Kosovë-Serbi, Dialogu vazhdon

June 29, 2015 by dgreca

Kosova dhe Serbia vazhdojnë dialogun në Bruksel për temat e 23 qershorit/

Nga Behlul JASHARI/ Kosova dhe Serbia vazhdojnë dialogun për të njëjtat tema si në 23 qershor edhe sot në Bruksel, në raundin e 27-të në nivel të lartë kryeministror, të nisur në mëngjes, të dytin brenda një jave, në procesin drejt normalizimit të marrëdhënieve, të kryesuar nga BE e mbështetur nga SHBA.

Ndërmjetësuesja, shefja e diplomacisë evropiane, Frederica Mogherini, fillimisht takoi veçantë delegacionin kosovar, e pastaj elegacionin serb, para takimit të përbashkët trilateral, i cili sapo ka filluar.

Shefja e Politikës së Jashtme të Bashkimit Evropian, Federica Mogherini, ka thënë se bisedimet midis kryeministrave të Kosovës dhe Serbisë, Isa Mustafa dhe Aleksandar Vuçiç, janë përqendruar në çështjet e pazgjidhura midis palëve, si: energjia, telekomi, krijimi i Asociacionit të Komunave Serbe në veri të Kosovës dhe liria e lëvizjes.

“Përparim i mirë është bërë në të gjitha çështjet. Ekipet tona do të vazhdojnë të punojnë për këto katër çështje në orët e ardhshme dhe ne do të mblidhemi shumë shpejt, në ditët e ardhshme, për të finalizuar marrëveshjet”, ka thënë Mogherini përmes një deklarate për media, pas raundit të 26-të.

Ajo po ashtu ka bërë të ditur se Memorandumi i Mirëkuptimit për njohjen e ndërsjellë të sigurimeve të makinave është nënshkruar në prag të takimit.

Ne Bruksel, kryeministri i Kosovës, Mustafa, nuk është deklaruar, ndërsa pas kthimit në Prishtinë, në një mbledhje të qeverisë, tha se, “ gjatë takimit të datës 23 qershor janë trajtuar disa prej çështjeve që kanë qenë të parapara, si çështja e parimeve themelore lidhur me asociacionin e komunave, çështja e energjisë, çështja e kodit telefonik, çështja e kalimit mbi urën e Ibrit dhe poashtu është arritur që të nënshkruhet Marrëveshja lidhur me policat e sigurimit”.

“Mund të them se për çështjet e tjera, sa i përket asociacionit të komunave, energjisë, për të cilat është diskutuar në mënyrë specifike, të tjerat nuk kanë arritur të diskutohen thellësisht. Kemi mbetur që të punojmë edhe më tutje në nivel të ekspertëve për të sqaruar disa çështje që kanë qenë shumë të hapura ndërmjet nesh dhe jemi marrë vesh që të vazhdojmë këtë të hënë”, shtoi ai.

Ne, vijoi Mustafa, jemi angazhuar që të gjitha këto çështje të zgjidhen në suaza të parimeve të cilat ne i kemi përcaktuar më parë dhe unë mendoj se ashtu edhe do të ndodhë.

“Ne do të bëjmë përpjekje maksimale që dialogu të jetë konstruktiv dhe që zgjidhjet të jenë ato të cilat do të ndihmojnë që ne në të ardhmen t’i lëmë anash problemet të cilat i kemi tani të hapura, por edhe të orientohemi në perspektivën tonë zhvillimore dhe në mirëqenien e të gjithë qytetarëve të Republikës së Kosovës”, deklaroi kreu i qeverisë kosovare.

Ndersa, kryeministri i Serbisë, Vuçiç, ka folur në Bruksel, pas takimit me kryeministrin e Kosovës Mustafa, ku ka thënë se bisedimet kanë qenë shumë të vështira dhe se nuk është arritur ndonjë marrëveshje finale.

“Kemi shënuar mjaft përparim, para së gjithash për çështjen më të vështirë që është Asociacioni i Komunave Serbe. Shpresoj se në ditët e ardhshme, së paku këtë marrëveshje mund ta finalizojmë, por po punojmë intensivisht dhe seriozisht për të gjitha temat e tjera”, shprehej Vuçiç.

“Bashkësia e komunave serbe” në Kosovë, renditej e para nga “katër temat” e raundit të 26-të të dialogut në nivel të lartë kryeministror Prishtinë-Beograd. Media në Serbi ka renditur të dytën “energjetikën”, të tretën “telekomunikacionin” dhe të katërtën “Parkun e paqes” siç e quajnë barrikadën në urën kryesore mbi lumin Ibër të qytetit të Mitrovicës, që ndanë veriun me shumicë serbe nga jugu me shumicë shqiptare.

Burimet zyrtare në Prishtinë po ashtu kanë theksuar katër tema, me dallim vetëm në renditje, “energjinë, telekomin, barrikadën mbi urën e lumit Ibër në Mitrovicë dhe Asociacionin e komunave serbe”.

Ndërsa, shtypi i sotëm në Prishtinë thekson se, për dallim nga herët e tjera, të hënën, që në mëngjes, pritet të fillojë raundi i ri i dialogut në nivelin më të lartë mes Kosovës dhe Serbisë. “Takim Mustafa-Vuçiç pritet të zgjasë së paku deri në orët e vona të pasdites, por kësaj radhe në BE shpresojnë se vërtet do të ketë rezultate konkrete, të cilat munguan në takimin e fundit, javën e kaluar”, shkruan shtypi, duke shtuar se, “vetë përfaqësuesja e lartë e BE-së, Federika Mogherini, kishte bërë të qartë se në takimin e radhës pret formalizimin e marrëveshjeve në disa pika”.

Për katër vite bisedimesh në Bruksel, që nisën me teknike e kaluan në nivel të lartë kryeministror, Kosova dhe Serbia kanë arritur 20 marrëveshje. Këtë e bëri të ditur në Prishtinë ministrja për Dialogun në qeverinë kosovare, Edita Tahiri, në konferencën e tretë të ambasadorëve të Republikës së Kosovës, ku në fundjavë foli për temën “Progresi në dialogun e Brukselit dhe perspektiva euroatlantike e Kosovës”.

“Sot katër vite pas, janë arritur njëzet e dy marrëveshje me Serbinë, disa janë zbatuar nga Serbia, e disa janë rrugës së zbatimit, dhe në disa fusha Serbia ka shënuar ngecje serioze në zbatimin e marrëveshjeve”, u shpreh ajo.

