Behlul Jashari – Page 216 – Dielli

Kosovë -Ambasada e SHBA-ve përkrahë dialogun politik

October 20, 2015 by dgreca

The Embassy of the United States in Kosovo strongly supports President Jahjaga’s attempts to foster political dialogue/
Nga Behlul Jashari/ PRISHTINË, 20 Tetor 2015/ Ambasada e SHBA-ve në Kosovë fuqimisht përkrahë përpjekjet e Presidentes së Republikës, Atifete Jahjaga, për të kultivuar dialogun politik mes partive politike të përfaqësuara në Kuvendin e Kosovës. “Kuvendi është institucioni më i rëndësishëm i Kosovës dhe funksioni i tij është jetik për demokracinë, përparimin, dhe sigurinë e Kosovës”, shprehet Ambasada e SHBA-ve.
Thekson se, “vetëm një Kuvend që funksionon mund të debatojë dhe miratojë masat që nevojiten për të përmirësuar jetën e qytetarëve të Kosovës dhe për të siguruar që Kosova vazhdon rrugëtimin e saj drejt integrimit Euro-Atlantik”.
“U bëjmë thirrje gjitha partive që të heqin dorë nga çfarëdo kërcënimi me dhunë që është edhe i paligjshëm edhe i papërputhshëm me një shtet modern demokratik”. Përfundon komunikata dërguar nga Ambasada e SHBA në Kosovë.
Presidentja e Republikës së Kosovës, Atifete Jahjaga, priti dje e sot në takime të ndara liderët e pozitës e opozitës, përfshirë delegacion të Listës Srpska dhe komunietetet tjera pakicë, në kuadër të “nismës për tejkalimin e gjendjes së krijuar në vend”.

October 20, 2015/

The Embassy of the United States in Kosovo strongly supports President Jahjaga’s attempts to foster political dialogue/
The Embassy of the United States in Kosovo strongly supports President Jahjaga’s attempts to foster political dialogue among the political parties represented in Kosovo’s Assembly. The Parliament is Kosovo’s most important institution and its function is vital to Kosovo’s democracy, prosperity, and security. Only a functioning Assembly can debate and approve the measures needed to improve the lives of Kosovo’s citizens and ensure that Kosovo continues on its path towards Euro-Atlantic integration. We call on all parties to renounce any threats of violence, which are both illegal and not compatible with a modern democratic state.
– Foto arkiv i Gazetes Dielli: 21 gusht 2015 Presidentja e Republikës së Kosovës, Atifete Jahjaga, priti në takim ambasadorin e ri të SHBA-së në Kosovë, Greg Delawie, i cili i dorëzoi letrat kredenciale.
—

