VASIL PAJÇINI, FIZIKANTI NGA DEVOLLI NE SAN FRANCISKO

May 14, 2018 by dgreca

-Kushtuar fizikantit shkencëtar, qytezarit Vasil Pajçini, me gradën PhD, i cili punon në një kompani të njohur amerikane- /

Nga Fuat Memelli/

Figurat e shquara të Devollit, që kanë lënë gjurmë në Shqipëri e nëpër Botë, më kanë tërhequr e vazhdojnë të më tërheqin vazhdimisht. Është zëri i krahinës tonë të dashur, që më nxit t’i qëmtoj këta njerëz, për t’i bërë të njohur për lexuesit e gazetës e më gjerë. Ne që na qëlloi fati të meremi me gazetari, e kemi për detyrë morale të shkruajmë e të flasim për këta njerëz me të cilët krenohemi. Ata shërbejnë edhe si modele për brezat që vijnë. Këtë rradhe “stacioni” i ndalesës time ishte Qyteza, një fshati i bukur i vendosur në një luginë në prehër të maleve, në Devollin e Sipërm. Sot ajo është tkurur nga largimet e shumta , ashtu si shumë fshatra të tjerë në Shqipëri, por gjurmët që kanë lënë njerzit e saj, nuk mund të shuhen. Ky fshat ka nxjerrë disa figura të njohura siç janë: patrioti Kol Tromara, veprimtar i shquar i “Vatrës” në Amerikë (ka qenë sekretar e kryetar i saj) dhe ka patur disa detyra të rëndësishme në Shqipëri, është pushkatuar nga regjimi komunist dhe sot s’ka varr; aktorët shqiptaro-amerikanë, vëllezrit Xhon e Xhim Belushi; mjeshtri i vallzimit, Pandeli Talko; basketbollisti Pandeli Palko (i riu), ish pjesëtar i ekipit kombëtar; mësuesi enciklopedist, Dhimitër Farmaqi; shkrimtari Petraq Samsuri; Valentina Duka, historiane e njohur dhe sot deputete e PD-së; Nik Vangel, biznesmen me emër në Çikago, etj. Por, sot do ndalem te fizikanti i shquar, shkencëtari, Vasil Pajçini, i cili ka qëndruar larg medias, duke punuar pa zhurmë e bujë. Siç thotë populli “kalliri plot, e mban kokën poshtë”.

DARDHA BIE NDËNË DARDHË

Është kjo një shprehje e vjetër e popullit tonë por që ka dalë nga përvja jetësore, kur pasardhesit vazhdojnë rrugën e të parëve të tyre. Vasili vazhdoi rrugë e babait, Koci Pajçini, i cili ka qënë mësues fizike në Miras. Atëhërë Vasili ishte fëmijë, por qysh atë kohë ze fill ëndra e tij pë t’u bërë fizikan. Ka qënë fëmijë me zgjuarsi të veçantë. Qysh 5 vjet, dinte gjithë kryeqytetet e botës. Duke parë zgjuarsinë e Vasilit, mësuesi i fshatit, Niko Ilo, e regjistroi në shkollën fillore me nxënësit që ishin një vit më i madh se ai. Pas fillores, vazhdon shkollën 7 vjeçare “Bajram Islami-Memelli” të Sinicës, një shkollë e vjetër dhe me tradita. Aty lëndën e matematikës dhe fizikës, e jepte mësuesi enciklopedist, qytezari Dhimitër Farmaqi. Ky mësues, me njohuritë e tij, la gjurmë të pashlyera te Vasili. Rruga e dijes vazhdon në gjimnazin “Themistokli Gërmenji” të Korçës. Duke mbaruar “shkëlqyeshëm” shkollën e mesme , i hapen dyert për të vazhduar degën e Fizikës, në fakultetin e Shkencave të Natyrës. Dashuria qe kishte për dy lëndët: matematikë e fizikë, anoi nga fizika. Ëndra për t’u bërë fizikant, po realizohej. Gëzimi i tij ishte i papërshkueshëm. Një ditë, pasi kishin bërë një kolekium (provim për një pjesë të lëndës), profesori i shquar, Vasil Kuneshka, hyn në auditor dhe pyet :”Kush është Vasil Pajçini?”. Studenti ngrihet në këmbë dhe dëgjon profesorin që thotë :” Bravo Vasil! Kurrë nuk kam patur rastin të korigjoj një provim si ky i joti.” Vasili lumturohet nga ky vlerësim i lartë që i bëri profesor Kuneshka para gjithë studentëve. Edhe studimet universitare, i mbaroi ashtu si shkollat e mëparëshme:” shkëlqyeshëm”.

