dgreca – Page 5047 – Dielli

Përurohet “Nëna Shqiptare”, Ahmeti: Shtetet që kryen masakrën të kërkojnë falje

November 28, 2013 by dgreca

Në prani të qindra mysafirëve nga vendi dhe diaspora, është bërë sot përurimi i Qendrës Përkujtimore “Nëna Shqiptare” në Zajas të Kërçovës.

Në hapësirën prej 10 mijë metrash katrorë, ku ndodhen rreth 300 varreza të viktimave të Luftërave Ballkanike, u zbulua sot përmendorja e Nënës Shqiptare.

Kreu i BDI-së, Ali Ahmeti, nën kujdesin e të cilit është zhvilluar manifestimi, ka thënë në fjalën e tij se vepra e tillë nuk është e drejtuar kundër askujt.

“Këto vepra kapitale nuk janë bërë për të nxitur hakmarrje, nuk janë bërë që të ushqejnë urrejtje ndaj popujve, sepse popujt nuk janë fajtorë për regjimet dhe gjenocidet që janë ushtruar mbi shqiptarët, para 100 vitesh dhe pas 100 vitesh nga Luftërat Ballkanike. Por janë krerët e tyre shovinistë dhe sot është 100-vjetori i masakrave më të mëdha që janë bërë në këto hapësira”, ka deklaruar Ahmeti.

Kreu i BDI-së ka thënë më pas se shtetet që kanë kryer masakrën dhe gjenocidin ndaj shqiptarëve të këtyre viseve duhet të kërkojnë falje.

“Sot është një ditë kur shqiptarët e këtyre viseve nuk kanë mundur as një lutje t’u bëjnë të afërmëve, sepse të gjithë kanë përfunduar në gropa dhe varre masive, të cilat ne pas 100 vitesh po i zbulojmë dhe po i vendosim aty ku e kanë vendin ata. Nuk është që në kthejmë pas të shkuarën, kjo që bëjmë sot është një apel, një thirrje, që të gjithë ata popuj, të gjithë ato shtete që kanë ushtruar gjenocid, që kanë shfarosur me fshatrat të tërë shqiptarë, të kërkojnë falje, sepse ne jemi ata që duam të ndërtojmë të ardhme të sigurtë për gjeneratat që vijnë pas nesh”, ka theksuar Ahmeti.

Ahmeti ka vijuar fjalën e tij, me një mesazh drejtuar bashkëqytetarëve maqedonas, duke kërkuar nga ata më shumë reflektim, sepse siç ka shtuar, “edhe ata kanë qenë viktima të dhunës e gjenocidit”.

“Ky rast le të shërbejë edhe për qytetarët maqedonas, sepse edhe ata kanë përjetuar dhunë e vrasje dhe ato i kanë pasqyruar në libra dhe në gazeta, në të kaluarën, por të jetë ky moment reflektimi edhe për bashkëqytetarët maqedonas, sepse edhe ndaj shqiptarëve që jetojnë dhe kanë jetuar në këto hapësira, është ushtruar dhunë, gjenocid e shfarosje. Lë të jetë një moment që të shohim bashkë të ardhmen, që siguron mirëqenie, dinjitet për shqiptarët dhe për bashkëqytetarët maqedonas”, ka vijuar Ahmeti.

Manifestimi zhvillohet me rastin e 101-vjetorit të Shpalljes së Pavarësisë së Shqipërisë dhe të Ditës së Flamurit.

Në këtë aktivitet ka marrë pjesë edhe zv.kryeministri për Marrëveshjen e Ohrit, Musa Xhaferri, si dhe shumica e ministrave shqiptarë dhe e krerëve të komunave.(Kortezi:Bota Sot)

Dita e Flamurit, presidenti Nishani me Qeverine në Vlorë

November 28, 2013 by dgreca

Festimet me rastin e 101 vjetorit të pavarësisë kanë mbledhur së bashku krerët më të lartë të vendit, por pa opozitën në Vlorë. Qyteti i flamurit ka pritur presidentin Bujar Nishani, kryeparlamentarin Ilir Meta dhe kryeministrin Edi Rama.

Ceremonia zyrtare e festimeve nisi me vendosjen e kurorave me lule te varri i “Ismail Qemalit” dhe ngritjen simbolike të flamurit kuq e zi nga presidenti Bujar Nishani.

