Archives for October 2017

Harta zonale e komunave të Kosovës dhe zgjedhjet lokale 2017

October 11, 2017 by dgreca

Shkruan:arch. Ylber Vokshi -Ylli/

Përmbajtja e dokumenteve hapësinore në thelb është e njëjtë në tërë rruzullin tokësor që rezulton me produktin final të planeve me emërtime të ndryshme, varësisht se si pajtohen pjesëmarrësit në proces nga shoqëritë e ndryshme. Natyrisht ka modalitete dhe përmbajtje të ndryshme që e kanë një rezultat final,organizimin e mirëfilltë të territorit të vendit dhe mirëqenien e banorëve të saj.Pra emërtimi i tyre nuk është i rëndësishëm por përmbajtja e tyre të cilën duhet harmonizua me kërkesat realistë të asaj shoqërie. Harta zonale e komunës e emërtuar me Ligjin e Planifikimit Hapësinor të vitit 2013, në thelb duhet ti ketë rezultatet përfundimtare të njëjta si Plani Zhvillimor urban i cili ishte në Ligjin e vitit 2003. Këto emërtime vetëm pa nevojë kanë krijuar huti,dikur quhej Plani urbanistik i qytetit,një emërtim adekuat i kohës.

Nuk e di a janë përmendur ma shumë se në këtë fushatë zgjedhore domosdoja e përpilimit të dokumenteve hapësinore për funksionimin e komunave tona. Nga aspekti profesional kjo është një arritur e madhe, pasi pas 18 vite po potencohet rëndësia e tyre,por po vërehet se sa të pa informuar janë kandidatët nga ana e këshilltarëve të tyre për rëndësinë e përpilimit të Hartës Zonale Komunale,dokument hapësinor i dyti për ka rëndësia sipas ligjit aktual.Përmendja e saj në kontest politik në disa raste ishte jo serioze,nënçmuese e në disa raste edhe qesharake, si ishte rast me një kandidat i cili i referohej mos përpilimit të tyre në shumës,duke mos ditur se Komuna mundet të ketë vetëm një Hartë Zonale. Ka disa parakushte që duhet plotësuar niveli Qendror dhe Komunal (MMPH dhe Komuna ) që të filloi përpilimin e ati dokumenti, ato nuk janë bërë deri me tani. Për këtë është dashur të jetë i informuar kandidati për kryetarë, e jo të kërkoi me këmbëngulje që Harta Zonale është dashur të bëhet në vitin 2014.

