3 persona kanë humbur jetën si pasojë e motit të keq në të gjithë vendin. Mësohet se babë e bijë humbën jetën në qendër të Laçit pasi makina me të cilën udhëtonin e ka marrë rrjedha e ujit, ndërsa në Kurbin si pasojë e shembjes së një ure ka humbur jetën 22 vjeçari.
Në Laç Gjon Kola, ish drejtor shkolle është nxjerrë i pajetë nga makina ndërsa vijojnë kërkimet për vajzën e tij, të cilën e ka marrë rrjedha e ujit.
Në fshatin Skuraj të Kurbinit si pasojë e shembjes së një ure ka humbur jetën 22-vjeçari Liman Balluku, të cilin e ka marrë rrjedha e ujit, ndërsa vijojnë hetimet për gjetjen e trupit.
Menjëherë pas gjendjes së krijuar nga reshjet e dendura të shiut në disa zona të vendit, nën drejtimin e Zëvendëskryeministrit Niko Peleshi, u mblodh grupi koordinator në Kryeministri, i cili po ndjek situatën në mënyrë të vazhdueshme.
Në përbërje të grupit janë: Ministri i Punëve të Brendshme; Ministri i Energjisë dhe Industrisë; Ministrja e Mbrojtjes; Ministri i Bujqësisë dhe Ministri i Shëndetësisë. Prej disa orësh, në zonat e rënduara si pasojë e reshjeve të forta ndodhet Ministri i Bujqësisë, i cili po ndjek situatën në terren.
Gjithashtu, në terren janë angazhuar forca dhe mjete logjistike të Ushtrisë, për t’i ardhur në ndihmë shtabeve të emergjencave civile të ngritura në çdo qark.
Grupi koordinator po monitoron orë pas ore të dhënat e ardhura nga të gjitha shtabet e emergjencave civile të çdo qarku dhe siguron qytetarët e zonave të prekura që janë ndërmarrë të gjitha masat e duhura, për të përballuar çdo situat eventuale.
Prifti katolik Shqiptar Dom Gjergj Meta foli në Uashington DC.
Nga Merita B McCormack/
Uashington DC- Fundjava e datave 14, 15 dhe 16 Nëntor 2014 do të mbetet e paharruar në kujtesën e shumë Shqiptaro-Amerikanëve dhe shumë Amerikanëve që patën fatin e mirë të takohen dhe të mësojnë për historinë e Shqipërisë, për të kaluarën jo shumë të largët, për martirët, për faljen e pajtimin, si dhe për shpresën e së ardhmes.
Fundjava filloi me takimin në Bibliotekën e Kongresit Amerikan, Divizioni Europian. Pjesëmarrësit ishin të fushave të ndryshme, duke përfshirë Diplomatë Amerikanë që përgatiten të shkojnë për të punuar në ambasadat Amerikane në Shqipëri e Kosovë, shkollarë, studjues amerikanë, këshilltarë nga Komisioni i Lartë i Helsinkit për të Drejtat e Njeriut si dhe shqiptaro amerikanë që jetojnë e punojnë në Uashington DC.
Merrnin pjesë edhe shkëlqesia e tij Ambasadori Fuqiplotë i Republikës së Shqipërisë në Uashington DC Z.Gilbert Galanxhi dhe zonja e tij Eva, Znj. Mamica Toska, Ministre Fuqiplotë e Ambasadës Shqiptare në Uashingtn DC, Z. Sami Kastrati, Zv.Ambasador i Republikës së Kosovës në Uashington DC, Znj.Daniela Kristo-Nesho, Konsulle e Republikës së Shqipërisë në Uashington DC. Në takim mori pjesë edhe Dr.Gjon Buçaj, President i Federatës pan -shqiptare të Amerikës “VATRA” dhe vatranë nga Uashingtoni. Aida dhe Gjergj Balaj, çifti nga Nju Jorku, ishin shoqëruesit e Dom Gjergjit në gjithë këtë fundjavë dhe fotot janë kortezi e tyre.
Nisur nga suksesi i vizitës papnore në Shqipëri, Dom Gjergj Meta ishte i ftuar nga Divizioni Europian në Bibliotekën e Kongresit Amerikan dhe ai bëri një prezantim të shkëlqyer lidhur me motivet e vizitës së Atit të Shenjtë, me mesazhet që ai përcolli dhe me homazhet që ai bëri. Bashkëorganizatore e aktiviteteve në DC për Dom Gjergjin ishte edhe Dega e Vatrës për Uashington DC.