Kosovë, mediat mbështetje anëtarësimit në UNESCO

October 19, 2015 by dgreca

-Në 21 tetor, Bordi Ekzekutiv i UNESCO-s do të votojë për kërkesën e anëtarësimit të Kosovës në këtë agjenci të OKB, ndërsa në fillim të nëntorit pritet që Asambleja e Përgjithshme e saj të votojë anëtarësimin përfundimtar/
Nga Behlul Jashari/ PRISHTINË, 19 Tetor 2015/ Mbi tridhjetë medie të shkruara, elektronike dhe online të Kosovës i kanë dërguar një letër drejtoreshës së përgjithshme të Organizatës së Kombeve të Bashkuara për Arsimin, Shkencën dhe Kulturën (UNESCO), Irina Bokova, në mbështetje të kërkesës së Republikës së Kosovës për anëtarësim në këtë agjenci të specializuar të Kombeve të Bashkuara.
Letrën e kanë nënshkruar pronarë, kryeredaktorë apo gazetarë të të gjitha komuniteteve që jetojnë në Kosovë.
“Kjo mbështetje e rëndësishme e komunitetit mediatik vjen pas angazhimit të një sërë institucionesh dhe personaliteteve me famë botërore të cilët i janë bashkuar aspiratës së shtetit kosovar për anëtarësim në UNESCO”, thekson MPJ e Kosovës.
“Ne vazhdimisht e vëzhgojmë punën e qeverive tona dhe jemi zëri kryesor kritik ndaj tyre kur ato dështojnë të japin rezultatet e duhura – qoftë në luftë kundër korrupsionit, reformën e sistemeve të kujdesit shëndetësor dhe arsimit, apo në rritjen ekonomike… Që Kosova vërtetë të ketë sukses në përpjekjet e saj për të ndërtuar një shoqëri të fortë, demokratike dhe të hapur, me respekt të plotë për liritë individuale dhe të drejtat e njeriut, përfshirë lirinë e patjetërsueshme të shprehjes, ne na duhen mundësi të barabarta. Dhënia e mundësive dhe praktikave më të mira ndërkombëtare për të rinjtë tanë në arsim, shkencë dhe kulturë mund të jetë e dobishme për të gjithë. Kjo është arsyeja pse ne sot ju nxisim që të mbështetni kërkesën e Kosovës për anëtarësim në UNESCO”, thuhet në letrëm e mediave.
Sopranoja Inva Mula, këngëtarja Rita Ora dhe shkencëtari Ferid Murad janë vetëm disa nga figurat eminente globale që kanë shkruar kolumne ku kanë ftuar mbarë komunitetin ndërkombëtar për të përkrahur aderimin e Kosovës në organizatën gjegjëse të Kombeve të Bashkuara.
Më 21 tetor, Bordi Ekzekutiv i UNESCO-s do të votojë për kërkesën e anëtarësimit të Kosovës në këtë agjenci të OKB, ndërsa në fillim të nëntorit pritet që Asambleja e Përgjithshme e saj të votojë anëtarësimin përfundimtar. Një javë më parë, Bordi Ekzekutiv ka aprovuar axhendën përfundimtare, ku është përfshirë edhe anëtarësimi i Kosovës në organizatë, pikë kjo e bashkësponsorizuar nga 47 shtete anëtarë të UNESCO-s.
Në 12 shtator zv/ministri i Jashtëm kosovar, Petrit Selimi, në një konferencë të jashtëzakonshme shtypi bënte të ditur se Kosova bëri hapin e parë drej anëtarësimit në UNESCO.
“Kërkesa për plikim është dorëzuar nga Shqipëria dhe është nënshkruar nga 44 shtete anëtare të UNESCO-s që përbën një numër rekord të bashkësponsoruesëve në historinë e re të UNESCO-s”, dekaronte zv/ministi i Jashtëm kosovar.
Ai bënte të ditur se Kosova ka aplikuar për anëtarësim në UNESCO gjatë verës përmes Nju Jorkut, sipas rekomandimeve nga vet agjencia gjegjëse e Kombeve të Bashkuara. “OKB në Nju Jork ka autorizuar UNESCO-n me mekanizmat e saj t’i prijë procesit në mënyrë të pavarur”, shtonte Selimi.

