Archives for September 2015

Lamtumirë Ajlen dhe Galip!

September 3, 2015 by dgreca

Nga Ilir Levonja/
Bota është e tronditur mbrëmë nga pamjet që shpërndan në internet disa fotoreporterë dhe dhe aktivistë të të drejtave të njeriut. E para qe Liz Sly reportere e Washington Post, për luftën në Siri.
Më pas Nadim Houry, Peter Bouckaert dhe David Miliband. Kryetari i Laburistëve britanikë. Këto janë dhe personat më të ndjekur për momentin në twitter. Madje statuteve të tyre u referohet edhe New York Times. Bëhet fjalë për një djalë të mbytur, 3 vjeçar me emrin Ajlan Kurdi. Atë e ka gjetur një oficer i policisë së qytetit Bodrum, në Turqi. Nga ku pretendohet se fëmija është pjesë e një grupi prej dymbëdhjetë vetash. Të cilët po i drejtoheshin ishullit Kos në detin e Kretës. Mirëpo, tragjedia nuk mbaron me kaq. Diku më tutje, gjendet edhe trupi vëllait të Ajlanit. Galipi pesë vjeçar. Eshte e pabesueshme. Dhe miliona e zërave të indinjuar ka kapërdirë natën deri sa duket sikur njerëzimi është zgjuar.Nga Siria, një vajzë hedh në faqen e Los Angeles Time, gazetës më të madhe të Kalifornisë, këto vargje:
Toka është e mbushur plot me martirë
Detet po përpijnë trupat e tyre,
Kur zemrat njerëzore refuzojnë të japin strehë
Të jesh tashmë njeri qënka veç asgjë.
Nafisa Sulejman Kushdo që zgjohet sot.
Kushdo që merr frymë.
Kushdo që ecën ca çape për diku.
Kushdo prej nesh, kudo…. I duhet të mbaj pak frymën dhe të provojë nëse i ka mbetur sado pak ndjesi njerëzore.
Të pyesi veten, se a ka zemër të fort. Të shpiki një lutje, por jo nga ato të Zotit. Të Zotit të sunitëve, katolikëve, orthodoksëve, më the e të thashë. Ta shpiki ashtu si i vjen për mbarë. Si ia ndjen shpirti. Shpirti i tij, ai i njeriut. Sepse edhe Zotin me sa duket e ka marrë porrropia. Eshtë mekur pas absolutizmit të Tij karshi ekzistencës së të vobektëve. A e keni vënë re. Shërbëtorët e të Madhit janë më fanatikë se ushtarët e të ashtuqujturave luftra të shenjta. Luftë për mbrojtjen e këtij apo atij. Çfarë të them…, gjithsesi lutuni për dy djem. Dy vëllezër. Dy të vegjël. Dhe mbyllini sytë kur t’i shikoni. Sidomos foton e Ajlanit tre vjeçar. Një herë përmbys. Një herë në duart e oficerit turk. Me rrobat e lagura nga uji i kripur. Me flokët plot shkëlqim. Një kërthi i pa jetë për shkak se klasa politike botërore ka dështuar. Merreni kështu pasi sot, nuk ka më qytetar lindje apo perëndimi. Por ka qytetar. Dhe në çdo grimë frymëmarrje besoni se kafshëria tek njeriu është më
brutale se nga vendi i origjinës së saj.
Lamtumirë Ajlen dhe Galip, ne sot nuk jemi sirianë.