Ministrja Tahiri tha se dialogu që po zhvillohet në Bruksel ndërmjet Republikës së Kosovës dhe Serbisë me ndërmjetësimin e Bashkimit Evropian ka dhënë rezultate të rëndësishme në disa plane. Vlen të veçohen rezultatet në forcimin e kushtetutshmërisë, ligjit dhe demokracisë në tërë vendin dhe shuarja e strukturave paralele serbe në fushat ku janë arritur marrëveshjet, pastaj përparime ka pasur në normalizimin e marrëdhënieve ndërfqinjësore me Serbinë, dhe në mënyrë të veçantë dialogu i Brukselit ka kontribuar në perspektivën euro-atlantike për Kosovën. Ajo pastaj u ndal në veçanti tek procesi i zbatimit të marrëveshjeve në fushën e drejtësisë dhe shuarjen e të ashtuquajturës “Mbrojtje Civile”, si dhe informoi mbi takimin e radhës në Bruksel në nivel kryeministrash ku, “do të trajtohen dhe eventualisht mbërrihen marrëveshjet për temat që janë në rend dite”.

Ajo shprehu pritshmërinë që, “do të ketë rezultate për përmbylljen e çështjes së kodit shtetëror telefonik, për të cilën do të aplikojë shteti i Austrisë, pastaj do të ketë përparime në çështjet e zbatimit të marrëveshjes për energjinë, në përkufizimin e parimeve të përgjithshme për asociacionin dhe për heqjen e barrikadës nga ura e lumit Ibër”.

Ministrja Tahiri shprehu kënaqësinë për nënshkrimin e marrëveshjes për njohjen reciproke të polisave të sigurimit të automjeteve mes dy shteteve, e cila marrëveshje do të ulë koston e tarifave dhe mundësojë një lëvizje më të lirë për qytetarët dhe në veçanti për shqiptarët e Luginës së Preshevës.

“Kosova me dialogun e Brukselit po dëshmohet si faktor paqeje dhe stabiliteti në rajon, dhe vetë dialogu i Brukselit po konsiderohet si kontribuuesi kryesor për paqen në rajon duke qenë se në vendet tjera nuk ka pasur zhvillime inkurajuese, duke pasur parasysh që në Maqedoni ka probleme demokratike dhe etnike ku nuk ka pasur përparime në zbatimin e Marrëveshjes së Ohrit dhe po ashtu Bosnja vazhdon me sfidat e saja”, tha ministrja Tahiri.

Në Bruksel këtë të hënë të 29 qershorit 2015 takohen për herë të katërt kryeministrat Isa Mustafa e Aleksandar Vuçiç të qeverive të reja të zgjedhjeve 2014 në të dy vendet, që u mbajtën më parë në Serbi e pastaj në Kosovë, ndërsa nga 26 raundet e zhvilluara deri tash të dialogut Prishtinë-Beograd në nivel të lartë, 23 ishin mes kryeministrave të atëhershëm Hashim Thaçi e Ivica Daçiç. Takimi i parë kryeministror në Bruksel është zhvilluar në 19 tetor 2012, ndërsa i 26-ti në 23 qershor 2015. Bisedimet në nivel kryeministrash kanë pasuar dialogun teknik Kosovë-Serbi, të filluar në 8 mars 2011, po ashtu në Bruksel, ku në krye të delegacionit kosovar ishte Edita Tahiri atëherë zëvendëskryeministre.

Pas raundit të 26-të, seanca plenare e Kuvendit të Kosovës në 25 qershor ka nisur me pyetjet për delegacionin kosovar se çfarë biseduan e për çfarë u dakorduan në raundin e 26-të kryeministror në 23 qershor dhe çka do të nënshkruajnë të hënën me delegacionin e Serbisë në Bruksel. Gjatë “koha për deklarime jashtë rendit të ditës”, këto pyetje i bënë deputeti i Lëvizjes Vetëvendosje, Ilir Deda, dhe deputetja e Nisma për Kosovën, Valdete Bajrami, duke theksuar opinonin e tyre se bashkësia e komunave serbe në veri do jetë “një autonomi apo republikë”.

Marrëveshja 15 pikëshe për Normalizimin e Marrëdhënieve ndërmjet Kosovës dhe Serbisë, e vlerësuar historike, e parafuar para dy vitesh, në 19 prill 2013, nga Thaçi e Daçiç, si dhe ndërmjetësuesja, Përfaqësuesja e Lartë e BE-së në atë kohë, Baronesha Catherine Ashton, në 6 pikat e para ka Asoaciacionin apo Bashkësinë e komunave me shumicë serbe në Kosovë.

Kosova në Panairin e Ushqimit në Nju Jork-“Summer Fancy Food Show”

June 29, 2015 by dgreca

Nga: Behlul Jashari/

Kosova dhe produktet ushqimore të saj po prezantohen për herë të parë në panairin më të madh të ushqimit “Summer Fancy Food Show” që mbahet në Nju Jork të Shteteve të Bashkuara të Amerikës nga 28 deri më 30 qershor. Gjashtë kompani prodhuese kosovare (Fluidi, Frutomania, Pestova, Korporata Rugove, Liri dhe Fungo) me rreth 100 lloje të produkteve cilësore janë në mesin e 2500 prodhuesve nga mbi 40 shtete të botës në një ngjarje të përmasave ndërkombëtare që gjatë tre ditëve pritet të tërheqë mbi 25000 vizitorë të regjistruar.

“Ky panair paraqet një mundësi të jashtëzakonshme për promovimin e produkteve kosovare përtej oqeanit dhe anembanë botës, ndërsa vetë pjesëmarrja e shtetit më të ri në botë në këtë panair ka zgjuar kërshërinë e vizitorëve të shumtë, të cilët kanë pasur vlerësime pozitive për cilësinë e produkteve kosovare”, deklaroi sot Oda Ekonomike Amerikane në Kosovë.

Prezantimi i Kosovës në panair po bëhet nën organizimin e Oda Ekonomike Amerikane dhe me mbështetje të Ministrisë kosovare të Tregtisë dhe Industrisë, përkatësisht të Agjencisë për Përkrahjen e Investimeve dhe Ndërmarrjeve të Kosovës, Ministrisë së Bujqësisë, Pylltarisë dhe Zhvillimit Rural, si dhe Ministrisë së Zhvillimit Ekonomik.

KOSOVË – RRETH 1.300 – 1.500 SERBË NË GAZIMESTAN FESTUAN VIDOVDANIN

June 28, 2015 by dgreca

Policia e Kosovës: Manifestimi ka përfunduar i qetë pa ndonjë incident/

Nga: Behlul Jashari/*

PRISHTINË, 28 Qershor/.-Serbë kosovarë dhe të ardhur edhe nga Serbia festuan Vidovdanin, të mbledhur sot në mesditë në Gazimestan, në një fushë rreth pesë kilometra në veri të Prishtinës, duke shënuar kështu 626 vjetorin e Betejës së Kosovës.Në çdo 28 qershor serbët festojnë Vidovdanin apo Betejën e Kosovës, që ka ndodhur në vitin 1389, e cila ishte humbur.Lidhur me manifestimet tradicionale religjioze ortodokse të festës së Vidovdanit Policia e Kosovës paraprakisht ka përgatitur planin operativ për menaxhimin e situatës së sigurisë.