VITET E PUNËS NË SHQIPËRI DHE….

Në fund të fundit, puna është “barometri” që tregon sa i ke përvetësuar njohuritë e shkollës dhe sa je në gjendje t’i zbatosh ato në praktikë. Megjithëse mbaroi “shkëlqyeshëm” nuk e mbajtën në Universitet, siç kishte ndodhur deri atëherë që student të tillë i mbanin në fakultet. Ai u qetësua pasi atë vit nuk mbajtën asnjë student të tillë. E caktojnë me punë në Ndërmarjen Bujqësore të Hoxharës në rrethin e Fierit, si fizikant për çkripëzimin e tokave që kishin qënë kënetë. U detyrua të mësojë nga e para fizikën e tokës. Megjithë vështirësitë që kishte nga mungesa e paisjeve të nevojshme, la gjurmët e tij gjatë 5 vjetëve që punoi në këtë ndërmarje. Aty u njoh dhe u martua me Vojsavën, e cila u bë jo vetm bashkëudhëtarja e jetës, por edhe mbështetësja në punën e tij.

Ishte viti 1982 kur e transferuan në Institutin e Fizikës Bërthamore në Tiranë. Këtu ai si të thuash, gjeti “shtëpinë” e vet. Në Institut u ngrit një grup pune për aplikimin e rezeve lazer. Fati vazhdoi t’i buzëqeshë. Pas dy vjet pune në Institut, një grup prej tre vjetësh, midis tyre edhe Vasilin, e çojnë për specializim dy vjeçar në Francë në fushën e spektrometrisë “Raman” të gazeve në presion. Pas këtij specializimi, ai tani shkencërisht mund të përcaktonte ecurinë dhe rezultatet e eksperimenteve shkencore. Me përpjekjet e specialistëve të këtij instituti si dhe falë mbështetjes ndrkombëtare, në vitin 1990, në Institutin e Fizikës Bërthamore, u ngrit një sektor lazerash. Ngritja e këtij sektori si dhe mbrojtja e doktoraturës, përbëjnë kapitullin e fundit të punë së tij në atdhe.

…..AMERIKË

Një rrugë e re hapet për fizikantin Vasil Pajçini. Duke patur nënën me dokumenta amerikane, në vitin 1993, vjen në Amerikë. Edhe këtu nuk i ndahet studimeve në fushën e fizikës. Në vitin 1994, fillon studimet në Universitetin e Pitsburgut. Studjon këtu për 5 vjet duke u marë edhe me punë shkencore në spektrometrinë ultraviolet “Raman” të materialeve biologjike në trajtë kristaline. Mbron edhe doktoraturën duke , duke fituar gradën PhD, që është nga më të lartat për kualifikimet në Amerikë. Më pas fillon punë në qendrën e quajtur EAG, në qytetin Synyvale, pranë San Franciskos në Kaliforni, që është djep i qarqeve të integruar si dhe të kompjuterave. Kjo kompani ka degë në të gjithë botën. Këtu ai meret me aplikimin e rezeve “Lazer” e cila quhet “Raman spectroscopy”. Në këtë kompani ai mban titullin” Scientist”- shkencëtar. Është ky një titull i lartë që nderon jo vetëm Vasilin e familjen e tij por edhe Qytezën, Devollin e Shqipërinë. Krahas kësaj pune, kompania e tij kryen edhe punë që përbëjnë sekret shtetëror. Një ndër ata që kryejnë këto punë, është edhe shqiptari Vasil Pajçini. Rrugën e dijes që ndoqi ai, e vazhduan edhe dy djemtë e tij të cilët u shkolluan në Amerikë . Djali i parë, Kostandini, është As.Profesor në një nga universitetet e Ilinoisit në Çikago, ndërsa djali tjetër, Marleni, është doktor radiolog në spitalin e qytetit, Santa Klara. Ja, kjo është hapësira që Amerika, ky vend i lirisë, u krijon emigrantëve.