Dom Gjergji e paraqiti prezantimin e tij në gjuhën angleze duke kapur tre aspekte kryesore të cilat ai i përmblodhi në temën domethënëse: “ Mbi krahët e shqiponjës: “Triptiku i një udhëtimi apostolik: Martirizimi, Bashkejetesa dhe Shpresa ne Shqiperi”
Prezantimin e hapi Drejtori i Divizionit Europian dhe njëkohësisht edhe kreu i Koleksionit të librave e materialeve në gjuhën shqipe në Bibliotekën e Kongresit Amerikan, Z.Grant Harris. Para se ta prezantonte Dom Gjergjin, Z.Harris vuri në dukje se organizatorëve iu desh të ndërronin sallën e takimit për shkak të numrit të shumtë të pjesëmarrësve, gjë që nuk kishte ndodhur asnjëherë më parë. Kjo, tha ai, tregon se ka shumë interes për temën dhe ligjeruesin. Prezantimi i Dom Gjergjit u prit me shumë interes dhe vemendje nga audienca. Përmbajtja e ligjeratës ishte tejet e pasur, informative, edukative dhe e shëndoshë teologjikisht e filozofikisht. Elokuenca dhe anglishtja e Dom Gjergjit shtuan në bukurinë e lehtësinë e përcjelljes së mesazhit dhe në absorbimin e tij nga të pranishmit. Kjo u duk qartë edhe nga pyetjet e shumta që iu bënë Dom Gjergjit dhe nga shoqërimi disa orësh për drekë që iu bë atij nga një grup i madh pjesëmarrësish në drekën pas takimit.
Eshtë për të theksuar se prezantimi ishte i balancuar, i preku të gjitha aspektet e jetës shqiptare dhe Dom Gjergji foli jo vetem si prift katolik e për probleme pastorale lidhur me kishën dhe besimtarët katolike, por edhe si një shqiptar që mbart me vete shqetësimin kombëtar për çështje që kanë të bëjnë me shoqërinë shqiptare në të kaluarën dhe në ditët tona. Ai theksoi se kujtesa dhe falja janë dy gjëra që shkojnë krah për krahu dhe duhen bërë të balancuara e të jenë procese produktive. Duke u folur pjesëmarrësve e sidomos duke iu drejtuar në veçanti diplomatëve të ardhshëm të ambasadës amerikane në Tiranë në Uashington DC për vizitën e Papës në Shqipëri në pjesën: Martirizimi: kujtesë dhe falje, Dom Gjergj Meta tha se:
“E kaluara nuk mund dhe nuk duhet të harrohet. Ajo duhet t’u mësohet brezave të rinj, ashtu sikurse ka qenë, pa deformime apo zbutje. Për fat të keq, ka sot në Shqipëri edhe akademikë e njerëz të shkencave historike që duan të rivendosin në panteon apo të rivlerësojnë figura kriminale, që gjatë komunizmit kanë vrarë ata vetë e kanë dhënë urdhër të vriten njerëz të pafajshëm. Ky gjest rehabilitimi në vetvete është kriminal. I ngjan fort negacionizimit të shoahut të Luftës së Dytë Botërore. Një shoqëri e lirë dhe demokratike nuk mund t’ia lejojë vetes këtë gjë. Është e rëndësishme të kujtojmë për të mos harruar, se ndryshe mund të përsërisim.”
Dom Gjergji referoi në anglisht, ndërsa pyetjeve iu pergjigj në shqip. Shumë dilomatë amerikane bënë gjithashtu pyetje në shqip. Perkthimin e përgjigjeve nga shqipja në anglisht e bëri Nesti Gjeluci, Shqiptaro-Amerikan në Uashington DC.
Pas takimit mbresëlenës në Bibliotekën e Kongresit dhe drekës në ato ambjente, Dom Gjergji pati një tur privat të koleksioneve shqipe aty.
Darka e bollshme për të nderuar Dom Gjergjin si mysafir i veçantë ndër shqiptarët në Uashington u sponsorizua nga disa familje Shqiptaro-Amerikane vatrane, dhe u mbajt në shtëpinë e Eduard dhe Dana Buçajt. Aty merrni pjese klerikë, diplomatë e shkollarë, besimtarë e adhurues të Zotit.
Disa priftërinj nga Dioqeza e Arlingtonit ishin pjesëmarres dhe aty u shfaq edhe një dokumentar i shkurtër, dëshmia e Dom Ernest Troshanit, dhënë më 21 Shtator 2014, para Papa Franceskos në Katedralen e Shën Palit në Tiranë. Kjo dëshmi ishte në gjuhën angleze dhe e lehtësoi komunikimin. Në atë mbrëmje iu bënë disa pyetje Dom Gjergjit sërish dhe ai iu përgjigj si zakonisht, duke folur të vërtetën dhe duke e përcjellë atë me bukurinë e fjalës shqipe. Enkelejda Shtjefni, një vajzë shqiptare e porsa mberritur ne Amerike, bëri një perkthim fantastik për atë mbrëmje.
E nesermja, e shtuna e datës 15 nëntor filloi herët. I shoqëruar nga çifti simpatik Aida dhe Gjergji Balaj, Dom Gjergji udhëtoi në Virxhinian e Veriut, ku bëri koncelebrim të Meshës së Shenjtë në Kishën e Shën Gjonit të Dashur në qytetin Meklejn , Virxhinia, afër Uashingtonit, famulli e Dioqezës së Arlingtonit dhe ku jetojnë edhe disa familje me origjinë shqiptare.
