Çmimet e edicionit të 72-të Golden Globes do të ndahen më 11 janar, duke hapur kështu edhe të ashtuquajturin sezoni i çmimeve hollivudiane./
Hollywood/12/Dhjetor/ Nominimet për çmimet prestigjioze artistike “Golden Globe”, i ka dominuar filmi i veçantë për botën e show-biznesit, “Birdman”, me shtatë nominime gjithsej.
Drama “Boyhood” dhe filmi biografik “The Imitation Game” kanë marrë nga pesë nominime secili, dhe do të garojnë me filmin “Selma” me katër nominime, aq sa patën edhe “The Theory of Everything”, “Gone Girl” dhe “The Grand Budapest Hotel”.
Në kategorinë e aktores më të mirë, garojnë Jennifer Aniston, Felicity Jones, Julianne Moore, Rosamund Pike dhe Reese Witherspoon. Kategoria e aktorit më të mirë është një garë midis Steve Carell, Oyelowo, Benedict Cumberbatch, Jake Gyllenhaal dhe Eddie Redmayne.
E vetmja regjisore femër që garon për çmimin e regjisores më të mirë është Ana DuVernay, e cila është në garë me Wes Anderson, David Fincher, Alejandro Gonzalez Inarritu dhe Richard Linklater.
Çmimet e edicionit të 72-të Golden Globes do të ndahen më 11 janar, duke hapur kështu edhe të ashtuquajturin sezoni i çmimeve hollivudiane.
Thaçi ia dorëzoi zyrtarisht detyrën Isa Mustafës
Nga Behlul Jashari/.- Me ceremoni solemne shtetërore, pritur me Gardën e FSK-së para Kryeministrisë së Kosovës, ka nisur sot pritja për dorëzim-pranimin e detyrës së Kryeminisrit nga Hashim Thaçi, lideri PDK-së, te partneri i koalicionit bashkëqeverisës, lideri i LDK-së, Isa Mustafa.
Dorëzim-pranimi i detyrës u bë brenda Kabinetit të Kryeministrit, në hyrjen e të cilit ishte shkruar emri i kreut të ri të qeverisë së Kosovës, Isa Mustafa.
Gjatë ceremonisë, mes shtrëngimeve të duarve e në një atmosferë të përzemërt bashkëpunimi e përkushtimi, Thaçi ia dorëzoi detyrën Mustafës.
Qeveria e Republikës së Kosovës, e kyeministrit të ri Isa Mustafa, pas pak zhvillon mbledhjen e parë, në përbërjen ku Hashim Thaçi do jetë zv/kryeministër i parë dhe ministër i Jashtëm, derisa të zgjedhet President i Kosovës, sipas marrëveshjes PDK-LDK për bashkëqeverisje, pas mandatit të Presidentes aktuale Atifete Jahjaga.
Edhe pse zgjedhjet parlamentare të 8 qershorit 2014 ishin të parakohëshme, kryeministri Hashim Thaçi përmbushë të plotë mandatin e dytë, që është katërvjeçar, pasi sot u mbushën plot katër vjet nga zgjedhjet parlamentare të 12 dhjetorit 2010, të cilat ishin të jashtëzakonshme.
Ato zgjedhje u organizuan për pak më shumë se një muaj pas shpërndarjes së Kuvendit të Kosovës në 2 nëntor 2010, që ishte shpërndarja e parë në historinë e parlamentarizmit kosovar, e cila u pasua me të dytën në 7 maj 2014 dhe me zgjedhjet e parakohëshme pas një muaji, në 8 qershor.
Qeveria e re e Kosovës, ku përfaqësohen edhe komunitetet pakicë me 1 zv/kryeministër e 4 ministra, u votua në Kuvend në 8 qershor në një seancë të jashtëzakonshme, pasi po atë ditë kishte përfunduar seanca konstituive e nisur në 17 korrik dhe që pati dy ndërprerje e një shtyrje./.
KOMB SHQIPTAR, KOMB KOSOVAR?!
