Featured – Page 371 – Dielli

SKËNDERBEU DHE NOLI

December 10, 2018 by dgreca

-Veprimtari e zhvilluar në kishën e Shën Gjergjit në Boston/

Nga Fuat Memelli/

Është e treta herë që brenda 6 muajve, në kishën e” Shën Gjergjit” në Boston, ose siç quhet ndryshe “Kisha e Nolit”, zhvillohen veprimtari kushtuar figures së heroit tonë kombëtar, Gjergj Kastrioti –Skënderbeut. E veçanta e kësaj veprimtarie përmbyllëse, ishte gërshetimi i saj me dy ngjarje të rëndësishme të kësaj kishe: 110 vjetorin e themelimit të Katedrales së Shën Gjergjit dhe mbajtjen e meshës së parë në gjuhën shqipe nga imzot Noli. Për të marë pjesë në këtë veprimtari të shënuar kishin ardhur shqiptaro-amerikanë e amerikanë nga Bostoni e qytetet rreth tij si dhe nga Neë Yorku , Ëashingtoni, etj. Ishte kjo jo vetëm një veprimtari përkujtimore por edhe si një dite feste. Neka Doko, punonjëse e Bibliotekës “Fan Noli” dhe e Qendrës Kulturore pranë kësaj kishe, një nga organizatoret kryesore të kësaj veprimtarie, thekson se ditës së sotme, i kanë paraprirë dy veprimtari të tjera në këtë kishë. Meqënëse janë pjesë të një “zinxhiri” veprimtarish, po ndalem shkurtimisht tek ato, për t’i lënë pastaj “sofrën” kryesore veprimtarisë përmbyllëse.

PROLOGU I VEPRIMTARIVE

Nisi më 6 maj të këtij viti. Kjo datë nuk ishte e rastësishme. Më 6 maj është ditlindja e Skënderbeut. Gjithashtu 110 vjet më parë, më 6 maj 1908, Noli mbajti liturgjinë e parë në gjuhën shqipe. Atë ditë ai lexoi shkrimin e tij për Skënderbeun, botuar një vit më parë te gazeta “Albania” që nxirte Konica. Një pjesë të kësaj fjale, e mbajti Neka Doko më 6 maj të këtij viti. Është ky një fjalim prekës i Nolit për Skëndërbeun. Ajo kujton disa nga fjalët e Nolit, drejtuar bashkëatdhetarëve në Shqipëri:…”Ju lutem juve, luftëtarë të mëdhenj, prijës, më hapni mua të gjorit një vend të vajtoj për Skënderbeun”. Fjalën e plotë të Nolit, ia kishte dërguar kishës bashkë me librin e tij “Antologji për Skënderbeun”, studjuesi Fotaq Andrea. Veprimtaria e mësipërme u mbështet nga At Artur Liolini dhe vajzat e Shën Gjergjit. Po atë ditë u paraqitën botime për Skënderbeun, fotografi, etj.

Ngjarja e dytë me temë “Punime në arte për Skënderbeun dhe Nolin në kishën e Shën Gjergjit”, ishte më 7 tetor të këtij viti. Me këtë rast u mblodhën fonde për Bibliotekën “Fan Noli” si dhe për veprimtarinë e fundit. U hap edhe një Ëebside për bibliotekën dhe Qendrën Kulturore pranë kësaj kishe, ku një ndihmesë të veçantë dha Loreta Dhamo, veprimtare e Shoqatës së Motrave “Qiriazi”.

NJË FESTË BINJAKE

Veprimtarinë përmbyllëse e çeli “i zoti shtëpisë” ,kancelari i kishës së Shën Gjergjit, At Artur Liolini. Ndër të tjera ai theksoi:” Sot kemi një festë binjake: së pari jubilleun e 550 vjetorit të ndarjes nga jeta të Skënderbeut. Po këtë vit kujtojmë edhe 110 vjetorin e themelimit të Katedrales së Shën Gjergjit si dhe të mbajtjes së litrugjisë së parë në gjuhën shqipe nga imzot Noli. Kisha e Shën Gjergjit ka qënë dhe do të jëtë gjithëmonë e hapur për shqiptarët, të krishterë e myslimanë”. Më pas afrohet në mikrofon studjuesi i njohur, Prof. Nikolla Pano. Ai u ndal në figurën e Skënderbeut, duke iu referuar ligjëratës së tij të mbajtur pak kohë më parë për herioin tonë në Tiranë. Ai ka dhënë një kontribut të çmuar si këshilltar dhe kontribues për pasurimin e bibloitekës së Nolit. Referues në këtë veprimtari ishin edhe dy amerikanë. Grant Harris, punonjës i Librarisë së Kongresit Amerikan në Ëashington, foli për një studim të tij për Skënderbeun dhe emigrimin e shqiptarëve pas vdekjes së tij. Tom Mclain, ish student i departamentit të Historisë në Universitetin e Bostonit, ku ka studjuar edhe Noli, në punimin e tij tok me Grigor Panon, u ndal në punën e bërë nga Noli për “Historinë e Skënderbeut”, vepër të cilën e ka shkruar kur vazhdonte këtë uiniversitet dhe e ka botuar në vitin 1947. Këtë punim Mclain e kishte referuar kur ishte student edhe para pedagogëve të tij.