Kryetari i parlamentit, Ilir Meta, u shpreh se integrimi është sfida e së ardhmes. Ndërkohë që Kryeministri Edi Rama deklaroi se kjo dite sherben per te kujtuar te gjithe per me shume pergjegjesi qeverisese dhe per ta çuar perpara projektin e Shqiperise Europiane.

Presidenti i Shqipërisë Bujar Nishani i shoqëruar edhe prej kryebashkiakut Shpëtim Gjika kanë vizituar familjen e patriotit Osman Haxhiu.

Nderkohe në teatrin “Petro Marko eshte prezantuar projekti “Lungo Mare”, ku u shpall dhe konkursi ndërkombëtar për projektin e vijës bregdetare të qytetit të Vlorës.

Kryeministri Rama në fjalën e tij u shpreh optimist për konkursin në funksion të zhvillimit të vijës bregdetare.

“Kemi shembuj të shkëlqyer të mënyrës se si duhet të jetë vija bregdetare e një qyteti mund të transformohet në një nga burimet më të rëndësishme të zhvillimit ekonomik, por edhe të mirëqënies së atij qyteti por edhe të mbarë vendit. Kemi shembuj të shkëlqyer për të mësuar nga gabimet e të tjerëve në projektimin dhe shfytëzimin mbi bazën e projekteve të bëra të vijës bregdetare urbane që është një element shumë i brishtë pasi bashkon shumë afër pranë njëra-tjetrës natyrën dhe nevojën për zhvillim. Unë besoj se kemi edhe eksperiencën e nevojshme, gjë që u reflektua edhe në paraqitjen që bëri Adelina për të ndërtuar një konkurs që të përfshijë jo vetëm talente dhe forcën e imagjinatës të shumë arkitektëve dhe urbanistëve me famë në botë, por edhe energjinë dhe mendimin e vetë njerëzve që jetojnë realitetin ku nuk është domosdoshmërisht talenti dhe imagjinata që vjen nga jashtë që mund të garantojë sukses, por është sinergjia mes të dyjave të garanton sukses.Kemi marrë një zotim që ti japim bregdetit dhe Shqipërisë në tërësi një përmasë të re zhvillimi, por njëkohësisht ti japim këtij zhvillimi shumëllojshmëri dhe ta bëjmë këtë zhvillim në një harmoni me natyrën dhe sa më pranë standarteve që sot përcaktojnë edhe cilësinë e industrisë së turizmit në botë, por edhe në Mesdhe dhe ky konkurs dhe ky projekt janë hapi i parë në realizimin e këtij zotimi ndërkohë që ky qytet dhe vija e tij bregdetare janë më siguri një sfidë për tu fituar në funksion të transformimit të gjithë vijës së përcaktuar nga konkursi ,nga pylli i Sodës deri lart tek tyneli në një realitet të ri europian dhe urban të Shqipërisë së re turistike” tha ai.

Ai theksoi se pavarësisht dëmtimit të vijes bregdetare nga ndërtimet pa kriter, është i mundur transformimi i saj në harmoni të plotë me natyrën në funksion të turizmit. Kryeministri tha se objektivi i qeverisë mbetet realizmi i këtij projekti brenda harkut kohor të dy viteve.

“Unë jam i bindur se pavarësisht dëmeve të bëra për shkak të mungesës së eksperiencës apo për shkak të ngutjes pas një zhvillimi të paqëndrueshëm potenciali është aty. Dhe jam i bindur që çdokush që kalon në pjesën e bregdetit të Vlorës në këmbë pas pastrimeve të bëra dhe atyre që do të behen deri në fund dhe shumë shpejt, e ndihen se aty është e gjithë hapësira për të ndërtuar një nga vijat urbane më të bukura të Mesdheut në funksion të zhvillimit të qytetit, në funksion të zhvillimit të gjithë vendit dhe në funksion të thithjes së një numri jo vetëm më të madh, por edhe më cilësor të turistëve drejt Vlorës. Turistë që vijnë nga të gjitha trojet shqiptare dhe turistë të huaj që me siguri që me realizimin e këtij projekti do të jenë drejt Vlorës dhe me ecurinë e këtij projekti do të jenë shumë më të tërhequr drejt vijës bregdetare.Ne e kemi të gjithë vullnetin për ta ndërtuar projektin për të gjithë vijën bregdetare të Shqipërisë duke e filluar me vijën bregdetare të Vlorës. Unë jam i bindur se në një kohë realivisht të shkurtër besoj se duhen afro 2 vjet ne mund ta prekim me sy dhe ta jetojmë këtë realitet, këtë projekt që fillon sot. Objektivi ynë është që projekti të jetë i realizuar përpara sezonit të verës të vitit 2015 dhe unë jam ibidnur që i kemi të gjitha mundësitë ta bëjmë realitet këtë objektiv” deklaroi Rama.

