Kryeministri Hoti: Udhërrëfyes i dialogut është Kushtetuta e Republikës së Kosovës

September 16, 2020 by dgreca

Kryeministri i Republikës së Kosovës, Avdullah Hoti, ka marrë sot pjesë në Tryezën e diskutimit: “Kryeministri i Kosovës përballë platformës së shoqërisë civile për dialog”, të organizuar nga Instituti Demokratik i Kosovës.

Në fjalën e tij hyrëse, kryeministri Hoti ka folur për kronologjinë e procesit të dialogut, si dhe për transparencën në këtë dialog, por edhe rrugën që Qeveria e Kosovës do ta ndjekë deri në arritjen e marrëveshjes finale për njohje reciproke ndërmjet dy vendeve.
Kryeministri Hoti ka përmendur angazhimet e qeverisë përgjatë tre muajve sa i përket qasjes ndaj dialogut me Serbinë duke theksuar se udhërrëfyes që nga dita e parë kur e ka marrë detyrën për procesin e dialogut është Kushtetuta e Kosovës.

“I kemi rikonfirmuar edhe një herë parimet tona për dialogun duke besuar se këto parime i nxjerrin jashtë loje komplet konspiracionet e shumta për takimet gjoja jopublike që kanë ndodhur mes delegacionit kosovar dhe atij serb:, tha kryeministri Hoti duke shtuar se “integriteti territorial i Kosovës është i panegociueshëm dhe se kjo nuk është shtruar asnjëherë para meje në tre muajt e fundit në çdo tavolinë të dialogut që unë kam marrë pjesë”. E dyta, vijoi ai, organizimi kushtetues i Kosovës nuk mund të preket, që nënkupton se ruhet karakteri unitar i shtetit, se nuk ka asociacion me kompetenca ekzekutive në Kosovë dhe për të dyja këto parime të procesit të dialogut, ka mbështetje të plotë nga partnerët tanë ndërkombëtarë dhe parimi i tretë që marrëveshja duhet të jetë plotësisht në përputhje me Kushtetutën e Republikës së Kosovës.

Po ashtu, kryeministri Hoti ka theksuar se ky proces duhet të rezultojë vetëm me njohje reciproke dhe assesi të mos mbetet një proces që e konsumon vetëm veten dhe që nuk prodhon rezultate në fund dhe se produkt i marrëveshjes dhe obligim i BE-së duhet të jetë që ta kalojmë problemin me pesë vendet anëtare që nuk e njohin Kosovën, mandej shfuqizimi i Rezolutës 1244 dhe anëtarësimi në OKB, organizata ndërkombëtare dhe hapja e perspektives për Kosovën për integrime euroatlantike, si dhe adresimi i të gjitha çështjeve pa përjashtim.

Kryeministri Hoti ka folur edhe për takimin e parë të nivelit të lartë më 16 korrik duke thënë se njëra nga temat ka qenë për personat e pagjetur dhe se kanë insistuar që ta fillojnë këtë dialog me personat e pagjetur, për shkak të ndjeshmërisë që e ka, por edhe për çështjet ekonomike dhe se në këtë aspekt është zhvilluar progres.

Ndër të tjera, kryeministri Hoti ka ripohuar se pa e arritur njohjen reciproke me Serbinë, nuk mund të adresohen çështjet e tjera, pasi çështjet e tjera janë derivat i njohjes reciproke.

Duke folur për marrëveshjen e arritur në Uashington, kryeministri Hoti tha se ka elemente kryesisht ekonomike, politike, por edhe të të drejtave të njeriut e edhe çështje të tjera.

“Janë dy komponente që janë shumë të rëndësishme, pjesa ekonomike që është një listë e projekteve kryesisht infrastrukturore, por edhe mbështetje për ndërmarrje të vogla dhe të mesme edhe që në total vetëm për pjesën tonë të Kosovës shkon në 1 miliard dollar amerikan. Janë disa agjenci në SHBA që e kanë marrë financimin e këtyre projekteve”, tha kryeministri Hoti duke bërë të ditur se në fund të shtatorit pret një vizitë nga përfaqësues të këtyre agjencive për të konkretizuar se si do të lëvizet më tutje.

