PRISHTINË, 7 Korrik -Në Doganën e Kosovës u mbajt sot ceremonia e donacionit të 15 automjeteve nga misioni i EULEX-it.Ky donacion u dorëzua personalisht nga shefi i EULEX-it, Gabriele Meucci, ndërsa u pranua nga drejtori i përgjithshëm i Doganës së Kosovës, Lulzim Rafuna.
“Ky donacion do të na ndihmojë që të realizojmë në mënyrë efikase detyrat tona, këto vetura do të përdoren për ekipet antikontrabandë”, tha Rafuna.
Ai shtoi se, “pa dyshim që donacionet si këto ndihmojnë në arritjen e standardeve evropiane, në luftimin e evazionit fiskal dhe indirekt reflektojnë në më shumë të hyra për buxhetin e shtetit, që është edhe strategjia e qeverisë së Kosovës në luftimin e ekonomisë joformale”.
“Dogana e Kosovës ka bërë përpjekje të jashtëzakonshme që të përmirësoj proceset dhe luftoj korrupsionin, ka treguar që është lidere në rajon”, theksoi shefi i EULEX, Meucci./B.J/
Procedohen tre edukatoret e jetimores në Shkodër, dhunonin fëmijët nën kujdestari
Ne Foto:Debati per skandalin ne komisionin parlamentar. Vokshi, debat me Spahiun/
Një ngjarje shokuese ka ndodhur në jetimoren e Shkodrës. Tre edukatore janë filmuar nga kamera amatore duke dhunuar fëmijët nën kujdestari.
I menjëhershëm ka qenë reagimi i Policisë së Shkodrës, që ka proceduar penalisht kujdestaret në fjalë. Kështu, pas publikimit të video-skandalit në një media audio-vizive në vend, Policia e Shkodrës ka shoqëruar edukatoret në komisariat, duke i marrë në pyetje dhe duke nisur proçedimin penal ndaj tyre.
Edvana Sulaj, Manjola Banisha dhe Albert Rekaj janë shoqëruar në komisariatin e policisë së Shkodrës. Kallëzimi ndaj punonjësve të cilët me gjakftohtësi dhunojnë jetimët e vegjël në moshë është bërë nga vetë drejtoresha e jetimores.
Ndërkaq, ditën e sotme, është nisur drejt Shtëpisë së Fëmijës Shkodër një grup i specializuar ekspertësh psikologë dhe punonjësish socialë, të cilët do të bëjnë një vlerësim më të plotë të situatës, jo vetëm për fëmijët e dhunuar, por edhe tek fëmijët e tjerë të qendrës.
Grupi i specializuar i ekspertëve jo vetëm do të vlerësojnë situatën por edhe do të kontrollojnë dhe vlerësojnë të gjithë stafin që përkujdeset për fëmijët në Shtëpitë e Fëmijës në rang Republike, pavarësisht asistencës sistematike që është dhënë në këtë drejtim nga ekspertët më të mirë vendas e të huaj përgjatë dy viteve të fundit.
Sakaq, Ministri Klosi i kërkon oganeve hetimore zbardhjen e menjëhershme të këtij akti skandaloz dhe organeve gjyqësore dënimin më shembullor të përgjegjësve për këtë akt të neveritshëm.
“Arti i rrugës” – “The Huffington Post” përfshin edhe Shqipërinë
Duket se arti i bashkon të gjithë shtetet, duke nisur nga vëndet më pak të populluara e të zhvilluara deri tek ato që njihen si superfuqi botërore.
Po flasim për atë që njihet si “arti i rrugës”, i cili gjen kudo ambjentin për tu shfaqur, ndonëse në vëndet e vogla nuk është aq i zhvilluar sa në vëndet e mëdha e të urbanizuara.
Është “The Huffington Post” i cili ka paraqitur në faqen e tij, një galeri fotosh nga vënde të ndryshme të botës, ku shpaloset ky lloj arti, mes të cilëve është edhe Shqipëria.
Në këtë galeri fotosh , janë 196 vënde nga të gjithë skajet e botës, ndër të cilët Afganistani, Argjentina, Australia, Bangladeshi , Belgjika, Kanadaja e plot vënde të tjera, të cilat në një farë mënyrë duket sikur nëpërmjet kësaj forme të të shprehurit, shpalosin edhe kulturën e vëndit të tyre.
uket se ky lloj arti gjen hapësirë për tu shfaqur nga njëri cep i botës në tjetrin.
Ndonëse disa vënde janë më të njohura për mbarë botën, arti duket se është ende diçka që na lidh së bashku, pa marrë parasysh dallimet tona dhe madhësinë e vëndit ku jetojmë.
Ky lloj arti duket se vjen më afër popujve, një mënyrë kjo për të bashkuar ato e për ti bërë më të kuptueshëm ndaj njëri-tjetrit.
