FRYMA E FJALËS SË LIRË

September 18, 2018 by dgreca

Nga Frank Shkreli*/

Përshëndetje dhe falënderimet e mia të gjithëve për pjesëmarrjen tuaj. Një falënderim i veçantë u shkon folësve për fjalët e tyre fisnike. E ndjejë veten tepër të nderuar me pjesëmarrjen tuaj në këtë bashkbisedim vëllazëror. Me disa prej jush, kam pas nderin dhe privilegjin të takohem, kryesisht, në rrethana zyrtare, por edhe shoqërisht, gjatë 30-viteve të periudhës post-komuniste, këtu në Tiranë, në Washington ose në Nju Jork, duke filluar nga marsi e prilli i vitit 1991, menjëherë pas rivendosjes së marrëdhënieve diplomatike midis Shqipërisë dhe Shteteteve të Bashkuara. Fillimisht, më lejoni të falënderoj, në mënyrë të veçantë, dy individë, miq dhe kolegë të mij të ngushtë, të cilët kanë mundësuar këtë bashkbisedim vëllazëror sot me ju dhe të cilët njëherazi edhe kanë sponsorizuar botimin e tre vëllimeve të librit, “Demokracia nuk pret”: Botuesin e gazetës Telegraf, Z. Agim Çiraku dhe Kryeredaktorin e kësaj gazete, Z. Engjëll Musai. Në të vërtetë, po të mos ishte gazeta Telegraf dhe udhëheqsit e saj, nuk besoj se do të isha sot këtu para jush. Ishin Ëngjëlli dhe Agimi ata të cilët para më shumë se 10-vitesh më ftuan të bashkpunoja me gazetën Telegraf. Ata më kanë inkurajuar dhe më kanë mbështetur pa ndërprerje dhe pa rezerva, megjithë pikëpamjet e mia politike që shpesh mund të jenë ndryshe nga ato që mbizotërojnë në hapësirat e gazetarisë shqiptare.

Ishte gjithashtu ideja e Agimit dhe Engjëll që shkrimet e mia, të botuara rregullisht në gazetën Telegraf, të përmblidheshin në këto tre vëllime që kemi përpara. Vëllimi i parë, “Demokracia Nuk Pret” — është botuar para një viti nga Shtëpia botuese, Morava — të cilën gjithashtu e falënderoj sinqerisht edhe për botimin e vëllimeve II dhe III.

Agimi dhe Engjelli më kanë dhënë absolutisht dorë të lirë dhe pavarësi të plotë në përzgjedhjen e subjekteve si dhe përmbajtjen e lëndës. I falënderoj nga zemra dhe u jam mirënjohës për gjithmonë, për miqësinë, respektin dhe kujdesin që kanë treguar ndaj meje.Siç e dini shumë prej jush, unë, kam punuar pranë Zërit të Amerikës për 30-vjetë, ku bashkë me shumë kolegë gjatë viteve, jemi përpjekur të japim kontributin tonë modest në shërbim të zhvillimeve demokratike të Atdheut të parëve tanë dhe të forcimit të marrëdhënieve midis dy kombeve tona mike. Në Zërin e Amerikës, për më shumë se 7 dekada të ekzistencës së tij – u përpoqëm t’a bëjmë këtë me fuqinë e fjalës së lirë, në shërbim të së vërtetës.

Është në këtë frymë të fjalës së lirë, të vërtetës dhe objektivitetit, që jam përpjekur të shkruaj edhe për gazetën Telegraf dhe media të tjera edhe pasi kam dalë në pension nga Zëri i Amerikës, përfshirë shkrimet e përmbledhura në këto tre vëllime të “Demokracia nuk pret”.

Gjithë jetën jam munduar t’i paraqes mendimet e mia në frymën e vëllazërimit, pa urrejtje, pa sharje e pa ofendime ndaj askujt dhe gjithmonë duke ndejtur larg përçarjeve të momentit, por duke u munduar njëkohsisht të pasqyroj virtytet më të shëndosha të kombit tonë, në një frymë të promovimit të dialogut dhe të mirëkuptimit midis shqiptarëve.

Ata që mund të kenë ndjekur shkrimet e mia modeste, kanë venë re se në ‘to jam përpjekur të pasqyroj dhe të promovoj, ndër të tjera, dëshirën e shumicës së shqiptarëve për integrim të plotë në strukturat politike, ekonomike dhe ushtarake euro-atlantike — si një komb që ndien thellësisht, në palcën e tij, nevojën e lartësimit moral dhe qytetar, duke theksuar se ai në vetvete, i ka të gjitha aftësitë dhe mundësitë për t’u rreshtuar me kombet më të përparuara.

Por, duhet të jemi të sinqert me veten dhe me tjerët se shqiptarët i ka penguar diçka që të zenë vendin e tyre aty ku u takon, me kombet e tjera, se pranvera e demokracisë shqiptare, si në Shqipëri, në Kosovë, ashtu edhe anë e mbanë trojeve shqiptare, nuk ka çelë ende lulet që prisnim dikur e për të cilat presim gjithnjë. Prandaj kemi ruajtur gjithnjë titullin, “Demokracia nuk pret” për të tre vëllimet – një titull që në të vërtetë është sugjeruar nga miku im, Dr. Halim Kosova. Shqiptarët kurrë më parë në historinë e tyre nuk kanë qenë më të lirë se janë sot, por zhvillimi i demokracisë së vërtetë është diçka tjetër. 30-vjetë më parë, Shqipërinë e donim si e gjithë Evropa.Është e drejtë e secilit prej nesh që të interpretojmë, të analizojmë dhe të gjykojmë tranzicionin politik post-komunist, pasi këtë na e mundëson kjo demokraci, sado e brishtë, cilido qoftë mendimi ynë për zhvillimin e saj të deritanishëm. Edhe unë jam munduar që në shkrimet e mia – në mënyrën më modeste — të them fjalën time – megjithse larg gjeografikisht, me Shqipërinë, me Kosovën dhe me trojet tona në përgjithësi, por shumë afër me zemër — dhe për këtë mundësi gjej rastin të falënderoj edhe lexuesit për mbështetjen e tyre të vazhdueshme.Përveç zhvillimeve demokratike në trojet shqiptare, ndër subjektet e tjera që jam përpjekur të trajtojë shpesh janë edhe marrëdhëniet historike dhe rëndësia e tyre, midis Shteteve të Bashkuara dhe Kombit shqiptar. Jam munduar gjithashtu të kujtoj edhe personalitete të njohura politike dhe intelektuale, jo vetëm të diasporës shqiptare, por edhe të tjerë, anë e mbanë trojeve shqiptare, të cilët ish-regjimi komunist i kishte përjashtuar nga historia, por të cilët, ma merrë mendja mua, se duhen vlerësuar për kontributin e çmueshëm të tyre, në historinë e Kombit shqiptar.Kam venë në dukje gjithashtu edhe veprimtarinë e personaliteteve moderne të politikës amerikane dhe rolin e tyre në historinë e re e të vjetër të shqiptarëve — dhe mbështetjen e tyre të sinqert për të drejtat bazë të njeriut për shqiptarët në trojet e veta. Miqë të Kombit shqiptar pra, të cilët janë shquar me dekada, sidomos për ndihmesën e tyre historike për lirinë dhe pavarësinë e Kosovës, por njëkohësisht edhe si promovues të forcimit të marrëdhënieve midis dy kombeve tona dhe të integrimit të shqiptarëve në organizmat euro-atlantike.