E ndërsa financat nuk premtojnë shumë, Krymeministri Rama u shpreh i bindur që për projektin “Lungo Mare” qeveria do të vërë në dispozicion në kohën e duhur dhe pa vonësë edhe burimin e financimit.

“Ndërkohë më lejoni të shtoj se jemi duke u përgatitur intensivisht edhe me projekte që janë komplomentare në mënyrë që ky zhvillim të mos mbetet i izoluar, por të shtrihet në gjithë bregdetin e Jonit, të jetë një zhvillim i qëndrueshëm jo vetëm urban, por edhe ekonomik dhe social. Një numër i konsiderueshëm projektesh tani më janë të përfunduara dhe presin burimet e financimit që sigurisht është e lehtë të thuhet, por është e vështirë të bëhet, ndërkohë që unë jam i bindur që projektin që po flasim ne do të vëmë në dispozicion në kohën e duhur dhe pa vonesë edhe burimin e financimit. Sfida është që kësaj shëtitoreje ti japim përmasën e njeriut dhe që gjithë lëvizjen që sot është shumë e rënduar për shkak të makinave, ta devijojmë për të krijuar kushte që edhe lëvizja e automjetve të jetë e garantuar përmes një segmenti tjetër dhe vijaurbane të jetë në dispozicion të qytetarëve” përfunoi Rama duke ndarë me pjesmarrësit urimin për festën e Flamurit dhe atë të Çlirimit me 29 nëntor.

101 vite më parë Ismail Qemali i shoqëruar dhe nga 83 delegatë shpalli pavarësinë e vendit në qytetin e Vlorës me anë të simbolit të ngritjes së flamurit kombëtar në më 28 Nëntor të vitit 1912. Ngritja e flamurit kombëtar në Vlorë më 28 Nëntor të vitit 1912, ishte një akt historik, që i ngriti lart krenarinë dhe dinjitetin e shqiptarëve.

Opozita, homazhe në Varrezat e Dëshmorëve

November 28, 2013 by dgreca

Edhe këtë përvjetor, politika shqiptare e feston e ndarë festën e Pavarësisë dhe të Çlirimit.Ndërsa Presidenti Nishani, kryeministri Rama dhe kryeparlamentari Ilir Meta ndodhen në Vlorë për të festuar ditën e Flamurit, Partia Demokratike ka zhvilluar homazhe në Varrezat e Dëshmorëve duke kremtuar në një ditë të dyja festat.

Kreu i PD-së Lulzim Basha i shoqëruar edhe nga grupi parlamentar demokrat kanë vendosur kurora me lule në monumentin “Nënë Shqipëri” si dhe kanë zhvilluar homazhe në nderim të dëshmorëve të Atdheut.

Në fjalën e tij, kreu i PD-së Basha është shprehur se 28 Nëntori përveçse një ditë përkujtimi për dëshmorët është edhe një ditë reflektimi për vendimarrësit në mënyrë që ata të marrin vendimet e duhura.

“Në këtë ditë të shënuar të kombit tonë 28 Nëntorin ku ne festojmë ngritjen e Flamurit dhe të Pavarësisë dhe është detyrimi ynë që ta nisim këtë ditë me krenarinë e thellë para atyre mijëra e mijëra dëshmorëve dhe të rënëve që u flijuan në shekuj për ditën e madhe të pavarësisë, që u flijuan për bashkim kombëtar. Sot kujtojmë këta martirë veprën e tyre, sakrificën sublime që i shërbyen kombit për të mbetur të pavdekshëm. Kujtojmë babain e pavarësisë Ismail Qemali dhe gjithë bashkëpunëtorët e tij që 101 vjet më parë ia dolën të dështojnë projektet për asgjesimin e popullit shqiptar. Kujtojmë sakrificën e mijëra dëshmorëve të luftës që dhanë jetën për çlirimin e Shqipërisë dhe për rrugëtimin e tyre drejt lirisë dhe demokracisë. Kujtojmë bijtë e shqipes, në Kosovë, Preshevë, Maqedoni që dhanë jetën për të drejtat e shqiptarëve në trojet e tyre” theksoi Basha.

