Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

“Ditët e Kujtesës”

by

Bardh Spahia/

“Ditët e Kujtesës” nisën nga Shkodra këtë vit, duke na ftuar të reflektojmë mbi të shkuarën nën perspektivën e artit.

Nisma e Institutit për Demokraci, Media dhe Kulturë e mbështetur nga Bashkia Shkodër dhe Konrad Adenauer është një aktivitet që synon të mbajë gjallë debatin shoqëror dhe kujtesën mbi pasojat e regjimit komunist në Shqipëri.

Shkodra e pagoi më shtrenjtë se çdo qytet tjetër dhunën dhe terrorin e një prej regjimeve më të egra në Europë për afro gjysëm shekulli. Ajo është dëshmitare e vuajtjes dhe shembull i rezistencës. Duhet punuar që kjo e shkuar të mos shtrembërohet dhe lihet në harresë, por t’jua mësojmë brezave të rinj, pasi në të kundërt rrezikojmë që ajo të na përsëritet. Ekspozita “European Gulag” në Vendin e Dëshmisë dhe Kujtesës na njohu me historinë e harruar të kampeve të stilit sovjetik të ndërtuar kudo në Europën Qendrore/Lindore, pas Luftës së Dytë Botërore. Një histori e kampeve të detyruar të punës në shumë vende komuniste, përfshirë edhe Shqipërinë.

Mbrëmja u përmbyll nën tingujt e muzikës përkujtimore të Gaspër Çurçisë, “Gaci in Jazz”, viktimë e terrorit dhe diktaturës komuniste, me kurator muzikantin Gent Rushi.

15 vjetori i pavarësisë së Kosovës u festua në Boras të Suedisë

by

Anxhela Ziso/

15- Vjetori i pavarsise se Republikës së Kosovës bashkoi shqiptarët në një eveniment madheshtor ne qytetin e Borås, e organizuar nga shoqata Dardania IF. Ne këtë feste ishin të pranishem patriotë shqiptarë, aktivistë të shquar të komunitetit, diplomatë, drejtues të organizatave e shoqatave te ndryshme ne Suedi, gazetarë e veprimtarë të komunitetit shqiptar në përkujtim të ngjarjes më të shënuar të popullit e shtetit të Kosovës, pavarësine e saj.

Pogrami për pavarsinë e Kosoves me datë 18 shkurt 2023, në orën 19:30, në ”Parkhallen” e hapi prezantuesja e mbrëmjes Anxhela Ziso ku ftoi te gjithë pjesemarrësit të ngriheshin në kembë e të këndonin të gjithë njëzëri himnin e flamurit si të Shqipërisë, Kosoves dhe Suedise.

Me pas ata që argetuan me kengë dhe valle ishin te rriturit dhe femijet e shoqates Dardania IF ne Borås. Folkloristi Dervish Kuqi me këngën ”Trojet shqiptare”, fëmijët me poezi, Liora Koca Gerxhaliu dhe Verona Totaj me nga një këngë secila, ku ngritën në këmbë të gjithë publikun pjesmarrës dhe duartrokitjen nuk kishin fund. Torta mbi qershi e mbrëmjes ishte grupi i valleve te femijeve te drejtur nga Sadije Hasani,Yllka Presheva dhe për të rritur Arditi, Albertina.

Ne vazhdim mori fjalën zv.kryetarja e shoqates shqiptare Syzana Haziraj, e cila mbajti një fjalim ne lidhje me rëndesinë dhe madheshtinë e kesaj dite te bekuar. Këtë mbremje e nderuan edhe udheheqes politik dhe zyrtar të lartë të qytetit të Borås : Ulf Olsson kryetar, Annette Persson Carlson zv. kryetare, Hans Johansson zyrtar i lartë (Verksamhetschef Arbetslivsförvaltning) dhe Driton Bilalli kryetar i komunes fqinjë Tranemo. Fjalen përshëndetese e mori dhe Muharrem Binaku perfaqesues i shoqates ku ne mungese të kryetarit falenderoi të gjithë të pranishmit dhe i përshëndeti me një fjalim të shkurtër.

