dgreca – Page 1820 – Dielli

SHTËPIA E VATRËS PËRHERË E HAPUR PËR BASHKATDHETARËT

August 31, 2017 by dgreca

Të Dielën me 27 Gush një grup bashkadhetarësh nga Nju Xhersi dhe Nju Jorku, vizituan Shtëpinë e Vatrës dhe dhuruan libra për Bibliotekën e Vatrës.(Për më shumë fotografi shkoni ne facebook)/

Shtëpia e Vatrës është përherë një portë e hapur për bashkatdhetarët, përfshi edhe ata që pa hyrë brenda saj bëjnë kritika nga larg duke amplifikuar edhe thashetheme e tëpavërteta. Edhe ditët e të shtuna e të diela nuk mungojnë bashkatdhetarët që e vizitojnë Shtëpinë e Vatrës. Një grup mërgimtarësh nën drejtimin e z. Mihal Jano, që është i njohur për aktivitetin patriotik kur ishte emigrant në Greqi, kërkuan që ta vizitonin Vatrën të Dielën me 27 Gusht 2017. Grupi përbëhej nga Mihal Jano, studiues i historisë, Ilo Foto, studiues, autor i 17 librave shkencore; Engjell Zerdelia, studiues dhe autori i librave për Kongresin Kombëtar të Lushnjës dhe Kongreset Kombtare Arsimore, si dhe Pirro Lako, Dionis Nushi, Shpetim Borova, Saimir Jano dhe Niko Gjoni. Ata u pritën nga Dritan Haxhia-Kordinator i Medias pranë Kryesisë së Vatrës dhe Editori i Gazetës”Dielli”, Dalip Greca.

Editori i Diellit, u uroi mirëseardhejen vizitorëve dhe shpalosi historinë e Vatrës përgjatë 105 viteve dhe të Gazetës Dielli, që ka hyrë në vitin e 110 të botimit. Në emër të grupit të mysafirëve foli Mihal Jano, i cili tregoi për vlerat e mërgimtarëve, vecanërisht të atyre të zonës të Myzeqesë, duke përmendur dhe fakte historike nga emigrantët e hershëm të kësaj treve si: Bush Nati, Leonidha Jano, Peco Dhimitri, Miti Jano, Maj Nito, nga zona e Rroskovecit, Lili Gjerazi nga zona e Libofshes, Andon Pope, Dhimitër Shallapi nga zona e Divjakës e të tjerë.

Më pas ai foli prurjet e studiuesëve nga të gjitha trevat kombëtare, për librat e tyre, një pjesë e të cilëve u sollën dhuratë për bibliotekën e Vatrës, përfshi dhe botime të emigrantëve shqiptarë nëpër botë.Gjatë bashkëbisedimit shfaqën mendimet dhe opinionet e tyre për Vatrën dhe organizimin e veprimtarive bashkuse edhe Illo Foto, Engjëll Zerdelia, Niko Gjoni, Piro Lako, Shpëtim Borova, Dionis Nushi.Mysafirët i përshëndeti edhe koordinatori i mediave pranë kryesisë së Vatrës, Dritan Haxhia, i cili tha se Vatra është gjithëshqiptare dhe i takon brezit të tanishëm ta cojë më tutje kryeveprën e Shqiptarëve të shekullit të shkuar. Eshtë kollaj të kritikosh, por është vështirë të kontribuosh.