Në këtë tryezë diskutimi, kryeministri Hoti ka folur edhe për njohjen nga Izraeli si pjesë e marrëveshjes në Uashington, duke thënë se është thyer një bllokadë që Kosova e ka pasur në njohjet ndërkombëtare tash e tre vjet dhe se njohja nga Izraeli hap një kapitull komplet të ri të konsolidimit të shtetësisë së Kosovës në arenën ndërkombëtare.

“Dhe, unë besoj se pritjet e mia janë që gjatë kësaj periudhe njëvjeçare ne duhet ta mbyllim çështjen në mes të Kosovës dhe Serbisë. Nuk ka momentum më të mirë, ka një interesim të drejtpërdrejtë të presidentit të ShBA-së, Trump dhe kryeqendrave të BE-së për këtë proces dhe ndoshta për arsye gjeopolitike që të mbyllet ky regjion i Ballkanit Perëndimor për ndërhyrjet që vijnë vazhdimisht nga Lindja”, tha kryeministri Hoti.

Gjithashtu, Kryeministri Hoti ka thënë se ka bërë kërkesë që të raportojë në Kuvendin e Kosovës, siç edhe kanë kërkuar deputetët që të raportohet pas çdo raundi të bisedimeve.

“Pas nënshkrimit të marrëveshjes në Uashington, ne jemi kthyer në Bruksel, në vazhdimin e dialogut në takimin e nivelit të lartë për të adresuar tash çështje të tjera”, pohoi kryeministri Hoti, i cili, po ashtu, tha se është zotuar që nga dita e parë se për të gjitha temat do të jetë transparent si para shoqërisë civile, deputetëve dhe qytetarëve.

Me këtë rast, kryeministri Hoti vlerësoi se duhet një konsensus politik për të ratifikuar këtë marrëveshje.

Në përmbyllje të kësaj tryeze, kryeministri Hoti iu është përgjigjur edhe shumë pyetjeve të parashtruara nga përfaqësuesit e shoqërisë civile dhe të mediave.

Basha pakt të ri me Ramën?!

September 13, 2017 by dgreca

Pas “vdekjes” së 18 majit, Basha pakt të ri me Ramën: ndryshime në ndarjen territoriale/

Shpallja e djeshme nga Lulzim Basha se “marrëveshja e 18 Majit me Edi Ramën ka vdekur”, është dhe zhvillimi kryesor politik i ditës përpos debatit dhe votimit për “Rama 2”, e cila gjithsesi nuk ka problem numrash në Kuvend.

Kreu i opozitës shqiptare, deklaroi literalisht se pakti parazgjedhor me të gjitha pikat e tij nuk ekziston më.

Lulzim Basha e grisi atë marrëveshje në mënyrë publike, duke e cilësuar si një relike të vjetër, a thua se e kishte firmosur dikush tjetër dhe jo personi që e deklamonte atë.

Por, cili ishte mesazhi i Lulzim Bashës në fjalimin e tij, që ka tërhequr edhe vëmendjen e ambasadorit amerikan në Tiranë, Donald Lu, i cili drekoi me kreun e PD-së.

Mesazhi i Bashës ishte i qartë: marrveshja e 18 majit ka vdekur, nuk njoh asnjë pikë të saj, dhe jam gati për një marrëveshje të re, me kushte të reja, ndryshe do të ketë kryengritje!

Po ç’përmban marrëveshja e re? Në një farë mënyrë, ose thënë qartë, atë që përmbante “e vjetra” që vrau kreu i PD. Pra reformë Kushtetuese, Zgjedhore dhe ajo që është më e rëndësishmja Administrative.

Burime pranë mazhorancës, i bënë të ditur tesheshi.com se mesazhi është përçuar si një ftesë e Lulzim Bashës për një pakt të ri me Edi Ramën, pra për një vazhdim të 18 majit me një format të ri.