Si një Skënderbei gjallë, me shpatë e përkrenare dhe veshje kombëtare, u paraqit në sallë aktori i njohur, Xheviat Limani. Ai interpretoi plot emocion fjalën e Skënderbeut kur u kthye në Krujë:” Lirinë nuk e solla unë por e gjeta midis jush….”. Në këtë interpretim ai kishte përfshirë edhe fjalë të shkruara prej vetë atij për Skënderbeun. Më pas ai recitoi poezinë e famëshme të Nolit”Jepni për nënën”…”Mbaju nëno mos ki frikë, se ke djemtë në Amerikë…”. Në të dy interpretimet, të cilat ishin ndër pjesët më të bukura të veprimtarisë,”Skënderbeu i gjallë” u “shpërblye” disa herë me duartrokitje nga të pranishmit.

Edlira Athanas, një nga moderatoret e kësaj veprimtarie, foli për figurën e Skënderbeut në operan shqiptare me të njëjtin titull, premeiera e të cilës u dha në vitin 1968. Kompozitor i saj ishte Prenk jakova , ndërsa rolin e Skënderbeut e lunate , Gjoni Athanas, , babai i Edlirës. Një koincidencë e bukur kjo! Prej disa vjetësh Gjoni jeton në Boston dhe me këngët e tij ka qënë i pranishëm në disa veprimtari të shqiptarëve në këtë qytet.

Moment me interes i veprimtarisë ishte paraqitja e një punimi grafik për Skënderbeun, realizuar 100 vjet më parë por që nuk i dihej autori. Punimi kishte pseduonimin “Shkëmb e gur”. Ai i ishte dorëzuar kishës në vitin 1975 , nga shqiptaro-amerikani Van Kristo, aktualisht konsull Nderi i Shqipërisë në Boston. Pas një pune këmbëngulëse disa mujore të Neka Dokos dhe dardhares Adriana Stefani, u bë e mundur gjetja e autorit. Ai ishte patrioti Spiridon Ilo. Shpjegimin plotësues për këtë gjetje, e bëri motra e Adrianës, Odeta Stefani, duke thënë se pseudonimi ishte gjetur te dokumenta të tjera të Spiridonit, të cilat i kishte patur djali i tij i adoptuar, dardhari i ndjerë, Vangjo Ilo.

Edhe poema e Long Fellout për Skënderbeun,zuri vend në atë veprimtai. Pjesë të saj u interpretuan në anglisht nga Erdlira Athanas dhe në shqip nga aktori, Julian Nënshati. Në emër të Federatës Pan Shqiptare “Vatra” përshëndeti nën kryetari i saj, Agim Rexha, ku mes të tjerash theksoi:” Kisha Orthodokse Shqiptare në Amerikë dhe “Vatra”, ishin dy shtyllat që mbajtën gjallë çështjen kombëtare shqiptare në Amerikë dhe i paraprinë Pavarësisë së Shqipërisë. Imzot Noli është një gur themeli në kështjellën e shqiptarizmit në Amerikë. Ai është edhe te kisha, edhe te “Dielli”, edhe të “Vatra”. Kujtojmë në këtë përvjetor heroin tonë kombëtar, Gjergj Kastriot- Skënderbeun, sepse një popull pa kujtesë, shuhet. Federat “Vatra” dhe gazeta “Dielli” me editor Dalip Grecën si dhe gazeta “Illyria” me editor Ruben Avxhiun, e kanë patur në qendër të vëmëndjes figurën e Skënderbeut në këtë vit jubilar”.

***

Veprimtaria përmbledhëse “Skënderbeu dhe Noli në kishën e Shën Gjergjit”, ishte konceptuar me disa element si referime, paraqitje vizuale me foto e dokumenta të gjetura në Amerikë dhe disa shtete të Europës. Ishte konceptuar edhe me interpretime, etj. Bostoni, qyteti të cilin Fan Noli e ka quajtuar “Një Shqipëri e vogël”, mbylli kështu veprimtaritë e shqiptarëve të Amerikës për figurën e heroit tonë legjendar, Gjergj Kastrioti-Skënderbeu.