Kosovë-Heqja e barrikadës nga Ura e Mitrovicës

October 19, 2015 by dgreca

-Zbatimi i Marrëveshjes për heqjen e barrikadës nga ura e Mitrovicës/
-Tahiri: BE dhe Grupi Punues do të monitorojnë rregullisht së bashku me dy kryetarët e komunave gjendjen politike dhe sigurisë gjatë procesit të revitalizimit/
Nga Behlul Jashari/ PRISHTINË, 19 Tetor 2015/ Marrëveshja e Brukselit për heqjen e barrikadës dhe revitalizimin e urës së Ibrit ka nis zbatimin më 17 tetor 2015. Bashkimi Evropian përkatësisht Zyra e BE-së në Kosovë që është kompetent për zbatimin e kësaj marrëveshje ka nisur punimet e revitalizimit të urës e cila do të zgjasë deri në qershor të vitit tjetër kur ura e Mitrovicës do të hapet për lëvizje të plotë të lirë, për këmbësor dhe automjete.
Më këtë rast ministrja për Dialog dhe kryenegociatore e dialogut teknik në Bruksel, Edita Tahiri, ka vlerësuar lartë nismën e zbatimit të kësaj marrëveshjeje duke theksuar rëndësinë e saj politike dhe të sigurisë për Kosovën.
Ajo ka thënë se, “më 17 tetor 2015 ka nisur zyrtarisht heqja e barrikadës nga Ura e Mitrovicës, e cila pas një periudhe të gjatë të negociatave në Bruksel më në fund ka marrë rrugën e mbarë për të krijuar lëvizjen e plotë të lirë në Urën e Ibrit”.
Ministrja Edita Tahiri ka theksuar se kjo është një ngjarje shumë e rëndësishme për vendin, sepse heqja e barrikadës nga ana e Bashkimit Evropian i jep fund ndarjes së Mitrovicës, dhe kjo urë prej një ure ndarëse po bëhet urë bashkimi për Mitrovicën dhe Kosovën.
“Në kohën kur e fituam lirinë në 1999, mbase asnjëri nuk e kishte besuar se do të duheshin 15 vjet për ta bashkuar Mitrovicën, dhe nuk është se kanë munguar përpjekjet e qeverive të kaluara për ta realizuar këtë qëllim, mirëpo munguan rezultatet, shkaqet e të cilave të gjithë i dimë. Prandaj, fal dialogut të Brukselit, qëllimi jonë u arrit, në frymë dialogu dhe në mënyrë paqësore. Tani e tutje Ura e Ibrit do të jetë si çdo urë tjetër në botë, një sinonim i bashkimit. Nuk do të ndjejmë më dhimbje kur përmendet ura e Ibrit por do të ndjejmë gëzim dhe liri ashtu siç e ndjejmë lirinë që e fituam pas një shekulli lufte e sakrificash të mëdha kombëtare”, ka thënë ministrja Tahiri, cituar në deklaratën e dërguar.
Tahiri ka vlerësuar se heqja e barrikadës dhe revitalizimi i urës do të sjellin stabilitet politik dhe siguri për të gjithë qytetarët, gjë e cila u dëshmua edhe me nismën e punimeve në këtë urë. Natyrisht, kërkohet një mirëkuptim dhe durim që punimet të përfundojnë me sukses dhe në qershor të vitit 2016, që të përjetojmë një fund për atë që nuk e deshëm dhe një fillim për atë që duam.
Ministrja Tahiri po ashtu ka folur edhe për hapat tjerë drejtë bashkimit të qytetit të Mitrovicës. Ajo ka thënë se, “qeveria e Kosovës po punon për të konsoliduar bashkëpunimin mes dy komunave të Mitrovicës dhe në periudhën vijuese do të krijohet edhe Bordi i përbashkët për menaxhimin e çështjeve lokale, bord ky i paraparë me Planin e Ahtisaarit”.
