Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

NJE FESTIM NDRYSHE PER PAVARESINE E KOSOVES

by

Në Uashington, pavarësia e Kosovës festohet pak më ndryshe: me flaut, recitime, fakte, fotografi, verë dhe “fli”/

Ne Foto: grupi organizator i festimeve te 6 vjetorit te Pavaresise nga komuniteti shqiptar ne Uashington/

Kur përdoret shprehja standarde se “komuniteti shqiptar i këtij ose atij qyteti të botës festoi pavarësinë e Kosovës”, zakonisht mendja të shkon te një grumbull i gjallë njerëzish që këndojnë, kërcejnë dhe hanë, duke uruar njëri-tjetrin dhe duke marrë poza me gotat plot, fotografi të cilat të nesërmen i shikon rëndom në Facebook.

Disa anëtar nga grupi i profesionistëve shqiptarë të Uashingtonit vendosën ta festojnë ndryshe 6-vjetorin e pavarësisë së Kosovës të mërkurën mbrëma. Muzika nuk mungoi, por kësaj here ishin tingujt e flautit të Klodina Kabashi Morinës (http://www.klodinakabashimorina.com/), që sillte plot finesë në mes të Uashingtonit muzikën e bukur të kompozitorit shqiptar Rauf Dhomi.

Në një kënd tjetër, të pranishmit mund të shijonin në ekran pamje mahnitëse nga Kosova (#InstaKosova) të përpiluara nga Rilind Latifi dhe Behar Xharra, disa nga organizatorët kryesor të aktivitetit “Gëzuar Kosovë!”. Një album i fotografes së talentuar Ferka Shala Rothschild (www.fashphotostudio.com)  ishte mjaft përfaqësues i bukurive kosovare, të shprehura në një mënyrë elegante dhe dinjitoze.

“Suzana Frashëri nga Kuçova, specialiste në fushën e së drejtës që punon për firmën e rekrutimit të avokatëve Arcade Recruitment Company,  recitoi nën tingujt e muzikës “Vargjet e Mia”, poezi nga Mark Krasniqi dhe “Lulebore” të Flora Brovinës, poezi te sygjeruara dhe siguruara nga stafi i bibliotekes ndërkomunale “Ibrahim Rugova” ne Gjakovë.

Alban Pruthi, një ndër organizatorët e tjerë të këtij aktiviteti kulturor tha se ideja ishte e thjeshtë: profesionistet shqipetarë në Uashington deshën t’i tregojnë botës se shtetin e ri të Kosovës duan ta ndërtojnë me kulturë, kreativitet, dije, vepra, profesionalizem, , dhe bashkepunim dhe jo përmes ahengjeve apo koktejeve të zakonshme.

Dhe u takonte. Për ata që nuk e dinë, komuniteti shqiptar i Uashingtonit dhe i rretheve të tij ka një bërthamë profesionistesh shqiptarë mjaft inteligjentë e të kulturuar që punojnë me ajkën e këtij qyteti të rëndësishëm. Me profesionalizmin e tyre, ata u bëjnë nder institucioneve amerikane dhe nderkombetare si Grupi i Bankës Botërore , Fondi Monetar Ndërkombëtar, universiteteve, organizatave dhe firmave të mëdha konsulente, për të cilat kryeqyteti amerikan është i njohur. Në të gjithë qytetet e rëndësishëm të Amerikës ka bërthama të tilla shqiptarësh të talentuar, por jo kudo ata arrijnë të bashkëpunojnë dhe organizohen.

Alban Pruthi, i cili vetë punon për Grupin e Bankës Botërore dhe ka një mijë punë në ngarkesën shtypëse që të imponon kryeqyteti amerikan, thotë se të rinjve shqiptarë nuk u mungon potenciali, por ata kanë nevojë për më shumë energji dhe dedikim që të organizohen në një mënyrë të re, të bashkojnë dijet për të bërë gjëra me të cilat do të ndihmojnë veten dhe vendlindjen e tyre, Kosovën dhe të gjithë rajonin e mbarë botën.

