Archives for February 2017

Nga Enton Daci/Kryetari i opozitës, Basha deklaroi nga sheshi i lirisë së protestës qytetare se, PD dhe qytetarët nuk do të pranojnë kurrë zgjedhjen nën tutelën e parave të krimit dhe të drogës, ndërsa bëri thirrje që përballë ushtrisë së banditëve të ngrihet e gjithë shoqëria.“Mbrëmë, ambasadori i OSBE-së, Bern Borshard më në fund lëshoi kushtrimin për kauzën që ne kemi ngritur tash 3 vite. 2 miliardë euro të pista për të blerë zgjedhjet e shqiptarëve. Para të pista, qeveri e pistë, lojë e listë, zgjedhje të pista. Ne nuk do ta pranojmë kurrë. Koha ka ardhur që përballë banditëve të veshur me pushtet e pushtetit të përforcuar me banditë, të rreshtohemi të gjithë qytetarë të lirë të Shqipërisë, të rreshtohemi në këtë betejë për të sotmen e të nesërmen e Shqipërisë dhe shqiptarëve. Dënglat e tyre se ata duan reformën në drejtësi dhe ne nuk e duam, nuk i beson më askush. Nuk ka zog gomari t’i besojë. Nga vettingu i vërtetë dhe drejtësia e vërtetë ka frikë Edi Rama, ka frikë Vangjush Dako dhe bandat e lidhura me to”, tha Basha.

Basha tha se qëndresa e shqiptarëve sapo ka nisur dhe nga dita në ditë ajo do të bëhet edhe më e fuqishme.“Qëndresa jonë sapo ka filluar, beteja jonë po merr hov nga dita në ditë. Mbështetja për këtë betejë vjen nga e vërteta, se rrugë tjetër për Shqipërinë nuk ka. Rruga tjetër të çon në një republikë të kapur nga bandat dhe krimi ku çdo shqiptar do të jetë skllav i tyre. Se si funksionon kjo mund ta thotë mirë çdo durrsak. Durrësi është qyteti i parë që ka rënë peng i bandave dhe i krimit, por Durrësi sot është këtu, Durrësi është gati, të ngrihemi të gjithë për të refuzuar republikën e krimit dhe për t’i hapur rrugë të gjithë së bashku republikës së demokracisë së vërtetë, republikës së shtetit ligjor të vërtetë dhe drejtësisë së vërtetë”, tha Basha.Deputetët e opozitës e kanë zhvilluar seancën parlamentare jo në sallën e Kuvendit, por në sheshin e lirisë të protestës, duke dhënë një mesazh të qartë të mosnjohjes së institucioneve që janë kapur nga krimi. Basha i ka bërë thirrje deputetëve të tjerë që të braktisin godinën e Parlamentit dhe t’i bashkoheshin sheshit të protestave.“Anëtarë të këtij Parlamenti të vërtetë të Shqipërisë ku po ushtrohet prej gjashtë ditësh demokracia direkte, demokracia direkte, sepse krimi dhe droga kanë asgjësuar institucionet e tjera të shtetit. Sot nuk ka dy parlamente, por një parlament dhe ai ndodhet këtu në këtë shesh të lirisë me çdo qytetar, përfaqësues i drejtpërdrejtë i zërit dhe vullnetit të tij. Godina që i thotë vetes Parlament, është sot streha më e qartë e krimit, korrupsionit, mashtrimit dhe maskarallëkut.Mbrëmë i bëra një thirrje çdokujt, duke përfshirë edhe ata deputetë të së majtës që kanë një fije ndërgjegje dhe një fije kurajo, që ashtu si shqiptarët vranë frikën dhe u bashkuan të vijnë këtu në këtë parlament të vërtetë, të mos rrinë në strofullën e krimit, të mos i bëjnë fresk krimit, të mos bëhen pjesë e parlamentit fasadë dhe e demokracisë fasadë. Kjo thirrje qëndron”, tha Basha.

Gjashtë ditë nga protesta e opozitës

Kryetari i PD, Basha deklaroi sërish dje nga sheshi i protestës se, opozita nuk do të tërhiqet për asnjë moment nga protestat deri në fitoren e plotë të qëllimit për të bërë vendin me zgjedhje të lira.“Sot është një ditë e madhe për Shqipërinë jo vetëm sepse për të gjashtën ditë radhazi shqiptarët protestojnë pa pushim nga ky shesh i lirisë, por sepse anembanë vendit, frika po vritet, njerëzit po bashkohen, kurajo qytetare po ngrihet në nivele të papara e të padëgjuara që prej revolucionit demokratik të vitit 1990.Kjo është një lëvizje e madhe popullore, është një lëvizje e madhe kombëtare, kjo është mbi të gjitha lëvizja juaj të nderuar qytetarë dhe qytetare të Shqipërisë. Dhe Partia Demokratike ka nderin të jetë pjesë, të jetë në ballë të kësaj lëvizjeje dhe të mos ju lërë në baltë, deri në përmbysjen e republikës së krimit, deri në përmbysjen e republikës së korrupsionit dhe ndërtimin së bashku të një republike të vërtetë demokratike të qytetarëve shqiptarë.

