Komunitet – Page 361 – Dielli

NE FESTAT E MARSIT ME ANAMALASIT

March 11, 2014 by dgreca

Nga Keze Kozeta Zylo/

Shoqata e mirënjohur “Ana e Malit” nderoi dhe festoi me madhështi 7-8 Marsin, Diten e Shenjtë të Mësuesit dhe Ditën Internacionale të Gruas. Në mjediset e bukura të restorantit Vanderbilt qindra gra pjesëmarrëse në këtë festë erdhën me lule në duar dhe me sytë dritë për të festuar dhe kaluar disa orë të gëzueshme së bashku. Hapësira me dritaret nga Oqeani që ishte aq i paqtë si një mendafsh blu reflektonte mahnitshëm në veshjet gjithë shije të grave të bukura që më së shumti ishin të Anës së Malit, Ulqinit.. dhe gjithë Shqipërisë. Eleganca e shtruarjes së tavolinave me trëndafila të freskëta ngjyrë rozë dhe lule bore mbi to së bashku me zonjat aromë gruaje tregonte qartë se sa kujdes i kishin shtruar të zotët e shtëpisë së Anes së Malit këtij aktiviteti kaq të rëndësishëm, jo vetëm për shoqatën, por dhe për Diasporën. Në hyrje të sallës të prisnin ngrohtësisht zonja e parë e shoqatës Naile Kurti dhe Besiana, një studente simpatike.

Mbrëmjen e ka hapur z.Ismet Kurti kryetar i shoqatës “Ana e Malit” i cili ka përshëndetur plot dashamirësi dhe mirënjohje të gjitha gratë. Z.Kurti tha se: Sot nuk është ditë e fjalimeve, por sinqersisht u jam mirënjohës dhe falënderues për pjesemarrjen tuaj, angazhimin tuaj, dhe çmoj lart kontributin që ju të nderuara nëna dhuroni për ruajtjen dhe edukimin e familjeve tona këtu në mërgim. Sot dhe gjithnjë ne duhet të reflektojmë mbi kontributin e gruas në të kaluaren dhe inkurajojmë gratë e reja që të shfrytëzojnë potencialin e tyre për të frymëzuar një të ardhme më të mirë.

Më lejoni që për angazhimin e tyre dhe organizimin e këtij manifestimi të falënderoj arkëtaren e Shoqatës zonjën Mina Salaj anëtaren e bordit zonjën Suada Ceka dhe Zonjën e parë të Shoqatës Naile Kurti.

Shoqata jonë “Ana e Malit” është një ndër shoqatat më aktive në komunitetin tonë e këtë e kemi arritur fal edhe angazhimit që ju bëni në çdo sferë të jetës e kjo po dëshmohet edhe sot me pjesëmarrjen tuaj.

Më vjen mirë të shoh gra të fuqishme nga çdo fushë të jetës ne mesin tonë. Ne e kemi parë fuqinë transformuese që gratë posedojnë dhe kontributin që ato kanë dhënë dhe mund të japin sa herë që bëhen pjesë aktive e shoqërisë. Kemi parë se investimi për gruan, nuk është vetëm investim në një individ, por është investim dhe në të ardhmen e fëmijëve tanë. Sot Shoqata “Ana e Malit” shpreh mirënjohje për të gjitha gratë shqiptare, por në veçanti do të dallojmë disa nga ju për kontributin e tyre në shoqëri dhe shpresojmë që arritjet e tyre të frymëzojnë gjeneratat e reja që të arrijne potencialin e tyre.

Një mirënjohje të veçante u japim mësuesëve të shkollës shqipe këtu në State Island, Brooklyn dhe në Bronx për punën e tyre të shkëlqyer që po bëjnë me fëmijët tanë për të ruajtuar gjuhën tonë të bukur shqipe dhe vogëlushëve tanë po ua mësojnë kulturën, historinë dhe traditatat tona të bukura shqiptare. Qofshi gjithnjë të lumtura në jetë! Urime 7-8 Marsin dhe ju dëshiroj argëtim të kandshëm!

Pas fjales se tij z.Kurti ka ftuar znj.Etrita Ibroci një aktiviste e mirënjohur e komunitetit e cila ndër të tjera tha: Në këto festa të bukura ne nderojmë gratë këtu dhe të gjitha gratë në botë ku punojnë me devotshmëri, përkushtim, pasion dhe dashuri duke frymëzuar miliona gra në botë. Si një forcë e madhe gratë shqiptare mund të përmirësojnë shumë gjëra në botë. Ne kemi shembuj si Elena Gjika (Dora D’Istria), Nënë Tereza dhe së fundi Rita Ora që tregojnë se sa shumë një person mund të arrijë. Si komunitet ne kemi nevojë të suportojmë gratë tona dhe t’i inkurajojmë të rejat të vazhdojnë edukimin më lart.

