dgreca – Page 946 – Dielli

A do ngrej PS-ja komision hetimor pas dorëheqjes së Ramush Haradinajt?

July 20, 2019 by dgreca

A do ngrej PS-ja komision hetimor pas dorëheqjes së Ramush Haradinajt?

NGA ILIR LEVONJA/

Sipas të gjitha gjasave, Ramush Haradinaj paska dhënë dorëheqjen për përfitim politik. Ky përfundim rezulton pas shumë gërmimeve që mediat pranë Edi Ramës i bëjnë këtij akti që shënon një standart të munguar në demokracisë tonë.

Vet Edi Rama nuk ka se çfarë të thotë, megjithëse është një shkundje në pjesën e epërme të truallit të shqiptarëve, ai është tepër i zënë me fushatën kundër informalitetit. Jo rastësisht muret e fb të tij janë të mbushur me dyer lokalesh plot shirita të kryqëzuara. Ku ai trumbeton efiçencën e veprimit të organeve përkatëse. Para pak ditëve i kërcënoi hapur dhe publikisht taksambledhësit e tij. Sot lavdërohet me dyer lokalesh bash në pikun e turizmit, luftë imformalitetit etj.

Megjithëse 98% e botës shqiptare gumëzhin, jo vetëm për Ramushin, por edhe për standartin, ai lufton informalitetin. Në dukje sikur nuk i interesojnë zhvillimet në Kosovë. Megjithëse vendet e rajonit, mediat, kryeministrat përkatës janë shprehur me kohë publikisht. Keq apo mirë, kundër apo pro, u shprehën. Kurse kryeministri i Shqipërisë është shumë i zënë me informalitetin, me gjykatat për ca mandate votimesh që ngecin në çengelat e ligjit. Për ca mandate që nuk e di pse nuk i çertifikon po publikisht deri sa sipas tij mori një fitore plebishitare? Nga ana janë një farë mballomash që në preteksin se kanë mendimin e tyre, thonë se Ramushi e bën për përfitim politik. Në fakt kuotat e Ramushit ka qënë lart me kohë që nga taksa 100% për mallrat serbe, qëndrimin kundër ndarjes territoriale a korrigjimit të kufijve etj. Dhe për më tepër është në detyrë dhe e ka mundësinë të t’i kapi të gjitha. Ka mundësinë t’i bëj presion gjykatave, presidentit, komisionit zgjedhor etj. Për më tepër që ka përvojë komandanti lufte dhe mund të rrahi gjoksin me dekorata, por nuk i bën. Dhe as nuk i çon nëpërmend. Dhe as nuk flet me përbuzje për kundërshtarin politik duke shpënë gjithë rëndësinë e ekzistencës së tij tek zgjedhja e sovranit. Kurse kryeministri ynë gërrvërret në fb me qytetarët që ndihen të alarmuar nga reprezaljet e gjobave në pikun e punës. Duke e kuptuar fare qartë që janë viktima të informalitetit të një shteti me arka të zbrazura nga partneriteti publik dhe korrupsioni. Kryeministri i Shqipërisë nuk ka se çfarë thotë për zhvillimet politike në Kosovë. I injoron ato për shkak të përplasje publike me Ramushin, pasi ky i fundit, nxorri në pazar bisedat e shefave në kabinetet e europës. Shkurt punë çiliminjsh kur thonë myzeqarët. Por ka angazhuar një tufë grafomanësh duke aluduar mbi përfitimin politik të Ramushit. Pra Ramushi dha dorëheqjen që të përfitojë politikisht. Kur është kështu përse nuk ia sugjerojnë edhe ”gjenisë” së informalitetit, km së tyre. Nëse ai nuk ka ftesë nga Haga, i thoni gjykatave shqiptare të shkruajnë ca fletë-thirrje gjyqi dhe ky të japi dorëheqjen. Pasi është i pastër, nuk frikë nga reforma në drejtësi. Kësisoj mund të përfitoj edhe politikisht ashtu si Ramushi. Pas kësaj logjike i bie të pyesim, a do ngrejë Ps-ja një komision hetimor për Ramushin? A do ankimoj Idajet Beqiri dorëheqjen e Ramushit në kolegjin zgjedhor? Po komisioni zgjedhor i Denar Bibës, a do e njohi dorëheqjen e Ramushit? Keni tagrin e plotë, shqiptarët ua kanë dhënë të drejtën të tallni menderen ndaj mos nguroni dhe bëjeni. Madje ngulni këmbë tek shefi, tregojini rrugën se si mund të bëhesh hero. Se u ka votuar sovrani. Por janë të gjitha broçkulla pasi e kanë mirë ata shumica e madhe e botës virtuale kur thonë atë që, kur Ramushi braktisi Zvicrën si emigrant dhe shkoi të çlironte Kosovën, shefi juaj gjurmonte plazhet nudo të europës. Madje Kosovën e kish në kokë si një nocion fshataresk, jo si pjesë e ashtit kombëtar. Dhe këto tipa a karktere nuk ndryshojnë pak, ndryshimi mes tyre nuk është i madh, por është humnerë.