Kjo nis me zgjedhje të lira dhe të ndershme dhe për këtë nuk ka e nuk do të ketë asnjë kompromis, për këtë nuk ka dhe nuk do të ketë asnjë negociatë, qeveri teknike ose populli do të qëndrojë këtu e do të përballet deri në largimin e qeverisë së bërë njësh me krimin.Parlamenti i shqiptarëve, parlamenti i qytetarëve është këtu. Parlamenti i pastruar nga kriminelët dhe që i shërben me zërin e vet me vendimet e veta qytetarëve, është këtu. Atje është vetëm shtëpia e krimit. Në shtëpinë e krimit ka vetëm deputetë kokulur dhe deputetë që i shërbejnë fasadës. Në shtëpinë e lirisë çdo qytetar është përfaqësues sovran i popullit të vet dhe interesave të tij. Ndaj le ta kenë të qartë të gjithë ata që nuk e kanë dëgjuar zërin e popullit se tërheqje nuk do të ketë. Se nuk do të ketë asnjë hap mbrapa, se, ditë për ditë, ne do të avancojmë deri në fitoren e plotë të kauzës qytetare për zgjedhje të lira dhe të ndershme përmes largimit të kësaj qeverie dhe vendosjes së një qeverie tjetër që i garanton ato. Ditë për ditë shqiptarët po bashkohen”, tha Basha.

Kapja e drejtësisë, Rama-Meta, 29 kandidatë për 27 vende

Institucionet e reja të drejtësisë do të jenë nën kontrollin e plotë të mazhorancës. Kryetari i PD, Basha bëri të qartë se skema e re që kërkohet të votohet me imponim është kapja e drejtësisë nga Rama dhe Meta, të cilët në aleancë me njëri-tjetrin kanë arritur pazarin për të emëruar njerëzit e tyre në postet kryesore të drejtësisë. Nga 27 kandidatura në të tilla poste, Rama dhe Meta kanë paraqitur 29 të emëruar të tyre.“Nga ky shesh dua t’ia bëj fare të qartë atyre dhe çdokujt që mund të ketë gënjyer. Partia Demokratike e bëri detyrën e vet në Parlament. Ne e mbaruam detyrën tonë dhe jemi krenarë për ndryshimet kushtetuese që i hapën rrugë një drejtësie të pavarur që nuk mbron, por lufton krimin dhe korrupsionin. Ishin ata që përjashtuan opozitën nga 7 ligjet duke thyer premtimin që dhanë përballë partnerëve tanë euroatlantikë. E përjashtuan me qëllim që të kapin institucionet e reja të drejtësisë. Sot, për këto institucione të reja të drejtësisë, kjo mazhorancë që e ka frikë reformën në drejtësi propozon 29 kandidatë për 27 pozicione. Pra, nuk ka zgjedhje, ka emërime. Edi Rama dhe Ilir Meta duan t’i emërojnë vetë në vend që të lejojnë zgjedhjen e më të mirëve, e më të aftëve, më të pakorruptuarve për të ndërtuar drejtësinë që duan shqiptarët. A mund ta pranojmë ne këtë?! A mund të pranoni një drejtësi të kapur nga Edi Rama?! Kujt i shërben një drejtësi e kapur nga Edi Rama?!”.Basha ka kërkuar korrigjim të 7 ligjeve në frymën e reformës të votuar me konsensus më 22 korrik në Parlament dhe jo në mënyrë të njëanshme.“Kurrsesi nuk mund ta pranojmë, por nëse në të vërtetë janë ata që nuk kanë frikë nga Vettingu, ju them që menjëherë pas paktit për një qeveri të vullnetit të mirë për zgjedhje të lira dhe të ndershme dhe pas korrigjimit të 7 ligjeve sipas vërejtjeve konsensuale të opozitës, urdhëroni ta bëjmë vettingun e të shohim kush ka frikë nga drejtësia e pavarur. Kush ka frikë nga gjyqtarët dhe prokurorët e pakapur?! Ata që e kanë lidhur fatin e tyre me bandat?! Ata që kanë vjedhur dhe shpërdoruar qindra e miliona euro në çdo sektor apo opozita që e ka lidhur fatin e saj me fatin e qytetarëve shqiptarë?! Partia Demokratike do ta votojë dhe do ta çojë përpara reformën në drejtësi, por vetëm sipas përcaktimeve europiane të Kushtetutës së Shqipërisë, sipas votës historike të 22 korrikut. Ne do ta hapim këtë rrugë bashkë me qytetarët shqiptarë. Nëse nuk tremben nga drejtësia e pakapur le t’i hapin rrugë qeverisë teknike, le të ndryshojmë së bashku 7 ligjet që i bënë përshesh për të kapur drejtësinë dhe ne do të na kenë aty dhe bashkë me qytetarët shqiptarë do ta zgjidhim çështjen e zgjedhjeve të lira e të ndershme dhe çështjen e drejtësisë së vërtetë për qytetarët shqiptarë”, tha Basha.