Trepça, pasuri e një rëndësie të përjetshme për Kosovën

September 3, 2015 by dgreca

-Haradinaj: Është urgjente njohja e ndërjesllë e Kosovës dhe Serbisë/
Nga Behlul Jashari/ PRISHTINË, 3 Shtator 2015/ “Trepça është një pasuri e një rëndësie të përjetshme për Kosovën”, ka deklaruar sot Kryetari i AAK-së, Ramush Haradinaj.
Ai gjatë një vizite në Kombinatin Trepça, tha se Kosova në asnjë situatë nuk guxon ta humbas pronësinë mbi Trepçën, por se duhet të gjendet një partner publiko-privat, që do ta aktivizonte këtë gjigand të fjetur të ekonomisë kosovare.
“Administrimi i mëtutjeshëm i Trepçës nga Agjencia Kosovare e Privatizimit nuk është zhvillim, as i Trepçës e as i ekonomisë së Kosovës përmes saj, por administrim i gjendjes së saj egzistuese, që është koncept i gabuar e i papranueshëm”, tha Haradinaj.
“Riaktivizimi i Trepçës në gjithë kapacitetin e saj, nënkupton zhvillim për tërë vendin, prandaj institucionet e Kosovës duhet të merren urgjentisht me këtë çështje. Situata siç është tani është e papranueshme”, u shpreh lideri i partisë opozitare AAK.
Po sot, Ramush Haradinaj, në një tryezë politike me temën “ndërtimi i raporteve shqiptaro-serbe” që u mbajt në Mitrovicë, e ku morën pjesë përsonalitete të rëndësishme nga jeta politike si përfaqësues diplomatikë nga shumë vende, tha se është urgjente njohja e ndërjesllë e Kosovës dhe Serbisë. Çdo vonesë në këtë proces, tha ai, po krijon vakum dhe keqkuptime të shumta. Haradinaj tha se në këtë proces rol vendimtarë mund të luaj faktori ndërkombëtar.
Duke folur për Bashkimin Evropian, ai tha se BE-ja po tregohet e pasuksesshme në Ballkan. “Rasti I Kosovës e cila vazhdon akoma të jetë në një fazë tranzicioni, rasti i moszgjidhjes së çështjës së emrit të Maqedonisë si dhe Greqia, janë vetëm disa shembuj mossuksesi të BE-së në Ballkan”, citohet Haradinaj në njoftimin e AAK-së.
Haradinaj tha se konferenca e sotme është një rast i mirë që të harrohen tabutë dhe gjërat të thuhen hapur.
“Kosova duhet ta përfundojë atë që quhet fazë e tranzicionit dhe të përfshihet seriozisht në të gjitha proceset integruese”, përfundoi ai.

Kosovë-Akademi përkujtimore për akademik Pajazit Nushin

September 3, 2015 by dgreca

PRISHTINË, 3 Shtator 2015/ Presidentja e Republikës, Atifete Jahjaga dhe kryeministri Isa Mustafa, morën pjesë sot në mbledhjen komemorative të mbajtur në Akademinë e Shkencave dhe të Arteve të Kosovës, me rastin e ndarjes nga jeta të akademik Pajazit Nushit, një ndër figurat më të shquara të shkencës, arsimit dhe të kulturës në Kosovë.
Për jetën, veprën dhe trashëgiminë shumëdimensionale që akademik Pajazit Nushi i ka lënë Kosovës, para të pranishmëve folën kryetari i ASHAK-ut, Hivzi Islami si dhe sekretari Jusuf Bajraktari.
Presidentja Jahjaga e kryeministri Mustafa bënë homazhe në nderim të figurës së shquar të akademik Pajazit Nushit, si dhe ngushëlluan familjarët dhe kolegët e pranishëm për këtë humbje shumë të madhe për Kosovën./b.j/