Haradinaj ia kthen mandatin Kryeministror qytetareve…

July 19, 2019 by dgreca

Haradinaj ia kthen mandatin Kryeministror qytetareve… … dhe top modeli Edi Rama /

Nga Ilir Levonja/

Ajo çka vlen për tu theksuar në rastin e Ramush Haradinajt, nuk është përballja me gjykatën e Hagës, pasi ai ka bërë një herë këtë dhe ka dalë i pastër. Kjo ka ndodhur në pranverën e vitit 2005, pas plot 100 ditë qeverisje. Atëherë ai dha dorëheqjen përpara presidentit të kohës Ibrahim Rugova dhe shkoi të gjykohej në Hagë për krime lufte ndaj popullsisë serbe dhe rome. Një përballje që zgjati diçka më shumë se 3 vjet deri sa në prill të 2008-ës ai u shpall nga kjo gjykatë si i pafajshëm. U kthye në Prishtinë me kokën lart dhe me meritë u prit si hero duke filluar gjithçka nga para. Kohët e fundit ka fituar pikë për komunikimin e hapur dhe taksën 100% mbi mallrat serbe. Por nga ana tjetër edhe për standartet që ka futur në demokracisë e shtetit më të ri të shqiptarëve atë të Kosovës. Eshtë kjo arsyeja që sot ajo pjesë progresiste e shqiptarëve si këtej dhe matanë kufirit i heqin me të drejtë kapelen. Në fakt Kosova ka bërë një progres të jashtëzakonshëm në raport me Shqipërinë. Dhe nuk ka asnjë diskutim që rolin parësor e luajnë standartet. Ramushi ka qënë me të vërtetë një kryeministër partner me shoqërinë. Kryeministri shqiptar ka bërë të kundërtën, shoqërinë e ka tallur, përçmuar, përbuzuar, kurse partneritetin e ka konsoliduar me tre P-të. Ramushi ka qënë i sinqertë me shoqërinë duke i folur partnerit popull hapur edhe për ca takime ku dy a tre veta kërkonin të vulosnin deri rindarjet territoriale, megjithëse nuk e kishin këtë tagër. Kurse kryeministri shqiptar ka përbuzur duke e quajtur deri dallkauk që nxjerr në pazar biseda midis kokash shteti. Kryeministri Haradinaj megjithëse e ka kundërshtar politikë presidentin e Kosovës, i jep atij tagrin që pasi të konsultohet me partitë politike të vendosi për datën e zgjedhjeve të parakohëshme. Kurse kryeministri i Shqipërisë ka plot dy muaj që e ka kthyer presidentin e vendit në një mejhane ku nuk ka ngel kush pa ia bërë në kokë, pa u shfryrë, pa mallkuar megjithëse qe vet ai që ua bëri dhuratë si shenjtor krishtlindjesh. Dhe mbi të gjitha i është futur një rruge pa krye të shkarkimit të tij. Kryeministri Haradinaj jep dorëheqjen duke thënë se mandatin ia kthej popullit dhe se i takon sovranit të vendosë për udhëheqjen e ardhshme me zgjedhje të lira dhe demokratike. Kurse kryeministri i Shqipërisë nuk pranon të bëj zgjedhje, mban ca votime shpifarake, duke fërkuar duart që opozita ka dalë në rrugë. Ka marrë pushtet absolut duke futur vendin në një ngërç institucionesh aq sot akoma nuk është zbardhur rezultati i votimeve të 30 qershorit. Aq sa e quan krejt normale që fiton pushtet vetëm me votat e militantëve duke mos e vrarë fare ndërgjegja për pjesën e munguar të shoqërisë. Lufta institucionale mes gjykatave, kolegjeve ka çuar vendin në anarshi. Aq sa qytetarët kanë në majë të gjuhës vetëm një togëfjalësh, të gjithë janë njësoj, një soj lloji prej muti. Kjo është edhe fundi, apo tabani që ka domethënien më të zezë të të gjitha kohërave, atë të humbjes së besimit ndaj klasës politike në vend. Kryeministri i Haradinaj e ka fare të kollajtë të thotë, po shkoj të gjykohem në Hagë si qytetar i thjeshtë, jo si kryeministër pasi nuk dua të rëndoj shtetin e Kosovës. Dhe kur të kthehem do garoj në zgjedhjet e parakohëshme etj. Kurse ai i Shqipërisë e ka gati të pamundur ta çoj nëpër mend dorëheqjen, turfullon e shan lartë e poshtë, nxiton të përmbushi tenderimet, urdhëron të zbrazet natën teatri kombëtar dhe gajas ndjekësit e tij me barsoleta lartë e poshtë. Me të drejtë lind pyetja, përse në Shqipëri është kaq e vështirë të aplikohet dorëheqja? Shqiptar është edhe Haradinaj, nuk është amerikan. Përse në Shqipëri gërrëverren studiove se kush ka apo nuk ka të drejtë? Dhe pse askush nuk flet e aplikon dorëheqjen?