Qëllimi strategjik i këtij plani operativ policor ishte: Mbajtja e rendit dhe sigurisë publike dhe zbatueshmëria e ligjit në vend; Shtimi i masave të sigurisë për të garantuar rend, qetësi dhe siguri publike, para, gjatë dhe pas manifestimit të Vidovdanit; Garantimi i lirisë së lëvizjes për të gjithë qytetarët dhe ofrimi i sigurisë; Kontrollimi dhe rregullimi i nevojshëm i rrjedhës së trafikut në të gjitha rrugët magjistrale, rajonale dhe ato lokale; Përcjellja dhe sigurimi i eskortave, individëve dhe grupeve të veçanta; Zbatimi i kompetencave dhe autorizimeve ligjore, përballë situatave të ndryshme dhe marrja e masave ndaj të gjithë shkelësve të ligjit, konform ligjeve të Republikës së Kosovës.

Policia e Kosovës më tej bën të ditur se në bazë të të dhënave nga terreni ka regjistruar rreth 1.300 – 1.500 pjesëmarrës, të cilët në mënyrë të organizuar kanë marrë pjesë në Graçanicë dhe Gazimestan të rajonit të Prishtinës, me rastin e festës me karakter religjioz të quajtur Vidovdani.

Fillimisht rreth orës 10:00 ka filluar manifestimi në afërsi të Manastirit në Graçanicë, ku kanë marrë pjesë një numër kryesisht i vogël i pjesëmarrësve.

Njësitet policore janë përkujdesur për mbarëvajtjen e manifestimit në Graçanicë, duke përfshirë edhe njësitet policore të trafikut të Prishtinës, të cilat kanë mundësuar qarkullimin e trafikut duke ri-drejtuar automjetet në rrugë alternative.

Ndërsa rreth orës 13:00, ka filluar manifestimi tek monumenti i Gazimestanit, ku njësitet policore janë përkujdesur për mbarëvajtjen e manifestimit si dhe rregullimin-orientimin e komunikacionit rrugor.

Njoftimi thekson se, karakteristikë që duhet veçuar me rastin e realizimit të planit policor është një planifikim me kohë i udhëhequr me vigjilencë dhe profesionalizëm nga Policia e Kosovës, e cila ka ofruar shërbimin e vet të sigurimit të pelegrinëve dhe qytetarëve në përgjithësi, duke siguruar një qarkullim të lirë sipas axhendave dhe planeve të parapara.

Po ashtu Policia e Kosovës është përkujdesur për të mundësuar lëvizjen e lirë për të gjithë pjesëmarrësit që kanë qenë pjesë e manifestimit, duke përfshirë edhe qytetarët tjerë të cilët nuk kanë qenë pjesë e këtij manifestimi.

Manifestimi ka përfunduar i qetë pa ndonjë incident që vlen të potencohet dhe pjesëmarrësit janë shpërndarë në formën siç edhe kishin ardhur, përfundon deklarata e orës së fundit e Policisë së Kosovës.

Bëhet e ditur se tashmë ka përfunduar festa e Vidovdanit në Gazimestan, ku sipas medias, i pranishëm në ishte edhe mitropoliti i Malit të Zi, Amfilohije Radoviq.

Duke folur rreth kësaj feste, Radoviq ka thënë se “Car Lazari dhe Skënderbeu kanë luftuar për të njëjtin ideal për largimin e Osmanëve prej Ballkanit”.

Ndërkohë, zyrtarët serbë, edhe pse kishin paralajmëruar pjesëmarrjen, ata nuk ishin të pranishëm në Gazimestan, raporton media kosovare.

Para 26 viteve, në 600 vjetorin e Betejës së Kosovës, kreu i atëhershëm shtetëror serb, Slobodan Milosheviç, pikërisht në ditën e Vidovdanit në fushën e Kosovës – Gazimestan, u binte daulleve të luftës, e cila pastaj u ndez e përfshiu hapësirat e ish-Jugosllavisë, luftës për Serbinë e madhe, nga më të përgjakshmet në gjithë historinë e Ballkanit, dhe që në fund e humbi e pastaj vet përfundoi në Tribunalin Ndërkombëtar për Krime Lufte në Hagë.

* Falenderojme gazetarin me pervoje nga Kosova z. Behlul Jashari qe i eshte shtuar lsites se bashkepunetoreve te Diellit nga Republika e Kosoves.

KOSOVE- QEVERIA, BISEDIME ME OPOZITEN PER GJYKATEN SPECIALE

June 27, 2015 by dgreca

QEVERIA E KOSOVËS PARALAJMËRON BISEDIME ME OPOZITËN DHE RIPROCEDIM NË KUVEND TË NDRYSHIMEVE KUSHTETUESE DREJT KRIJIMIT TË SPECIALES/

Nga: Behlul Jashari/

PRISHTINË, 27 Qershor.-Qeveria dhe insititucionet tjera të Republikës së Kosovës angazhohen që në asnjë rrethanë të mos krijohet hapësirë për oponentët e pavarësisë që çështja e Gjykatës Speciale të kalojë në Këshillin e Sigurimit të OKB-së.

