s p – Page 1824 – Dielli

VIZITA E JIM XHEMËS NË PRISHTINË — ME FOTOGRAFI

February 22, 2023 by s p

Nga Frank Shkreli

Një kombinim i mrekullueshëm veprimtarie prej dekadash. Jim Xhema një patriot i madh shqiptaro-amerikan, i cili nuk kurseu asgjë për lirinë dhe të drejtat e Kosovës dhe të shqiptarëve. Bob Dole, një Senator republikan i madh dhe Dr. Ibrahim Rugova, një udhëheqës shqiptar i Kosovës që fitoi zemrat e jo vetëm të shqiptarëve por edhe të mbarë botës së qytetëruar. I ftuar nga Kryetari i Prishtinës, Z. Përparim Rama për të vizituar Kosovën me rastin e 15-vjetorit të Shpalljes së Pavarësisë së Republikës së Kosovës, Z. Jim Xhema kaloi 4-5 ditë në Kosovë, ku u takua me udhëheqsit më të lartë të vendit dhe me shumë qytetarë. Fotot më poshtë janë vetëm një pasqyrim i vogël i vizitës së tij shumë të ngjeshur, javën e kaluar.

May be an image of 2 people, beard, people standing and suit

Kryetari i Komunës së Prishtinës, Përparim Rama me bashkshorten Kristalen kanë pritur në vizitë veprimtarin e shquar shqiptaro-amerikan, Jim Xhema.

Me këtë rast, kryetari Rama i ndahu mirënjohje veprimtarit Xhema për atdhedashurinë dhe punën e palodhshme për çlirimin e Kosovës.

May be an image of 7 people and people sitting

Në mjediset e Komunës së Prishtinës

Pas takimit me Kryetarin e Prishtinës, Z. Përparim Rama, Jim Xhema u prit në Presidencë nga Presidentja e Republikës së Kosovës, Vjosa Osmani. Presidentja Osmani i dorëzoi medaljen “Urdhri i Lirisë”, veprimtarit të njohur të mërgatës shqiptare të Amerikës, Z. Jim Xhema. Zonja Osmani ka theksuar se mërgata shqiptare në Shtetet e Bashkuara të Amerikës është urë e fortë lidhëse ndërmjet Republikës së Kosovës dhe popullit shqiptar në Ballkan me aleatin strategjik, Shtetet e Bashkuara të Amerikës. Ajo e cilësoi Z. Jim Xhema një ikonë të mërgatës shqiptare në Amerikë, i cili për më shumë se tri dekada ka dhënë një kontribut të pazëvendësueshëm për lirinë dhe pavarësinë e Kosovës.

Ndërkaq aktivisti i çeshtjes kombëtare në Amerikë, Z. Jim Xhema shprehu mirënjohjen e tij të thellë për Presidenten e Republikës së Kosovës dhe institucionet e Kosovës për mikpritjen dhe respektin. Ai tha se liria dhe pavarësia e Kosovës ka qenë beteja jetësore e tij dhe e të gjithë shqiptaro-amerikanëve, duke shtuar se dekorimi me medaljen, “Urdhri i Lirisë”, është respekt dhe mirënjohje jo vetëm ndaj tij, por edhe ndaj veprimtarëve shqiptaro-amerikanë, të cilët për vite dhe dekada kanë punuar për lirinë dhe pavarësinë e Kosovës dhe për forcimin e marrëdhënieve strategjike në mes të Republikës se Kosovës me Shtetet e Bashkuara te Amerikës.

Nga Presidenca Z. Jim Xhema shkoi në Kryeministri ku u takua me të parin e qeverisës së Republikës së Kosovës, Kryeminstrin Albin Kurti. Kryeministri Kurti e falënderoi përzemërsisht z. Xhema për kontributin e tij të çmuar në promovimin dhe fuqizimin e çështjes shqiptare dhe të Kosovës në ShBA, veçanërisht, përmes raporteve të mira me Senatorin Bob Dole e kongresistin Tom Lantosh. Roli i mërgatës shqiptare në Amerikë, shtoi ai, për çlirimin dhe pavarësimin e vendit ka qenë kyç, dhe se edhe sot vazhdon të jetë po aq i rëndësishëm në zhvillimin dhe afirmimin e Kosovës. Z. Xhema falënderoi Kryeministrin Kurti për pritjn e ngrohtë që i pari i qeverisë së Kosovës i bëri atij dhe delegacionit shqiptaro-amerikan.

A picture containing person, curtain, person, screen

Description automatically generated

Aktivisti prej dekadash i çeshtjes kombëtare, Jim Xhema me Kryeministrin e Kosovës, Z. Albin Kurti

Nga Kryeministria, Z. Jim Xhema me delegacionin shqiptaro-amerikan shkuan për të përshëndetur familjen e Presidentit të parë dhe historik të Republikës së Kosovës — mikut të tij dhe mbarë komunitetit shqiptaro-amerikan ndër vite si dhe bashkpuntorit të tij të ngusht prej dekadash, Dr. Ibrahim Rugovës. Ishte ky një takim shumë i ngrohtë –me pjestarët e familjes së ish-Presidentit të ndjerë, përfshir bashkshorten e tij të nderuar — dhe plot kujtime dhe emocione.