Ka një shpjegim, atë që kemi dështuar si shoqëri.

19 korrik 2019

Përgjegjësi

July 19, 2019 by dgreca

Nga Astrit Lulushi/

Pavarësia nuk është fjalë boshe dhe as pavlerë. Njeriu lind i pambrojtur dhe i pa-aftë të mbrojë veten, fat i paracaktuar për të qenë i varur. Kështu, mbrojtja e jetës mund të thuhet se ka vlerë, por për cilin? Për atë qe merr përgjegjësinë ta mbrojë. Sepse si mund t’i kërkohet një tjetri të rrezikojë jetën e vet për të mbrojtur tënden?
Gjëja më e frikshme është gjēja më e zakonshme. Besimi në dikë është çlirim nga përgjegjësia e vetes edhe kjo është kaq e zakonshme. Njeriu heq dorë nga pavarësia duke mos pranuar të marrë përgjegjësi për mbrojtjen e jetës së vet. Karakteristika thelbësore e të gjitha qeverive, pavarësisht nga forma, është autoriteti, vendosur diku me respekt e diku me forcë, frikë e mashtrim. Qeveria është forcë e organizuar, jo domosdoshmërisht me ose pa forcë, për të sunduar e dominuar të tjerët.
Hapi më i thjeshtë i një individi të guximshëm, thotë Solzhenicin,
është që të mos marrë pjesë në gënjeshtër. Vetëm një fjalë në përkrahje të së vërtetës ai tejkalon gjithë botën.
Dikur, shpesh edhe sot, ishte tmerrësisht e rrezikshme që njeriu mendimet e veta t’i shfaqete brenda rrezes së një teleskopi. Gjëja më e vogël që mund të shkaktonte ishte një qëndrim nervoz, një ankth i pavetëdijshëm, një zakon për të pëshpëritur me veten – që e bënte të dukej i çmendur – të kishe diçka për të fshehur, në çdo rast, të mbaje një shprehje të pakënashme në fytyrë … ishte një vepër e dënueshme.
Imagjino të jetoje në objektivin e shikimit 24 orë, 7 ditë në javë, nën indoktrinim dhe kushtëzim nga autoriteti. Çlirimi nga unaza e mbikëqyrësve institucionalë nuk ka shpëtim, nuk ka afat, dhe asnjëherë nuk jepet falas. Tani pyesni: Sa të pavarur e të çliruar jemi?