NDEROHET NE BOSTON GJERGJ KASTRIOTI-SKËNDERBEU DHE FAN S. NOLI

December 10, 2018 by dgreca

KATEDRALJA E SHËN GJERGJIT DHE BIBLIOTEKA NOLIANENDERUAN GJERGJ KASTRIOTI-SKËNDERBEU DHE FAN S NOLI-/

– Vatra u përfaqësua me nënkryetarin e saj z. Agim Rexhaj, i cili krahas përshëndetjes përcolli edhe Kumtesën e përgatitë nga Editori i Diellit për kontributin e Editorëve të gazetës Diellit me studimet historike rreth figurës së Heroi Kombëtar: Fan S. Noli, Athanas Gegaj, Andon Frashëri, Nelo Drizari,Bilal Xhaferri, Edward Lico dhe Xhevat Kallajxhiu-

– Vatrës iu dorëzua Certifikata e Mirënjohjes nga Kryekancelari Atë Arthur Liolin-

Me 8 Dhjetor në Katedralen e Shëngjergjit në Boston u organizuan veprimtari nderuse dhe historike për 550 vjetorin e vdekjes së Heroit Kombëtar Gjergj Kastrioti Skënderbeu si dhe u nderua Kujtimi i Imzot Nolit në 110 vjetorin e Meshës së parë në Gjuhën shqipe. Ashtu sic kishte njoftuar Gazeta Dielli në disa numra radhazi dhe në publikimin online Kisha Orthodokse dhe Biblioteka Noliane i kishin bashkuar të dy përvjetorët, duke nderuar dhe Nolin si studues i Heroit Kombëtar, por dhe Misionin e Tij për Kishën Autoqefale dhe Meshën e Parë ën Gjuhën Shqipe në SHBA.

Studues të njohur si Prof. Nikolla Pano, Grant Harris nga Biblioteka e Kongresit, Agron Alibali, Neka Doko, përcollën të dhëna e interpretime interesante me kumtesat e tyre rreth Heroit Kombëtar.

Në përshëndetjen e tij z. Agim Rexhaj tha:

I dashur At’ Arthur Liolin

Të nderuar miq

Ndjehem shumë i privilegjuar që t’ju përshëndes sot nga kjo Foltore në emër të Federatës Panshqiptare të Amerikës VATRA, në emër të Kryetarit të saj z. Dritan Mishto, Kryesisë, Këshillit të Vatrës, dhe degëve të saj në SHBA e Kanada, që ma deleguan mua përfaqësimin sot këtu, ngase një tjetër veprimtari zhvillohet po sot në Vatër me Kryeparlamentarin e Kosovës z. Kadri Veseli!

Po ashtu nuk mundi të vinte edhe Dalip Greca, Editori i Gazetës Dielli, gazetës më të vjetër të Botës shqiptare, që pas ca muajësh, me 15 shkurt 2019, feston 110 vjetorin e themelimit të saj me Editor të parë Imzot Nolin, ashtu si Kryekisha e Shëngjergjit dhe Biblioteka Noliane kujtojnë sot 110 vjetorin e Meshës në gjuhën shqipe të udhëhequr nga Imzot Nolit.

Kisha Orthodokse Shqiptare në Amerikë dhe VATRA, ishin dy shtyllat që mbajtën në këmbë çështjen Kombëtare Shqiptare në SHBA dhe i paraprinë Pavarësisë së Shqipërisë.

Emri i Imzot Nolit është gurë- themeli në Kështjellën e Shqiptarizmit në Amerikë; Noli është edhe tek Kisha, edhe tek Dielli, edhe tek vetë VATRA. Ndërsa e kujtojmë këtë përvjetor të 110 të Meshës në Gjuhën shqipe ne nderojmë Imzot Nolin dhe të gjithë ata që i shërbyen dhe i shërbejnë me devocion Kishës Orthodokse Shqiptare në ShBA duke ruajtur të shenjtë Autoqefalizmin.

Kjo veprimtari Juaja, shënon epilogun e të gjitha veprimtarive që u organizuan në Kujtesë të Heroit Kombëtar Gjergj Kastrioti Skënderbeu. Federata Panshqiptare e Amerikës VATRA dhe Gazeta e saj Dielli i kanë paraprirë dhe e kanë mbajtu në qendër të veprimtarive figurën e heroit Kombëtar. Gazeta Dielli, përveç numrit special Kushtuar këtij përvjetori, që nxori në Ditën e Flamurit, në çdo numër të saj ka evokuar historinë që lidhet me emrin e heroit, ndërkohë që Vatra në bashkëpunim me institucionet fetare dhe organizatat e tjera të diasporës ka qenë bashkëorganizatore e simpoziumeve dhe konferencave shkencore kushtuar Heroit Kombëtar. Kështu së bashku me Kishën Katolike “Zoja e Shkodrës” në Nju Jork, Vatra realizoi një Konferencë me nivel shkencor me rastin e 550 vjetorit të Vdekjes të Gjergj Kastriotit Skënderbeut. Po ashtu Vatra ishte pjesë e një akademie shkencore, që u organizua në Michigan, ku ligjëruan studiues dhe akademikë të njohur nga trevat shqiptare.