Ky aktivitet nuk do të kishte kuptim pa ata të cilet u kujdesen për rend dhe rregull dhe ç’do gjë shkoi më së miri: Abdullah Gerxhaliu-Culi, Fatmir Bajramaj, Albertina-Tina, Vjollca Nord –Vivi, Lirije Kadriu.

Festa vazhdoi në frymën e gëzimit dhe të kënaqësisë për kulturën e doket shqiptare që ndiheshin tek kushdo nga artistët e ftuar për këtë ngjarje dhe nga të pranishmit. Këngëtarët e ftuar të mbremjes ishin Ymer Bajrami, Edona dhe Milot Lalloshi si dhe muzikanti Armend Hajra.

Ishte një festë e shënuar që mblodhi shqiptarët duke gëzuar me njëri-tjetrin, një shtysë kjo edhe për të ardhmen që edukata dhe kultura shqiptare të qëndrojë e fortë në familje dhe sidomos në brezin e ri, në diasporën e Suedisë tek çdo emigrant. Mbremje te tilla mund të shënojnë dhe një marrëdhënie më të afërt me gjithë shqiptarët në Suedi midis njeri-tjetrin, ruajtjen e gjuhës shqipe dhe kalimit të saj në brezin e ri si edhe marrëdhënien me shkollën dhe librat shqip.

Si bashkim i unitetit dhe identitetit kombëtar i jepet rëndësi çështjes shqiptare, për këtë falenderojmë kryesinë e shoqatës shqiptare Dardania IF dhe të gjithë për pjesmarrjen dhe mbështetjen e kësaj dite të shënuar.

Urime Kosovë! Gëzuar festën tënde të pavarësisë!

Shqiptarët në Saint Louis festuan 15-vjetorin e pavarësisë së Kosovës

by

Të shtunën në 18 shkurt 2023, shqiptarët e shoqatës “ILIRIA” Saint Louis sëbashku me miq amerikanë të ftuar festuan 15-vjetorin e shpalljes së pavarësisë të Kosovës. Atmosferën e gëzueshme festive e filluan duke recituar poezi shqipe, nxënësit e shkollës shqipe “ILIRIA”; Eliza Palloshi, Valdrina Fejza, Valdrin Fejza, Albion Palloshi, Valera Dullovi, Sara Dullovi nën përkujdesjen e mësuesës së shkollës znjsh. Rafaela Hajdini. Me një gjuhë të rrjedhshme shqipe në ata rrezatuan dashurinë patriotike duke u pritur me shumë duartrokitje nga të pranishmit në sallë. Fjalën përshëndetëse e mbajti nën kryetari i shoqatës z. Xhevat Dullovi i cili në emër të bordit drejtues falenderoi pjesëmarrësit për prezencën dhe theksoi rëndësinë kësaj dite historike për shtetin e Kosovës. Theks i vuri edhe mbështetjes së madhe të forcave të NATO-s dhe rolit të UÇK-së në çlirimin e Kosovës. Një befasi e këndshme ishte pjesëmarrja dhe fjala e ushtarakut z. John Mitchell i cili i ka përcjellë ato ditë historike të shpalljes së pavarësisë si pjesëtar i forcave të KFOR-it. Ato vite shërbimi ai i solli me emocion dhe respekt të thellë si kujtime të pashlyeshme të një misioni që ka shkruar histori për Kosovën dhe të gjithë popullin shqiptar. Në vijim, znj. Anila Veizi, anëtare e bordit drejtues dhe ish kryetare e gruas së shoqatës mbajti një kumtesë kushtuar femrës kosovare në histori. Në pasqyrën e kujtesës historike ajo solli shëmbuj të ndryshëm të kontributit të tyre që nga thellësia e kohërave e deri në ditët e sotme. Gruaja shqiptare e Kosovës është pjesë e pa ndarë në ndërtimin dhe prosperiten e strukturës familjare, asaj patriotike si dhe konstruktin shpirërtëror dhe kulturor të identitetit kombëtar.

Orkestra dhe këngëtarët Arif Palloshi dhe Gazmend Muslia krijuan atmosferë të gëzueshme gjatë gjithë mbrëmjes me këngë patriotike dhe lirike nga të gjitha trevat shqiptare.