Dikujt nuk i intereson që shqiptarët në të dy anët e kufirit të afrohen vazhdimisht si shqiptarë, si pjesë të një trupi të çarë me shpatë. Dëshirojnë me i nda përfundimisht “shqiptarë” veç e “kosovarë” veç. Më keq se ç’kanë qenë ndarë mizorisht për njëqind vjet./
Nga Mehmet Elezi/
Do gazeta po na bëjnë çorbë, shkruan Flora Deda. Jo “kombi shqiptar”, jo “kombi kosovar”. Ç’duan që na ngatërrojnë, a nuk jemi të tërë një komb shqiptar?
1.Mendoj se kjo “ngatërresë” ka prapavijë politike, për të cilën jam shprehur shumë herë. Por ndodh që është edhe çështje gjuhësore. Për prapavijën politike. Është shfaqur hapur qysh fillim të viteve 1990, kur në disa media filloi me u folë për “shqiptarë” dhe “kosovarë”. Më pas një e përmuajshme lëshoi idenë e “dy kombeve shqipfolëse”. Ky “zbulim” rimerret kohë pas kohe e qitet në treg si mall origjinal.
Dikujt nuk i intereson që shqiptarët në të dy anët e kufirit të afrohen vazhdimisht si shqiptarë, si pjesë të një trupi të çarë me shpatë. Dëshirojnë me i nda përfundimisht “shqiptarë” veç e “kosovarë” veç. Më keq se ç’kanë qenë ndarë mizorisht për njëqind vjet.
Nuk është përpjekje e re.
Në librin “Në gjuhë” dhe “për gjuhë” (Dukagjini 1999), akademik Rexhep Ismajli ka nënvizuar mishërimin ligjor të kësaj strategjie. Në tri kushtetutat e Jugosllavisë (1946, 1953, 1963) dhe në tri kushtetutat e Serbisë (1947, 1953, 1963), shqiptarët trajtohen si “kombe” të ndryshme. Shqiptarët e Jugosllavisë emërtohen Shiptari, gjuha shqipe kur është fjala për ta emërtohet shiptarski jezik. Ndërsa shqiptarët e Shqipërisë quhen Albanci, gjuha shqipe në Shqipëri albanski ose arbanski jezik.
Në memorandumin e Akademisë Serbe të Shkencave e Arteve të vitit 1986, që i shtroi rrugën Milosheviçit, fakti që këtyre dy “entiteteve”, “Shiptari” e “Albanci”, u qe lejuar me njësue gjuhën dhe flamurin, cilësohet “lëshim” që prek interesat serbe.
2.“Çorba” – po përdor cilësimin e zonjës Deda – ka edhe një anë gjuhësore.
Në shumicën e gjuhëve perëndimore për komb përdoret nacion (nation). Fjalë me gurrë latine, lidhet me foljen me le, me u lindë. Fjalën nacion përkthyesit në shqip e japin gjithmonë komb. Dhe këtu shfaqet problemi. Duke qenë se në botën e sotme mungon një përkufizim i gjithëpranuar për kombin, në do gjuhë kuptohet ndryshe, në do të tjera ndryshe.
Përmbledhtazi:
Në anglisht nacion ka tjetër përmbajtje nga komb në shqip. Nacion në anglisht shpreh tërësinë e shtetasve të një vendi, pavarësisht nga prejardhja, gjuha amëtare, gjaku, raca etj. Në këtë kuptim presidentët amerikanë flasin për kombin amerikan. Në kombin amerikan bën pjesë krejt popullsia e SHBA: të bardhë, të zinj, të verdhë, latinos, indigjenë…
Komb në shqip është tjetërgjë. Për ne kombi shqiptar përbëhet nga të gjithë ata që gjuhën shqipe kanë gjuhë nëne, që kanë rrënjë, gjak e histori të njëjtë dhe nderojnë të njëjtat simbole kombëtare. Pavarësisht nga shtetet ku jetojnë e pasaportat që mbajnë.