Këso veprimesh me trajtimin hapësinor dhe urban të hapësirës në Komunat tona e kemi evidentë në të gjithë Kosovën. Janë përpiluar dokumente të ndryshme hapësinore dhe urbane,për atë janë shpenzuar mjetë të mëdha materiale,pyetja është sa dhe si është punuar sipas atyre dokumenteve, përkundër premtimeve elektorale që shumë rrallë janë plotësuar nga Kryetarët e Komunave.Rezultatet e këtyre veprimeve pas 18 vite shihen,preken dhe akuzojnë,kanë rezultuar me qindra mija ndërtime pa leje,me një situatë të rëndë urbane dhe rurale,sot është vështirë të mashtrohen prapë votuesit. Premtimet elektorale në shumtën e rasteve janë jo reale,jo serioze, të pa bazuara në planifikim të mirëfilltë hapësinor dhe urban. Kur kësaj i shtojmë edhe kualitetin manipulativ të disa ligjeve dhe akteve nën ligjore, gjegjësisht të udhëzimeve administrative të punuara nga Ministria, si është rasti i UA nr 24/2015,gjegjësisht të nenit 44 për Hartën Zonale të Komunave,atëherë situata është tërësisht e pa qëndrueshme.Për të shpjeguar këtë çështje më duhet të shërbehem me disa të dhëna puro profesionale dhe ligjore, që nuk janë në interesin e lexuesve të shumtë të shkrimeve të mija,prandaj iu kërkoi falje publike atyre.Parimi bazik në përpilimin e akteve nënligjor apo udhëzimeve administrative sipas njohësve të fushës është se domosdo duhet të jenë të bazuara në ligjet adekuate, e jo për të bërë devijime që janë në kundërshtim me ligjin, si është rasti konkret. Ekziston vetëm një rrugë e përpilimit të Hartës Zonale të Komunës e ajo duhet të jetë produkt i dokumenteve të nivelit ma të lartë, gjegjësisht Planit Hapësinor të Kosovës,Hartës Zonale të Kosovës dhe Planit Zhvillimor Komunal, zgjidhje tjera nuk mundet me pas, nuk ka askund në botë. Kjo vetvetiu nënkupton se ma parë duhet punuar dhe miratuar planet e nivelit ma të lartë e pastaj të Hartës Zonale të Komunës.Do të tentoi të shpjegoi këto anomali që duhesh të jesh i rafinuar me i parapa. Harta Zonale e Komunës NUK mundet të punohet para se të bëhet apo të plotësohet Plani Zhvillimor Komunal sipas ligjit të vitit 2013 (neni 44 pika 1 e UA nr 24/2015), produkt i të cilit duhej të ishte. Për çudi në dispozitat përfundimtare të ati UA (neni 44 pika 3) ka një udhëzim se në raste të tilla ajo duhet të jetë në pajtim me standardet ndërkombëtare të aplikueshme për planifikim hapësinor çka nënkuptohet,nëse Komuna fillon punën e përpilimit të saj para miratimit të normave teknike të planifikimit hapësinor.

Ajo NUK mundet të punohet para se të bëhet Harta Zonale e Kosovës me të cilën duhet me qenë në harmoni,ligjdhënësi ynë “gjenial” e lejon këtë sipas nenit 44 pika 2, ku udhëzon që ajo duhet të jetë në pajtim me Planin Hapësinor të Kosovës dhe me interesat tjera nacionale … Kjo tregon një diletantizëm tërësisht të pa pranueshëm,të pa lejueshëm dhe të pa qëndrueshëm me problematikën hapësinore të territorit.E kamë theksua disa herë këtyre viteve se atëherë kur u shtjerrën të gjitha format e “suksesshme” të abuzimit me hapësirën urbane dhe rurale të Kosovës, duke shfrytëzuar periodën emergjente të pas luftës,me jo-ligjshmëri ekstreme,duke mos i respektuar as normat dhe standardet elementare të ndërtimit,gjegjësisht të planifikimit hapësinor,urban dhe arkitektonik, filloj loja e re me përpilimin e ligjit të ri të Ndërtimit dhe Planifikimit hapësinor në vitin 2012 dhe 2013.Këto dy ligje ende janë në fuqi por ende nuk janë tërësisht funksional, pasi MMPH ende nuk ka përpiluar të gjitha udhëzimet administrative, si është ai për Planet rregulluese të hollësishme (neni 17 i LPH),për të cilët Ministria nuk e ka pa të rëndësishme që edhe pas 4 vite të përpiloi udhëzimin administrativë, se çka duhet të përmbajë ai dokument. Edhe ato akte nënligjore gjegjësish udhëzime administrative kanë të meta të mëdha që në disa raste ato i bëjnë jofunksionale.

Ti referohemi ati plani me anën e të cilit duhet të zgjidhen të gjitha problemet urbane është vetëm një mashtrim elektoral i votuesve, pasi përpilimi teknik i ati dokumenti hapësinor të avancuar kërkon shumë kohe dhe ekspertizë e cila ka munguar në Kosovë këto 18 vite. Problem edhe ma i madh do të jetë zbatimi i saj,duke u bazuar në atë se si është punuar deri me tani,sipas meje është e pa mundur ta punojnë të gjitha Komunat,vetëm po e mashtrojmë vetveten. Duhet ndryshuar mendësinë urbane së pari të politik bërësve tanë e pastaj popullit, proces i cili kërkon kohë me dekada me ndryshuar filozofinë primitive jetësore të këtij mileti