Përshëndetja e Kongresistit Amerikan z.Michael Grimm dhe Asambleistit të shtetit të Nju Jorkut z.Mark Gjonaj

Mes duartrokitjesh është pritur kongresisti amerikan z.Michael Gerard Grimm për Staten Island dhe Brooklyn, New York i shoqëruar nga z.Ismet Kurti dhe Marko Kepi president i organizatës “Rrënjët” i cili bashkëpunoi për këtë aktivitet të rëndësishëm. Kongresisti amerikan është zgjedhur për të dytën herë në Kongresin Amerikan dhe është anëtar i partisë republikane amerikane. Ai përshëndeti të gjitha gratë, kryetarin e shoqatës z.Ismet Kurti dhe çmoi punën e shoqatës Ana e Malit dhe të gjithë diasporës shqiptare për kontributin që po japin. Shqiptarët janë njerëz shumë punëtorë dhe çmojnë lirinë, Amerikën dhe e duan shumë vendin nga kanë ardhur. Unë kam takuar kryeministrin e Shqipërisë, z.Edi Rama, të Kosovës HashimThaci si dhe shumë përfaqësues nga të gjitha trevat shqiptare dhe jam informuar mirë për Shqipërinë. Kongresisti amerikan foli shkurt dhe tha gjithcka. Ajo që më ka bërë përshtypje në përgjithësi tek politikanët amerikanë është se nuk përdorin fjalor vulgar që e sheh rëndom tek politikanët tanë, por me mëncuri dhe dipllomaci i ftoi të gjitha gratë dhe shqiptarët që të marrin pjesë në votime. Nuk ka rëndësi në se votoni për mua apo dikë tjetër, e rëndësishme është që të votoni për vehten dhe pikëpamjet tuaja. Duke dëgjuar me vëmendje kongresistin amerikan kujtova se sa e sa shqiptarë në Amerike e neglizhojnë votimin, regjistrimin dhe për rrjedhoje mosvotimi dhe mosregjistrimi nuk është pa pasoja. Kongresisti amerikan lirshëm dhe me humor tha se jam dhe beqar kështuqë pse jo mund të më bjerë fati me ndonjë nikoqire dhe grua shqiptare, për të cilat kam dëgjuar fjalë aq të mira. Fjala e kongresistit amerikan u ndërpre disa herë nga duartrokitjet.

Pas Kongresistit amerikan z.Michael Grimm fjalën e ka marrë asambleisti i shtetit të Nju Jorkut z.Mark Gjonaj, shqiptari i parë i zgjedhur në këtë detyrë kaq të rëndësishme. Z.Mark Gjonaj të befason me vëmendjen e tij dhe kujdesin që tregon për të gjitha organizatat në aktivitete të ndryshme. Z.Gjonaj është një politikan plot perspektive dhe në se vazhdon me këtë temp, pohoj me plot gojën se e ka të sigurtë përsëri fitoren, pse jo dhe në shtëpinë e Bardhë. Ardhja e z.Gjonaj në çdo aktivitet bashkon Diasporën dhe sjell frymë të re. Z.Gjonaj përshëndeti të gjitha gratë pjesëmarrëse dhe me humor solli një episod nga familja e tij. Ne vazhdoi Gjonaj duhet t’i respektojmë gratë në maksimum për kontributin e tyre, kujdesin mëmësor karshi fëmijëve, edukimin e gjithanshëm që u bëjnë fëmijeve të tyre dhe kudo. Ato janë pasuri e paçmuar botërore. Ishte interesante t’i shikoje dy politikanë anëtarë të partive të ndryshme dhe të respektonin dhe të cmonin njeri-tjetrin aq shumë. Të dy së bashku, Grimm dhe Gjonaj shkuan kokë më kokë dhe takuan gratë, por jo vetëm kaq por dhe komunikuan fare thjesht me to.

Fotografët fiksonin momente të takimit të tyre me gratë.

Dr.Zylo Watkins, Emmie Salaj dhe Haxhire Redzovic u vlerësuan me çmime mirënjohjeje

Zonjusha Salije Rexha me plot profesionalizëm prezantoi zonjat para pjesëmarrësve të cilat ishin përzgjedhur nga Shoqata për t’i vlerësuar për kontributin e tyre. Ajo lexoi një biografi të shkurter për punën e secilës, të cilën e filloi me Dr.Zylo Watkins e cila ka lindur në Tiranë dhe ka 20 vjet në Amerikë. Ka mbrojtur doktoraturën nga PennStateUniversity për letersi dhe gjuhën spanjisht. Dr.Zylo Watkins ka dhjetë vjet që jep mësim në Universitet duke filluar me PennState, KeanUniversity, Montclair dhe së fundi është në College of Staten Island. Përvec kësaj ajo ka një kontribut të vyer për Shkollat Shqipe në Staten Island dhe Brooklyn dhe ka përgatitur mjaft materiale për aktivitete të ndryshme si me 7 Marsin, festën e abetares, etj. Ka bashkëpunuar dhe ka prezantuar mjaft aktivitete të rëndësishme si për festën e Pavarësisë së Shqipërisë, për çështjen e Pavarësisë së Kosovës në simpoziumin që është organizuar në BramsonORT College në Brooklyn, ku folësi kryesor ishte kongresisti amerikan Joe Di Guardi. Ajo është vlerësuar me çertifikatë mirënjohje në Ditën e Mësuesit nga shoqata “Dibra” dhe është e fokusuar t’ju mësojë në shkollë gjuhën shqipe fëmijëve të komunitetit shqiptar që janë lindur dhe rritur në Diasporë.