***
Akademik Pajazit Nushi, kontribut shumëdimensional për Kosovën

PRISHTINË, 3 Shtator 2015/ Drejtuesit institucionalë e politikë të Kosovës vlerësojnë lartë akademik Pajazit Nushin, i cili u nda nga jeta dje pasdite në moshën 82 vjeçare.
“Ndarja nga jeta e Akademik Pajazit Nushit, simbolit të dijes dhe të paqes, është humbje e madhe jo vetëm për familjen, miqtë edhe bashkëpunëtorët, por për gjithë Kosovën”, shprehet në telegramin e ngushëllimit Presidentja e Republikës, Atifete Jahjaga.
“Akademik Nushi, me përkushtimin e tij të jashtëzakonshëm, ka dhënë kontribut shumëdimensional për Kosovën, duke qenë ndër të tjera edhe një figurë e spikatur në fushën e mbrojtjes së lirive dhe të drejtave të njeriut në Kosovë”, thkeson kryeministri Isa Mustafa.
“Në memorien tonë kolektive, Profesor Nushi do të mbetet si njëri nga veprimtarët e palodhur i të drejtave të njeriut, pedagog i nderuar i Universitetit të Prishtinës dhe autor i shumë teksteve që kanë vënë bazat e dijeve psikologjike te ne”, vlerëson kryetari i Kuvendit, Kadri Veseli.
“Akademik Nushi ishte pedagog, shkencëtar, humanist dhe mbrojtës e promovues i lirive dhe të drejtave të njeriut në Kosovë”, thekson ministri i Drejtësisë, Hajredin Kuçi, duke përkujtuar edhe se “ishte një prej themeltarëve të Institutit për Hulumtime dhe Krime të Luftës”.
“Do të kujtohet përherë kontributi i çmuar dhe angazhimi i akademik Pajazit Nushit në fushën e shkencës si dhe veprimtaria e tij politike në shërbim të çështjes kombëtare, zhvillimit të demokracisë si dhe promovimit dhe mbrojtjes së të drejtave dhe lirive të njeriut përgjatë gjithë etapave të zhvillimeve në vend”, thekson deklarata e Aleancës për Ardhmërinë e Kosovës./b.j/
***
Kryeministri Isa Mustafa ngushëlloi familjen Nushi, me rastin e ndarjes nga jeta të akademik Pajazit Nushit
Prishtinë, 2 shtator 2015
Kryeministri i Republikës së Kosovës, Isa Mustafa, ngushëlloi familjen Nushi dhe të gjithë qytetarët e Republikës së Kosovës, me rastin e ndarjes nga jeta të akademik Pajazit Nushit, një ndër figurat më të shquara të shkencës, arsimit dhe të kulturës në Kosovë.
“Ndarja nga jeta e Pajazit Nushit është një humbje shumë e madhe për familjen, për shkencën, arsimin, kulturën dhe Akademinë e Shkencave dhe të Arteve të Kosovës. Akademik Nushi, me përkushtimin e tij të jashtëzakonshëm, ka dhënë kontribut shumëdimensional për Kosovën, duke qenë ndër të tjera edhe një figurë e spikatur në fushën e mbrojtjes së lirive dhe të drejtave të njeriut në Kosovë. Me jetën dhe veprën e tij, akademik Pajazit Nushi, do të mbetet përherë në memorien e popullit të Kosovës si një nga personalitetet më të shquara të kohës sonë”, thuhet në telegramin e kryeministrit Isa Mustafa.
Kryeministri Isa Mustafa, në emër të Qeverisë së Republikës së Kosovës dhe në emrin e tij personal, i shpreh ngushëllimet më të sinqerta familjes Nushi, kolegëve, miqve dhe dashamirëve të shumtë anekënd Kosovës, dhe më gjerë.

NJU JORK : Policët amerikano – shqiptarë, dëshmi e integrimit në rradhët e policisë njujorkeze