Një mënyrë kjo për të treguar se ndonëse ka dallime mes popujve, të gjithë e pëqejnë të bukurën, të gjithë e pëlqejnë artin, e lehtësisht mund të gjenden gjëra që na bashkojnë
Kosove, Shkarkimet përplasin Qeverinë me Zyrën e BE-së
Shkarkimet dhe emërimet e reja në sektorin e resurseve njerëzore dhe në administratën brenda Ministrisë së Tregtisë dhe Industrisë në Kosovë, kanë nxitur reagime në zyrën e Bashkimit Evropian në Kosovë.
Shefi i zyrës së BE-së në Prishtinë, Samuel Zhbogar, ka kritikuar ministren Hikmete Bajrami se ka larguar nga puna njerëz profesionistë me performancë të shkëlqyeshme.
Për më shumë, ai ka theksuar se me këto veprime, ministrja Bajrami ka rrezikuar edhe mbarëvajtjen e procesit të negociatave për Marrëveshjen e Stabilizim Asociimit dhe proceset e tjera të integrimeve evropiane në të cilat gjendet Kosova.
“Bashkimi Evropian është jashtëzakonisht i shqetësuar për këtë rrjedhë të ngjarjeve e cila jo vetëm që vë në pikëpyetje aftësinë e Ministrisë së Tregtisë dhe Industrisë për qëndrueshmërinë dhe implementimin e projekteve për të cilat jemi dakorduar, por gjithashtu vë në pikëpyetje hyrjen në fuqi të Marrëveshjes së Stabilizim-Asociimit”, thuhet në letrën e Samuel Zbogar dërguar ministres së Tregtisë dhe Industrisë Hikmete Bajrami.
Këtyre kritikave iu është përgjigjur ministrja e Tregtisë dhe Industrisë Hikmete Bajrami, duke thënë se me këto veprime po lufton korrupsionin në ministri.
“Asnjë presion, asnjë shantazh, asnjë kërcënim, asnjë veprim i kujtdo qoftë nuk më largon nga ideja për t’i ndalë keqpërdorimet, krimin, korrupsionin edhe të njerëzve që janë të lidhur me çfarëdo faktori vendor apo ndërkombëtar”, ka theksuar Bajrami.
Shkarkimet dhe emërimet e reja në sektorin e resurseve njerëzore dhe në administratën e Ministrisë së Tregtisë dhe Industrisë po kritikohen edhe nga përfaqësues të shoqërisë civile dhe ish ministri i Tregtisë dhe Industrisë Bujar Dugolli.
Ish ministri Dugolli në një prononcim për Radion Evropa e Lirë ka theksuar se këto ndërrime që po bëhen po dëmtojnë proceset ekonomike.
Ai ka kujtuar se në këtë ministri vazhdimisht ka pasur ndërrim të pozitave, varësisht nga partia e cila ka udhëhequr me këtë dikaster.
“Në kohën kur kam qenë ministër më ndihmën e donatorëve ndërkombëtarë kemi kualifikuar dhe aftësuar stafin që të jenë adekuat për çështje të ndryshe që janë në domenin e Ministrisë së Tregtisë dhe Industrisë. Por, me ndërrimin e pushtetit vjen ministri pasues dhe i largon nga detyra ata njerëz të cilin ishin profesionistë e që ne kishim investuar në përgatitjen e tyre, dhe ky trend vazhdojë edhe me ministrat tjerë të kësaj ministrie”, tregon Dugolli.
Dugolli kujton se që nga viti 2004 deri në vitin 2008 shumë kuadro ishin përgatitur për të kryer punë të rëndësishme në Ministrinë e Tregtisë dhe Industrisë që shumë prej këtyre personave më janë më pjesë e kësaj ministrie.
“Në rast se po bëhen emërimet e reja dhe shkarkimet për të rehatuar militantët partiak është një gjë e gabuar dhe shumë e dëmshme për shtetin, por që nëse ndodh si rezultat i performancës së dobët ose aferave korruptive unë mendojë se askush nuk duhet t’i mbrojë ata as komuniteti ndërkombëtarë por as edhe zyrtarët qeveritarë”, shton Dugolli.
Përfaqësues të shoqërisë civile, në anën tjetër e kanë quajtur të pakuptimt ndërhyrjen e shefit të zyrës së BE-së në Prishtinë, në punët e ministres Bajrami.
“Zhbogar nuk do të duhej të ndërhynte në këtë mënyrë tek disa vendime brenda Ministrisë së Tregtisë nga ana e ministres Bajrami, pasi që nuk besoj që Zhbogar e njeh më mirë administratën brenda sesa vet ministrja”, ka theksuar Petrit Zogaj nga Lëvzija Fol.