Zakonisht aktivitete kulturore dhe promovuese të këtij lloji organizohen nga ambasadat dhe konsullatat me fonde të qeverisë. Por këta profesionist zgjodhën një rrugë tjetër – ndonëse bashkëpunuan me ambasadën e Kosovës për transportimin e verës kosovare (http://www.stonecastlewine.com/) nga Nju Jorku, sigurimin e flamujve, dhe disa fotografive (#InstaKosova) shpenzimet erdhën nga xhepat e grupit të profesionistve shqipëtarë nga zona e Uashingtonit.

Ju mund ta merrni me mend si ndodh zakonisht në aktivitete festive të komunitetit shqiptar. Disa zyrtarë ngrihen dhe mbajnë fjalime të gjata, të mërzitshme dhe të formatit standard, nga të cilat njeriu nuk mëson asgjë. Në të shumtën e rasteve njerëzit bëjnë zhurmë dhe nuk e kanë mendjen te fjalimi. Shpesh, ne ia hedhim fajin vetes që nuk dimë të respektojmë atë që flet. Në aktivitetin e këtyre profesionisteve të përkrahur nga Fondacioni El-Hibri (http://elhibrifoundation.org/), që ofroi hapsirën elegante në objektin e tyre falas, nuk ndodhi kështu. Ata pak njerëz që folën, e thanë shkurt dhe qartë atë që duhej thënë. Ata folën kryesisht për çka përfaqëson Kosova sot dhe çfarë përpiqet të arrijë shteti i ri. Të gjithë që dëgjonin ishin mjaft të interesuar dhe vemendja ishte plotësisht e përqendruar, sepse ata që flisnin dinin ta shprehnin me kulturë dhe me elegancë idenë që donin të thoshin.

Më pëlqeu sidomos prezantimi me një video të shkurtër i disa fëmijëve nga shkolla “Rrezor” e komunës së Malishevës (http://www.youtube.com/watch?v=9vK-rnBYIDI). Nuk duhet më shumë se një dekadë e gjysmë që këta fëmijë t’i shohim të rritur, njerëz që do të fillojnë të marrin përgjegjësitë e shtetit të ri. Sot ata flasin me drojën e zakonshme të një shtatë-vjeçari, por koha kalon shpejt dhe ne do të duam të shohim te këta të rinj të ardhshëm dritën e kulturës dhe të qytetërimit. Kjo të sjell në mendje se çfarë pune kolosale kemi përpara për të ndihmuar Kosovën tonë, për të ndihmuar që atje të rritet një brez sa më pranë modeleve të përparuar kulturorë që ofron bota dhe sa më larg fanatizmit, dhunës dhe paragjykimeve.

Në aktivitet u prezantua edhe ushqimi i Kosovës i përgatitur nga Valentina Gashi dhe Ferka Shala Rothschild. Çfarë ka të veçantë Kosova? Menjëherë mendja na shkon te “flija”. Duke qenë se në Uashington është e vështirë të bësh “fli”, (me saç jo e jo) kishte nga të pranishmit që nuk e kishin provuar kurrë këtë specialitet të famshëm, ndonëse emrin ia kishin dëgjuar. Nga pak “fli” e shoqëruar me verë cilësore na bëri vërtet të ndjejmë se Kosova ofron ushqim të shijshëm dhe origjinal. Natyrisht askush nuk kishte ardhur për të ngrënë e për të pirë dhe për ta festuar pavarësinë e shtetit të ri me shishen e rakisë deri në mëngjes. Kjo ishte një ngjarje kulturore prandaj “flija”, djathi dhe vera kosovare të prezantuara këtu ishin thjesht për kulturë dhe në masën që e bëjnë njeriun të thotë: shijova pak Kosovë dhe u kënaqa duke mësuar.