Ministria edhe me ligj ka krijuar një bllokadë totale të procesit të planifikimit hapësinorë në tërë territorin e Kosovës, që si duket ishte dhe është edhe qëllimi i tyre,të vazhdoi kjo formë e ndërtimeve që kishin filluar që nga viti 1999. Ndryshe si të shpjegohen pikat 1, 2 të nenit 44 të UA nr.24/2015 për Hartën Zonale të Komunave. Është jashtë të gjitha principeve dhe rregullave teknike ajo çka është paraparë apo urdhëruar me këtë nen. Kjo haptas tregon paditurinë elementare të përpiluesve të sajë me procedurat natyrore të përpilimit të dokumenteve hapësinore që janë të njëjta në tërë botën e civilizuar. Krijimi i një konfuzioni të tillë të qëllimshëm po i vërteton koha dhe si të tillë duhet tërësisht ndryshuar-reviduar.

Premtimet elektorale se do të rregullohen disa lagje janë jo realiste,atë nuk kanë arritur edhe shoqëritë shumë ma të pasura,ato intervenime kushtojnë shumë,do të mbesin ashtu si relikte të një kohe kur nuk ka funksionuar ligji për të iu treguar pasardhësve tonë se si është jetuar në Kosovë në fillim të shekullit 21.

A thua do të kemi ndonjë herë fushat të zgjedhjeve lokale të bazuara vetëm në fakte reale, që me trajtimin e tyre profesional do të ngrihej dhe përmirësohej mirëqenia e banorëve të vendbanimeve në Kosovë.

Prishtinë, tetor 2017

arch. Ylber Vokshi -Ylli

arkitekt i pavarur

“Ujqërit e mendimeve”

October 11, 2017 by dgreca

nga Majlinda BUSHJA/Kur njeriu “copton” mendimin e tjetrit ose i ka sosur durimi, ose mosbesimi ka arritur kulmin dhe merret e pavërtetë ajo çka thuhet. Një rast i tillë ndodhi pak ditë më parë pas fjalimit të Rigerta Lokut nga Rubiku në Parlamentin e parë Rural Shqiptar, ku u fol për aktrim, e çnuk u tha aq sa dhe opozita lëvizi nga vendi. U zgjua dhe foli. Disa syresh ju turrën Rigertës, megjithëse Rigerta kishte të drejtë në ato çka foli. Madje një gazetare që nuk kishte jetuar asnjë ditë në fshat e revoltuar u shpreh se “problemi më i madh në fshat nuk është bujqësia, por krimi…”, pavarsisht se bujqësia në fshat është puna dhe puna për njeriun është jeta. Kurse krimi është si krimbi që kur lindi nuk është zhdukur, veçse luftuar gjithmonë me rezultate të përkohshme.Mirëpo, nuk është ky rasti i vetëm ku mendimi i drejtë dhe e vërteta coptohen, raste të tjera në debatet e përnatshme televizive rrëfejnë sesi nuk pranohet mendimi i tjetrit deri në copëtimin e tij, madje gjerat shkojnë deri në fyerje personale. Flasin edhe ata që nuk pajtohen me idenë, por edhe ata që nuk e kanë të plotë idenë, por hamendësojnë mbi atë që thuhet duke nxjerrë përfundime. Dhe kjo e fundit është më e keqja.