Në lidhje me vijën administrative mes dy komunave, ministrja Tahiri theksoi se vija administrative mes Mitrovicës Jugore dhe Mitrovicës Veriore është e përcaktuar me ligjet e Kosovës dhe Planin e Ahtisaarit dhe kjo vijë është mbi lumin Ibër në pjesën veriore të saj. Ministria e Ambientit dhe Planifikimit Hapësinor është kompetente për të përcaktuar zonat kadastrale të fshatrave Suhadoll dhe Kroi i Vitakut, sipas hartave të caktuara nga Plani i Ahtisaarit, dhe ky proces po zhvillohet në bashkëpunim me kryetarët e dy komunave, për të cilën do të bëhet edhe një Memorandum mirëkuptimi. Ajo po ashtu ka thënë se, “qeveria e Kosovës siguron qytetarët e fshatrave Suhadoll dhe Kroi i Vitakut se do të respektohen ligjet e Kosovës në lidhje me vijën administrative mes dy komunave dhe se nuk ka vend për shqetësime në këto çështje”.
“Proceset e shtetndërtimit në një vend siç është Kosova me një histori lufte të rëndë dhe shkatërruese, po tregohen jo të lehta, por me një angazhim siç po e bëjmë si institucione shtetërore dhe partneritet me aleatët tanë ndërkombëtarë SHBA-të dhe BE-në, Kosova po dëshmon fuqinë e saj për të përballuar çdo sfidë drejt vizionit për t’u bërë një shtet euroatlantik”, shprehet Tahiri.
Ajo thekson heqjen e barrikadës (“parkut të paqes”) nga ura e lumit Ibër në Mitrovicë nga ana e BE-së.
“Revitalizimi i Urës realizohet dhe financohet nga BE-ja, sipas një plani të dakorduar simetrik në të dyja anët e lumit Ibër. Ura do të hapet për automjete dhe këmbësor jo më larg se fundi i qershorit 2016”, thotë Tahiri.
Po ashtu, vijon ajo, kjo marrëveshje i jep fund ndërtimeve të egra dhe pretendimeve serbe për të ndryshuar strukturën etnike në fshatrat e Suhadollit dhe Kroit të Vitakut, duke i dhënë mbështetje Memorandumit të Mirëkuptimit mbi Planin e Zhvillimit Komunal mes Ministrisë së Ambientit e Planifikimit Hapësinor dhe dy kryetarëve të komunave të Mitrovicës, në pajtim me hartat e linjave administrative të zonave kadastrale të të dyja fshatrave, të përcaktuara me ligjet e Republikës së Kosovës.
“BE dhe Grupi Punues do të monitorojnë rregullisht së bashku me dy kryetarët e komunave gjendjen politike dhe sigurisë gjatë procesit të revitalizimit”, përfundon deklarata.
Në 15 shtator 2011 bëhej e ditur se, “në Mitrovicë natën e kaluar serbët kanë barrikaduar edhe urën kryesore mes veriut dhe jugut, mbi lumin Ibër, ku është ndërprerë trafiku i automjeteve, ndërsa sot kalojnë vetëm këmbësorët”.
Është raportuar edhe se, në 18 qershor 2014, “herët në mëngjes, serbët larguan barrikadën në anën veriore të urës mbi lumin Ibër, tre vjet pas vendosjes, e më pas po nga ajo anë e po aty vendosën në mesditë ‘Parkun e paqes’ prej fidanësh të mbjellur në vazo betoni, çka shkaktoi reagime në jug kundër rimbylljes së urës për lëvizjen e lirë me barrikadën e re në një formë tjetër”.

