Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

EURODEPUTETI TAKOI FILLIMISHT OPOZITEN

by

Kukan në Tiranë: Të vendoset dialogu politik, i rëndësishëm drejt rrugës së BE/
Ka përfunduar takimi mes eurodeputetit, Eduart Kukan dhe kryetari të Partisë Demokratike, Lulzim Basha për vendosjen e dialogut mes mazhorancës dhe opozitës dhe thyerjes së bojkotit opozitar.
Eurodeputetit, Eduart Kukan u takua sot në mëngjes me Kryetarin e Partisë Demokratike, Lulzim Basha për të gjetur një marrëveshje mes mazhorancës dhe opozitës për ta kthyer opozitën në Kuvend.
Eduart Kukan pas takimit me kryetarin e opozitës, Lulzim Basha dha një prononcim për mediat dhe u shpreh se “kam ardhur sot të vijoi punën e kolegut tim, z. Flenkeshtein për të rivendosur dialogun politik në Shqipëri që është shumë i rëndësishëm për të zhvilluar një politikë evropianë të suksesshme”.
“Jemi në diskutime”, është përgjigjur Kukan, pyetjes së drejtuar nga gazetarët përsa i përket bojkotit të opozitës.
Meta pas takimit me Kukan: Opozita e mirëpritur; të vendosur për gjithëpërfshirje
Kryetari i Kuvendit, Ilir Meta u takua të hënën me eurodeputetin e Parlamentit Evropian, Eduard Kukan, me të cilin bisedoi mbi zhvillimet e fundit politike në Shqipëri duke ndarë bindjen e përbashkët se të gjitha institucionet demokratike në vend duhet të funksionojnë përmes parimeve të pjesëmarrjes, dialogut dhe bashkëpunimit politik.
Në këtë kuadër u vlerësua angazhimi dhe mbështetja e eurodeputetëve dhe PE-së, veçanërisht e dy grupeve të mëdha europarlamentare të Partive Popullore Evropiane (EPP) dhe Aleancës Progresive të Socialistëve dhe Demokratëve (S&D). Pas takimit, kryeparlamentari tha se opozita është e mirëpritur të kthehet në parlament, pasi tashmë janë plotësuar të gjitha kërkesat kryesore të saj, përfshi dhe ato që synojnë funksionimin më demokratik dhe transparent të parlamentit.

“Besoj se janë plotësuar të gjitha kërkesat kryesore të opozitës, si dhe çdo kërkesë e saj që synon një funksionim më demokratik dhe transparent të Kuvendit. Opozita ka qenë dhe mbetet gjithmonë e mirëpritur dhe ne jemi të vendosur për transparencë dhe gjithëpërfshirje. Ajo është e mirëpritur në çdo moment për të përmbushur rolin dhe funksionet e saj në parlament dhe do të shpresoja shumë që kjo të ndodhte para Krishtlindjeve”, u shpreh kreu i Kuvendit në prononcimin e tij për gazetarët.
.

I pyetur nëse kthimi i deputetëve të opozitës lidhet me djegien e mandateve, kryeparlamentari u përgjigj se nuk është momenti të flasim për këtë, por duhet të flasim për përfshirje dhe dialog.
“Këtu nuk flitet thjesht për të evituar një djegie mandatesh, por për ta ndarë njëherë e mirë politikën tonë nga fryma e bojkotit dhe e konfliktit. Ne na duhet të krijojmë një traditë të qëndrueshme të një demokracie funksionale dhe të një dialogu funksional për realizimin e reformave që kërkon vendi. Fakti që kemi angazhimin e dy eurodeputetëve të njohur tregon se ka një vëmendje ndërkombëtare për të mbështetur rivendosjen e dialogut politik në vend. Dhe unë shpresoj që ky angazhim i eurodeputetëve Kukan dhe Fleckenstein të jetë i suksesshëm dhe kjo është mjaft pozitive”, nënvizoi Ilir Meta.
I pyetur nga gazetarët se ende politika shqiptare vazhdon të ‘mbikëqyret’ nga ndërkombëtarët, edhe pas 25 vitesh pluralizëm politik, ai u përgjigj se ‘kjo nuk është çështje mbikëqyrje, por çështje standardesh”.

