dgreca – Page 3870 – Dielli

ISMAIL KADARE NDEROHET NE KONGRESIN AMERIKAN

May 21, 2015 by dgreca

Nga Keze Kozeta Zylo-Capitol Hill, Washington DC/
Të nderosh kulturën e popullit shqiptar në zyrat e kongresit amerikan është ogur i mirë për Kombin tonë dhe kjo në saje të penës brilante të shkrimtarit Kadare./
Shkrimtari i shquar botëror, SHQIPTARI Ismail Kadare nderohet për vepren e tij në Washington DC në zyrat e kongresit amerikan në Capitol Hill.
Në nderim të veprës së tij të jashtëzakonshme u valëvit Flamuri amerikan mbi Capitol Hill.
Ndonëse shpesh herë në Washington kemi vajtur të organizuar në demonstrata në kërkim të të drejtave tona, të Pavarësisë së Kosovës, të cështjes kombëtare etj, këtë herë në muajin më të bukur të vitit, në Majin e luleve, shkuam për të marrë pjesë në ceremoninë e organizuar në nderim të veprës së Kadaresë organizuar nga gazeta e mirënjohur “Illyria” me botues z.Vehbi Bajramin dhe ligjvënësi i Kongresit amerikan Eliot Engel, miku i ngushtë i shqiptarëve. Të nderosh kulturën e popullit shqiptar është ogur i mirë për Kombin tonë dhe kjo në saje të penës brilante të shkrimtarit Kadare.
Programi në nderim të personaliteteve të shquara në zyrat e kongresit amerikan në Capitol Hill ka filluar qysh në vitin 1937 me propozim të një anëtari të Kongresit amerikan. Dhe erdhi dita që në shekullin e XXI midis shumë personaliteteve të shquara amerikane të nderohet dhe një jo amerikan siç është SHQIPTARI Ismail Kadare.
Moderimin e ceremonisë e kreu editori i gazetës Illyria” analisti i njohur z.Ruben Avxhiu. Në fillim Z.Avxhiu ka ftuar artistin Gjon Krasniqi i cili ka interpretuar dy hymnet kombëtare: amerikane dhe shqiptare.
Pas hymneve kombëtare ka përshëndetur përkthyesi i veprave të Kadaresë, prof.David Bellos profesor në universitetin e mirënjohur Princeton, Nju Xhersi.
Prof. Bellos me fjalë të zgjedhura përshkroi veprën e Ismail Kadaresë si vepër dinjitoze botërore dhe ka ditur të zbërthejë vuajtjet e popullit nën diktaturë, si dhe të një sistemi të tërë totalitar në të cilën jetoi dhe vetë shkrimtari Kadare. Përkthyesi dhe profesori Bellos tha se Kadareja është një shkrimtar i njohur në të gjithë botën dhe nëpërmjet veprave të tij nuk njihet vetëm Kadareja, por dhe vendi i tij Shqipëria. Ai renditet ndër shkrimtarët më të famshëm të botës duke filluar që nga antikiteti e deri në ditët e sotme.
Prof.Bellos me përkthimet e tij prestigjioze e ka sjellë Kadaren të njihet dhe në botën anglishtfolëse dhe të fitojë miliona lexues rreth botës.
Pas fjalës së prof.Bellos Editori i gazetës “Illyria” Avxhiu ka ftuar për të përshëndetur kongresistin amerikan Eliot Engel.
Kongresisti amerikan Eliot Engel është anëtar i lartë në zyrën e Komitetit të punëve të jashtme dhe shërben në komisionin e të drejtave të njeriut. Kongresisti Engel është gjithashtu mik i ngushtë i shqiptarëve i cili ka ndihmuar shumë në çështjen tonë kombëtare.
Kongresisti Engel ndihej i nderuar që këtë ceremoni ia kushtonte shkrimtarit të shquar botëror Kadares.
Kongresisti Eliot Engel tha se miku im personal Vehbi Bajrami më frymëzoi për ta berë të njohur veprën e shkrimtarit të shquar Kadare në dhomën e Përfaqësuesve të Kongresit Amerikan ne Washington DC dhe në nderim të shkrimtarit të valëvitej flamuri amerikan mbi Capitol Hill. Kam qenë shumë i impresionuar me veprat e Kadares që kam lexuar, vepra që e kanë bërë shkrimtarin me famë në gjithë botën. Ndërsa kongresisti Engel fliste me konsideratën më të lartë për veprën e Kadarese ndihesha krenare që bota e qytetëruar ka arritur ta vlerësojë me çmimet më të larta të nderit dhe të kutpojë shpirtin e lirë të një shkrimtari të madh që jetoi dhe krijoi nën diktaturë. Ajo kutpoi botën e një shkrimtari nën diktaturë, i cili i diktonte asaj të mësonte të vërtetën nga tempulli i i tij i letërsisë me gjuhën hyjnore artistike si psh: tek “Laokoonti” që shkruan: Më shihni tek mbytem nga gjarpërinjtë/ në muze të Luvrit në Madrid, në Nju-jork/ para syve tuaj e aparate turistësh/ qindra vjet kam që vuaj/ nga që sflas dot/ Si të flas/a mundet një nofull mermeri/ të lëvizë nje grimë, të korrigjojë diçka/ vini re sytë e mi, te zgavrat e thella/ një enigmë, si amebë të tharë atje ka/ Një të fshehtë të madhe ndrydh brenda gjoksit/ para syve tuaj, në Paris, në Madrid/ Ah, do të doja dyfish të m`i shtonit, veç sekretin e madh të shkarkoja një ditë/.
Kongresisti Engel ne emër të tij i dorëzoi botuesit të gazetës “Illyria” z.Bajrami flamurin amerikan që u valëvit krenar mbi Capitol Hill për shkrimtarin e famshëm botëror Kadare dhe një kopje të deklaratës, dhuratë për Ismail Kadarenë, që u mirëprit me duartrokitje nga miqtë dhe të ftuarit në sallë.
Z.Vehbi Bajrami i dhuroi kongresistit Eliot Engel veprën e shkruar nga Ismail Kadare “Tri këngë zie për Kosovën”.
Në këtë veprimtari morën pjesë ambasadorja e Republikës së Shqipërisë në Washington zonja Floreta Faber dhe Ambasadori i Kosovës z.Akan Ismaili.
Veprimtaria u mbulua nga Zëri i Amerikës dhe TV Alba Life, New York.