Figura e Heroit Kombëtar Gjergj Kastrioti Skënderbeu ka shërbyer si një Ikonë e shenjtë për Diasporën shqiptare në Amerikë dhe Europë. Në mënyrë të veçantë për Federatën Panshqiptare të Amerikës VATRA, figura e heroit Kombëtar, ka mbajtur ndezur shpirtin e atdhetarizmit.Rexhaj përcolli pjesë nga Kumtesa e përgatitë me këtë rast nga Editori i Diellit, Dalip Greca, kumtesë që fokusohej në kontributin e Editorëve të gazetës Diellit me studimet historike dhe librat e botuar prej tyre rreth figurës së Heroi Kombëtar.Ndër ta përmendim: Fan S. Noli, Athanas Gegaj, Andon Frashëri, Nelo Drizari, Bilal Xhaferri, Edward Lico dhe Xhevat Kallajxhiu.(Për më shumë lexoni në Gazetën Dielli në print)

Kryeparlamentari i Kosovës Kadri Veseli në selinë e Vatrës

December 9, 2018 by dgreca

Kryeparlamentari Veseli: Në Vatrën Shqiptare gjeta të gjallë shpirtin e atdhedashurisë për vendin dhe Kombin; gjeta të ndezur idealin e atyre burrave që themeluan Vatrën dhe i paraprinë shpalljes së Pavarësisë së Shqipërisë, gjeta përpjekjet shekullore të Vatrës për ti shërbyer Kombit, gjeta të ndezur shpirtin Kombëtar për forcimin e demokratizimin e Shtetit të pavarur të Kosovës, ku kontributi i shqiptarëve të Amerikës, mbetet gurë-themeli.

Nga Rafaela Prifti & Dalip Greca*/

Të Shtunën me 8 Dhjetor, Kryetari i Parlamentit të Kosovës ishte mysafir në Vatër. Ai shoqërohej nga ambasadorja e Republikës së Kosovës në Washington Vlora Citaku dhe Konsullja e Përgjithshme e Kosovës në Nju Jork, Teuta Sahatcija.

Kryetari i Vatrës z. Dritan Mishto i uroi mirëseardhjen në Vatër z. Veseli dhe diplomateve të Kosovës, duke e vlerësuar vizitën e kryeparlamentarit si historike, pasi është e para herë që një lider i këtyre përmasave i Kosovës në pushtet viziton Vatrën. Kryetari i Vatrës ka prezantuar qëndrimet e Vatrës rreth cështjeve aktuale që po kalon Kosova dhe Shqipëria, duke prazantuar mospajtimet me votën kundër SHBA-ve, të shtetit shqiptar. Për Kryetarin e Vatrës, miqësia ndaj SHBA-ve, është detyrim moral i Kombit shqiptar.

Kryetari i Parlamentit të Kosovës falenderoi për pritjen e ngrohtë dhe vlerësoi se Federata Panshqiptare e Amerikës Vatrës, sot është vazhduese e punës historike të Vatrës për më shumë se një shekull.

Duke iu referuar zhvillimeve në Kosovë dhe marrdhënieve me SHBA, Veseli tha se pavarësisht sfidave demokratike edhe ekonomike të shtetit të ri,Republika e Kosovës ka vetëm një orientim, atë perëndimor, përkatësisht evropian dhe amerikan. Një nga synimet e zhvillimeve demokratike është mbajtja në Kosovë e kapaciteteve intelektuale dhe vecanërisht rinisë së Kosovës. Për sa i takon arritjeve, Republika e Kosovës është në nivel të ngjashëm ekonomik e jetësor me Ballkanin Perëndimor, por larg standarteve të vendeve të përparuara evropiane.

Shkuarja drejt tyre është synimi i reformave ligjore dhe ekonomike, ndërsa synimi politik është anëtarësimi në OKB me gjithë pengesat e vazhdushme që po vendos në këtë rrugë Serbia. Ai tha se Kosova është e vendosur në rrugëtimin e saj, nuk ka hapa pas, vetëm përpara, ndërsa për Kufijtë e Kosovës, nuk do të lejohet cënimi i tyre.