Një format, që Lulzim Basha kërkon ta shesë brenda partisë së plagosur Demokratike si një paketë e re me kushte ndaj qeverisë.

Siç mësohet ajo që është më e rëndësishmja nga kushtet që PD-ja pritet t’i vendosë qeverisë, ose më mirë mazhorancës në këmbim të luajalitetit për të miratuar së bashku reformat e mëdha, është rishikimi i Ndarjes Administrative dhe Territoriale.

Partia Demokratike kërkon të hyjë në zgjedhjet lokale të vitit 2019 me një ndarje të ndryshuar, ku të ketë më shumë qendra administrative, pra bashki në veri të vendit, dhe më pak në jug.

Siç mësohet, PD-ja do të kërkojë që Lezhën dhe Shëngjinin ta ndajë sërish në dy bashki, Shkodrën dhe Dukagjinin, si dhe nënshkodrën në bashki të veçanta, por ajo që është më dramatikja në këtë mesele, është se ka gjasa që të vihet dorë edhe mbi Himarën.

Pra që të kthehet ndarja administrative ku t’i hiqet Himarës pjesa e Labërisë. Në këtë aspekt Athina po bën presion të madh, duke vendosur edhe kushtin e vetos për negociatat me BE-së.

Vetë takimi i ambasadorit amerikan Donald Lu, me ambasadoren greke në Tiranë, gjatë seancave të Kuvendit në mënyrë demonstrative, ishte një sinjal për një mundësi të tillë.

Ndërkaq, edhe Rama këtë herë nuk ishte aq i ashpër me Athinën si herët e tjera.

Lulzim Basha, siç e kemi shkruar më herët, pritet të jetë protagonist i reformës kushtetuese dhe zgjedhore, ku sipas parashikimeve do të drejtojë ai vetë Komisionin e Posaçëm Parlamentar.

Dhe duke marrë rolin e protagonistit, pra prodhuesit të reformës de fakto, ai do të negocojë edhe për Himarën, e cila po kërkohet me ngulm nga Athina.

Një tjetër kërkesë e PD-së për reformën territoriale është që edhe Paskuqani të jetë bashki në vete, duke i bashkëngjitur Valiasin, i cili aktualisht është në bashkinë e madhe të kryeqytetit.

Tiranës, pritet që të kërkohet edhe shkëputja e periferisë pra që Farka bashkë me ish-komunat e pjesës Lindore të grumbullohen në një bashki më vete, sikur edhe Kashari, të cilit mund t’i bashangjitet pjesë të Domjes apo Laknasit që sot janë pjesë e bashkisë Vorë.

Me këtë ndarje, PD-ja shpreson të faktorizohet duke fituar më shumë asete elektorale që mund ta ringjallin atë politikisht, duke mos e lënë në kushtet aktuale ku PD mendon se është e destinuar të humbasë.

Nuk dihet nëse do të pranohen të gjitha nga Edi Rama, por ka gjasa që një pjesë e madhe të këtyre kushteve të pranohen edhe si pjesë e vullnetit politik të shprehur nga Kryeministri për marrëveshje institucionale.

Lulzim Basha, do ta përdorë rolin e tij si inspirues i reformës si një atu politik, për tu ringritur si brenda PD-së, por edhe në elektorat.

Përmendja e termit “kryengritje”, kreu i opozitës synon ta mbajë si një “shpatë Demokleu” që të rrijë si një kërcënim për Edi Ramën se ai kurdoherë mund ta hapë çadrën e famshme, që mazhorancës së vetme të Ramës, mund t’i shkatërrojë imazhin duke rrezikuar izolimin politik.

Dhe këtu Basha nuk ka gjë për të humbur, ç’pati, i humbi më 25 qershor.

Është Edi Rama, ai që rrezikon të prishë një fitore që e kishte kërkuar prej kohësh. Ndaj sipas të gjitha gjasave ai do ta hapë krahun lirisht për atë që e quajti hapur në Kuvend: “konkurrent, e jo kundërshtar”.

