Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

USAID, mbështetje të plotë sistemit të drejtësisë të Kosovës

by

-Përfaqësuesit e USAID-it, në takim me ministrin e Drejtësisë, Hajredin Kuçi, janë shprehur të gatshëm të vazhdojnë bashkëpunimin me qëllim fuqizimin e sundimit të ligjit, në favor të qytetarëve të Republikës së Kosovës/
Prishtinë, 14 Janar 2016/ Ministri kosovar i Drejtësisë, Hajredin Kuçi ka pritur sot në takim Drejtorin e misionit të USAID-it në Kosovë, James Hope, i shoqëruar me implementuesit e programit të sapo lançuar për fuqizimin e sektorit të drejtësisë në Kosovë.
Ministri Kuçi ka vlerësuar lartë partneritetin e qëndrueshëm me USAID-in drejt shtytjes së reformave për përmirësimin e sistemin e drejtësisë. Ministri Kuçi i ka njoftuar përfaqësuesit e USAID-it për arritjet e deritanishme në fuqizimin e pavarësisë së gjyqësorit, duke theksuar njëkohësisht përpjekjet e vazhdueshme në ngritjen e llogaridhënies së sistemit të drejtësisë.
Programi i ri i USAID-it synon fuqizimin e efikasitetit të sistemit të drejtësisë, ngritjen e llogaridhënies dhe profesionalizmit të institucioneve dhe akterëve në sistemin e drejtësisë, si dhe mbështetjen e funksionimit të plotë të sistemit gjyqësor në tërë territorin e Republikës së Kosovës.
Gjatë takimit, ministri Kuçi ka kërkuar që përmes programit të ri, gjyqtarët dhe prokurorët të marrin mbështetje të shtuar profesionale në fusha të caktuara, duke përfshirë luftimin e krimeve kibernetike, krimeve financiare dhe korrupsionit.
Ministri Kuçi ka vlerësuar lartë mbështetjen e USAID-it në arritjen e prioriteteve të Ministrisë së Drejtësisë. Puna e Ministrisë së Drejtësisë gjatë këtij mandati po përqendrohet në konsolidimin e kornizës ligjore për të drejtat pronësore, hartimin e kodit të parë civil të Republikës së Kosovës, si dhe në ngritjen e besimit të qytetarëve në drejtësi, tha ai.
Njoftimi dërguar nga Ministria thekson se, fuqizimi i sundimit të ligjit mbetet prioritet për te dyja palët. Përfaqësuesit e USAID-it u shprehën të kënaqur me bashkëpunimin dhe partneritetin e ndërtuar me Ministrinë e Drejtësisë. Përfaqësuesit e USAID-it janë shprehur të gatshëm të vazhdojnë bashkëpunimin me qëllim fuqizimin e sundimit të ligjit, në favor të qytetarëve të Republikës së Kosovës./b.j/

CEREMONIA PERKUJTIMORE PER PRESIDENT RUGOVEN E IMZOT SOPIN…TEELEGRAMI I NGUSHELLIMIT DHE NJE KUJTIM I 2005-sës

by

Kosovë-Në Katedralen Nënë Tereza, meshë në nderim të Presidentit historik Rugova dhe Imzot Sopit
-Guri themeltar i Katedrales Nënë Tereza është vënë në 26 gusht 2005 nga Presidenti historik i Kosovës Ibrahim Rugova dhe Kardinali i Katedrales së Uashingtonit, Teodor Mekarik (McCarrick)/
Nga Behlul Jashari/ PRISHTINË, 13 Janar 2016/ Në Katedralen Nënë Tereza në Prishtinë, është mbajtur mbrëmë meshë në nderim të Presidentit historik të Kosovës, Dr. Ibrahim Rugova dhe Imzot Mark Sopit, në 10 vjetorin e kalimit të tyre në amshim.
“Disa muaj para se të kalonin në shtëpinë e Atit tonë qiellor, që të jetonin në amshim, e kurorëzuan veprën e tyre mbi tokë, duke bekuar gurin e këndit të kësaj Katedraleje”, kujtoi Ipeshkvi i Ipeshkvisë së Kosovës, Imzot Dodë Gjergji. Gjatë meshës, ai ka përkujtuar veprat e mëdha të dy personaliteteve të shquara të Kosovës, njëri i Shtetit e tjetri i Kishës, duke bërë thirrje që të ndiqet rruga e trasuar nga ta dhe që të realizohen amanetet e tyre.
Kryeministri i Republikës së Kosovës, Isa Mustafa, si dhe përfaqësues të tjerë institucionalë e politikë të vendit e të pranisë ndërkombëtare, morën pjesë në meshë dhe, po ashtu, vizituan ekspozitën e hapur në ambientet e Katedrales në nderim të dy korifejve të kombit, Presidentit historik Rugova dhe ish-Ipeshkvit të Ipeshkvisë se Kosovës, Imzot Sopit. Ekspozita do jetë e hapur deri në 22 janar.
Guri themeltar i Katedrales Nënë Tereza është vënë në 26 gusht 2005 në oborrin e ish-gjimnazit “Xhevdet Doda” në qendër të kryeqytetit, Prishtinës, nga Presidenti historik i Kosovës Ibrahim Rugova dhe Kardinali i Katedrales së Uashingtonit, Teodor Mekarik (McCarrick).
***
Telegrami i ngushëllimit i para 10 viteve:

PRESIDENTI RUGOVA NGUSHËLLON IPESHKVINË E KOSOVËS ME RASTIN E VDEKJES SË IMZOT MARK SOPIT
Me rastin e vdekjes së Imzot Mark Sopit, Ipeshkvit të Ipeshkvisë së Kosovës, Presidenti i Kosovës, Dr. Ibrahim Rugova, i ka dërguar një telegram ngushëllimi Ipeshkvisë së Kosovës.
Më poshtë po e japim tekstin e plotë të këtij telegrami:
11 janar 2006
Prishtinë, Kosovë
Ipeshkvisë së Kosovës
Prizren
Ipeshkvi e nderuar,
Me rastin e vdekjes së Imzot Mark Sopit, Ipeshkvit të Ipeshkvisë së Kosovës, Ju lutem pranoni ngushëllimet e mia të thella dhe të popullit të Kosovës.
Në historinë më të re të Kosovës Imzot Mark Sopi do të mbetet një burrë i madh që gjithë jetën punoi për fe e për atdhe. Duke vepruar për forcimin e kishës katolike shqiptare, pra të Ipeshkvisë së Kosovës, që e drejtoi për një dekadë të tërë, u bë njeri i dashur dhe i nderuar për të gjithë popullin e Kosovës. Imzot Mark Sopi gjithmonë ishte me popullin e Tij dhe me Zotin. Kjo i bën njerëzit të jenë të mëdhenj e të nderuar përgjithmonë.
Imzot Mark Sopi me vite të tëra u angazhua për pavarësinë e vendit tonë, Kosovës, duke na dhënë zemër e forcë se ajo do të bëhet së shpejti nga miqtë tanë.

Sot në këto momente të dhembjes, ndihem krenar që pata një mik të tillë, çfarë ishte Imzot Mark Sopi, të cilin gjithnjë e kisha krah të fortë pranë vetes në punët shtetërore në momentet më të vështira e më të mira.
I falemi kujtimit të Tij të përjetshëm.I qoftë i lehtë dheu i Kosovës së lirë.
Zoti e bekoftë Imzot Mark Sopin, siç e ka bekuar.
Zoti e bekoftë Familjen Sopi.
Zoti e bekoftë Ipeshkvinë e Kosovës.
Zoti e bekoftë Kosovën.
Dr. Ibrahim Rugova
President i Kosovës
***
KUJTESË- NJË TAKIM, SI NJË BEKIM
Në ditëfestën e 28 Nëntorit – të Pavarësisë së Shqipërisë dhe të Flamurit Kombëtar Shqiptar, para më shumë se 10 vitesh, në vitin 2005, kam shkruar si në ditar një shënim për një takim në Prishtinë me Ipeshkvin e Ipeshkvisë së Kosovës, Imzot Mark Sopin, me të cilin folëm edhe për gazetën tradicionale të Kosovës Rilindja, kryeredaktor i së cilës isha deri në numrin e fundit dhe në angazhimet për ta rikthyer të përditshme. Shënimi, që e gjejë sot në një mesazh të dërguar me e-mail, ishte ky:
Takimi spontan me Imzot Mark Sopin
Tek po festonim në Grand 28 Nëntorin, ku kishte shumë personalitete, me shumë prej të cilave edhe u takova personalisht dhe ngritëm dolli, një emocion e përshtypje shumë të veçante më solli momenti i takimit me Ipeshkvin e Ipeshkvisë së Kosovës, Imzot Mark Sopin, me të cilin nuk isha takuar ndonjëherë më parë ashtu drejtpërdrejtë.
-Besoj se nuk po gabohem, je Behlul Jashari, më tha derisa po më afrohej dhe pas shtërgimit të duarve edhe më perqafoi.
Më përgëzoi për angazhimet për Rilindjen dhe më ftoi për një vizitë në Ipeshkvi. Më vlerësone dhe më njihte edhe nga shkrimet. Dhe për vendosmërinë per Rilindjen.
E përjetova këtë edhe si një bekim.
E falënderova shumë për vleresimin, nderin dhe përkrahjen që më bëri. Dhe, me shumë kënaqësi iu përgjigja ftesës për vizitën.
Behluli
28 Nëntor 2005

