PRISHTINË, 10 Maj 2016/ Një fraksion i dalë nga Lëvizja Vetëvendosje, subjekti më i madh opozitar kosovar, iu bashkua sot Partisë Demokratike të Kosovës, më të madhes kosovare, e cila, siç paralajmëroi kryetari i ri, Kadri Veseli, do të ketë edhe ardhje të reja.Në një konferencë shtypi përkrah tij, Ajnishahe Halimi deklaroi se, “Fraksioni Plus nga sot bashkohet me Partinë Demokratike të Kosovës, do jetë pjesë e saj”. Ajo ka qenë edhe udhëheqëse e Lëvizjes Vetëvendosje në komunën e Skënderajt, ku është këshilltare e Asamblesë Komunale.Në konferencën për shtyp ishin edhe anëtarë tjerë të Fraksionit Plus, Arben Gecaj dhe Fatos Aliu. “Jemi para një akti solemn për përqafimin e PDK-së nga grupi i Fraksion +. Ky është një bashkim i konceptit të përbashkët politik i së ardhmes, nuk është bashkim i njerëzve të pakënaqur, por i atyre që dëshirojnë ta fuqizojnë vendin”, ka thënë Veseli me këtë rast.
DOSJA NR. 2199… DON DEDË MALAJ E PUSHKATUAN ME 11 MAJ
Nga Fritz RADOVANI/
KUSH E VRAU DON DEDË MALAJ ?!/
NE FOTO: DON DEDË MALAJ (1917 – 1959)/
■24 PRILL 1959 Ditë hane. Rigonte pak shi… Altoparlantët ishin hapë në të gjitha rrugët e Shkodres, per me transmetue gjyqin e “armikut të Popullit” Don Dedë Malaj.Ishim tue pritë një grup i vogel tek streha e teneqexhijve, perballë Xhamisë së Parrucës, kur u ndigjue zani i prokurorit Rrapi Mina, që hapi seancen mbas hymjes në kinema “Republika” të kriminelit Hilmi Seiti, i shoqnuem nga ambasadori jugosllav…
■Prokurori pyeti të parin Don Deden: “Që kur jeni armik i komunizmit i pandehur?”
Don Deda me zanin e Tij burrnor, po edhe pa Ju tutë syni u pergjegjë: “Unë jam anmik i komunizmit që në moshen 9 vjeçare, kur kam shkue nxanës tek Don Alfons Tracki, aty mora vesh këte emen dhe nuk kam dashtë me ia ndigjue zanin kurrma, sepse, unë jam brumosë me ato ide!”… Në një heshtje të plotë që kishte ra n’ atë rrugë të Parrucës së vjeter, krejt pranë meje, u ndigjue zani i një Burri në moshë po, që pa pikë frike tha: “Hallallë ta baftë Zoti qumështin e Nanës, se Ajo, paska rritë djalë per Shqipni!..”, dhe iku në drejtim të rrugës Zdralej. Kurrma nuk e kam pa atë Burrë Trim e as, nuk e njoha.
■Don Dedë Malaj asht le në Selcë të Vermoshit, nga prindët Keq e Lula Malaj, me daten 16 Nandor 1917, prej ku mbas pak vitesh kanë zbritë në Velipojë, e nen kujdesin e Don Alfonsit, u brumos me kulturen Europjane, dhe në vitin 1941, në Gjenacanin e Fugures së Zojës së Shkodres, bash perballë Saj u betue dhe u Shugurue Meshtar në Itali.
U këthye në Shqipni dhe ka sherbye në Velipojë, Mal të Jushit dhe së fundi, në Dajç të Bregut të Bunës, ku edhe u arrestue në vitin 1958, ato ditë kur u pushkatue Miku i Tij Don Ejëll Kovaçi, edhe Ai pse nuk pranoi me firmue “Statutin e Kishës së vitit 1951”.
■Don Dedë Malaj ishte kundershtar i vendosun i firmosjes së “Statutit të Kishës”, aqsa në letren që i pat shkrue Vatikanit, ishte vetem një pyetje: “Ipeshkvijtë e shuguruem mbas vitit 1951, a janë të aprovuem nga Vatikani?”… Tjerat “shtesa” janë jo të verteta! Letra ka shkue deri tek Don Ivo Bozhiq, po jo ma larg… Këte e ka vertetue At Konrrad Gjolaj, kur ishte në Vatikan mbas vitit 1992, dhe asht interesue per letren e Don Dedës.