HARADINAJ SFIDON HAGEN- DOREHIQET

July 19, 2019 by dgreca

KRYEMINISTRI RAMUSH HARADINAJ JEP DORËHEQJE, FTOHET NGA GJYKATA SPECIALE NË HAGË/

-Për Ramush Haradinajn kjo është hera e dytë e ftesës nga Haga dhe e dorëheqjes nga posti i kryeministrit të Kosovës. Herën e parë Ramush Haradinaj është dorëzuar vullnetarisht në Tribunalin e Hagës në 9 Mars 2005, pasi një ditë më parë kishte dhënë dorëheqje nga funksioni i kryeministrit të Kosovës, menjëherë pasi ishte njoftuar për ngritjen e aktakuzës nga Tribunali i Hagës. Në 29 nëntor 2012 u shpall i pafajshëm për të gjitha pikat e akuzës/

Gazeta DIELLI nga korrepondenti në Kosovë Behlul Jashari

PRISHTINË, 19 Korrik 2019/ Lideri i Alenacës për Ardhmërinë e Kosovës, Ramush Haradinaj, sot dha dorëheqje nga posti i kryeministrit, në mbledhjen e Qeverisë pasdite deklaroi se arsyeja e këtij vendimi është se ka marrë thirrje të paraqitet për t’u marrë në pyetje si i dyshuar nga Gjykata Speciale në Hagë.

Për Ramush Haradinajn kjo është hera e dytë e ftesës nga Haga dhe e dorëheqjes nga posti i kryeministrit të Kosovës. Herën e parë Ramush Haradinaj është dorëzuar vullnetarisht në Tribunalin e Hagës në 9 Mars 2005, pasi një ditë më parë kishte dhënë dorëheqje nga funksioni i kryeministrit të Kosovës, menjëherë pasi ishte njoftuar për ngritjen e aktakuzës nga Tribunali i Hagës. Në 29 nëntor 2012 u shpall i pafajshëm për të gjitha pikat e akuzës.

“Më në fund, pas shtatë viteve të gjata, dhe dy gjykimeve të gjata, kjo Gjykatë ka sjellur drejtësi për Ramush Haradinajn dhe për popullin e Kosovës”, theksonte deklarata e Ben Emmerson në emër të ekipit mbrojtës.

DEKLARATA E PLOTË E KRYEMINISTRIT RAMUSH HARADINAJ SOT NË MBLEDHJEN E QEVERISË SË KOSOVËS:

Të nderuar qytetarë,

Dua të ju informoj se sot kam marrë këtë vendim:

Jap dorëheqje të parevokueshme nga detyra e Kryeministrit të Republikës së Kosovës dhe dua që të ju falemnderoj për besim dhe përkrahje. Arsyeja e këtij vendimi është se kam marrë thirrje të paraqitem për t’u marrë në pyetje nga Dhomat e Specializuara në Hagë si i dyshuar.

Qeveritë dhe pushtetet janë të ndërrueshme, jetojmë në demokraci.