Marshi epik i banorëve të Zharrëzit

Kryetari i PD, Basha ka përshëndetur marshin epik të banorëve të Zharrëzit, të cilët janë nisur në këmbë drejt Tiranës me qëllim që zëri i tyre i revoltës të dëgjohet pas një periudhe të gjatë censure.“Dua të përshëndes sot në mënyrë të veçantë marshin epik të banorëve të Zharrëzit, të cilët po i afrohen ora-orës Tiranës, po i afrohen ora-orës sheshit të lirisë, parlamentit të qytetarëve shqiptarë, do t’i mirëpresim këtu këta njerëz të vuajtur, këta njerëz të nëpërkëmbur të zhvatur dhe të goditur rëndë nga arroganca, nga korrupsioni dhe papërgjegjshmëria e kësaj qeverie. Por, do të mirëpresim kështu çdo qytetar që niset të bashkohet me këtë parlament të shqiptarëve, me këtë aulë dhe agorë të vërtetë të demokracisë shqiptare”, tha Basha.Basha ka përshëndetur edhe protestën e qytetarëve të Durrësit që janë ngritur kundër mafies së betonit të Gjushit në Durrës. “Dua të përshëndes të gjithë qytetarët e Durrësit, të cilët e kanë përdorur këtë parlament të vullnetit popullor sot për të denoncuar me fakte, për të denoncuar dhembjen e madhe që ky qytet ndjen. Sepse ka rënë peng i bandave, ka rënë në mëshirën e bandave, të cilat kanë emëruar në krye të punëve Vangjush Dakon, si përfaqësues dhe si menaxher të aferave të pista të krimit të organizuar.E kanë emëruar bashkë me Edi Ramën për t’iu shërbyer interesave të tyre dhe prandaj sot Durrësi është një qytet ku papunësia është ndër më të lartat në Shqipëri. Prandaj Durrësi sot është një qytet ku shëndetësia është përtokë. Prandaj Durrësi është sot një qytet ku nxënësit studiojnë në kushte të mjerueshme, ku ndihma ekonomike i jepet vetëm një numri shumë të vogël familjesh, ndërkohë që mijëra të tjera që kanë nevojë për këtë ndihmë, nuk e marrin. Është një qytet i mbifaturuar, i shkatërruar me këto gjoba energjie e uji. Është një qytet tipik i menaxhuar nga mafia, ku miliona euro beton hidhen për fasada, ndërkohë që qindra mijëra familjarë, çifte të reja nuk marrin dot kredi për strehim social. Të gjitha këto janë derivat i zgjedhjeve të shkatërruara të vitit 2015 ku Vangjush Dako me bandat mori Durrësin.Ja çfarë ndodh kur kapen zgjedhjet, ja çfarë ndodh kur krimi dikton zgjedhjet. Kjo është një orë e madhe e zgjimit kombëtar, është një orë zgjimi për Durrësin, është një orë zgjimi për gjithë Shqipërinë, është një vendim i pakthyeshëm. Kurrë më zgjedhje të kapura dhe të prishura nga krimi! Kurrë më zgjedhje me bandat! Vetëm zgjedhje të lira dhe të ndershme që nisin me largimin e Edi Ramës dhe qeverisë së tij të inkriminuar e të korruptuar. Nisin me një pakt të madh kombëtar, për një qeveri të zgjedhjeve të lira dhe të ndershme”, tha Basha.