Elbasan, ura e para 300 viteve në këmbë, atë të 2008-ës e mori lumi

by

Ura e Kamarës është 20 km në verilindje të Elbasanit. Ajo është ndërtuar nga osmanët rreth viteve 1715. Për më shumë se 300 vjet ajo u ka rezistuar ujërave të rrëmbyer të Lumit Shkumbin, edhe pse kurrë nuk është vënë dorë për forcimin e saj. Ky fakt shpjegohet me strukturën ndërtuese të kësaj ure. Në këmbët e saj janë të vendosura disa dritare shkarkuese, të cilat mbrojnë këmbët e urës duke shkarkuar ujin në rast të prurjeve të mëdha. Pjesa ballore e saj është e ndërtuar në formë lundre e quajtur ujëthyese për të zbutur forcën goditëse të lumit, ndërsa pjesa e pasme është cilësuar si ujë shuarse që bën shpërndarjen e ujit pasi kalon nga ura. Në atë kohë ura shërbente për të komunikuar mes tyre qendrat tregtare, siç ka qenë Elbasani i asaj kohe, ndërsa sot ende përdoret nga banorët e zonës. Ndërsa një gjysmëurë është ndërtuar në vitin 2008. Në 7 vitet e saj të jetës ajo u shërbeu 3 mijë banorëve të fshatit Gryksh i Madh dhe disa fshatrave të tjerë të Bashkisë së Peqinit. Edhe pse e ndërtuar me këmbë të mëdha betoni dhe me një strukturë të përforcuar hekuri ajo u shemb katër ditë më parë nga prurjet e lumit. Por ura e Grykshit nuk është e vetmja urë e shembur mbi Shkumbin këtë vit. Të njëjtin fat pati edhe ura e Broshkës e ndërtuar në vitin 1999, apo një sërë urash të tjera të ndërtuara mbi përrenj. Shkumbini këtë vit nuk kurseu as aksin kombëtar Elbasan-Librazhd, i ndërtuar në vitin 1999. Në Xibrrakë rruga thuajse është përgjysmuar dhe sipas specialistëve pjesa e mbetuar është ajo që mbahet poshtë nga rruga ekzistuese e ndërtuar në vitet ’30. Më herët, një tjetër urë në Elbasan u shemb nga furia jo shumë e fortë e një përroi. Kjo ndodhi sepse këmbët e saj ishin vetëm disa centimetra thellësi, nga 2.5 metra që parashikohej në projekt. Kjo është arsyeja se përse urat e inxhinierëve modernë janë të një cilësie shumë më të dobët sesa ato të inxhinjerëve osmanë të para tre shekujve.