Jim Xhema me grupin në një takim të ngrohët dhe plot emocione e kujtime me familjen e Presidentit të parë historik të Republikës së Kosovës, Dr. Ibrahim Rugova, mik dhe bashkpuntor i ngusht për fatet e Kosovës i Z. Xhema — në banesën e familjes Rugova në Prishtinë.

Duke bërë nderimet e rastit tek varri i Presidentit Dr. Ibrahim Rugova

Rruga “A” për rreth Prishtinës tani e tutje do të bartë për gjithmonë emrin e veprimtarit të madh të shqiptaro-amerikanit të shquar, Z. Jim Xhema. Gjatë ceremonisë, Kryetari I Prishtinës, Z. Rama tha se ndjehet falënderues ndaj veprimtarit Jim Xhema për kontributin e tij që ka dhënë për lirinë dhe pavarësinë e Kosovës. Rama tha se për të nderuar veprën e tij, komuna e Prishtinës ka vendosur që ta emërojë rrugën A në emrin e tij. “Është sot nder i veçantë edhe kënaqësi me e pasë këtu veprimtarin e heroin e kohërave tona. Siç e dini, zotëri Xhema ka kontribuar për lirinë dhe pavarësinë e Kosovës dhe është marrë me këtë aspekt gjithë jetën e tij. Kemi nderin sot që kemi atdhetarin tonë këtu. Ne kemi vendosur që ta nderojmë dhe përjetësojmë veprën e tij nëpërmjet rrugës A, që tash rruga A, thirret ‘Jim Xhema’ ”. Jim Xhema dhe i pari i Prishtinës kujtuan vizitën historike të Senatorit Dole në vitin 1990 në Prishtinë. “Moment ky i njohur si “pikë kthesë për lirinë e Kosovës, që ia hapi sytë bashkësisë ndërkombëtare mbi abuzimet e vazhdueshme të të drejtave të njeriut në Kosovë”, pasi ç’prej atëherë Zoti Dole u bë zë i fuqishëm në politikën amerikane për çështjen e Kosovës”.

Jim Xhema falënderoi përzemërsisht Kryetarin e Prishtinës, Z. Përparim Rama për nderin dhe respektin që i ka akorduar ai dhe Këshilli i Komunës së Prishtinës, duke përjetësuar emrin e tij me emrimin e një nga rrugët më kryesore të kryeqytetit të Republikës së Kosovës, në emër të tij. Në nderim të veprës së Jim Xhemës, Komuna e Prishtinës kishte organizuar një varg aktivitetesh gjatë ditës së martë.

A group of people holding a sign

Description automatically generated with medium confidence

Nga inaugurimi i rrugës “A” me emrin e aktivistit të madhe shqiptaro-amerikan, Jim Xhema, duke përjetësuar emrin e tij për brezat e ardhëshëm në Prishtinë dhe Kosovë, falë kontributit të tij të pazevëndsueshëm, për lirinë dhe pavarësinë e Kosovës.

Jim Xhema me Kryetarin e Prishtinës,, Përparim Rama duke përshëndetur qytetarët e Prishtinës dhe të shqipztarë nga të gjitha trojet përgjatë rrugës së parakalimit të forcave të armatosura të Republikës së Kosovës.

Jim Xhema në Universitetin e Biznesit dhe Teknologjisë në Prishtinë (UBT)

May be an image of 4 people and people standing

Me këtë rast, veprimtari Jim Xhema ka thënë se edukimi është esencial për çdo vend që të ketë sukses për të përballuar ardhmërinë.

“Është imperativ që ju të merrni studimet shumë seriozisht, pa ju dhe gjeneratën që tani rritet në Kosovë ne do të jemi në situatë të vështirë që të zëvendësojmë gjeneratat e vjetra. Unë personalisht do të qëndroj i kyçur këtu me ju dhe të themeloj fonde personalisht dhe nga shokët e mi qe të sigurohemi që ne i arrijmë qëllimet së bashku. Ne kemi arrit shumë, por udhëtimi juaj është i gjatë”, u ka thënë Jim Xhema të pranishmeve.