■Interesimi i Sigurimit të shtetit komunist per zhdukjen e Don Dedë Malaj, ishte shumë i madh aqsa edhe perkushtimi i një grupi aq të madh, që interesohej per vrasjen e Tij.
I pari mërrijti në Dajç, oficeri i njohun Çesk Shoshi, i cili bashkpunoi me kriminelët ma të poshter të Degës së Mbrendshme të Shkodres, drejtue nga terroristi Hilmi Seiti.
E po ti rreshtojmë agjentët e sigurimit tue fillue nga Xheudet Miloti, Mustafa Qilimi, Ali Xhunga, Hamdi Ulqinaku, Dul Rrjolli e sa vrasës të tjerë, do të fillohej me u dyshue edhe Figura e Paster dhe Burrnore e Don Dedë Malaj, që asht pushkatue i Pafajshem!
■Don Deda njihej si mik dhe “bashkpuntor” i Don Kolec Prennushit, At Konrrad Gjolaj, Don Ejëll Kovaçit, të gjithë kundershtarë të firmosjes së “Statutit të Kishës Katolike të 1951”, pra meqë asnjeni nuk pranonte këputjen e lidhjeve me Vatikanin dhe Papen:
■Me daten 29 Prill 1959, Kryetari i gjyqit Mustafa Qilimi, dha vendimin per të gjithë të akuzuemit, dhe perfundimisht Don Dedë Malaj, u dënue me vdekje, me pushkatim.
***
■Don Dedë Malaj ishte fëmijë kur mbeti jetim pa Babë. Në ditët e para të Dhjetorit të 1944, brigadat partizane i patne pushkatue vllaun Nikollin, ndersa Frani, kur ishte i arrestuem Don Deda në vitin 1948, vdiq papritmas, dhe la një vajzë të vogel Dranden, që e mori nën kujdes Gjyshja e vet, pra Nana e Don Dedës, Lula. Kur Drandja ishte 7 vjeç,
Nana Lulë vdiq dhe Dranden e mori në qelë Don Deda, që në moshen 13 vjeç Drandja mbeti pa asnjë njeri të aferm… Edhe Don Deda, pritej me u pushkatue…
■Drandja e vogel 13 vjeçare do të interesohej me i “shpetue” jeten axhës së vet.
Në këte fatkeqësi kaq të madhe Drandes Ju gjetën dy Klerikë të njohun të Don Dedës, Don Marin Shkurti, ish nxanës i Don Dedës, që u pushkatue në vitin 1969, dhjetë vjet mbas Mësuesit të vet, dhe Don Pjeter Gruda, mik i Don Dedës, që edhe Ky vdiq në kampin e shfarosjes së Sarandës, i paralizuem në vitin 1989… Tre muej para lirimit.
Me ndihmen e këtyne dy Priftenëve, Drandja u nis në Tiranë me daten 1 Maji 1959, me mujtë me takue Enver Hoxhën. Kje e pamujtun, madje, as Haxhi Lleshin, kryetar’ i Kuvendit Popullor. Mujti me takue sekretaren e tij Nexhmije Hoxhën, që i takonte me kenë dora vetë. Drandja e vogel tue e kujtue veten para një “gjyshes”, ra në kurthen e asaj që populli e ka quejtë “pantera e zezë”, dhe vajza jetime me lot përfaqe i kerkoi faljen e jetës së axhës së vet, tue i shpjegue se ‘nuk kam asnjë njeri në këte Botë’. ■Nexhmia iu pergjegj: “Pse t’ ia falesh jetën atij, ai është armik i popullit. Ti nuk ke mundësi t’ interesohesh për té, mese do e mbash até?” Drandja iu pergjegj: “Até e mban burgu, s’ ka gja, veç të jenë i gjallë, aman të lutem ma ban këte nderë, se nuk kam as nanë as babë, veç këte axhë!”
■Me daten 9 Maji Drandes, i erdhi pergjegja e kobres: “Lutja yte refuzohet.”
Besoj e kujton mirë vrasësja e fëmijëve Nexhmije Hoxha, kur ka nenshkrue Vendimin: “Të pushkatohet Don Dedë Malaj…vjeç 42…Klerik Katolik Shqiptar”!