Sipas tij, sakrificat nuk mbarojmë me aktet e mëdha, ato duhet të vazhdojnë. “Për të lënë mënjanë interesat meskine, e për bashkëpunuar për interesat kombëtare. Akti i djeshëm i miratimit të rezolutës nga PD për mbështetjen e statusit, mos të mbetet një akt simbolik dhe i veçuar, uroj që ky akt të ketë ndërgjegjësuar klasën politike. Gëzuar 28 Nëntorin! “ – tha Basha.

Gjithashtu, Basha komentoi edhe aktin e djeshëm të miratimit të e rezolutës nga Partia Demoratike, për mbështetjen e saj për statusin e vendit kandidat.

“Përgjegjësitë tona nuk kanë përfunduar, do ta çojmë përpara projektin, ku destinacioni pa dyshim është Evropa. Sakrificat nuk mbarojmë me aktet e mëdha, ato duhet të vazhdojnë, për të lënë mënjanë interesat meskine, e për bashkëpunuar për interesat kombëtare. Akti i djeshëm i miratimit të rezolutës nga PD për mbështetjen e statusit, mos të mbetet një akt simbolik dhe i veçuar, uroj që ky akt të ketë ndërgjegjësuar klasën politike. Gëzuar 28 Nëntorin!” shtoi Basha.

Edhe ish-kryeministri Sali Berisha në një prononcim për mediat i ka uruar shqiptarëve marrjen e statusit të kandidatit.

“Sot është ditëlindja e 101 e Shqipërisë, festa e flamurit dhe e çlirimit të vendit, është dita ku çdo shqiptar përulet me nderimin më të madh para qindra e mijëra vajzave e djemve që flijuan vetën për pavarësinë. Është dita në të cilët ne nderojmë Ismail Bej Vlorën, etërit e pavarësisë, që në kushtet mbinjerëzore ia dolën të shpallin pavarësinë e Shqipërisë. Le të shprehim nderimin më të madh për familjet e të rënëve, t’i urojmë Shqipërisë statusin e vendit kandidat, dhe sukses të mëtejshëm në proceset e Integrimit” tha Berisha.

Ndërkohë kreu i PD-së Lulzim Basha ka zhvilluar homazhe edhe te memoriali i Komandantit legjendar Adem Jashari.

Botimi i kutjimeve te ISMAIL QEMALIT NE vitin 1968 ne KANADA

November 28, 2013 by dgreca

Nga Gëzim Llojdia*

Teki Gjonzeneli nga Tragjasi i Vlorës me banim në Kenosha SH.B.A. Ish i persekutuar i regjimit. Dhëndër i familjes Agaj,më dhuroi një vit më parë një ndër botimet e rralla. Botimi “Kujtimet e Ismail Qemalit” është një ndër 1000copët në gjuhën shqipe të publikuara për herë të parë në Toronto,Kanada. Brenda këtyre kontureve, d.m.thbrenda faqes së parë të këtij botimi gjejmë emrin e përkthyesit nga anglishtja Reshad Agaj.Faqja e dytë shfaq këto të dhëna: The Memoirs of Ismail Kemal Bey që d.m.th kujtimet e Ismail Qemalit si dhe editorin që në këtë rast është Edited by SOMMERVILLE STORY ëith a preface by WILLIAM MORTON FULLERTON Copyrights by Constable Publishers London. Permission granted for publication in the Albanian Language Jan. 9th, HARMONY PRINTING LIMITED TORONTO, CANADA

Përkthyesi R.Agaj shkruan këtë dedikim:u kushtohet dëshmoreve te atdheut dëshmoreve te flamurit a tyre që ranë ne çdo vent dhe në çdo kohe për Shqipërinë e lirë e të pa varur për flamurin e shenjte te Scanderbe Kastriotit dhe te Ismail Qemalit.

Një fillesë e çuditshme: dy poezi në faqen 5. Fryte dritë e Shqipërisë,/ nga qytet i erret,/Ti veç dermën tindhelpërisë/ E të gëzoç na të mjerët./ Ti që kur dole në jetë/, Që kur bëri nëna djalë,/ Kokën e mbajte përpietë/Edhe shpirtin zjarr e valë.