Lidhjet shqiptaro-amerikane, për të cilat kam shkruar një numër artikujsh gjatë viteve, janë aq të vjetra sa është edhe diaspora shqiptare atje. Ato kanë filluar në vitet e para të shekullit të kaluar, në kohën e kolosëve të Federatës Pan-Shqiptare VATRA, Fan Nolit dhe Faik Konicës. Atëherë, si edhe më vonë pas shembjes së komunizmit në Shqipëri si dhe para dhe gjatë luftës në Kosovë — komuniteti shqiptaro-amerikan, ka luajtur dhe vazhdon të luaj rolin kryesor në çimentimin dhe përparimin e mëtejshëm të këtyre marrëdhënieve, të cilat diaspora shqiptare në Amerikë –pa dallim orientimesh politike — i ka konsideruar dhe i konsideron ato gjithmonë si të pa zevëndsueshme për interesat jetike të Kombit shqiptar.Një subjekt tjetër që jam përpjekur të trajtoj, nga koha në kohë, janë edhe marrëdhëniet ndërkombëtare dhe se si ato prekin interesat shqiptare, sidomos këtu në hapësirën e Ballkanit Perëndimor. Jam munduar të jap alarmin për shtimin në rritje e sipër të përhapjes së influencës së Rusisë së Putinit dhe të Turqisë së Erdoganit në trojet shqiptare. Në atë mënyrën time, kam paralajmëruar edhe mbi rrezikun e flirtimit të autoriteteve të larta shqiptare me udhëheqsit autoritarë të këtyre vendeve, si diçka që nuk është në interesin afat gjatë të Kombit shqiptar.

Të drejtat e njeriut në përgjithësi, liria e shtypit dhe liria e fjalës në veçanti, jo vetëm për shqiptarët por për të gjithë popujt e botës, janë një subjekt që më ka interesuar gjithë karierën time. Viktimat e komunizmit ndërkombetar dhe të atij shqiptar si dhe të drejtat e tyre, atëherë dhe sot, janë diçka që i kam pasur gjithmonë afër zemrës.

Për të gjitha këto subjekte, në mënyrën time modeste, në shkrimet e mia kam pasqyruar mendimet dhe qëndrimet e mia personale por edhe të atyre të cilëve, për arsye të rrethanave historike nuk u është dhënë mundësia as e drejta të flasin për veten dhe të shprehin lirisht mendimet e tyre.

Por, në shkrimet e mia, mos u mundoni të gjeni promovimin e ideve ose të qëndrimeve të shumicës, ose pakicës politike, ose preferencat e të fuqishëmve dhe të autoriteteve qeveritare, të cilës do palë qoftë, sepse nuk do t’i gjeni në shkrimet e mia. Objektivi im gjithmonë ka qenë dhe është, për të mos qenë kritik ose pesimist, vetëm për hir të qenët kritik, por me qëllim për të qenë gjithmonë i qartë në mendime, ndërtues dhe jo shkatërrues me fjalë as me vepra.

Prandaj, ashtu siç përpiqem të përfundoj shumicën e shkrimeve të mia me një frymë ndërtuese, më lejoni ta mbyll këtë bisedë me një notë optimiste. Nga njëherë gjatë këtij tranzicioni të tej-zgjatur, shumë vetave u duket, ndoshta me të drejtë, sikur dielli ynë i demokracisë së vërtetë të ketë humbur rrugën në vranësirat e jetës politike shqiptare, ose të pakën ai diell të ketë devijuar nga rruga që duhej të ndiqte në jetën tonë post-komuniste. Por, megjithë vështirsitë, me të cilat përballen sot shqiptarët, si popull dhe si komb, dhe megjithë kritikat e mia ndaj klasës politike të këtyre 28-vjet post komunizëm, gjithmonë qëllim-mira, e që mund t’i keni lexuar ndonjëherë edhe në shkrimet e mia modeste, sidomos ndaj disa fenomeneve politike shqiptare — unë jam i bindur se dielli i demokracisë shqiptare nuk e ka humbur rrugën, as nepër “vranësirat” politike të këtij tranzicioni, por mendoj se, mbi të gjitha, me besim në vetvete, nodnëse me shumë sfida përpara, ky diell do udhëheq botën e re shqiptare drejtë një të ardhme më të bukur për fatin e Kombit.

Rrethanat dhe sfidat e sotëme politike, ekonomike, shoqërore e të tjera, me të cilat përballet Kombi shqiptar, mund të duken të ndërlikuara, nganjëherë të rënda dhe kaotike për fisin shqiptar, siç janë mungesa e bashkpunimit dhe dialogut politik, pështjellimi i ideve, dhe grindjet e kacafytjet politike midis partive politike dhe përfaqsuesve të tyre në kuvendin e Shqipërisë dhe të Kosovës. Por, Ernest Koliqi, në kohën e tij, të gjitha këto probleme dhe sfida i ka cilësuar si, “Dëshmi e një gjallënie të pashueshme në gjakun arbnuer – që shërbejnë si shkas farzues e gratçuer n’errësi të nenvetëdijes së Kombit, të cilat njëkohësisht sajojnë fytyrën e re të tij, në pasqyrë të moteve të reja.”

Një fytyrë e re në pasqyrën e moteve të reja për Kombin Shqiptar, është lutja dhe shpresa ime dhe e të gjithë shqiptarëve që ia duan të mirën Kombit të vet, por Demokracia nuk pret gjithmonë, siç sugjeron edhe titulli i tre vëllimeve që kemi përpara.

Por, megjithë sfidat me të cilat përballen shqiptarët sot, ia vlen të jemi optimist për një të ardhme më të mirë e më të bukur, sidomos në këtë vit kushtuar Heroit tonë Kombëtar, Gjergj Kastriotit-Skenderbe – se Kombi shqiptar do të dalë ngadhnjyes mbi të gjitha sfidat me të cilat përballet sot. Shkrimtari Ismail Kadare, me rastin e Shënjtërimit të Nënë Terezës ka thënë: “Gjergj Kastrioti, simbol i vullnetit tonë për liri dhe qytetërim evropian, libri i Gjon Buzukut, mëshirimi i etjes së shqiptarëve për kulturë dhe dritë, dhe Nënë Tereza — mëshirimi ynë i madh i harmonisë, përdëllimit dhe dashurisë për popujt dhe njerëzimin mbarë — janë vlerat tona morale ato që do të na shoqërojnë përherë në rrugëtimin tonë të madh”, drejt moteve të reja.

Ju falënderoj nga zemra për pjesemarrjen, respektin dhe për durimin. Zoti qoftë gjithmonë me Shqiptarët!