■11 MAJI 1959 Don Dedë MALAJ u pushkatue brinjë Liqenit të Shkodres, ku gropa e Varrimit u ruejt nga një Vlla Musliman, që e kishte në kopshtin e vet…
■Don Dedë MALAJ mbeti i perjetshëm me perkufizimin filozofik të komunizmit:
“E Premtja e Zezë në Shqipni ka fillue me 29 nandor 1944, dhe ka me vazhdue derisa të mbarojë komunizmi!” (Në gjyqin e Tij, në kinema “Republika” Shkoder, Prill 1959).
Melbourne, Maji 2016.
MOS E PREKNI VALBONEN- Ne natyren e paprekur eshte qendrueshmeria e botes!
Nga Ferhat Ymeri/Kent, Washington/
Kam ndjekur me shqetesim te madh shkrimet e Mehmet Elezit dhe te Dr. Islam Laukes mbi rrezikimin e Valbones…Kjo nuk guxon te ndodh! Nje: eshte nje fyerje ndaj inteligjences dhe ndaj te arriturave shkencore ne fushen e mjedisit!
Valbona eshte nje perle e Natyres (shqiptare dhe europiane). Ajo duhet te ruhet e te mbrohet per te miren e Shqiperise, te Europes e te Botes.
“In wilderness is the preservation of the world”
(“Ne natyren e paprekur eshte qendrueshmeria e botes.”)
thote Thoreau.
Ne shtetin Washington, duke respektuar dijen dhe parimet bashkekohore te shkences se mjedisit, u lirua lumi Elwha
nga prangat e dy hidrocentraleve, te cilat e kishin prangosur kete lum malor ne gjatesi prej 45 miljesh per 100 vjet, qe nga viti 1910. Projekti i rrenimit te hidrocentaleve zgjati nga shtatori i v. 2011 deri ne shtator te v. 2014. Ishte ky projekti me i madh botnor i heqjes se pendave te ndonje hidrocentrali.
Sot, “zhurma e gjeneratoreve eshte zevendesuar me kengen e lumit zaplot, duke hequr zgjedhen e nje shekulli si te mos kishte qene fare. Zgjimi i natyres eshte i dukshem gjithandej.”
” Gjera te medha mund te ndodhin kur njerezit kembengulin,” tha Mike McHenry, biolog i fisit Klallam ne rrjedhen e poshtme te lumit Elwha, i cili e nisi veprimin
per heqjen e pendes kur ende mendohej se ajo ishte nje ide e krisur.”
Por jo me.”
Tashti lumi dhe natyra jane ringjallur, duke perfshire dhe lloje te cmuara te peshkut salmon.
Vendimi per lirimin e Lumit Elwha u mor me nje akt te Kongresit te SHBA ne v.1992. “Me 83 per qind te shtratit te lumit te mbrojtur si pjese e Parkut Nacional Olympic,
eksperimenti Elhwa i cili kushtoi 325 million dollare ofroi nje mundesi unike per te filluar serish.”
“Dukej sikur i gjithe shtrati (menzi) po priste.”
Pra, te mesojme nga kjo praktike e ndritur e mendjeve te urta ne SHBA (ne Washington State), qe mos te prangoset Valbona per njeqind vjet, dhe, pastaj, pas nje shekulli
te shpenzohen me qindra miliona (ndoshta miliarda) leke
per te liruar lumin e mrekullishem Valbona nga prangat
e roberise, te paditurise e te krimit te tmerrshem qe po i
kercenohet.
Uroj qe Shqiperia, dhe mbrojtesit e mjedisit ne Europe, ne SHBA e kudo ne bote, nuk do te lejojne nje gjeme te tille,
e cila do te ishte vertet nje krim i llahtarshem jo vetem ndaj natyres shqiptare po dhe ndaj inteligjences dhe arsyes njerezore!