Policia e Kosovës përgënjeshtron VetëVendosjen

by

VetëVendosja: Kriminelët po punësohen në polici/
-Policia e Kosovës ka dërguar sot një sqarim për media pas një komunikate të Lëvizjes Vetëvendosje. I sjellim të plota:
SQARIM PËR MEDIA/
Policia e Kosovës demanton komunikatën e Lëvizjes “Vetëvendosje” të publikuar në media me titull ” Kriminelët po punësohen në polici”
Prishtinë 12 janar 2016
Lidhur me shkrimet e publikuara sot nëpër media që i referohen një komunikate të Lëvizjes Vetëvendosje ku flitet për punësimin apo integrimin e punonjësve në PK; (Sipas komunikatës së VV: “Kriminelët po punësohen në polici”)Policia e Kosovës për hir të informimit të drejtë të qytetarëve tanë dhe mediave në përgjithësi sqaron se:
Deklarimet e tilla janë të pavërteta, të pabaza dhe me tendencë për të zvogëluar besueshmërinë e lartë të Policisë së Kosovës që gëzon nga qytetarët e Republikës së Kosovës, institucionet vendore dhe ndërkombëtare.
Policia e Kosovës inkurajon të gjithë qytetarët dhe mediat që të mos bien pre e manipulimeve të tilla deklarative dhe sqaron se aktualisht nuk është në zhvillim e sipër asnjë proces i rekrutimit, seleksionimit, punësimit apo integrimit të ndonjë individi në PK, e që ndërlidhet me komunikatën e publikuar nga Lëvizja VV.
Procesi i rekrutimit, seleksionimit dhe punësimit të punonjësve të PK-së, çdo herë është realizuar përmes konkurseve të hapura, duke u bazuar në ligjet e aplikueshme në vend dhe duke respektuar parime dhe procedura standarde, ku të përfshirë kanë qenë të gjitha komunitetet pa dallim.
Për secilin kandidat për punonjës në kuadër të PK-së gjithashtu kryhen hetime relevante dhe aty ku ka elemente dyshimi për implikime në vepra penale çdo herë nga autoritetet relevante të kontrollit dhe mbikëqyrjes merren masat adekuate.
Të gjitha proceset e tilla të rekrutimit të punonjësve duke përfshirë edhe procesin e integrimit të pjesëtarëve serb të ish-MPB vite më parë, kanë qenë publike, transparente dhe të gjitha detajet janë bërë të ditura përmes mediave dhe aktualisht nuk ka asnjë proces të integrimit që ndërlidhet me Policinë e Kosovës.
Me respekt,
Zyra për Informim e Policisë së Kosovës
DPP-Prishtinë,
….
Kriminelët po punësohen në polici
Shteti i Kosovës është shndërruar në plaçkë, e cila po copëtohet e po ndahet midis partnerëve të koalicionit qeverisës. Nuk ka mbetur asnjë pjesë e buxhetit shtetëror, administratës dhe e sektorit publik e cila nuk po plaçkitet prej subjekteve qeverisëse, ndërkohë që shtresat e gjera popullore gjithnjë e më shumë varfërohen.
Institucioni i fundit që po e dëshmon këtë logjikë të kapjes është Policia e Kosovës. Ky institucion që duhet të ishte në shërbim të publikes, është mbushur me militantë të partive, të cilët nuk hezitojnë të abuzojnë edhe me ligjin, për të zbatuar urdhrat e eprorëve të tyre. E së fundi, me integrimin e “Mbrojtjes Civile” në shtetin e Kosovës edhe Lista Serbe po e merr hisen e vet në shtetin e kapur të Kosovës, bashkë me PDK e LDK të cilët e ndanë shtetin porsi një plaçke të tyre nëpërmjet marrëveshjes për koalicion të 8 dhjetorit 2014.
Kjo qeveri e ‘Zajednicës’ nuk u shqetësua aspak për të vërtetuar se çfarë kanë bërëkëta persona të sapopunësuar në Policinë e Kosovës para luftës, gjatë luftës e pas luftës. Këtë e themi duke e ditur se pjesëtarët e Mbrojtjes Civile i paguan e i kontrollon Beogradi.
Po vërtetohet sërish qëndrimi i Lëvizjes VETËVENDOSJE! se dialogu në Bruksel nuk po i integron serbët në Kosovë, por po integron Serbinë dhe strukturat e saj në shtetin gjithnjë e më të varur të Kosovës.
E për më keq, ky “integrim” i strukturave paralele të Serbisë në policinë e Kosovës, është edhe një skandal ekonomik.Në një vend si Kosova, ku papunësia është enorme dhe ku për një vend pune aplikojnë me qindra qytetarë, sot po pranohen pa konkurs paramilitarët serbë të“Mbrojtjes Civile”.Punësimi i tyre me rrogëqë del nga buxheti i Kosovës, pa konkurs e thjesht përmes marrëveshjes politike me Serbinë, është gjithsesi një krim ndaj të varfërve shqiptarë, boshnjakë, turq, romë, ashkalinj, egjiptas etj. pra, ndaj të gjithë atyre që s’janë serbë e nuk i shërbejnë Serbisë.
Kjo polici e cila integron ish-kriminelët e të gjitha llojeve, nuk mund të jetë në shërbim të drejtësisë.
12 janar 2015
Lëvizja VETËVENDOSJE!

NDAL DHUNES…-Pllakat nga Atjon Zhiti

by

Stop dhunes seksuale…Nuk eshte vetem ngjarja e Kelnit ne Gjermani, qe e shqeteson publikun boteror, por ne mbare rruzullin fenomeni shfaq rrezikshmeri shoqerore…Atjon Zhiti na la pas kete grafike kunder sulmeve seksuale, qe mund te perdoret per sensibilizimin e shoqerise.Ky pllakat eshte realizuar nga Atjon Zhiti, kur ishte nxenes ne Rome, rreth vitit 2008-2009.
Gazeta Dielli po e ndane me publikun.