NOSTALGJI DERI NË DHIMBJE

Kështu e cilëson fizikanti Vasili Pajçini, dashurinë e mallin që ka për vendlindjen, Qytezën ku i “ka rënë koka”. Këtë mall e ka ndier prej vitesh. Siç thotë vetë, kjo ndjenjë ka zënë fill qysh në vitin 1968, kur mbaroi shkollën e Sinicës dhe filloi gjimnazin në Korçë. Qysh atëhere e deri sot, mbeti vizitor në vendlindje. Kur ishte me studime dhe me punë në Shqipëri, shkonte shpesh, por kur ardhi në Amerikë, vizitat në vendlindje janë rralluar, por jo pesha e mallit. Ai mban lidhje me ata pak qytezarë që kanë mbetur në fshat si dhe me qytezarë të tjerë në Shqipëri e nëpër Botë, veçanrisht në Çikago, ku ka një komunitet të madh qytezarësh, që kanë edhe shoqatën e tyre me emrin “Përparimi”, e krijuar qysh në vitin 1923 nga emigrantët qytezarë. Por, siç ka thënë Horaci “ qiellin por jo shpirtin ndryshon ai që shkon përtej detit”. “Magneti” i Qytezës e ka tërhequr dhe e tërheq drejt prehërit të saj. Sa herë shkon aty, shijon bukurinë e fshatit me shtëpi të gurta, dëgjon ison e lumit Devoll që murmurit aty pranë ; dëgjon cicërimat e zogjve; viziton dy kishat e vjetra; prek me dorë dhe shpirt gjithçka që i përket fshatit të tij, për të cilën aktori i madh Xhim Belushi ka thënë: “Qyteza është një fshat i bukur, një nga vendet më magjike e misterioze që kam njohur dhe parë në jetën time…”

Me At Nikolla Markun në Kosovë

May 11, 2018 by dgreca

-Kosovën e sheh si një mrekulli dhe një ëndërr të realizuar…Ashtu si në ardhje, edhe në shkuarje sheshit e kudo në Prishtinë njerëzit e përshëndetnin vëllazërisht priftin ortodoks shqiptar nga Elbasani/

-At Nikolla Marku flet me besim e mirënjohje. Tregon se në në Prishtinë ishte për vizitë mjekësore te Prof. Asc. Dr. Afrim Blyta/

Gazeta DIELLI nga korrespondenti në Kosovë Behlul Jashari/

PRISHTINË, 11 Maj 2018/ Kosovën e sheh si një mrekulli dhe një ëndërr të realizuar, derisa një pasdite maji të vitit jubilar të 10 vjetorit të pavarësisë së shtetit të dytë të shqiptarëve shikonte Sheshin Nënë Tereza të kryeqytetit, Prishtinës, që kishte edhe festë për Ditën e Evropës.

I ardhur nga kryeqyteti e festës gjithëshqiptare të Ditës së Verës, Elbasani, prifti ortodoks shqiptar i kishës “Shën Mëria”, At Nikolla Marku, pinte kafe në teracë restoranti buzë sheshi, ku e takojmë bashkë me Dr. Jusuf Telakun, i cili më kishte njoftuar në telefon për ardhjen e mikut nga Shqipëria, duke më përcjellë kështu edhe përshëndetje nga SHBA-Nju Jorku, të Dr.Gjon Buçajt, vatranit veteran, që deri vitin e kaluar ishte edhe kryetar i Federatës Panshqiptare të Amerikës, Vatra.

“Ishim bashkë në studimet për mjekësi, në Shkup”, tregon doktori për doktorin.

At Nikolla Marku më flet me besim e mirënjohje edhe për një doktor tjetër. Tregon se ishte për vizitë mjekësore te Prof. Asc. Dr. Afrim Blyta, specialist i neuropsikiatërisë, në klinikën e tij AURA per neurologji dhe psikiatri, në Prishtinë.

Në komunikim Dr.Gjon Buçaj më shkruante se edhe në takim e bisedë me mua si korrespondent në Kosovë i Gazetës DIELLI, At Nikolla donte të kishte rast të falënderonte për bujarinë e mjekëve kosovarë, te cilet i kanë bërë vizitat falas.

“Vatra i kemi ndimuar At Nikolles financiarisht në të kaluarën, sepse ai nuk i është nenshtruar peshkopit grek Janullatos, duke ruejtë pavarësinë e Kishës dhe trashëgiminë e Nolit”, shkruhej në mesazh…

Këtë e dija edhe nga shkrimet e shtypit shqiptar gjatë viteve.

At Nikolla Markun e njihja kaherë nga ato shkrime për të e për qëndrimet e tij, që i ka shprehur edhe në shkrimet që ka dërguar vetë ai në organin e VATRËS – Gazetën DIELLI.