Prezantimi ka vazhduar me znj.Emmie Salaj e cila punon në një korporatë lluksoze Bulgari Coorporation në Amerikë si zv/presidente e saj në Ameriken e Veriut. Ka Master në studimin profesional në kozmetikë, marketing nga Instituti i modës dhe teknologjisë. Ajo është në këtë kompani nga viti 2012. Më parë ka qenë zv/presidente e marketingut për Ralf Lauren, një divizion i L’Oreal USA. Ajo ka arritur shumë suksese në inisiativa të ndryshme si në World Polo dhe Big Pony Collegiate Tour. Ka qenë menaxhere në disa vende dhe njëkohësisht ajo është një vizionare dhe lidere frymëzuese e kompanive ku jep vetëm rezultat.

Ajo ka vazhduar studimet e mëtejshme në Angli, Francë, Kinë dhe Tokio. Gjithashtu ka diplomën në Anglisht dhe komunikim nga BaruchCollege.

Ajo është një anëtare aktiviste e grave ekzekutive të kozmetikës dhe është në Bordin e produkteve të kujdesit personal.

Eshtë e specializuar në kozmetikë, kujdesin e lëkurës, në media marketing, në reklama të ndryshme, në produkte e mjaft të tjera.

Ka përfunduar me zonjën Haxhire Redzovic. Në vitet e kaluara znj.Redzovic ka ndarë historinë personale në websitin: afterall-this.com e cila qëndron për rrugët pafund të jetës përmes shpresës, frymëzimit dhe suportit.

Ajo është një grua e afirmuar. Ka përfunduar studimet për kompjuter në BaruchCollege ku 20 vjet më parë ishte e dominuar nga burra. Ajo ka punuar për 8 vjet në Wall Street. Ajo filloi si instruktore e teknologjisë dhe shumë shpejt filloi menagere dhe drejtore e Wachovia Securities. Znj. Salaj jep mësim çdo të dielë, leksione të vallëzimit dhe të këngës, rekordon episode të shfaqjes së gatimit dhe paraqitet në dokumentarët komercialë në Broadway, punon pas skenës në javën e modës së New Yorkut dhe ndryshon stilin sa më shumë të jetë e mundur. Në 2003 ajo humbi binjakët dhe ka pasur probleme me shëndetin. Ka qenë dy muaj në reaminacion me veshka pa funksion dhe mushkëri të sëmura, ka bërë transfuzion gjaku dhe dializë, humbi shikimin, ra në koma, dhe më vonë mësoi të ecte përsëri. Vetëm 20% kishte shpresa shpëtimi nga doktorët. Ajo i surprizoi doktorët, familjarët me luftën e saj dhe pozitivitetin absolut. Në vitin 2006 ajo pati një vdekje tragjike të motrës së saj dhe të kunatit. Ishe shumë vështirë për çdo njeri, por ajo luftoi dhe i mbajti njerëzit me shpirt dhe moral të lartë. Ajo ka 10 vjet që punon për komunitetin, ajo mëson të rinjtë dhe frymëzon për të ecur më tej. Të gjithë e dini që është Haxhireja tha zonjusha simpatike Rexha, por unë preferoj ta quaj mami.

Zonjat e vlerësuara janë përshëndetur nga Kongresisti Amerikan z.Grimm dhe asambleisti z.Mark Gjonaj.

Aktiviteti është filmuar nga Amir Suka dhe Qemal Zylo per TV Alba Life.

Pjesëmarrësit janë argëtuar nën tingujt e D.J. me drejtues z.Adriatik Çobaj.

Ishte një aktivitet tepër mbresëlënës, realizuar plot kulturë dhe elegancë, që do të mbahet mend gjatë në kujtesën e tyre.

9 Mars, 2014

Staten Island, New York

Kryekomunari i Dibres, Lata, u takua me komunitetin dibran në Staten Island

March 9, 2014 by dgreca

Dibranët,në Amerikë, diskutuan hallet dhe brengat të Dibrës së Madhe me Kryetarin e Dibrës, zotëri Ruzhdi Lata,me temën: “Ju, bashkë me Kryetarin, do ta ndërtoni Dibrën! Dibrën do t’a bëjnë vetëm dibranët”/

Nga Beqir Sina/

STATEN ISLAND NEW YORK – Kryetari i Komunës së Dibër e Madhe, vijoi vizitën e tij në Shtetet e Bashkuara, dje me një takim mjaft të ngrohtë me përfaqësues të Komunitetit Dibranë, në ishullin e dibranëve në Nju Jork – Staten Island. Takimi me dibranët në zonën e Tri- Shtetshit, u mbajt të shtunën më datën 8 Mars 2014 ora 12 e mesë-drekës, deri në orën 4 të mbasdrekës, në lokalin e njohur “Klubi Dibra” me pronar bashkëqytetarin dibran Titi Maqellara, në Bay Street, Staten Island -NYC. Si dihet kryetari i Dibrës së Madhe, zoti Lata erdhi në SHBA, javën e kaluar bashkë me nënkryetarin e BDI-së, zotëri Izet Mexhiti, i autorizuar si përgjegjës për diasporën në zgjedhjet parlamentare, të 26 prillit atë të Kërçovës zotin Fatmir Dehari, për të marrë pjesë në zgjedhjen e kanadidatit shqiptarë nga diaspora, duke bërë thirrje që shqiptarët nga Maqedonia të regjistrohen dhe të dalin masivisht në votime më 26 Prill këtu në Shtetet e Bashkuara të Amerikës.