Mbështetje amerikane për kauzën e zgjedhjeve të lira/Shtetet e Bashkuara mbështesin protestën dhe betejën qytetare të shqiptarëve për zgjedhje të lira dhe të ndershme. Mesazhi i mbështetjes i ka mbërritur Kryetarit të opozitës Basha nga anëtari i  Dhomës së Përfaqësuesve të Teksasit, republikani  John P. Cyrier, i cili shprehet në mesazhin e tij, se SHBA-të, do të mbështesin gjithmonë përpjekjet e popullit shqiptar për liri, demokraci dhe të drejtat e njeriut. “I dashur Kryetar Basha. Ju lutem pranoni këtë mesazh të mbështetjes në përpjekjet paqësore të popullit shqiptar në betejën për zgjedhje të lira dhe të ndershme. Populli shqiptar duhet ta dijë se ata do të kenë mbështetjen tonë në përpjekjen për liri, demokraci dhe liritë individuale”, thuhet në mesazhin e zotit Cyrier.Ky nuk është mesazhi i parë që vjen nga përfaqësues të nivelit të lartë të Shteteve të Bashkuara të Amerikës, në mbështetje të përpjekjeve të opozitës për të garantuar zgjedhje të lira dhe të ndershme. Një ditë para 18 shkurtit ishte Kongresmeni amerikan Dana Rohrabacher, njëkohësisht kryetar i Komisionit për Çështjet e Jashtme ai i cili, do të dërgonte mesazhin e parë për opozitën, dhe të qartë për mazhorancën. “I dashur Lulzim, ne mbështesim fuqimisht përpjekjet e qytetarëve shqiptarë dhe betejën e tyre të drejtë për zgjedhje të lira dhe të ndershme. Populli shqiptar duhet ta dijë se do të ketë gjithmonë mbështetjen tonë në kauzën e tij për liri dhe demokraci, shtet të së drejtës dhe liri njerëzore”, ishte mesazhi i kongresmenit amerikan.

Ai njihet si një ndër njerëzit më të besuar të Presidentit Trump, dhe një ndër tre kandidaturat për postin e Sekretarit të Shtetit. Kur kishin kaluar vetëm dy ditë nga fillimi i protestës së opozitës, një tjetër mesazh do të vinte nga Kongresi amerikan, këtë herë nga kongresmeni Robert Aderholt. Edhe ai ashtu si kolegu i tij Rohrabacher, do të mbështesë protestat e opozitës për zgjedhjet e lira dhe të ndershme. “Unë mbështes fuqimisht, hapat e qytetarëve shqiptarë dhe betejës së tyre për zgjedhje të lira dhe të ndershme. Populli shqiptar duhet ta dijë se ka mbështetjen e Shteteve të Bashkuara në kauzën e tyre të drejtë për liri dhe demokraci, shtetin ligjor, si dhe lirinë individuale”, ishte mesazhi i zotit Aderholt, duke ngritur njëkohësisht dhe shqetësimin për manipulimin e zgjedhjeve të ardhshme në Shqipëri. “Zgjedhjet parlamentare pritet të mbahen në Shqipëri më 18 qershor 2017. Unë e kuptoj që, asnjë masë konkrete nuk është marrë në implementimin e rekomandimeve të OSBE/ODIHR, si dhe në përmbushjen e kritereve të Kopenhagenit.Manipulimi i zgjedhjeve vendore dhe raporti i OSBE/ODIHR mbetet një shqetësim, sidomos në lidhje me dhunimin e mundshëm të së drejtës themelore të shqiptarëve për të votuar të lirë”, thuhej në mesazhin e kongresmenit. Pra duket qartë se, Edi Rama nuk jep garanci se do të mbajë zgjedhje të lira, jo vetëm për opozitën shqiptare, por dhe për vetë Shtetet e Bashkuara të Amerikës. Spërdredhjet politike për të gjetur zëra të përhumbur në arenën ndërkombëtare, të cilat kundërshtojnë këtë fakt duket se janë të dështuara, para deklaratave të përfaqësuesve të lartë të SHBA.

Studentët i bashkohen protestës në shesh/Pasditen e ditës së gjashtë të protestës, studentë nga e gjithë Shqipëria iu bashkuan qëndresës së qytetarëve në Sheshin e Lirisë. Studentë nga Korça, Shkodra, Elbasani, Pogradeci, Durrësi ngritën shqetësimet lidhur me përditshmërinë në sistemin arsimor. Brikela është një studente e Universitetit të Korçës, me banim në Pogradec. Ajo u shpreh se shpenzimet për të udhëtuar drejt Korçës janë sakrificë e prindërve të saj. “Shpenzimet e shkollimit tim janë një sakrificë e babait tim, i cili gjithashtu ka mbetur pa punë, e kanë hequr. Aftësia e këtij kryeministri për të ndihmuar studentët ka mbaruar, pasi nuk ka më çfarë të japë për këtë vend”. Të tjerë studentë të filialeve të universiteteve publike në Shqipëri ngritën shqetësimet e tyre jo vetëm lidhur me sistemin arsimor kaotik sipas tyre, por edhe premtimeve të tjera të pambajtura të qeverisë.

