Sociale – Page 71 – Dielli

PESE KERKESAT E ISH TE PERNDJEKURVE POLITIKE

May 31, 2014 by dgreca

Ish të përndjekurit politikë të futur në grevë urie për shkak të mashtrimit nga qeveria, i drejtojnë kësaj të fundit të pranojë dhe realizojë pesë kërkesa të tyre. Ata kërkojnë një seancë plenare në të cilën Kuvendi të dënojë aktivitetin e diktatorit Enver Hoxha, mbi bazën e konventës mbi torturën, largimin nga e shkuara komuniste dhe të dënohen krimet, gjetja e eshtrave e 4500 qytetarëve të vrarë nga regjimi, ndërtimin e një varreze kombëtare në Tiranë për të pushkatuarit e diktaturës, ngritjen e një muzeumi kombëtar në Tiranë për ata që u martirizuan për fjalën e lirë dhe paqen si dhe ndalimin e botimeve të historisë së diktaturës në median televizive. Provokimi i shqiptarëve me portretet e diktatorit Enver Hoxha dhe nderimet publike të tij të bëra nga mazhoranca e majtë qeverisëse në ceremoninë përkujtimore për 70-vjetorin e Kongresit të Përmetit ka ngjallur reagimin e ish-të përndjekurve politikë. Nga Konferenca Kombëtare “Krimi komunist i padënuar ende”, njëzëri ata kërkuan që klasa politike të distancohet nga diktatura komuniste dhe reminishencat e saj. Ish-të përndjekurit politikë theksuan se ceremonia përkujtimore për 70-vjetorin e Kongresit të Përmetit dhe shfaqja e fotove të ish-diktatorit Enver Hoxha në takimin ku morën pjesë kryetari i Kuvendit dhe deputetë të tjerë të mazhorancës janë rikthimi në të kaluarën më të errët të Shqipërisë. Gjithashtu ata janë shprehur të indinjuar edhe për debatin e zhvilluar mbi enverizmin dhe simbolet e komunizmit gjatë seancës së ditës së enjte parlamentare. Mustafa Lici, kryetar i Partisë Mendimi i Djathtë Liberal, forcë politike e cila ishte pjesë e koalicionit të majtë në zgjedhjet e 23 qershorit dënoi ashpër qëndrimin e mbajtur nga Rama e Meta në Kuvend. Ata kërkuan mbajtjen e një seance me debat në Parlament për krimet e bëra nga diktatori Hoxha, si dhe dënimin e tyre në bazë të rezolutës së miratuar nga Parlamenti shqiptar. Kështu ditën e shtunë shqiptarët u provokuan sërish me portretin e diktatorit dhe nderimet publike të tij. E majta është përkujdesur në detaje për organizimin e një aktiviteti me rastin e 70-vjetorit të Kongresit të Përmetit. Aktiviteti është organizuar në kujdesin e strukturave të Partisë Socialiste, Lëvizjes Socialiste për Integrim si dhe Bashkisë së majtë të Përmetit. Nëpër rrugët e qytetit, si rrallë ndonjëherë kalonin disa grupe njerëzish që ishin përgatitur për të pritur Ilir Metën, Gramoz Ruçin. Ata mbanin në duar portretin e diktatorit si dhe pankarta me mbishkrimet “Partia Komuniste e Shqipërisë”, “Lavdi PPSH”, “Rroftë PPSH”, ndërsa brohorisnin në kor: “Rroftë Partia Komuniste”. As Meta, as Ruçi dhe asnjë nga deputetët e majtë nuk u distancua nga kjo pritje aspak normale për një vend anëtar të NATO-s dhe që aspiron të marrë statusin e vendit kandidat. Ndërkohë, mes njerëzve që shoqëronin Metën dhe Ruçin kishte edhe fëmijë që mbanin në duar fotot e diktatorit. Pas ecjes në rrugët e qytetit të Përmetit, aktiviteti është zhvendosur në ambientet e brendshme të godinës, ku u mbajt Kongresi i Përmetit. Në sallë veteranët brohorisnin në kor Partinë Komuniste dhe Enver Hoxhën, përfaqësuesit e majtë me në krye Metën dhe Ruçin duatrokisnin.