Kosovë-Jahjaga fton spektrin politik parlamentar për dialog

October 19, 2015 by dgreca

-Deklaratë e Presidentes së Republikës së Kosovës/
-Në pritje të takimeve të Presidentes me drejtuesit politikë, mbledhja e Kryesisë së Kuvendit të Republikës së Kosovës, e paraparë për sot, është shtyrë për ditën e martë/
-AAK, një nga tre partitë opozitare, do mbajë konferencë për shtyp/
Nga Behlul Jashari/ PRISHTINË, 19 Tetor 2015/ Presidentja e Kosovës, Atifete Jahjaga, në një konferencë shtypi sot deklaroi se, pas konsultimeve me krerët e institucioneve, me Kryeministrin dhe Kryetarin e Kuvendit për t’i njoftuar me vendimin tim, ftoj për dialog politik partitë politike parlamentare në përpjekje për të tejkaluar gjendjen e krijuar në vend.
“Veprimet e dhunshme dhe diskursi si në institucione dhe jashtë tyre të ditëve të fundit janë të papranueshme dhe rrezikojnë të lëndojnë konsensusin demokratik në Republikën e Kosovës”, theksoi ajo.
Mandati im si Presidente e vendit, vijoi Jahjaga, është të garantoj funksionimin demokratik të institucioneve dhe të shërbej si faktor uniteti, dhe mbi këtë bazë e ftoj spektrin politik parlamentar të Kosovës që të pranojnë këtë ftesë për dialog për mospajtimet në këto javët e fundit.
“Tashmë ftesat subjekteve politike si të koalicionit qeveritar ashtu edhe partive opozitare u janë dërguar, fillimisht për takime të ndara në zyrën time, dhe përfundimisht – në mirëbesim – në tryezë të përbashkët”, tha Presdientja e Republikës.
Shpresoj, vijoi Jahjaga, që kjo iniciative e imja të ndihmojë që shqetësimet t’i adresojmë me pjekuri politike dhe duke dëshmuar angazhimin tonë që të jetësojmë përkushtimin tonë për një demokraci parlamentare që fuqizon institucionet, forcon besimin e qytetarëve në perspektiven e vendit të tyre dhe krijon pajtimin bazik për rrugën tonë përpara.
“I thërras partitë politike dhe përfaqësuesit e tyre t’i përgjigjen ftesës dhe të tregojnë vullnet që bashkërisht të gjejmë gjuhë të përbashkët për daljen nga kjo gjendje”, theksoi ajo.
Presidentja Jahjaga u shpreh se, tash më shumë se kurrë është momenti t’ua dëshmojmë të gjithë qytetarëve që na e kanë besuar udhëheqjen e këtij shteti se dëshira e tyre për të jetuar në paqe, të kenë një ardhmëri të sigurt për ta e për brezat e ardhshëm nuk është premtim që zbehet përballë sfidës së parë, por udhërrëfyes, obligim, besë e dhënë se dallimet tona, të çfarëdo natyre, i tejkalojmë në tryezë, duke biseduar, duke gjetur zgjidhje bashkërisht dhe duke marrë përgjegjësi për to.
“Përgatitjet për seancën plenare” janë sot në axhendën e mbledhjes së Kryesisë së Kuvendit të Republikës së Kosovës me kryetarët e grupeve parlamentare.
Kosova po vazhdon të humb në kohë me Kuvendin e saj, i cili në legjislacionin e kaluar ishte 7 muaj jofunksional, 1 muaj para e 6 muaj pas zgjedhjeve parlamentare parakohëshme të 8 qershorit, derisa u mblodh në seancën konstituive shumë të vonuar në 8 dhjetor 2014.
Para më shumë se një muaji, raportimi i qeverisë së Kosovës lidhur me katër marrëveshjet e arritura në Bruksel më 25 gusht 2015 ishte në axhendë në seancat e para të sesionit vjeshtor në 17 e 22 shtator. Në seancën e parë nuk ishin të pranishëm raportuesit dhe koalicioni qeverisës kërkoi shtyrje, ndërsa në të dytën që u shpall e mbyllur pas disa ndërprerjeve e pa u zhvilluar pati edhe gjuajtje vezësh nga opozita drejt kryeministrit sapo ai nisi raportimin.