Pas Meshës aty, Dom Gjergji u takua me meshtarë e besimtarë dhe bëri nje prezantim verbal dhe me DVD lidhur me martirët shqiptarë, faljen, pajtimin dhe kërcënimin e lirive themelore te njeriut në ditët e sotme.
Ai bëri edhe një prezantim te shkurter viziv te kishës se Shën Luçisë ku ai është famulltar.
Meshtarët e kishës se Shën Gjonit dhe besimttarët e kësaj famullie e pritën shumë ngrohtë dhe e mbushën sallën e konferencave të kishës, aq sa disa pjesemarrës që nuk gjenin dot vend ku te uleshin, qëndruan më këmbë.
Besimtarët pjesemarrës në prezantim, të prekur nga historitë e treguara dhe duke parë në video gjendjen e ndërtesës së kishës së Shën Luçisë dhe ndërtesat rreth saj, bënë ngadonjë dhurim personal të hollash, sipas mundësive, për Dom Gjergjin, i cili i falenderoi ata nga zemra dhe ne emër të besimtarëve të famullisë së tij. Ndërsa prezantimi u bë në gjuhën angleze, pyetjeve të pjesëmarrësve Dom Gjergji iu përgjigj në shqip. Ato pergjigje i përktheu në Anglisht sërish Nesti Gjeluci.
Pas këtij aktiviteti në Meklejn, Dom Gjergji, me ftesë të “Zërit të Amerikës”, seksioni shqip, vizitoi studjot e ketij insititucioni amerikan shoqëruar nga çifti Balaj dhe Rudina Dervishi, gazetarja e njohur e Zerit. Në orën 12 të ditës sipas orës së Uashingtonit, Dom Gjergji u intervistua nga gazetarja tjetër e njohur e Zërit të Amerikës Keida Kostreci, në programin e lajmeve “Ditari”
***
Pas intervistës Dom Gjergji pati një takim me disa amerikanë të interesuar për Shqipërinë, lirinë e besimit dhe fenë katolike në përgjithësi, të cilët e shoqëruan Dom Gjergjin edhe në Basilikën Mariane Kombëtare “The National Shrine of the Immacualte Conception” në DC, ku Dom Gjergji pati edhe një takim të këndshëm të rastit edhe me Kardinalin Timothy Dolan të Nju Jorkut, që ndodhej aty për një pelegrinazh një ditor me besimtarë nga Nju Jorku. Kardinali Dolan e përgëzoi Dom Gjergjin për veprimtarinë e tij në DC. Dom Gjergji vizitoi Basilikën tej e mbanë dhe bëri një lutje speciale edhe në kapelën ku gjendet mozaiku replikues i ikonës legjendare “Zonja e Këshillit të Mirë” (Zoja e Shkodrës).
Darka atë mbrëmje u bë në një restorant në Uashington DC, ku të pranishmit falenderuan Dom Gjergjin për vizitën dhe i uruan atij suksese.
Të nesërmen , të Dielën më 16 Nëntor, Dom Gjergji, koncelebroi Meshën e Shenjtë të së Dielës dhe u takua me shumë meshtarë e besimtarë të tjerë në kishën e Shën Gjonit të Dashur, dhe kështu përfundoi këtë vizitë tre ditore në kryeqytetin amerikan. Besimtarë nga kjo famulli i dhuruan Dom Gjergjit për përdorim personal një replikë të krucikifsit të kishës së tyre si kujtim për të mbajtur mend dashurinë e madhe qe Zoti ka për njeriun, aq sa flijoi birin e tij per të na shpëtuar ne, krijesat e tij. Dom Gjergji u largua nga DC në mesditën e së dielës.
Rrjeti i Bizneseve të Diasporës në SHBA u takua në “FIORINO”
Nga Beqir SINA/
SUMMIT NEW JERSEY: Unioni i Rrjeteve të Biznesit të Diasporës për Amerikën e Veriut dhe Kanada, dega e saj në Nju Jork – u takua me një grup të biznesmenëve amerikano shqiptarë, që kanë vite, duke ushtruar bizneset e tyre në Shtetet e Bashkuara në një takim të ashtuquajtur “B&B – Business and Businessman”. Takimi u organizua ne fundjave në restorantin e njohur “Fiorino”, në Nju Xhersi, me pronar vatranin e përkushtuar z. Sabit Bytyçi .
Takimin e organizoi në bashkëpunim Oda Amerikane e Tregëtisë në Kosovë dhe Kombet e Bashkuara, Arian Zeka Drejtor Ekzekutiv, Visar Sahatciu kordinator për SHBA- Naim Dedushaj nga drejtoria e Departamentit të Investimeve, në Kosovë, së bashku me bordin e degës së Tri-Shtetshit (NY-NJ-CT) së së Unionit të Rrjeteve të Biznesit të Diasporës për Amerikën e Veriut dhe Kanada, zotin Elmi Berisha.