“Cila është marrëdhënia juaj me krerët aktualë të kishës ortodokse?”, ishte pyetja në një intervistë në shtypin e Shqipërisë në pranverën e para një viti-2017, në të cilën At Nikolla është përgjigjur:

“Sinodi i shenjtë i krijuar nga Janullatosi nuk e njeh ekzistencën time. Ata e quajnë Kisha Autoqefale Shqiptare, ndërsa ne e quajmë Kisha Ortodokse Autoqefale Kombëtare Shqiptare. Ne e quajmë të tillë sipas parimeve të Fan Nolit dhe Kushtetutës së vitit 1937, kohë kur Patriarkana njohu ortodoksinë autoqefale kombëtare shqiptare të pavarur nga kishat e tjera, sidomos nga ajo greke… Unë nuk e njoh Janullatosin si kryepeshkop…”

Në vjeshtën e vitit 2016 shtypi shqiptar shkruante se, At Nikolla Marku, famullitari i Kishës Ortodokse Shqiptare “Shën Mëria”, në një konferencë për shtyp u shpreh se Kryepeshkopi i Kishës Ortodokse Serbe, Ireneu, mbajti qëndrimin e tij luftënxitës dhe shovinist ndaj kombit shqiptar dhe territorit ku jetojmë ne së bashku në Ballkan.

“Ireneu para disa ditësh tha se Kosova është plagë e hapur e Serbisë, qëndrimet e tij janë të papranueshme dhe jashtë realitetit ku jetojmë tani.

Me neveri dhe përçmim i hedhim poshtë si lajthitje dhe luftënxitëse ndërmjet njerëzve. Ne i themi Ireneut se Kosova është shtet i pavarur si gjithë shtetet e tjera të botës”, citohej At Nikolla Marku.

Ai ka reaguar edhe pas deklaratave këtë vit të priftit malazez Radomir Nikçeviç se “Kosova është Serbi”.

“At Nikolla Marku e ka dënuar deklaratën, ndërsa ka kërkuar nxjerrjen e tij nga Shqipëria dhe ndërhyrjen e shtetit, pasi po cenohet paqja në Ballkan…

Gjatë meshës sot në Shkodër, Nikçeviç i pyetur për Kosovën ritheksoj qëndrimin e shtetit serb se ‘Kosova është Serbi’ duke ngjallur reagimin e ashpër të shqiptarëve”, shkruante media shqiptare në 7 janar 2018…

Përsëri do bisedonim për këto dhe çështje tjera në një intervistë me shumë pyetje e përgjigje që donim të zhvillonim me At Nikollën, po ai ishte i lodhur nga udhëtimi e sëmundja ndërkohë që vazhdonte kurimin sipas udhëzimeve mjekësore.

Dakordohemi që për një intervistë në një të ardhme të vijojmë komunikimin pasi të kthehet në Elbasan, për ku do niset të nesërmen herët në mëngjes, pasi të kalojë natën në hotelin në qendër të kryeqytetit, deri ku do e përcjellim, bashkë me Dr. Jusufin, i cili ishte përkujdesur edhe për akomodimin e edhe për udhëtimin e kthimit në shtëpi të At Nokollës, me veturë e shoqërim të Fehmi Bytyqit, nisur nga Prishtina, nëpër autostradë – Udhën e Kombit, që kalon nëpër qytetin e lashtë e historik të Prizrenit e portën kufitare në Vërmicë-Morin…

Duke biseduar për Prizrenin e kufirin At Nikollës i tregoi se para 22 viteve, në 18 mars 1996, në gazetën e përditshme “Bujku” në Prishtinë, që ishte gazetë e rezistencës dhe lëvizjes e luftës për liri e pavarësi, me orientim e përcaktim të fuqishëm perëndimor euroatlantik, të vetmes atëherë në Kosovë, themelues-kryeredaktor i parë i së cilës isha, në reportazhin nga kufiri Kosovë-Shqipëri me titull “Muri ndërshqiptar si ‘fundi i botës’” botuar edhe në Shqipëri në 19 mars 1996 në gazetën Rilindja që dilte në Tiranë pas ndalimit nga regjimi okupues serb në Kosovë, mes tjerash, kam shkruar:

“Një grup i të rinjëve dhe të rejave nga rrethi i Prizrenit, ditë më parë ishin penguar të shkojnë në Shqipëri, meqë nuk iu ishin dhënë vizat dalëse nga administrata e instaluar policore serbe në Prizren.

Qëllimi i udhëtimit të tyre në Shqipëri ishte të marrin pjesë në festën e njohur të qytetit të Elbasanit-të Ditës së Verës, Ditës së Luleve, të 14 marsit.