Duke dorëzua librat e autorëve dhurues, z. Mihal Jano tha se i falenderonte të gjithë ata që ia kishin besuar atij dhurimin në Vatër. Ja disa nga librat e dhuruara: ” Pulti” viti 743-10 mars 2005″ i autorit Mark Palnikaj, botuar në Prishtine 2017; “Tungj Miftari, Bajraktari i Mërturit”-autor Mark Palnikaj, botuar në Tirane 2014. Studjuesi dhe historiani Nikollë Loka ka disa libra si: “Prengë Bibë Doda- dritëhijet e nje burri shtetasi”; ” Imzot Nikollë Kacorri- Burrështetas Shqiptar në Altarin e Atdheut”, bashkautorë me Angjelin Shtjefni; “Lekë Rajta- Burri i madh i një dere të njohur”, ” Tuk Jakova- jeta dhe vepra”, botuar në Tirane 2017; “Zef Shkorreti, Mësues Hero i kohës së tij”; ” Studime historike, Recensione Publicistike” vellimi pare, Nikoll Loka, Tirane 2014; “Kuvendi i Fanit dhe Pamundësia e Piemontit shqiptar”.Edhe bashkombasi Nokë Sinishtaj ka dhuruar disa libra si: “Motive Malësore”-, botuar në Luzerne 2017; ” Monologu i Cinise së Podgorices” shkruar nga Noke Sinishtaj, botuar në Tirane 2016; “Cui Bono”- Noke Sinishtaj- Luzerne 2016; ” Shqiponja e Grudës- Gjekë Gjon Shyti Sinishtaj 1894-1938-botuar në Tiranë 2016 , Dejka Kujtimesh-Poezi, botuar në Tiranë 2014 etj..Po ashtu u dhuruan edhe disa libra nga autore të tjerë si”Maska e Dites” Antologji e prozes se shkrimtarve emigrante ne Greqi;” A doni më për ….Belulin” me autor Fran Ukcama,”Vite emigracioni” nga Albert Zholi, “Fllad e këngë Laberie” nga Kastriot Lekdushi,”S’di të hesht” poezi nga Faslli Haliti, “Vdekja e Varreve”- ditar mergimi nga Zeqir Lushaj, “Fitimtarë të një Populli të Mundur” nga Fatbardh Rustemi,”Fjalë të urta” pjesa e 11 nga Bektash Hysni Zoto;” Apollonian e Ilirise ne burimet antike” nga Bashkim Vrekaj;” E besova Eseninin”- Lirika nga Spiro Xhavara,” Me jetue në Shekullin e sotëm- ZOGU I” me autor Ramiz Lushaj;”Apollonia e Ilirisë” e autorit Bashkim Vrekaj etj.

Mihal Jano vecoi kontributin shkencor të studiuesit të pasionuar që jeton në Astoria,Nju Jork, z. Illo Foto, për të cilin tha:- Dua të dalloj e të vlerësoj më të moshuarin këtu mes nesh, studjuesin e pasionuar, specialistin e bujqësisë shqiptare, shkencëtarin Illo Foto, një emigrant i moshuar dhe bir i një prej emigrantëve të hershëm shqiptar nga Zagoria, një kontributor me vlera kombëtare për edukimin e brezave me njohuri shkencore.Ilo Foto, tha ai, eshtë një enciklopedi e gjallë dhe studimet e tij kanë vlera të spikatura. Librat dhe artikujt studimorë të tij janë punime të një intelektuali të mirëfilltë. Illo Foto ka shkruar mbi 17 libra me vlerë si dhe me qindra artikuj me trajtesa skincare dhe problematika shoqërore në organet e shtypit shqiptar shkencor dhe atij të përditshëm, përfshi dhe gazetat e diasporës, Dielli dhe Illyria. Të gjitha këto libra studjuesi Illo Foto i ka realizuar me shpenzimet e familjes së tij dhe në aktivitete të shumta i ka dhuruar. Ai ka marrë vlersimet e larta si nje intelektual e qytetar, model për të gjithë brezat.Një pjesë të librave,z. Illo Foto, ia dhuroi bibliotekës së Vatrës. Ndër to përmendim:Nga Harri Fultz tek Ilia Pali;Miqtë e mi të Deklasuar; Fshatarëisi e tradhëtuar; Bujqësia dhe Mjedisi në Tranzicion; Mushkëritë e Plagosura të Atdheut, Toka, Bujku, Shteti; 15 Shkencëtarët e vërtetë të Bujqësisë Shqiptare; Kriza Financiare Përballë Bujqësisë Fermere etj….