Takimi i organizua nga Shoqata Atdhetare Dibra me qendër në Staten Island dhe e kryesoi kryetari i saj zoti Musa Paçuku. Me këtë rast shoqata Dibra e nderojë me Mirënjohje, kryetarin e Dibrës zotëri Ruzhdi Latën.

Ndërkoh në bashkëbisedimin e mbajtur dje morën pjesë më shumë se 200 dibranë, shumia anëtarë të kësaj shoqate, si dhe veprimtarë të dalluar të këtij komuniteti, afaristë e biznesmen të suksesshëm dibranë në SHBA.

Takimi, pati formën e një forumi bashkëbisedues në mes të parit të Dibrës, maxhistër Ruzhdi Lata, dhe komunitetit dibranë, i cili thuhet se është një ndër komunitetet më të mëdha në SHBA, me rreth 20 mijë dibranë, aqsa mendohet se kan emigruar nga Dibra e Madhe në Amerikë, gjatë 5 dekadave të fundit.

Gjatë bashkëbisedes të mbajtur në lokalin “Dibra Club” kreu i Dibrës, zoti Lata, në fillim të fjalës së tij i përgëzoi dibranët për kontributin që ata japin në të mirë të imazhit të Dibrës dhe shqiptarëve të Amerikës dhe informoi ata për përpjekjet që po bënë Komuna e tij, për të rritur kujdesin dhe bashkëpunimin me diasporën dibrane në SHBA.

Kryetari i Dibrës bëri edhe një ekspoze të detajuar të Komunës

Duke iu drejtuar të pranishmëve, zoti Lata, vuri në dukje arritjet e vitit të parë prej kur ai fitojë edhe mandatin e kryetarit të Komunës së Dibrës së Madhe dhe foli gjithashtu edhe për sfidat që qëndrojnë përpara në rrugën e zhvillmit ekonomik e social të Dibrës dhe konkretisht për të arritur atë se çfarë besuan në votën e tyre dhe duan populli i Dibrës së Madhe .

Kryetari i Komunës së Dibrës Madhe, në Maqedoni, maxhistër Ruzhdi Lata duke bëri një ekspoze të detajuar të punëve që janë bërë deri tani në këtë Komunë, tha se për të lënë pas të shkuarën duhet që dibranët, sot të mos merren shumë me të shkuarën dhe se çfarë është bër më parë , por të gjithë së bashku tha ai duhet të kemi një vështrim të qartë nga e ardhmja e Dibrës, dhe çfarë mund të bëjmë për Dibrën dhe dibranët. Ai dha sqarime rreth çështjes së regjistrimit të dibranëve në SHBA për votimet në Maqedoni dhe rëndësinë e madhe që kan këto zgjedhje, për shqiptarët e Amerikës, duke bër thirrje edhe një her për dalje masive në këto zgjedhje. Në këtë kontekst ai sqaroi edhe pse nuk u zgjodh një dibran(ashtu si dëshorinin të gjithë) për kandidat nga diaspora në zgjedhjet parlamentare në Maqedoni.

Më pasë edhe në përgjigjet e shqetësimeve të dibranëve ai nuk anashkaloi dhe sqaroi mirë si qëndron çështja me devijimin e Lumit të Radikës. Kreu i Dibrës, siguroi dibranët se ; ” Në asnjë mënyrë nuk do të ketë devijim të Lumit të Radikës”. Ku, sipas tij do të bëhet si ka vendosur populli i Dibrës” dhe shtojë si e ka krijuar natyra pra ” Lumi ka rrjedhën dhe drejtimin e saj shekullor dhe atë do të ketë atë perj nga Lindja drejt Perendimit dhe jo nga Perndimi drejt Lindjes, për të “fryrë” dhe mubushur me ujë për lundrim Vardarin e daljen e tij me derdhje në Detin Egje nëpërmjet Greqisë”.

Ndërsa, duke folur rreth zgjedhjeve Parlamentare në Maqedoni, të ilat mbahen në 26 Prill, zotëri Lata, tha se angazhimi i tanishëm tek ne ka të bëjë me faktorizimin e akoma më të madh të shqiptarëve në qeverinë e ardhshme, ku përndryshe nga 3 vjet më parë, ai tha se tani BDI-ja, partia së cilës ai i përket, synon të marrë të paktën 2 nga 3 deputetët e diasporës. “Këtu nuk është çështje shprese, theksojë, ai, por është çështje angazhimi pasi numri është dominant i njerëzve tanë në SHBA dhe nëse angazhohen shqiptarët që të dalin në votime, të shkojnë deri në konsullatë të Maqedonisë që të votojnë, është më se e sigurt që ne fitojmë edhe një deputet më shumë shqiptarë në parlamentin e Maqedonisë”, u shpreh kryetari i Dibrës maxhistër Ruzhdi Lata, duke u bërë thirrje vazhdimisht disa her edhe në këtë bashkëbisedim komunitetit dibranë, që të mos harrojnë të regjistrohen dhe të dalën masivisht në zgjedhjet e 26 Prillit, vetem e vetëm të zgjidhet një shqiptarë”.