Nderi i Kryeministrit dhe Shtetit duhet të ruhet dhe unë nuk e poshtroj asnjëherë. Në Hagë si Ramush Haradinaj do t’i dal përball shpifësve, ashtu si e kërkon nderi i luftëtarit shqiptar.

Pastërtia ime dhe e luftës së UÇK-së, e konfirmuar nga dy aktgjykime nuk mund të njolloset nga askush dhe asnjëherë.

Shteti im është Kosova, e paprekshme në multietnicitet, shumëgjuhësi, në territor e kufijë.

Kosovës i bëhet presion i padrejtë për çmimin e njohjes nga Serbia. Ndarja apo Dodik Republika janë të papërballueshme për Kosovën dhe stabilitetin e rajonit.

Si Kryeministër i Qeverisë së Kosovës besoj fuqishëm se çmimi për njohje është tregu dhe për këtë taksa duhet të jetë çmimi i njohjes.

Bashkësia ndërkombëtare po bën gabim që po insiston në çmim të papërballueshëm për Kosovën për njohje. Lidershipi Kosovar po bën gabim se nuk po e fuqizon legjitimitetin e vendimit për taksën ndaj Serbisë. Herët a vonë do ta kuptojmë se sa dëm i madh po i bëhet vendit me këtë mosunitet.

Kosova euro-atlantike është e interesuar për njohje reciproke në kufijtë ekzistues. Dialogu për njohje është edhe rruga për tregti të lirë me Serbinë. Kurrë nuk është vonë të jemi bashkë – tregu për njohje, e jo ndarja apo Republika e Dodikut.

Më lejoni të ju siguroj se: Taksa mbetet, Ushtria e Kosovës shkon para, Trepça është e gatshme për investime.

Pas kësaj dorëheqjeje MANDATIN IA KTHEJ POPULLIT. Sovrani të vendosë për udhëheqjen e ardhshme me zgjedhje të lira dhe demokratike.

I drejtohem Presidentit që në afatin kushtetues të kryejë konsultimet me partitë politike dhe t’i shpallë zgjedhjet e parakohshme.

Qeveria e vendit vazhdon të kryejë funksionet e veta pa lejuar vakuum qeveritar deri në Qeverinë e re të dalur nga zgjedhjet e lira dhe demokratike.

Menjëherë do t’i drejtohem me shkresa zyrtare për dorëheqjen e parevokueshme institucioneve të vendit dhe udhëheqësve të koalicionit qeverisës.

Do t’i shërbej me besnikëri, gjithë jetën, POPULLIT, ATDHEUT DHE SHTETIT TIM KOSOVËS! Faleminderit.

I juaji,
Ramush Haradinaj

***

KRYEPARLAMENTARI VESELI: LUFTA E UÇK, E PASTËR DHE E DREJTË

Kryetari i Kuvendit të Kosovës, Kadri Veseli, shkruan: Me keqardhje mësova nga mediat për thirrjen që u është bërë nga Gjykata Speciale bashkëluftëtarëve të mi, si dhe për dorëheqjen e Kryeministrit Ramush Haradinaj.Lufta e Ushtrisë Çlirimtare të Kosovës ka qenë e pastër dhe e drejtë dhe jam i sigurt se ndershmëria e luftës së popullit tonë për liri e pavarësi ka për t’u vërtetuar sërish.Koalicioni qeveritar u ndërtua për të marrë vendime të mëdha për Kosovën dhe për t’i mbrojtur vlerat e UÇK-së.Të gjitha veprimet dhe vendimet tona do të jenë vetëm në shërbim të interesave më të mira të Kosovës dhe qytetarëve tanë, si dhe në përputhje të plotë me ligjet tona.