Kërkesat

– Një seancë plenare në të cilën Kuvendi të dënojë aktivitetin e diktatorit Enver Hoxha, mbi bazën e konventës mbi torturën
– Largimi nga e shkuara komuniste dhe të dënohen krimet
– Gjetja e eshtrave e 4500 qytetarëve të vrarë nga regjimi
– Ndërtimi e një varreze kombëtare në Tiranë për të pushkatuarit e diktaturës
– Ngritjen e një muzeumi kombëtar në Tiranë për ata që u martirizuan për fjalën e lirë dhe paqen
– Ndalimin e botimeve të historisë së diktaturës në median televizive

Ish e përndjekura, 70 vjeç i bashkohet grevës

Tendës të grevës së urisë së ish-të përndjekurve i është bashkuar ditën e djeshme një tjetër protestuese. Ajo është Turbullira Jakup Shalsi, 70 vjeç. Grupi i ish-të përndjekurve në ditën e tretë të grevës së urisë janë shprehur se janë të vendosur t’i shkojnë deri në fund kauzës së tyre. Ata janë vendosur përpara Parlamentit dhe në afërsi të Institutit të të Përndjekurve Politikë. Ndërkohë që Fatmir Hoxha, organizatori i grevës së urisë së ish-të përndjekurve u shpreh se janë të vendosur për ta çuar deri në fund grevën e urisë. “Nuk i shkëputemi grevës deri në vdekje. Ta marrë vesh politika shqiptare jemi të vendosur burra dhe gra deri në vdekje, të dënohet krimineli Enver Hoxha”, u shpreh ai. 15 ish-të përndjekurit që janë vendosur me çadra përpara Parlamentit dhe në afërsi të selisë së tyre hynë në grevë urie me 5 kërkesa drejtuar qeverisë. Pavarësisht se kur ishte në opozitë kryetari i Partisë Socialiste, Edi Rama ishte zotuar se do t’i kthente dinjitetin moral dhe material shtresës së ish-të përndjekurve politikë, një pjesë e tyre sot janë në grevë urie, sepse ndihen të mashtruar nga Kryeministri, qeveria e të cilit u hoqi fëmijët nga puna dhe jo vetëm nuk po dënohet figura e Enver Hoxhës, përkundrazi ai dhe simbolet e komunizmit po adhurohen dhe nderohen nga mazhoranca e majtë.

Ish Aleatët e Ramës kërkojnë largimin e tij

Vetë aleatët e Ramës kërkojnë largimin e tij si Kryeministër i vendit. Kështu të tjerë të përndjekur politikë do të nisin protesta përpara Parlamentit, pas provokimeve të të majtëve me nderimet kundrejt figurës së Enver Hoxhës. Partia e Mendimit Liberal të Shkodrës, e cila për zgjedhjet e 23 qershorit bëri aleancë me Kryeministrin Rama shprehet e penduar që i ka besuar premtimit të Ramës përtej së majtës dhe së djathtës. Ata e kanë akuzuar Ramën se së bashku me Ilir Metën duan të instalojnë sërish simbolet e diktaturës. Kryetari i Partisë Mendimi Liberal i Shkodrës, Mustafa Lici, në një intervistë televizive thekson se kjo parti ka dalë nga koalicioni pasi Rama ka shkelur marrëveshjen dhe së bashku me kreun e LSI kërkon ringritjen e bustit të Enver Hoxhës, ringritjen e diktatorëve të mëparshëm, që të gjithë të përndjekurit politikë i kanë vuajtur në kurriz. “Kur një njeri nuk të respekton marrëveshjen nuk ke çfarë bën më me të. Qe një gabim i pafalshëm. 13 mandate janë partitë politike, një nga ato parti që kam kontribuar për të marrë mandate jam edhe unë. Ky person shkeli marrëveshjen me ne, sepse e kompletoi Ilir Meta, e kompletoi një njeri, i cili po kërkon ringritjet e bustit të Enver Hoxhës, ringritjet e diktatorëve të mëparshëm që ne e kemi vuajtur në kurriz”, u shpreh ai. (Kortezi: Dorina Tile)

Alarmi vjen nga Dielli:Toka në prag të një stuhie të madhe!?