19 Maj, 2015
Capitol Hill, Washington DC

Gjuha Kosovare e Nexhmedin Spahisë…

May 21, 2015 by dgreca

Nga Fahri XHARRA*/
Diktatura komuniste me politiken e saj veçuese u perpoq ta armiqesonte popullin shqiptar me gjithe boten, kryesisht me Europen Perendimore, por nuk ia doli dot. Pas renies se komunizmit, populli shqiptar deshmoi ndaj te huajve europiane dhe amerikane po ate ndjenje miqesore te dikurshme.   Gjuha Kosovare e Nexhmedin Spahisë !  Mjaft i kishim ngacmimet , cyetjet , shemtitë tjera kur pa “pritmas” na del nëske në një “bard” i kombit që dëshiron ta bëjë historinë- lindjen e një kombi të oa qenë kurrë – Kombit Kosovar. Ide origjinale e tij ? –Jo. I mishërusr nga dikush ? – nuk e dij ,,ndoshta.
Por fatbardhësisht ideja e lindjeve të kombeve të pa qena në Ballkan , nuk pati sukses. Vdic si pa lindur . Dhe Agim Doçi shkroi :  PARALAJMERIM PER NEXHME(pa)DIN SPAHIUT!
Nexhme(pa)din!
Me librin e “ri” qe na dashke me e promovue dhe ne Qytetet e Republikes se Shqiperise, te porosis:
1.- Qe ne titull (per tu ba interesant) “Foshnjeria e kombit kosovar” mendoj qe Ti duhet te ndrrosh urgjentisht ilaçet se qenke shume semure me “pordhe çubrilloviqiane”.
2.- Ku te çon mushka?! Mos gabo me ardh ne Shtetin Ame, me promovue at liber monster pa marr leje (dozvole) nga Demir Fazlliq!…
3.- Mos me ofendo Vorret e te Pareve te mij, se ashtu si kam komponue “Marrshin e UCK-se”, ta dedikoj enkas per Ty “Marrshin Funeber”….! Shqiptaret e Kosoves jane Etnik or Nexh(pa)din Spa-thiu!
4.- Te kam respektue si Intelektual i Shquar – por po me rezulton se je kthye ne Intelektual i Shqyer!
5.- Kaq per sot! Do ta shkund e tund opinionin shqiptar te Kosoves,kundra Teje, sepse nuk e kam dijte qe ndan e copton Kombe Liridashese!
A nuk po shef se si po i keqtrajtojne shqiptaret ne Maqedoni, Kosove, Mal te Zi e gjithandej???!!!…
Na del edhe Ti me at liber qe Beogradi do te baj Qytetar Nderi – Mohues i kombit Shqiptar!
Ma shta da radish gospo(pa)din?!…  Ndësa( Prof.Dr. Eshref Ymeri) shkruan “Si është e mundur, ore Profesor Nexhmedini, që juve nuk ju bëjnë përshtypje reagimet shoviniste të Beogradit, të Moskës dhe të Athinës, sa herë që në Shqipëri dëgjohen zëra për ribashkimin e trojeve tona etnike? Vallë nuk ju shqetësuaka fakti që pikërisht shovinistët grekosllavë janë ata që u bien kambanave kundër këtyre zërave në të gjitha udhëkryqet e Evropës e deri në Organizatën e Kombeve të Bashkuara, sepse pikërisht ata vazhdojnë të mbajnë ende të kolonizuara një pjesë të mirë të trojeve tona etnike? Vallë të mos jeni i bindur ju që fqinjët tanë grekosllavë nuk e duan të bashkuar kombin shqiptar, se gjatë një periudhe mbinjëshekullore ata kanë pasur dhe vazhdojnë të kenë si pikësynim që kombi shqiptar të mos ngrihet kurrë më këmbë, por të vazhdojë të zvarritet, si deri tani? Rusisë shoviniste, për interesat e grekosllavizmit, i intereson një komb shqiptar i përçarë, varfanjak, i telendisur, i nëpërkëmbur se kështu krijohen kushtet për mpakjen ca nga ca të kombit tonë dhe zbrazjen tërësore në perspektivë të trojeve tona etnike prej elementit shqiptar. 