Jim Xhema duke folur në Konferencën shkencore në UBT , ku u bëri thirrrje studentëve që të t’i marin studimet seriozisht”

May be an image of 9 people, people standing, monument and outdoors

Jim Xhema në vizitën në kryeqytetin e Kosovës, u ndalua edhe në Katedralën “Nënë Tereza”, ku ndezi një qiri në kujtim të bashkshortes së ndjerë Mrika

Jim Xhema me Ipeshkvin e Kosovës, Mons. Dodë Gjergj

May be an image of 6 people and people standing

Duke u përshëndetur me Presidentin e Shqipërisë, Z. Bajram Begaj në Prishtinë

15 vjet shtet - FSK dhe Policia parakalojnë shesheve të kryeqytetit - Bota Sot

Jim Xhema mori pjesë edhe në paradën ushtarake Ditën e Pavarësisë së Kosovës, ku mor[n pjesë mijra qytetarë të prishtinës dhe nga të gjitha trojet shqiptare – të cilët me të dalluar pjesëmarrjen e Jim Xhemës në parakalimin e forcave të armatosura të Kosovës, filluan të thërrisnin emrin e tij: “Jimmy, Jimmy, Jimmy…”

Në Prekaz —

Gjatë qëndrimit të tij në Kosovë, Jim Xhema vizitoi edhe Prekazin për të nderuar familjen Jashari. “Kjo është dëshmi se çka na kanë bërë… e të mos harrojmë se çfarë po ndodh. Ejani këtu dhe bëni respekt, respektoni njerëzit që paguan çmimin me familjet e tyre dhe fëmijët shtatë vjeç e pesë vjeç”, është shprehur Xhema për median.

Jim Xhema duke bërë nderimet e tija para monumentit të Presidentit të Shteteve të Bashkuara, Z. Bill Clinton në Prishtinë javën që kaloi. Siç dihet Presidenti Clinton, me ndihmën e Senatorit Dole në Senation Amerikan siguroi mbështetjen e Kongresit për të urdhëruar NATO-n të sulmonte forcat terroriste ushtarake dhe policore serbe që po kryenin krime kundër njerzimit ndaj piopullatës shqiptare në Kosovë

Z. Xhim Xhema para bustit të Senatorit Robert Dole — mikut të tij të ngusht prej dekadash dhe mikut të madh dhe mbështetsit të vendosur të Kosovës dhe shqiptarëve – Prishtinë, 17 shkurt, 2023

Këshilli i Ambasadorëve Shqiptarë i propozon Kuvendit të Republikës së Shqipërisë që dita e Pavarësisë e Republikës së Kosovës të shpallet Festë Zyrtare

February 22, 2023 by s p

Tiranë, më 22 Shkurt 2023Duke vlerësuar 17 Shkurtin e vitit 2008, ditën e shpalljes së Pavarësisë së Republikës së Kosovës,si një nga ngjarjet më të rëndësishme në historinë tonë kombëtare;si përmbushjen e një aspirate shekullore të kombit tonë në rrugën e tij drejt forcimit të identitetit, bashkimit kombëtar dhe integrimit në strukturat Euro – Atlantike;si një ditë të shënuar që frymëzon çdo shqiptar;si ngjarje madhore për të cilën kanë kontribuar shqiptarët anembanë botës, me mbështetjen e fuqishme të SHBA-ve, BE-së, NATOs dhe vendeve të tjera aleate dhe mike,Këshilli i Ambasadorëve Shqiptarë i ka drejtuar një kërkesë zyrtare Kuvendit, më dt. 21 Shkurt 2023, për të ndërmarrë nismat përkatëse ligjore për ta shpallur këtë datë Festë Zyrtare të Republikës së Shqipërisë.Këshilli i Ambasadorëve Shqiptarë beson se një vendim i tillë do të gëzonte dhe do të mbështetej nga çdo shqiptar kudo ku jeton, pavarësisht bindjeve politike.

Letër nga Kryetari i Kolegjit të Kirurgëve të Kosovës, Prof. Dr. Rifat Latifi

February 22, 2023 by s p

Drejtuar: Të gjithë kirurgëve të çfarëdo disipline kirurgjike, shkencëtarëve të shkencave bazike që merren me çështje kirurgjike, specializantëve të të gjitha degëve të kirurgjisë, apo edhe studentëve të fakultetit të Mjekësisë/Stomatologjisë, dhe të tjerë që punojnë dhe jetojnë në diasporë.