Është e vërtetë që bujqësia ka nevojë për ujë dhe asnjë fermer nuk duron dot tek sheh bimët e tij që vuajnë në temperaturë 40, apo 45 gradë në verë, ai do përpiqet të gjej një zgjidhje sado të mundimshme, nga ana tjetër duhet dhe rrugë që prodhimi të mos mbes stok. Por nuk është vetëm kjo që i jep fund problemeve në fushën e bujqësi dhe fshatit. Duhet organizim për orientimin e kulturave që duhet të mbjell fermeri, madje unë hedh idenë dhe në hapjen e “Bibliotekave Bujqësore”, të profilizuara, që ndoshta nuk mund të hapen në çdo fshat, por në çdo ish-komunë do të ishte një vlerë e mirë për cdo fermer që do të ketë sukses në punën e tij, që e do tokën dhe do të jetojë prej saj. Librat dhe informacionet, studimet shkencore nuk duhen të mbesin vetëm në zonat urbane, pasi atje ku ekzistojnë njerëzit duhet të shkojnë dhe librat. Dija kurrë nuk është e tepër, ajo të jep me tepri mundësi për të gjetur zgjidhje. Ndoshta duket një luks, në kohën kur fermerit nuk i shkon asnjë pikë uji në ara, nga ana tjetër prodhimi që kanë marrë me shumë mundim mbet pa u shitur për shkak të cmmimeve të ulta, sidoqoftë pasurimi me dije në fushën e bujqësisë, do të jepte rezultate më të mira dhe do bënte që njerëzit të kthejnë sytë nga fshati, nga fshati që duam e qeveria e thotë sa herë që i vjen rasti.

Është folur shumë për reformën në bujqësi, për fshatin që duam, për sfidat që e presin bujqësinë, rilindjen e fshatit, janë shkrepur foto nën hijen e pemëve gjatë fushatave elektorale, janë bërë premtime të majme, është shpërdoruar shumë kohë pa u konkretizuar në punë konkrete dhe njerëzit në fshat janë drejtuar kryesisht emigrimit si e vetmja shpresë për ringritje dhe për të jetuar. Fakti që të gjitha qeveritë i kanë nënvlerësuar e kanë bërë fshatin sot një vend ku ritmi i jetës ecën shumë ngadalë. Toka mund të quhet pa frikë “dheu i artë”, por shumë njerëz e kanë braktisur tokën çka e tregon dhe raporti i popullsisë qytet-fshat në ditët e sotme. Pasi toka të ushqen, kur ti “e ushqen”, por njerëzit nuk mund ta bëjnë këtë pa një pëkrahje, ndaj e kanë parë veten të humbur para kësaj sfide dhe kanë ikur. Kanë ikur dhe kanë parë sesa e prapambetur është bujqësia në vendin tonë në krahasim me vendet e tjera të rajonit e më gjerë. Kanë parë të vërtetën mbi atë që thuhet dhe bëhet realisht për bujqësinë shqiptare. Dinë të dallojnë të vërtetën nga gënjeshtrat e politikës dhe politika ju është bërë gjithmonë e më e largët në shpresën e tyre.

Megjithëse forma e të vërtetës nuk është gjithmonë si një vijë e drejtë, ajo shërben për të ndryshuar të vërtetën e mëvonshme duke e bërë të pëlqyer. Le ta lëmë të vërtetën nën dritën e të gjithëve (si në rastin e fjalimit të Rigerta Lokut), disa sy që nuk kanë mundur ta shohin më parë mund të reflektojnë dhe ta ndryshojnë gjendjen. Çdo ngutje për ta coptuar si bën mirë të vërtetës, përveçse e deformon atë, duke vonuar çdo ndryshim që mund të vijë në kohë për mirë. Vërtet koha që jetojmë na ushqen përditë me mosbesim, por të vërtetës duhet t’i japim kohën e duhur para se ta flakim, e ta coptojmë. Dhe “Ujqërit e mendimeve” janë kthyer sot në frikë për të vërtetën, jo vetëm në fushën e bujqësisë, por në të gjitha fushat e jetës duke u sjell si “Zot i të vërtetave”. Ata shkojnë pas së vërtetës imagjinare duke u përpjekur ta coptojnë e largojnë nga vëmendja e opinionit publik të vërtetën e vërtetë. Në disa raste duke e zbukuruar me magjinë e gënjeshtrave që ata vet i besojnë si të vërteta. Por të vërtetës nuk duhet t’i bëjmë bishta, pavarsisht se mund të jetë e shëmtuar dhe s’na pëlqen. E vërteta është drita e ndërgjegjes dhe tregues i gjendjes që duhet të shfaqet me përmasat e saj reale, për reflektim dhe ndryshim pozitiv në sa më pak kohë.