September 3, 2015 by dgreca

Fondacioni “The Tunnel To Towers Foundation” rinovon shtëpinë e familjes së policit të vrarë nga uniformat e NYPD, në Brooklyn/
Nga Beqir SINA/
BROOKLYN NYC- (2 shtator 2015) Fondacioni “The Tunnel To Towers Foundation” , dje ka përfunduar renovimet në shtëpinë e oficerit të policisë Weinjein Liu, i i vrarë së bashku me kolegun e tij hetuesin Rafael Ramos, vitin e kaluar gjatë patrullimit afër një stacioni treni në Brooklyn New York.
Dje, në ceremoninë e inagurimit të sapo rimodeluar të shtëpisë së tij, merrnin pjesë të afërmit e oficerit të policisë të rënë në qytetin e Brooklyn – New York, të cilë kan prerë shiritin në shtëpinë e tyre, gjatë një ceremonie solemne të mërkurën, rajonin Bensonhurst në Brooklyn.
Simbas autoriteteve kjo ka qenë një ceremoni e veçantë, në të cilën morën pjesë drejtuesit lokal të qytetit, si dhe zyrtarët e lartë nga uniformat e NYPD, oficerët e policisë nga rajoni i policisë ku ata shërbyen, duke përfshirë edhe anëtarët e të dy familjeve të oficerve të rënë Liu Wenjian dhe Rafael Ramos.
Ndërkohë, pjesmarrja edhe e dy policëve shqiptar nga uniformat e policisë njujorkeze NYPD – të cilët kan qenë koleg të dy policëve të vrarë nga rajoni i Policisë “74th and 87th precincts” – tregojë edhe një herë se dhjetëra policët amerikano – shqiptarë, që janë duke shërbyer në rradhët e uniformave të NYPD – janë dëshmia e integrimit në rradhët e uniformave të policisë njujorkeze.
Prania e një numri të rëndësishëm të shqiptaro-amerikanëve në uniformat e NYPD, si dhe origjina e dy oficerëve të vrarë janë një ndër shembujt e shumtë, të cilat tregojnë qartë se këtu nuk kemi të bejmë me dallime racore – “oficerëve të bardhë të policisë – të zinjë apo aziatik“, por megjithse ata vijnë nga horizonte të ndryshme dhe nga vende të ndryshme, ata janë së bashku duke i shërbyer uniformave të policisë Amerikane .
Dy prej tyre, nga rajoni i Policisë “74th and 87th precincts” – Tony Sh dhe kolegu tjetër shqiptarë nga Mali i Zi, ishin dje në mesin e dhejtëra oficerëve të tjerë, në ceremoninë e organizuar dje nga Fondacioni “The Tunnel To Towers Foundation” , ku sapo kan përfunduar renovimet në shtëpinë e familjes së oficerit të vrarë Weinjein Liu në Gravesend, Brooklyn, ku jetojnë gruaja e ve, babai Liu dhe nëna e tij.
Liu dhe partneri i tij, Det. Rafael Ramos, u qëlluan në makinën e tyre patrullë në lagjen Bedford-Stuyvesant në dhjetor 2014. Dorazi Ismaaiyl Brinsley, pas kësaj u gjetë i vdekur, në afërsi të stacionit të trenit – mbasi ai vrau veten menjëherë pas krimit.
Zyrtarët thanë se rinovimet gjithashtu do të bëhen edhe në shtëpinë e oficerit tjetër të vrarë Rafael Ramos, përmes donacioneve të këtij fondacioni.
Fondacioni “The Tunnel To Towers Foundation” i themeluar në kujtim të të rënëve 9/11 , thotë se ka mbledhur më shumë se 1 milion dollar në donacionet nga i gjithë vendi dhe pjesë të tjera të botës, në një përpjekje për t’ju ndihmuar familjeve të zjarrëfikësve dhe uniformave të policisë që janë në nevojë.