MUSTAFA: ËSHTË FAT I KEQ QË ËSHTË KËRKUAR QË GJYKATA TË THEMELOHET JASHTË KOSOVËS

Në një mbledhje konsultative të qeverisë, të zhvilluar sot, lidhur me hapat që do të ndërmerren për përmbushjen e obligimeve të institucioneve të Kosovës ndaj marrëveshjes ndërkombëtare që ka të bëjë me themelimin e Gjykatës Speciale, e ratifikuar me ligj të veçantë në Kuvendin e Kosovës vitin e kaluar, kryeministri kosovar Isa Mustafa paralajmëroi riprocedim dhe për këtë bashkërendësim e bisedime edhe me tre partitë opozitare që nuk i votuan dje në Kuvend ndryshimet kushtetuese drejt krijimit të Speciales.“Kam ftuar këtë mbledhje konsultative të qeverisë, për të biseduar bashkërisht lidhur me hapat që do të ndërmarrim në këto ditë rreth përmbushjes së obligimeve të institucioneve tona ndaj marrëveshjeve ndërkombëtare të cilat ne i kemi ratifikuar në Kuvendin e Republikës së Kosovës, në këtë rast ndaj marrëveshjes që ka të bëjë me themelimin e Gjykatës Speciale, që është ratifikuar në Kuvend me ligj të veçantë”, tha fillimisht Mustafa.Dje, vijoi ai, ka qenë seanca e Kuvendit të Republikës së Kosovës në të cilën është diskutuar gjatë lidhur me amendamentet kushtetuese që kanë të bëjnë lidhur me implementimin e kësaj marrëveshje.“Edhe përkundër asaj që nuk është arritur që të sigurohen votat e dy të tretave të deputetëve të Kuvendit të Republikës së Kosovës, në mënyrë evidente është realizuar vullneti i shumicës së deputetëve, dhe kjo flet për përcaktimin e shumicës që ne të ndjekim rrugën evropiane dhe euroatlantike, që ne të tregojmë seriozitetin tonë lidhur me zbatimin e të gjitha detyrimeve tona që i kemi marrë ndaj faktorit ndërkombëtar, dhe detyrimeve të cilat i kemi marrë vitin e kaluar lidhur me ligjin për ratifikimin e marrëveshjes, përkatësisht letrës e cila është këmbyer ndërmjet Presidentes së Republikës së Kosovës dhe Baroneshës Ashton, e që ka të bëjë me themelimin e dhomave të veçanta të Gjykatës Speciale”, u shpreh kryeministri kosovar.

Në këtë rast, vijoi ai, ne konsiderojmë se duhet të bëjmë të gjitha përpjekjet, si qeveri e Republikës së Kosovës, edhe më tutje që të përmbushen detyrimet e vendit tonë, sepse kemi të bëjmë me përmbushjen e detyrimeve ndaj vënies së drejtësisë, mirëpo gjithmonë duke bashkëpunuar me Shtetet e Bashkuara të Amerikës dhe Bashkimin Evropian, në mënyrë që të shtrojmë një rrugë dhe një perspektivë të përbashkët të zhvillimit të vendit tone”, theksoi Mustafa.

Ne, tha ai, mendojmë se në ditët në vijim qeveria e Republikës së Kosovës të bashkërendis aktivitetet me Kuvendin e Republikës së Kosovës, me grupet parlamentare, në mënyrë që të punojmë të gjithë së bashku, që në ditët në vijim të riprocedohet lënda e ndryshimeve kushtetuese, përkatësisht amendamenteve kushtetuese në Kuvend dhe poashtu të zhvillojmë edhe takime dhe biseda edhe me faktorin ndërkombëtar, i cili është këtu në Kosovë dhe të bashkërendisim me ta të gjitha këto punë.

“Konsiderojmë poashtu se çështja e ndryshimeve kushtetuese dhe zbatimi i drejtësisë nuk është vetëm çështje e pozitës, përkatësisht e partive të cilat janë në pozitë, është çështje e të gjithë deputetëve të Kuvendit të Republikës së Kosovës, edhe deputetëve të opozitës të cilët në mandatin e kaluar e kanë votuar ratifikimin e marrëveshjes, përkatësisht letërkëmbimin ndërmjet Presidentes së Republikës së Kosovës, Atifete Jahjaga dhe Baroneshës Catherine Ashton (përfaqësueses së lartë të Bashkimit Evropian në atë kohë), dhe janë pjesë e ligjit mbi ratifikimin e kësaj marrëveshje. Ky ligj i detyron jo vetëm partitë që janë në pozitë, por i detyron të gjitha subjektet në Kosovë që ta bëjnë zbatimin e saj dhe ne poashtu e shohim arsyen që edhe me partitë opozitare të bashkërendisim dhe të bisedojmë, sepse çështja e vënies së drejtësisë dhe çështja e perspektives evropiane të Kosovës nuk është çështje vetëm e disa strukturave, ose e një strukture politike ose një koalicioni politik, por është çështje e shtetit të Kosovës, është çështje e qytetarëve të Kosovës dhe është çështje e ardhmërisë tone”, theksoi kryeministri Mustafa.

Ai vijoi se, të gjithë ne do të ishim të lumtur sikur kjo gjykatë me kohë të ishte themeluar në Kosovë dhe ne të përplotësonim të gjitha kushtet që një gjykatë e tillë të funksiononte këtu.

“Është fat i keq edhe për Kosovën edhe për neve që është kërkuar që gjykata të themelohet jashtë vendit. Mirëpo, ne megjithatë jemi pajtuar sepse kemi ratifikuar një marrëveshje të tillë dhe të gjithë ne e kemi marrë për obligim se ajo marrëveshje do të realizohet. Prandaj, ne shohim arsye të punojmë, të tregojmë gatishmërinë tonë dhe përcaktimin tonë që si qeveri duhet të punojmë edhe më tutje, të bashkëpunojmë me të gjithë deputetët e Kuvendit të Republikës së Kosovës dhe suksesin tonë e shohim si sukses të të gjithëve”, tha kryeministri.

Mustafa tha se, natyrisht se në asnjë rast nuk i gëzohemi asaj që ne të festojmë ose të manifestojmë mosvotimin e përcaktimeve tona dhe detyrimeve tona, por e shohim si sukses kur detyrimet tona arrijmë t’i bëjmë vepër dhe që zotimet tona që i kemi dhënë ndaj bashkësisë ndërkombëtare, ndaj Shteteve të Bashkuara të Amerikës dhe ndaj Bashkimit Evropian t’i vëmë në vepër dhe të ecim në perspektiven evropiane.

“Kemi nevojë që të kemi bashkëpunim ndërkombëtar, kemi nevojë të ecim rrugës së integrimeve evropiane, sidomos të atyre që kanë të bëjnë tani me nënshkrimin e Marrëveshjes për Stabilizim-Asociim, me liberalizimin e vizave, me aderimin tonë në institucionet tjera ndërkombëtare, të cilat janë të domosdoshme që aty të gjendemi dhe për këtë ne duhet të tregojmë përcaktimin dhe seriozitetin tonë ndaj të gjitha detyrimeve të cilat Kosova i ka marrë, por edhe ndaj detyrimeve të cilat ne do t’i marrim në të ardhmen”, tha kreu i qeverisë kosovare.

Prandaj, përfundoi Mustafa, takimi i sotëm ishte i karakterit që ne të ulemi të tregojmë përcaktimin tonë dhe zotimin tonë që do të punojmë këto ditë, në mënyrë që të përmbushim detyrimet tona, do të punojmë më tërë Kuvendin, me të gjithë deputetët dhe me të gjitha institucionet e Republikës së Kosovës dhe faktorin ndërkombëtar që është këtu dhe pastaj në qeveri do të marrim vendimin adekuat lidhur me riprocedimin e amendamenteve përkatësisht lëndës e cila do të mundësonte që ne të realizojmë këto detyrime.