Pse shqiptarët në Amerikë nuk rreshtohen me LQSHA Joe DioGuardi?

October 11, 2017 by dgreca

Në vend të reagimit/

(Rreth paraqitjes së Haxhi Dautit,kryetar i Këshillit Kombëtar në Nju Jork për gjendjen aktuale shqiptare në Maqedoni dhe për zgjedhjet lokale)/

NGA SKENDER KARAÇICA/

Para do dite,arkivi historik i LQSHA-së Joe DioGuardi ka sjell në kujtesën e opinionit të gjerë rrugëtimin që ka bërë kjo lëvizje e madhe kombëtare për lobim të çështjes shqiptare në Ballkan dhe për lirinë e Kosovës.Nuk ka dyshim se projekti kombëtar i ish kongresmenit dhe arbëreshit me gjak shqiptari,Joe DioGuardi në LQSHA-së ka bërë shumë për të vënë në tavolinën politike dhe diploimatike(si lobist shqiptaro-amerikan)çështjen shqiptare në Ballkan dhe për ndarjen e trojeve tona entike nga grabitqarët fqinjë para Kongresit dhe Senatit Amerikan në Shtëpinë e Bardhë në Uashington.

Kjo është e vërteta historike që na vjen prapa dhe duhet të ruhemi nga gjykimet historike,si thoshte Hasan Prishtina.Në këtë plan diaspora shqiptare në Amerkikë ka bërë shumë për një shekull për çështjen shqiptare dhe e drejta për liri dhe pavarësi të Kosovës,ndonëse dihet për ripushtimet e Serbisë dhe përgjakja dhe skenarët për asgjësimin e shqiptarëve me ,,Tokën e djegur,,!

Tashti problem në vete paraqet çështja e (pa)zgjidhur shqiptare në hapësirën etnike në Maqedoni.Për të hedh dritë në këtë rrafsh,Haxhi Dauti,kryetar i Këshillit Kombëtar në Nju Jork në kohën e zgjedhjeve komunale në Maqedoni,del para opinionit me disa teza të gabuara si ,,shpëtimtar,,i çështjes shqiptare dhe si ,,lobist,,për disa vija të trasha se ,,Amerika na përkrah,,për çdo gjë kur e kur është në pyetje çështja shqiptare.Kush po lobon dhe kush loboi tash e tridhjetë vjetë për çështjen shqiptare përmes dyerëve të politikës,të diplomacisë dhe të miqëve tanë senatorë e kongresmenë në Shtëpinë e Bardhë në Uashington.Po,ai është arbëreshi,ish kongresmeni Joe DioGuardi,i cili me tërë argumentet historike të kohës vrastare të Serbisë,i doli përballë kryekriminelit Sllobodan Millosheviq në Gjykatën Ndërkombëtare për Krime Lufte në Hagë dhe ia tregoi gishtin tek hudnët kriminelit serb se çfarë kishte bërë në Kosovë dhe ndaj popullit shqiptar deri në shkallë të gjenocidit me skenarët e tij vrastar për,,Tokën e djegur,,!

Pse po anashkalohet arbëreshi Joe DioGuardi,pa anatemohet nga disa që aktivitetin e vet e kanë pranë tavolinave dhe të lojës së golfit në livadhet e gjelbëruara në Nju Jork.Kë po e pengon JoeDiogurdi,për Serbinë dihet po për shqiptarët në atdhe nuk e kemi të qartë.Ndërkaq,ish kryeministri i Shqipërisë Sali Berisha nuk e pati për nder që e ,,haroi,,arbëreshin me gjak shqiptare që të ftoi në kremtimin e 100-vjetorit të pavarësisë së Shqipërisë në Tiranë.Kështu jem ne,harrojmë,anashkalojmë dhe,për fatin e keq dimë edhe të anatemojmë njeri-tjetrin.Kjo ndodhi pa të drejtë me arbëreshin dhe ish-kongresmenin Joe DioGuardi në Nju Jork.