Kryeparlamentari i Kosovës Veseli informoi edhe për vizitën e tij në shtetin e Iowa-s. Ai tha se Partneriteti me shtetin Iowa, në fushën ushtarake dhe më tej do zgjerohet edhe në fushën bujqësore dhe akademike. Për dijeni, 25 donacione të pajisjeve nga ushtria amerikane do jenë në Kosovë në fund të muajit, pjesa më e madhe e tyre kanë mbërritur. Me 7 dhjetor z. Kadri Veseli vizitoi shtetin e Iwoa. Kryetari i Kuvendit të Kosovës, Kadri Veseli gjatë kësaj vizite është pritë edhe në Gardën Kombëtare të Iowa-s, ku ka parë nga afër mënyrën e organizimit dhe ka diskutuar me ta për mbështetjen që i është dhënë deri më tani Forcës se Sigurisë së Kosovës. Kryetari Veseli informoi se është pritur nga gjenerali Timothy Orr dhe drejtues të tjerë të Gardës se Iowa-s. Gjatë vizitës u konfirmua edhe një herë mbështetja për Forcën e Sigurisë së Kosovës edhe pas transformimit të saj në Ushtri të Kosovës. Kjo mbështetje do të vazhdojë të jepet në trajnime dhe edukim por edhe në aspekte të tjera që kanë të bëjnë me funksionimin e saj si ushtri. Kryetari Veseli rikonfirmoi se Ushtria e Kosovës do të jetë ushtri e paqes në Ballkan, por edhe në zona të tjera kudo qe do të kërkohet angazhimi i saj, në ruajtjen e paqes. Gjenerali Timothy Orr , ka ritheksuar edhe një herë përkrahjen për Kosovën, e në veçanti për Forcën e Sigurisë sa Kosovës.

Sipas Kryetari Veseli, kurrë shqiptarët nuk kanë qenë më mirë se tani, kurrë më të fortë se tani, por kërkohet më shumë organizim dhe bashkëpunim për të ecur përpara.

Duke iu referuar marrdhënieve me SHBA dhe lobimit në SHBA,ai konstatoi se disa nga miqtë tanë të vjetër amerikanë, që na dhanë mbështetje të fuqishme para dhe gjatë luftës, janë larguar nga skena politike, janë plakur apo kanë ndërruar jetë, prandja duhet lobim i fuqishëm për të bërë miq të rinj. Edhe klasa tradicionale e biznesmeneve shqiptare jane plakur dhe prandaj nevojitet riaktivizimi i lobit shqiptar.

Kryeparlamentari Veseli ishte në një mendje me Kryetarin e Vatrës për votimin e Perfaqesueses se Shqiperise ne OKB kunder votes se SHBA. Ky, tha ai, eshte tregues negativ në marrdhëniet me mirëbërsin e shqiptarve, shtetin amerikan. Politika e Republikes se Kosoves eshte nje me ate te SHBA, tah Veseli.

Në mbyllje të fjalës së tij, z. Veseli, iu drejtua Kryetari të Vatrës duke thënë se duhet të jesh krenar për paraardhësit e Vatrës si edhe misionin e saj historik.

Më pas janë bërë pjesë e debatit me pyetje përgjigje disa nga pjesmarërrsit në takim. Pasi i uroi mirëseardhjen z. Asllan Bushati pyeti nëse: Kosova ka plan për të shpëtuar nga zgjedha e Kushtetutës së Kosovës të hartuar nga Ahtisari? Dhe a mendonte Kryeparlamentari se kishte zgjidhje tjetër për taksën e Rrugës së Kombit, e cila më së shumti rëndon mi qytetarët e Kosovës?

Përgjigja e Kryeparlamentarit: Kushtetuta e Ahtisarit e ka kryer funksionin e saj dhe nuk mund të mbajë peng ecjen përpara. Barrierat duhen zvogëluar për të komunikuar më mirë. Rruga e Kombit kërkon mirëmbajtje financiare por vendosja e taksave e vështirëson lehtësinë e komunikacionit të hapur e të lirë.

Anëtari i kryesisë së Vatrës z. Marjan Cubi tha se Demokratë e Republikanë në SHBA pajtohen për Kosovën dhe kjo është pozitive. Me rëndësi është përkrahja për ushtrinë e Kosovës. Shtetet shqiptare duhet që të punojnë më shumë për mbështetjen e Presidentit Trump.

Lekë Përlleshi :-Përkrahja ushtarake për ushtrinë e Kovovës, mendoj se është goditje për Serbinë

Kam mendimin se vendosja 100 per qind taksës për Serbinë është pozitive dhe në kohën e duhur.

-Kam mendimin se punëtorët e arsimit nuk janë kompensuar për punën gjatë që kryen në kohën e okupimit serb, ku u ngrit sistemi paralel i arsimit. A keni ndonjë plan kompensimi?

Përgjigje: Kërkesat për reparacione nuk mund të përmbushen nga shteti i ri i Kosovës,Përvec arsimtarëve, janë policët e minatorët etj

Veprimtari i njohur nga Komuniteti Esad Gjonbalaj, një nga themeluesit e Shoqatës se Plave- Guci në SHBA kërkoi nga kryetari i parlamentit që Jakup Ferri të shpallet hero kombëtar nga shteti i Kosovës.

Gjonbalaj tha: Jakup Ferri është një figurë kombëtare që theu vendimet e kongresit të Berlinit, është një figurë kombëtare që mundi ushtarakisht Malin e Zi dy herë në vij të frontit, është një komandant i shquar i Lidhjes së Prizrenit, që vrau Magjar Pashën në Gjakovë. Stambolli e kishte dërguar atë për të nënshtruar Plavë Gucinë për Malin e Zi. Komandanti që me 4000 ushtarë mundi ushtrinë malazeze me 12000 ushtarë.Mendoj se nuk ka asnjë arsye pse nuk është i shpallur hero kombëtar, komentoi Gjonbalaj.