*FJALA ME RASTIN E PROMOVIMIT TË TRE VËLLIMEVE:

DEMOKRACIA NUK PRET

Tiranë, 11 shtator 2018

SHBA-Kosovë, shkëmbim i kulturave, njohurive dhe ideve

September 18, 2018 by dgreca

-Kryeministri Haradinaj priti në takim përfaqësuesit e organizatës Kosovo Hope. Është njoftuar për punën dhe aktivitetet e e kësaj organizate e cila në fokus ka shkëmbimin e kulturave, njohurive dhe ideve, ndërmjet Kosovës dhe Shteteve të Bashkuara të Amerikës, veçmas ndihma dhënë institucioneve shëndetësore, përmes sjelljes së mjekëve amerikanë për shërbim në Kosovë dhe ndihma arsimore përmes programeve të këmbimit/PRISHTINË, 18 Shtator 2018- Gazeta DIELLI/ “Diplomacia më e mirë për Kosovën është shkëmbimi i studentëve përmes programeve të profilizuara. Kjo që po e bënë Hope Kosova është për t’u çmuar dhe Qeveria e Kosovës do të shoh mundësitë për t’i ndihmuar nisma të tilla”, kështu tha Kryeministri Ramush Haradinaj pasi priti në takim përfaqësuesit e organizatës “Kosovo Hope” Berat dhe Valdete Gegaj dhe disa nxënës të përzgjedhur për udhëtimin në Amerikë në programin e kësaj organizate.

Kryeministri Haradinaj nga përfaqësuesit e kësaj organizate është njoftuar për punën dhe aktivitetet e saj e cila në fokus ka shkëmbimin e kulturave, njohurive dhe ideve, ndërmjet Kosovës dhe Shteteve të Bashkuara të Amerikës, veçmas ndihma dhënë institucioneve shëndetësore, përmes sjelljes së mjekëve amerikanë për shërbim në Kosovë dhe ndihma arsimore përmes programeve të këmbimit.Kryeministri Haradinaj tha se Qeveria e Kosovës është duke punuar me përkushtim që rinia e Kosovës të ketë një të ardhme më të mirë.“Programet e shkëmbimit dhe iniciativat e tilla janë të mirëseardhura dhe do ta kenë mbështetjen time dhe të Qeverisë të cilën unë e udhëheq”, the kryeministri Haradinaj duke i përgëzuar për punën e tyre.

Më tej kryeministri Haradinaj tha se shkëmbimet e përvojave ndërmjet studentëve, mjekëve, oficerëve dhe shumë profileve tjera ndërmjet Kosovës dhe Shteteve të Bashkuara të Amerikës, janë një mundësi e mirë për avancimin e gjithanshëm të gjeneratave të reja.

Përfaqësuesit e organizatës “Kosovo Hope” Berat dhe Valdete Gegaj, falënderuan kryeministrin Haradinaj për pritjen dhe kërkuan mbështetjen e tij dhe të Qeverisë në misionin e organizatës së tyre për ndërtimin e urave të komunikimit ndërmjet popujve dhe komuniteteve të ndryshme./b.j/

Kosova dhe BE-ja duhet të qëndrojnë afër

September 17, 2018 by dgreca

Në Prishtinë, Komisioni Parlamentar për Marrëveshjen e Stabilizim-Asociimit /
Picula: Kosova dhe BE-ja duhet të qëndrojnë afër/

1 Veseli Picula 2 ok harad kuv 2 ok veseli picula 1 Pcula 1 Mbledhja e qev me Picula

-Në Prishtinë po mbahet sot e neser mbledhja e pestë e Komisionit Parlamentar për Marrëveshjen e Stabilizim-Asociimit Bashkim Evropian-Kosovë/

–Kryesuesi i delegacionit të Parlamentit Evropian, Tonino Picula, tha se Kosova dhe BE-ja duhet të qëndrojnë afër, ndërsa konfirmoi mbështetjen për Prishtinën zyrtare të delegacionit që ai drejton, në të gjitha fushat, me theks të veçantë, liberalizimin e vizave për qytetarët e Kosovës

PRISHTINË, 17 Shtator 2018-Gazeta DIELLI-B.Jashari/ Komisioni Parlamentar për Marrëveshjen e Stabilizim-Asociimit BE-Kosovë, i cili përbëhet nga deputetë të Kuvendit të Kosovës dhe të Parlamentit Evropian, nisi sot pasdite mbledhjen e pestë dyditëshe në Prishtinë. Kryesuesi i delegacionit të Parlamentit Evropian, Tonino Picula, tha se Kosova dhe BE-ja duhet të qëndrojnë afër, ndërsa konfirmoi mbështetjen për Prishtinën zyrtare të delegacionit që ai drejton, në të gjitha fushat, me theks të veçantë, liberalizimin e vizave për qytetarët e Kosovës.Para fillimit të mbledhjes, kryetari i Kuvendit të Republikës së Kosovës, Kadri Veseli, priti në takim delegacionin e Parlamentit Evropian, anëtarë të Komisionit për Marrëveshjen e Stabilizim-Asociimit BE-Kosovë, të kryesuar nga Tonino Picula.Në emër të qytetarëve dhe institucioneve të Kosovës, Kryeparlamentari Veseli falënderoi eurodeputetin Picula dhe anëtarët e tjerë të delegacionit për mbështetjen e pakursyer ndaj Kosovës dhe për vendimmarrjen e fundit të Parlamentit Evropian për procesin e liberalizimit të vizave për qytetarët e Kosovës.Veseli tha se ky delegacion ka dhënë kontribut të çmuar në arritjen e MSA-së për Kosovën, ndërsa tani si pjesë e komisionit të përbashkët me delegacionin e Kuvendit të Kosovës, përbën një forum të pazëvendësueshëm në mbështetje të Kosovës.“Ky takim i radhës që po mbahet mes dy komisioneve tona që merren me zbatimin e MSA-së bëhet në atmosferën shumë pozitive të krijuar pas përgjigjes pozitive që ka marrë Kosova për liberalizimin e vizave. MSA-ja ishte hapi parë i rëndësishëm në rrugëtimin e Kosovës në integrimin e saj evropian. Kosova është tërësisht e përkushtuar në vizionin e saj nacional për tu bërë pjesë e Bashkimit Evropian. Ne besojmë në këtë vizion. Nuk kemi asnjë dilemë dhe as nuk mendojmë në alternative tjerë strategjike. Ky përcaktim për të ardhmen i ka rrënjët në identitetin evropian të popullit dhe qytetarëve tanë”, theksoi kryeparlamentari Veseli.Ai po ashtu tha se liberalizimi i vizave do të shënojë një input të ri në marrëdhëniet e Kosovës me Bashkimin Evropian.Mbledhja në Kuvendin e Republikës së Kosovës, në sesionin e parë të punues me fillim sot pasdite në orën 16:00 kryesohet nga Memli Krasniqi, kryetar i delegacionit të Kosovës dhe Tonino Picula, kryetar i delegacionit të Parlamentit Evropian.

Fjalën e hapjes e mban Nataliya Apostolova, Shefe e Zyrës së BE-së / Përfaqësuese Speciale e BE-së në Kosovë, në emër të Përfaqësuesit të Lartë të Bashkimit për Punë të Jashtme dhe Politikë të Sigurisë dhe në emër të Komisionit Evropian

Në mbledhjen e katërt të Komisionit Parlamentar për Stabilizim-Asociim BE-Kosovë, anëtarët e Parlamentit Evropian dhe të Kuvendit të Kosovës u takuan në Strasburg në 17-18 janar 2018.

Komisioni Parlamentar për Stabilizim Asociim BE-Kosovë për herë të parë është mbledhur në Prishtinë në 16-17 maj 2016, në të cilin vit, në 1 prill, nisi zbatimi i Marrëveshjes së Stabilizim Asociimit në mes të Kosovës dhe Bashkimit Evropian, e nënshkruar në 27 tetor 2015 në Strasburg dhe e ratifikuar në Parlamentin kosovar pas pak ditësh, në 2 nëntor.