ANTIKOMUNISTËT: JO DIKTATURËS – PROTESTË ME 9 SHTATOR

August 31, 2017 by dgreca

Gazeta “Dielli” ka marrë në postën e saj elektronike Thirrjen e Shoqatës Antikomuniste të të Përndjekurve Politikë të Shqipërisë, që drejtohet nga gazetari Nebil Cika, një thirrje që u drejtohet qytetarëve shqiptarë për një protestë në ditën e hapjes se Legjislaturës se re te Kuvendit te Shqipërisë, 9 shtator ora 90.30 para Kuvendit te Shqipërisë. Po e botojme te plote:/

krimet-e-komunizmit Pushkatimet

Antikomunistët tubim – proteste në ditën hapjes së Kuvendit .

Tirrje !

Shoqata Antikomuniste e te Përndjekurve Politikë të Shqipërisë organizon ditën e hapjes se Legjislaturës se re te Kuvendit te Shqipërisë një tubim proteste kundër rikthimit ne krye te Kuvendit te Shqipërisë dhe te qeverise shqiptare ish drejtuesve te larte te diktaturës komuniste dhe pinjollëve te tyre gjenetike e politike si dhe pjesëtareve te policisë politike te komunizmit Sigurimit te Shtetit .Te përndjekurit politikë antikomunistë vlerësojnë zgjedhjen e ish ministrit te fundit te brendshëm te diktaturës komunistë ne krye te parlamenti dhe pjesëtareve te Sigurimit te Shtetit dhe pinjollëve te Byrosë Politike te PPSH dhe institucioneve te tjera te diktaturës si një kërcenim real për lirinë demokracinë dhe shtetin ligjor , fyeje për martiret dhe viktimat e terrorit komunist dhe rrezik për të gjithë shqiptarët që besojnë ende tek lirinë ,demokracia , shati ligjor , prona , familja dhe dinjiteti njerëzor .

Ne vlerësojmë se kjo situatë është një rikthim mbrapa ne përpjekjet 27 vjeçare të e vendit dhe popullit tonë për tu shkëputura nga komunizmi dhe pasojat e tij si një thike mbas shpine atyre qe luftuan e u sakrifikon për lirinë.

Me shume se një raport kriminal me te kallurën diktatoriale ky zhvillim negativ politik është një kërcenim real për të te sotmen dhe te ardhmen e vendit. Ata , kundër rikthimit ne pushtet te të te cilëve ne protestojmë, janë persona me precedentë te rrezikshëm kriminalë si vrasje , arrestime , torturime etje te kundërshtareve politike te komunizmit, qe kategorizohen si vepra penale te renda , krime kundër njerizimit gjenocid etje . Ne se këta persona marrin serish p[pushtetin dhe mjetet e duhura mund te kryejnë serish vepra te ngjashme gjë qe përben një kërcenim real për lirinë demokracinë dhe jetën e qytetareve.

Prandaj ne i bëjmë thirrje çdo te përndjekuri politik te komunizmit, çdo qytetari që vlerëson e respekton lironte dhe të drejtat e tij , te familjes, të pronës te fjalës , te atdheut etje ti bashkohet protestës sonë paqësore.

Ju bëjmë thirrje deputeteve te Kuvendit te Shqipërisë , atyre qe besojnë tek liria e demokracia nuk ndjehen te kapur nga e kaluar komuniste te bashkojnë votat dhe veprimit be tjera ne Kuvend me protestën tone duke ndaluar , duke mos u bere pjese e këtij rikthimi te rrezikshëm te njerëzve te diktaturës ne krye te shtetit dhe qeveri .

Bashkohuni me protestën tone tani qe nesër te mos jete vonë . Nuk ka nevojë të mundoheni te merrni me mend se çfarë mund te ndodhe ne se Sigurimi i Shtetit kthehet ne krye te shtetit . Ktheni pak kokën mbrapa dhe kujtoni çfarë ka ndodhe ne ketë vend vetëm 27 vjet me pare .

Nen moton : Jo diktaturës ! , te protestojmë se bashku ne 09 shtator ora 90.30 para Kuvendit te Shqipërisë .