Kryeparlamentari Veseli deklaroi në Vatër se shumë shpejt kjo kërkesë do të shqyrtohet dhe garantoi se brenda dy muajve Jakup Ferri do të shpallet hero kombëtar nga shteti i Kosovës.
Nga atmosfera e krijuar aty në takim shpërtheu i madhi Gezim Nika duke kënduar një refren të këngës, për Jakup Ferrin, duke ndezur atmosferën e takimit.
Esad Gjonbalaj tha për Diellin se të njëjtën kërkesë do t’ia bëjë edhe shtetit të Shqipërisë. Do t’i drejtohem presidentit Meta sepse gjate kohës se diktuarës Jakup Ferrit i ishte mohuar ky titull, tha Gjonbalaj.

Editori i Diellit e njohu Kryeparlamentarin me historinë e Vatrës.

Kryeparlamentari shënoi në librin e vizitorëve: Në Vatrën Shqiptare gjeta të gjallë shpirtin e atdhedashurisë për vendin dhe Kombin; gjeta të ndezur idealin e atyre burrave që themeluan Vatrën dhe i paraprinë shpalljes së Pavarësisë së Shqipërisë, gjeta përpjekjet shekullore të Vatrës për ti shërbyer Kombit, gjeta të ndezur shpirtin Kombëtar për forcimin e demokratizimin e Shtetit të pavarur të Kosovës, ku kontributi i shqiptarëve të Amerikës, mbetet gurë-themeli. Por asgjë nuk përfundon këtu; Shqiptarët nuk do të ndalen në rrugëtimin e vet të lirë. Shqiptarët do të jenë gjithëmonë mirënjohës vendit të Lirisë dhe demokracisë, Shteteve të Bashkuara të Amerikës. Largohem nga Vatra plot emocione. Faleminderit!

Kryetari i Kuvendit të Republikës së Kosovës

-Kadri Veseli- Firma

Me fotografime me Kryeparlamentarin dhe me një fotografi të përbashkët është mbyllë takimi i Vatrës me Kryeparlamentarin Kadri Veseli.

*Per me shume fotografi shihni ne Facebook

Ta çojmë përpara amanetin e dëshmorëve

December 9, 2018 by dgreca

Veseli nderon vëllezërit Bytyçi: Ta çojmë përpara amanetin e dëshmorëve/

Kryetari i Kuvendit të Republikës së Kosovës, Kadri Veseli, gjatë qëndrimit në New York, së bashku me ish-bashkëluftëtarët nga Batalioni “Atlantiku”, ka bërë homazhe dhe ka vendosur lule pranë varreve të tre ish-pjesëtarëve të UÇK-së, vëllezërve Yll, Agron dhe Mehmet Bytyçi, të vrarë nga forcat serbe pas përfundimit të luftës në Kosovë.

Kreu i Kuvendit tha se vet përulja para këtyre tre heronjve, tregon se sa shumë është dashur të jepet për të arritur këtu ku jemi sot.

Veseli tha se liria është e shenjtë dhe e shtrenjtë, prandaj duhet punuar edhe më shumë për ta ruajtuar atë që është arritur dhe njëkohësisht për të vazhduar edhe më fuqishëm në kultivimin e partneritetit me SHBA-të, edhe për faktin se, siç tha ai, ky vend u ka dhënë mundësinë të gjithëve.

“Vetëm 19 vite më herët demonstronit, dilnit në mënyrë ushtarake për t’u nisur në drejtim të rrugëtimit të lirisë, luftës së UÇK-së dhe çlirimit të vendit tonë, Kosovës. Ne do të vazhdojmë këtë partneritet. Jemi falënderues ndaj SHBA-së, ndaj partnerëve tanë dhe do të vazhdojmë bashkarisht për fuqizimin e shtetit. Nuk ka kush që na ndalë”, theksoi kryeparlamentari Veseli.

Kryetari i Kuvendit tha se shteti ynë është i shenjtë, sikurse janë të shenjtë sovraniteti dhe integriteti territorial. Ai shtoi se do të punohet, së bashku me partnerët, që shtetin ta kemi edhe më të fuqishëm në aspektin ekonomik, demokratik dhe atë ligjor.

“Ju duhet të jeni krenarë për kontributin që keni dhënë për lirinë e Kosoves. Ata që na kanë ndihmuar dhe e kanë bërë të mundur që edhe ne që kemi qenë në luftë të luftojmë, duhet të jenë krenarë, për aq sa duhet të jemi krenarë edhe për kombin të cilit i takojmë”, tha Veseli.