“Ne kemi bërë një zgjedhje për t’u integruar plotësisht në Bashkimin Europian dhe ky bashkëpunim me BE-në më duket i natyrshëm dhe në fund të fundit e rëndësishme është të ecet përpara drejt një dialogu të qëndrueshëm e afatgjatë që e ndihmon Shqipërinë të përmbushë më shpejt standardet e saj drejt BE-së”, the kreu i Kuvendit.
Eurodeputeti Eduard Kukan, i mandatuar nga grupimi i së djathtës në Parlamentin Europian, ndodhet në Tiranë në kuadër të misionit të faktorit ndërkombëtar për të ndërmjetësur rikthimin e opozitës në Kuvend.
Axhenda e tij nisi me takimin me kryetarin e Partisë Demokratike, Lulzim Basha, për të vijuar më pas me takimin me kryeministrin Edi Rama dhe kryeparlamentarin Meta.

Berisha nga Budapesti:”Ne do ju rezervojmë bijve fatin e etërve te tyre”!

by

Berisha ka reaguar nga Budapesti, ku ndodhet si i ftuar ne konferencën kushtuar kryengritjes antikomuniste të Timoshoarës ku nisi edhe kryengritja antikomuniste qe coi ne rezimin e diktatorit komunist Çaushesku . Bersha ka postuar ne profili n e tij ne fb një mesazh qe përfundon me premtimin se pushtetarëve ish komuniste ne Tirane do ju rezervojnë fatin e etërve se Te dashur miq, sot mora fjalën ne konferencën e organizuar ne Budapest për 25 vjetorin e Kryengritjes se Timoshoares . Ne fjalën time shpreha mirënjohjen për ftesën dhe nderin qe me bene t’i drejtohem si i ftuar nderi këtij Forumi, sikundër theksova se kombet qe vuajtën nen diktaturat komuniste janë dhe do mbeten shume mirënjohës ndaj kombit hungarez.
Ne fjalën time theksova se kombi i tyre vigan, ishte i pari qe se bashku me autoritetet e vendit shembi segmentin e vet te murit te Berlinit, hoqi telat me gjemba ne kufirin me Austrinë dhe duke hapur kufirin për gjermanet e Lindjes luajti rol te pazevendesueshem ne shembjen nga gjermanet te murit ne Berlinit. Ne fjalen time u shpreha gjithashtu se nga ajo tribune dëshiroja te përulesha me nderimin me te madh para trimërisë, guximit, heroizmit te qytetareve te Timoshoares dhe bishopit te tyre Tukesh Lazlo, qe shndërruan 25 vjet me pare, fillimisht Kishën e me pas qytetin e tyre, ne kështjelle te pamposhtur te lirisë. Timoshoara nuk është një ngjarje e madhe vetëm për ketë qytet dhe Transilvaninë por dhe për rumunet, shqiptaret dhe mbare popujt e tjere te shtypur, te cilet mbeten pas zhvillimeve epokale ne Poloni, Hungari, Gjermani, Çekosllavaki nen diktaturat e egra komuniste. Qendresa e qytetareve te Timoshoares frymezoi rumunet dhe shqiptaret ne perpjekjet e tyre per liri, te drejta dhe dinjitet njerezor.
Ne fjalen time, pasi i njoha me levizjen studentore te dhjetorit 1990, u ndala ne zhvillimet e fundit ne Shqiperi ku nder te tjera theksova se sot ne Shqiperi jane ne pushtet bijte e atyre qe ne permbysem ne vitin 1990. Une besoj se askush nuk mund te mbaje pergjegjes bijte per veprat e eterve te vet. Mirepo ne Shqiperi qeveritaret aktual festuan ne vitin e 70 vjetorit te çlirimit duke rehabilituar diktatorin Enver Hoxha, diktatorin me mizor qe Europa ka njohur pas Luftes se Dyte Boterore, te cilin lideret e EDU, qendres se djathte europiane, ne deklaraten e Samitit te pranveres se viti 1991 e cilesuan si Hitlerin shqiptar te Pasluftes. Ata ngriten muze shteteror per Enver Hoxhen, dekoruan mbi 1000 drejtues kryesor,persekutor xhelat te rregjimit hoxhist qe kryen ndaj shqiptareve genocid dhe krime te tmerrshme kunder njerezimit.
Ne kete konference une mbylla fjalen time me zotimin solemn se ne demokratet shqiptare do t’u rezervojme bijeve fundin e eterve te tyre barbar !”, përfundon Berisha .(Kortezi:Minerva)