POPUJT “PA HISTORI” JANË PLOT ME “HISTORIANË”…

September 3, 2015 by dgreca

Nga Fritz RADOVANI/*
■Ndër Popujt e Europës, Shqiptarët janë prej kombësive ma të vjetra të kontinentit!
“Historianë” kemi me tretë, po “Histori” të shkrueme… “ata” thonë se, “nuk kemi”!
■Pak e aspak shtete kanë figura të mëdha e të njohuna sa Gjergj Kastrioti, Nana Tereze e Ibrahim Rrugova… E ndoshta, lakmia e atyne që dishrojnë me i pasë për vete na ka ba me u perçudnue deri në këte shkallë, sa “historinë” me e shkrue injorantët, tradhëtarët, fallsifikatorët, antishqiptarët ose ma keq se këta: Filo… Vazhdoni ju, se nuk dij ku kemi fillue e ku asht fundi i tyne, që as në Kinë, nuk besoj se ka kaq sa tek ne “antiatdhetarë”!
Hapim sytë me lexue çka kanë shkrue të huejtë per historinë tonë të lavdishme…
■Monumenti i Heroit Kombtar Gjergj Kastrioti sot asht në shumë shtete e vende të tjera, në Londer, Gjenevë, Bruksel, New York, Romë, Budapest, Vienë, Spanjë… Munxhufuni (Montecilfone) Itali, që as nuk e dij ku asht ky vend i banuem me Arbëreshë!!
■Vetem të huejtë shkruejn sakt per Nanen Tereze, kur u nderue me çmimin “Nobël”, dokumenti kishte të shkrueme gabim kombësinë “jugosllave”. Ajo e pau dhe, Ua këthej atyperaty per me e korrigjue tue U thanë: “Unë jam kombësi Shqiptare, se kam le në Shtetin Shqiptar!” Dhe, menjëherë Dokumenti u korrigjue ashtu si u tha Nana Tereze.
■Familja, Qyteti dhe Shteti, janë Familja e Madhe per të cilen na mësoi Nana Tereze, asht tue thanë në këte moment Papa Françesku…(30 Gusht 2015, ora 18.20 Melbourne)…
■Kosova asht e lirë! Liria e Dardanisë Shqiptare asht meritë vetem e Nanës Tereza dhe e Ibrahim Rrugovës, e këte nuk e kam thanë unë po, Ua ka shpjegue Presidenti Klinton!
“Nanë Tereza, ishte e para Ajo që më bani ta due kombin Shqiptar. Dhe tashti ndihem shumë krenar që e plotësova një detyrë morale ndaj Saj dhe ndaj vlerave të lirisë”, ka deklarue Bill Klinton mbas ndërhymjes së NATO-s për çlirimin e Kosovës.
■Ka shumë antishqiptarë që shkruejnë “Historinë e Shqipnisë” pa zanë me gojë fare një nga Figurat ma të Mëdha të Popullit Shqiptar, Heroin e Pavdekshem të Hotit dhe të Flamurit të Gjergj Kastriotit të 6 Prillit 1911, Dedë Gjo’ Lulin…Kujtojnë se “lavdia e tyne” filloi me 28 Nandor 1912 në Vlonë, tue u kremtue në Shqipni, Kosovë e Maqedoni…
Harrohet Hoti e Gruda, e aq ma keq Çamëria e Trojet tona… që po i sundon greku!
Kur u ngrit Flamuri në Vlonë, “…Ishte menduar nga Ismail Qemali, që Shqipëria të vazhdonte për të qenë dhe pas vitit 1912 autonome në suazen e Perandorisë Osmane.” Edhe mbledhja e përfaqësuesve të kolonive Shqiptare të ShBA-së, që u ba në Boston më 6 tetor 1912, duke “… marrë në sy atë që po mundet Turqia, e që shtetet e Ballkanit do ta ndajnë Shqipërinë në mes tyre”, deklaronte: “Është detyrë e atdhetarëve shqiptarë të jenë plotësisht të bashkuar me guvernën (qeverinë – shën. i aut.) otomane kundër armiqve të Mbretërisë”. Ndonëse frymëzohej nga qëllime patriotike, qëndrimi i kolonive shqiptare të ShBA-së përmbante në vetvete një rrezik të madh për vendin. Përkrahja pa kushte që shqiptarët do t’i jepnin Turqisë në luftën kundër Aleancës Ballkanike do të sillte si pasojë që Shqipëria të pësonte të njëjtin fat që do të pësonte Turqia në Ballkan dhe do t’u jepte një argument të fortë qeverive të Aleancës Ballkanike për të mbrojtur përpara opinionit publik ndërkombëtar planin e copëtimit të Shqipërisë si një provincë e thjeshtë turke…” Po këte a e dijnë “historianët” tanë?!