KARDIOLOGU FIERAK I ARIZONËS

August 31, 2017 by dgreca

Nga Hajro Hajra/Arizona/SHBA/

Po të ishte Shqipëria çfarë nuk është, truri i saj nuk do të shpërndahej gjithandej nëpër botë, ajka e mendjes nuk do të ikte e të kërkonte “shpëtim” larg, sa më larg Atdheut, i cili në çerek shekulli demokraci, nuk arriti të demokratizohet. E çfarë mund t’u ofrojë bijve e bijave të saj Shqipëria demokratike, kur demokracia në Shqipëri, kjo metamorfozë e komunizmit, Shqipërinë e ka shndërruar, po të flasim me gjuhën enveriste, në një kopsht të lulëzuar, porse jo në kopsht të lulëzuar në kuptimin e mirëfilltë të fjalës, por në një kopsht ku lulëzon droga, korrupcioni, shantazhi, pasiguria, varfëria, “demokraci” të cilën do ta braktiste, po të mundte, i madh e i vogël. Kjo demokraci e detyroi dhe personazhin e këtij shkrimi t’ia kthente shpinën kopshtit-parajsë e të vinte për të filluar një jetë nga e para këtu, në SHBA, në “skëterrën kapitaliste”.

Është ky kardiologu i njohur i Arizonës, dr. Akil Loli, i certifikuar për kardiologji mjekësore të brendshme, për kardiologji kirurgjike, për kardiologji nukleare dhe për tomografi kompjuterike kardiake. Akili me familjen jeton në Paradise Valley, një qytet i vogël me 13-14 mijë banorë, e drejta një paralagje e Feniksit, kryeqytetit të Arizonës, e njohur me fushat luksoze të golfit, me shtëpitë e me hotelet e shtrenjta. Ai është nga Fieri, ndërkaq zonja e tij, Marina, është nga Shkodra. Akili ka lindur në Fier, ku ka jetuar deri në moshën 18-vjeçare, kohë kur (më 1988) ka vajtur në Tiranë për të filluar studimet në Fakultetin e Mjekësisë në Universitetin Shtetëror të Tiranës, degë që i ishte caktuar me direktiva partie, siç veprohej atëherë në Shqipërinë – Kështjellë të Komunizmit. Pas përfundimit të studimeve, më 1993, menjëherë ka filluar punën në Spitalin Ushtarak, për të vazhduar në vitin e dytë në Repartin e Kardiologjisë, ku kishte bërë trajnimin për kardiologji.

Më 1995 është martuar me Marina Progrin nga Shkodra, me të cilën ishte njohur në universitet (edhe ajo ka mbaruar studimet në mjekësi, 1 vit pas Akilit), ndërkaq, familja e saj është me prejardhje nga Kosova. Më 1992, ajo kishte pasur fatin ta takonte Nënën Terezë, gjatë vizitës së saj të tretë në Shqipëri, një fakt që ajo e thotë me krenari.

Pas 1 viti, në shtator të vitit 1995, pasi sigurojnë vizat, marrin udhën për në Amerikë. Fillimisht vendosen te xhaxhai i Akilit, Gjorgji, në qytetin Coral Springs, të shtetit Florida. Në shtëpinë e xhaxhait jetojnë për më pak se 1 vit, derisa vjen në jetë fëmija i parë dhe pastaj shkojnë për të jetuar në një shtëpi më vete.

Po, pse kishin zgjedhur pikërisht Amerikën dhe jo, ta zëmë një vend të Europës, më afër Shqipërisë? Ja si e shpjegon Akil Loli psenë e vendimit për të ardhur në SHBA: – Në asnjë vend, as në Europë, njeriu nuk trajtohet aq mirë, siç trajtohet këtu, në Amerikë.

Pa u bërë 1 vit nga ardhja në Amerikë, në maj 1996, çiftit Loli u kishte lindur fëmija i parë, gëzimi i parë, vajza Helen.

Fillimi, eh, si çdo fillim, i vështirë, me peripeci të shumta, por Akili e Marina, megjithatë i kishin përballuar, ndonëse jo me aq lehtësi.

Ja si i kujton zonja Marina ditët e para në Amerikë: – Ishte vështirë, shumë vështirë. Ishim pa lekë, punë nuk gjenim. Unë aplikoja për të punuar çfarëdo pune, por kur e shkruaja në aplikacion profesionin mjeke…, kush të merrte në punë. Veç kësaj, as anglishten nuk e dija mirë. As Akili s’po gjente punë… Kishim marrë vendim të ktheheshim dhe do të ktheheshim, po të kishim lekë për bileta. E kaluam si e kaluam këtë fillim tepër të rëndë, por shumë shpejt gjërat filluan të ndryshonin për të mirë, sapo Akili gjeti punë.