Donon të shihnin se si kremtohet në Elbasan e njëjta festë që është edhe në Prizren e rrethinë”.

Dhe vijojmë të flasim me At Nikolla Markun: “Kufijtë që i kemi mes nesh nuk i vendosëm vetë ne shqiptarët…po do i bëjmë të lirë e të hapur…”

Ashtu si në ardhje, edhe në shkuarje sheshit e kudo në Prishtinë njerëzit e përshëndetnin vëllazërisht priftin ortodoks shqiptar nga Elbasani.

Dhe përshendetemi me urimin: Natën e mirë dhe rrugë të mbarë në udhëtimin që do kalojë kufirin që nuk është e nuk do të jetë më kurrë si ishte i ndalur e i hekurtë dhe në një të ardhme mund të mos jetë më fare kufi mes shqiptarëve…

Pasi urojmë At Nikollën ecim edhe ca sheshit në mbrëmje me Prof. dr. Jusuf Telakun, për të cilin ka kohë kemi lexuar se ishte nismëtari i themelimit dhe kryetar i parë i Asociacionit të Psikiatërve të Kosovës…

NIK MRNAÇAJ DHE DITA E LIRISË SHQIPTARE NË NJU JORK

May 9, 2018 by dgreca

MARTIRI I DEMOKRACISË NIK MRNAÇAJ DHE DITA E LIRISË SHQIPTARE NË NJU JORK/

NGA DALIP GRECA/Kensico Dam Plaza, Valhalla, Westchester, NY, 6 Maj 2018- Shqiptarët e Nju Jork-ut kanë një ditë të tyre, një Ditë të Lirisë Shqiptare, ku mund të krenohen me Flamurin e tyre Kombëtar. Në manifestimin e përvitshëm Flamuri kuq e zi valvitet në shenjë kujtese. Kjo ditë e shënuar mbanë emrin e birit të Malësisë, luftëtarit të Lirisë, antikomunistit Nik Marash Mrnaçaj. Është e diela e parë e Majit të çdo viti, ku shqiptarët e Nju Jork-ut bëhen bashkë në Kensico Dam Plaza, Valhalla, Westchester, NY , në përgjigje të Ftesës së Familjes Mrnaçaj dhe në praninë e përfaqësuesëve të Westchester County-t.Vitet e fundit kujdestare e veprimtarisë kulturore- historike është Shoqëria Kulturore Artistike “Kelmendi”, që shpalos historinë me vargje, këngë e valle tradicionale.

Edhe në organizimin e sivjetëm të 6 majit 2018 pjesmarrja e bashkatdhetarëve ishte e shumtë, pavarësisht se në të njejtën ditë dhe në të njëjtën kohë, në kishën Katolike Shqiptare”Zoja e Shkodrës” organizoheshin veprimtari kushtuar 6 majit, Ditëlindjes së Heroit Kombëtar Gjergj Kastrioti Skënderbeu. Famullitari Dom Pjetër Popaj nga eleteri i njoftoi besimtarët për veprimtarinë kushtuar Ditës së lirisë Shqiptare dhe u bëri thirrje që pas akademisë përkujtimore të bëheshin pjesë edhe e manifestimit kushtuar Nick Mrnaçaj.Ai vetë pas akademisë përkujtimore u bë pjesë e manifestimit në Ditën e Lirisë Shqiptare.Kjo ditë e shënuar sjellë në kujtesën e shqiptarëve të Amerikës qëndresën e rinisë nacionaliste shqiptare, që nuk i pushoi asnjëherë përpjekjet për ta sensibilizuar Amerikën për dhunën e përgjakshme, që ushtronte shteti komunist shqiptar kundër familjeve nacionaliste, me kalvar 45 vjeçar burgjeve dhe kampeve të internimit.I tillë ishte edhe i riu nacionalist, antikomunisti Nik Mrnaçaj, i biri i Marash dhe Mrije Mrnaçaj,që humbi jetën pasi kthehej nga demonstrata antikomuniste e organizuar në Detroit me 22 Janar 1990. Vujatjet e fisit të tij në Shqipëri, kalvari në burgje dhe kampet e internimit, burgosja dhe vdekja e axhës së tij, Nikolla Mrnaçaj nga torturat,e kishin mbushur shpirtin e tij, dhe e kishin bërë aktiv në demonstratat antikomuniste në SHBA.