Ferhat Ymeri
Kent, Washington
Burimi i citimeve: artikulli :ROARING RESURGENCE
ELWHA RIVER After the removal of two dams, nature takes its course
By LINDA V. MAPES
Seattle Times environment reporter
THE SEATTLE TIMES, SUNDAY, FEBRUARY 14, 2016
( Te interesuarit mund te bejne nje udhetim virual mbi lumin Elwha: ” Take a virtual trip the the Elwha:
at sattletimes.com)
Reforma në drejtësi
* Ambasada e SHBA-së: Mbështetja unanime, e pazakontë në Shqipëri/
* Vlahutin: Ka ardhur momenti që KE në fund të vitit të japë rekomandimin për çeljen e negociatave /
Ne Foto: Ambasadori Donald Lu dhe ambasadorja e BE-së, Romana Vlahutin, dy arkitektet e marreveshjes se detyruar/
TIRANË, 9 Maj/- Ambasada e Shteteve të Bashkuara mirëpret vendimin e Komisionit të Posaçëm për Reformën në Drejtësi për të pranuar në parim draftin përfundimtar të ndryshimeve kushtetuese, të përgatitur sipas rekomanimeve të Opinionit Përfundimtar të Komisionit të Venecias.
“Mbështetja unanime për këtë vendim duhet t’i japë popullit shqiptar shpresën se tani udhëheqësit politikë janë të përkushtuar ndaj miratimit të kësaj reforme”, thuhet në një deklaratë për shtyp të ambasadës amerikane.
Ambasada e SHBA-së vlerëson se mbështetja unanime është e pazakontë në Shqipëri, ndaj dhe përgëzon Komisionin e Posaçëm për këtë hap të rëndësishëm përpara në reformën në drejtësi.
Vlahutin: Ka ardhur momenti që KE në fund të vitit të japë rekomandimin për çeljen e negociatave
Miratimi në parim i Reformës në Drejtësi nga komisioni i posaçëm duket se është pritur mjaft mirë nga ndërkombëtarët. Pas reagimit të Ambasadës Amerikane, është shprehur edhe ambasadorja e BE-së, Romana Vlahutin.
Ambasadorja e BE-së tha nga Shkodra se ka ardhur momenti që KE në fund të vitit të japë rekomandimin për çeljen e negociatave për anëtarësim në BE. “Jam e lumtur që sot u votua në parim drafti për reformën në drejtësi. Votimi është një lëvizje e mirë, por gjërat ende nuk kanë përfunduar. Vendi ka shumë punë, por kjo do të jetë pika e kthesës”, tha Romana Vlahutin….
***
NJOFTIMI I ZERI TE AMERIKES
Reforma në Drejtësi Miratohet në parim
Tiranë, 9 Maj 2016- Votë në favor edhe opozita. Palët në Komisionin e Posaçëm ranë sot dakort që t’i hapin rrugë diskutimit nen për nen. Vendimi përshëndetet nga ambasada amerikane dhe ambasadorja e BE-së
Në Shqipëri Komisioni i Posaçëm i Reformës në Drejtësi ka miratuar sot në parim projektin e ndryshimeve kushtetuese, të rishikuar nga ekspertët e Misionit amerikan të Ndihmës ligjore OPDAT dhe atij europian EURALIUS. Miratimi është bërë në unanimitet si nga përfaqësuesit e shumicës dhe nga ata të opozitës, duke i hapur rrugë diskutimeve nen për nen. Vendimi u përshëndet menjëherë si nga ambasada amerikane ashtu dhe ambasadorja e delegacionit të Bashkimit europian.
Mbledhja e sotme e Komisionit të Reformës, ishte paraprirë nga jo pak dilemma. Një natë më parë opozita duke shprehur qëndrimin e saj në favor të tekstit të rishikuar nga ekspertët e misioneve amerikane dhe europiane, OPDAT dhe EURALIUS, ishte shprehur kundër miratimit të saj në parim, si një “procedurë ekstrakushtetuese”. Megjithatë duket se situata kishte evoluar dhe palët ranë dakort gjatë që ta votonin në parim.
Pas mbledhjes nënkryetari i Komisionit demokrati Eduard Halimi e shpjegoi se “Vota jonë pro fillimit të procesit të amendamenteve, të diskutimeve nen për nen të amendamenteve Kushtetuese, nuk duhet të interpretohet, ashtu siç dhe u ra dakord në mbledhje, nuk duhet të interpretohet si një votë pro çështjeve politike, të cilat ekspertët e misionit të EURALIUS dhe OPDAT nuk i kanë marrë në trajtim”
Kryetari i Komisionit socialisti Fatmir Xhafaj e quajti votimin e sotëm në parim “një hap të mirë përpara. Me këtë votë në parim, sot i hapet rruga diskutimit nen për ne të procesit në ditët në vijim, votimit në tërësi dhe më pas shqyrtimit në seancën plenare në kuvendin e Shqipërisë”
Sipas opozitës, projekti i rishikuar ka përfshirë përmirësime të shumta, por se do të duhet të diskutohen diskutohen pikat për të cilat janë ofruar disa zgjidhje. “Janë çështje që kanë të bëjnë me institucione të reja Kushtetuese dhe me emërimet e këtyre institucioneve apo me ndërprerjen e mandateve kushtetuese, janë çështje politike për të cilat qoftë ekspertiza ndërkombëtare, qoftë Komisioni i Venecias pothuajse në të gjitha paragrafët e tij, ia adreson politikës”, deklaroi zoti Halimi.