Për të arritur këtu ku është sot, Akili kishte qenë i detyruar të punonte shumë. Vitin e parë, kur u kishte lindur vajza, kishte bërë tri punë të ndryshme, kishte punuar deri në 18 orë në ditë, me një pagë 4.25 dollarë në orë (aq sa ishte paga minimale në Floridë më 1995) dhe pastaj kishte arritur të shkollohej pa asnjë lloj ndihme, pa asnjë lloj burse, i mbështetur tërësisht në forca të veta. Gjatë 3 vjetëve të qëndrimit në Floridë, ai arriti t’i kalonte hap pas hapi të gjitha provimet e domosdoshme për t’iu njohur shkollimi që kishte bërë në Shqipëri, domethënë diploma për mjekësi.(Me shume lexoni ne Diellin ne print)

Kosovë-Serbi, takim presidencial në Bruksel

August 31, 2017 by dgreca

-Drejt një faze të re të dialogut e zbatimit të marrëveshjeve e normalizimit të marrëdhënieve/
-Takim i presidëntëve të Kosovës dhe Serbisë, Hashim Thaçi dhe Aleksandar Vuçiç, me ndërmjetësimin e shefes së Politikës së Jashtme të Bashkimit Evropian, Federica Mogherini/

-Të gjitha takimet kryeministrore e presidenciale Kosovë-Serbi në Bruksel, kryesuar nga BE e mbështetur nga SHBA/

*Pas Takimit:-Presidenti Thaçi pas takimit në Bruksel kërkon themelimin e shpejtë të institucioneve dhe ekipin e unitetit/

PRISHTINË, 31 Gusht 2017-Gazeta DIELLI-Behlul Jashari/ Një fazë e re e dialogut dhe zbatimi i marrëveshjeve drejt normalizimit të marrëdhënieve janë në fokus të takimit që po zhvillohet sot në Bruksel të presidëntëve të Kosovës dhe Serbisë, Hashim Thaçi dhe Aleksandar Vuçiç, me ndërmjetësimin e shefes së Politikës së Jashtme të Bashkimit Evropian, Federica Mogherini.

Sipas zëdhënëses së BE-së, Maja Kocijançiç, “dy presidentët do të shkëmbejnë pikëpamjet mbi vazhdimin e bisedimeve për normalizimin e marrëdhënieve, pas pajtimit të tyre, në muajin korrik, që të fillojnë përgatitjet për një fazë të re të dialogut”.

Në dialogun në Bruksel Kosovë-Serbi për presidentin Thaçi të inauguruar në muajin prill 2016 dhe presidentin Vuçiç të inauguruar në qershor 2017, takimi i sotëm është i dyti, pas të parit në 3 korrik të këtij viti.

Në 2017-tën kishte edhe dy takime të tjera në Bruksel në nivelin presidencial. Në 1 shkurt Kosova dhe Serbia zhvilluan takimin e dytë brenda një jave, në vazhdimësi të takimit të 24 janarit, në nivelin më të lartë me pjesëmarrje edhe të presidentëve bashkë me krerët e qeverive pas 30 raundeve kryeministore të procesit drejt normalizimit të marrëdhënieve, të kryesuar nga BE e mbështetur nga SHBA.

Në këto dy raunde presidenti i Kosovës Hashim Thaçi u takua me atëherë presidentin e Serbisë Tomislav Nikoliç. Realizimi i marrëveshjeve dhe dhënja fund situatave tensionuese e retorikave ishte në fokus të dy takimeve presidenciale, që u zhvilluan ndërkohë që kishte kaluar një vit pa asnjë raund të nivelit të lartë, që nga takimi i 30-të kryeministor, por i vetmi në 2016-tën i zhvilluar në 27 janar dhe i fundit që nga i pari në 19 tetor 2012.