“Në emër të Kolegjit të Kirurgëve të Kosovës, ju ftoj për bashkëpunim, anëtarësim, dhe angazhim në zhvillimin dhe avancimin e kirurgjisë së Kosovës, mbretëreshës së të gjitha fushave të mjekësisë në botë”. NE e kemi krijuar Kolegjin e Kirurgëve të Kosovës (KCS) në fund të vitit 2018 si organizatë shkencore dhe avokuese, për të udhëhequr avancimin e të gjitha disiplinave kirurgjike në Kosovë me standardet dhe etikën e praktikës kirurgjike.Avancimi i të gjitha disiplinave kirurgjike mund të arrihet përmes edukimit të vazhdueshëm dhe të strukturuar, që fillon në fakultetin e Mjekësisë, përgjatë specializimit që ka nevojë për ndryshime thelbësore, sub-specializimeve krahas avancimeve teknologjike, si dhe përditësimit dhe adaptimeve të protokolleve më të reja klinike dhe shkencore.E gjithë puna a KCS-së është e organizuar përmes Komiteteve të ndryshme, nga kirurgët që kanë interesim dhe aftësi klinike të posaçme. Ndërsa, e tërë puna jonë është e planifikuar në mënyrë që të rrisim qasjen kirurgjike për të gjithë pacientët, për të reduktuar komplikimet duke përmirësuar rezultatet, e njëkohësisht për të ulur koston e kujdesit për të gjithë.Tash KCS ka fituar rëndësi në Kirurgjinë botërore. Vitin e kaluar për herë të parë KCS mori pjesë në mënyrë të barabartë me shtetet tjera në Kongresin e Kolegjit Amerikan të Kirurgëve.Ishte nderi im më i madh të përfaqësoj KCS-në në këtë familje të madhe ndërkombëtare të kirurgjisë. Ne do të jemi në këtë Kongres Klinik për çdo vit, i cili është më i madhi në botë.Ndonëse jemi Kolegji më i ri në botë, këtë vit do ta festojmë 5 vjetorin e krijimit tonë. Kësisoj, Kolegji i Kirurgëve të Kosovës ka organizuar dy Kongrese Klinike shumë të suksesshme, në vitin 2021 dhe 2022, dhe tani për këtë vit jemi në proces të përgatitjeve për organizimin e Kongresit të Tretë Klinik, i cili do të mbahet më 12-15 Tetor, 2023. Ky Kongres, si edhe të tjerët, do të jetë multi-disiplinar me pjesëmarrje masive të kirurgëve të Kosovës dhe diasporës, si dhe ligjërues më eminent ndërkombëtar, kirurgë më eminent të botës, që tash janë anëtarë nderi të KCS, dhe të tjerë të cilët kanë ardhur me vetëfinancim në dy kongreset tona.Ndërkaq, vlen të theksohet se KCS ka filluar ta ribotojë revistën e vetme shkencore në fushat e shëndetësisë, Kosova Journal of Surgery. Për të mbajtur të informuar sa më mirë anëtarësinë KCS-së kemi filluar me botimin e Buletinit të KCS-së, i cili nga ky vit do të botohet tre ose më shumë herë në vit.Unë e di shumë mirë se si JU të gjithë ndiheni, sepse punoni dhe jetoni atje ku jeni, por me mendje gjithmonë jeni në Kosovë. Bëni dy jetë, por shumë me rëndësi është të merrni pjesë në secilin aktivitet të KCS-së, në Kongres, dhe në të gjitha Komitetet e Kolegjit, duke sjellë njëkohësisht miq dhe mentorë tuaj. Ju mund ta mbështetni një ligjëratë në emër te profesorëve tanë të nderuar, te cilat i kemi identifikuar ashtu që kurrë mos t’i harrojmë mësuesit dhe pionierët e kirurgjisë kosovare, mund ta mbështetni një pjesë të Kongresit, mund ta shpërndani përkushtimin tonë për ta ndërtuar kirurgjinë moderne kosovare. Bëhuni anëtarë i rregullt i KCS-së, dhe me mburrje shtoni shkronjën FKCS pas emrit tënd, Fellow of Kosova College of Surgeon, sikurse që unë e bëj në çdo nënshkrim timin. Ejani në Kongresin Klinik te Kolegjit të Kirurgëve të Amerikës dhe shikoni flamurin e Kosovës në familjen e gjithë atyre shteteve që bëjnë kirurgjinë botërore. E di se ju e doni