Nga ana e tij zoti Xhafa tha se ka propozuar një kalendar intensiv punimesh për ditët në vijim: “E kemi ndarë procesin në 6 kapituj dhe kam propozuar një axhendë të ngjeshur pune anëtarëve të komisionit dhe shpresoj të ecet me këtë ritëm, me shqrtimin e cdo kapitulli hap pas hapi. Nëse ka realisht vullnet të sinqertë ne do të mund të përfundojmë në kohë të gjithë këtë proces”
Vendimi i sotëm i Komisionit u përshëndet menjëherë nga Ambasada e Shteteve të Bashkuara. “Mbështetja unanime për këtë vendim duhet t’i japë popullit shqiptar shpresën se tani udhëheqësit politikë janë të përkushtuar ndaj miratimit të kësaj reforme. Mbështetja unanime është e pazakontë në Shqipëri dhe ne e përgëzojmë Komisionin e Posaçëm për këtë hap të rëndësishëm përpara në reformën në drejtësi”, thekson deklarata e Ambasadës amerikane.
Ndërsa nga Shkodra, ambasadorja e delegacionit të Bashkimit Europian Romana Vlahutin, shprehu një entuziazëm të përmbajtur: “Është një lëvizje e mirë, por gjërat nuk kanë përfunduar deri në momentin që do të përfundojnë me të vertetë. Megjithatë, kjo është shumë e rëndësishme, sepse është krijuar tashmë momenti i duhur në mënyrë që, në fund të këtij viti, me punën që do të bëjmë së bashku, ne të krijojmë mundësinë që Komisioni Europian të japë një rekomandim pozitiv për çeljen e negociatave për Shqipërinë. Prapë, do të duhet shumë punë, sepse edhe në rast se votimi i reformës do të bëhet plotësisht , atëherë duhet të shikojmë edhe elementet e parë të zbatimit të mirë dhe të duhur të kësaj reforme. Por, sinqerisht, kjo do të jetë pika e kthimit”, u shpreh ambasadorja Vlahutin në mesazhin e saj për Ditën e Europës.
Edhe drejtuesit më të lartë të shumicës, kryeministri Edi Rama dhe kryetari i parlamentit Ilir Meta, përshëndetën vendimin e marrë duke e cilësuar si mesazhin më të mirë pikërisht në Ditën e Europës.
Marsh përkujtimor në Kumanovë, paqartësi për ngjarjen në lagjen e Trimave
Ka përfunduar e qetë dhe pa asnjë incidente marshi përkujtues për ngjarjet e 9 majit. Marshi fillojë në “Lagjen e Trimave”, ku marshuesit thane se ky përkujtim vlen për t’i zgjuar dhe vetëdijesuar shqiptarët, si dhe për t’u thënë mjaftë më skenarëve të montuara.
Edhe një vit pas përleshjes së armatosur ndërmjet forcave të policisë maqedonase dhe grupit të armatosur në Kumanovë, me ç’rast humbën jetën 8 pjesëtarë të forcave policore dhe 14 pjesëtarë të grupit të armatosur, gjërat ende mbeten të paqarta.
Shtëpitë në këtë lagje janë ndërtuar pjesërisht por banorët thonë se plagët nuk shërohen derisa mos të dalë e vërteta plotësisht në pah mbi atë se çfarë ndodhi në Kumanovë. Këshilli i familjeve nga lagja e Trimave në Kumanovë, një vjetorin e përleshjes së armatosur mes policisë dhe grupit të armatosur në këtë lagje e ka kujtuar përmes organizimit të një marshi përkujtimorë.
Shaban Demiri për Radion Evropa e Lirë thotë se marshi përkujtimor përshkon në heshtje rrugën nga lagja deri në qendër të qytetit, përkatësisht tregu ku ishin të vendosura postblloqet e forcave maqedonase të sigurisë.