Kuvendi i Kosovës pa asnjë seancë të përfunduar në sesionin vjeshtor, i bllokuar nga opozita, është mbledhur në një seancë tjetër në 15 tetor të ftuar nga Kryesia me shefat e grupeve parlamentare, në mbledhjen me vetëm përfaqësuesit e subjekteve politike të koalicionit qeverisës, përballur edhe me bojkotin opozitar.
Por, që në fillim deputetët e opozitës bllokuan me “rrethim” të foltorës dhe kryesuesit, e pastaj, për të dytën herë, si edhe një javë më parë, hodhën gaz lotsjellës dhe seanca e Kuvendit të Kosovës u ndërpre.
Derisa ndodhnin zhvillimet në seancën parlamentare dhe pas ndërprerjes së saj, në shesh para ndërtesës së Kuvendit të Kosovës kishte grumbullime për protestë të aktivistëve të opozitës e qytetarëve tjerë.
“Aksionet simbolike” të opozitës, me “rrethime” të foltores e kryesuesëve, fërshëllima, gjuajtje vezësh e gazi lotësjellës në sallën e seancave të Kuvendit, janë pjesë e kundërshtimeve, edhe me protesta në rrugë dhe me një peticion me rreth 200 mijë nënshkrime deri tani, të 4 marrëveshjeve të 25 gushtit me Serbinë dhe marrëveshjes së demarkacionit me Malin e Zi.
“Protesta jonë në Kuvend nuk do të ndalet dhe nuk do të lejojmë normalizimin e ‘Zajednicës’ dhe faljen e tokave të Kosovës Malit të Zi”, ka paralajmëruar opozita në deklaratën e përbashkët të tre partive, LVV, AAK e Nisma.
Opozita shprehet me fjalën serbe “Zajednica” që do të thotë “Bashkësi” dhe nënkupton Bashkësinë/Asociacionin e komunave me shumicë sebe në Kosovë.
Në mbledhjen e sotme të Kryesisë me shefat e grupeve parlamentare, sipas njoftimeve zyrtare nga Kuvendi, “do të diskutohet për vazhdimin e seancës plenare, të ndërprerë në 15 tetor si pasojë e hedhjes së gazit lotsjellës”. Opozita vazhdon të bojkotojë mbledhjet e Kryesisë së Kuvendit dhe komisionet parlamentare, ndërsa kërkon të mos thirren seanca plenare, ku shkon vetëm për t’i bllokuar.
“Kërkojmë nga Kryesia e Kuvendit që të mos thërras më seancë plenare. Çfarëdo insistimi në këtë drejtim është provokim dhe përshkallëzim i situates në Republikën e Kosovës”, ka theksuar opozita në një deklaratë.
Organizata të shoqërisë civile në Kosovë në një deklaratë kanë shprehur opinionin se, “thirrja e seancave plenare pa ndryshim të qëndrimeve dhe rrethanave politike, nuk i shërben daljes nga situata e krijuar politike”, ndërsa theksojnë se “gjuha e dialogut politik është forma e vetme e zgjidhjes së problemeve politike”.
“Po ashtu, ne kërkojmë që në këtë proces të përfshihet edhe Presidentja e vendit si garante e funksionimit kushtetues të institucioneve”, përfundohet në deklaratën e organizatave të shoqërisë civile. Ndërkohë, u njoftua nga Presidenca kosovare se, “Presidentja e Republikës së Kosovës, Atifete Jahjaga mban sot konferencë për media”.
SHTYHET PËR NESËR MBLEDHJA E KRYESISË SË KUVENDIT, NË PRITJE TË TAKIMEVE TË PRESIDENTES ME DREJTUESIT POLITIKË
Ndërkohë, mbledhja e Kryesisë së Kuvendit të Republikës së Kosovës, e paraparë për sot, është shtyrë për ditën e martë, në orën 11:00.
Kryetari i Kuvendit, Kadri Veseli, para fillimit të mbledhjes, i njoftoi nënkryetarët e Kuvendit dhe kryetarët e grupeve parlamentare me iniciativën e presidentes së vendit për takime me drejtuesit institucionalë dhe politikë, lidhur me zhvillimet e fundit politike në Kosovë. Në pritje të zhvillimit të këtyre takimeve, kryetari Veseli propozoi që mbledhja të shtyhet për ditën e nesërme. Propozimi u përkrah njëzëri nga Kryesia.
Kreu i Kuvendit bëri të ditur po ashtu se gjatë kësaj jave do të mbahet mbledhja plenare, e ndërprerë javën e kaluar.