Kryetari i komunë së Dibrës , Ruzhdi Lata, si kryetar komune, tha se për këto 11 muaj prej se kur e mori Komunën në drejtimin e tij ka bërë shumë për të realizuar gjitha projektet e pushtetit vendor. Të cilat ishin edhe premtimet e tija elektorale. Ai u shpreh se gjithmon ka pasur kënaqësinë e tij, që të jetë si kryetar i Dibrës duke potencuar ” Kryetar për të gjithë, pa dallim politik, fetar apo nacionaliteti, kryetar i të gjithë qytetarëve dibranë”. “Pushteti vendor në fillim të mandatit tim, theksoi ai kishte nevojë për sistemim dhe rregullim të mjeteve financiare, sistemim të vendeve të punës dhe këtë e arritëm me sukses. Në komunën e Dibrës nuk ka më punëtorë me kontratë në vepër, por të gjitha kanë vendime, ne nuk duam punëtorë me stres por duam të ketë rehati në vendin e punës, dhe këtë e arritëm qysh në 100 ditëshin e parë të punës time” si kryetar komune tha Lata.

“Kemi paguar shumë borxhe, sqaroi ai sepse duhej të bëhej një punë e tillë, me këtë rast dua të përmend Ndërmarrjen e Gostivarit “Progres,, një vlerë prej 80 mijë euro. Për mua si kryetar është bashkëpunimi i mirëfilltë me qytetarët , jam i pari kryetar që nuk kam bë asnjë ndryshim kadrovik në komunë e jo më në institucione të tjera” ka potencuar Lata.
Sa i takon projekteve ai ka deklaruar se për këtë kohë janë bërë shumë punë , duke filluar qysh nga asfaltimet të lagjeve të shumta të qytetit. Sipas, tij nuk ka pasur tender në këto projekte, sepse i gjithë materiali është ofruar nga ana e pushtetit vendor ,ndërsa krahu i punës ka qene vetë qytetari i çdo lagje të Dibrës së Madhe. Lata foli për ujin e pijëshëm në qytet, energjinë elektrike, spitalin, pastrimin e qytetit, Liqenin e Dibrës, çështjet e tjera administrative, Hdrocentralin e Spiles, kulturën sportin, biznesin vendor, çështjen e shqipes në dokumentat e administratës.

Takimi u mbyll në formën e një bashkëbisedimi, dhe mirëkuptimi, ku me anë të pyetjeve që i moderojë zotëri Muharrem Borova, por edhe përgjigjeve të sakta që dha Kryetari i Komunës së Dibrës së Madhe – Maqedoni, maxhistër Ruzhdi Lata.

Ata së bashku gjatë gjithë kohës shkëmbyen mendime për forcimin e lidhjeve ndërmjet vendorigjinës – vendlidjes dhe diasporës në të gjitha pjesët e jetës së këtij komuniteti, që është dalluar në diasporë për kontributin e madh që ka dhënë në çështjen kombëtare dhe qytetin e tyre Dibrën e Madhe.Në fund u shtrua një darkë për nder të Kryetarit të Dibrës ë Madhe zotëri Ruzhdi Lata.(Foto: Keze Zylo)

KONSULLI I PERGJITSHEM I KOSOVES NE WORCESTER

March 9, 2014 by dgreca

*Ambasadori Bekim Sjediu, Konsull i Pergjithshem i Kosoves ne New York, vizitojë qytetin e Usterit në Masaçustes me rastin 7 marsit – Ditës së Mësuesit, si dhe 8 marsit – Ditës së Gruas/

*Kryetari i Bashkisë së qytetit të 180 mijë banorëve Worcester Uster, Massachusetts, zoti Joseph M. Petty , sipas një tradite nëntëdhjetëvjeçare vjeçare, nderoi me “Çelsin e Qytetit”, për vizitën që i bëri këtij qyteti Konsullin e Përgjithshëm të Kosovës në Nju Jork, Ambasadorin Bekim Sejdiu.

Nga Worccester Beqir Sina/

WORCESTER – MASSACHUSETTS: Shoqata KOMBI priti Ambasadorin , Konsullin e Përgjithshëm të Kosovës zotin Bekim Sejdiu më 7 Mars 2014 në një vizitë që ai i bëri këtij komuniteti për të dhuruar libra shkollorë për shkollën shqipe të qytetit të Worcester – Uster Masaachusetts, ku jetojnë një nga komunitetet më hershme shqiptare në Amerikë.

Vizita u zhvillua me rastin e shënimit të 7 marsit – Ditës së Mësuesit, si dhe 8 marsit – Ditës së Gruas, dhe nisi një takim me pedagogët dhe grupin e studentëve shqiptarë nga Kosova e Shqipëria, që kan ardhur këtu të mësojnë me bursat të Institutin Politeknik Worcester (WPI).