Këto takime u tha se po mbahen me qëllim që nga Shtetet e Bashkuara të Amerikës, të ri-lëvizë, “mekanizmi”, i biznesve për investimet e mundshme në mbështetje dhe rimëkëmbje të ekonomisë së Kosovës edhe pse Kosova tash pesë muaj është e përfshirë në një ngërç të “ngatërruar” politik.
Në këtë kuadër kanë ardhur në SHBA – një grup i biznesmenëve nga Kosova – të cilët kanë në axhendën e tyre takime me bizneset nga Shtetet e Bashkuar të Amerikës, në kryeqendrat shqiptare, New York, Detroit, Chicago dhe Dallas, për të shikuar mundësitë e tyre, për investimet të drejtëpërdrejta nga diaspora në Republikën e Kosovës, e për rreth saj.
Këto takime nisën dje më 15 nëntor 2014, ku mori pjesë edhe konsullja e përgjithshme e Republikës së Kosovës në New York, zonjusha Vlora Çitaku, ish kryetari i Pejës, z. Ali Lajçi dhe një grup veprimtarësh dhe biznesmenësh të suksesshëm shqiptaro amerikan – të cilët kan investuar prej vitesh në Kosovë,si; Harry Bajraktari, Gjok Deçkaj, Elmi Berisha, Besim Malota, Arben Krasniqi, Ramiz Muja e të tjerë.
Në mesin e pjesëmarrësve ishin edhe biznesmenë amerikanë të cilët kanë bizneset e tyre të lidhura me biznesmenë shqiptar në SHBA, dhe dëshirojnë të investojnë edhe në Kosovë.
Takim e hapi me një fjalë përshëndetëse, zyrtari nga Ministira e Diasporës zoti Naim Dedushaj, drejtor i Departamentit të Investimeve,
Përfaqësuesja diplomatike e Kosovës në New York, Vlora Çitaku foli për rëndësinë e investimeve nga diaspora dhe rëndësinë jetike që kanë ato për Kosovën si i ri.
“Ne kemi nevojë për ndihmën tuaj – që ta zhvillojmë Kosovën, që bashkë me ju të ndërtojë ato urat e bashkëpunimit mes komunitetit të bisnesit në Kosovë dhe komunitetit të bisnesit në SHBA- në mënyrë që të ketë sa më shumë investime dhe sa më shumë zhvillim për qytetarët tanë atje, të cilat në fund-të fundit sjellin përfitime të ndërsjellta”., tha ndër të tjera ajo.
Ajo e quajti nismën e Prishtinës si një kthesë të rëndësishme “në ri-fokusimin e një potenciali të jashtëzakonëshëm, që e kemi në diasporën tonë këtu në Shtetet e Bashkuara të Amerikës, në kontekst të investimeve në Republikën e Kosovës, por edhe në Shqipëri, dhe vendbanimet shqiptare në Ballkan”
Vlora Çitaku nënvizoi gjithashtu se investimet nga SHBA sjellin me vete edhe një kulturë dhe mentalitet pune që i mungon në një pjesë të madhe Kosovës së sotme, duke luajtur kështu edhe një rol edukues. “Nuk duhet harruar se Kosova nuk ka shumë trashëgmni në këtë fushë pikërisht për shkak të kontekstit të saj historik, andaj për këtë arsye, roli i juaj është jashtëzakonisht i rëndësishëm.”, u shpreh Çitaku.
Kryetari i degës së Tri-Shteshtit, nga Unioni i Rrjeteve të Biznesit të Diasporës për Amerikën e Veriut dhe Kanada, zoti Elmi Berisha, theksoi se: “Ky projekt madhor ka për qëllim krijimin dhe forcimin e lidhjeve të biznesit mes biznesmenëve të Diasporës, jo vetëm duke inkurajuar por edhe duke nxitur kështu edhe investimet e tyre, në vendet tona, pra në vend origjinën tonë”.
“Unë besoj se suksesi i të ardhmes ekonomike të Kosovës dhe visve shqiptare, apo edhe shtetit mëmë, Shqipërisë varet nga lidhjet me diasporën shqiptare në Europë, SHBA dhe Azi. Prandaj, edhe kjo inisiativë po gjen përkrahje nga një numër i madh biznessmenësh të suskseshëm shqiptaro amerikanë që medeomos do ta marrin me përkushtim e seriozitet për t’ia dalë mbanë”, tha Elmi Berisha.
Takimi i radhës në axhendën e takimeve me biznesmenët shqiptarë në Amerikën e Veriut do të mbahet sot në Dallas, Teksas ku jeton dhe ushtron biznesin e tij kryetari i Unionit Global të Rrjeteve të Bizneseve të Diasporës për Amerikën e Veriut dhe Kanada, veprimtari dhe biznesmeni i dalluar Nazar Mehmeti.