Ky është më i butë “Prandaj, profesor i nderuar, si shqiptar, ju këshilloj të hiqni dorë nga shpikja e “kombit kosovar” dhe potencialin tuaj intelektual t’ua kushtoni përpjekjeve për ribashkimin e trojeve tona etnike në një shtet të vetëm, me një stemë dhe me një flamur. Ju, po të dëshironi, mund të merreni me një problem të parrahur absolutisht deri tani dhe që është mjaft shqetësues për mbarë kombin shqiptar” ( Prof.Dr.:Eshref Ymeri)  
*Epoka e turpit para gjyqit- Pjesa e tretë   
Fahri Xharra,21.05.15 
Gjakovë

Nëse tradhton do të mësosh si të tradhtojnë

May 21, 2015 by dgreca

PERSONAZH/ Flet regjisorja dhe aktorja, Eliona Thomaraj: Tradhtia nuk është një trend i kohës/
-Dashuria e vërtet ekziston./
-Pluhuri i kohës nuk duhet të zverdhi forcën e dashurisë së vërtetë/
Nga Albert Z. ZHOLI/
Sot vihet në skenën e teatrit komedia e Dario Fo “RIKONSTRUKSIONI I CIFTIT” me regji të Eliona Thomaraj, skenograf Bledar Gerxaliu, dhe me interpretim të Herion Mustafaj dhe Eliona Thomaraj. Ka ditë që në të gjitha ambientet artistike diskutohet vënia në skenë e kësaj komedie, e cila është tepër aktuale. Regjisorja Thomaraj kishte kohë që mendonte për vënien në skenë të një vepre të Dario Fo dhe duke parë me vëmendje problemet aktuale sociale në Shqipëri, mendoi se kjo vepër ishte mëse e përshtatshme. Në rolin kryesor regjisorja ka zgjedhur aktorin e mirënjohur Herion Mustafaj, i cili ka kohë që qëndron jashtë skenave shqiptare.
Një komedi shumë e njohur dhe me një hapësirë shpirtërore interesante. Cili ishte synimi juaj për spektatorin shqiptar?
Kjo është një komedi brilante e Nobelistit Dario Fo “Cifti i Hapur” të cilën mendova ta risjell për spektatorin shqiptar të përshtatur si një “Reallity show”.
Si do ta cilësonit rolin tuaj?
Roli im është i një gruaje e cila pas 25 vite martese ndjen që bashkëshorti i saj nuk e dëshiron dhe për më tepër e tradhton dhe do të përligji tradhëtin e tij si një trend i kohës…. Të rikonstruktojnë çiftin. Pikërisht kjo sjell humor të hollë dhe situatë komike.
Pse pikërisht zgjodhe Erjon Mustafaj për këtë rol? Ka ndonjë specifik?
Herion Mustafaj kishte vetëm një pretendim…”MALLI PER SKENËN SHQIPËTARE” dhe interpretimi i tij përpara spektatorit ndjehej që ishte nostalgji dhe mall i dyanshëm. Publikut tonë i ka munguar gjithë këto vite Herion Mustafaraj.
Kjo vepër tingëllon aktuale në çdo kohë, apo ishte thjeshtë një dëshirë personale?
Unë si regjisore shikoj dhe kërkoj më të mirën e mundur për t’ja servirur spektatorit artdashës. Kjo është një vepër aktuale e cila u bë e mundur të vihet në skenë vetëm nga dëshira e mirë e disa miqve tanë dhe pasionit të padiskutueshëm të aktorëve….
Pra ku konsistoi vënia në skenë?
Është vënë në skenë vetëm nga dashuria e madhe për artin…
Cili është mesazhi i kësaj vepre kaq shumë të diskutuar?
Mesazhi i veprës është se dashuria e vërtet ekziston. Pluhuri i kohës nuk duhet të zverdhi forcën e saj. Nëse tradhton do të mësosh si të të tradhtojnë.
Kjo vepër ka pak personazhe, por shumë ngjarje, ku qëndron intriga?
Kjo vepër ka vetëm një çift në qendër të saj të cilët rrëfejnë se çfarë ju ka ndodhur në një moment kritik në jetën e tyre bashkëshortore.