shumë Kosovën, prandaj tash neve na duhet shkencërisht dhe praktikisht ta shprehim këtë. Kosova ka shumë nevojë për kontributin tuaj, për disiplinën dhe etikën e punës që keni krijuar jashtë Kosovës, për etikën kirurgjike dhe mjekësore dhe për përgatitjen tuaj shkencore.Ejani e bëhuni pjesë e simpoziumeve shkencore, ligjëratave dhe transformimit të Kirurgjisë së Kosovës, bëhuni pjesë e ndërtimit të 8 Qendrave Kirurgjike Klinike të Ekselencës në Kosovë, nga ato 12 sosh sa kemi premtuar se do t’i bëjmë.Ndihmoni në një ose më shumë nga 22 sub-specializimet që kemi planifikuar vitin e kaluar. Ejani dhe vendoseni një gurë në themelin e Qendrës dhe Institutit Bio-Mjekësor dhe Qendrës për Kërkime Shkencore dhe Simulimit, e po ashtu edhe të Qendrave tjera të Ekselencës. “Nëse NE kirurgët e bëjmë punën tonë dhe e vendosim kirurgjinë në piedestalin më të lartë, mjekët dhe profesionistët tjerë shëndetësor të Kosovës të shpërndarë në gjithë botën do të na bashkohen gjithsesi”.Sikurse të gjithë ju në botë, pra jashtë Kosovës, edhe unë tash e më shumë se 30 vjet kam jetuar dy jetë, atë profesionale në SHBA, përderisa gjithmonë në mendje kam qenë dhe jam në Kosovë. Në nëntor të vitit 2021 ndërpreva të gjitha gjërat që kisha ndërtuar me vite në SHBA, si Kryeshef dhe Drejtor i Kirurgjisë në gjithë rrjetin e 10 spitaleve në Westchester, New York, dhe me vullnet e dëshirë shumë të madhe pranova ftesën t’i shërbej vendit dhe qytetarëve të Kosovës. Kjo pjesë e jetës sime do të jetë një nga më të ndriturat dhe më të rëndësishmet e jetës sime akademike, kombëtare dhe njerëzore. Më pak se një vit më vonë, me shumë dhembje dhe zhgënjim të pa imagjinuar dhashë dorëheqje, ngase kuptova qartë se unë mund të kontribuoj shumë më tepër “jashtë kafazit dhe TEATRIT POLITIK”.E di se për shumë nga JU dorëheqja ime nga posti Ministrit të Shëndetësisë së Republikës së Kosovës ka pasur ndikim jo të mirë, dhe ka qenë “një dush i ftohtë”, në shpresat e shumicës, që menduan se më në fund do ta transformojmë dhe rivalizojmë shëndetësinë e Kosovës.Edhe pse dhashë dorëheqje nga posti i Ministrit të Shëndetësisë, UNË dhashë premtimin dhe do e mbaj deri në fund, se nuk do të ndalem asnjëherë së ndihmuari Kosovën.Nuk kam dhënë dorëheqje për të ndaluar së ndihmuari Kosovën, në asnjë mënyrë, bashkë të gjithë do të vazhdojmë, andaj apeloj të JU, te të gjithë, ta bëni të njëjtën, “BASHKË TA NDIHMOJMË KOSOVËN”, në mënyra të ndryshme, por efektive. Ne, më së paku kemi komoditetin-rehatinë që të shkojmë ngadalë në zhvillimin e shëndetësisë. Kjo do thotë se Ne nuk kemi kohë për të humbur me ata që as nuk dinë as nuk donë ta zhvillojnë shëndetësinë e Kosovës. Nuk mund të vazhdojmë të bashkëpunojmë me “neokolonialistët mjekësor”, që kanë lëshuar rrënjë në forma të ndryshme në Kosovë, tash më shumë se dy dekada. Për ta ndërtuar shtetin tonë duhet të kemi shëndetësi moderne, pa shëndetësi moderne nuk kemi liri të plotë dhe nuk kemi shtet funksional.Për të arritur barazi profesionale kirurgjike, me kirurgjinë botërore, NE të gjithë bashkë, duhet të punojmë shumë më tepër dhe ta “duam vendin dhe kombin tonë shumë më shumë se që po e duam sot”. Duhet të jemi të ndërgjegjshëm dhe të sillemi më përgjegjësi të madhe secili prej nesh, por gjithashtu, do të kërkojmë përgjegjësi nga secili. Dorëheqja ime ishte kërkesë e përgjegjësisë për secilin prej nesh. Nuk ishte dorëzim-përkundrazi, ishte dhe është drejtë realizimit të qëllimeve tona.