Megjithatë, Zogaj ka kërkuar nga ministrja Bajrami që nëse ajo po deklarohet se me këto vendime të shkarkimeve dhe emërimeve të reja po lufton korrupsionin, të tregon ne detaje se për çfarë vepra të korrupsionit bëhet fjalë dhe se kush janë ata persona.(Luljeta Krasniqi-Veseli)
Jo-ja nuk është fjala e fundit
Pas dorëheqjes së Ministrit të Financave Varoufakis Greqia kërkon një fillim të ri në negociatat me kredidhënësit. Por pozicionet janë ngurtësuar./
Nga Jani Padimitriou/
Që dy orë pas mbylljes së lokaleve të zgjedhjeve ishte e qartë: në bazë të rezultateve paraprake të Ministrisë së Brendshme të Athinës, në këtë kohë kampi-Jo ndodhej me 61 përqind të votave shumë përpara dhe mori thuajse në çdo zonë elektorale shumicën e votave.
Pasoi një festë në qendrën e Athinës të mbështetësve të Jo-së, deri në orët e para të mëngjesit. Kjo në një kohë kur të gjitha sondazhet e ditëve të fundit patën sugjeruar një garë kokë më kokë. Kryeministri Alexis Tsipras, i cili e thirri referendumin për propozimet e kursimit duket më i fortë në pozicionin e tij.
Numri i nevojshëm i pjesëmarrësve, prej 40 përqind që referendumi të shpallej i vlefshëm, u tejkalua mjaft me shifrën 65 përqind. “Edhe vetëm pjesëmarrja e madhe e njerëzve e largon çdo dyshim për ligjshmërinë e referendumit”, deklaron Nikos Filis, zëdhënës i Grupit Parlamentar të partisë së majtë Syriza, në intervistë me televizionin grek Mega.
Arsyeja për këtë deklaratë: të gjithë gjykatësit kushtetues dhe jo së fundi Këshilli i Evropës patën shprehur para referendumit dyshim nëse referendumi ishte në përputhje me ligjet – para së gjithash për shkak të pyetjeve të paqarta dhe shumë komplekse, si dhe kohës jashtëzakonisht të shkurtër të fushatës elektorale.
Pas fitores së qartë të papritur të kampit-Po, në shtypin e Athinës janë shtuar spekulimet për një Grexit, për daljen e Greqisë nga Eurozona. “Dakordim ose Grexit” është pyetja që shtrohet tani e tutje, bën të ditur gazeta ekonomike liberale Kathimerini. “Reforma ose Grexit”, është titulli i shkrimit të gazetës Ta Nea. Një interpretim tjetër bën Avgi, gazeta partiake e të Majtëve grekë: “61 përqind i thonë jo politikës së rreptë të kursimeve.”
“Populli ynë mund të rezistojë”
Megjithë reagimet e ashpra nga vendet e BE, qeveria Tsipras e kupton referendumin jo si një fund, përkundrazi, si një fillim të ri të negociatave me kredidhënësit. “Ne punojmë që të arrijmë një dakordim. Populli ynë ka treguar se ai mund të rezistojë”, deklaroi Ministri i Brendshëm, Nikos Voutsis të dielën në një intervistë televizive.
Dhe shtoi: “Një javë të tërë duruan njerëzit në Greqi, me siguri që do të durojnë edhe disa ditë më shumë”, një aludim për mbylljen e bankave me urdhër të qeverisë të hënën e kaluar (29.6.), hap që ndoshta, në mungesë ta parave do të zgjatet.
Ekonomisti Kostas Stoupas beson se qeveria greke ndodhet në një rrugë pa krye dhe do të konfrontohet me pasoja të pakontrollueshme javët dhe muajt e ardhshëm për shkak të mbylljes së bankave. Sipas mendimit të tij kërcënon zvarritja e pagesave në shërbimet publike, si dhe mungesë ushqimesh, medikamentesh dhe e benzinës. Stoupas është i sigurtë: “Fitorja e Jo-së në referendum e vështirëson pozicionin e negociatave të Greqisë.”
Kthim në tryezën e negociatave
Qeveria e Athinës e sheh këtë ndryshe: përfundimi i referendumit nuk është porosi për t’u prishur me donatorët, deklaroi Kryeministri Tsipras në një fjalim televiziv të dielën në darkë. Ka padyshim zgjidhje të qendrueshme, megjithatë me kredidhënësit duhet folur edhe për një ristrukturim të borxheve greke.
Vetëm pas referendumit grek nis “pjesa substanciale e negociatave”, tha zëdhënësi i qeverisë, Gavriil Sakellaridis. Prej kohësh kryeministri Tsipras ka premtuar se do të arrihet një dakordim me donatorët “brenda 48 orëve pas referendumit”.
Disfata e papritur e rëndë e kampit të Po-së ka pasoja jo së fundi edhe për opozitën në Athinë: para një takimi krize të të gjithë drejtuesve të partive me Presidentin e shtetit Prokopis Pavlopoulos të hënën (06.07.) dha dorëheqjen udhëheqësi i opozitës konservatore dhe ish-kryeministri Antonis Samaras. Kryetar i ri i përkohshëm i partisë do të bëhet ish-Presidenti i Parlamentit Vangelis Meimarakis, i cili i ka kërkuar Kryeministrit Tsipras ta realizojë tani premtimin për “dakordim brenda 48 orësh.”