CFARE THANE RAMA E BASHA NE KUVEND

RAMA

Askush nuk fiton nga diskretidimi i qeverisë shqiptare në botë. Në shumë vende kurrë konkurrentët nuk njollosin njëri-tjetrin. Zgjedhjet nuk fitohen duke nxitur të huajt të deklarojnë sensacione të zymta për vendin që është i të gjithëve. Pushteti nuk merret duke shkuar në Bruksel të ndarë. Dekriminalizimi dhe kanabsi, probleme reale, por u frynë. Opozita luajti një rol në shkundjen tonë ndaj këtyre problematikave.

Edhe opozita ka rolin e saj në rezultatin e sotëm ndaj kanabisit. Problemet t’i zgjidhim njëherë në shqip. Po flitet për krim shqiptar në disa kryeqytete, ndaj kësaj duhet të jemi bashkë. Transparenca është gjë e madhe që na bashkon, por cfarë na pengon të hapim një dialog serioz për të mos vijuar edhe 4 vite në avazin e vjetër, për të mos i lënë këto probleme në rrjedhje të lirë për të gjetur zgjidhje në minutë n e fundit, pasi jemi bërë gazi i botës.

Kush fiton prej nesh kur përballemi me njëri tjetrin. Ne emër të shumicës unë u shpreh sot opozitarëve gatishmërinë për një nisëm të hapur për gjërat që na bashkojnë, paketa e detyrimeve madhore e partive të vërteta dhe politikanëve seriozë të cdo vendi. Shqipëria e bashkua me europën dhe bashkimi i shqiptarëve janë apo nuk janë pjesë e kësaj pakete. Kush fiton nga mosmarrëveshjet, që kthehen në pengesa në rrugën drejt BE. Nuk po flas për Shqipëri të madhe or një popull të vetëm shqiptar, që sot ka dy shtete, është ende larg i lidhur në të drejta dhe detyrime me qëllimet e mëdha dhe i unifikuar në përpjekjet.

Axhendat partiake nuk do të marrin peng rendin e ditës së Kuvendit. Jemi të vetëdijshëm për gabimet dhe defektet tona. Jo armiq, por konkurrentë, shpresoj të jetë kështu edhe për ju. 25 qershori provoi se në Shqipëri nuk fiton kur i fryn konfliktit, akuzon, shan dhe fyen, kush bllokon.

BASHA

“Ky parlament nuk shpreh vullnetin e qytetarëve por tjetërsimin dhe vjedhjen e vullnetit të tyre. Raporti paraprak i OSBE-ODIHR sikundër edhe ai i ministrave teknikë faktojnë shitblerje masive të votave, përdorim të grupeve të strukturuara kriminale, skedimin dhe matrikullimin e shqiptarëve, duke i shantazhuar, intimiduar, frikësuar dhe terrorizuar për t’u blerë varfërinë dhe mjerimin e thelluar nga kjo qeveri”.

Thelbi i marrëveshjes së 18 majit, ishin zgjedhjet e lira dhe të ndershme. Ndaj, dhe zgjedhjet e 25 qershorit shënuan edhe vdekjen e kësaj marrëveshjeje. Aleanca e pandërprerë asnjë cast e Ramanjishit me krimin dhe shitblerja e votave me paratë e drogës dhe të korrupsionit e vranë marrëveshjen dhe rikonfirmuan problemin numër 1 të Shjqipërisë: vjedhjen dhe tjetërsimin e vullnetit të shqiptarëve për hir të pushtetit personal dhe privat të Edi Ramës.

E vetmja gjë që arriti 8 maji është që 450.000 shqiptarë përfaqësohen sot këtu në këtë sallë nga opozita, nga Partia Demokratike. I vetmi sukses i 18 majit është që ti nuk arrite ta emërosh opozitën tënde siç e kishe nisur dhe siç doje ta bitisje

Nëse 25 qershori e vrau marrëvëshjen e 18 majit, 9 shtatori e varrosi atë përfundimisht. Jo vetëm zgjedhja në krye të kuvendit e Gramoz Rucit, të cilit i është ndaluar përjetësisht hyrja në SHBA për shkak të lidhjeve të tij me krimin dhe trafiqet, por edhe akti mafioz i blerjes apo tjetërsimit të 2 votave opozitare, është shprehja më e qartë se në vend të bashkëekzistencës demokratike me kundërshtarin, t’i zgjedh gjithmonë shitblerjen dhe manipulimin.