Ky festim ishte shprehje solidariteti, gëzimi dhe bashkimi të komunitetit shqiptar këtu në Saint Louis për ti mbajtur gjallë dhe aktivë lidhjet me trojet e viseve nga vijmë.

Përgatiti: Besian Gjika

20 shkurti – dita simbol kundër diktaturës!

by

Bujar Leskaj/

32 vite më parë, në 20 shkurt 1991, qytetarët e Tiranës të frymëzuar nga akti sublim i studentëve rrëzuan monumentin e diktatorit Enver Hoxha dhe ua sollën zvarrë kokën studentëve të ngujuar në Grevën e Urisë.

723 studentë e pedagogë të ngujuar në Grevën e Urisë, me kërkesën për heqjen e emrit të diktatorit Enver Hoxha nga Universiteti, të mbrojtur nga qindra studentë të tjerë, mijëra banorë të Tiranës e Shqipërisë, në një akt patriotik, demokratik, sublim e konfrontim të drejtpërdrejtë me diktaturën ndryshuan Historinë!

723 studentë kishin marrë parasysh çdo gjë!

Tre ditë të rrezikuar për jetën, tre ditë vetëm me cigare dhe ujë…

Por me shumë guxim, vendosmëri e ëndrra!

Dhe në anën e duhur të Historisë!

Në anën e vetme të drejtë të Historisë!

Ata 723 studentë nuk ndryshuan vetëm Shqipërinë!

Ndryshuan jetën e shumë, shumë njerëzve.

Sot dua të krenohem për atë ç’ka arritën studentët atë Shkurt të zjarrtë.

Dolën në ballë të epokës, pa ulërima dhe pa lajka, por me guxim i thanë gjërat me emrin e tyre.

Respekt e mirënjohje për ata studentë e pedagogë të guximshëm e demokratë, të cilëve Historia u ka borxh!

Respekt e mirënjohje për ata studentë që nuk kërkuan që rreth tyre të thurreshin legjenda e mite, që luftuan që të shemben njëherë e mirë idhujt e mitet e rremë.

Respekt e mirënjohje për të gjithë prindërit e studentëve grevistë, por edhe për të gjithë ata qytetarë të Tiranës që u bënë gardh për mbrojtjen bijve e bijave të tyre,

Respekt e mirënjohje për të gjithë studentët vlonjatë të Dhjetorit ’90 e Shkurtit ’91!

Sot, 32 vite më pas, Historia na ka thirrur përsëri të mbrojmë demokracinë e pluralizmin nga një autokrat i ri, nga Edi Rama, i cili ashtu si Enver Hoxha në vitet 41-44, 45-49, 56, 74 e me radhë, urren demokracinë, Shqipërinë progresiste dhe opozitën.

Dhe përsëri do ia dalim. Sepse mitet e rreme dhe autokratët Historia gjithmonë i ka përçmuar dhe i ka hedhur në kosh.

VATRA U TAKUA ME PRESIDENTIN E SHQIPËRISË BAJRAM BEGAJ

by

Kryetari i Federatës Pan-Shqiptare të Amerikës VATRA z.Elmi Berisha dhe delegacioni zyrtar i Vatrës që e shoqëronte në festimet zyrtare në Prishtinë me rastin e 15 vjetorit të pavarësisë së Kosovës, u takua me Presidentin e Republikës së Shqipërisë, Shkëlqësinë e Tij z.Bajram Begaj. Në takimin e përzemërt e vëllazëror, Presidenti Begaj ka çmuar lart punën e Federatës Vatra dhe gazetës Dielli në dobi të çështjes kombëtare e komunitetit shqiptar në Shtetet e Bashkuara të Amerikës dhe i ka ftuar zyrtarisht në Presidencë për të vazhduar bashkëpunimin institucional në dobi të mërgatës shqiptare në Amerikë. Kryetari i Federatës Vatra z.Berisha i ka përcjellur Presidentit Begaj urimet më të përzemërta prej të gjithë vatranëve dhe e ka siguruar për bashkëpunim të ngushtë dhe të vazhdueshëm mes Federatës Vatra dhe Presidentit të Republikës së Shqipërisë.