Në aktivitet u prezantuan edhe fakte interesante për Kosovën të përgatitura nga disa vullnetarë nga grupi i profesionistëve në Uashington dhe disa bashkëpuntorë nga Kosova. Secilit të ftuar i jepej një zarf, brenda të cilit kishte një kuriozitet për Kosovën që të ngelet në mendje. Për shembull, në zarfin që më ra mua, ishte shkruar: Çarshija e Madhe është perla kulturore e qytetit të Gjakovës, që shërben si një vend për të bërë biznes, për t’u takuar dhe për t’u përzierë me njerëz, duke shijuar një muzeum të gjallë. Meqenëse kam qenë në Gjakovë vetëm kalimthi, jam shumë kureshtar të shkoj të shikoj Çarshinë e Madhe, sepse vërtet duhet të jetë një vend interesant. Këtë fakt nuk do ta kisha ditur po të mos kisha qenë në shoqërinë e këtij grupi të mrekullueshëm të profesionistëveshqiptarë që dinë të festojnë me dinjitet dhe që kanë plane për aktivitete po kaq të bukura për të ardhmen.

Korrespondenti i Diellit /Uashington

 

Ilir Meta takon Konsujt

by

Meta:  Roli juaj, me rëndësi për përmirësimin e imazhit të Shqipërisë/

Edhe pse kanë kaluar vetëm pak ditë nga krijimi i saj, Shoqata e Konsujve të Nderit në Tiranë është mjaft aktive në harmonizimin e vetëfunksionimit, por edhe në raportet me institucionet shqiptare.Si një ogur të mbare, takimin e parë Shoqata e Konsujve e zhvilloi me kreun e Kuvendit, Ilir Meta.Për të nisur rrugëtimin e një udhe të fortë bashkëpunimi, kryeparlamentari priti në kryesinë e Kuvendit 18 Konsuj Nderi, në një takim të kërkuar nga Kryekonsullli dhe Kryetari i Shoqatës, Ylli Ndroqi.

Numri një i Kuvendit, vlerësoi rolin e rëndësishëm që Konsujt luajnë në përmirësimin e imazhit të Shqipërisë në vendet që ata përfaqësojnë dhe premtoi se jo vetëm ai, por i gjithë Kuvendi do të jetë një derë e hapur bashkëpunimi për Shoqatën.

Edhe pse ishte mes një përfaqësie diplomatësh, kryetari i Kuvendit vendosi të mos jetë diplomat, por i drejpërdrejtë kur tha se:

“Është i rëndësishëm kontributi i konsujve në marrëdhëniet mes vendit tonë dhe shteteve që përfaqësojnë. Roli juaj është me rëndësi për përmirësimin e imazhit të Shqipërisë në botë Në shumë raste koha ka treguar se roli juaj është më i rëndësishëm se i Ambasadorëve”.

Duke vlerësuar gatishmërinë e Kreut të Kuvendit për të mirëpritur në takim Konsujt e Nderit nga e gjithë bota, kryetari i Shoqatës, Ylli Ndroqi, i cili përfaqëson shtetin e Meksikës në Tiranë tha se Shoqata do të jetë një urë e fortë lidhëse mes Shqipërisë dhe 28 shteteve që përfaqësohen me Konsuj ne Shqipëri.

Dimension primar i Shoqatës do jetë forcimi i lidhjeve të biznesit, në një mjet për të shtuar investimet në vendin tonë.

“Qëllimi i Shoqatës së Konsujve për të forcuar lidhjet e biznesit mes Shqipërisë e vendeve që përfaqësojmë. Veprimtaria jonë është një kontribut vlerash të mëdha.Shoqata e Konsujve, një lëvizje e madhe për bashkëpunim mes Shqipërisë e vendeve që përfaqësojmë” u shpreh zoti.Ndroqi.

Edhe Dekani i Shoqatës, Konsulli i Nderit të Austrisë në Tiranë, Gjergj Liqezja, vuri theksin tek roli që do ketë Shoqata në lidhjen e marrëveshjeve të bashkëpunimit, jo vetëm në sektorin ekonomik, por edhe në turizëm, etj.

Për të fiksuar këtë takim të parë, kryetarit të Kuvendit, Ilir Meta, iu dhurua simbolika e këtij unioni të krijuar rishtazi, logoja e Shoqatës së Konsujve të Nderit në Tiranë.