KRYEMINISTRI HARADINAJ: VOTA PRO KOSOVARËVE ËSHTË VOTË PRO QYTETARËVE EUROPIANË

Kryeministri i Republikës së Kosovës, Ramush Haradinaj, priti në takim delegacionin e Parlamentit Evropian, të kryesuar nga Tonino Picula, i cili po qëndron në Kosovë për të marrë pjesë në mbledhjen e Pestë të Komisionit Parlamentar për Marrëveshjen e Stabilizim-Asociimit BE-Kosovë, i cili përbëhet nga deputetë të Kuvendit të Kosovës dhe të Parlamentit Evropian.
Kryeministri Haradinaj, e njoftoi delegacionin nga Parlamenti Evropian për të arriturat në të gjitha fushat, me theks të veçantë në zhvillimin e qëndrueshëm ekomomik, forcimin e sundimit të rendit dhe ligjit, përmbushjen e agjendës së Reformave Evropiane dhe në fusha të tjera që ndikojnë në rritjen e mirëqenies sociale.Kryeministri Haradinaj në veçanti ka falënderuar deputetët për votën pro liberalizmit të vizave në Parlamentin Evropian, duke thënë se ky konfirmim është lajm i mirë për popullin e Kosovës.

“Vendimi i Parlamentit Evropian pro rekomandimit për heqjen e vizave, ishte lajm i mirëpritur nga institucionet dhe populli i Kosovës, andaj në emër të qytetarëve tanë ju shpreh mirënjohjen të gjitha institucioneve të BE-së për punën dhe angazhimin e tyre që Kosova të jetë pjesë e integrimeve evropiane. Vota juaj pro kosovarëve është votë pro qytetarëve tuaj. Ne jemi të përkushtuar që t’i takojmë vlerave evropiane, besimit evropian dhe një ditë edhe familjes evropiane”, tha kryeministri Haradinaj, duke shtuar se Kosova është e përqendruar që të vazhdojë punën e saj në konsolidimin e brendshëm në të gjitha fushat, marrëdhëniet e mira ndër fqinjësore, dialogun dhe në fuqizimin e partneritetit me vendet e BE-së dhe SHBA-të.

Në këtë takim u diskutua edhe për progresin e Kosovës dhe rezultatet e arritura në implementimin e MSA-së. Kryeministri Haradinaj i njoftoi parlamentarët evropianë për zbatimin e MSA-së, për të cilën tha se ka dhënë rezultate pozitive, dukefalënderuar institucionet e BE-së, në përkrahjen e dhënë në implementimin e masave që duhen ndërmarrë për zbatimin e Reformës së Agjendës Evropiane.

Deputetët e Parlamentit Evropian të kryesuar nga Tonino Picula përshëndetën të arriturat në Kosovë, duke theksuar përkrahjen e vazhdueshme të Parlamentit Evropian në proceset e integrimeve evropiane të Kosovës dhe duke inkurajuar institucionet të vazhdojnë angazhimin e tyre për fuqizimin e brendshëm dhe ndërkombëtar të Kosovës.Pjesë e takimit ishte edhe shefja e Zyrës së Bashkimit Evropian në Kosovë, Nataliya Apostolova, zëvendëskryeministri dhe ministri i Punëve të Jashtme i Republikës së Kosovës, Behgjet Pacolli, ministrja e Integrimit Evropian, Dhurata Hoxha dhe ambasadori i Kosovës në Bruksel, Bernard Nikaj.

***

Kryeministri Haradinaj: Për Axhendën Evropianr, të gjithë jemi të bashkuar

Prishtinë, 17 shtator 2018- Kryeministri i Republikës së Kosovës, Ramush Haradinaj, mori pjesë në takimin e Pestë të Komisionit Parlamentar për Marrëveshjen e Stabilizim-Asociimit BE-Kosovë, i cili përbëhet nga deputetë të Kuvendit të Kosovës dhe të Parlamentit Evropian.
Para të pranishmëve, përfaqësues të Parlamentit Evropian, kryesuar nga Tonino Picula dhe shefja e Zyrës së Bashkimit Evropian në Kosovë, Nataliya Apostolova, kryeministri Haradinaj tha se është shumë me rëndësi të theksohet, se qytetarët e Kosovës, të të gjitha përkatësive etnike e fetare, e konsiderojnë veten evropianë, si dhe qëndrojnë dhe mbështesin integrimin evropian të vendit tonë. “Në këtë fazë të hershme, kemi marrëdhënie kontraktuale me BE-në, përmes MSA-së, por besojmë se ky është vetëm fillimi dhe jemi të angazhuar për anëtarësim të plotë në BE. Me seriozitet e kemi marr agjendën, e cila është pjesë e programit qeveritar. E kemi integruar me prioritetet e marra nga MSA-ja, përmes planit të Agjendës së Reformave Evropian dhe mund të konfirmoj se në fund të tetorit do të përmbyllen prioritetet e para dhe do të vazhdojmë me fazën e dytë të Agjendës së Reformave Evropiane, së bashku”, tha kryeministri Haradinaj, duke u shprehur mirënjohës ndaj të gjithë përfaqësuesve të Parlamentit Evropian për votën e tyre pro heqjes së regjimit të vizave për qytetarët e Kosovës.
Kryeministri Haradinaj shfaqi shpresën se në këtë dinamikë Kosova do të qëndrojë së bashku në trialogun ndërmjet Parlamentit, Komisionit dhe Këshillit. “Ne i dimë detyrat tona. Fuqizimi i sundimit të ligjit, lufta kundër krimit të organizuar dhe korrupsionit, si dhe të qëndrojmë të fokusuar në planin tonë të punës dhe veprimeve këtu. Në këtë drejtim, mund të llogaritni në ne. Ne po punojmë në mënyrë substanciale në fushën e sundimit të ligjit, jo vetëm përmes lëndëve të shënjestruara, por përmes konsolidimit të sistemit të drejtësisë. Nuk duam të jemi vetëm konsumues të sigurisë. U jemi mirënjohës të gjitha vendeve që na kanë ndihmuar, NATO-s, EULEX-it dhe për tërë mbështetjen që kemi marrë. Por, tani ka ardhur koha, që ne të jemi edhe ofrues të sigurisë. Transformimi i FSK-së në ushtri është në shërbim të kontribuimit për sigurinë. Duke u bërë anëtare e NATO-s, ne synojmë të kontribuojmë për sigurinë në rajon dhe më gjerë”, tha kryeministri Haradinaj.Po ashtu, kryeministri Haradinaj, foli edhe për raportet me fqinjët, por edhe për dialogun me Serbinë, duke thënë se Kosova është e interesuar për njohje reciproke përmes marrëveshjes së detyrueshme ligjore. “Kjo njohje nuk duhet të jetë temë e korrigjimit apo lëvizjes së kufijve. Ajo që quhet korrigjim, është një mënyrë për t’u kthyer në të kaluarën tragjike. Ajo që duhet të arrijmë së bashku dhe që shpresojmë të ndodhë ndonjë ditë, është një marrëveshje paqeje. E kaluara jonë ishte tragjike. Plagët janë ende të hapura në vendin tonë. Ky është kontributi më i madh që mund të japë vendi ynë”, tha kryeministri Haradinaj.Po ashtu, kryeministri Haradinaj tha se është i interesuar të arrihet një marrëveshje obligative ligjore ndërmjet Kosovës dhe Serbisë, por jo përmes territoreve, jo përmes kufijve dhe jo duke i bërë thirrje të kaluarës sonë tragjike.“I bëjmë thirrje secilit vendimmarrës në Evropë dhe më gjerë, të mos lejojnë që procesi të shkojë në drejtimin e gabuar dhe që të jenë në kohë për të thënë jo, sepse në të kaluarën vonesat kanë kushtuar me jetë të njerëzve. Ne nuk jemi të interesuar të shohim rajonin dhe Ballkanin të kthehen mbrapa në atë kohë të tragjedive. Ne jemi të ndarë këtu në Parlamentin tonë, pozitë-opozitë, parti të ndryshme, kemi komunitete të ndryshme, Listën Serbe. Kur vjen puna te agjenda evropiane, gjithmonë do ta gjejmë mënyrën që të jemi bashkë. Qytetarët e Kosovës presin nga ne që të bëhemi të gjithë bashkë dhe të sigurojmë perspektiven evropiane të vendit tonë”, tha kryeministri Haradinaj. Në takimin e Pestë të Komisionit Parlamentar për Marrëveshjen e Stabilizim-Asociimit BE-Kosovë, folën edhe bashkëkryesuesi i Komisionit Parlamentar për Marrëveshjen e Stabilizim-Asociimit, njëherësh udhëheqës i delegacionit të Parlamentit Evropian, Tonino Picula, shefja e Zyrës së Bashkimit Evropian në Kosovë, Nataliya Apostolova dhe kryetari i Kuvendit, Kadri Veseli.

