Të Hënën me 1 Prill 2019, poeti bashkatdhetar nga Kosova, Neki Lulaj, me banim në Gjermani, vizitoi VATRËN për herë të dytë. Mysafiri i njohur si poet i talentuar, por edhe si aktivist në Diasporë: Kryetar i Lidhjes Shqiptare në Botë për 7 Lande të Gjermanisë dhe Nënkryetar i Lidhjes së Shkrimtarëve e Artistëve Shqiptarë në Gjermani, u prit nga Editori i Gazetës DIELLI, Dalip Greca. Editori e njohu mysafirin me përgatitjet që po bën VATRA për ta festuar 110 Vjetorin e Gazetës “DIELLI”, me Konferencën Shkencore, ku do të përcjellin Kumtesat e tyre studues të njohur shqiptarë dhe amerikanë.
Mysafiri tha se do të ndjehet i nderuar pasi do të jetë pjesë e kësaj Konference ditën e Shtunë me 6 Prill.
Z. Lulaj informoi për veprimtaritë e shoqatave që ai drejton dhe për krijimtarinë e tij artistike. Për bibliotekën e VATRËS ai dhuroi librin e tij me poezi “KODI I TOKËS”.
Poeti vizitoi ekspozitën kushtuar 107 vjetorit të Vatrës si dhe Bibliotekën së bashku me arkivin.
Në librin e mysafirëve Neki Lulaj shkroi mbresat dhe vlerësimet për vizitën e dytë në VATËR: Kjo është vizita ime e dytë në VATËR. Jam me statusin e poetit, të mërgimtarit, të Kryetarit të Lidhjes së Shqiptarëve në Botë për 7 Lande të Gjermanisë, si dhe të nën/kryetarit të Lidhjes së Shkrimtarëve shqiptarë për Gjermaninë…Ta kesh fatin e bardhë e ta vizitosh VATRËN don të thotë të pasurohesh shpirtërisht me Historikun e VATRËS prej rrëfimeve të Editori të Diellit. Këtu në VATËR bëhet një punë kolosale për të mbajtur gjallë shpirtin e shkapërderdhur shqiptar në kontinentin e largët prej Vendlindjes. Sot këtu takova mikun tim, Editorin e Diellit, folëm dhe shkëmbyem mendime për Nolin, për Konicën, për Mid’hat Frashërin, dhe “u takuam” me të gjithë shërbestarët e Kombit, që përmes Vatrës dhanë c’mundën, pasuri e mall, madje edhe jetën sic ndodhi me: Kol Tromarën, Bahri Omarin, Kristo Kirkën, Aqif Përmetin, Aqile Tasin, Andon Frashërin, Kolë Rodhen, Ali Kucin e shumë të tjerë.
Sa kanë jetë rrezet e DIELLIT pastë udhëtim në kohë VATRA , VATRANËT DHE DIELLI SHQIPTAR(Emrat e të cilëve i mësova kur isha fëmijë).