Një studente e Universitetit të Korçës, banuese në Devoll iu drejtua godinës së Kryeministrisë për të pyetur se ku është ndihma ekonomike për familjet në nevojë. Kryedemokrati Lulzim Basha iu përgjigj shqetësimeve të studentëve të sjella nga anembanë Shqipërisë në sheshin e qëndresës qytetare. Sipas tij, sistemi i kësaj qeverie i ka shtyrë të rinjtë drejt rrugës së emigrimit, duke larguar kështu asetin më të vlefshëm që ka vendi ynë sot: rininë shqiptare. “Ilaçi për demokracinë janë zgjedhjet e lira dhe të ndershme. Ky është ilaçi për demokracinë që e kthen pushtetin dhe vendimmarrjen tek ju, rinia dhe çdo shqiptar që kërkon të jetojë me djersën e ballit. Ne jemi gati të marrim përsipër përgjegjësitë që na takojnë për rininë, për studentët”.

Premtimet ndaj rinisë ua përsëriti edhe studentëve të Universiteteve publike shqiptare, të cilët udhëtojnë nga vendbanimi i tyre drejt qyteteve, ku sot gjenden filialet e universiteteve publike. “Qindra-mijëra studentë janë goditur sot për shkak të tarifave të larta të studimit, janë goditur sot për shkak të mbylljes së filialeve. Unë dua t’u them se, filialet e universiteteve publike që janë goditur nga kjo qeveri anti-arsim, nga kjo qeveri anti-kulturë, nga kjo qeveri anti-studentore do të rihapen dhe do të financohen plotësisht me fondet e taksapaguesve shqiptarë. Këto fonde nuk do të përfundojnë më në xhepat e klientëve të qeverisë, por do të financojnë arsimimin e fëmijëve shqiptarë në universitetet publike me tarifa të ulura, me tarifa të përballueshme dhe me filiale sa më pranë tyre”. Planin e ndihmës ndaj rinisë studentore, kreu i selisë blu, Basha e çon përtej sistemit të Arsimit të Lartë. “Stazhet janë një koncept europian. Unë i kam përjetuar gjatë kohës që studioja në Europën Perëndimore, kam parë se si i ndihmojnë studentët si një urë nga shkolla drejt tregut të punës. 70% e studentëve shqiptarë që kanë pasur mundësi të sigurojnë një stazh pune kanë siguruar një vend pune. Ndaj nuk është shpikje, nuk është propagandë, nuk është ofertë partiake. Eshtë oferta për të gjithë studentët shqiptarë dhe nesër do të jetë realitet. 10 mijë studentë shqiptarë në bazë të meritës së tyre do të kenë nga shteti shqiptar mbështetje financiare për një vit”. Një nga studentët pjesëmarrës e pyeti zotin Basha si ka ndërmend të përmirësojë situatën për studentët, të cilët sot po largohen nga vendi i tyre, kur Shqipëria është në një gjendje ekonomike si kjo e sotmja, e cila ka rënduar çdo familje shqiptare. Përgjigjen kryetari demokrat Basha e arsyetoi si më poshtë: “Klima ekonomike në Shqipëri është e rënduar, sepse fitimet e shqiptarëve kanë rënë. Taksat janë rritur, çmimet janë rritur, konkurenca është zeruar. Ky është sistemi që jemi ngritur të shembim këtu në këtë “Shesh të Lirisë”. Ju keni ardhur të kërkoni të drejtën tuaj për të konkuruar dhe ne do ta garantojmë këtë të drejtë së pari, duke sprapsur modelin e së keqes dhe duke u dhënë shqiptarëve dhe rinisë modelin e konkurencës së lirë. Ekonomia shqiptare do t’i përgjigjet platformës tonë të taksës së sheshtë, të qeverisë, e cila nuk qëndron përballë biznesit si xhandar, por është në krah të sipërmarrjes për interesin publik, për punësimin”. Rruga e vetme drejt një Shqipërie me standarde europiane për rininë dhe qytetarët për kryedemokratin Basha është sigurimi i zgjedhjeve të lira dhe të ndershme, që mund të vijnë vetëm përmes një qeverie teknike.