Në Bruksel, në procesin drejt normalizimit të marrëdhënieve Kosovë-Serbi, të kryesuar nga BE e mbështetur nga SHBA, në 19 prill 2013 është nënshkruar Marrëveshja për Normalizimin e Marrëdhënieve ndërmjet Kosovës dhe Serbisë, e vlerësuar historike, e parafuar nga kryeministrat e atëhershëm Hashim Thaçi e Ivica Daçiç, si dhe ndërmjetësuesja, Përfaqësuesja e Lartë e BE-së në atë kohë, baronesha Catherine Ashton.

Në 30 raundet kryeministrore, 23 takimet Thaçi-Daçiç janë pasuar me 7 raunde të tjera të kryeministrave Isa Mustafa e Aleksandar Vuçiç të qeverive të reja të zgjedhjeve 2014 në të dy vendet, që u mbajtën më parë në Serbi e pastaj në Kosovë.Bisedimet Kosovë-Serbi në nivel të lartë kanë pasuar dialogun teknik, të filluar në 8 mars 2011, poashtu në Bruksel, ku në krye të delegacionit kosovar ishte Edita Tahiri atëherë zëvendëskryeministre e më pastaj ministre e Dialogut.

Kosova të përfaqësohet nga Ekipi i Unitetit

-Presidenti Thaçi pas takimit në Bruksel kërkon themelimin e shpejtë të institucioneve dhe ekipin e unitetit/

-Thaçi pas takimit me Vuçiç: “Sot, mes Kosovës dhe Serbisë, kemi një komunikim më normal se që ka qenë më herët. Marrëveshja përfundimtare do të jetë ndihmuese për njëra-tjetrën, por edhe marrëveshja mes Kosovës dhe Serbisë nënkupton marrëveshje për paqe dhe stabilitetin për tërë rajonin e Ballkanit Perëndimor”/

BRUKSEL, 31 Gusht 2017-Gazeta DIELLI/ Presidenti i Republikës së Kosovës, Hashim Thaçi, ka marrë sot pjesë në takimin me presidentin e Serbisë, Aleksander Vuçiqin, i lehtësuar nga Përfaqësuesja e lartë e Bashkimit Evropian për politikë të jashtme dhe siguri, Federica Mogherini.

Njoftimi i sapodërguar thekson se, pas takimit, presidenti Thaçi ka thënë se ka qenë një takim korrekt, në të cilin janë diskutuar hapat e mëtutjeshëm për fillimin e një faze të dialogut mes shtetit të Kosovës dhe Serbisë, për normalizimin e plotë të marrëdhënieve dhe pajtim.

“Edhe Kosova edhe Serbia, qytetarët e dy vendeve kanë nevojë për një marrëveshje përfundimtare që u hap perspektivë të dy vendeve tona”, ka theksuar ai.Sipas tij, Kosova dhe Serbia janë dy shtete të pavarura dhe si fqinjë ekziston një domosdoshmëri për komunikim. Presidenti ka ritheksuar se kjo fazë e re e dialogut duhet të fillojë sa më shpejt që është e mundur dhe të kryhet sa më shpejt që është e mundur.

“Ne kemi besim të plotë në rolin udhëheqës të zonjës Mogherini, që duhet të ketë një unitet të qëndrueshëm të Bashkimit Evropian dhe një mbështetje të fuqishme të Shteteve të Bashkuara të Amerikës”, ka shtuar ai.

Duke folur për përmbajtjen e takimeve të ardhshme, presidenti Thaçi ka thënë se do të diskutohen tema që kanë mbetur ende të hapura, që janë të nevojshme të përmbyllen njëherë e përgjithmonë për t’i dhënë fund armiqësive njëshekullore.

“Sot, mes Kosovës dhe Serbisë, kemi një komunikim më normal se që ka qenë më herët. Marrëveshja përfundimtare do të jetë ndihmuese për njëra-tjetrën, por edhe marrëveshja mes Kosovës dhe Serbisë nënkupton marrëveshje për paqe dhe stabilitetin për tërë rajonin e Ballkanit Perëndimor”, ka thënë ai.