KONCERT, NË DITËN KOMBËTARE TË JETIMËVE SHQIPTARË

May 21, 2015 by dgreca

Nga Prof. Murat Gecaj/
Mbrëmë, me rastin e 20 Majit, Ditës Kombëtare të Jetimëve, Instituti Kombëtar i Integrimit të Jetimëve Shqiptarë, organizoi koncertin-homazh, “Një mesazh për ty”, në sallën e Teatrit Kombëtar të Operas e Baletit të kryeqytetit. Të pranishëm ishin fëmijë, edukatorë e mësues, punonjës të arsimit e kulturës, personalitete të jetës politike e shoqërore, përfaqësues të bashkësive fetare, nga media e shkruar dhe ajo elektronike etj.
Ishte i pranishëm në këtë shfaqje dr. Halim Kosova, i cili krijoi për fëmijët e braktisur, në Maternitetin e Tiranës, “Djepin e engjëjve”. Gjithashtu, ishin të ftuar nderi disa autorë dhe aktorë të filmave për fëmijë. Nga ata, ndodhej Petraq Qafëzezi, skenarist i filmit “Lulëkuqet mbi mure”, i cili kishte ardhur posaçërisht nga Italia, ku jeton familjarisht
Idea dhe realizmi i shfaqjes ishin nga Ilir Çumani, me regjisor Bujar Kokonozin dhe drejtor artistik Zhani Cikon.
Pasi në ekran u shfaqën fjalët e Nënë Terezës: “Jetojmë në një botë që vuan nga uria. Jo vetëm nga uria për bukë, por nga uria për dashuri”, u dhanë montazhe nga jeta e jetimëve tanë, në institucione të ndryshme të Shqipërisë. Më tej, moderatorët Silvana Braçe e Herion Mustafaraj (aktor-fëmijë, në filmin “Beni ecën vetë”) nisën ta paraqesin programin e përgatitur, para të pranishmëve.
E para përshëndeti artistja e njohur Roza Anagnosti-Xhuxha. Në vazhdim, kënduan me radhë: Sidrit Bejleri, Juliana Pasha e Bashkim Alibali.
Pasi u dha në ekran një intervistë e vitit 2002, artistit të paharruar, Kadri Roshi, dolën para të pranishmëve në këtë shfaqje, këngëtarët: Myfarete Laze, Gëzim Nika e Manjola Nallbani. U duartrokit për paraqitjen e tij edhe grupi polifonik “Çipini”.
Gjithashtu, u pëlqyen recitimi i artistes Margarita Xhepa dhe interpretimet e Kozma Dushit e Luan Zhegut, i cili këndoi bashkë me fëmijët. U duatrokitën nxehtësisht vallja e shkathët e një grupi fëmijësh dhe artistë të tjerë, që morën pjesë në këtë koncert-homazh. Ai ishte në vazhdën e veprimtarive të përvitshme, që organizon Instituti Kombëtar i Integrimit të Jetimëve Shqiptarë, i cili drejtohet me përkushtim, nga Ilir Çumani. Prandaj të pranishmit u larguan të kënaqur dhe morën me vete emocione e mbresa të bukura.
Përmbledhurazi, mesazhi i tërë kësaj shfaqjeje ishte, për institucionet shtetërore përgjegjëse dhe mbarë shoqërinë shqiptare: “Duajini, ndihmojini dhe mbrojini fëmijët tanë jetimë!”
Me këtë rast, duhen përshëndetur e përgëzuar edhe të gjithë sponsorët, të cilët u treguan të pakursyer e bashkëpunuan, si për organizimin dhe zhvillimin e tërë kësaj veprimtarie artistike.
(Foto nga:M.Gecaj)
Tiranë, 21 maj 2015