May 22, 2014 by dgreca

Dielli mund të shkaktojë stuhi të fuqishme në Tokë që do të sillnin ndërprerjen e furnizimit me energji elektrike dhe çorjentimin e sistemit satelitor, GPS.
Ndërkohë që Dielli është pothuaje në kulmin e ciklit të tij 11 vjeçar të shpërthimeve, shkencëtarët thonë se stuhi të forta mund të vijnë në Tokë. Shpërthimet duken si njolla diellore. Shkencëtarët si Michael Wiltberger në Observatorin e Lartësive të Mëdha në Qendrën Kombëtare të Kërkimeve Armosferike në Boulder të Kolorados i emërtojnë ato CME, ose shpërthime masive të koronës, raporton Zëri i Amerikës. “Vëzhgimi i ciklit diellor është shumë i hershëm. Kur Galileoja e drejtoi teleskopin e tij nga Dielli, ai pa njolla në sipërfaqe. Shkencëtarët kanë mbajtur shënime për njollat e konstatuara që nga ajo kohë. Pra ne kemi të dhëna prej rreth 200 vjetësh për njollat diellore”.
Wiltberger po ndërton modele kompjuterike për të ndjekur ciklin e Diellit që do të shërbejnë për të parashikuar më mirë kohën e keqe në hapësirë. Ai thotë se stuhia më e fortë gjeomagnetike diellore goditi tokën në vitin 1859. Astronomi Richard Carrington e vëzhgoi dhe la shënime për këtë në librin e të dhënave, shkruan noa.al.
Fenomeni Carrington prishi sistemin telegrafik të komunikimit. Megjithëse jo aq të fuqishme sa ajo e vitit 1859, stuhi të tjera diellore kanë shkaktuar ndërprerjen e energjisë elektrike, linjat telefonike, kanë prishur shërbimet satelitore dhe kanë bllokuar valët e radios. Tokës i ka kaluar cikli i një tjetër stuhie si ajo Carrington, vihet në dukje në raportin e ri të Lloydit të Londrës, tregu më i vjetër i sigurimeve në botë. Bashkëautori i studimit, Neil Smith, thotë se stuhia tjetër mund të jetë edhe më shkatërrimtare, duke patur parasysh varësinë e botës tek rrjeti shpërndarës i energjisë elektrike.
“Ne llogarisim se nga 20 milionë deri në 40 milionë njerëz mund të mbeten pa energji deri në një vit apo edhe dy. Kjo ka të bëjë me zëvendësimin e transformatorëve që janë element kritik i rrjetit. Ky numër njerëzisht ka koston e vet ekonomike prej 0.6 trilion në 2.6 trilionë dollarë”.

20 MAJI… PER JU JETIMë…

May 20, 2014 by dgreca

Nga Fritz RADOVANI/
Nanë Tereza thshe:
■Fëmijët janë dhurata ma e bukur e Zotit.
Çdo fëmij ka të drejtë të vijë në këtë Botë pamvarsisht dëshirës sonë.
■Në shtëpinë tonë jetonte një fëmijë shumë i thatë, që nuk hante asgja.
Ishte i dëshpruem sëpse ato ditë i kishte vdekë Nana. Kërkova një murgeshë që i përgjante Nanës së tij dhe e porosita murgeshën që të mos bante tjetër vetëm të luente me voglushin. Mbas pak kohe ky fëmij u qetësue dhe filloi jetën normale.
■Jam e bindun se tortura ma e madhe kundër njeriut asht ndjenja e braktisjes.
■Mendo: Se, Krijuesi i Gjithësisë ka krijue kohë për ne, për krijesat e tij të vogëla.
Ka vetem nje Zot dhe Ai asht Zot tek të gjithë. Asht e rendësishme të kuptohet se gjithësejcili shihet si i barabartë perpara Zotit.
Gjithmonë kam thanë se ne duhet të ndihmojmë një Hindu të bahet Hindu ma i mirë, një Mysliman të bahet Mysliman ma i mirë, një Katolik, të bahet katolik ma i mirë.
***
■Shqiptarët sot duhet të krenohen per Figuren Botnore të Nanë Terezës, e cila në qendren e Shpirtit Saj, kishte të ruejtun dashunin dhe sakrificen per jetimët e gjithë Botës…
■Per një fakt jam shumë i sigurtë se, Jetimët, as nuk mendojnë, as nuk andrrojnë, as nuk e dishrojnë dhe, as nuk punojnë kurrë, dhe asnjëherë, gjithë jeten e vet që nga veprat e tyne Bota që i rrethon me pasë të pakten edhe një jetim ma shumë se ka!
■Nga zemra Ua uroj atyne fatzezëve që kanë këte emen, që e ardhmja të mos iu randojnë sado pak ndergjegjen e tyne me pamundsinë me i sherbye familjes e shoqnisë, me evitue në çdo kohë mundsinë me shtue edhe një jetim ma shumë në çdo vend ku i ka shpernda jeta.
■Me shumë dashuni, u uroj Jetimëve Diten e Tyne… 20 Maji 2014 !