VOTONI PËR FORUMIN SHQIPTAR DHE NIK GJELOSHAJN, SOLOMONIN E MALËSISË

February 22, 2023 by s p

Nga Gjekë Gjonlekaj /

New YorkNë fillim të këtij muaji Nik Gjeloshaj ishte i ftuar nga Shtëpia e Bardhë për Lutjet e Mëngjesit, ku si zakonisht marrin pjesë personalitete të shquara nga vende të ndryshme të botës. Disa analistë amerikanë e cilësojnë këtë si një pelegrinazh modern dhe Washingtonin e quajnë Meka e demokracisë botërore. Ftesa e një malësori shqiptar në këtë ceremoni ishte një nderim i jashtëzakonshëm për Malësinë dhe për vetë z. Gjeloshaj i cili në këtë vend ishte takuar me disa politikanë dhe diplomatë të njohur në Shtetet e Bashkuara. Në fushatën e parë zgjedhore për kryetar të Komunës së Tuzit, z. Gjeloshaj kishte premtuar se do të krijojë lidhje të mira me Shtetet e Bashkuara dhe me diasporën e Malësisë në Amerikë dhe Evropë. Pesë vjet më parë premtimet e tij ishin të mrekullueshme, por realizimi dukej pak i vështirë. Deri në kohën e z. Gjeloshaj diaspora ishte lënë pas dore totalisht. Por një politikë e tillë i përshtatej politikës serbo-malazeze, që diaspora e Malësisë të izolohej sa më shumë. Përgjegjësit e politikave serbo-malazeze për pothuajse një shekull e gjysmë bënë çmos për t’i larguar malësorët nga vendlindja e tyre e dashur. Që prej Lidhjes Shqiptare të Prizrenit e deri sot Malësia u vra, u shtyp dhe u terrorizua nga forcat policore dhe ushtarake serbo-malazeze. Ata sot e kësaj dite bëjnë përpjekje për ta demoralizuar Malësinë, bile edhe me botime qesharake. Një shembull i tillë ishte botimi i Enciklopedisë malazeze nga Akademia Malazeze e Shkencave dhe e Arteve. Malësorët që janë në tokën e tyre tash mijëra vjet, ata i quajnë ardhacakë! Si mund t’i arsyetojnë ato çmenduri historike kur xhubleta e Malësisë u vendos në Muzeun Historik të UNESCO-s, duke e vlerësuar mes tjerash edhe vjetërsinë e saj prej për më shumë se 4000 (katër mijë) vjeçare.Në kohën kur posa kishte dalë nga shtypi botimi, gjoja i asaj Enciklopedie, shumë shqiptarë, sidomos malësorë atdhetarë ishin shqetësuar shumë për ato trillime dhe falsifikime monstruoze. Pothuajse askush, bile as akademitë shqiptare nuk kishin reaguar kundër atyre shpifjeve monstruoze. Në atë kohë Nik Gjeloshaj ishte deputet në Kuvendin e Malit të Zi dhe ishte fyer rëndë dhe ndier keq për këto shpifje, prandaj ndërgjegjja e tij kombëtare e kishte detyruar që para gjithë deputetëve serbo-malazezë t’i fuste ato faqe të Enciklopedisë në koshin e plehrave. Kuvendi i Malit të Zi ishte tronditur për aktin e tij shumë të guximshëm, por Nikës nuk ishte lodhur fare, pavarësisht se ata ishin tërbuar për këtë akt të guximshëm që mund të quhej vepër historike dhe patriotike. Zyrat më të larta kombëtare e uruan Nikën për atë akt shumë të guximshëm. Si pasojë, për një kohë të gjatë e kishin kërcënuar banditët e Podgoricës deri në atë masë sa për një kohë nuk i merrte me vete fëmijët e tij për t’i shëtitur në qytetetin e Podgoricës, sepse kishte frikë se ato banda mund ta sulmonin fizikisht përpara fëmijëve të tij, gjë që mund t’u shkaktonte atyre trauma të mëdha. Nik Gjeloshaj dhe bashkëpunëtorët e tij patriotë kishin vendosur që në Malësinë tonë të mos festohej 13 Korriku ngase kjo datë ishte dita e pushtimit të Malësisë nga serbo-malazezët. Nik Gjeloshaj dhe bashkëpunëtorët e tij nuk pranuan diktatin e qeverisë qendrore për ta mbyllur Tuzin dhe Malësinë në kohën e pandemisë, për ç’gjë nuk kishin asnjë arsye sepse Tuzi dhe Malësia e kishin kaluar këtë faze. Bile edhe gjatë periudhës së virusit ata, domethënë Komuna në krye me Nik Gjeloshajn kishin vepruar më mirë se asnjë vend tjetër në botë për shpëtimin e popullit të vet. Por qeveria qendorore e kishte bërë këtë qëllimisht për të penguar zhvillimin e këtij vendi. Si pasojë, sot e kësaj dite qëndron padia në Gjykatën e Podgoricës kundër Nikës dhe Rexhep Çunmulajt.Sivjet është 110-vjetori i copëtimit të tokave shqiptare, ku për fatkeqësi bën pjesë edhe Malësia jonë. Qysh atëherë e sot trojet dhe populli i Malësisë u shtyp pa mëshirë nga diktaturat mbretërore dhe ato komuniste. Malësia filloi të marrë frymë pak më lirisht atë ditë kur fitoi të drejtën e themelimit të Komunës së pavarur. Ardhja e Nik Gjeloshajt në detyrën e kryetarit u prit mirë para katër vjetësh. Mund të thuhet lirisht se që prej ndarjes së Malësisë nga Shqipëria e deri sot Malësia jonë nuk ka lindur burrë më të rreptë dhe më të drejtë se Nik Gjeloshaj. Ai është politikan dhe demokrat i vërtetë dhe s‘ka dyshim se këto cilësi i ka trashëguar nga të parët e tij. Ata kanë traditë të shkëlqyeshme kombëtare për pothuajse tash 250 vjet. Kjo administratë dhe Nik Gjeloshaj jo vetëm që e ringjallën Malësinë, por ringjallën edhe diasporën malësore të Amerikës dhe Evopës. Para një shekulli Atë Gjergj Fishta kishte botuar poemën shumë të dhimbshme, ku thotë “Çonju të Vdekur se maroi Malësia”. Këtë poemë kushtrimi e kishte botuar pas masakrës së Hotit të vitit 1919. Në atë poemë i thërret të vdekurit ta shpëtojnë Malësinë. Gjergj Fishta thërret Dedë Gjo’ Lulin dhe Bibë Dodën, që të dy kishin qenë të vdekur. Bile për Malësinë disa herë kishte thënë se “çka han ujku s’e zën gjarpni”. Kështu e parashikonte të ardhmen e Malësisë poeti ynë kombëtar Gjergj Fishta. Kjo poemë tragjike mua