■Luigj Gurakuqi pa ju tutë fare syni, nuk priti po, nxori patllaken dhe u tha delegatëve: “Pa u ngritë sot Flamuri, asnji nuk dalim të gjallë nga kjo shtëpi!..”
(Shikoni me kujdes foton në balkon ku, Luigji vazhdon me kenë me dorë në xhep…) Guximi i Gurakuqit lidhet edhe me besnikrinë e Trimit të Kosovës Isa Boletini, i cili me 300 Burra të armatosun kishte rrethue Sheshin ku menjëherë u ngrit Flamuri…
■Kjo asht arsyeja që edhe Luigj Gurakuqi duhet “harrue”, se Ky asht Ai që “na prishi me vëllezërit e gjakut turqë të vjeter e të rinjë, se me sllavë as nuk bëhët fjalë…”
■Presidenti i Shqipnisë e ka gjetë zgjidhjen: “Bustit të Skenderbeut i ka vue rrota…”
■Tradhëtarët pranojnë injorancen e idjotsinë per hirin e titujve “dr, prof, e akademikë”!
Ka shkue puna e “historisë” sonë per turp, sa per Figuren e Gjergj Kastriotit me diskutue në TVSh… njëfarë turkeshet Djana Kastrati, nga brezi i “turqëve të rijë” per të cilët, ka shkrue i Madhi Prof. Arshi Pipa… “Turqit e rij të Shqipnisë së Re” “Adriatiku” 1992:
■I.Pushtimi i gjatë i Shqipnisë nga Turqit la mbresa të pashlyeshme në mendësinë dhe kulturën e kombit shqiptar…Mbasi systemi politik i perandorisë shumëkombëshe otomane bazohej në fenë islame dhe tue qenë se shqiptarët ishin nji grup ethnik i privilegjuem në perandorinë otomane për arsye t’islamizimit të tyne në masë, Turqit e Rij shqiptarë e panë të volitshme me kufizue kërkesat e tyne te ideja e krijimit të nji Shqipnie autonome në suazën e perandorisë otomane. Kjo Shqipni do të përmblidhte katër vilajetet e Shkodrës, Kosovës, Janinës dhe Manastirit, që përbajshin pjesën ma të madhe të trojevet otomane n’ Europë. Po shënojmë këtu, në kalim e sipër, se ideja e autonomisë nuk ishte aspak popullore në Kosovë, mbasi kosovarët n’atë kohë vazhdojshin me qenë besnikë të Sulltanit, që ata e quejshin “baba mbret”…
■Tue raportue mbi kto ndeshje në revistën Albania Faik Konica shkroi çka vijon: “Na duhet të luftojmë Turqit e Rij që janë personifikim i kulshedrës në përrallat popullore. Por nëse nesër marrin prap pushtetin turqit e vjetër, atëherë le të sillemi kundër tyne. Vërtet se ka disa burra të mirë mes tyre. Por të rij ose të vjetër, turqit janë turq, dmth janë, si thotë fjala latine, “bukë e nji mielli (ejusdem farinae)”.
■…Tjetër faktor i përbashkët asht oportunizmi i të dy palëve: stalinistat shqiptarë renegatë mohuen hoxhanizmin n’emën të demokracisë pa qenë ata vetë demokratë po ashtu si Turqit, që çuen krye kundër Sulltanit n’emën të liberalizmit dhe nuk ishin ata vetë liberalë… Nji tjetër gjasim asht se të dyja kto lëvizje disidente nuk ishin fillime por vazhdime. Turqit e rij ecën në vazhdën e liberalëve turq të mërguem, ndërsa revolta e shqiptarëvet stalinista qe shprehja finale e disidencës partiake që ka nji histori të gjatë.
■Turqit e Rij shqiptarë nuk rrezikuen asgja tue kalorue valën revolucionare të nisun nga studentat dhe të çueme përpara nga grevat e punëtorëvet.
■Sa do të zgjasë sundimi i tyne?
Turqit e Rij humbën vrullin e tyne revolucionar mbas katër vjetësh. Sundimi i PD-së ka gjasë mos me qenë aq i gjatë. Udhëheqsit e saj kanë ba shumë poterë me akuzat e tyne kundër komunistëvet të Hoxhë-Alisë, tue ba popullin me besue se, t’ardhmen ata në fuqi, do të hapnin gjyqet. Por këte ata nuk do t’a bajnë tashnjiherë, mbasi hapja e dosjevet të Sigurimit mund të jetë kompromentuese për së paku disa prej tyne.”(Ne vijim te rubrikes;Në 70 vjetorin e përmbytjes së Shqipnisë…)
■Historia nuk mund të shkruhet nga “ata” që e kanë fallsifikue dhe shtremnue…
Melbourne, Shtator 2015.