***

Berisha: Betejën do ta fitojmë me çdo çmim dhe me çdo kusht

Ish-Kryeministri deklaroi dje nga sheshi i protestës qytetare se shqiptarët do ta fitojnë betejën me qeverinë e krimit dhe të bandave me çdo kusht dhe me çdo çmim. “Kjo është një betejë, të cilën ne do ta fitojmë me çdo çmim, me çdo kusht.Pra, kjo betejë është betejë për çdo të ri shqiptar. Pse ne jemi këtu? Ne jemi këtu për të nxjerrë Shqipërinë nga Kolumbi e Europës. Do u dërgoj një mesazh të gjithë atyre, të cilët verën që kaloi ose sot arritën të marrin para si punëtorë krahu në plantacionet e drogës. Vërtet që keni marrë një grusht para, por është e vërtetë që nesër a pasnesër dhe vitet që vijnë, do të detyroheni të shisni dhe lëkurën tuaj për të çdroguar fëmijët tuaj, sepse drogën, baronët e drogës po e fusin me shpejtësi në shkolla ndaj mos vrisni me drogë të ardhmen tuaj. Bashkohuni me ne, t’u japim vendin këtyre trafikantëve dhe banditëve që duan të helmojnë rininë me drogë, që duan të errësojnë të ardhmen e tyre”, tha Berisha.

Berisha tha se për të parën herë ai po zhvillonte një seancë parlamentare jo në sallën e Kuvendit, por me qytetarët. “Në karrierën time politike kjo është dita e parë e parlamentit me qytetarët dhe ju jap fjalën se ndihem 100 herë, në mos një mijë herë më i nderuar, më i lirë, më krenar sot këtu me ju se sa atje në atë sallë, me ata, të cilët e shndërruan Parlamentin në komunitetin e kriminelëve më të rrezikshëm të vendit”, tha Berisha.

Gazetat në Belgjikë: Mark Frroku, vrasës në Belgjikë, deputet në Shqipëri

Shndërrimi i Parlamentit në arenën e të inkriminuarve ishte një tjetër denoncim i ish-Kryeministri Berisha dje, i cili solli në vëmendje se mediat ndërkombëtare vijojnë të ngrejnë çështjen e deputetëve të inkriminuar në Parlamentin shqiptar. Berisha citoi artikullin e gazetës kryesore belge, e cila dje në një editorial të saj shkruante për Mark Frrokun, ndërsa në Belgjikë akuzohet për vrasje në Shqipëri mban mandatin e deputetit. Por rasti i Frrokut nuk është rasti i vetëm i një deputeti të inkriminuar në Parlament.

“Duke ardhur këtu më dërgon një qytetar një sms dhe unë do ja u tregoj se çfarë ishte. Gazeta kryesore e Belgjikës hapet sot në mëngjes përsëri me histori krimi të pushtetit shqiptar, ‘Mark Frroku, vrasës në Belgjikë dhe deputet në Shqipëri’. Artikulli thotë se prokurori në Shqipëri i kërkoi 16 vjet burg për vrasje, por artikulli sërish thotë, se kryeprokurori Rama po bën gjithçka për ta nxjerrë të pafajshëm. Artikulli thotë se i afërt dhe i mbrojtur nga pushteti, vrasësi deputet është i paprekshëm. Çdo herë që ulesha në Parlament dhe shihja këtë vrasës të shëmtuar në anën tjetër, ndjehesha në një vështirësi të jashtëzakonshme morale, në radhë të parë para jush të dashur qytetarë. Ktheja sytë në krahun tjetër, shikoja tjetrin kriminel, që në shkatërrim dhe shkelmim të plotë të traditës të tij familjare dhe të çdo tradite familjare shqiptare, kishte tregtuar vajzat e Lezhës, i kishte shtyrë ato drejt prostitucionit. Por nuk ishte i vetëm Ndoka aty. Aty ishin jo një apo dy, por mbi 19 si ky. Dhe ndonjëherë mendoja me vete, po të shkoj në një burg dhe të më nxjerrin përpara 140 të burgosur, a do të gjej kund dot 19 të burgosur më kriminelë se sa këta që kam sot në Parlament?! Dua t’u them se çështjen e krimit, PD dhe kryetari i saj, deputetët e saj e kapën në krye të radhës si një çështje jetike për ju dhe për vendin. Pikërisht se e kemi të tillë, dolëm jashtë Parlamentit. E bëmë çështjen e krimit në Shqipëri një çështje ndërkombëtare, çështje të Europës, çështja të Departamentit të Shtetit. Për herë të parë në memorien time, institucione të mëdha ndërkombëtare publikisht thanë se PD ka të drejtë që braktisi Parlamentin dhe ato iu imponuan kryebanditit”.