***

PRESIDENTI THAÇI: KEQARDHJE PËR FTESAT NGA GJYKATA SPECIALE

-Unë besoj në pastërtinë e luftës së Ushtrisë Çlirimtare të Kosovës dhe besoj në vlerat e larta morale të ushtarëve të lirisë/

Presidenti i Kosovës, Hashim Thaçi, sot ka shkruar në ‘facebook’:

Me keqardhje mësova që Gjykata Speciale ka ftuar për intervistim ish-shefin e Shtabit të UÇK-së, Bislim Zyrapi, njëherësh këshilltar i imi, ish-komandantin e Zonës Operative të Dukagjinit, kryeministrin Ramush Haradinaj, si dhe disa ish-eprorë të tjerë të UÇK-së. Nga mediat tani u informova edhe për vendimin e Kryeministrit të Republikës së Kosovës, Ramush Haradinaj, për dorëheqjen e parevokueshme nga pozita e tij. Unë e respektoj vendimin e tij dhe si President i Republikës së Kosovës ju siguroj se do të veprojë bazuar në kompetencat e mia kushtetuese dhe ligjore, për të cilat qytetarët e Kosovës do të njoftohen me kohë. Unë besoj në pastërtinë e luftës së Ushtrisë Çlirimtare të Kosovës dhe besoj në vlerat e larta morale të ushtarëve të lirisë. As vlerat e lirisë sonë dhe as luftën e UÇK-së nuk mund ta cenojë askush! HTH

Kosova me parimet që drejtohen nga SHBA

July 19, 2019 by dgreca

-Kryeministri Haradinaj takim me studentë nga 28 shtete: Bota duhet ta njohë realitetin e Kosovës dhe atë se kush jemi ne/

-Kosova në kufijt ekzistues, marrëveshja me Serbinë për njohjen reciproke/

PRISHTINË, 19 Korrik 2019-Gazeta DIELLI/ Kryeministri i Republikës së Kosovës, Ramush Haradinaj, ka pritur sot në takim një grup prej 55 studentëve të programit Akademia Verore, nga 28 shtete të ndryshme të botës.Fillimisht kryeministri Haradinaj iu uroi mirëseardhje studentëve dhe i përgëzoi organizatorët për këtë vizitë, duke thënë se sjellja e studentëve dhe të rinjve nga kombe të ndryshme në Kosovë është një gjë e mirë.Kjo, sepse siç theksoi kryeministri Haradinaj, është shumë e rëndësishme që shumë njerëz të botës të na njohin se kush jemi ne, ta njohin realitetin tonë.“Kosova është një komb i ri dhe jemi shtet i pavarur që 11 vite. Jemi shtet multientik, dhe po ky është shteti ynë dhe ne ndajmë besimin në vlerat e përbashkëta europiane. Kemi shumë sfida si një komb i ri dhe shoqëri dhe sfida kryesore për ne ishte ekonomia e shkatërruar gjatë luftës 20 vjet më parë, dhe për shkak të saj ka ende mungesë të vendeve të punës për rininë tonë”, tha kryeministri Haradinaj, duke thënë se sundimi i ligjit ka përmirësuar dhe është duke e përmirësuar luftimin e korrupsionit.

Në fjalën e tij para studentëve, kryeministri Haradinaj deklaroi se është sfidë për Kosovën themelimi i besimit brenda komuniteteve, por theksoi se është bërë progres në këtë drejtim por ende duhet punë për t’u bërë.

“Po ashtu presim edhe një marrëveshje më Serbinë për njohjen reciproke në kufijt ekzistues dhe shpresojmë se dialogu do ta sjellë këtë dhe se përmes kësaj do të mund të bashkoheshim më BE-në, NATO-n, në një botë ku rreshtohemi me parimet që drejtohen nga SHBA-ja dhe të gjithë aleatët tanë që na kanë ndihmuar”, tha kryeministri Haradinaj.

Pas fjalës së tij kryeministri Haradinaj zhvilloi një bashkëbisedim me studentët dhe u përgjigj në shumë pyetje rreth punës së tij si kryeministër, sfidat e qeverisjes dhe drejtimin që ka marrë Kosova./b.j/