(tesheshi)

Kosovë-Serbi, në Bruksel arrihet marrëveshja për njohjen reciproke të diplomave

September 29, 2015 by dgreca

-Kjo marrëveshje i jep fund periudhës së dështimit të njohjes së diplomave universitare nga ana e Serbisë/

-Marrëveshja për njohjen reciproke të diplomave do të ndihmojë me theks të veçantë popullatën shqiptare të Luginës së Preshevës/

-Delegacioni i Kosovës kërkoi ndihmën e BE-së që të zhbllokohet dërgesa e teksteve shkollore për Luginën e Preshevës/

Nga Behlul Jashari/ PRISHTINË, 29 Shtator 2015/ Kosova dhe Serbia në bisedimevt në Bruksel kanë arritur sot marrëveshje për njohjen reciproke të diplomave.

Me këtë marrëveshje palët u zotuan njohjen reciproke të diplomave si dhe respektimin e procedurave dhe afateve sipas legjislacionit respektiv të secilit shtet. Kjo marrëveshje përfshinë të gjitha nivelet universitare (Bachellor, Master dhe Doktoratë), diplomat e shkollave të mesme, arsimin profesional, si dhe nivelin e pestë të kualifikimeve sipas kornizës evropiane të kualifikimeve.
Procesi i certifikimit të diplomave të institucioneve respektive të arsimit do të vazhdojë përmes certifikimit nga Asociacioni i Universiteteve Evropiane (AUE), të cilat pastaj do të njihen nga shtetet përkatëse për çështje dhe qëllime të tregut të punës apo për studime të mëtejme, varësisht nga interesimi i aplikantëve.

Kjo marrëveshje i jep fund periudhës së dështimit të njohjes së diplomave universitare nga ana e Serbisë, dhe kërkon që brenda afatit prej pesë muajsh të njihen të gjitha diplomat e certifikuara nga ana e AUE në një numër prej mbi 400 diploma të certifikuara, të cilat Serbia ka dështuar t’i njohë deri më tani.
Po ashtu, me këtë marrëveshje përcaktohet mekanizmi mbikëqyrës i procesit të zbatimit të Marrëveshjes që përbëhet nga tre palët (pala e Kosovës, BE-së dhe e Serbisë) dhe që ka obligim të raportojë, vlerësojë dhe përmirësojë sipas nevojës procesin e zbatimit të marrëveshjes.

Marrëveshja për njohjen reciproke të diplomave do të ndihmojë me theks të veçantë pjesëtarët e popullatës shqiptare të Luginës së Preshevës të cilët kryesisht studimet e tyre i kryejnë në institucionet e arsimit në Republikën e Kosovës dhe kanë nevojë të kthehen dhe të shërbejnë në vendet e tyre për të ndihmuar në zhvillimin e komunitetit shqiptar në Luginë dhe shoqërisë në përgjithësi.
Qeveria e Kosovës gjithmonë ka qenë e shqetësuar dhe në vazhdimësi i ka raportuar për pengesat e vëna nga ana e Serbisë popullatës shqiptare në Luginën e Preshevës në këtë aspekt, thekson njoftimi i dërguar sonte nga Brukseli.
Bëhet e ditur se, po ashtu në takimin për diplomat, nga ana e delegacionit kosovar, ministrja e Dialogut Edita Tahiri dhe ministri i Arsimit, Shkencës e Teknologjisë, Arsim Bajrami, shtruan çështjen e shpërndarjes së teksteve shkollore për Luginën e Preshevës dhe kërkuan ndihmën e BE-së që dërgesa e Kosovës të zhbllokohet dhe të dërgohet tek studentët. Pala serbe mori obligim që brenda dy ditësh të jap përgjigje për këtë çështje. Ndërsa delegacioni i Kosovës konfirmoi zbatimin e reciprocitetit për këtë çështje.
Kosova dhe Serbia në procesin drejt normalizimit të marrëdhënieve, të kryesuar nga BE e mbështetur nga SHBA, takimin e parë në nivel të lartë kryeministror në Bruksel e kanë zhvilluar në 19 tetor 2012, ndërsa të 28-in në 25 gusht 2015.