TË DREJTAT E NJERIUT DHE POLITIKA E JASHTME
Nga Frank Shkreli/
Shtetet e Bashkuara dhe aleatët e tyre perëndimorë për një kohë të gjatë e kanë konsideruar mbështetjen dhe mbrojtjen e të drejtave të njeriut dhe të demokracisë si një pjesë të pandarë të politikës së tyre të jashtme. Sidomos, Shtetet e Bashkuara e kanë promovuar mbështetjen e tyre ndaj të drejtave të njeriut kudo në botë, si një pjesë thelbësore të politikës së jashtme amerikane, në përputhje jo vetëm me Kushtetutën e Amerikës por edhe me Deklaratën Universale të Drejtave të Njeriut. Shtetet e Bashkuara kanë mbajtur qendrimin se mbështetja ndaj demokracisë dhe të drejtave të njeriut kudo në botë, “ndihmon në sigurimin e paqës, ndalon agresionin, promovon zbatimin e ligjit, lufton krimin dhe korrupsionin, forcon demokracitë dhe parandalon krizat humanitare.” Si e tillë, mbrojta e të drejtave të njeriut kudo, është konsideruar gjatë dekadave të kaluara si një politikë me rëndësi e interesit kombëtar për Shtetet e Bashkuara. Por ishte Presidenti Xhimi Karter ai i cili në vitin 1976 e ritheksoi këtë angazhim të Amerikës në mbrojtje të të drejtave të njeriut duke e bërë këtë pjesë të pandarë të politikës së jashtme të administratës së tij. Ish-Presidenti Karter besonte se politika e jashtme e Shteteve të Bashkuara duhej të pasqyronte, mbi të gjitha, parimet më të larta morale të kombit amerikan. Duke njoftuar angazhimin e tij në mbrojtje të të drejtave të njeriut anë e mbanë botës e sidomos në ish-vendet komuniste, Presidenti Karter kritikoi politikënamerikane tëndjekur deri atëherë, duke thënë se “Për shumë vite kemi qenë të gatëshëm të pranojmë parimet dhe taktikat e gabuara të kundërshtarëve tanë, nganjëherë edhe duke hequr dorë nga parimet tona në favor të parimeve të tyre”, në kundërshtim të dukshëm me parimet tona në mbështetje të të drejtave të njeriut. Presidenti Karter e pat përcaktuar qartë politikën e jashtme që do të ndqite administrata e tij në marrëdhënjet amerikane si me aleatët ashtu edhe me kundërshtarët. “Politika jonë bazohet në një vizionhistorik të rolit të Amerikës në botë.Politika jonë rrjedhë nga një pikëpamje më e gjërë e ndryshimeve në botë.Politika jonë i ka rrënjët në vlerat tona morale, të cilat nuk ndryshojnë kurrë.Kjo politikë mbështetet nga pasuria materiale dhe në fuqinë ushtarake.Kjo politikë ka për qëllim t’i shërbejë botës”, ka deklaruar ish presidenti Karter.
Politika e re e Presidentit Karter në mbështetje të të drejtave të njeriut dhe demokracisë anë e mbanë botës, çoi në vendimin që mori Kongresi amerikan më 1976, për t’i kërkuar Departmentit amerikan të Shtetit “një raport të plotë vjetor “, që tani njhet si “Raporti mbi të Drejtat e Njeriut në Botë”e që botohet çdo vit dhe i cili pasqyron gjëndjen e të drejtave të njeriut në çdo vend të botës.
Në mbështetje të të drejtave të njeriut anë e mbanë botës, Shtetet e Bashkuara historikisht kanë bashkrenduar politikën dhe veprimtaritë e tyre në këtë fushë, me aleatët e tyre me rëndësi, përfshirë Bashkimin Europian dhe organizata të ndryshme ndërkombëtare dhe rajonale, përfshirë edhe Kombet e Bashkuara.
Mirëpo, Freedom House, një organizatë e pavarur që monitoron gjëndjen e lirisë dhe të të drejtave të njeriut në botë dhe e cila mbështetë ndryshimet demokratike kudo –në një raport të ri të botuar javën që kaloi –kritikon Shtetet e Bashkuara, Europën dhe vende të tjera se nuk po bëjnë sa duhet dhe sa munden në mbështetje të demokracisë anë e mbanë botës.Sipas raportit të javës që shkoi të Freedom House, “Demokracitë kryesore të botës nuk kanë dhënë prova se po i përgjigjen seriozisht rritjes dhe shtrirjes së autoritarizmit në rajonet e tyre”. Sipas një njoftimi për median nga Freedom House, në raport thuhet se “Shtetet e Bashkuara, Europa dhe demokracitë e reja shpeshëherë dështojnë që të ballafaqohen me rastet e shumëta të shtypjeve politike në rajonet e tyre të influencës. Mos vullneti për t’u përballur me shkeljet dhe abuzimet e të drejtave të njeriut, me raste të shtypjes së shoqërisë civile, me kufizimet dhe pengesat ndaj lirisë së medias dhe masa të tjera anti-demokratike – po vihet re në një periudhë ndërsa janë duke u shtuar sfidat ndaj insitucioneve demokratike nga fuqitë autoritare në zonën e Euro-Azisë, në Lindjen e Mesme, në Kinë dhe gjetiu”, thuhet në raportin e Freedom House.