PRESIDENTI META PRITET NGA PAPA FRANÇESKU

September 17, 2018 by dgreca

PRESIDENTI META PRITET NË NJË AUDIENCË TË POSAÇME NGA PAPA FRANÇESKU/

VATIKAN- 17/09/18 Presidenti Meta pritet në një audiencë të posaçme nga Papa Françesku

Presidenti i Republikës, Sh. T. Z. Ilir Meta, u prit sot në një audiencë të posaçme nga Ati i Shenjtë, Papa Françesku, në Selinë e Shenjtë në Vatikan.

Presidenti Meta shprehu mirënjohjen e thellë për kontributin e jashtëzakonshëm të Selisë së Shenjtë në rimëkëmbjen shpirtërore e sociale të komunitetit katolik dhe popullit shqiptar, veçanërisht pas daljes së vendit nga izolimi i gjatë komunist dhe vendosjes së pluralizmit në Shqipëri.

Në mënyrë të veçantë Presidenti Meta e falënderoi Papa Françeskun, për lartësimin mbarëbotëror të simbolit më domethënës shpirtëror të kombit shqiptar, Nënë Terezës, përmes shenjtërimit të saj.

Duke shprehur mirënjohjen për vëmendjen e veçantë që Papa Françesku ka treguar për popullin shqiptar, Presidenti Meta, e siguroi Atin e Shenjtë për vokacionin e qartë e të pandryshuar evropian të Shqipërisë dhe shqiptarëve dhe vendosmërinë e tyre për të ecur në rrugën e integrimit evropian.

“Shenjtërimi i Nënë Terezës, si dhe lumturimi i 38 martirëve të Kishës Katolike shqiptare dhe emërimi i At Ernest Troshanit si Kardinal Nderi në Vatikan, na bëjnë krenarë ne shqiptarët dhe na japin më shumë besim e forcë për ta ruajtur e promovuar me vendosmëri e përkushtim bashkëjetesën e harmoninë shembullore ndërfetare e kanonike” – nënvizoi Presidenti Meta.

“Viti Mbarëkombëtar i Gjergj Kastriot Skënderbeut na rikthen në kujtesën tonë jo vetëm marrëdhënien e ngushtë të Heroit tonë Kombëtar me Selinë e Shenjtë, por edhe rolin e tij të pazëvendësueshëm në mbrojtjen e civilizimit evropian duke përcaktuar qartë identitetin evropian të shqiptarëve,” vuri në dukje Presidenti Meta gjatë takimit me Atin e Shenjtë.

Të dy bashkëbiseduesit nënvizuan rëndësinë e jashtëzakonshme që merr në ditët e sotme modeli shqiptar i harmonisë ndërmjet bashkësive të ndryshme fetare, si dhe ranë dakord për të vijuar bashkëpunimin e ngushtë mes Shqipërisë dhe Selisë së Shenjtë për promovimin e mëtejshëm të kësaj vlere në mbarë botën.

Një mirënjohje të veçantë Presidenti Meta e shprehu edhe për mbështetjen e vyer që Papa Françesku dhe Selia e Shenjtë i kanë dhënë Kosovës dhe, ku padyshim lartësimi në ditën e Shën Terezës së Kishës katolike të Prizrenit në Dioqezë, përbën një akt domethënës jo vetëm për komunitetin katolik të Kosovës, por për mbarë shqiptarët.

Presidenti Meta dhe Ati i Shenjtë diskutuan edhe për zhvillimet e fundit në rajonin e Ballkanit dhe rëndësinë e jashtëzakonshme që ka bashkëjetesa ndëretnike dhe fetare në dobi të stabilitetit, sigurisë, paqes dhe mirëqenies të popujve tanë për të mos u rikthyer më kurrë në konfliktet e përgjakshme të viteve 90-të.

Ati i Shenjtë vlerësoi forcën e shqiptarëve dhe përkushtimin e tyre për t’u ringritur shpirtërisht pas periudhës së gjatë të shtypjes dhe ndalimit të besimit, nënvizoi arritjet e deritanishme të Shqipërisë veçanërisht në fushën e lirisë së besimit dhe shprehu mbresat e tij të jashtëzakonshme nga vizita e tij në Shqipëri dhe mikpritja që ju rezervua gjatë kësaj vizite historike.

“Gjatë kthimit nga Shqipëria një nga gazetarët më pyeti se përse kisha zgjedhur të bëja vizitën e parë në Evropë, në Shqipëri, në një vend jo anëtar të Bashkimit Evropian, unë iu përgjigja se zgjodha Shqipërinë për të dhënë një mesazh,” – tregoi Ati i Shenjtë gjatë audiencës së posaçme me Presidentin Meta.

Presidenti Meta dhe Ati i Shenjtë diskutuan gjithashtu edhe për çështjen e mprehtë të emigracionit, luftën kundër varfërisë, rëndësinë e ruajtjes së ambientit dhe kujdesin ndaj familjes dhe veçanërisht ndaj gruas dhe fëmijëve, në këndvështrimin e ndërtimit të një shoqërie më njerëzore dhe të një bote në paqe.

Ati i Shenjtë dhe Presidenti Meta diskutuan mbi rëndësinë e madhe për të siguruar një të ardhme më të mirë për të rinjtë me qëllim ndalimin e fenomenit të largimit nga vendi i tyre dhe mbajtjes larg nga veset, droga dhe fenomenet negative sociale.

“Evropa po përjeton një dimër demografik,” – u shpreh Papa Françesku, ndaj, vendi juaj duhet të mos vuajë nga ky fenomen, i cili kërkon një përkujdesje, përkushtim dhe vëmendje më të madhe në edukimin, arsimimin dhe krijimin e mundësive më të mira për ta.

“Rrallë kam parë”, – tha Papa Françesku gjatë audiencës, “aq shumë të rinj gjatë vizitës sime në Tiranë sa në asnjë vend tjetër e duhet bërë gjithcka që ata të qëndrojnë në vendin e tyre.”