THAÇI: GJYKATËN SPECIALE TA THEMELOJMË NË BAZË TË KUSHTETUTËS DHE LIGJEVE TË KOSOVËS, BASHKËRISHT ME PARTNERËT TANË BE-në E SHBA-të

Zëvendëskryeministri e ministri i Jashtëm i Kosovës, Hashim Thaçi tha se mbështetë plotësisht qëndrimet që i prezantoi kryeministri Mustafa në emër të qeverisë dhe pozicionimin e qeverisë së Republikës së Kosovës edhe pas zhvillimeve të reja që kanë ndodhur dje në Kuvend. “Ajo që është me rëndësi është që shumica e deputetëve ishin në favor të përcaktimit tonë të kryerjes së këtij standardi, kriteri apo edhe obligimi karshi bashkësisë ndërkombëtare që e kemi marrë ne si shtet i Kosovës”, u shpreh ai.

Prandaj, vijoi Thaçi, vlerësoj se riprocedimi në kohën e duhur në ditët e ardhshme nga ana e qeverisë është një vendim i drejtë, një vendim që duhet të kalojë edhe përmes një koordinimi edhe ndërpartiak, por në të njëjtën kohë edhe një konsultimi të ngushtë edhe me partnerët tanë ndërkombëtarë në mënyrë që kjo çështje të përmbyllet sa më shpejtë që është e mundur dhe sa më shumë që është e mundur në kuptimin e një konsensusi edhe politik edhe qytetar edhe një bashkëpunimi të ngushtë me partnerët tanë strategjikë në mënyrë që të ruajmë hapin e perspektivës evropiane edhe në procesin e nënshkrimit të Marrëveshjes së Asociimit dhe Stabilizimit, aplikimit në Këshill të Evropës si dhe rekomandimin pozitiv për liberalizimin e vizave.

“Prandaj, unë dëshiroj dhe në njëjtën kohë shpresoj që ne do të ngrihemi të gjithë mbi reagimet çfarë i kemi pasur edhe dje aty këtu prej deputetëve apo individëve të caktuar, në mënyrë që të marrim përgjegjësinë edhe të vlerësimit politik, edhe të votimit në kuadër të përgjegjësive më të larta tona kushtetuese, ligjore dhe të interesit shtetëror të Republikës së Kosovës. E ritheksoj edhe sot se është jetike për të ardhmen e vendit që të themelojmë ne gjykatën e veçantë, Gjykatën Speciale, në bazë të Kushtetutës dhe ligjeve të Kosovës, pra ta themelojmë bashkërisht me partnerët tanë Bashkimin Evropian dhe SHBA-të dhe në asnjë rrethanë të mos krijohet hapësirë për oponentët e pavarësisë së Kosovës që kjo çështje të kalojë në Këshillin e Sigurimit”, theksoi kryediplomati kosovar Thaçi.

Ai vijoi se, bashkërisht me partnerët tanë ne jemi të qartë se do të përmbyllet kjo çështje në periudhë shumë të shkurtër kohore 3 deri 5 vjet, ndërsa në rast të ndonjë rreziku tjetër apo lëshimi tonë kjo çështje mund të bartet në një periudhë të gjatë, me dëm të madh për shtetin e Kosovës, në periudhën 15 apo 20 vjeçare.

“Do të thotë edhe dëmi politik mund të jetë i madh, edhe dëmi i perspektivës euroatlantike por edhe një dëm i madh i sanksioneve të ndryshme për zhvillimin ekonomik dhe perspektivën e sigurt për qytetarët e Kosovës”, përfundoi Thaçi.

Qeveria e Republikës së Kosovës në një deklaratë mbrëmë vonë vlerësi se mosmiratimi i djeshëm në Kuvendin e Kosovës i ndryshimeve kushtetuese që do të hapnin rrugë për miratimin e Ligjit për Dhomat e Specializuara dhe Zyrën e Prokurorit të Specializuar, si dhe Ligjit për Mbrojtjen Juridike dhe Mbështetjen Financiare të Personave të Akuzuar potencialë në Proceset Gjyqësore pranë Dhomave të Specializuara, nuk i shërben interesave madhore të Kosovës.

“Qeveria e Republikës së Kosovës, mbetet e përkushtuar të punojë deri në përmbushjen e plotë të detyrimeve që derivojnë nga letërkëmbimi ndërmjet Presidentes së Republikës së Kosovës, Atifete Jahjaga dhe Baroneshës Catherine Ashton si dhe fton të gjitha institucionet që t’i kontribuojnë përmbushjes së këtij obligimi dhe të mbrojnë interesat e shtetit të Kosovës”, theksonte deklarata.

“Qeveria e Republikës së Kosovës vlerëson se çdo dështim për përmbushjen e obligimeve nga ana e institucioneve tona, e vë në pikëpyetje seriozitetin dhe perspektivën euroatlantike të Republikës së Kosovës”, përfundon deklarata.

MUNGONIN 5 VOTA PËR MIRATIM TË NDRYSHIMEVE KUSHTETUESE PËR GJYKATËN SPECIALE

Kuvendi i Kosovës me 75 vota pro, 7 kundër, 2 abstenime nuk e miratoi propozim-amendamentin nr. 24 në Kushtetutën e Republikës, krijimin e Gjykatës Speciale. Për miratim duheshin së paku 80 vota të Kuvendit 120 anëtarësh, përfshirë këtu edhe dy të tretat e 20 deputetëve të komuniteteve pakicë.

Mungonin së paku 5 vota për miratim. Ndërsa më shumë se 5 mungonin votat pro të deputetëve nga partia më e madhe e koalicionit qeverisës, PDK – 7 ishin kundër e 2 abstenuan.

Në deklarime, dy forcat më të mëdha politike të koalicionit qeverisës që kanë 68 deputetë (PDK 35, LDK 33) u shprehën pro, e tre të opozitës me gjithësej 31 deputetë kundër, ndërsa grupet parlamentare të komuniteteve pakicë nuk u deklaruan. Pa grup parlamentar janë 5 deputetë, 4 shqiptarë e 1 serb.

JACOBSON: JEMI TË ZHGËNJYER THELLË NGA REZULTATI I VOTIMIT NË KUVEND

Ambasadorja amerikane në Kosovë, Tracey Ann Jacobson, ka bërë të ditur se SHBA-ja është e zhgënjyer thellë me moskalimin e amendamenteve që hapnin rrugën e themelimit të Gjykatës Speciale, dje në Kuvendin kosovar.

Sipas shtypit të sotëm të Prishtinës, ajo ka bërë të qartë se kjo çfarë ka dëshmuar të premten Kuvendi i Kosovës është një pengesë për aspiratat euroatlantike të Kosovës. Jacobson bën sërish të ditur se Qeveria amerikane nuk do t’i bllokojë përpjekjet e vendeve që nuk e njohin Kosovën që të themelojnë Tribunalin në OKB në mungesë të themelimit të saj me lejen e Kuvendit të Kosovës.