(Nga “Kalendari Kombiar” i vitit 1900) (Kushtuar Ismail Qemalit nga Poeti i ri i asaj kohe Duçe J. Baba)

Poezia e dytë që është renditur pas kësaj i përket lirik Poradeci(“Bjene Telat” — Rapsodi nga poeti Lasgush Poradeci).

Bjenë Telat ven e vinë, Po na tundin Shqipërinë/, Toskerin, Gegërinë/, Me çdo vend me çdo krahine:/ Që në Shkodër në Janinë/, Që në Vlor’ e në Prishtinë:/ Opopo ç’’fitoj Lirinë ! Opopo ç’u ngrit rrëmeti!/ Seç u tunt si vale deti:/ Posi det që vjen me valë/, Po vjen rëndë e me ngadalë/, E po ndjek Smail Qemale:/ Smail-burri i shpje në Vlorë/ Me Flamur të kuq në dorë/, Me Flamurin e Lirisë/, Mu ndë thelp të Shqipërisë/! Shqipëri moj Shqipëri/! Hidhe lark atë shami/ Që të treti në të zi /Në vajtim e robëri!

Faqja 7 :Udhëtimi i Ismail Qemalit në Siqeli:

Pietro Scaglione që përshkruan këtë udhëtim historik te Ismail Qemalit na bën një shërbim të shquar. Ne të shohim me habi dhe me dridhje te forta shpirti se vëllezërit e gjakut tone e pritnë Atin e Kombit të udhëhequr si të thuash nga një fuqi profetike se Ay një dite do t’a nxirrte Atdheun në dritë. Kjo çerdhe e mrekulluarshme e arbëresheve na del para syve në atë kohe të largët të 1903 si një qendër ku valojnë këngët e bukura të Arbëris me bandën në krye dhe ku Shoqëria Kombëtare Shqiptare cvillon aktivitetin e vet për çlirim te Atdheut. Shume interesante të vrehet se si, qysh në atë kohë Ismail Qemali sheh rrezikun e Shqipërisë nga Rusija dhe kërkon t’i hapë sytë dhe Italisëvetë duke dashur që të kuptojnë se fati ynë dhe i atyre vetë është i njëjtë andaj duhet të ndihmojmë njëri tjetrin . . .

Po kush ish ky Pietro Scaglione dhe c’ka bërë? Qe një shqiptar i flaktë nga arbëreshet e Siqelisë i cili lindi ne Plana dhe sosi ditët e tij në Shtetet e Bashkuar të Amerikës. Nuk dihet as data e lindjes as ajo e vdekjes. Ka qenë shumë i varfër dhe vetë mësoj si autodidakt i shtyre me tepër që t’i shërbej idealit tij që aqë me buçitje valonte në zemër. Në Shtetet e bashkuar nxori për disa kohe një gazete me emrin “Afrimi” dhe në 1929 e ndryshoj në “Albania”. Gjithë jetën rrojti i varfër se gjithë c’kish i prishte për botime.

Vëllimi nga është nxjerre përshkrimi i udhëtimit të Ismail Qemalit në Siqeli quhet “Historia e Shqiptareve te Italisë” dhe mban gjithashtu një perhyrje nga Lumo Skendua (Midhat Frasheri) i cili në atë kohe ndodhej ne Barcelone (8 Prill 1921). Qofte perhyrja e Midhat Frasherit qoftë parethenja e Prof. Josef Kadikame lavdërojnë veprën e këtij arbreshit te flakte Petro Scagliones. Në perhyrjen e Midhat Frasherit lexojmë midis te tjerave: “Kam dëgjuar se arbreshet, pasi dalin nga kisha, burra, gra dhe fëmijë, kthehen nga dielli — drejt asaj pike ku në kujtim të tyre janë varret e stërgjysheve — bien në gjunjë dhe këndojnë një kantike patriotike. Nuk e di në jetën t’ime gjë me të mallëngjyeshme dhe me poetikërisht sentimentale se këto lutje, që lutje ,është dhe një hov, një klithje e zemrës drejt një vendi prej të atit fati i verbër i ka ç’këputur po që gjaku nuk i le t’a harrojnë.