Gjatë kësaj audience të posaçme të Atit të Shenjtë, Papa Françesku, Presidenti i Republikës, Sh. T. Z. Ilir Meta shoqërohej nga familja e tij

LETER NGA SHBA PRESIDENTIT META MBI GENOCIDIN GREK

September 15, 2018 by dgreca

GENOCIDI GREK MBI NJE SHEKULL , HALË NE FYT TË SHTETIT DHE QEVERIVE SHQIPTARE./

I nderuar President i Republikës së Shqipërisë, Shkelqesia Juaj Ilir Meta/

Rrethanat politiko-ekonomike e strategjike ballkanike dhe më gjërë si dhe zhvillimi i rrjedhave të tyre në përgjithësi mbas viteve 1990 ,kur u rivendosën marrdhëniet dipllomatike me shtetet perëndimore dhe vecanërisht me Shtetet e Bashkuara të Amerikës, u kanë sjellë progres të madh shqiptarëve në planin kombëtar me një Kosovë shtet të pavarur e me më shumë të drejta për shqiptarët e tjerë që jetojnë në trevat etnike. Duket qartë se ky do të jetë edhe shekulli i sukseseve për fitimin e të drejtave në planin kombëtar të shqiptarëve.Duke ndjekur me vëmendje dinamikën e marrdhënieve midis Shqipërisë dhe shtetit fqinj,Greqisë sidomos mbas viteve 1990-të, të bën përshtypje heshtja e shtetit dhe e qeverive shqiptare ndaj genocidit më të tmerrshëm të viteve 1913-1914 që ushtria greke e kryeministrit Eleftero Venizellosit vrau dhe masakroi barbarisht popullsinë civile në Shqiprërinë Juglindore.

Shteti grek duke filluar nga viti 1844 ,kur ishte kryeministër Ioannis Kolettis ,shpalli “Megali Idea “ për një Greqi të madhe me kufi deri në teritoret e dikurshme të Perandorisë Bizantine,duke përfshirë edhe trojet shqiptare.Historikisht teoria e “Megalo Ides “është përkrahur vazhdimisht nga të gjithë presidentët dhe qevritë e shtetit grek në të gjitha kohërat deri tek presidenti Prokopis Pavlopulos dhe kryeministri Aleksis Cipras që janë sot në pushtet.

Endërra e Vorio Epirit ,si pjesë e planit “Megalo idea “,është objektiv strategjik më rëndësi të vecantë dhe prespektiv i përhershëm i shtetit grek.Për realizimin e kësaj ideje Institucionet e shtetit dhe të qeverrive greke kanë investuar dhe vazhdojnë të investojnë hapur dhe fshehur. Me luftë ,në vitet 1913-1914 zhvilloi genocidin duke kryer krime të përmasave të mëdha njerëzore dhe materiale.Genocidin e vazhdoi edhe me popullsinë shqiptare që jetonte në zonën e Çamërisë.Vendosi Ligjin e luftës.Në gusht të vitit 1949 kërcënon përseri me luftë me të ashtu quajturin “ provokacion “.

Këto kanë qënë veprimtaritë antishqiptare më të dukshmet,por sa e sa plane,operacione e veprimtari të fshehta që grekët në bashkëpunim me aleatët e vet kanë bërë e investuar kundër vlerave shqiptare duke përvetësuar apo deformuar cdo realitet të vlerave të popullit shqiptar që nga historia jonë e lashtë ,me okupimin e tokave tona dhe vazhdon deri në pretendimet e sotme teritoriale.

Tentativat e qeverisë greke për marrjen e Vorio Epirit me forca ushtarake, duke aplikuar genocid të pastër për pastrim etnik ,u intensifikuan menjëherë mbas shpalljes së Pamvarsisë së Shqipërisë në Nëntor të vitit 1912.Aleatet ;Serbia,Mali i Zi,Bullgaria dhe Greqia , në kuadër të Luftës së Parë Ballkanike ( 1912-1913 ) aplikuan planin sekret për pushtimin e trevave shqiptare.Në dhjetor të vitit 1913 qeveria greke e Venizellosit, e detyruar nga fuqitë e mëdha tërhoqi provizorisht ushtrinë e tij nga Shqipëria Juglindore dhe në fillim të janarit të vitit 1914 u rikthyen përsëri të njëjtat formacione të ushtrisë së rregullt greke që kishin pushtuar me 1913 Shqipërinë Juglindore ,duke shfarrosur me metoda dhe mjete të dhunshme gjithë popullsinë civile në këto zona,por këtë herë ushtria greke u maskua me uniforma civile për të disinformuar dhe përhapur kudo, deri tek ndërkombëtarët ,alibinë se kjo luftë po bëhet mes popullsisë civile të krishtere dhe myslimanëve shqiptarë.Këtë e vërteton edhe deklarimi i kryeministrit grek, Elefteros Venizellos, në Konferencën e Paqes ku në seancën dëgjimore të datës 24 shkurt 1919 dok.# 5, kur flitet për krimet që ushtria e tij kreu në formën e genocidit më të turpshëm të viteve 1913-1914 në Shqiperinë Juglindore, ai ndër të tjera deklaron se sipas tij 15.000 shqiptarët toskë janë masakruar nga shqiptarët violentë të krishterë.

Po ja se cfarë shkruan në ditarin ” Vorio Epiri ” edhe oficeri G.K. i ushtrisë greke, kur ishte në atë kohë vetë kryeministër Elefter Venizellos; …kishim urdhër të prerë nga komanda qëndrore e Athinës,që vrasjet e shqiptarëve duhet t’i bëjmë me mjete të ftohta [ bajoneta,thika,sopata hanxhare]…Ne përdorëm edhe mjetet që kishin shqiptarët në shtëpitë e tyre [sfurk,cengel,litar,zinxhira]…. megjithëse ushtarët tanë ishin të prëgatitur dhe të paguar mire kur ju prisnim kokat njerëzve dhe grave shtatzëna ju canim barkun e ua nxirrnim foshnjat… ulerinte dheu nga britmat…disa ushtarë villnin nga gjaku dhe dezertuan …shumica e popullsisë që ne vrisnim ishin gra,pleq e fëmijë…ishin të cuditshëm ,edhe të shtrirë gati për vdekje si burrat dhe gratë, nuk dorzoheshin…të gjallë e të vdekur i dogjëm që të mos linim shenjë për t’i kujtuar … hasëm vështirësi, pasi priftërinjtë dhe kryepleqtë e zonave nuk na ndihmonin me përjashtim të … një fshati …të Kolonjës.Ishim porositur që të linim ndonjë banor të ikte me vrap apo të fshiheshin e të shpëtonin gjoja nga pakujdesia jonë pasi ne donim që këta t’ju tregonin të larguarve tmerrin që panë me sy,që të ikurit të mos ktheheshin më…. Në fund të ditarit oficeri grek G.K.shkruan…Ishte e vështirë të vrisje cdo ditë njerëz,bëmë detyrën ndaj shtetit tonë,por unë kurrë nuk do ta bëja më këtë shërbim qoftë edhe për Krishtin…( siguroi nga arkiva dhe perktheu AK-Athine)

Fatin e ketij tmerri në mase të madhe fillimisht e provuan zonat e Leskovikut,Kolonjës,Permetit,Korcës,Tepelenës,

Skraparit,Beratit,Gjirokastrës deri në Delvinë e Sarandë.