Melbourne, 20 Maji 2014.

Shpërndahet kësti i parë për 106 ish- të përndjekurit politikë

May 14, 2014 by dgreca

Nga Zina Tosku-Ministri i Mirëqënies Sociale dhe Rinisë Erion Veliaj , në një takim të organizuar ditën e mërkurë, në ambjentet e Ministrisë, ndau për 106 ish të përndjekurit politik, këstin për të gjithë për ata që nuk kanë marrë asgjë për 23 vjet.
“Më vjen mirë që kam firmosur 106 urdhër pagesat për transhin e dytë për ata që marin këstin e tyre këtë vit. Bëhet fjalë për një shoqeri që po i kthen borxhin disa njerëzve që kanë punuar pa pagesë, njerëz që janë torturuar”., u shpreh ai.
Veliaj ndër të tjera ka përmendur dhe debatin në parlament lidhur me këtë çështje. “Në debatin që patëm në parlamënt, ne nuk bejmë asgjë për shoë politik. Po të shikoni ekipin tim, bëhet fjalë për njerëz që janë vetë të përnjdekur, jo si ata që kanë qënë sekretar partie, apo që kanë kaluar të bëjnë hamendime për të përndjekurit”, u shpreh Veliaj.
Gjatë fjalës së tij, Ministri i Mirëqënies Sociale dhe Rinisë, Veliaj u ndal dhe në çështjen e buxhetit. “Jemi të ndjeshëm ndaj atyre që kanë qënë vet në burgjet komuniste, ndaj ne po ndryshojmë ligjin. Duke filluar nga 20 maj, do të botojmë propozimet tona për ligjin, që ata që janë mbi 70 vjeç të marrin prioritet, që të mund të marrin këstin”, tha Veliaj.
Ministri kërkoi mirëkuptimin ish të përndjekurve politikë, sepse pa marë këstin e parë disa ish të përndjekur, të tjerët nuk mund të marrin këstin e dytë apo tretë. Përveç 106 dosjeve që ne paguajmë sot, nesër do të botojmë në gazeta dhe 40 të tjerë”, tha Veliaj.