Takimi miqësor vijoi për afro 30 minuta, ku kreu i Kuvendit u njoh me veprimtarinë e deritanishme të kësaj, por edhe objektivat e saj në të ardhmen.

Në unison Konsujt shprehën vendosmërinë e tyre për të dhënë kontribut maksimal në imazhin pozitiv të Shqipërisë nëpër botë, por nga ana tjeter vlerësuan se duhet bërë edhe më shumë për të përmirësuar të drejtat dhe privilegjet e tyre si Konsuj Nderi.

 

NEKROLOGJI-PUSHOI SË RRAHURI ZEMRA E ELHAM SHARRËS

by

Më 16 shkurt, pushoi së rrahuri, në Amerikë,  zemra atdhetare e Doktorit të Shkencave, Elham Sharra, pinjoll i denj i familjes patriotike të Sharrajve të Vlorës.

Nga kjo familje ka dalë Hasan Sharra, bashkëluftëtari i Ismil Qemalit, Muço Sharra, Musa Sharra e Ceno Sharra, që ra dëshmor i atdheut në vitin 1914, duke mbrojtur shtetin shqiptar.

Në këtë udhë eci edhe nipi tyre Elham Sharra. Ai u gjend në vijën e parë të luftës për përmbysjen e diktaturës komuniste dhe për këto merita populli i Vlorës më 20 korrik 1992 e zgjodhi kryetar të Bashkisë, detyrë të cilën në ato kushte të vshtira e ushtroi me përkushtim, aftësi e kompetencë profesionale.

Elham Sharra ka lindur në Vlorë në vitin 1942, ku kreu edhe arsimin para universitar.

Në vitin 1966, u diplomua në Universitetin e Tiranës në Fakultetin e Shkencave të Natyrës.

Po kështu është trajnuar në SHBA dhe Finlandë.

Në vitin 1999, u diplmua në Universitetin e Shkodrës në Fakultetin e Drejtësisë dhe në vitin

2002, ka fituar gradën: Doktor i Shkencave.

Kudo ku punoi në Vlorë ai u dallua për aftësi të larta profesionale, dhe dëshirën e madhe për

t`u thelluar në dijet shkencore.

Në vitin 1997 u emërua prefekt  i  Shkodrës, Malesisë së Madhe dhe Pukës dhe më pas

Këshilltar i  Kryetarit të Këshillit të Rrethit Tiranë.

Në vitin 2006 u emërua Drejtor i  Marredhenieve me Publikun në Kryeministri, nga ku doli

edhe në pension.

Elhami ishte një atdhetar i mirë, një nëpunës i përkushtuar, një njohës i mirë i shkencës, që ashtu

si të parët e tij, nuk u kursye asnjëherë, për t`i shërbyer vendit të tij, edhe në kushte shumë të

vështira siç ishte viti 1992, apo viti 1997. Ai nuk u tërhoq asnjëherë nga vështirësitë e jetës, por

me guxim e me zgjuarsi por edhe me trimëti dijti ti kapërxente ato duke dhënë shembullin e një

qytetari dhe intelektuali me vizion europian.

Elhami la në pikëllim familjen, fëmijët, të afërmit, miqtë dhe shokët e tij të shumtë në të gjithë Shqipërinë, të cilët do ta kujtojnë gjithmonë.

Lamtumirë miku jonë i shtrenjtë! Sali Berisha, Jozefina Topalli, Astrit Patozi, Liljana Elmazi, Arben Ristani, Bujar Leskaj, Fari Balliu, Gëzim Zilja, Enver Memishaj, Vilson Haxhiraj, Neshet Nguci, Agron Sharra, Dorotea Konomi, Hysni Sharra,  Astrit Xhaferi,  Bajram Karabolli, Ilia Vishi,  Koço Paço,  Kreshnik Alimerko, Et`hem Kurti,Kujtim Murati, etj.