Bisedimet në nivel kryeministrash kanë pasuar dialogun teknik, të filluar në 8 mars 2011, poashtu në Bruksel, ku në krye të delegacionit kosovar ishte Edita Tahiri atëherë zëvendëskryeministre, tash ministre e Dialogut.

23 VJET NGA MARRËVESHJA QË SOLLI JANULLATOSIN NË KRYE TË KISHËS AUTOQEFALE SHQIPTARE

June 24, 2015 by dgreca

* A është rastësi që marrëveshja u ënnshkrua në Korfuz, pikërisht aty ku është nënshkruar më 1914, aneksimi i jugut të Shqipërisë?!/

*Nënshkrimi i marrëveshjes “Kapllani-Samaras” të 27 qershorit 1991 në Korfuz, kishte haraç pranimin e z.Anastas Janullatosit si drejtues i përkohshëm në Kishën Ortodokse të Shqipërisë

Shkruan: Arben Llalla-Historian/

U mbushën 23 vite që në krye të kishës autoqefale të Shqipërisë ndodhet Anastasi, një i huaj që erdhi përkohësisht për riorganizimin e kishës, por që u ngul dhe nuk po shkulet më.Ai erdhi me një marrëveshje midis dy vendeve të nënshkruar në fillim të vitit 1991, në ishullin e Korfuzit. Ministri i jashtëm i Shqipërisë, z.Muhamed Kapllani dhe ai i Greqisë, z.Andoni Samaras më 27.6.1991, në Korfuz ku nënshkruan marrëveshjen se Greqia pranonte refugjatët shqiptar me statutin ekonomik dhe jo politik.Nënshkrimi i kësaj marrëveshje kishte haraç pranimin e z.Anastas Janullatosit si drejtues i përkohshëm në Kishën Ortodokse të Shqipërisë.

Ishte koha kur Shqipëria kalonte çaste të vështira, ku z.Nano ishte vetëm disa muaj Kryeministër i një vendi në çorientuar dhe të rrënuar ekonomikisht.Ka disa gjëra interesante se ditën që është nënshkruar kjo marrëveshje midis dy vende në ishullin e Korfuzit, atje ku është nënshkruar më 1914, aneksimi i jugut të Shqipërisë.

Akademiku Ylli Popa gjendej për një vizitë në shtëpinë e Anastas Janullatosit në Athinë.Lind pyetja: Rastësisht z.Popa ndodhej për kafe në shtëpinë e Anastasit pikërisht atë ditë? Nga njiheshin dhe përse në shtëpinë e Anastasit, Popa piu kafe shoqërore kur ata të dy nuk kishin njohje më parë?Sot Shqipëria është më mirë politikisht dhe ekonomikisht se në fillimet e viteve 1990, shumë shqiptar ortodoks mund ta drejtojnë tashme Kishën Autoqefale të Shqipërisë, do të ishte në nder të Kryepeshkop Anastasit që të largohet nga ky post me krenari sepse nëse ai largohet nga ligjet e natyrës, figura e këtij kleriku të imponuar herë do ndriçohet edhe herë do të errësohet duke krijuar probleme midis ortodoksëve shqiptar.Ndoshta pas vdekjes do jetë vetë figura e tij që mund të rrënojë atë që ai e riorganizoj prej kaq shumë vitesh.(Ne Foto: Vangjel Dule duke ndihmuar ne meshen e Janullatos)

Mustafa: Marrëveshja siguron funksionimin e gjyqësisë në gjithë territorin e Kosovës