Presidenti Thaçi nga Brukseli ka bërë thirrje që sa më parë të krijohen institucionet e Kosovës, të dala nga zgjedhjet e 11 qershorit. “Ftoj gjithë spektrin politik që sa më shpejt të formohet Qeveria, të konstituohet dhe të funksionalizohet Kuvendi i Kosovës”, ka shtuar ai.Presidenti ka thënë se pas krijimit të institucioneve, në mënyrë sa më konsensuale të mundshme, përmes Ekipit të Unitetit, Kosova të përfaqësohet në këtë pjesë finale, përmbyllëse, historike të shtetndërtimit.

Ai ka thënë se çdo zgjidhje përfundimtare do të jetë në përputhshmëri me vullnetin e qytetarëve të Kosovës.“Për këtë arsye kam thirrur për krijimin e një baze të gjerë përfaqësuese të spektrit politik kosovar dhe të shoqërisë civile, të medieve dhe opinionbërësve”, ka shtuar ai./b.j/

Shqipëria në kohën e drogës, drogmenëve dhe demagogëve!

August 31, 2017 by dgreca

5-Ilir-levonja-2-288x300-1

Nga Ilir Levonja/Florida/ SHBA/

1) Vitin e kaluar si kjo kohë ndodhesha në Shqipëri. Dhe në një tavolinë mes miqve, diku në Tiranë. Shtrova një pyetje naïve. Vërtet, kaq shumë drogë po mbillet maleve tona?

Nuk kaloi shumë dhe një nga bashkëbiseduesit se me kë foli, a teksti diku. Dhe vërshuan sms-të. Pashë ca foto që më kujtuan fermat e kartelit të drogës në Kolumbi. Njerëz që koha jonë a demokracia jonë i kishte çuar drejt një lloj skllavërimi me ndërgjegje. Gjysmë lakuriq, me ca peshqira kokës, qeshje. Me ca kova të vogla nën ca tenda degësh të thara.

Parcela mes dushqeve a rrëpirave, ku këmba e shqiptarit civil a ushtar mund të kishte gati tridhjetë vjetë pa shkelur. Karvane të rinjsh që kishin marrë malet, jo për në Greqi. Greqia as që bëhet më fjalë. Por, ku e ku më thellë Shqipërisë, pasi tregu i kanabisit ishte më fitim prurës se ai i emigrimit jashtë shtetit. E kam përmendur shkarazi këtë fakt. Në një nga opinionet e vjetshëm. Duke e aluduar se droga mund ta çoj një vend deri në ndarje territoriale, për shkak të fuqizimit të karteleve, paralizimit të ekonomisë ose të të ardhurave të pakta, informalitetit dhe syrit mëshirues nga vendet perëndimore. Pse jo në një lloj lufte dhëmbësh e gjoja bindjesh. Siç është sot Kolumbia, një vend i madh ku kartelet nën emrin e armatave marksiste mbajnë territore të tëra, krahina, ku nuk shkel dot kurrë këmba e shtetit. Në këto territore nuk bëhet asgjë tjetër, veç prodhimit të kokainës. Dhe shance për dasime të tilla, sigurisht i kanë vendet ku klima politike është tepër e nxehtë. Ku me një sigurisht më të forte akoma, Shqipëria jonë nuk bën përjashtim.