Ramush Haradinaj: Kam bërë gabime në politikë

by

Kreu i Aleancës për Ardhmërinë e Kosovës pranon se ka gabuar dhe paralajmëron reformë të politikave dhe organizative.
Në një fjalë të mbajtur në takimin me strukturat e përgjithshme drejtuese të AAK-së, Haradinaj u shpreh se Aleanca ka vendosur të pastrojë oborrin e vet.
Sot zhvilluam takimin me strukturat e përgjithshme drejtuese të AAK-së, tha kreu i Aleances Haradinaj.
Aleanca nuk do të jetë më e njëjtë, duke më përfshirë edhe mua. Kam bërë gabime në politikë.
Por, do të reformohemi dhe do të ndryshojmë. Fuqishëm dhe pandalshëm. Ky ndryshim do të jetë i plotë: Reformë e politikave dhe reformë organizative.
Ne e vlerësojmë mbështetjen e qytetarëve që na është dhënë për 15 vjet me radhë. Do të angazhohemi për të ndërtuar një momentum të ri. Do të përgatitemi intensivisht për të merituar besimin të plotë dhe të fuqishëm të qytetarëve.
Do të fillojmë menjëherë me punë për të ndërtuar një forcë politike për të gjithë qytetarët e Kosovës, ngado që janë, të të dy gjinive, të të gjitha moshave, të të gjitha profesioneve.
Do ta intensifikojmë qysh tash angazhimin për të ndërtuar ekipin e ri. Kërkoj angazhimin tuaj. Të të gjithëve. Të seciles dhe secilit që ka vendosmëri për të sjellë ndryshimin e vërtetë.
Ne do të ndërtojmë Aleancën e të gjithë qytetarëve të ndershëm dhe të përkushtuar për jetë të mirë. Të të gjithë atyre grave e burrave të Kosovës që besojnë në demokraci, shtet ligjor dhe funksionim të shtetit.
Po ju them krejt publikisht:
– Aleanca nuk ka vend për asnjë shkelës të ligjit.
– Aleanca nuk ka vend për gangsterë që përfitojnë në emër tonin e të Aleancës.
– Aleanca ka vendosur të pastrojë oborrin e vet.
– Aleanca i shpallë të përjashtuar qysh sot këdo që ka keqpërdorur detyrën zyrtare apo buxhetin qoftë në nivel komunal, qoftë në nivele tjera.
– Për Aleancën, kushdo jashtë strukturës apo brenda strukturës së Aleancës, që mënyrë të jetës e ka haraçin dhe fajdet është kriminel dhe duhet të shkojë në burg.
Po u them sot të gjithë njerëzve të tillë publikisht:
Largoni këmbët e duart larg nga zyrat e strukturat e Aleancës. Nuk na duhet vota juaj, nuk na duhet vota e kriminelëve!
Harrojeni, kushdo që jeni, se mund të silleni me papërgjegjësi para qytetarëve e duke u thirrë në emër të Aleancës. Kushdo, ama kushdo që sillet ashtu, nuk është Aleancë. Nuk ka qenë kurrë Aleancë dhe nuk do ta lejojmë afër nesh.
Personat e tillë duhet ta kenë vendin në burg, jo në Aleancë dhe askund nëpër parti politike. Fatkeqësia është se shteti nuk po funksion, sepse përndryshe të papërgjegjshmit dhe gangsterët do të përballeshin me ligjin!
Po ju them qartë dhe prerë:
Aleanca nuk është streha e profiterëve. Asnjëherë nuk ka qenë, por ndoshta ndokush edhe brenda strukturave të Aleancës nuk e ka kuptuar këtë!
Përkundrazi:
– Aleanca po përgatitet për të ndryshuar Kosovën, por së pari do ta ndryshojmë veten.
– Po e hapim partinë për intelektualë, për profesorë e aktivistë të shoqërisë civile.
– Po e hapim partinë për nivelin më të lartë të dijes në Kosovë.
– Po e hapim partinë për të gjithë.
Anëtari i Aleancës duhet të jetë:
– I ndershëm
– I pakorruptuar
– I sinqertë
– I arsimuar dhe kompetent
– I gatshëm për të shërbyer për popullin.
Ky është anëtari apo anëtarja e Aleancës. Dhe, të tillë Kosova ka shumë. Qytetarët e Kosovës janë të mirë, të ndershëm, punëtorë. E tillë do të jetë Aleanca e Ndryshimit. E mirë, e ndershme, punëtore.