personalisht më shqetësonte shumë. Por Zoti i Madh që ka krijuar Malësinë e Gjithësinë, pas 100 vjetësh solli në Malësi një burrë-shteti për ta shpëtuar Malësinë. Pavarësisht se Malësia nuk është shtet, brenda përbrenda ka të gjitha atributet e një shteti. Nik Gjeloshaj dhe administrata e tij e ngjalli Malësinë gjatë këtij mandati, duke bërë mrekulli që nuk ishin paramenduar as nga optimistët më të mëdhenj. Kjo administratë po realizon tri objektiva të domosdoshme për një shoqëri të përparuar. Po ndërton dhe rindërton rrugët e Tuzit dhe Malësisë sipas standardeve evropiane, të shoqëruara me rrymë elektrike dhe ujësjellës. Veprat e kësaj administrate, në krye me Nik Gjeloshajn, janë kolosale. Punime të tilla mund të jenë pare në kohët antike, por në një stil tjetër. Kështu kishin punuar Agroni e Teuta dhe Perandori Dioklecian. Qysh atëherë e deri sot civilizimi i Malësisë ishte rrënuar dhe groposur nën dheun e Labeacisë. Hordhitë e ndryshme barbare, duke përfëshirë edhe ato sllave, kishin bërë çmos për ta zhdukur të kaluarën e Labeacisë, ku bën pjesë Malësia sot. E gjithë kjo ishte bërë për zhdukjen e identitetit iliro-arbëror. Kjo që po ndodh sot, mund të quhet renesanca e Malësisë, më mirë të them Rilindja e Malësisë. Diaspora malësore kurrë nuk ka qenë më optimiste për përparimin dhe zhvillimin e Malësisë. Nik Gjeloshaj kurdo që ka vizituar Shtetet e Bashkuara është pritur me nderime të mëdha. Diaspora ka fituar mirëbesim të jashtëzakonshëm te Nik Gjeloshaj dhe administrata e tij. Diaspora ka filluar investimet e veta dhe vizita të përhershme në Malësi, sepse ata priten me nderime nga autoritetet e vendit. Asnjë politikan nga Malësia nuk është nderuar dhe pritur ashtu siç pritet Nik Gjeloshaj. Tuzi dhe Malësia ka mbështetjen e Shteteve të Bashkuara dhe këtë mbështetje e jep nëpërmjet zyrave të ndryshme, sidomos përfaqësive diplomatike amerikane. Kështu veprojnë edhe vendet perëndimore të Evropës.Për të folur për administratën e Komunës së Tuzit në krye me Nik Gjeloshajn duhet orë e ditë të tëra. Një pjesë të madhe të tyre i kemi parë në transmetimet e Televizionit BOIN. Nik Gjeloshaj është politikani më ekumenik i Malësisë tash një shekull. Për Pashkë Nika shkon në kishë, por edhe për Bajram shkon në xhami, duke i trajtuar njësoj. Malësia sot është një oaz midis dy shteteve shqiptare dhe Malit të Zi. Një pjesë e madhe e liqenit të Shkodrës dhe fushat e Dheut të Zi deri ne Majën e Komit janë pasuri e patundshme e Malësisë. Këtu bën pjesë Cemeri, Korita dhe lumi Cem që janë shumë piktoreske dhe të mira për turizëm. Kjo administratë po e vë në përdorim teknologjinë e re dhe sistemin më modern kompjuterik që janë të domosdoshme në këtë kohë. Komuna ka krijuar fonde dhe fondacione për të mirën e studentëve të dalluar dhe për shumë çështje të tjera. Nik Gjeloshaj ka themeluar Kryqin e Kuq të Pavarur të Tuzit. Si pjesë e veprimtarisë së Komunës janë gjithë ato dikastere të cilat i drejtojnë specialistë dhe ekspertë të njohur nga shkollat më të njohura të Ballkanit dhe më gjerë. Kjo administratë ka zhvilluar bujqësinë, pemtarinë dhe blegtorinë, që janë shumë të domosdoshme. Tani po zhvillon edhe industrinë, që siç duket Tuzi dhe Malësia do të jenë një vend industrial modern. Pra, Komuna ka afruar rreth vetes elitën e profesionistëve malësorë shqiptarë.Fushata e FORUMIT SHQIPTAR në krye me Nik Gjeloshajn na kujton fushatën presidenciale të Presidentit Ronald Reagan në vitin 1984, për fitoren e mandatit të dytë. Reagan gjatë mandatit të dytë kishte thënë: “Nuk keni parë çka do të shihni” (You haven’t see nothing yet). Kështu do të veprojë edhe administrata e Nik Gjeloshajt. Përparimet e mëdha do t’i shihni në mandatin e dytë, bile aq të mëdha që nuk mund t’i paramendoni sot. Nik Gjeloshaj mendon edhe për themelimin e shkollave të larta dhe mundësisht edhe të një universiteti në Tuz. Pas përfundimit të mandatit të dytë, Tuzi dhe Malësia do të duken si ato malësitë e Zvicrës ose Austrisë. Kush kishte menduar se Klubi Futbollistik “Deçiq” do të ngritej aq lart në Ligën Kombëtare të Malit të Zi?! Para 20 vjetësh, një miku im, specialist e çështjeve ballkanike, autoritet pranë qeverisë amerikane, kishte kaluar nëpër Tuz drejt Shqipërisë. Pas kthimit në Amerikë, më tha miqësisht me keqardhje se Tuzi ishte për dëshpërim. Edhe unë personalisht kur jam kthyer pas 35 vjetësh, jam larguar nga Malësia i dëshpëruar për gjendjen e mjerë të Tuzit. Dukej si ato vendet e banuara të Kandaharit! Por Zoti dërgoi një djalë malësor dhe besnikët e tij për të rindërtuar Tuzin dhe krejt Malësinë.Koalicioni FORUMI SHQIPTAR duhet t’i fitojë zgjedhjet e 5 marsit që vjen. Ata janë shumë më të kualifikuar se të tjerët për ta zhvilluar Tuzin dhe Malësinë. Dashuria dhe respekti për këtë koalicion dhe mandatin e kaluar e tregon më së miri vullneti i diasporës e cila do të bëjë një udhëtim patriotik dhe historik “për shpëtimin e Malësisë”. Sakrifica e tyre për të marrë pjesë në ato zgjedhje do të jëtë kapitull i shkëlqyeshëm në historinë e Malësisë sonë legjendare. Nik Gjeloshaj është si ata kalorësit e Mesjetës, është burrë shteti dhe biznismen. Anglisht Nik Gjeloshaj është: gentleman, statement & businessman, i cili ka për të hyrë në histori si Solomoni i Tuzit dhe i Malësisë.