Ky koncept është trashëguar prej rilindasve. Ata përshtatën fjalën komb me prejardhje arabe dhe e mbushën me përmbajtje sipas rrethanave politike të kohës. Për komb gjuha shqipe ka fjalën e vet të mirëfilltë lem. “Me i dhanë lemit e polemit nji të keqe të msheftë…”, thuhet në Kanunin e Skanderbegut, mbledhur e kodifikuar nga imzot Frano Ilia. Lem, ashtu si nacion, lidhet me foljen me le. Ndonëse me shtjellim jo plotësisht të saktë, këtë fjalë e kanë edhe fjalorët e akademisë (marrë prej Gazullit). Fjala shqip ka mbetur në hije
Pikënisje e kombit, në kuptimin që i jep gjuha shqipe, është etnia, por nuk janë e njëjta gjë. Kombi është koncept i shoqërive pasfeudale, është “etni” në shkallën moderne të zhvillimit.
Për një arsye të thjeshtë, kurrfarë alibie nuk mund të ndërtohet duke cituar thënie të miqve tanë që paskan përmendur “kombin kosovar”. Nëse Hillari Klintoni, Toni Bleri apo Mati Ahtisari kanë shqiptuar “komb kosovar”, ata s’kanë menduar shqip dhe nuk janë shprehur shqip. Kanë menduar anglisht dhe në mendje kanë pasur konceptin që bart fjala nation në anglisht.
Një përkthyes i saktë togfjalëshin anglisht “Kosovar Nation” nuk e përkthen “kombi kosovar”. Një përkthyes i saktë “Kosovar Nation” e shqipëron “populli i Kosovës”. Togfjalëshi “populli i Kosovës” nënkupton tërësinë e qytetarëve të Republikës së Kosovës, shumicën shqiptare dhe pakicat serbe, turke, rome…, pra “kombin” sipas konceptit amerikan. Në këtë kuptim flitet për komb shumetnik (multiethnic nation) në Kosovë. Shqip nuk mund të thuhet Kosova është komb shumetnik. Thuhet Kosova është vend shumetnik ose shoqëri shumetnike.
Me të njëjtën logjikë në anglisht mund të thuhet nacioni serb për tërësinë e shtetasve me pasaportë serbe, nacioni maqedon për tërësinë e shtetasve me pasaportë maqedonase, nacioni malazias për për tërësinë e shtetasve me pasaportë malazeze. Kjo nuk do të thotë se shqiptarët e Luginës së Preshevës janë serbë, se tetovarët e të tjerë janë maqedonas, se ulqinakët e të tjerë janë malazezë. Shqiptarët e viseve të mësipërme janë shtetas të vendeve ku jetojnë, në anën tjetër janë pjesë e pandashme e kombit shqiptar me gjuhë, gjak e histori të përbashkët.
Nëse “kombi shqiptar” qenka “komb më vete”, “kombi kosovar” edhe ky qenka “komb më vete”, atëherë, sipas përhapësve të kësaj “teorie”, ku do të futeshin shqiptarët e Maqedonisë, të Luginës së Preshevës, të Malit të Zi, cila do të ishte përkatësia kombëtare e tyre? Apo do të quheshin thjesht maqedonë, serbë, malazezë dhe do të asimiloheshin?
4.Gjuha vesh mendimin. Në të njëjtën veshje mund të futet lëndë e ndryshme. Për shembull në shqip themi: fëmijë delikat, sëmuret shpesh. Anglishtja e ka fjalën delikat (delicate), por fjalia e mësipërme në anglisht do të përkthehej: fëmijë i brishtë (fragile), sëmuret shpesh. Edhe në frengjisht e njëjta gjë. Një përkthim fjalë për fjalë do ta errësonte kuptimin.
Kështu ka ndodhur edhe me fjalët nacion (nation) dhe komb.
Miqtë tanë të çmuar, që janë shprehur në anglisht për “Kosovar Nation”, janë shprehur saktë. Pahiri a dashtas, pasaktësia niset e bitiset kur nuk respektohet kumti i tekstit origjinal, kur togfjalëshi përkthehet mekanikisht “kombi kosovar”
Reagime në Tiranë për raportin e Senatit Amerikan mbi veprimtarinë e CIA-s
Kryeminisri Edi Rama foli për raportin e Senatit në pritjen me ambasadorët e akredituar në Shqipëri. Edhe ish-kryeministri Sali Berisha shpërndau një deklaratë përmes rrjeteve sociale.