Kreu i Kuvendit tha se duhet ruajtuar dhe çuar përpara amaneti i këtyre tre heronjve, të rënë në altarin e lirisë.

“Jam shumë krenar që sot, si bashkëluftëtar i tyre, bashkëluftëtar i juaji, vij në krye të institucionit të përfaqësuesve të popullit të Kosovës, Kuvendit të Republikës së Kosovës, të ndajë dhe të përkulemi bashkarisht para sakrificës së popullit tonë, para këtyre heronjve të lirisë. Lavdi heronjve të UÇK-së, lavdi sakrificës së popullit tonë”, tha kryetari i Kuvendit, Kadri Veseli.

STUDENTË DEMOSTRUES , JEMI ME JU

December 8, 2018 by dgreca

17 asllani 1 studentet

NGA ASLLAN BUSHATI/

Por, para se të flasim direkt për demostratat e studentëve të këtij dhjetori, (të cilat dukshëm ju ngjajnë atyre të vitit 1990-të), do të parashtrojmë një tezë se: a ka gisht opozita në të gjitha ngjarjet politike të kohëve të fundit në Shqipëri dhe nëse po sa e përfshirë është ajo në drejtimin dhe nxitjen e tyre?

Për të patur një mendim më të qartë, më është dashur të ndjek disa portale, gazeta dhe emisione televizive. Më është dashur tju telefonoj disa miqve në diasporë e në trojet etnike, të bisedoj me disa vatranë e miq të Vatrës duke i pyetur konkretisht se: a) A është kauz e qëndrueshme që opozita të mbështesë mosshembjen e Teatrit Popullor, një godinë në degrading e sipër? Pothuaj të gjithë janë përgjigjur “jo”. Po nëse qeveria manipulon disa artistë dhe prapa shembjes së Teatrit ka një aferë korruptive disa milionëshe me grabitje teritori me 7-8 kulla shumkatëshe? Të gjitha përgjigjet ishin “po është kauz”.

b) A është kauz e qëndrueshme që opozita të mbështes mos prishjen e disa ndërtimeve (me dhe paleje) në gjurmën e miratuar të unazës së re të Tiranës nga Sheshi “Shqiponja” e deri tek pallati me shigjeta e më gjërë? Përgjigja është “jo”. Po në se prapa këtij segmenti fshihet një aferë korruptive disa milionëshe me dokumenta të falsifikuara (pa marrë para syshë se qeveria po mashtron disa individë të vecantë)? Përgjigja është: ja vlen të këthehet në kauz.
c) Për” Rrugën e Kombit” qeveria vendosi taksë dhe opozita mbështeti protestat e qytetarëve të Prefekturës së Kuksit. Ndërkohë qeveria uli taksën e kuksianeve , por e la në fuqi taksën për të tjerët dhe shqiptarët e Kosovës . Përgjigja është : kjo është kauz e lënë përgjysëm nga opozita.
d) Ish Presidenti dhe ish Kryeministri i Shqipërisë Zoti Sali Berisha ju bëri thirrje të hapur gjithë shqiptarëve të cohen në këmbë deri në mosbindje civile për largimin nga skena politike të Qeverisë Rama se po e shkatërron cdo gjë të mirë në këtë vend dhe se me të nuk mund të shkohet në asnjë lloji zgjedhje? Opozita nuk u shpreh në të njejtën formë si Zoti Berisha, por gjithsisht i ftoi shqiptarët në disa forma e mënyra të kuptojnë realitetin dhe të reagojnë. Edhe kjo pranohet si opsion kauz vepruese e opozitës
e) Qeveria e Edi Ramës do të mbahet mend gjatë për: kriminalizimin e shumë hallkave qeverisëse, kanabizimi, degradimin e jetës ekonomiko-shoqërore, varfërimin e tejskajshëm të pjesës më të madhe të popullatës , mbështetjen e një grupi oligarkësh dhe korrupsionin, mos hapja e vendeve të reja të punës, vjedhje qindra milionëshe me të ashtuquajturin partneritet publik privat(PPP) , mashtrimin me temën e bashkimit kombëtar duke e larguar vemendjen nga problemet e mprehta të kohës dhe me deklaratën se:”unë do të largohem kur të dua unë dhe jo kur të doni ju”, janë sejcila kauz jo vetëm për opozitën por edhe për shoqërinë civile e mbi të gjitha edhe për një “dhjetor të dytë të lëvizjes studentore”.

Tani le të shikojmë lëvizjen studentore të këtyre ditëve nga disa kënde shikimi. Fillimisht të kujtojmë tam-tamet e trumpetuar gjatë se Qeveria e Edi Ramës ka ndërmarrë disa reformat të rëndësishme në shkallë vendi si : shtetbërja, administrativja, e sistemit drejtësisë, shëndetësi falas, arsimi etj. Në të vërtetë asnjera nuk ka qenë as e plotë, as e mirëmenduar dhe akoma më keq e përfunduar.