February 10, 2015 by dgreca

Aleksander Vuçiç: Kemi bërë gjithçka për popullin tonë në Kosovë/
PRISHTINË, 10 Shkurt/- Kryeministri i Kosovës, Isa Mustafa, deklaroi sot se marrëveshja e arritur në Bruksel siguron funksionimin e gjyqësisë në gjithë territorin e Kosovës.
Në një postim në rrjetin social Facebook, Mustafa thekson se “sot në mëngjes përfunduam një marrëveshje shumë të rëndësishme, e cila siguron funksionimin e gjyqësisë në gjithë territorin e Kosovës. Falenderoj përfaqësuesen e lartë të BE-së, Federica Mogerini dhe anëtarët e delegacionit, zv kryeministrin Hashim Thaçi, Ministrin e Drejtësisë, Hajredin Kuci, Ministren Edita Tahiri, Ministrin e integrimeve Evropiane, Bekim Collaku, Blerim Shala dhe Valon Halimi, këshilltarin tim për çështje të emigracionit dhe migrimit. Falenderoj edhe ekipet profesionale që punuan gjatë dhe me përkushtim për këtë fushë të rëndësishme”.
Kosova dhe Serbia arritën marrëveshjen për drejtësinë në procesin drejt normalizimit të marrëdhënieve mes këtyre dy shteteve, të kryesuar nga BE dhe mbështetur nga SHBA, në takimin e natës së kaluar në Bruksel të raundit të 24-ët të dialogut në nivel të lartë, të parit të kryeministrave të rinj, Isa Mustafa e Aleksandar Vuçiç. Ndërmjetësuar nga përfaqësuesja e lartë për politikë të jashtme dhe siguri të Bashkimit Evropian Federica Mogherini, marrëveshja u arrit pas më shumë se katër orë bisedimesh.
Vuçiç: Kemi bërë gjithçka për popullin tonë në Kosovë/
Kryeministri i Serbisë, Aleksandar Vuçiq, ka thënë se delegacioni i Serbisë në bisedimet me Kosovën në Bruksel, ka bërë gjithçka për popullin e tij në Kosovë “në rrethana dhe kushte jo të lehta”.
Kryeministrat e Kosovës dhe të Serbisë kanë arritur në orët e para të ditës së sotme marrëveshje për drejtësinë.
“Pres dhe besoj që i gjithë komuniteti ndërkombëtar të mbështesë përpjekjet tona të rënda në dialogun me shqiptarët”, ka thënë Vuçiq në Beograd, transmeton Shërbimi i Ballkanit i Radios Evropa e Lirë.
Sipas tij, problem në zbatimin e marrëveshjes për drejtësinë do të jetë numri i gjykatësve dhe prokurorëve serbë në Kosovë.
“Kemi luftuar që të kemi shumë vende, por çështja është se a do të kemi mjaft njerëz që të kryejnë këtë punë”, ka thënë Vuçiq.

MARREVESHJA
Kosova dhe Serbia arritën marrëveshjen për drejtësinë në procesin drejt normalizimit të marrëdhënieve mes këtyre dy shteteve, të kryesuar nga BE dhe mbështetur nga SHBA, në takimin e natës së kaluar në Bruksel të raundit të 24-ët të dialogut në nivel të lartë, të parit të kryeministrave të rinj, Isa Mustafa e Aleksandar Vuçiç.
Ndërmjetësuar nga përfaqësuesja e lartë për politikë të jashtme dhe siguri të Bashkimit Evropian Federica Mogherini, marrëveshja u arrit pas më shumë se katër orë bisedimesh.
Në një komunikatë të Mogherini thuhet se të dy kryeministrat “përmbyllën një kapitull kritik për zbatimin e marrëveshjes së Brukselit, që do të përmirësojë në mënyrë substanciale jetën e qytetarëve në terren”.
Ende nuk janë bërë të ditura hollësitë e marrëveshjes.
Mogherini tha se “të dy kryeministrat zhvilluan debate gjithëpërfshirëse për një varg çështjesh, si dhe shprehën përkushtimin e tyre për vazhdimin e përparimit në rrugën e normalizimit të marrëdhënieve.