Haxhi Dauti në këtë paraqitje për opnionë,paksa nga këndi i problemit shqiptar në Maqedoni,sikur e ,,kryen,,punën e vet me një prorosi të një melodie të këputur sikurse çdo gjë është mirë në hapësirën shqiptare dhe përmes fjalorit ,,poltik,,dhe si,,lobist,,rithekson se ka biseduar me shumë senatorë e kongresmenë për ,,fuqizimin e Marrëveshjes së Ohrit,,që sipas tij na qenkash ,,shpëtimtare,,e çëshjtjes së (pa)zgjidhur shqiptare në Maqedoni!

Nuk di a është në dijeni Haxhi Dauti(Këshilli Kombëtar)se me ligjet Kushtetuese në Maqedoni,populli shqiptar si popull i dytë shumicë ende e ka statusin e pakicës kombëtare dhe jo shtetformues(?!)Atëherë me këtë status aktual si mund të fitojnë shqiptarët në Maqedoni në këto zgjedhje komunale kur ende në këtë vend nuk zbatohet Konventa e BE-së për decentralizimin e pushtetit lokal,ndonëse nuk di a e din Haxhi Dauti se para do kohe,pushteti i centralizuar në duart e qeverisë në Shkup(rasti i N.Gruevskit),ku për pesë minuta ia hoqi tërë paratë nga xhirollogaria komunës së Strugës dhe kryetarit aktual z.Ziadin Sela!

Atëherë çfarë të drejtash dhe çfarë të mirash do të sjellin këto zgjedhje komunale në Maqedoni për pushtetin lokal të shumicës shqiptare Haxhi Dauti?Për tërë rrafshet e përmenduar më lartë na duhet të lobojmë bashkarisht në institucionet shtetit amerikanë në Uashington dhe të jemi unikë se çështja shqiptare ende nuk është zgjidhur drejtë në hapësirën etnike në Maqedoni.Mos të bëjmë qejfin vetës dhe të bëjmë lobim për krysetarët e komunave me shumicën shqiptare si në Kërçovë,Gistivar dhe Strugë që të mos na dalin nga dora.

Për fund fare Haxhi Dauti,do të ishte mirë që Këshilli Kombëtar në Nju Jork të niset në mëngjes dhe të takoj LQSHA Joe DioGuardi dhe bashkarisht të nisemi për lobim dhe aktivitete në një front të përbashkët kombëtar se kështu të ndarë e të përqarë nga flamujt partikë në atdhe,e ardhmja e diasporës shqiptare në Amerikë ka ardhë në pikën zero!Ndërkaq,lobi serbë derisa ne jemi të përqarë dhe ia kemi kthyer shpinën arbëreshit Joe DioGuardi,lobi serbë i përkrahur nga shteti i Serbisë,po shkel me këmbën e djathë në selinë e Kongresit dhe të Senatit në Uashington.Na duhet që të marrim frymë dyherë dhe pa hamendje të rreshtohemi me Lëvizjen e madhe të Lobit Shqiptaro-Amerikanë përderisa nuk bëhet vonë për çështjen e (pa)zgjidhur shqiptare në Ballkan,kështu thuhet në reagimin e SHSHA-së në Çikago.