Në raportine titulluar,“Në Mbështetje të Demokracisë në Botë: Një Vlerësim i Fuqive Kryesore”, thuhet se ndër 10 vendet më me rëndësi në botë, përfshirë Bashkimin Europian, nuk tregojnë asnjë kujdes ndaj abuzimeve të të drejtave të njeriut në rajonet e tyre dhe nuk kundërshtojnë autoritarizmin në rritje. Ndër vendet kryesore demokratike të botës, sipas raportit, vetëm Shtetet e Bashkuara kanë dhënë një ndihmesë modeste në mbështetje të demokracisë dhe të të drejtave të njeriut.
“Vetëm disa vende kryesore demokratike, në mënyrë të vazhdueshme, mbajnë një qëdrim të prerë në mbrojtje të vlerave të veta në vendet përtej kufijve të tyre”, pohoi drejtoresha e raportit në fjalë, Sarah Repucci.Ajo u bëri thirrje vendeve kryesore demokratike që të tregohen më të angazhuara dhe më të kujdesshme në mbështetje të demokracisë dhe të drejtave të njeriut, “Në një kohë që diktaturat dhe diktatorët po shtojnë influencat e tyre anë e mbanë botës”, theksoi ajo dke shtuar se, “demokracitë e mëdha duhet të tregojnë një interesim më të madh ndaj vendeve ku demokracia dhe mbështetsit e saj kërcënohen më së shumti.Kjo vlenëveçanërisht kur aktet shtypëse dhe shkeljet flagrante ndaj të drejatve të njeriut janë në rritje e sipër, sidomos në vendet fqinjetë një vendi demokratik.” Në lidhje me Kinën, drejtoresha e raportit të Freedom House, u bëri thirrje vendeve demokratike që të punojnë së bashku për t’ju përgjigjur shkeljeve të të drejtave të njeriut dhe nismave anti-demokratike të udhëheqjes komuniste kineze dhe të mos shikojnë vetëm interesat e menjëhershme ekonomike dhe strategjike të tyre, në kurriz të të drejtave të njeriut të popullit kinez.
Raporti vjen në përfundim se ndonëse pothuaj të gjitha vendet për të cilat bëhet fjalë në raport japin ndihma të mëdha për zhvillimin e zgjedhjeve demokratike në vende të ndryshme, ato në përgjithësi pas zgjedhjeve sipas raportit, dështojnë të mbështesin dhe të promovojnë demokracinë dhe respektin për të drejtat e njeriut nepërmjet politikës së tyre tregtare dhe ekonomike.
Këtë muaj, gjermanët dhe bota festuan 25-vjetorin e shëmbjes së Murit të Berlinit, simbolit të shkeljes dhe të abuzimit me të drejtat e njeriut nga komunizmi ndërkombëtar që kishte skllavëruar gjysmën e Europës për pothuaj një çerek shekulli.Gjatë një ceremonie në përkujtim të këtij përvejtori, Kancelarja e Gjermanisë, Angela Merkel, deklaroi me këtë rast se shëmbja e Murit të Berlinit u jep shpresë edhe rajoneve të tjera të botës ku, “liria dhe të drejtat e njeriut vazhdojnë të kërcënohen dhe të shkelen”, tha ajo.Të hënën, në një fjalim që mbajti në Australi, kancelarja gjermane paralajmëroi se Rusia mund të përpiqet të prishë stabilitetin dhe sigurinë në zona të gjëra të Europës Lindore, nëqoftse Moska nuk sfidohet në Ukrainë. Kancelarja gjemrane tha se aneksimi i Krimesë nga Rusia dhe destabilizimi i Ukrainës tani, “venë në pikëpyetje të gjithë rendin e tanishëm paqësor në Europë.”Ajo paralajmëroi në fjalimin e saj në Australi, ku mori pjesë në mbledhjen e nivelit të lartë të G20, se “nuk kemi të bëjmë vetëm me Ukrainën. Por kemi të bëjmë me Moldovën, me Gjorgjinë dhe nëqoftse vazhdon ky trend, atëherë ne duhet të pyesim për Serbinë dhe pastaj do të detyrohemi të bëjmë pyetje se ç’bëhet me vendet e Ballkanit Perëndimor”, shtoi udhëheqsja gjermane.