“Kryeministri Mustafa dhe kryeministri Vuçiç kanë rënë dakord të punojnë së bashku për të trajtuar shqetësimet rajonale, midis të cilave edhe çështjen akute të migrimit të paligjshëm nga Kosova”, thuhet në komunikatën e Mogherinit.
Përfaqësuesesja e lartë e BE-së, Federica Mogherini, takoi mbrëmë në Bruksel duke nisur nga ora 18:00 fillimisht kryeministrin e Kosovës, Isa Mustafa e pastaj atë të Serbisë, Aleksandar Vuçiç, dhe më pas u vazhdua me takimin e përbashkët.
“Ka përfunduar pas orës 02:00 takimi në Bruksel. Palët kanë nënshkruar marrëveshje për drejtësinë”, ka raportuar media kosovare nga bisedimet.
Pas takimit kryeministri Mustafa tha se marrëveshja mundëson funksionimin e sistemit unik të drejtësisë në Kosovë.
I pyetur nëse janë diskutuar tema të tjera në dialog, Mustafa u shpreh se nuk ka pasur kohë për të tilla.
Ai ka thënë se nuk do të hapen tema të reja, pa u shuar institucionet paralele në veri të Kosovës me theks të veçantë “Mbrojtja Civile”.
Kryeministri serb Vuçiç tha se “me arritjen e marrëveshjes Gjykata e Mitrovicës do të ketë 9 prokurorë shqiptarë e 9 serbë”.
Në këtë proces takimesh kryeministrore Kosovë-Serbi për herë të parë ndërmjetësoi përfaqësuesesja e re e lartë të BE-së, Federica Mogherini, e cila ka pasuar Baroneshën Catherine Ashton, ndërmjetësuesen e 23 raundeve të kryeministrave të mëparshëm Hashim Thaçi e Ivica Daçiç, aktualisht zv/kryeministra e ministra të jashtëm, pjesëmarrës edhe në takimin e mbrëmshëm.
Thaçi dhe Daçiç kanë zhvilluar takimin e parë në 19 tetor të vitit 2012, ndërsa në 19 prill 2013 kanë nënshkruar Marrëveshjen për Normalizimin e Marrëdhënieve ndërmjet Kosovës dhe Serbisë, të vlerësuar historike.
Kryeministri kosovar Mustafa në konferencën e fundit për shtyp në Prishtinë, në 3 shkurt, ka theksuar se “jemi shumë të interesuar që të bëjmë integrimin e veriut, që të krijojmë ura të bashkëpunimit me të gjitha komunitetet në Kosovë, veçanërisht me komunitetin serb, të vazhdojmë dialogun në Bruksel për të zgjidhur të gjitha problemet dhe çështjet që i konsiderojmë se janë të diskutueshme dhe të debatueshme me qeverinë serbe për të krijuar një stabilitet në rajon dhe për të ardhur deri te gjendja që Serbia do ta pranojë pavarësinë e Republikës së Kosovës dhe ne do të punojmë në këtë aspekt”.
Dje, Kryesia e Kuvendit kosovar u njoftua dhe e mirëpriti shkresën e kryeministrit të Kosovës, Isa Mustafa, nëpërmjet të cilës ai shpreh gatishmërinë për ta njoftuar Kuvendin e Kosovës lidhur me takimin në Bruksel me kryeministrin e Serbisë.
Nga takimi i 31 marsit 2014, i cili ishte i 23-ti dhe i fundit Thaçi-Daçiç, bisedimet në Bruksel, me ndërmjetësimin e BE-së, të nivelit të lartë kryeministror Prishtinë-Beograd për normalizim marrëdhëniesh kanë pasur një ndërprerje prej afër 10 muajsh, gjatë së cilës kohë, fillimisht në Serbi e pastaj në Kosovë janë zhvilluar zgjedhje, nga të cilat dolën qeveritë e reja të dy shteteve dialoguese.