Së bashku me Adem Belliun e Televizonit Kultura Shqiptare në Nju Jork, pasi ndoqëm Meshën dhe për një orë Akademinë Përkujtimore kushtuar Heroit tonë Kombëtar, u bëmë pjesë e Ditës së lirisë Shqiptare në Kensico Dam Plaza.

Pjesë e manifestimit u bënë edhe Kryetari i Vatrës Dritan Mishto, zv/Kryetari Agim Rexhaj, anëtari i kryesisë Marjan Cubi me zonjën Dile,anëtari i kryesisë së Vatrës Zef Balaj, anëtari i Këshillit të Vatrës Simon Qafa, Zef e Alebert Përndocaj dhe dhjetëra vatranë.

Bashkatdhetarët vijnë grupe-grupe dhe bëhen pjesë e manifestimit. Prindërit e Nick Mrnaçaj, Marash dhe Mrije, të rrethuar nga familja e madhe Mrnaçaj, takohen me bashkatdhetarët dhe marrin prej tyre fjalë zemre për ta kujtuar në jetë të jetëve dëshmorin e Lirisë Nickën. Duket se Nikën e kanë të gjallë.Vetëm për të flitet. Ai është kthyer në Memorien Kombëtare dhe është përjetësuar në vendlindje.

Mark Mrnaçaj është përherë i rrethuar nga ish miqtë e tij bashkëvuajtës në kampin e internimit në Savër dhe kujtojnë së bashku kohët e vështira.

Musa e Rukie Berisha sjell në kujtesë kohët e vështira ku sfiduan vuajtjet. Ervin Dine, i biri i Dine Dines ka ardhë së bashku em zonjën dhe vajzën përt tu bërë pjesë e Ditës së Lirisë. Këtu janë të gjithë bashkë; ata që vuajtën dhe ata që ishin të “lirë” në Savër, ata në apel dhe ata pa apel, por në Savër dhe ata, pa trysninë e operativit dhe kryetarit të këshillit e atij të Frontit,,,por me shumicën shkuan si fqinj të mirë. Familja Berisha e internuar dikur takon Adem Belliun dhe familjen dhe kërkojnë që të fotografohen së bashku, të dy familjet.

– Kush është kjo goca?- pyet Rukia për vajzën e Ademit dhe të Mozës.

– Kjo është Vera?

-Ua, paska marrë emrine gjyshes. Sa e mirë që ishte. Shpirt njeriu…E kishim fqinjë dhe na ndihte me ç’të mundëte.

Paulin Mrnaçaj tek flet me zv. kryetarin e Vatrës Agim Rexhaj, kujton kohën e veprimtarive të përbashkëta antikomuniste dhe ato për Kosovën.

E pyes Paulinin për Flamurin kuq e zi, që është gati për t’u ngritë në Shtizën e lartë të Parkut përkrah Flamurit amerikan:- Përse ka një hapësirë boshe në formë rrethore flamuri, që ngrini këtu në kujtesë të veprimtarisë së Nikës?

– Aty ka qenë vendi i yllit komunist. E kam pre vetë. Jo se nuk gjenim flamur të ri për ta ngritë çdo vit, por thjeshtë si simbol të mosharresës. Nika demonstroi dhe humbi jetën kudër yllit të kuq, simbol i komuizmit, kundër regjimit antikombëtar të komunistëve. Duke e parë atë vend bosh kujtojmë sistemin antipopullor të Enver Hoxhës dhe nderojmë veprën e Nickës.

Në mesin e manifestuesëve është edhe një nga miqtë dhe bashkëudhëtarët e Nik Mrnaçaj. Ai ishte me Nikën ditën e kobshme kur ndodhi tragjedia, 28 vite të shkuara. Quhet Mark Tinaj. Për 28 vite ai është me trup e shpirt pranë mikut të tij që nuk jeton më, por që është kthyer në simbol KUJTESE.

KRONIKA: Nderoi me pjesmarrjen e tij dhe përshëndeti pjesmarrësit Ken Jenkins- Westchester County Deputy Executive(Zëvendësshefi i Qarkut në Westchester) …

Përshëndeti tubimin diakon Marash Shkreli, famullitari i Kishës “Zoja e Shkodrës” Dom Pjeter Popaj, Kryetari i Vatrës Dritan Mishto, Haxhi Dauti, kryetar i Keshillit Shqiptaro Amerikan , Mikel Mrnacaj, i biri i deshmorit te Lirise, Nik Mrnacaj….