 

  

 

 

 

 

 

 

 

 

 

 

 

 

 

 

 

 

 

 

  

Kosova 6 vjet shtet, festimet vazhdojnë

by

Nga B.Jashari/.-Në Kosovë vazhdojnë të dielën festimet e nisura zyrtarisht dy ditë më parë për 6 vjetorin e shpalljes së Pavarësisë në 17 shkurtin historik të 2008-ës.

Në mbrëmje, Presidentja e Republikës së Kosovës, Atifete Jahjaga, do të organizojë një pritje solemne në Prishtinë, ndërsa në Teatrin Kombëtar mbahet koncerti festiv i Ansamblit Kombëtar Shota.
Festimet vazhdojnë sot edhe në qytete të tjera të Kosovës.
Në qytetin më të madh jugor, Prizren, rreth mesditës nis punëtoria e skulptorëve te akullit, ndërsa në mbrëmje mbahet tryeza “Artist talk”.

Po në mbrëmje, do të organizohet takimi letrar “Ora e Pavarësisë” dhe koncerti festiv i AKV “Lidhja e Prizrenit” në Shtëpinë e Kulturës.

Në qytetin më të madh verior të Kosovës, në Mitrovicë, në mbrëmje hapet një ekspozitë në Muzeun e qytetit dhe një tjetër ekspozitë e artistëve në qendrën e kulturës “Rexhep Mitrovica”, ku do të mbahet manifestimi qendror

Me 17 shkurt, protestë gjithëshqiptare para selisë së BE-së në Bruksel

by

Të ndalet padrejtësia kundër shqiptarëve. Protestë për njohjen e Kosovës nga pesë vendet e BE-së, për integrimin e Kosovës dhe ndaljen e aparthaedit serb kundër shqiptarëve të Kosovës Lindore./

Me 17 shkurt (2014) organizohet një protestë para selisë së Parlamentin Evropian, ku do të kërkohet qe shtetin e Kosovës ta njohin edhe pesë shtet tjera të BE-së, e me këtë t’i hapet rruga e integrimeve shtetit më të ri në Evropë. Sipas Këshillit Organizativ, gjatë protestës do të kërkohet qe nga BE-ja qe të kenë trajtim më realist dhe me kredibil ndaj shtetit të Kosovës, sepse Bashkimi Evropian po e amniston Serbinë për krimet e veta ndaj popullit shqiptar të Kosovës e bashkë me këtë, por i man nën pushtim edhe nëntë komuna të Kosovës me popullsi shumicë serbe. Republika e Kosovës në këto nëntë komuna nuk posedon shtrirjen e autoriteteve të veta, juridike-kushtetuese e as nuk valon flamuri i Republikës së Kosovës. Është e çuditshme se si Evropa po e favorizon Serbinë në të gjitha fushat e integrimeve, e as nuk kërkon qe Beogradi t’i kthejë rreth 1.800 të zhdukurit e Kosovës. Qe 15 vjet Kosova mbahet si vrimë e zezë, si geto e sanksionuar nga të gjitha të drejtat njerëzore të kombit shqiptar të kësaj ane të Dardanisë, andaj kërkohet qe me 17 shkurt 2014 edhe njëherë të dëgjohet zëri shqiptar, duke kërkuar nga BE-ja, qe të trajtojë Kosovës si shtet sovran, pa asnjë modalitet me komuna autonome serbe. Po ashtu edhe Kosova Lindore, vuan nën terrorin e policisë dhe xhandarmerisë serbe, dhe Evropa në vend që të sanksionojë Serbinë për egërsinë e saj, Brukseli po i jep të gjitha favoret shtetit serb duke e amnistuar edhe nga e kaluara e saj kriminale, por edhe nga apetitet e fundit të saja hegjemoniste e fashiste. Pra, kërkohet me 17 shkurt 2014 të gjithë shqiptarët të tubohen para selisë së PE-së në Bruksel dhe t’i tregojmë Evropës se shqiptarët nuk durojnë padrejtësinë, por kërkojnë që të trajtohen të barabartë me gjitha kombet etjera evropiane./ Petrit Rudi, standardi)