Skënder Karaçica

Presidenti i Shqipërisë Ilir Meta, në Kosovë

October 11, 2017 by dgreca

PRISHTINË, 11 Tetor 2017-Gazeta DIELLI-B.Jashari/ Presidenti i Republikës së Shqipërisë, Ilir Meta, pritet sot në vizitë zyrtare në Kosovë.Presidenca kosovare në njoftimin e dërguar bën të ditur se, në orën 11:00, Presidenti i Republikës së Kosovës, Hashim Thaçi, me ftesë të tij, pret në vizitë shtetërore Presidentin e Republikës së Shqipërisë, Ilir Meta.Fillimisht, Presidenti Thaçi do ta pres Presidentin Meta me ceremoninë e organizuar në Sheshin “Ibrahim Rugova”, për të vazhduar më tej me takimin bilateral.Në përmbyllje të takimit, në ambientet e Presidencës së Kosovës, presidentët Thaçi e Meta do të mbajnë konferencë për shtyp.Presidenti shqiptar Ilir Meta pritet të zhvillojë edhe takime të tjera me drejtues institucionalë e politikë të Kosovës.

Prishtinë-Hapet zyrtarisht RYCO – Zyra Lokale në Kosovë

October 10, 2017 by dgreca

-Zyra Rajonale për Bashkëpunim Rinor (RYCO), si mekanizëm rajonal, është themeluar nga qeveritë e gjashtë shteteve të Ballkanit Perëndimor: Shqipërisë, Kosovës, Malit të Zi, Maqedonisë, Serbisë dhe Bosnë e Hercegovinës/

PRISHTINË, 10 Tetor 2017-Gazeta DIELLI-B.Jashari/ Në Prishtinë sot u bë hapja zyrtare e Zyrës Rajonale për Bashkëpunim Rinor (RYCO), Zyra Lokale në Kosovë, në hapësirat e Qendrës së Studentëve – Kampusit Universitar, në praninë e përfaqësuesve vendorë e ndërkombëtarë. Zyra Rajonale për Bashkëpunim Rinor, si mekanizëm rajonal, i themeluar nga gjashtë qeveritë e Ballkanit Perëndimor (Shqipëria, Kosova, Mali i Zi, Maqedonia, Serbia dhe Bosna e Hercegovina) në bashkëpunim të plotë me shoqërinë civile, ka filluar funksionalizimin e saj me kapacitete të plota në 4 korrik 2017.RYCO tenton të jetë një shembull i mirë i bashkëpunimit rajonal në Ballkanin Perëndimor dhe të forcojë procesin e Berlinit, bashkëpunimin paqësor dhe demokratik në rajon.

Me programet e saj të shkëmbimit, RYCO synon të përmirësojë mirëkuptimin reciprok ne mes dallimeve kulturore dhe të zhvilloj respekt të ndërsjellë, si dhe përgjegjësinë e përbashkët për rajonin dhe Evropën midis të rinjve të Ballkanit Perëndimor.Përmes qasjes së saj, RYCO gjithashtu synon të nxit trajtim konstruktiv ndaj të kaluarës dhe do të mbështet procesin e pajtimit në rajon.Aktualisht RYCO është në fazën e hapjes zyrtare së Zyrave Lokale në gjashtë vendet e Ballkanit Perëndimor. Në këtë kontekst edhe qeveria e Kosovës ka përmbushur obligimin e saj ligjor duke siguruar Zyrën Lokale të RYCO-së në Prishtinë.

Qeveria e Kosovës në 30 dhjetor 2016 ka miratuar Projektligjin për ratifikimin e Marrëveshjes për themelimin e Zyrës Rajonale për Bashkëpunim Rinor në mes të Kosovës, Shqipërisë, Bosnjës dhe Hercegovinës, Malit të Zi, Maqedonisë dhe Serbisë. Ndërsa, në 30 mars 2017 Kuvendi i Kosovës miratoi Ligjin për ratifikimin e Marrëveshjes për themelimin e Zyrës Rajonale për Bashkëpunim Rinor në mes të Kosovës, Shqipërisë, Bosnjës dhe Hercegovinës, Malit të Zi, Maqedonisë dhe Serbisë. Nga 93 deputetë prezentë seancën plenare, 82 votuan pro, 10 kundër e 1 abstenoi.