Në vijim të kësaj vizite, duke u dhuruar Abetaren e unisuar si dhe mjete të tjera shkollore për shkollën shqipe në Kishën Otodokse Shqiptare e “Zonjës Shën Marisë”, ai vijojë me vizitën e tij, me takime me personelin drejtues të kësaj kishe, ku ndodhet edhe shkolla më e vjetër shqiptare në Amerikë, dhe funksionon Grupi i djemëve dhe vajzave të Këngëve dhe Valleve, shqiptare.

Më tej Ambasadori Sjediu, për të nderuar Ditën e Nënave – 8 Marsin pati një takim me nënat e moshuara shqiptare në shtëpinë e pleqve “Kopshti Illirianve – Illyrians Garden” e cila funksionon pranë kësaj Kishe.

Me këtë rast në mbrëmje, në lokalin me pronar shqiptar “Nova”, u shtrua edhe një darkë nga Shoqata Kombi, ku përfaqësuesit të shtetit të Kosovës në Nju Jork, Konusllit të Përgjithshëm – Ambasadorit Bekim Sjediu, i uroi mirëseardhjen edhe asamblesitja e shtetit të Massachusetts, zonja Mary Keffee, si dhe mikëpritësi dhe organizatori i kësaj vizite kryetari i Shoqatës Kombi, zoti Artur Vrekaj dhe ish kryetari i saj Professor Ilir Maçi.

Në këtë pritje morën pjesë edhe një grup veprimtarësh të komunitetit, zoti Ardian Preçi – Shef Eksekutiv i shoqatës ” Massachusettes Albanian Chamber of Comerce”, si edhe ish Kryebashkiakja shqiptare e këtij qyteti – Këshilltarja e Këshillit të Bashkisë së qytetit Uster – Worcester, zonja Konstantina Lukes, e cila ka qenë dhe para kryetare bashkie me origjinë Shqiptare, në Shtetet e Bashkuara të Amerikës.

Me këtë rast, Kryetari i Bashkisë së qytetit të 180 mijë banorëve Worcester Uster, Massachusetts, zoti Joseph M. Petty , sipas një tradite nëntëdhjetëvjeçare vjeçare, nderoi me “Çelsin e Qytetit”, për vizitën që i bëri këtij qyteti Konsullin e Përgjithshëm të Kosovës në Nju Jork, Ambasadorin Bekim Sejdiu.

Duke lexuar motivacionin e dhënjesë së “Çelsit të Qytetit” Worcester ( Uster), kryetari i Bashkisë, Joseph M. Petty, tha se :” Shkëlqësia Juaj Amabasador Bekim Sejdiu – është kënaqsi për mua që në emër të Kryetarit të Bashkisë së qytetit, të u dhurojë me këtë rast “Çelsin e Qytetit” – Worcester ( Uster), Massachusetts, më 7 Mars 2014, si një nderim për vizitën Tuaj në qytetin tonë.

Qyteti i Worcester ( Uster), tha Petty, është krenar dhe i bekuar që ka në jetën e tij, një nga komunitetet më të mëdha dhe më vital në këtë qytet, siç është komuniteti shqiptarë. Komuniteti shqiptarë është një nga komunitetet më të mëdha në qytetin tonë , ku shqiptarët janë pronar të pasurive të patundëshme dhe bizneseve të tjera.

Dhe për dallim nënvizojë ai komuniteti shqiptarë ka edhe fëmijët në shkollat e këtij qyteti nga më të mirët dhe nga më të suksesshmit.

Më pas ai sqaroi se ky nderim ka nisur prej kur një nga Kryetarët e parë të kësaj bashkie, pikërishtë 90 vjet më parë, në vitin 1924, pati nisur i pari këtë praktikë të dhurimit miqve tanë “Çelsin e Qytetit” Ëorcester. Ai ishte njeriu i cili diznjojë vetë këtë “Çelës të Qytetit”, një praktik zyrtare, kjo, që ne po vazhdojmë të ruajmë traditën e tonë.

Andaj , shtojë kreu i kësaj bashkie unë jam krenar që më është dhënë mundësia si Kryetar i kësaj Bashkie, të ri-përsërisë këtë traditë të bukur të qytetit tonë Ëorcester ( Uster), Massachusetts, në versionin e saj origjinal.

Këtë “Çelës të Qytetit” tonë e kanë marr më parë edhe personalitete të tjera të shquara amerikane dhe të komuniteteve të tjera që kan vizituar këtë qytet, përfundojë kryetari i Bashkisë, Joseph M. Petty

Sipas Regjistrimit tha ish Kryebashkiakja shqiptare e këtij qyteti – Këshilltarja e Këshillit të Bashkisë së qytetit Uster – Worcester, zonja Konstantina Lukes, e cila ka qenë dhe para kryetare bashkie me origjinë Shqiptare, në Shtetet e Bashkuara të Amerikës, numri i shqiptarëve në vitin 2000, ishte rreth 14,000 ( nga një popullsi të përgjithshme prej 170.000 banorë të këtij qyteti ). Pjesa më madhe e atyre shqiptarëve ishin të vendosur në qytetin e Worcester-it dhe rrethinat e tij. Komuniteti shqiptar i Massachusetts është më i madh i një ndfër katër komuniteteve shqiptare të Amerikës (pas atyre të New York , Michiganit dhe Illinoisit ) . Ndërkohë , shtoi ajo Worcester vjen e 10-ta në listën e qarqeve amerikane me përqendrimin më të madh të shqiptarëve.