Shqetësimi i kancelares gjermane duhet të merret seriozisht dhe paralajmërimi i saj duhet të shërbejë si një kambanë që duhet të dëgjohet si një paralajmërim për veprim të përbashkët nga të gjitha vendet demokratike të botës, para se të jetë vonë.Dhe në përputhje meraportin e Freedom House, botuar javën që kaloi, mbrojtja e të drejtave të njeriut dhe demokracisë në Europë dheanë e mbanë botës, nevojitë një bashkrendim më të madh midis vendeve kryesore demokratike për të kundërshtuar autoritarizmin në rritje e sipër dhe për t’u përballur me sfidat kërcënuese ndaj lirisë dhe demokracisë, madje edhe 25 vjetë pas shëmbjes së komunizmit në Europë.
MEDIAT TELEVIZIVE FYEN PËRVJETORIN E PUSHKATIMIT TE INTELEKTUALËVE TIRANAS
Nga Besim Ndregjoni/
70 vite ma parë, kur Lufta e Dytë Botërore po shkonte drejt fundit dhe diktatura naziste po mundej, e kur blloku antifashist botëror po triumfonte mbi këtë diktaturë, në Shqipëri forcat komuniste kishin marrë revanshin në emër të luftës për “çlirim” vrisnin intelektualë të pafajshëm vetëm se ata kishin mbaruar në Perëndim dhe ishin borgjez e antikomunist.. Cilët ishin 39 intelektualët? Ata ishin deputetë të shtetit shqiptar në vitet 1920-1922, inxhinier, gazetarë, profesor, teologë dhe ushtarakë studente. Ata ishin në Tiranë në profesionet e tyre, në shërbim të strukturave të shtetit shqiptar dhe jo në shërbim të pushtuesve. Ata nuk ishin pajtuar me pushtuesit. Ata i shërbenin shtetit të tyre. Edhe pse ishte luftë; ata ishin në shërbim të qytetarëve shqiptarë.
Ata ishin intelektualë të pavarur, që respektonin mendimin ndryshe dhe filozofia e tyre ishte që Shqipëria të ishte pjesë e bllokut të madh kundër nazizmit. Ata e respektonin filozofinë e demokracisë dhe ishin në luftë kundër diktaturës naziste, por jo për një luftë civile kundër patriotëve që kishin mendim ndryshe dhe nuk ishin dakord me ideologjinë e komunizmit. Këta intelektualë nuk kishin bërë thirrje që të luftoheshin forcat komuniste, por të bashkoheshin me forcat nacionaliste, që Shqipëria të ishte pjesë e bllokut antifashist. 1939 pushkët e para ishin të nacionalistëve patriot shqiptar me në krye trimin Abaz Kupi , ku ushtaraku mbretëror Mujo Ulqinaku do të vadiste tokën shqiptare me gjakun e tij duke u bërë dëshmori i parë antifashistë në europë, Asnje komuniste nuk ishte në at luftë… e kur familjet monarkiste internoheshin nga fashizmi asnje komunist apo familje e tyre nuk e internonte fashizmi…Vrasja e organizuar nga forcat komuniste ishte një skenar tipik terrorist që të ekzekutoheshin këta intelektualë. Pushkatimet u bënë në vende të caktuara, si hotel “Bristol”, Sharrë, Tufinë, Dajt, Rruga e Dibrës, te shkolla “Kristoforidhi”, Rruga e Kavajës dhe brenda periudhës 24 tetor-17 nëntor 1944. Të gjitha ekzekutimet u bënë gjatë natës dhe në mëngjes herët. Disa të tjerë i vranë sapo i nxirrnin nga dera e shtëpisë. Tirana kryeqyteti 24 vjecar përgjakej me gjakun e intelektualëve të pafajshëm. Vërtetimi i këtyre vrasjeve dokumentohet në veprën e diktatorit Enver Hoxha, i cili shkruan: “Kur qeveria ishte në Berat, më vjen Sejfulla Malëshova (anëtar i udhëheqjes komuniste, por me pikëpamje liberale) dhe më thotë: Shoku Enver, po vriten intelektualë të pafajshëm në Tiranë, dhe kjo është terrorizëm! Enveri përgjigjet: “Ata janë borgjezë dhe me pikëpamje perëndimore, nuk i shërbejnë kauzës sonë të proletariatit, të komunizmit. Partizanët po kryejnë detyrën.” Njësitet guerile kan mandatin e komandantëve të tyre për të kryer këto pushkatime. Dhe mirë bëjnë. Veçojmë se skenari i ekzekutimit ishte dy planësh: e para, që intelektualët të mos ishin prezent në mbarimin e Luftës së Dytë Botërore, dhe forcat komuniste, e kishin më të lehtë marrjen e pushtetit; e dyta, me vrasjen e tyre të krijonin terror në popull, që të heshtej rreth krimit të tyre. Një ndër manipulimet më të rënda e dramatike që ka bërë historiografia komuniste është manipulimi me të ashtuquajturën Lufta Antifashiste Nacionalçlirimtare, e cila ka prodhuar kaq shumë ngatërresa, përçarje e gjenocid