Reshat Agaj me punën e tij ka derdhur me një kosto jo të vogël: qindra vargje,mijëra fjalë, që janë produkt i këtij deti shpirti të pafund njëkohësisht të paanë,rrëfen kohën dhe si i përktheu kujtimet e Ismail beut.Mirëpo ky rrëfim nuk vjen në këtë botim të vitit 1968 botimi i Kanadas,por gjëndet në librin me kujtime të Reshat Agaj „Vëllai ipengut“.Kapitulli:Aksident në rrugë, përkthej kujtimet e Ismail Qemalit.Përshkrimi i R.Agaj është ky:“Një ditë nëntori te’ vitit 1965, kur isha duke shkuar në punë në Dominion Citrus, duke kaluar rrugën, një autobus më ra pas krahëve dhe më hodhi përdhe me rrëmbim. Qe një aksident i papritur, më shumë’ nga pakujdesia e shoferit të autobusit, se sa nga pakujdesia ime. Ndeshja u bë anash, se, po të më kishte rënë përpara, do më kishte shtypur në vend. Kur rashë, i goditur nga pas, instiktivisht, Zoti më mësoi të vë dorën time në balle dhe duke rënë përtokë në xhade, dora ime e majtë iu bë mbrojtje kokës, që u përplas mbi të në tokë. Qe një tronditje e madhe, po nuk pësova asnjë dem, qoftë në kockë, qoftë në ndonjë anë tjetër të trupit. Po nga rënia me fuqi, u trondita shume sa hë për hë m’u muarën mendtë dhe pejzat e dorës në të mbërthyer, aty ku ngjitet krahu me shpatullën, u shembën. Kisha dhimbje shumë të forta e s’mund ta lëvizja dorën fare. Doktori me tha se këto dhimbje vijnë nga këputja e disa pejzave, që kanë lidhje me krahun e shpatullën e kështu shkaktojnë shumë dhimbje, të cilat do t’i kisha për shumë kohe. Doktori më dha leje të gjatë dhe më rekomandoi kura elektrike të krahut dhe ilaçe kundër dhimbjes. Meqenëse dorën fillova ta lëvizja pake dhe pas dy javëve nuk me dhimbte si me parë, mendova të përktheja kujtimet e Ismail Qemal Vlorës, që kisha lexuar më parë dhe ndodheshin në bibliotekën e Torontos. Fillova nga përkthimi, duke mos patur dhe aq besim në veten time, nëse do ia dilja mbanë punës, ashtu si duhej. Faqet e para të përkthimit ua lexova për mendim dhe këshilla dy shokëve të mi, Viktor Emanolit dhe Zija Boricit, të vetmit që kisha e që mund të më jepnin një gjykim mbi punën time. Me entuziazmin e tyre, ata më ngrohën dhe mund të them se përfundimisht më nxiten t’i futesha me vendosmëri kësaj pune. Kështu iu vura punës, se kohë kisha plot dhe brenda katër muajve e mbarova përkthimin e tërë kësaj vepre. Më duhet të shtoj se tërë shpenzimet e botimit u vunë nga Nysret Bejkomalaj, i cili më tha të nisja botimin se harxhet do t’i kisha nga ai. Nysreti mori tërë paratë që mblodhëm nga shitja e mese dyqind copëve dhe te tjerat që ai ka shitur me vone. Ato cope libra që mbeten, gati 750-800, ia nisa Nysretit ne Ottava, që t’i mbante atje, në rast se do të shiteshin me vonë, ose në qoftëse do të hapen Shqipëria e Kosova a kushedi ndonjë rast tjetër. Librat janë atje edhe sot. Nga falënderimet që pata me rastin e punës time letrare, e para në jetë, ishte kënaqësia që më dha recensioni i të ndjerit Prof. Nexhat Peshkëpia në gazetën e Komitetit “Shqipëria e Lire”, i cili midis të tjerave shkroi: ” Bravo! T ë lumtë Reshat! Puna jote është e bekuar”. Në një letër tjetër, qe mora nga Mbreti Leka i pare nga Spanja, midis të tjerave, ai me shkruante: ” Me punën dhe me mundimin tënd na ke zbardhur faqen dhe na ke nderuar përpara te huajve”. Si duket atyre te Ministrisë se Jashtme në Londër u kishte ardhur shumë mirë, se Ismail Beu kishte qenë miku i tyre i ngushtë dhe kujtimet e tij na mbeten neve vetëm në sajë të interesimit të veçantë të anglezëve e veçanërisht të Ëilliam Morton Fullerton, një amerikan dhe nga anglezi Sommerville Story, që shkroi e redaktoi kujtimet në anglisht dhe bëri punën më të madhe.