Sipas të dhënave , emigrantët e parë shqiptarë erdhën në Massachusetts dhe Worcester-it nga fundi i shekullit të 19-të. Ata emigrantë do të gjenin qysh atëhere një strehë të ngrohtë në Kishën Shqiptare që kohët e fundit festoi përvjetorin e saj të 90 .

Sipas zonjës Keffee :” Komuniteti shqiptar i Worcester-it, është një nga grupet më të mëdha etnike të qytetit , dhe ajo vazhdon të rritet . “Ne jemi krenar të them se sot shqiptarët e Worcester, janë pronarët e shtëpive dhe pronarët e bizneseve , ndërsa nxënësit shqiptarë janë studentët nga më të mirët e shkollave dhe në kolegjet Worcester-it dhe universitetet që ata ndjekin ” u shpreh asamblesitja e shtetit të Massachusetts, zonja Mary Keffee.

Kryetari i shoqatës KOMBI , zoti Artur Vrekaj tha se :”Disa aktivitete të komunitetit dhe festimet , janë të tilla si Festivali shqiptar që organizohet çdo dy vjet nga kisha shqiptare , të cilat janë një tregues i fortë se shqiptarët e Worcester, që i kanë mbetur besnikë ndaj kulturës së tyre të bukur dhe traditat shqiptare . Me festat tona kombëtare ne Shoqata Kombi japëm një kontribut të mirë për bashkimin e komunitetit shqiptar dhe ruajtjen e identitetit e tonë, zhvillojmë paradën dhe ngritjen e flamurit” theksoi Vrekaj .

NDËRROI JETË NË NJU YORK SADIK LAJQI

March 8, 2014 by dgreca

Komuniteti shqiptar në Nju Jork ka humbur një ndër aktivistët e vet, të ndjerin Sadik Lajqi. I ndjeri humbi jetën me 7 Mars 2014 në moshën 67 vjecare. Miqtë dhe të afërmit kanë kryer vizita në shtëpi gjatë ditës së Shtunë, 8 Mars, ndërsa të dielën, me 9 Mars , komuniteti Shqiptar do të shprehë ngushëllimet në Ruggiero & Sons Funeral, që ndodhet në adresën:

732 Yonkers Ave,

Yonkers, NY 10704

Phone:(888) 375-1400

Shërbimet mortore do të kryhen të dielën nga ora 13.00 p.m deri ën orën 21.00 p.m. I ndjeri Sadik Lajqi do të përcillet për në banesëne fundit të Hënën në orën 11.00 a.m në varrezat Kensiko në Vallhalla të Nju Jorkut.

KOMITETI MYSLIMAN I SHQIPERISE ME KRYETAR TE RI

March 8, 2014 by dgreca

Skënder Bruçaj kryetari i ri i KMSH, Muça: Jam i sëmurë, peng që nuk u ndërtua Xhamia/

IRANË- Skënder Bruçaj zgjidhet kryetari i ri i Komunitetit Mysliman. Bruçaj do të zërë vendin e Haxhi Selim Muçës, pasi ai nuk rikandidoi për këtë post. Ditën e sotme u votua për kryetarin e ri, ku Bruçaj u zgjodh me 88 vota pro si kryetar i KMSH-së.
Pas përfundimit të mandatit të Kryetarit H. Selim Muça, kandidaturat që fituan të drejtën për të garuar për këtë post ishin: z. Bujar Spahiu, nënkryetar i KMSH-së; Skender Bruçaj, nënkryetar i KMSH-së; Dorian Demetja, drejtor i Burimeve Njerëzore pranë KMSH-së.
Kryetari në detyrë H. Selim Muça në fjalën e tij falënderoi bashkëpunëtorët e ngushtë dhe anëtarët e Këshillit të Përgjithshëm për mbështetjen e vazhdueshme në përmbushjen e kësaj detyre. “Ju falënderoj për mbështetjen dhe besimin që më keni dhënë në çdo moment. Të njëjtën gjë shpresoj ta bëni edhe me pasuesin tim në këtë detyrë të shenjtë e fisnike”, u shpreh Muça.
Këshilli i Përgjithshëm e shpalli H. Selim Muçën kryetar nderi dhe anëtar i përhershëm i Këshillit të Përgjithshëm të KMSH-së, me motivacionin: “Për kontributin e vyer në konsolidimin e vlerave fetare dhe atdhetare në shoqërinë shqiptare”.
Procesi i votimit për zgjedhjen e kryetarit të ri u zhvillua në mënyrë të fshehtë. Nga 101 anëtarë që ka Këshilli i Përgjithshëm, në votim morën pjesë 99 vetë. Fitues me shumicë votash u shpall Skender Bruçaj.
H. Selim Muça i dorëzoi në shenjë simbolike Kryetarit të ri çallmën dhe xhyben e tij, duke i uruar suksese dhe mbarësi në këtë mandat pesëvjeçar. Më pas, Bruçaj me dorë mbi Kur’an bëri betimin konform statutit përpara anëtarëve të Këshillit të Përgjithshëm, si vijon:
“Betohem në emër të Allahut, se do të vazhdoj me besnikëri e përkushtim urdhrat e Islamit, do të punoj me ndërgjegje të plotë islame për lartësimin e fesë së Allahut, do të zbatoj me përpikëri Statutin dhe Rregulloren e Komunitetit Mysliman, dhe do të punoj me ngulm për forcimin e ndjenjës kombëtare e atdhedashurisë ndër myslimanët e Republikës së Shqipërisë. Allahu më ndihmoftë!”
Selim Muça u zgjodh të drejtonte institucionin më të lartë të myslimanëve shqiptarë në datën 17 mars 2004. KMSH-ja është drejtuar për një kohë të gjatë nga Haxhi Selim Muça prej 10 vitesh. Muça ka qenë kështu lideri i dytë i myslimanëve shqiptarë në periudhën e demokracisë, duke zëvendësuar në këtë post Haxhi Hafiz Sabri Koçin.
Ai erdhi në një kohë kur në dosjen e tij kërkojnë zgjidhje një sërë çështjesh të rëndësishme, siç janë vizioni i ri dhe një prej çështjeve më të mprehta, ajo e rikthimit të pronave, çështje kjo shpesh e diskutuar dhe ndonjëherë e keqinterpretuar jo vetëm nga mediat, por edhe nga individë të caktuar.