(Lexoje të plotë në Diellin e printuar)

DITELINDJA E HEROIT KOMBËTAR, MESHË DHE AKADEMI PËRKUJTIMORE NË NJU JORK

May 8, 2018 by dgreca

* Akademia Përkujtimore kushtuar Ditëlindjes së Heroit Kombëtar hodhi idenë e kthimit në festë mbarëkombëtare të 6 Majit!/

* Datëlindja e Kryetrimit të tokave të Arbërit është një apel për kujtesë historike dhe që mbart në vetëvete kumtin e bashkimit kombëtar, që faktikisht sot është vënë në pikëpyetje nga përçarjet dhe papërgjegjshmëria e shtetit dhe klasës politike./

* Është fakt që ka harmoni Fetare, por nuk ka Harmoni Kombëtare. Shteti dhe politika tentojnë ta përdorin si fasadë harmoninë fetare, por vetë ata nuk përcjellin mesazhe të Harmonisë dhe bashkimit Kombëtar; përkundrazi, janë kontributorët më të këqinj që e kanë zbehur ndjenjën dhe krenarinë Kombëtare.

Nga Dalip Greca/

Veprimtaritë kushtuar 6 Majit, Përvjetorit të 613-të të Ditëlindjes së Heroit Komëbtar Gjergj Kastrioti Skënderbeu Organizuar nga Kisha Shqiptare ” Zoja e Shkodrës” në Nju Jork në bashkëpunim me Fedearatën Panshqiptare të Amerikës “VATRA” nisën të dielën paradite, me 6 Maj 2018, me Meshën kushtuar Heroit Kombëtar, Ditëlindjes së tij të 613-të. Famullitari i kishës Katolike Shqiptare “Zoja e Shkodrës” Dom Pjetër Popaj ka udhëhequr Meshën dhe ka përcjellë mesazhe krenarie Kombëtare për Heroin tonë Kombëtar Gjergj Kastrioti Skënderbeu. Ai tha ndër të tjera se Heroi ynë është krenaria Jonë Kombëtare, është Ati shpirtëror i shqiptarëve, është simboli i bashkimit Kombëtar.

Pas meshës në Qendrën “Nëna Terezë” u organizua Akademia kushtuar Ditës së Lindjes së heroit Kombëtar me bashkorganizatore Federatën Panshqiptare të Amerikës “VATRA”. Ashtu siç u bashkëpunua edhe me rastin e 17 janarit 2018, 550 vjetorit të vdekes së Heroit Kombëtar, Kisha Zoja e Shkodrës dhe Federata Panshqiptare e Amerikës “VATRA” bashkëpunuan edhe në Akademinë Përkujtimore kushtuar 613 vjetorit të Lindjes së Heroit Kombëtar Gjergj Kastrioti Skënderbeu.

I pranishëm në Akademinë Përkujtimore ishte Kryetari i Vatrës Dritan Mishto, zv/Kryetari Agim Rexhaj, anëtari i kryesisë dhe arkëtari i Vatrës Marjan Cubi, anëtari i kryesisë dhe folës Zef Balaj(përcolli kumtesën e Asllan Bushatit me titull”Gjergj kastrioti Skënderbeu dhe Dita e Shën Gjergjit”), shefi i Kabinetit të Kryetarit dr. Pashko Camaj dhe shumë vatranë të tjerë.

Në Akademinë Përkujtimore ishte i pranishëm edhe Këshilltari i Nju Jork-ut, bashkatdhetari ynë Mark Gjonaj, biznesmeni dhe aktivisti Harry Bajraktari si dhe drejtues shoqatash të komunitetit.

Akademinë Përkujtimore e ka çelë Kryetari i Këshillit të Kishës Zoja e Shkodrës Leonardo Berishaj, i cili u ka uruar mirëseardhjen pjesmarrësve për këtë ngajrje të shënuar dhe ka ftuar të pranishmit që të ngriheshin në këmbë për të përcjellë Hymnet Kombëtare. Më pas z. Berishaj ka parqitë koordinatorin e veprimtarisë përkujtimore, drejtuesin e saj, Kryeredaktorin e revistës “Jeta Katolike” Mark Shkreli.

Zoti Shkreli, ka ftuar Famullitarin e Kishës, dom Pjetër Popaj për të mbajtë fjalën përshëndetse. I pari nga folësit ishte diplomati nga Misioni i përhershëm i Republikës së Shqipërisë pranë Kombeve të Bashkuara z. Armando Shandro, i cili falenderoi organizatorët për ftesën dhe u ndal në madhështinë e figurës së Heroit Kombëtar dhe meszhet e bashkimit që vijnë në përkujtimin e Ditës së Lindjes.