Fëmijët pas telave më gjemba

February 22, 2023 by s p

Instituti i Studimeve për Krimet e Komunizmit për herë të parë sjell para publikut dokumente arkivore që dëshmojnë veprimtarinë kriminale të regjimit diktatorial mbi fëmijët. Dje, të vendosur në një ekspozitë, në sheshin Skënderbej, “Fëmijët pas telave me gjemba” ishte një akt dhe homazh për fëmijët në Ditët e Kujtesës, të cilët vuajtën dhunën dhe persekutimin, pas burgosjes apo ekzekutimit të familjarëve të tyre. Drejtori i ISKK, Çelo Hoxha ne fjalën e tij, tha se “dokumentet në këtë ekspozitë e vërtetojnë se në periudhën 1945-1990 ka pasur mungesë ligji, dhe se, në terma ligjore, ajo që quhet internim ka qenë kufizim i paligjshëm i lirisë nga institucionet e regjimit komunist”. E shoqëruar me dokumente autentike, ekspozita ka tërhequr vëmendjen e qytetarëve si, dhe të trupave diplomatikë e përfaqësuesve të parlamentit prezentë në ceremoninë e perurimit duke u njohur me pjesën më të errët, dhe të dhimbshme të represionit komunist edhe mbi fëmijët e pafajshëm.Me ide të ish drejtores se Drejtorise se Studimeve ne ISKK, Luljeta Lleshanaku, dhe kurim të studiueses Brisejda Lala, qëllimi i ekspozitës është të hedhë dritë në një pjesë të rëndësishme dhe të pa studiuar të historisë së Shqipërisë, e cila lidhet me një nga anët më të errëta të veprimtarisë kriminale që u krye në emër të shtetit shqiptar.Ekspozita sjell për herë të parë aspekte të rëndësishme që lidhen me jetën e fëmijëve në internim dhe persekutimin e tyre. Nëpërmjet dokumenteve arkivore dhe fotove, vijnë para publikut informacione të panjohura lidhur me burgosjen e minorenëve dhe dërgimin e tyre në kampe pune. Dokumentet dhe historiku shoqërohen me skica të ish përndjekurit politik z.. Musa Çapani; ndërsa grafikat e tjera të përshtatura me historitë personale të marra nga vëllimet e “Zërave të Kujtesës”, janë realizuar nga piktorja Neraida Dado. Dokumentet e ekspozuara zbulojnë që internimi i fëmijëve ishte një proces i pabazuar ligjërisht, duke ofruar fakte mbi jetën e fëmijëve në kampe internimi, të rrethuar me tela, siç ishte Kampi i Tepelenës; jetën e fëmijëve në vende internimi në mungesë të kushteve më minimale të jetesës gjë që binte në kundërshtim me propagandën e kohës dhe konventat ndërkombëtare të të drejtave të fëmijëve. Këtu janë ekspozuar dhe dokumente të kohës që pasqyrojnë numrin e fëmijëve në kampe dhe vende internimi; dëshmitë e kohës i japin zë historive personale të përjetuara prej tyre. Ekspozita është e fokusuar tek persekutimi i fëmijëve dhe vuajtjet e tyre gjatë regjimit komunist, pavarësisht mungesës së theksuar të dokumenteve zyrtare dhe të dhënave lidhur me këtë fenomen. Përpos kontributit në Ditët e Kujtesës, ekspozita shënon nje prej ngjarjeve, më me rëndësi në kuadër të veprimtarisë vjetore të ISKK, duke përfshirë edhe botimin e kolanës 2022, promovimi i të cilëve mbahet nesër, në orën 10.00, në mjediset e Hotel Internacional Tirana, me prezencë të autorëve, ish të përndjekur dhe studiues.