FTESA E PRESIDENTES PARTIVE, AAK KONFERENCË SHTYPI

Pas njoftimit për ftesën e Presidentes, sapo bëhet e ditur nga AAK, partia e dytë opozitare, se do mbajë konferencë për shtyp sot në orën 13:30 në selinë qendrore në Prishtinë. Ende nuk ka ndonjë njoftim nga dy subjektet tjera politike të opozitës së bashkuar, LVV dhe Nisma.

Kosova, shpronësime edhe për Rilindjen

October 18, 2015 by dgreca

-Buxheti i Shtetit të Kosovës në vitin 2016, për shpronësimet 27 milionë euro/
-Shpronësim edhe Pallatit Rilindja. Dhe në pritje të ridaljes së gazetës tradicionale të Kosovës Rilindja, të privatizuar/
-Gazeta Rilindja në Kosovë ka nisë të dalë para 70 viteve si gazeta Dielli në SHBA para 106 viteve – në muajin shkurt/
-Ministri Hoti në konferencë shtypi: Qeveria e Kosovës po punon në rritjen e transparencës dhe menaxhimin efikas të parasë publike/
Nga Behlul Jashari/ PRISHTINË, 18 Tetor 2015/ Qeveria e Kosovës në Buxhetin e Shtetit për vitin 2016 pret të ketë 27 milionë euro për shpronësimet, që kryesisht i dedikohen trasesë së autostradës nga Prishtina në Han të Elezit-kufiri me Maqedoninë drejt Shkupit, bëri të ditur ministri i Financave, Avdullah Hoti, i pyetur nga korrespondenti i gazetes Dielli në Prishtinë në një konferencë për shtyp.
“Ne këtë vit kemi pasur 27 milionë euro për shpronësime. Edhe vitin e arshshëm i kemi 27 milionë euro, kryesisht janë të lidhura me shpronësimet e ndërtimit të autostradës për në Shkup dhe me kontrata nëpër ministri të ndryshme për rrugë, shkolla dhe projekteve tjera publike”, theksoi ai.

Në një mbledhje të qeverisë muajin e kaluar, ministri i Financave, Hoti, ka informuar për situatën në buxhetin e planifikuar për shpronësimet për interes publik, i cili për këtë vit është shpenzuar dhe, siç u theksua, “vendimet e ardhshme duhet të vlerësohen dhe shqyrtohen me vëmendje”.
Në 23 majin e vitit 2014, pjesë e vendimeve të qeverisë ishte edhe vendimi përfundimtar i shpronësimit për interes publik të ngastrave kadastrale në të cilën ndodhen objektet e Ndërmarrjes Shoqërore Rilindja, e në këtë kuadër Pallati Rilindja tash ndërtesë qeveritare.
“Sa i përket shpronësimit të Pallatit të Rilindjes është çështje e dakordimit të veprimit me Agjencinë Kosovare të Privatizimit, sepse në atë rast ne paguajme vetëm 20 përqindëshin që u takon punëtorëve”, tha ministri i Financave, Avdullah Hoti, i pyetur nga korrespondenti, duke shtuar se nuk kishte edhe detaje të tjera.
Pas shpronësimit dhe në kuadër të procesit të ligjshëm të privatizimit pritet e kërkohet edhe ridalja e gazetës së përditëshme tradicionale të Kosovës Rilindja, e cila ka nisë të dalë në Prizren para 70 vitesh, në 12 shkurt 1945. Në shkurt si edhe gazeta Dielli në SHBA, gazeta me e vjetër shqiptare ne botë, e cila nisi të dalë para106 viteve – nga 15 shkurti 1909.
Gazeta tradicionale e Kosovës Rilindja, e cila ka filluar të dalë në frymën e Konferencës së Bujanit e me anagzhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur para 13 vitesh me dëbim të kundërligjshëm e të padrejtë nga Pallati i saj në Prishtinë nga administrata e UNMIK në 21 shkurt 2002. Pas kësaj date gazeta Rilindja ka dalë me numra protestues të jashtëzakonshëm, të kohëpaskohshëm.
Gazeta Rilindja, kronikë e zhvillimeve historike të Kosovës, pasi doli me botime speciale edhe për ngjarjen historike të shpalljes së pavarësisë dhe njohjet ndërkombëtare që pasuan, ka përmbyllë daljet e mëse 40 numrave protestues në 30 dhjetor 2008, me numrin e festës së Vitit të Ri 2009, me paralajmërimin në ballinë: Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë.
Në konferencën e sotme për shtyp, ministri Avdullah Hoti theksoi se, qeveria e Kosovës po punon në rritjen e transparencës dhe menaxhimin efikas të parasë publike.