“Ne jemi të zhgënjyer thellë nga rezultati i votimit të sotëm në Kuvend. Rezultati është një pengesë për aspiratat euroatlantike të Kosovës. Siç e kemi theksuar më parë, në mungesë të themelimit të Gjykatës Speciale, Qeveria e SHBA-së nuk do t’i bllokojë më përpjekjet e anëtarëve që s’e njohin Kosovën që të themelojnë Tribunalin në OKB”, ka thënë ambasadorja Jacobson për “Zërin”, shkruan kjo gazetë.

ZHBOGAR: BASHKIMI EVROPIAN ËSHTË NJOFTUAR PËR VOTIMIN NEGATIV TË KUVENDIT TË KOSOVË

Bashkimi Evropian është njoftuar për votimin negativ të Kuvendit të Kosovë, deklaroi mbrëmë Shefi i Zyrës së BE-së/PPBE Samuel Zhbogar lidhur me ndryshimet kushtetuese që mundësojnë themelimin e Dhomave të Posaçme.

“Jam i zhgënjyer me rezultatin e seancën e sotme të Kuvendit të Kosovës. BE-ja është njoftuar për votimin negativ lidhur me ndryshimet kushtetuese të cilat do ta kishin mundësuar krijimin e Dhomave Speciale të Kosovës dhe Zyrës së Prokurorit Special. Kosova nuk ka alternativë tjetër përpos që t’i trajtojë supozimet serioze që dalin nga raporti i vitit 2011 të Këshillit të Evropës. Në këtë mënyrë BE-ja do të vazhdojë të punojë me institucionet e Kosovës përkitazi me konfirmimin e zotimeve që dalin nga Letër këmbimet 2014”, theksonte Zhbogar në deklaratën e sdërguar nga Zyra e BE në Kosovë.

SEJDIU: KOSOVËS I NEVOJITET HAP I VENDOSUR DHE I ARSYESHËM PËR TË GJETUR FORMULËN MË TË MIRË

Ish-Presidenti i Kosovës, Fatmir Sejdiu, ka deklaruar se debati i djeshëm në Kuvendin e Kosovës dhe mosmiratimi i amendamenteve kushtetuese të propozuara nga qeveria për themelimin e Gjykatës Speciale domosdo Kosovën e fut në një fazë të re dhe jashtëzakonisht të ndjeshme.

“Megjithë zotimet e zyrtarëve më të lartë të shtetit për përfundimin e këtij procesi, sot doli një përgjigje tjetër nga Kuvendi i Kosovës. Kjo tregon se nuk kishte një përgatitje serioze dhe thellësisht të pjekur për këtë proces. Po kështu, kjo dëshmon brishtësinë e funksionimit institucional”, është shprehur ai.

“Kosovës i nevojitet hap i vendosur dhe i arsyeshëm për të gjetur formulën më të mirë të kapërcimit të kësaj situate. Sigurisht se variantet mund të jenë të shumta. Por, para së gjithash Kosovës i nevojitet një unitet nacional dhe qytetar dhe veprime shumë të vendosura për të zhvilluar partneritet të sinqertë , në radhë të parë brenda gjithë forcave politike të vendit dhe paralelisht një partneritet të fuqishëm e të sinqertë me miqtë e dëshmuar të Kosovës”, ka theksuar Fatmir Sejdiu, i cili si President i vendit ka udhëhequr Ekipin e Unitetit në negociatat për statusin e Kosovës, të ndërmjetësuara nga Kryenegociatori Martti Ahtisaari – Emisari Special i OKB-së.

KONJUFCA: LAJM I MIRË PËR KOSOVËN -MOSVOTIMI I GJYKATËS SPECIALE

Lëvizja Vetëvendosje organizoi sot konferencë për shtyp, ku kryetari i Grupit Parlamentar, Glauk Konjufca, foli rreth mosvotimit të djeshëm të Gjykatës Speciale. Ai tha se mosvotimi i kësaj gjykate nga Kuvendi është një lajm i mirë për Kosovën. “Dje u evitua heqja e një pjese të konsiderueshme të sovranitetit republikan”, tha Konjufca.

Ai reagoi ndaj paralajmërimeve të qeverisë se këtë çështje do ta rikthejë në Kuvendin e Kosovës. “Në vend që qeveria të reflektojë pas këtij refuzimi në kuvend, ajo është përcaktuar për rrënimin total të demokracisë parlamentare”, u shpreh Konjufca.

HARADINAJ: NE SI SHTET DUHET TË FILLOJMË TË MERREMI VETË ME TEMAT TONA

Kosova duhet të merret vet me temat e veta, tha sot Ramush Haradinaj, kryetar i AAK-së, një prej tre partive opozitare, që bashkë me disa deputetë të pozitës dje në Kuvendin kosovar pamundësuan miratimin e ndryshimeve kushtetuese për krijimin e Gjykatës Speciale jashtë vendit.

“Ne si shtet duhet të fillojmë të merremi vetë me temat tona, cilatdo qofshin ato. Ne jemi kundër eksperimenteve me Kosovën. Të gjithë duhet të na trajtojnë dhe të na besojnë se jemi të gatshëm me i marrë vetë përgjegjësitë”, është shprehur ai.

Kryetari i Aleancës për Ardhmërinë e Kosovës, Haradinaj, ka marrë pjesë sot në hapjen e punimeve të Kuvendit Zgjedhor të Aleancës së të Rinjve të Kosovës.

“Kosova po kalon momente të rëndësishme dhe ju rinia mund t’i vëni në shprehje aftësitë tuaja për zhvillimet dhe ndryshimet që mund të vijnë shpejtë”, është shprehur ai.

Kreu i AAK-së, Haradinaj, ka shfrytëzuar kuvendin zgjedhor të të rinjve të partisë së tij, për të kritikuar edhe njëherë qeverinë e Kosovës që ka mbajtë mbledhje edhe sot dhe insistimin e saj për themelimin e Gjykatës Speciale.

DEDA: KOSOVËS I DUHET ALTERNATIVË PËR SPECIALEN, OPOZITA TË MOS BARRIKADOHET

Deputeti i subjektit më të madh opozitar kosovar, Lëvizjes Vetëvendosje, Ilir Deda ka thënë se pa inate e pa barrikadim, të gjitha partitë politike duhet të ulen dhe të propozojnë alternativën e Kosovës për Gjykatën Speciale.