“Marshi ynë sot është marsh përkujtimor, nuk është marsh protestues. Ai realizohet në heshtje në rrugët e Kumanovës. Kemi paraparë që heshtja të flas gjithçka që ne nuk mund ta themi lirisht sepse nuk kemi liri të shprehjes, nuk kemi gjykata të pavarura, nuk mund të presim gjykime të drejta por vazhdojnë proceset e montuara ….”, ka bërë të ditur për Radion e Evropa e Lirë Shaban Demiri, kryetar i Këshillit të Familjeve nga Lagja e Trimave.
Familjarët e kësaj lagjeje edhe sot kanë kërkuar që partitë politike shqiptare qoftë ajo në pushtet ose ata të cilat veprojnë në opozitë, të mos keqpërdorin ngjarjet e 9 dhe 10 Majit në Kumanovë për përfitime të politikës ditore.
“Ne nuk organizuam sot protesta por vetëm një marsh përkujtimor për t’i thënë politikës që të qëndroj larg Lagjes së trimave. Problemet zgjidhni në metoda tjera dhe në vende të tjera larg Kumanovës”, thekson Shaban Demiri, duke i bërë thirrje Bashkimit Evropian dhe SHBA-së për realizimin e një hetimi ndërkombëtar për Lagjen e Trimave dhe zbardhjen e këtij rasti deri në fund.
Ministria e Punëve të Brendshme, menjëherë pas aksionit të forcave policore në lagjen e trimeve në Kumanovë, një vit më parë, pati deklaruar se aksioni kishte të bënte me zbulimin e një grupi të madh të armatosur I cili sipas të dhënave operative të dikasterit të policisë maqedonase dyshohej se do të kryente sulme mbi institucione e Maqedonisë.
MPB tha se grupi I armatosur në Maqedoni është futur përmes rrugëve ilegale nga një vend fqinj, ndërkohë që siç është prononcuar ministrja e punëve të brendshme, në atë kohë, Gordana Jankullovska, policia ka arritur që me kohë, përkatësisht përpara se ky grup të vepronte, të gjejë vendndodhjen e tij. Sipas saj, veprimi i policisë është bërë mbi bazën e informatave për grupin dhe i cili ka bërë një rezistencë të fortë të armatosur.
Vetëm tre ditë më vonë, ministrja Jankullovska dha dorëheqje, së bashku me drejtorin e drejtorisë për Zbulim dhe Kundër Zbulim, Sasho Mijallkov.
Në shkurt të këtij viti, ndërkaq, në Gjykatën Themelore e Maqedonisë nisi procesi gjyqësor për 29 pjesëtarët e grupit të armatosur, të cilët kryesisht janë shtetas të Kosovës, me akuzën për pjesëmarrje në “organizatë terroriste“, në bazë të nenit 394, si dhe për veprën penale “terrorizëm “ të sanksionuar me kodin penal të Maqedonisë.
Por, familjarët e policëve të vrarë nuk besojnë se pjesëtarët e grupit të armatosur kanë qenë terroristë.
“Ku humbi jetën dhëndri im I cili la dy fëmijë jetim. Në një aksion për të luftuar terrorizmin? Jo këtu nuk ka terrorizëm vetëm vrasje e paguar “, thotë Sllavko Kirovski, familjar i një pjesëtari të vrarë të policisë maqedonase në ngjarjet e 9 Majit në Kumanovë.
Edhe avokatët të cilët mbrojnë të akuzuarit për rastin e Kumanovës thonë se kanë dëshmi të forta të cilët do t’i bëjnë publike gjatë gjykimit, se grupi i armatosur nuk ka të bëjë fare me terrorizëm dhe se pas aksionit të forcave policore të Maqedonisë fshihen skenarë të strukturave të shërbimeve të inteligjencës maqedonase dhe një vendi fqinj, ndërkohë që të akuzuarit janë vetëm viktima të këtij skenari. Pala mbrojtëse njëherësh ka kërkuar që rasti në fjalë t’i kalohet prokurorisë speciale publike të Maqedonisë.
Përleshja e armatosur ndërmjet forcave të policisë dhe grupit të armatosur ndodhi në kulmin e kizës politike, kur opozita maqedonase publikoi bisedat e përgjuara, që inkriminojnë zyrtarë të lartë të pushtetit në vepra të rënda penale.