Bukurite Shqiptare-Shëngjini, bukuria detare e veriut tonë

May 13, 2014 by dgreca

Nga Nikolla Lena /-Rripi i gjërë i rërës së pastër, nga njëra anë kufizohet me detin dhe nga ana tjetër me pyllin e rrallë me pisha e drurë te tjerë. Një rrip i ngushtë rëre me bimësi, ndan ujrat e cekta bregdetare me lagunat.
Në plazhin e Shëngjinit dhe të Kunes, pushuesit gjejnë hotele, restorante e mjedise të tjera, të ngritura në përshtatje me kushtet dhe traditat e zonës, por edhe shtëpi tradicionale, me kopshte dhe lulishte të bukura. Kudo ofrohet kuzhina tradicionale, por edhe ajo e huaj, sipas shijes e kerkeses. Mbizoterojnë prodhimet e detit, shpendët e egër dhe mishi i zgarës. E, mbi te gjitha, shërbimi i standarteve bashkekohore.
Shëngjini si nyje e rëndësishme transporti, që nga kohët e lashta, ka pritur e percjellë shumë udhëtar e vizitorë, vendas dhe të huaj. Ndërsa turizmi masiv u zhvillua vetëm në fillim të viteve ‘60 të shek.XX, kur filluan ndërtimet në plazhin e Shëngjinit, i cili kishte kushte dhe mundësi për të pritur një numër të madh pushuesish.
Shëngjini, për vetë kushtet që ka, ofron si të veçantë edhe gjuetinë në rezerva të posaçme, si dhe peshkimin me natyrë sportive, por edhe për biznes, kryesisht në det, si dhe në ujrat e lagunave të Kënallës, Kunës, Merxhanit e Vain.
Shoqata e Gjuetarëve të Lezhës ka krijuar mardhënie të rregullta me shoqata gjuetarësh të vendeve fqinje, të cilët frekuentojnë gjithnjë e më shpesh Shëngjinin, gjë që tregon se kjo formë e turizmit është një mundësi tjetër për zhvillimin e kësaj zone me tradita në këtë fushë.Në Shëngjin vihet për diellin, për detin e rërën, për bukuritë e rralla, që natyra u ka dhuruar banorëve mikpritës e të shoqërueshëm.
Turizmi: Një qytet afër Lezhes, Shëngjini, 8 km në Veriperëndim, në bregun e Adriatikut. Jul Cezari, në veprën “Lufta Civile” e përmend emrin e këtij limani si Nymfeum në vitin 48 para Krishtit. Këtu erdhi Flota e Mark Antonit në fushatën e Cezarit kundër Pompeut. Emri Nymfeun lidhet me çetën e nymfave apo të zanave. Nymfeuni, është njohur në epokën romake, si një liman shumë i mbrojtur “Tutisimuss portus”. Në mesjetë ky liman njihet me emra të tjerë, quhet limani Meduo. Në një hartë të shek.XIII të Pjetër Viskontit njihet madje edhe me emrin Medea. Gjate mesjetës përmendet ky liman si “Portus”, “Medue”, “Porto di Medea”. Etimologjia e ketij emri ka mbetur ende pa u sqaruar. Sipas A.Majerit termi Medua, lidhet me emrin antik të qytetit Medeon – Meduni i sotem, në bregun dalmat.
Emri i Medeas është lidhur edhe me emrin e fshatit Mjedë. Gjithsesi ky toponim mbart një jehonë mitologjike të stërlashtë. Kurse Shëngjin është një kalk i emrit të shënjtorit Shën Gjin, ose i shënjtorit Shën Gjon Pagëzorit, që shkurtimisht ka dhënë fjalën Shëngjin. Pra, një simbiozë mendësishë mitologjike dhe fetare deri në kohën e sotme.

Limani i Shëngjinit ka qenë në të gjithë kohërat limani detar i Lezhës. Kjo lidhje nuk është zhdukur asnjëherë dhe në ditët tona është përjetuar një rol i ri i Shëngjinit, lidhur edhe me rrugët e lidhjes së Shqipërisë me Kosovën.
Limani i Shëngjinit është më i rëndësishmi liman detar në Veri të Durrësit.Rëndësia e Limanit të Shëngjinit u shtua mjaft vetëm pas vitit 1880, kur Ulqini, ky qytet shqipëtar ju dorëzua padrejtësisht Malit të Zi, në zbatim të vendimeve të Kongresit të Berlinit.
Plazhi i Shëngjinit përbën një nga resurset më të veçanta turistike detare, jo vetëm të Lezhës por edhe të Shqipërisë, sidomos duke patur parasysh parkun ekologjik të rrethinës.
Plazhi i Shëngjinit mbetet si plazhi më i përshtatshëm për zonat veriore të vendit duke përfshirë dhe Kosovën. Ndodhet në distance të afërta me qytetet Lezhë, Shkodër, Laç dhe me Tiranën.
Infrastruktura rrugore dhe ajo e shërbimit hotelerik është mjaftë komode dhe bashkëkohore