“Tash, pa inate, të gjitha partitë politike në Kuvend duhet të ulen dhe ta propozojnë alternativën e Kosovës ndaj Gjykatës Speciale që nuk kaloi dje. As nuk duhet qeveria të inatoset dhe për inat ta procedojë amandamentin e dështuar kushtetues, dhe as nuk duhet të barrikadohet opozita”, ka thënë Deda.

Ajo që duhet të ndodh tash sipas Dedës është një marrëveshje për Gjykatën e Kosovës për Krime Lufte.
“Gjykatë të njëjtë çfarë kanë Kroacia, Bosnja e Serbia. Mund ta bëjmë këtë Gjykatë të Kosovës për Krime Lufte, me seli në Prishtinë; edhe nëse është me gjykatës e prokurorë ndërkombëtarë; të bëhen gjykimet në Kosovë për çfarëdo pretendimi; dhe të pajtohemi për dëshmi dhe mbrojtje të dëshmitarëve jashtë Kosovës që janë të rrezikuar këtu”, ka thënë Deda, i cituar nga media.

“Ekziston edhe rruga e cila e sforcon shtetin tonë dhe pjekurinë politike dhe shoqërore për ballafaqim me të gjitha krimet e kryera në Kosovë, dhe jo vetëm sipas pretendimeve të Martyt. Pa inate, pa barrikadim”, është shprehur deputeti Deda.

Kosovë –Amendamentet kushtetuese, pastaj Gjykata Speciale

June 21, 2015 by dgreca

Nga: Behlul Jashari

Në Kuvendin e Kosovës, amendamentet kushtetuese do të votohen para se të votohet për Gjykatën Speciale, drejt së cilës u bë edhe një hap tjetër në mbledhjen e të premtës së 19 qershorit të qeverisë me miratimin unanimisht të kërkesës së Ministrisë së Drejtësisë për t’i dërguar si informatë Kuvendit Projektligjin për Dhomat e Specializuara dhe Zyrën e Prokurorit të Specializuar si dhe Projektligjin për Mbrojtjen Juridike dhe mbështetjen financiare të personave të akuzuar potencialë në proceset gjyqësore pranë Dhomave të Specializuara.Duke prezantuar kërkesën, ministri i Drejtësisë Hajredin Kuçi, theksoi se nuk bëhet fjalë për shqyrtim të miratimit të projektligjit, por është informim me përmbajtjen e tij për Kuvendin e Republikës së Kosovës.

Ai prezantoi në detaje tërë procesin e trajtimit të Projektligjin për Dhomat e Specializuara dhe Zyrën e Prokurorit të Specializuar, i cili, sic theksoi, “është hartuar krejtësisht nga BE-ja dhe ka filluar me themelimin e grupit teknik nga presidentja e Republikës së Kosovës, Atifete Jahjaga, e cila ka kërkuar që të shqyrtohet legjislacioni i pranuar nga Bashkimi Evropian për themelimin e Dhomave të Specializuara dhe Zyrën e Prokurorit të Specializuar”.

“Ky është draft që nuk ka më hapësirë për negocim nga ekipi i ekspertëve”, tha ministri Kuçi, duke theksuar se, “është menduar që me përmbajtjen të njoftohet qeveria dhe Kuvendi i Republikës së Kosovës, dhe më pastaj me procedura të rregullta edhe kushtetuese, edhe me rregullore të Kuvendit por edhe atë të qeverisë, të merren vendimet adekuate”.

Kryeministri i Kosovës, Isa Mustafa, ka vlerësuar me përkushtim shumë të madh punën e bërë nga ministri dhe grupi i ekspertëve, të cilët kanë qenë njerëz të përgjegjësisë së lartë për fushat që i kanë mbuluar në bisedimet me Brukselin, duke theksuar përpjekjet e tyre që maksimalisht ligji t’i përshtatet kushteve të Kosovës dhe të përmbajë të gjitha elementet të cilat është konsideruar se duhet t’i përmbajë një ligj i tillë.

“Përgjigja përfundimtare, edhe e përfaqësuesve të Bashkimit Evropian dhe përfaqësuesve të Shteteve të Bashkuara të Amerikës, ka qenë se ky është teksti i fundit në të cilin nuk ka hapësirë që të bëhen ndryshime”, bëri të ditur kryeministri kosovar.

Mustafa vlerësoi se, një kontribut i madh i grupit ka qenë edhe heqja e fjalës dhe shprehjes gjenocid nga teksti i ligjit, të cilën e ka përmbajtë në versionin e mëparshëm dhe përshtatja e ligjit me ligjet ndërkombëtare që rregullojnë këto fusha.

“Ne kemi aprovuar në qeveri ndryshimet në Kushtetutën e Republikës së Kosovës. Për këto ndryshime është dhënë mendim pozitiv edhe nga ana e Gjykatës Kushtetuese. Edhe ndryshimet kushtetuese dhe Ligji për Dhomat e Veçanta janë rrjedhojë e letërkëmbimit të Presidentes së Republikës së Kosovës me Baroneshën Ashton, që është bërë vitin e kaluar, dhe e Ligjit mbi ratifikimin e këtij letërkëmbimi që ka aprovuar Kuvendi i Kosovës me votat e mbi dy të tretat e deputetëve ”, theksoi kryeministri Mustafa.

Kryeministri po ashtu bëri të ditur se nuk ka asgjë të re në përmbajtjen e këtyre ligjeve dhe amendamenteve që nuk ka qenë pjesë e zotimit përmes Kuvendit të Republikës së Kosovës se do të përmbushen detyrimet ndaj kërkesave të komunitetit ndërkombëtar për vënien e drejtësisë së plotë, duke konsideruar se edhe ky do të jetë një kontribut i Kosovës në këtë aspekt.

“Ritheksoj se as ndryshimet kushtetuese dhe as ky ligj nuk ka të bëjë fare me kontestimin e luftës së drejtë të Ushtrisë Çlirimtare të Kosovës. Ne do të mundohemi dhe do të bëjmë përpjekje maksimale që të afirmojmë dhe t’i ruajmë vlerat e UÇK-së. Por, çështja është që të zbardhet drejtësia për dyshimet ndaj individëve të caktuar, për të cilët askush nga ne nuk e din se kush janë dhe kush do të jenë, sepse janë çështje që drejtësia duhet t’i zbardhë në një proces të plotë të drejtësisë. Andaj, unë propozoj që ne t’ia dërgojmë Kuvendit të Republikës së Kosovës në këtë fazë si informim, dhe në momentin kur bëhet aprovimi i ndryshimeve të Kushtetutës, me vendim të qeverisë, projektligjet marrin formën për shqyrtim dhe aprovim në Kuvendin e Republikës së Kosovës”, tha kryeministri Mustafa.