Kumtesën e përgatitur nga Profesor Sami Repishti e lexoi miku i tij, aktivisti i njohur i komunitetit, ish Kryetar i këshillit të Kishës, si dhe ish zv/kryetar i vatres. z. Tonin Mirakaj.

Një kumtesë interesante përcolli edhe Prof. Gjon F. Ivezaj.

Nga foltorja përcollën mesazhe Këshilltari Mark Gjonaj, avokati Vedat Gashi, që synon Asamblenë e shtetit të Nju Jork-ut, si dhe Kryetari i Qendrës Kulturore Nëna Terezë Marjan Cubi, ndërsa aktivisti Nosh Camaj u duartrokit tek përcolli një poezi emocionuse.

Këshilltari i Nju Jork-ut, z. Mark Gjonaj, i ka dorëzuar famullitarit dom Pjetër Popaj dhe Kryetarit të Vatrës Dritan Mishto nga Mirënjohje për Kishën dhe Vatrën në emër të Këshillt të Nju Jork-ut .

Meshën dhe akademine i përcollen Televizioni Kultura Shqiptare(Albanian Culture TV), Gazeta Dielli dhe TV 21.

***

Nga Akademia përkujtimore e Nju Jork-ut u shfaq ideja që Ditëlindja e Heroit Gjergj Kastrioti Skënderbeu të kthehet në një festë mbarëkombëtare nga shtetet shqiptare.

Nuk ka asnjë arsye që të mos bëhet.

Kjo datë e lindjes të Kryetrimit të tokave të Arbërit, është një apel për kujtesë historike dhe që mbart në vetëvete kumtin e bashkimit kombëtar, që faktikisht sot është vënë në pikëpyetje nga përçarjet dhe papërgjegjshmëria e shtetit dhe klasës politike. Është fakt që ka harmoni Fetare, por nuk ka Harmoni Kombëtare. Shteti dhe politika tentojnë ta përdorin si fasadë harmoninë fetare, por vetë ata nuk përcjellin mesazhe të Harmonisë dhe bashkimit Kombëtar; përkundrazi, janë kontributorët më të këqinj që e kanë zbehur ndjenjën dhe krenarinë Kombëtare.

Nuk mjafton që Kryeministri të rrethohet nga dy priftërinj dhe një Imam dhe të parakalojë në kryeqendrat botërore,nuk mjafton që ai krenohet me përkatësinë e tri feve në familjen e vet, por do të duhej që qeverisja e tij të reflektonte harmoni dhe interesa Kombëtare. Nuk mjaftojnë vetëm deklaratat e shtetarëve dhe politikanëve në ditëfestat e shënuara të besimeve fetare, por çdo ditë do të duhej të përcilleshin mesazhe bashkimi e respektimi ndaj qytetarëve, pavarësisht cilit besim i përkasin. Shteti në Shqipëri e Kosovë do të duhej të: luftonin kriminalitetin, korrupsionin, të ulnin varfërinë dhe të rritnin mirëqenien, me qëllim që të mos iknin qytetarët nga sytë këmbët për një jetë më të mirë, apo të mos mbuloheshin femrat kokë e këmbë për 50 Euro, apo djemët të ktheheshin në mercenarë e të mbushnin radhët e ISS-it duke u bërë mish për top për një ideologji që, veçanërisht shqiptarëve nuk u shkon….

SHQIPTARJA, më e bukura e Manchesterit

May 7, 2018 by dgreca

SHQIPTARJA, më e bukura e Manchesterit për 2018/

31969947_1611126802339744_2817731677000826880_n

Mjaft shqiptarë kanë emigruar në vende të ndryshme si SHBA, Itali, Mbretëri e Bashkuar apo dhe shumë vende të tjera dhe mjaft mirë mund të shërbejnë si histori frymëzimi dhe suksesi për shumë të rinj. Një prej tyre është Fatime Gashi.Në moshën 2 vjeçare familja e saj emigroi drejt Anglisë për të shpëtuar nga sulmet serbe. Familja e saj e ndërtoi jetën në shtetin britanik, dhe sot vajza e madhe e familjes ka zënë titujt kryesorë të shtypit anglez. Fatimja është shpallur si vajza më e bukur e Manchesterit në kompeticionin e bukurisë së qytetit.“Mançesterti më ka dhënë kaq shumë dhe ndihem sikur kjo është mënyra ime e kthimit në qytetin tim në shtëpi. Kjo ende më duket si një ëndërr “, – është shprehur bukuroshja shqiptare.