Nga Ilirian Agolli/Tirane
Kryeministri i Shqipërisë Edi Rama deklaroi në mbrëmje se pati ndjesi të jashtëzakonshme nga publikimi i Raportit të Senatit Amerikan për hetimet, sipas tij, “jo fort të lavdërueshme të CIA-s” përgjatë të ashtuquajturës Luftë kundër Terrorit”. Zoti Rama tha gjatë një fjalimi para ambasadorëve të akredituar në Shqipëri që Shtetet e Bashkuara treguan edhe njëherë se ç’do të thotë të jesh një demokraci dhe të duash të mbetesh demokraci, pavarësisht kostos që kjo ka.
“…Edhe njëherë tjetër ne shqiptarët morëm provën se jemi në anën e duhur të historisë, duke qenë besnikërisht në anën e Shteteve të Bashkuara. E për ne, kjo do të thotë padyshim besnikëri në çdo angazhim ndërkombëtar për paqen apo kundër armiqve të njerëzimit, po edhe besnikëri ndaj vlerave e parimeve të demokracisë që e bëjnë fat të jetuarit në këtë pjesë të botës për njeriun e lirë” – deklaroi kryeministri Rama.
Ai tha se përballë ndodhive të hatashme si lindja e një projekti monstruoz për të ashtuquajturin Shtet Islamik, apo projekti tanimë i përfunduar i aneksimit të dhunshëm të Krimesë, Shqipëria është me fat që gjendet në projektin e Bashkimit Europian. “Jemi me fat që jemi pjesë e botës së organizuar nën ombrellën ushtarake të NATO-s dhe që kemi një partner e aleat të madh strategjik si Shtetet e Bashkuara” – theksoi zoti Rama. Ai tha se Shqipëria e ka rritur figurën e saj në rajon dhe rolin e saj në gjirin e NATO-s, si i vetmi vend anëtar i NATO-s në rajon, që nuk është anëtar i Bashkimit Europian.
“Zëri ynë në NATO ka qenë e do të vazhdojë të jetë qartësisht në mbështetje të politikës së dyerve të hapura për aspiratat e fqinjëve tanë në rajon lidhur me Aleancën. Ne do ta mbështesim fuqimisht anëtarësimin sa më shpejtë të Malit të Zi në NATO, ashtu siç do të mbështesim edhe atë të Maqedonisë” – tha më tej, zoti Rama, duke kërkuar zbatimin më të shpejtë, më cilësor e më të besueshëm të Marrëveshjes së Ohrit.
Për Raportin e Senatit Amerikan reagoi edhe ish-kryeministri Sali Berisha, duke deklaruar se Shqipëria ka patur dhe ka një bashkëpunim të ngushtë dhe të suksesshëm me CIA në luftën kundër terrorizmit. “Për periudhën pas vitit 2005, çdo bashkëpunim, në çdo operacion me këtë organizatë partnere ka patur si kusht mospërdorimin e torturës, dhe ky është zbatuar plotësisht, madje kjo nuk është kërkuar asnjëherë nga kjo agjensi” – deklaroi përmes rrjetit social facebook, zoti Berisha.
Ai shtoi se në Shqipëri nuk kanë ekzistuar asnjëherë burgje në administrimin e CIA, por Shqipëria ka lejuar fluturime të avionëve të CIA, sepse ajo është një organizatë legale e aleatit kryesor të saj, me kontribute thelbësore në luftën kundër terrorizmit, sistemit komunist dhe rreziqeve të tjera të paqes në botë.(Kortezi:VOA)
CIA dhe raporti i Senatit
Gjatë një konference të rrallë për shtyp, John Brennan, drejtori i Agjencisë Qendrore të Zbulimit, CIA, mori në mbrojtje agjencinë, pas publikimit të një raporti të Senatit ku thuhet se agjentët kanë përdorur torturën në luftën kundër terrorizmit. Por ai tha gjithashtu se agjencia disa herë nuk veproi siç duhet. Është një pohim i cili vjen ndërkohë që po shtohen thirrjet për t’i vënë CIA-n dhe Shtetet e Bashkuara para përgjegjësisë.