Policia nuk hapi hetim ndaj Ndokës për plagosjen

Bashkëpunimi i ngushtë i pushtetit me bandat u demonstrua edhe me ngjarjen e disa ditëve më parë në Lezhë, ku nipërit e ish-deputetit socialist, Arben Ndoka, i cili la mandatin për shkak të precedentëve kriminalë, dhunuan me armë ish-kreun e PS për këtë qark, por policia nuk regjistroi asnjë procedim penal ndaj tyre.

“Ka shumë njerëz që më thonë pse tregohesh kaq i ashpër, ju them se koha do e tregojë këtë. Shqipëria ka banditë dhe vrasës, por serial killer dhe kryebandit është ky këtu (Rama), sepse është ky që familjarisht është i lidhur me klanet e kokainës, është ky që çon të vëllain e tij shofer të Genc Xhixhës, bosit të kokainës së Xibrakës. Është ky ai që liron e mban në Parlament Mark Frrokun, është ky dhe jo ndonjë tjetër që përdor gjithë forcën e shtetit, madje edhe levat ndërkombëtare, për të mbrojtur një hajdut ordiner, një vrasës e kriminel si Armand Prenga, i cili shkon dhe qëllon në seli të komisariatit ata që shkuan e u ankuan për të”, tha Berisha.

Ai theksoi se është ky e jo ndonjë tjetër që liron Hakmarrjen për Drejtësi, të cilën e dënoi drejtësia kur socialistët ishin në pushtet. Berisha kujtoi se ish-ambasadori Jefrey bëri gjithçka që të bëhej drejtësia kur ekzekutuan pak metra prej nesh shoferin e prokurorit të Përgjithshëm. “Është ky kryebandit dhe vrasës serial, që Kostandinin e Luizës, pasi ekzekutoi 4 të rinj djem nënash në një mëngjes këtu në Tiranë, pasi kishte vrarë një tjetër të ri një vit më parë, e hoqi nga dënimi përjetë; dhe nxori në tapet të kuq nënën e tij si korbë e krimit, e cila në vend që të ndrydhej, të qante për krimin e shëmtuar të të birit, të qante për nënat që veshi në zi, dilte e rrihte gjoksin me një paranojak se po jepte dorëheqjen”, u shpreh ish-Kryeministri.

“Është ky dhe jo ndonjë tjetër, që mbante në zyra Shullazin dhe që e shtynte t’i thoshte rektorit tërhiqu se të marr djalin peng. Është ky ai i cili merr mesazhe nga Dritan Dajti, merr mesazhe nga Zani Çaushi, merr mesazhe nga vrasësit serialë dhe komunikon me ta si shok i tyre. Është ky dhe jo ndonjë tjetër, që pasi liroi Hakmarrjen për Drejtësi, ka dërguar Aldo Baren në gjykatë dhe u thotë gjyqtarëve  se me shpatën e Vettingut të drejtësisë do u presë kokën nëse nuk e lirojnë njeriun që preu koka njerëzish në Lushnjë dhe i përdorte si top futbolli.

Është ky kryebanditi, është ky serial killeri, është ky kryehajduti  i vendit, dhe derisa ne të mos bindim çdo shqiptar, përgjegjësia është e jona dhe jo e atyre që janë të pabindur. Duhet të ulemi një më një me çdo qytetar e t’i tregojmë se ja kush është ky që drejton sot ekzekutivin e vendit. A mundet ne të votojmë në këtë mënyrë?”, vijoi ish-Kryeministri.

“Çfarë ndodhi pardje në Lezhë? Nënprefektin e Lezhës, ish-kryetarin e PS, ish-deputetin e Lezhës, Agostin Marku i dalin banditët e drogës, nipat e Ndokës, e shtrijnë në mes të rrugës, i gjuajnë me revole dhe policia nuk guxon të hapë çështje, dhe vetëm pas reagimeve të fuqishme detyrohet ta bëjë. Por kur ata, për ish-kryetarin e tyre e bëjnë këtë, çfarë mendoni se do të bëjnë këta për votën tuaj, për fëmijët tuaj? Përkundrazi. Janë këta që shtypin si krimbat çdo qytetar që i nënshtrohet”, tha Berisha.

Ish-Kryeministri theksoi se fundi i këtij pushteti që sot mbahet në këmbë nga bandat është i pashmangshëm.