Vecanërisht ajo e arsimit e para një viti e gjysëm e pasuruar me një të ashtuquajtur VKM ,shërbeu madje si shtysë që studentët të dilnin në sheshe (jo vetëm për VKM-në, por me kërkesa politike në rritje) dhe ti thonin Qeverisë Rama-zbythu. Kjo na solli në fokus dhjetorin e 1990-ës ku fillimisht studentët parashtruan kërkesa ekonomike, për drita ujë etj dhe më pas kërkesa për ndryshim të regjimit të cilën e realizuan.

Duke e parë situatën të rrezikëshme e në zhvillim, Qeveria u tërhoq nga një pjesë e VKM-së dhe i ftoi studentët të zgjedhin një përfaqësi për të biseduar (në fakt për ti mashtruar). Studentët nuk pranuan ofertën mashtruese ,por thanë:”hajdeni ju në shesh e të bisedojmë”duke patur një kujtesë të keqe me hilet e dikurëshme të Ramiz Alisë.

Kjo tregoi se midis Qeverisë dhe studentëve ka krizë besimi, por pse jo edhe përfaqësimi që mund të manipulohej nga Edi Rama. Sepse ky i fundit, është mjeshtër i manipulimit dhe është sjellë herë si patriark e herë si shërbëtor, herë si perandor e herë si rob lufte, herë si mbret e herë si klloun, herë si arrogant e herë si i përulur. Në mendjen e tij ka mbizotruar mendimi se shqiptarët nuk kanë shpirt protestues, por kanë shpirt largimi nga ky vend. Kështu reagimi i studentëve ka qenë për të dhe qeverinë e tij ,ndoshta i papritur dhe i pamenduar për fuqinë që ajo mbart.

Edi Rama me klanin e tij, fillimisht e ka marrë si të lehtë lëvizjen studentore, por kur ajo shpërtheu në të gjitha universitetet dhe se kur u tha se nesër është premtuar se studentëve do tju bashkangjiten edhe prindërit e tyre , situate u bë komplekse dhe tronditëse. Më pas u tha se do të ngihen në protesta mjekët dhe infermjerët, pas tyre biznesi i vogël dhe pak më pas edhe të punësuarit në bujqësi e blegtori etj, atëherë Edi Rama gjej vrimë ku të futesh.

E thënë me fjalë të tjera ti Edi Rama i ke fajet vetë, se u shkatërrove cilësinë e jetës shqiptarëve, e përdore pronën dhe parat publike për qefet e tua dhe të klanit që të rrethon. U premtove shqiptarëve shendetësi falas dhe i mashtrove madje dhe i sëmure me ilace të skaduara nga depozitat fundërrina të shteteve të tjera. E shkatërrove arsimin, policinë, prokurorinë, gjykatat duke e këthyer vendin në një katraueë, me nivelin më të ulët të jetesës në Europë. Para pesë vitesh një familje normale blinte dy kilogramë mish në javë, kurse sot ajo blenë 200 gramë. Një rrobaqepës priste veshje të reja të stileve të ndryshme, sot bënë vetëm arnime. Pse, vetëm nga varfëria dhe keq qeverisja.

Të gjitha këto kanë ardhur se Ju dhe qeveritarët tuaj Zoti Rama, keni vjedhur e vazhdoni ta vjedhni këtë popull. Individi ndjehet i trembur,i vetmuar dhe i shantazhuar nga ju dhe nga fakti se nuk ka institucione drejtësie që ti mbrojë. Por diaspora nuk ka frikë tju a përplasi këto në fytyrë.

Protestat e studentëve kanë si synim goditjen e korrupsionit dhe keq qeverisjen, mashtrimin e neopotizmin, ndryshimin e mentalitetit primitiv te qeverisjes se unë jam zot e bëj ctë më dojë qejfi. Ky është fillimi që sa do që të manipulohet nuk do të ndalet.

Dhe së fundi protestat nuk kanë cfaqur liderët e tyre. Nga ky këndshikimi na lihet hapsira të hamendësojmë se a është opozita pas tyre apo liderë të rinj janë në formim e sipër. Në formë duket sikur opozita është e mënjanuar si të gjitha partitë e tjera , kurse në brendi me siguri qe ajo po gjeneron energji per zhvillime të mëtutjeshme.

Kjo qeveri ka bërë shumë ”zollume” duke shkelur mbi interest kombëtare e publike. Prandaj shtyrja e saj drejt theqafjes nga studentët, minatorët, naftëtarët. infermjerët, biznesi i vogël etj, do ti bëjë mirë të sotmes dhe së ardhmes së Shqipërisë. Kjo qeveri nuk ka mjete monetare për të bërë asgjë, prandaj mos u mashtroni të nderuar student dhe qytetarë të Shqipërisë. Përpara dhe vetëm përpara. Keni edhe gjithë mbështetjen e diasporës.