Nga dokumentacionet e deritanishme vërtetohet se shifra e njerëzve të masakruar dhe vrarë në këto zona nga ky genocid gjatë viteve 1913-1914 është mbi 50.000 shqiptarë.Kulmi i krimeve të genocidit greke u realizua në korrik të vitit 1914 në fshatin Panarit të Korcës.Të gjitha shtëpitë e këtij fshati u kthyen në kasapanë.Ushtria greke dogji të gjallë barbarisht, vrau, theri me sopata,bajoneta,thika e mjete të tjera dhune popullsine civile; pleq,plaka,gra,të rinj e të reja, fëmijë të lindur e të palindur në barg të nënave,kanë përdhunuar dhe kanë marrë peng 47 vajza të cilat me përjashtim të një vajze që u kthye, nuk u gjendën më.Të vrarë,të masakruar e djegur të gjalle jane 375 persona.Mbi 167 të vdekur rrugëve për në ullishtat e Vlorës deri në bregdet.Me qindra familje të tmeruara u shpërngulën përgjithmonë nga fshati dhe u vendosën nëpër trojet më të largëta shqiptare edhe jashtë Shqipërisë si në; Maqedoni,Rumani dhe në Shtetet e Bashkuara të Amerikës dhe nuk u kthyen kurrë më në Panarit.Ushtria greke dogji 647 shtëpi që kishte fshati.Bilanci i ketij genocidi në Panarit ishte tragjik. Kurrë më në këtë fshat deri më sot nuk u rindërtuan më shumë se 200 shtëpi ,pa llogaritur me mijëra bageti dhe pasuri të tjera të grabitura.Në të gjitha këto zona që u përfshinë nga genocidi grek,nuk ka asnjë gjeneratë,familje , fis apo fshat që të mos jetë pjesë e dhimbjes së ketyre krimeve.Nga ky bilanc i dëmeve të mëdha njerëzore dhe materiale,rezulton se pasojat e tyre ndihen edhe sot.

I nderuar President i Republikës së Shqipërise z.Ilir Meta.Shqëtesimi dhe indinjata e popullit të zonës sonë është se të gjithë të vrarët e të djegurit nga ky genocid grek i viteve 1913-1914 në Shqipërinë Juglindore nuk kanë patur dhe nuk kanë asnjehere interesimin,vëmendjen,përkujdesjen,studimin apo evidentimin e shtetit shqiptar dhe të qeverive të tij, qoftë edhe vetëm për statistika apo studime historike.Nuk është folur asnjëherë me grekët për këtë Genocid.Ndaj une dhe shumë të tjerë, nëpërmjet emisioneve televizive dhe shkrimeve, po pasqyrojmë krimet e këtij genocidi që së pari ta njohë këtë genocid vetë shteti shqiptar dhe pastaj bota me gjerë.

Me qëndrimin e deritanishëm, heshtjen,harresën,indiferentizmin,frikën,paaftësinë e paditurinë ndaj genocidit grek ,mos qoftë kjo tradheti , shteti shqiptar bie ndesh me detyrimet kushtetuese si dhe me moralin dhe traditat tona ndaj të vdekurve,pasi genocidi është vrasje masive e qëllimshme e civileve në bazë etnike,nacionale,racore,religjioze apo politike që tentojnë eleminimin fizik të kësaj kategorie njerëzish.Këto krime kanë ndodhur ditën me diell në Shqipërinë Juglindore zoti President,ndajshqiptarëve duhet tu themi të vërtetën se cili është qëllimi i shtetit grek, si mendojnë e veprojnë dhe cfarë kërkojnë dhe bëjnë ata kundër shtetit shqiptar.Tu themi troc shqiptarëve se në thelb të edukimit të ndjenjave kombëtare, shteti grek i rrit dhe i edukon brezat e rinj në shkollë,në politikë,në art,në ushtri dhe fe me ëndrrën e papërfunduar të Vorio Epirit. Kështu një ditë edhe gjeneratat e reja të diasporës shqiptare të mbas viteve 1990 që jeton në Greqi me gjak qindpërqind shqiptar, po nuk ju saqrua qysh tani e vërteta e genocidit grek edhe ata jo vetem se do të humbasin,asimilohen si arvanitasit e lashtë por do të vijë dita që të luftojnë kundër shqipëtarëve dhe e gjithë kjo do të vijë vetëm e vetëm se shteti shqiptar në marrëdhënie me Greqinë nuk po punon në drejtimin e duhur jo vetëm në planin strategjik,por edhe në dinamikën e përditshme,pasi Greqisë i jepet hapësirë për të fallsifikuar faktet historike deri aty sa konsullatave greke ju hapi të gjitha zyrat e pushtetit local, bile edhe zyrat e gjendies civile i vuri në disozicion të punonjësve të asfalias greke.

I nderuar President.

Agjenturat greke mbas viteve 1990 në bashkëpunim edhe me UDB-në sërbe ,ka penetruar shumë në teritorin e Shqipërisë duke patur rezidentura në popullsinë civile nga Tropoja deri në Sarandë dhe në institucionet shtetërore nga Parlamenti i Shqipërisë deri në komunat më të largëta shqiptare.Nga pa aftësia e shtetit shqiptar, mbas viteve 1990 asfalia greke ka mundur që agjenturën e vjetër të kohës së komunizmit që ishin kryesisht të nivelit,barinj,minoritarë,kooperativistë,shoferë,berberë si dhe ndonjë intelektual,sot i ka zvendësuar ata,me deputetë,ministra,priftërinj,profesorë,historianë me flokë të bardha,gazetarë që paguhen në muaj sa fondi i pagave të një bashkie,avokatë,gjykatësa,biznesmenë e nënpunësa të institucioneve të rëndësishme informative e mediatike,gazetareske,emisione televizive,ku disa të vetëquajtur “analistë”, opinionistë” u jepet hapësirë dhe pagesë në televizione për më shumë se 20 vjet,të cilët pasi përmbushën me sukses detyrat e padronëve serbo-grek ,e kane arritur qëllimin duke e maskuar “ helmin e tyre “ në kuadër të “ fjalës së lirë dhe lirisë së mediave”.Me këto veprime publike ata kanë dëmtuar hapur ndjenjën kombëtare duke e quajtur të moralshme e të pranueshme të shahen figurat më të shquara në shekuj të kombit shqiptar si ; Gjergj Kastriot Skënderbeu,Nënë Tereza e etj,duke mbjellë harbutërinë në emisionet e televizioneve kombëtare,duke prishur cdo provë të prokurorisë,duke hedhur tymnaja e duke u bërë freski politikanëve të koruptuar dhe tani janë edhe moderatorë emisionesh.Të gjitha këto vertetojnë se “ fuqinë e pushtetit të katërt “në shqipëri nuk e kanë institucionet mediatike, por padronët.