“Ne, këtë betejë nuk e nisëm sot. Sot apo më 20 shkurt ne i vumë kurorën finale për të mos dalë kurrë nga kjo çadër të gjallë pa vendosur në vend ligjin, vullnetin tuaj, votën e lirë, të ardhmen e shqiptarëve.

Beteja me krimin është beteja më e vështirë, më e rrezishme, por absolutisht, me guximin e qytetarëve ai bëhet pluhur më shpejt se çdo gjë tjetër. Banditët me pushtet hiqen si trima, vrasin e presin, banditët nën presionin e ligjit gjejnë vrimat e miut për t’u futur dhe ata do t’i detyroni ju shumë shpejt t’i gjejnë”, tha Berisha.

Shqiptarët vranë frikën, 38 mijë të arrestuar më 2015

Prezenca masive e qytetarëve në protestën e 18 shkurtit dëshmoi se shqiptarët e kanë frikën dhe janë gati sot t’i japin fund regjimit të krimit në pushtet. Berisha kujtoi dje në bashkëbisedimin me protestuesit në çadrën e lirisë terrorin e ushtruar nga qeveria Rama përmes arrestimeve të pjesës më vulnerabël të shoqërisë, të varfërit e të pamundurit.

“A e dini ju se cili ka qenë mesazhi hyjnor që më ka ardhur mua nga 18 shkurti? Me qindra qytetarë më shkruanin ‘e vramë frikën sot dhe ne do të fitojmë’. Por a kishin të drejtë këta? Kishin, se bijtë e etërve xhelatë arrestuan sipas statistikave të tyre, në vitin 2015, 38 mijë qytetarë shqiptarë. Ata nuk ishin me imunitet si ne deputetët, nuk ishin të mëkëmbur, ata ishin të varfërit dhe hallexhinjtë e këtij vendi. Prej tyre, 22 mijë vetëm për llambën elektrike u futën në burg. Etërit e tyre ishin terroristë, etërit e tyre ishin kriminelët më të mëdhenj të historisë kombëtare, ata ekzekutuan me gjyq edhe pa gjyq me dhjetëra mijëra. Por në fushatën e arrestimeve në vitet ‘45-‘47 arrestuan 27 mijë shqiptarë, pra 10 mijë më pak se Edvin Kristaq Rama më 2017. Jam 100% i sigurt në fitore, kurrë në jetë nuk kam qenë më i sigurtë se sa sot në fitoren e kësaj beteje. Kam një thirrje. Këtu para jush, para se të mblidheshim një zonjë nga Durrësi lëshoi një kushtrim; i bëj thirrje intelektualëve të ngrihen, tha. Edhe unë u bëj thirrjen më miqësore intelektualëve të ngrihen. Ne intelektualët që kaluam vite e dekada në diktaturë e mbështetëm fuqishëm diktaturën qoftë me heshtjen tonë, duke qenë ne shumicë e heshtur diktatura jetoi nga viti në vit e nga dekada në dekadë, dhe kjo duhet të na shoqërojë gjithë jetën si një brejtje e madhe e ndërgjegjes. Dhe kjo duhet të jetë një thirrje e madhe që vjen nga thellësitë e ndërgjegjes tonë. Kurrë më të mos konformohemi, por të ngrihemi fuqishëm kundër të keqes çdo ditë”, tha Berisha.

Ish-Kryeministri u bëri thirrje intelektualëve të mos heshtin ndaj situatës që sot ka përfshirë vendin.

“Intelektuale dhe intelektualë, edhe ju që nuk keni jetuar diktaturën, kujtoni një shprehje të Burkes, i cili thotë ‘e keqja nuk kërkon asgjë tjetër që të triumfojë përveç indiferencës së njerëzve të mirë’, përveç konformizmit të intelektualëve pra, përveç heshtjes së tyre. Mos u bëni bashkëfajtorë në këtë reagim kriminelësh, në këtë regjim banditësh, se ju që të gjithë mund të lexoni për politikën dhe do të gjeni se më i keqi i të gjitha regjimeve, më i keqi i të gjitha diktaturave dhe oligarkive është banditokracia. Ndaj të ngrihemi, frymëzohuni nga ata qindra e mijëra burra që vërshuan drejt Tiranës dhe erdhën këtu. Absolutisht të paktën 100 mijë prej tyre, erdhën me vullnetin e hekurt për ta fshirë nga faqja e dheut këtë ndërtesë dhe klikën e urryer. Por vendosën me përgjegjësi qytetare të qëndrojnë në fibrën e tyre qytetare, në guximin e tyre, të qëndrojnë të pamposhtur në këtë çadër, në çdo vend gjer në fitore”, u shpreh Berisha.(A Shahini)