2) Kërkush nuk ka heshtur tjetër gjatë viteve 2015, 2016 -të, për punën e kanabisit se qeveria dhe mediat e saja. Kërkush? Madje edhe kur aleatët si LSI-ja, për ndonjë qejfembetje a përplasje për post, pohonin se droga ekzistonte. Prapë qeveria ngërdheshej. Ndofta ishte një luftë e heshtur për zonat e kultivimit midis tyre. Kutadish? Vetë km-ja shikonte vëngër dhe nga lartësia e gjatësisë së tij, i aludonte atij apo asaj, sipër kokës dhe me nënqeshje se kishte marrë informata të gabuara nga Shqupi. Ata kaçatorrë ishin mushkonja, me një lloj tallje bythe me mentalitetin e kohës së babë Dullës, i cili para mikrofonave e quante Myzeqenë hambar. Kurse darkave, sallonëve të dhunës, vendin e malarjes dhe malarikëve. Ndaj gjahun e tij e çonte atyre anëve në internim. Kërkush nuk ka heshtur pra, se kjo qeveri. Kërkush tjetër? Megjithatë shqiptarët e votuan. Ndofta të bindur se droga nuk ekzistonte. Se me paratë e saj nuk u shit apo u ble ndonjë vote. Ose më e fundit, ishin edhe vetë pjesëmarrës aktiv në këtë fushatë të kanabizimit të Shqipërisë, gjatë viteve 2015, 2016-të. Dhe kjo nuk përjashtohet. Ndaj e solla shembullin e fotove. Në fund të fundit, (se e kam përsëritur shpesh) strategjitë apo platformat, nuk mund të bëhen vetëm. Duan njerëz, popull etj. Enveri përshembull nuk vrau vetëm, po me nje njerëz, me popull, në emër të popullit. Dhe ky padyshim që është një faj kolektiv. Dhe mjerë ato familje, ku ndonjë nga bijtë apo bijat, është nën efektin e drogës, ku me siguri dhuna është duke punuar me qejf. Aty nuk ka gjë tjetër, veç grindje, rrahje, sherre dhe si përfundim ndarje.

3) Sot i duhet thënë LSI-së, Monës, me që është dhe nënë e tre fëmijëve. Si edhe ideuse e programit për kultivimin shafranit etj. Po edhe si ish pjesëmarrëse në qeveri. Se është pikërisht ajo që ka shancin e madh të tregojë e para, fushatën e kanabisit. Se vitet 2015, 2016-të, do mbahen mend gjatë, për djegjen e Lazaratit me metodën e çobenëve, se vënia e zjarrit u shërben përtëritjeve të kullotave. Pra, pikërisht për këtë fushatizimin e bimëve narkotike. E ka shancin se duke qënë brenda një kabineti, mund të tregojë të vërtetën e madhe të një lloj qeverisje butaforike që tashmë është bërë rutinë për shqiptarët. Madje nga këtu mund të nisi vërtet një opozitarizëm tjetër. I cili do prishi përfundimisht këtë realitet të drogës, drogemenëve dhe demagogëve. Askush tjetër se një pjestar i shtëpisë nuk i di dertet e saj. Ndaj nëse e ka seriozisht opozitarizmin i duhet ta bëj publikisht. Këto dy vite kanë plot data e fakte dhe fotot e avionët kaçatorrë janë akoma memories së internetit. Këtë mund ta bëj edhe çdo shqiptar, kushdo që mendon se nuk ka qënë pjesëmarrës në fushatën e mbjelljes, korrjes, së kanabisit. Eshtë një problem social që sapo ka filluar, lëreni entuziazmin e Edi Ramës që, thotë se e kapi drogën. Eshtë si puna atij që pasi i vuri flakën shtëpisë, doli i bërtiste fqinjëve, ejani më ndihmoni.

Ndaj një nga aludimet më naïve, është hedhur si virus në internet. Dhe pa diskutim me yshtjen e webe pro Edi Ramës. Një lloj bah-ije habie, se, në Shqipëri nuk u mboll aq shumë drogë sa thuhej nëpër lajme. Se në Shqipëri nuk kish aq shumë kanabis, sa shtypi përreth të na cilësonte si një Kolumbi e vogël e ballkanit perëndimor etj. Se ato pamjet me avionat e vegjël ngecur dherishtave e ranishtave sa në Ishëm e Divjakë. Ato haluçinacione njerëzish nga fushat e zbrazëta të Myzeqesë ku u shkonin e uleshin papritur kaçatorrët e ajrit dhe nga ana tjetër afroheshin furtunë ca fuoristrada me thasë plasmasi të zinj, etj. Kaçatorrët e ajrit që kryeministri i cilësonte si mushkonja, Të gjitha paskan qënë zhurmë. Dhe ja fakti, konkret, që policia a shteti e bllokoi menjëherë drogën. Pra shumë shpejt. Sepse pak ishte etj.

Përkundrazi tani ka filluar. Dhe ato që policia ka kapur, nuk janë gjë tjetër veç ca koka turku të sojit armiku i klasës.

Një fakt kokëfort që Shqipëria është plotësisht në kohën e drogës, drogmenëve dhe demagogëve.