HAXHI SELIM MUÇA: NUK KANDIDOVA SEPSE JAM I SËMURË PREJ 1 MUAJI
Në një intervistë për “News24”, kreu i Komunitetit Mysliman, Haxhi Selim Muça bëri të ditur se nuk rikandidoi për të qenë sërish kryetar i KMSH-së për arsye shëndetësore dhe për t’i dhënë mundësi brezit të ri.
Haxhi Selim Muça tha se prej një muaji është i sëmurë dhe për këtë arsye nuk kishte pranuar të rikandidonte për kryetar i Komunietit Mysliman.
Kreu i KMSH-së deklaroi se i mbetet peng që nuk u ndërtua Xhamia e Madhe e Tiranës. “Shpresoj të nisin punimet për projektin sa të jem gjallë. Zbatimi i projektit zgjat 2 deri në 3 vite”- u shpreh Muça.

KUSH ËSHTË SKENDER BRUÇAJ?
Skender Bruçaj ka lindur në rrethin e Malësisë së Madhe më 22 qershor 1976.
Pasi mbaroi arsimin 8-vjeçar në vendlindje, ai u bë pjesë e kontingjentit të parë të studentëve që u nisën nga KMSH drejt Turqisë në vitin 1992.
Kështu më 1996 ai kreu Medresenë Bejkoz në Stamboll, Turqi. Më pas ai ndoqi studimet në Institutin e Gjuhëve të Huaja pranë Universitetit të Bosforit, ku pasi mbrojti gjuhën angleze, vazhdoi studimet në Fakultetin e Shkencave Sociale, dega Psikologji.
Gjatë viteve 2000-2011 kreu studimet pasuniversitare, ndërsa aktualisht është duke ndjekur studimet për doktoraturë me temë: “Menaxhimi i Cilësisë në Arsim”.
Për disa vite ka punuar si konsulent për disa komani të huaja.
Në vitin 2008 është emëruar Drejtor i Qendrës së Planifikimit të Karrierës në Universitetin Epoka.
Në shtator 2008 është emëruar nga Komuniteti Mysliman si Kryetar i Komisionit të Hartimit të Dosjes për hapjen e Universitetit “Hëna e Plotë-Bedër”. Me hapjen e universitetit ai fillon të japë leksione si pedagog në Fakultetin e Shkencave Humane në Departamentin e Shkencave Islame dhe atë të Drejtësisë në tre gjuhë: shqip, anglisht dhe turqisht.
Në periudhat shtator 2011-dhjetor 2013, krahas lektorit në lëndët Psikologji Sociale dhe Psikologji Islame në universitet, ai ka qenë gjithashtu përgjegjës i Departamentit të Drejtësisë dhe zv/dekan i fakultetit të Shkencave Humane në Universitetin Bedër.
Skender Bruçaj ka qenë gjithashtu Drejtor i Qendrës për Edukim të Vazhduar dhe Formim Profesional në Universitetin Bedër.
Duke parë përgatitjen e tij të gjerë akademike, Kryesia e KMSH-së, në dhjetor 2013 e emëron atë nënkryetar të KMSH-së.
Z. Bruçaj ka disa marrë pjesë në shumë konferenca kombëtare dhe ndërkombëtare, si referues në emër të Universitetit Bedër dhe Komunitetit Mysliman të Shqipërisë.
Ai njeh disa gjuhë të huaja si anglisht, turqisht dhe italisht.
Z. Bruçaj është i martuar dhe ka dy fëmijë (djem).(Kortezi: Balkanweb)