Në parathënien e botimit William Morton FULLERTON thotë kështu po sjellim vec një faqe :Duke paraqitur “Kujtimet” e Ismail Kemal Beut me ane te kësaj hyrjes t’ime dhe me ane te pake shënimeve te pa nevojshme, por le të shpresojmë jo absolutisht të pa vlerë, unë nuk bëj gjë tjetër veçse mbaj një premtim solemn që i bëra gatë muajve që në kaluam së bashku në Paris në 1917 dhe 1918. Qe natyrisht një gjë e thjeshtë për Ismail Kemal Bejne që të më kërkonte mua një premtim të tillë. Në të vërtetën ky libër kujtimesh nuk do qe shkruar fare po të mos kish qenë këmbëngulja ime e pa prerë. Për më tepër shumë i zënë drejt për drejt me punët e luftës dhe cvillimin e saj që t’i ofrojshe mikut t’im bashkëpunimin e përhershme që kërkonte dhe që në fakt kishte nevojë- unë prapë së prapë qeshë në gjendje që t’i jepsha ndihmën e domosdoshme që rasa lypte. Këto “Kujtime” në fakt janë edituar nga Sommerville Story dhe është detyra e të dy palëve që të mos lënë asnjë dyshim se çdo të thotë në ketë rasë “Botimi” në fjalë. Dalja e këtij libri në dritë qe një pune e vështirë. Gjatë prodhimit të kësaj lande Ismail Kemal Beut i ranë mi shpatulla halle personale shpesh here të renda dhe halle të tjera më të rënda në lidhje me problemet patriotike të lidhur me të ardhmen e Atdheut Shqiptar. Ay nuk i dha, dhe pa dyshim nuk mundte t’i dedikonte kësaj pune, tërë kohën e tij. Gëzimet dhe enthusiazmi që nuk i kish të përhershme, mungesat e tij plot ankth për punë të tjera më të rëndësishme, edhe methodat e tij që nuk qenë të vazhdueshme kur i binte rasa të rikthehesh në detyrën e mbledhjes së këtyre kujtimeve, e bë ri punën e redaktimit një barrë shumë të rëndë, për suksesin e veprës të cilën Z. Story e kish marrë përsipër. Me gjithë këtë pa ndihmën e veçante qe Z. Story dha pre ketë vepre këto kujtime kurrë nuk do të kishin dalë në dritë.

PERFUNDOI ODISEJA E TE BURGOSUREVE TE DRENOVES, KAPET I SHTATI

November 28, 2013 by dgreca

Ka marre fund arratia e 7 te burgosurve nga burgu i Drenoves. Pas 5 ditesh kerkimesh intensive ne kufirin shqiptaro- grek eshte bere e mundur gjate dites se sotme edhe arrestimi i dy te arratisurve te fundit nga burgu i Drenoves,Eduard Lulo dhe Reiz Haxhiraj, ndersa naten e mbremshme u be edhe arrestimi i Gezim Tomes.

Arrestimi i tre te arratisurve te fundit u be ne territorin grek nga policia e ketij shteti, e cila prej ditesh ishte mobilizuar per kapjen e tyre, pas dyshimeve qe policia shqiptare shfaqi se ata mund te kishin kaluar kufirin.

Kane qene 5 dite te veshtira jo vetem per tre te burgosurit, por edhe per policine shqiptare edhe ate greke,kjo per shkak se teperaturat e uleta dhe reshjete e debores kane qene te pranishme pergjate gjithe ketyre diteve.

Arrestimi i Reiz Haxhirajt, Eduard Lulos dhe Gezim Tomes eshte bere ne token greke ne malet e Kosturit vetem 25 km larg nga kufiri me Shqiperine. Njeri prej tyre tashme ka mbetur i plagosur per shkak se gjate arrestimit te Gezim Tomes naten e mbremshme ka patur nje shkembim zjarri nga ku Toma mbeti i plagosur, ndersa dy te tjeret munden te largoheshin per tu kapur me pas ne oret e para te mengjesit te sotem.

Eduard Lulo dhe Reiz Haxhiraj nuk i kane rezistuar policise greke mengjesin e sotem, gjithashtu nuk kane qene as te armatosur.Tre te arrestuarit jane dreguar ne komisariatin e Kosturit dhe mbetet per tu pare nese do te ekstradohen menjehere ne Shqiperi apo do te gjykohen per faktin qe kane shtene ndaj policise greke naten e mbremshme.