mes shqiptarëve, saqë efekti i saj zor se po zhduket dhe pse faktori kohë po ecën gjate. Rishikimi i historisë së Shqipërisë në një masë të madhe është rishikimi i situatës që krijuan komunistët gjate kësaj lufte. Gjithsesi, pa i gjykuar ashpër të ashtuquajturit “dëshmorë të Luftës NÇL”. Mund të them me bindje se idealet e tyre u manipuluan dhimbshëm dhe sakrificat e tyre nuk u drejtuan në altarin e shenjtë të interesave kombëtarë. Dhe për këtë para gjyqit të historisë duhet të japin llogari komunistët, dhe historianët e tyre, qoftë dhe për partizanët e vrarë, të cilët, në vend që të vriteshin si luftëtarë të lirisë kundër okupatorit, u dërguan të vriteshin në një luftë të pamoralshme civile kundër vëllezërve të një gjaku e të një gjuhe. Verifikimi i të vërtetave që lidhen me Luftën Nacionalçlirimtare ka qene dhe eshte një mision i papërmbushur i demokracisë shqiptare. Shoqëria shqiptare ushqehet dhunshëm me një treg të zi informativ, duke stimuluar dhe edukuar pandërprerë një ndjeshmëri dhe sensibilitet kriminal, lexuesit dhe shikuesit të saj i tundën para syve qindra mijë faqe gazetash dhe ekranesh me ngjyra me portrete gjakatare të diktatorëve, gjeneratat e reja mësohen me përralla detektive për lavdinë e madhe të udhëheqësve komunistë. Por kurrë dhe asnjëherë në hapësirat e kësaj lirie të fjalës nuk u dëgjuan rënkimet e thella të plagëve tona. Dhe sot mbas 70 vitesh dhe 24 viteve të ndrimit të sistemit ne po vuajmë pasojat posttraumatike po vuajmë sërish faje të reja prej fajtorëve të vjetër. Sot mbas 70 vitesh intelektualët nuk kan nje varr, kriminelët nderohen nga pushteti politik , historianët komunistë helmatisin shoqërinë me propogandë të gënjeshtër duke mohuar të vertetën e duke lartësuar gënjeshtrën ideologjike të diktaturës komuniste.
Mbas 24 vitesh ne ndeshemi me fenomenin negativ e shume të dëmshëm për shoqërinë që po ndërtojm, kur brohoritet për luftën clirimtare e për diktatorin ku në mes të këtyre turmave ndodhen udhëheqësit e pushtetit politik të ideollogjizuar që ekzaltohen me shamitë e kuqe e kur duartrokasin para figurës së diktatorit pa përgjeshmëri dhe pa ndjesi njerzore ndaj gjakut të pafasjshëm të Gazetarit Nebil Cika, e Dr. Isuf Allamanit , ndaj deputetit Deliallisi, e patriotit Ismail Ag Petrela, ushtarakut Akil Sakiqit e studentit Seliadin Ali Korca. Por cfar ndodhi në përvjetorin e 70 të vrasjes së tyre dje me 17 nëndor në Tiranë. Familjarë të të pushkatuarëve , ish të denuar politikë intelektual të fushave të ndryshme, nderuan me homazhe në pllakën memoriale kushtuar jetëve të martirëve u filmuan nga mediat televizive , por kronikat e këtyre homazheve nuk u dhanë. Dihet se politika ka luajtur me keta martir për 24 vite duke mos u gjetur dhe eshtrat dhe duke i përdor politikisht për interesa të tyre, por media televizive cfar pati !, pse nuk i nderoi por u muar me deklerata idiotësh politikanësh kush e don Enverin e kush nuk e don.. kur për 24 vite nuk e denuan penalisht diktatorin për krimet shnjerzore që kreu dhe ndaj këtyre intelektualëve.. nuk pati as ndjesine njerzore të i nderonte këta viktima të pafajshëm që i pushkatoi politika e urrejtjes,, në mes ketyre të pafajshëm ishte dhe një gazetar koleg i tyre me atribute kombëtare si Nebil Cika fatëkeqësisht dhe dje media u bë palë me politikën duke i anashkaluar si politika dhe duke i denuar me heshtje nderimin e tyre.. Përkujtim i djeshëm kishte mesazhin njerzor kombëtar : dënimim e krimeve të komunizmit, që shoqëria shqiptare të shkojë drejt pajtimit kombëtare! Kishte mesazh dashurie kundër urrejttjes, kishte mesazh paqje për të cilën ne shqiptaret kemi më shum nevojë sot që të punojmë për të nesërmen e fëmive tanë. Dhe po e mbyll këtë koment timin për mediat televizive shqiptare me thenjen e ketij gazetari te madh botëror : Republika jonë dhe gazetaria do të ngrihen ose do të fundosen së bashku. Një media cinike, mercenare, demagoge, me kalimin e kohës do të prodhojë një publik po aq pa vlerë sa vetja / Joseph Pulitzer Maj 1904
Besim Ndregjoni
President i UMIBPPPSH.