HARTOHET PROJEKTLIGJI PËR PLOTËSIMIN DHE NDRYSHIMIN E LIGJIT PËR PROKURIMIN PUBLIK TË REPUBLIKËS SË KOSOVËS

Ministri Hoti bëri të ditur se, Ministria Financave, së bashku me të gjithë akterët relevantë, ka hartuar Projektligjin për plotësimin dhe ndryshimin e Ligjit për Prokurimin Publik të Republikës së Kosovës.
“Projektligji për plotësimin dhe ndryshimin e Ligjit për Prokurimin Publik avancon prokurimin publik, duke e bërë procesin më efikas përmes freskimit të procedurave ekzistuese dhe inkuadrimit të mekanizmave dhe procedurave të reja. Këto modifikime janë bazuar në nevojat e identifikuara gjatë zbatimit të ligjit ekzistues, si dhe në legjislacionin përkatës të Bashkësisë Evropiane”, theksoi ai.
Ndryshimet që do t’i sjell ky Projektligj, vijoi Hoti, do të ndikojnë në rritjen e efikasitetit, transparencës, cilësisë së punëve dhe materiale që prokurohen, në shmangien e procedurave të komplikuara dhe në shtimin e vlerës së parasë.
“Krahasuar me ligjin aktual, Projektligji rregullon më në detaje prokurimin në fushën e sigurimit dhe mbrojtjes, duke siguruar që vetëm për mallrat që janë specifike mund të evitohen procedurat e prokurimit standard, dhe kjo në përputhje me praktikat më të mira ndërkombëtare. Dhe gjithashtu mundëson ndarjen e kontratave publike në llote homogjene dhe heterogjene, me qëllim të përfshirjes së ndërmarrjeve të vogla dhe të mesme në tregun kombëtar të prokurimit publik”, ka thënë ministri Hoti.
Ministri i Financave, Hoti gjithashtu bëri të ditur se në bazë të vlerësimeve të Ministrisë së Financave implementimi i këtij Projektligji nuk do të sjell kosto shtesë financiare për institucionet e zbatimit të ligjit. “Përkundrazi, do të krijojë kursime”, shtoi ai.

PERFORMANCË E JASHTËZAKONSHME E TË HYRAVE TATIMORE

Në konferencën për shtyp, ministri Avdullah Hoti prezantoi gjithashtu të hyrat dhe shpenzimet e qeverisë për periudhën Janar – Shtator 2015. “Ka pasur një performancë të jashtëzakonshme të të hyrave tatimore, në mesatare kemi një rritje prej 7.8% të të hyrave, prej të cilave 11.1 % ka rritje të të hyrave në Administratën Tatimore të Kosovës (ATK) dhe 7.3% ka rritje të të hyrave në Dogana. Në një situatë ku ekonomia e Kosovës po rritet me një normë mesatare rreth 3%, pra kemi trefish më shumë të hyra se sa rritja nominale vjetore e aktivitetit ekonomik në vend, që është shenjë e luftimit të informalitetit dhe rritje së ekonomisë formale”, theksoi ai.
“Po vazhdojmë me disiplinimin e kursimeve, si rezultat kemi pas kursime prej 4.8% në shpenzimet për mallra dhe shërbime, në kategoritë e tjera shpenzimet po shkojnë sipas trendit dhe ne besojmë se do ta përmbyllim vitin ashtu siç e kemi planifikuar me rishikimin e Buxhetit në muajin korrik”, u shpreh në konferencën për shtyp ministri Hoti.