Drejtori i CIA John Brennan mbrojti agjencinë e tij, duke thënë se ajo u përpoq të bënte atë që duhej ndërsa përballej me alternativa tejet të vështira.
Por ai pranoi se disa agjentë i kaluan caqet.
“Në një numër të kufizuar rastesh, zyrtarët e agjencisë kanë përdorur teknika të marrjes në pyetje që nuk ishin të autorizuara, që ishin të neveritshme dhe që me të drejtë duhet të kritikohen nga të gjithë. Gjithashtu, ne nuk vepruam si duhet kur erdhi puna për t’i vënë para përgjegjësisë disa oficerë për gabimet e tyre.”
Zoti Brennan përsëriti argumentet se të ashtuquajturat “seanca të zgjeruara të marrjes në pyetje” – duke përfshirë simulimin e mbytjes me ujë dhe privimin e gjumit – mund të kenë sjellë ndryshim përsa i përket rezultatit.
“Të paraburgosurit të cilët ishin viktima të këtyre teknikave të marrjes në pyetje dhanë informacione që ishin të dobishëm dhe që u përdorën në operacionin përfundimtar për ndjekjen e bin Ladenit.”
Zoti Brennan nuk tha nëse ka pasur lidhje të drejtpërdrejtë midis këtyre seancave të marrjes në pyetje dhe vrasjes së kreut të al-Kaidës, Osama Bin Laden.
Pohimet e shefit të CIA-s nuk ka të ngjarë të ndalin thirrjet për të mbajtur përgjegjës CIA-n dhe persona të tjerë për praktikat që edhe OKB-ja i cilëson si tortura.
“Kjo duhet të jetë fillim i një procesi.Çështja e përgjegjësisë është me rëndësi kritike.”
Përgjegjësia mund të jetë e vështirë të dalë brenda SHBA. Dje, zëdhënësi i Shtëpisë së Bardhë, Josh Earnest tha se Departamenti i Drejtësisë i ka parë tashmë provat në raportin e Senatit.
“Prokurorët federalë kanë thënë se nuk kanë prova të mjaftueshme për të paditur dikë.”
Sa për përpjekjet e mundshme ndërkombëtare, edhe kjo është e ndërlikuar, thotë Richard Kelsey i Universitetit George Mason nëpërmjet Skype-it.
“Çfarëdo që mund të bëhet ligjërisht është gjithmonë ndryshe nga sa mund të arrihet praktikisht dhe politikisht.”
Ndonëse nuk ka gjasa, hetimet e reja në vendet ku CIA operonte të ashtuquajturat “objekte të zeza”, si Polonia, Rumania dhe Afganistani, mund të bëjnë që çështja t’i çohet Gjykatën Penale Ndërkombëtare.
Por vendet që kanë ligje lidhur me atë që njihet si juridiksion universal mund të përpiqen të kërkojnë drejtësi në gjykatat e tyre.
Profesorja e Universitetit Amerikan dhe ish-zyrtare e Departamentit të Drejtësisë Jennifer Daskal, komentoi nëpërmjet Skype-it:”Sigurisht po të isha ndonjë prej zyrtarëve të cituar në raport si dikush i përfshirë në krijimin dhe mbikëqyrjen e këtij programi, nuk do të udhëtoja në Evropë, të paktën tani.”
Është madje e mundur që raporti i Senatit të lejojë të ndaluarit të kërkojnë dëmshpërblim në SHBA. Zëvendës Drejtorja e organizatës Human Rights Watch, Andrea Prasow, thotë se ata mund ta bënin këtë duke ngritur padi civile për të kërkuar kompensim.
“Janë 500 faqe që dokumentojnë me shumë hollësi çdo shkelje. Viktimat e përmendura në raport duhet të jenë në gjendje të ngrejnë padi në gjyq.”
Tani për tani, kemi të bëjmë me një gjykim të një lloji tjetër për SHBA dhe për CIA-n, në gjykatën e opinionit publik.(VOA)