Shehi: Opozita të hyjë në parlament, bojkoti sjell efekte anësore

by

Dashamir Shehu, kreu i LZHK-së, Shehi, pohoi në media se “e enjtja e ardhshme duhet t’i gjejë në Parlament deputetet e opozitës”, duke rikonfirmuar edhe pozicionin e tij/
Kryetari i Lëvizjes për Zhvillim Kombëtar dhe deputet i Partisë Demokratike, Dashamir Shehi, në një prononcim për mediat sot ka pohuar se duhet të marrë fund bojkoti i Kuvendit, pasi sjell efekte ansore të pariparueshme.
Shehi është shprehur se opozita ka marrë një pozicion që po dëmton vetveten, madje e ka konsideruar bojkotin e Parlamentit dhe të zgjedhjeve lokale (që parashikohet të mbahen vitin e ardhshëm) si një paradoks të vendimmarrjes politike.
Sot, kreu i LZHK-së, Shehi, pohoi në media se “e enjtja e ardhshme duhet t’i gjejë në Parlament deputetet e opozitës”, duke rikonfirmuar edhe pozicionin e tij, madje edhe jashtë grupit të Partisë Demokratike”.(I Vata)

Kadri Veseli, kryetar i Kuvendit të Kosovës

by

Kuvendi i Kosovës zgjodhi me 71 vota pro Kadri Veselin në postin e Kryetarit të Kuvendit.
Gjatë seancës plenare të mbledhur sot pas nënshkrimit të marrëveshjes mes PDK-së dhe LDK-së, deputetët e e Kuvendit zgjodhën me 71 vota pro, 41 kundër dhe 1 abstenim Kadri Veselin si Kryetar të Kuvendit. Përfaqësuesi i PDK-së, Hajredin Kuçi në emër të grupit parlamentar propozoi zv/kryetarin e PDK-së, Kadri Veselin për kryetar Kuvendi.
Ndërsa Xhavit Haliti nga PDK, Sabri Hamiti nga LDK dhe Glauk Konjufca nga VV u zgjodhën nënkryetarë të Kuvendit, nga partitë shqiptare. Nga komunitetet pakicë, nënkryetar i Kuvendit nga Lista Serbe u zgjodh Jasmina Zhivkovic, ndërsa nga Grupi 6+ Duda Balje, e cila do të zëvendësohet nga deputetët e tjerë të minoriteteve në periudha të caktuara.
Meta uron kryeparlamentarin e Kosovës, Kadri Veseli
Kryetari i Kuvendit, Ilir Meta, uroi sot kryetarin e sapozgjedhur të Kuvendit të Kosovës, Kadri Veseli, per zgjedhjen ne kete detyre.
“Suksese z. Veseli në detyrën e re dhe urime të gjithë parlamentarëve të Kosovës gjatë kësaj legjislature”, shprehet z. Meta në urimin drejtuar homologut kosovar. Ai shpreh mbështetjen e Kuvendit të Shqipërisë për Kuvendin e Kosovës në rrugëtimin e përbashkët evropian, si dhe gatishmërinë për të thelluar më tej bashkëpunimin dypalësh.
Kryeparlamentari shqiptar vlerësoi rol kyç të Kuvendit të Kosovës në forcimin e institucioneve demokratike të vendit. Ndërsa e mbyll urimin e tij duke e ftuar z.Veseli për një vizitë në Tiranë, kryetari Meta thekson se Shqipëria mbështet avancimin e Kosovës drejt së ardhmes evropiane, pa humbur kohe.