Ata që mendojnë se nuk duhet të ngrihen këto diskutime me grekët nën pretekstin se janë të vjetra,se nuk është momenti,se ndikojmë në marredheniet me ta ,nuk na japin votën pro në BE etj,janë gabim.Disa historianë dhe arkeologë që Enveri u kishte besuar të shkruanin Historinë e Shqipërisë dhe origjinën e prejardhjes sonë, shkruajtën jo vetëm tre rjeshta në librin e Historisë së Shqipërise ,por i prishën edhe kuptimin këtyre krimeve duke e quajtur atë masakra e Panaritit,masakra e Hormovës,pa shpjegim se kush e vrau këtë popullsi.Ku i lanë mbi 50,000 shqiptarë të vrarë,thua ta kenë harruar këtë gjenocid ?.Arkeologjia shqitare nuk gërmoi aspak jo vetem nën tokë, por as në muzeumet përkatëse.Lind pyetja se edhe në këtë fushë të ketë qënë paaftësi në një kohë kur populli shqiptar nuk la kodër e mal pa gërmuar duke i kthyer ato në fusha pjellore. Të gjitha këto kanë një emërues që ka dëmtuar çështjen kombëtare.Nëse ne shqiptarët nuk respektojmë të vdekurit dhe vecanërisht të vrarët padrejtesisht në shtëpitë e tyre, nuk na respekton askush.Populli grek ka kulture civile dhe jam i bindur se do ta gjejë formën dhe mënyrën për ta respektuar popullsinë shqiptare që të parët e tyre kanë vrarë në ato vite.Prandaj ju si pushtetarë duhet të zgjoheni nga gjumi shekullor dhe ta hiqni atë halën që ju ka ngelur në grykë,pasiheshtja juajpër cdo arsye qoftë jo vetëm që i ka lënë të vrarë e gjallë në breza të poshtëruar, por nga ana tjeter ka favorizuar ekzekutorët.Ndaj i nderuar president aktualisht grekët guxojnë të kërkojnë hapur teritore shqiptare,kërkojnë të mos dëgjojnë më kërkesa dhe emrin Çamëri nga shqiptarët,kërkojnë eshtrat e ushtarëve grekë të qënë e të paqënë , të vrarë në Luftën Italo-Greke e tu ngrenë edhe monumente në tokën shqiptare ,kërkojnë prej shtetit shqiptar më shumë të drejta për minoritetin grek që jeton në Shqipëri,kërkojnë që Himara dhe vende të tjera në Shqipëri të njihen si minoritete greke etj.etj.Këto kërkesa të shtetit grek janë tërësisht pjesë thelbësore e ëndrres greke të Vorio Epirit.

“Nisën të ndërtohen monumentet kushtuar ushtarëve grekë të rënë në luftën kombëtare për çlirimin e Vorio Epirit”-kështu kanë komentuar mediat greke lajmin për ndërtimin e varrezave greke në Shqipëri.

“ Zjarri “ është ndezur dhe tymi i kësaj pune vjen mbrapa.Ndoshta aq kohë larg sa jo vetëm unë dhe Ju z.president nuk do të jemi më gjallë, por edhe shumë breza të tjera pas nesh.Në këto rrethana shteti shqiptar jo vetëm që duhet të jetë korrekt me Kushtetutën e Republikës së Shqipërisë,me legjislacionin e të drejtave ndërkombëtare si palë e denjë ndërshtetërore,por të tregoheni edhe fisnikë e komshi të denjë me fqinjët.

I nderuar President Meta,ka dëshmi dhe prova se një pjesë e ushtarëve dhe oficerëve të ushtrisë greke ,të vrarë apo të ngelur të gjallë në Luftën Italo-Greke në vitet 1940-1941,kanë qenë pjesëmarrës në formacionet e ushtrisë greke në vitet 1913-1914 e janë ata qe kanë kryer genocidin në Shqipërinë Jugelindore. Me këto varreza greke që po ndërtohen në tokën tonë, mbi gjakun,mbi hirin e eshtrave të djegura,mbi aktet e përdhunimeve të të parëve tanë të kryera nga grekët,jo vetëm shpirtërat e të masakruarve nuk do të prehen të qetë, por edhe ne, pasardhësit e tyre brez pas brezi ,nuk do të harrojmë këto krime makabre të grekëve dhe indiferentizmin e pushtetarëve shqiptare që për më shumë se nje shekull nuk kanë qenë të aftë e të zotë që t’ja u bëjnë të ditur popullit grek dhe gjithë botës mbarë se në vitet 1913-1914 ushtria e rregullt e shtetit grek, me kryeministër Eleftero Venizellos, realizoi Genocid të pastër etnik në Shqiperinë Jugëlindore.Edhe pse kanë kaluar 104 vjet, këta njerëz të pafajshëm nuk kanë varre,nuk kane simbole në nderim dhe respekt të tyre.Në këto rrethana shteti shqiptar duhet ta shkruajë të vërtetën e këtyre vrasjeve në Historinë e Shqipërisë , për të cilat nuk është folur deri tani me pretekst banal duke rënë preh e legjendave dhe e përrallave greke.Atyre ju intereson që rishikimin e marrëdhënieve me Shqipërinë ta fillojnë nga vitet 1945, bile duke folur e trajtuar këto probleme butësisht,pasi nëpërmjet kësaj sjellje si dhe kartonit që kanë në BE ,ata kapërcejnë dhe mbulojnë krimet që kanë kryer nëpërmjet Genocidit të viteve 1913-1914 si dhe me mijra vrasje makabre që kanë bërë në kufirin Shqiptaro- Grek nga vitet 1990 e deri më sot me emigrantët shqiptarë. Shteti grek, minimalisht për genocidin që ka kryer ndaj popullsisë civile shqiptare, duhet të kërkoje falje botërisht.

I solla këto informacione pasi të gjitha këto krime i ka paguar gjithmonë me gjak e jetë njerëzish dhe dëme të pallogaritshme materiale vetëm populli ynë shqiptar.

Fakti që unë po ju shkruaj Juve si President i Shqipërisë është jo vetëm se keni këtë funksion,por kam një shpresë tjetër tek ju.Kam besim se gjaku juaj si shqiptar,sado që në këto vite të mbrapshta trazicioni të Shqipërisë tu jetë holluar, si skrapalli që jeni nuk besoj se e keni humbur genin .Pasi Ju edhe sikur jetë mbretërore të keni bërë në Skrapar,nuk besoj se të parët tuaj nuk ju kanë treguar e folur ndonjë histori të dhimshme mbi këto krime makabere që ka bërë greku edhe në zonën tuaj në vitet 1913-1914.

Ajo që unë kërkoj prej Jush i nderuar z.President është një gjë e thjeshtë ,veprim njerëzor,pa kosto .Kërkoj që ju si burrë shteti të ndiheni për një moment qytetar i thjeshtë, t’i përjetoni këto dhimbje dhe këtë fyerje shekullore si gjithe populli,si skrapallinjtë tuaj dhe pastaj jam i bindur dhe kam besim se me funksionin që keni dhe eksperiencën shumë vjecare në politikë, do ta keni të lehtë që të urdhëroni institucionet përkatëse që të bëjnë evidentimin dhe dokumentimin e dosjes së Genocidit të kryer nga ushtria greke në vitet 1913-1914.Keshtu, ju z.President ,do të kryeni detyrën si shqiptari i pare që jeni në Republikën e Shqipërisë dhe me veprimin tuaj do t’ju ktheni respektin,dinjitetin,krenarinë kombëtare të vrarëve dhe ne te gjallëve e keshtu do te kemi mundësinë ne dhe brezat që do të vinë që për shpirtin e tyre në qendrat e qyteteve të Shqipërisë Jugelindore të ndezim ndonjë qiri e të vendosim tufa me lule ne monumentet që do të ngrihen për pasqyrimin e historisë së ketij genocidi.