DITA OLIMPIKE NË QYTETIN E DURRËSIT

May 21, 2015 by dgreca

Dita e premte datë 15 Maj 2015, përbën një ngjarje të bukur për jetën shkollore e sportive të fëmijëve durrsak. Buzë detit në shëtitoren “Taulantia”, QKF e Durrësit në bashkëpunim me shkollat e qytetit, zhvilloi një veprimtari të bukur të quajtur “Dita olimpike”, e cila është kurora e “Javës Olimpike” të zhvilluar në të gjitha shkollat 9-vjeçare të Qarkut të Durrësit. Është viti i katërt që durrsakët e vegjël festojnë këtë ditë të shënuar, që nuk ka të krahasuar për nga bukuria e ngjyrave, veshjeve, gjallërisë dhe çiltërsisë të shkollarëve të vegjël.
Duke biseduar me z. Avni Çuni, drejtor i QKF-së së Durrësit, mësojmë se për këtë festë të vërtetë, argëtuese e sportive, ësht menduar e planifikuar me kohë: – “Janë njoftuar e porositur të gjitha shkollat 9-vjeçare për të organizuar “Javën Olimpike”. Jemi të kënaqur që kemi gjetur gatishmëri e mirëkuptim me drejtoritë dhe mësuesit e edukimit fizik”. – Më tej vazhdon: Tashmë është formuar edhe një lloj tradite, pavarësisht se është fare e re, vetëm katër vjet, por vemë re seriozitetin e organizimit të kësaj veprimtarie nëpër të gjitha shkollat, njëkohësisht dëshirën dhe fantazinë e tyre për të gjetur forma të bukura lëvizore e sportive, aq të shëndetëshme, të pëlqyera dhe të kërkuara nga fëmijët tanë. Ne e çmojmë shumë, ndaj falënderojmë Komitetin Olimpik Shqiptar, që e nxiti dhe e shtriu këtë veprimtari edhe nëpër shkolla, pasi është me mjaft vlera të dobishme edukative, sepse fëmijët kanë nevojëtë njihen me njëri-tjetrin, të shohin se ç`bëjnë të tjerët dhe më së shumti, të duan dhe të merren me sport e ta ushtrojnë atë gjatë gjithë jetës”.
Organizatorët Arian Plaku, Çlirim Kume dhe Enid Furxhi, pjestarë të stafit të QKF-së, ishin kujdesur për gjithçka, që të realizohej mësëmiri i gjithë programi i parashikuar. Të shumtë ishin qytetarët e rastit që shijuan këtë ditë sportive me shumë gjallëri e ngjyra. Ata duartrokitën ndeshjet e volejbollit, garën me patina, nisjen e biçikletave, lojën e bukur popullore “Tërheqje litari”, që shkaktoi nxitje, brohoritje dhe të qeshura te pjesmërrësit dhe spektatorët e shumtë. Me mjaft interes u ndoq dhe u përshëndet koncerti artistike me numra aerobik të balerinave të vogla, të cilat dhuruan kënaqësi te të gjithë bashkëmoshatarët, të cilët në fund u bashkuan dhe vallëzuan të gjithë së bashku. Pa komandë e dirigjent, i gjithë sheshi u përfshi në vallëzim. U krijua një mjedis i magjishëm kënaqësie e argëtimi.
Falënderim për organizatorët dhe pjesëmarrësit, që i dhuruan Durrësit dhe dursakëve këtë festë sportive e artistike.

Përgatiti për DIELLIN:
Kadri Tarelli
Durres 19 Maj