Edhe zëvendëskryeministri i parë e ministri i Jashtëm, Hashim Thaçi, shprehu vlerësimin më të lartë për punën që ka bërë grupi punues, në krye me ministrin e Drejtësisë, Kuçi.

“Vlerësoj se, në veçanti pas tërheqjes së çështjes apo termit gjenocid që ka qenë e përfshirë në propozimet e para, ne, si qeveri e pranojmë këtë informatë për ta dërguar edhe si ekip qeveritar. Është me interes që të pranojmë për t’ia dërguar si informatë Kuvendit të Republikës së Kosovës Projektligjin për Dhomat e Specializuara dhe Zyrën e Prokurorit të Specializuar”, u shpreh ai.

Gjithashtu, vijoi Thaçi, duke marrë parasysh edhe kultivimin e raporteve tona me Bashkimin Evropian dhe Shtetet e Bashkuara të Amerikës, me këtë proces ne evitojmë edhe pretendimin e kundërshtarëve të pavarësisë që kjo çështje të shkojë në Këshill të Sigurimit.

“Prandaj, mendoj se tërheqja e termit gjenocid, domosdoshmëria e themelimit të kësaj gjykate, obligimet që dalin nga letërkëmbimi i Presidentes Jahjaga me Baroneshën Ashton, të vitit të kaluar, gjithashtu përgjegjësitë tona që kemi karshi bashkësisë ndërkombëtare dhe obligimeve ndërkombëtare dhe duke u nisur edhe prej vizionit për të ardhmen evropiane dhe perëndimore të Republikës së Kosovës, mendoj se tani ky Projektligj, e lehtëson orientimin, përcaktimin dhe votimin edhe të deputetëve të Kuvendit të Republikës së Kosovës, për votim pro”, tha zëvendëskryeministri Thaçi.

Po ashtu, vijoi ai, shprehu besimin që edhe në Kuvendin e Republikës së Kosovës do të ndërtohet një konsensus sa më i gjerë politik, në kuptimin e dërgimit të mesazhit të konsensusit qytetar, në të njëjtën kohë.

“Prandaj, vlerësoj se do të ishte mirë dhe me interes që gjithë kabineti qeveritar në mënyrë unike, t’i japë këtë mbështetje punës së grupit punues dhe natyrisht jo vetëm si partnerë të koalicionit, por shpresoj që në një bazë edhe më të gjerë politike do të kemi një mbështetje edhe në Kuvendin e Republikës së Kosovës. Tërë ky proces ka kaluar nëpër një proces të një pune të përbashkët të të gjithëve, gjithmonë duke pasur parasysh ruajtjen dhe kultivimin e vlerave të luftës së popullit të Kosovës për liri dhe pavarësi, të luftës së Ushtrisë së Çlirimtare të Kosovës, por në të njëjtën kohë edhe të ruajtjes dhe kultivimit të plotë të partneritetit strategjik të Republikës së Kosovës me SHBA-të dhe Bashkimin Evropian”, theksoi zëvendëskryeministri Thaçi.

Sipas shtypit të sotëm kosovar, qeveria dhe Kuvendi kanë gjetur një zgjidhje kompromisi për mënyrën se si të zhbllokohet procesi i vendimmarrjes për amendamentet kushtetuese, të cilat krijojnë bazë për themelimin e Gjykatës Speciale.

Kuvendi është informuar me Projektligjin për këtë gjykatë, por pa të drejtën për ta vënë në votim përnjëherë me amendamente.

Rreth një muaj më parë, me propozim të subjekteve në pushtet, është shtyrë seanca për amendamentet, me arsyetimin se deputetët nuk e posedonin para vetes edhe Projektligjin për Specialen.

Ishte arsyetim formal, ngaqë shtyrja qe bërë në mungesë votash. Megjithëkëtë, Kuvendi i qëndroi pas arsyetimit dhe ishte përcaktuar që, kurdo që t’i verë amendamentet në rend dite, ta qesë para deputetëve për votim edhe Projektligjin. Qeveria nuk e ka përfillur këtë kërkesë, pasi ka vlerësuar se pa u bërë ndryshimet kushtetuese ligjërisht nuk mund ta procedojë për votim Projektligjin.

Kësisoj, të premten Projektligji nuk është proceduar për t’u votuar, por vetëm që deputetët të informohen me përmbajtjen e tij, përfundon shtypi në Prishtinë.

Axhenda e seancës vijuese plenare të Kuvendit të Kosovës vendoset nga Kryesia, mbledhja e së cilës me shefat e grupeve parlamentare nuk është ftuar ende.

Drejt projektligjit për Gjykatën Speciale, “shqyrtimi i propozim-amendamentit nr.24 në Kushtetutën e Republikës së Kosovës, të propozuar nga qeveria e Republikës së Kosovës”, ishte pika e vetme e rendit të ditës në seancën e 29 majit, por u shty (me 78 vota pro, 1 kundër dhe 2 abstenime) me propozimin e koalicionit qeverisës. “Në mungesë të materialeve nuk ofrohet mundësia për deputetët për të parë se çfarë do të votojnë dhe meqë draftligji pritet të kthehet nga Brukseli, ne propozojmë që të shtyhet mbledhja, derisa të kemi materialet e nevojshme për analizim për këtë çështje”, u tha me atë rast nga pozita.

Ndërsa, opozita tha se kishte “vetëm dy alternativa të mundshme: Gjykata Speciale ose nuk duhet të vijë fare në Kuvendin e Republikës së Kosovës ose do të duhej të shtyhej deri në pafundësi”.

Duke nisur nga ora kur ishte ftuar seanca plenare, e edhe në 17 qershor, organizatat e dala nga lufta e UÇK-së, me mbështetje edhe nga opozita, zhvilluan protesa kundër miratimit të Gjykatës Speciale, para ndërtesës së Kuvendit dhe të qeverisë së Kosovës.

Për miratimin e propozim-amendamentit duheshin dy të tretat e votave të Kuvendit 120 anëtarësh, përfshirë ato të komuniteteve pakicë që përfaqësohen me 20 deputetë.

Në mbledhjen e caktimit të axhendës, Kryesia e Kuvendit kishte kërkuar nga qeveria e Kosovës që për seancën e 29 majit të procedojë në Kuvend edhe Projektligjin për mbrojtjen juridike dhe mbështetjen financiare të personave të akuzuar potencialë në proceset gjyqësore pranë Gjykatës Speciale.

Në 7 mars qeveria e Republikës së Kosovës ka miratuar Propozimin për amendamentimin e Kushtetutës së Republikës së Kosovës. Me atë rast u tha se me këtë amendamentim po përmbusheshin obligimet që ka marrë qeveria nga Kuvendi i Kosovës vitin e kaluar, për themelimin e Gjykatës Speciale.