KFOR-i DHE ORGANIZATAT E SIGURISË NË KOSOVË ME USHTRIM TË PËRBASHKËT
Prishtinë, 3 Qershor 2016 Njësitë manovruese të KFOR-it kanë planifikuar një ushtrim të përbashkët me pjesëtarë të Misionit Evropian të Sundimit të Ligjit (EULEX) dhe Organizatës së Sigurisë së Kosovës (OKS), përfshirë Policinë e Kosovës dhe Forcat e Sigurisë së Kosovës (FSK)
Në këtë edicion të parë të vitit 2016, ushtrimi “Shpata e Argjendtë” bazohet kryesisht në menaxhim të trazirave dhe migrimit në Kosovë sipas skenarit.
Aktivitetet ishin kryer në disa lokacione të ndryshme gjeografike në mënyrë që të simulohen skenar të ndryshëm operacional. Në kampin “Pomozatin” dhe në “Vrellë” në zonat e trajnimeve, Forcat e Sigurisë së Kosovës zhvendosin një ekip të reagimit për të menaxhuar fluksin e imagjinuar të migrimit dhe për të ngritur kampin e pranimit, në bashkërendim të ngushtë me Grupin Luftues Shumëkombësh-Lindje për menaxhim të një krize të mundshme të migrimit. FSK-ja ishte paraqitur në kapacitet të marrjes me mbrojtjen e civilëve në kushte emergjente së bashku me njësitë e deminimit dhe kërkim shpëtimit. Këto ushtrime i kanë mundësuar FSK-së të rrisë aftësitë e tyre në përmbushjen e detyrave të tyre specifike në lidhje me funksionet e sigurisë me fokus në aftësitë e reagimit vendor në kriza.
Në kapin “Villaggio Italia” trupat e KFOR-it dhe elementet e Policisë së Kosovës intervenauan në kontroll të turmave sipas skenarit, të shkaktuara nga demonstratat e dhunshme në rrethinën e një lokacioni fetar ku KFOR-i vepron si reagues i parë. Ky skenar i zhvilluar me kujdes ishte bazuar në eskalim të dhunës ku njësitet e KFOR-it kërkojnë përforcim nga PK-ja për të rivendosur ambientin e sigurtë dhe të qetë.
Trajnimet dhe ushtrimet janë një rutinë e aktiviteteve ushtarake për trupat e KFOR-it. Në baza vjetore KFOR-i kryen ushtrime të tilla për t’u trajnuar dhe përmirësuar aftësitë e njësive të veta sipas skenarëve intensiv real.
Qëllimi i këtyre ushtrimeve periodike është që të ngritet aftësia e KFOR-it në mbajtje të gatishmërisë së trupave dhe përforcimin e fleksibilitetit operacional. Harmonizimi i teknikave, taktikave dhe procedurave në mes të policisë së Kosovës, EULEX-it, FSK-së dhe KFOR-it ishte objektivi fundamental i kësaj periudhe të ushtrimeve.
Ushtrimet e KFOR-it sigurojnë ndërveprueshmëri me partnerët aktualë dhe potencialë si dhe për të kryer detyra të mundshme të misionit të komandës përfshirë rrejtet kompjuterike dhe ndërveprueshmërisë në komunikim.
Ndërlidhja, komunikimi dhe ndihma e reaguesve të ndryshëm ishte pjesë kritike e ushtrimit dhe skenar të atypëratyshëm që kërkojnë bashkëpunim të përparuar në mes të të gjithë reaguesve, sidomos kur kemi të bëjmë me Procesin e Vendim-marrjes Ushtarake, përfundon komunikata e dërguar sonte nga KFOR. /b.j/
Koha për një fitore të re të humanizmit liberal mbi fanatizmin e dhunshëm
-Kryetari i Kuvendit të Republikës, Kadri Veseli: Kosova mbetet e përkushtuar, me tërë qenien e saj, në luftën kundër ekstremizmit të dhunshëm. Ne kemi pasur rezultate të prekshme në këtë drejtim dhe aleatët tanë na janë falënderuar për këto rezultate/
-Çmimi i Kosovës për Dialog Ndërfetar për Monsignor Vincenzo Paglia, themelues i Komunitetit të Sant’Egidio dh kryetarin e Londrës Sadik Khan/
-Në Prishtinë përmbyllet Konferenca Ndërkombëtare Ndërfetare “Interfaith Kosovo”/
PRISHTINË, 2 Qershor 2016-B.Jashari/ Është koha për një fitore të re të humanizmit liberal mbi fanatizmin e dhunshëm, tha kryetari i Kuvendit të Republikës së Kosovës, Kadri Veseli, sot në Konferencën Ndërkombëtare Ndërfetare “Interfaith Kosovo”, e cila u përmbyll pasi gjatë tre ditëve u mbajt në Prishtinë. Kryeparlamentari kosovar ndau Çmimin e Kosovës për Dialog Ndërfetar për themeluesin i Komunitetit të Sant’Egidios, Monsignor Vincenzo Paglia. Me këtë çmim u nderua edhe kryetari i Londrës, Sadiq Khan.
Në fjalën para të pranishmëve, kryetari Veseli shkoqiti aspekte të kulturës fetare në Kosovë, e cila, siç tha kreu i Kuvendit, është një vend i vogël, por ka pasur fatin historik të trashëgojë një traditë të madhe e të fuqishme, atë të mirëkuptimit dhe bashkëjetesës mes feve të ndryshme.
“Historia jonë është historia e një territori, ku përgjatë shekujve, janë ndeshur perandoritë e ndryshme të lindjes e perëndimit. Është historia e një territori ku janë takuar kulturat dhe religjionet e ndryshme dhe kështu i kanë dhënë jetë pasurisë kulturore që ka sot rajoni ynë. Sot, vendi ynë mburret me faktin se është pjesë e kësaj pasurie”, theksoi kryetari Veseli.
Ai shtoi se, shekuj me herët, kur në vendet tona ballkanike po takohej krishterimi me islamin, “populli ynë krijoi individin multireligjioz, me të cilin zë fill tradita jonë e mirëkuptimit dhe bashkëjetesës religjioze, dhe pamja e bukur tradicionale e qyteteve tona ku kishat, xhamitë dhe sinagogat i kanë bërë hije njëra-tjetrës”.
“Ne jemi krenarë me këtë traditë dhe e ndjejmë veten të lumtur se shpirti i kësaj tradite është në përputhje me vizionin që kemi sot për vendin tonë – vizionin e integrimit në Bashkimin Evropian. Ne jemi plotësisht të përkushtuar në përmbushjen e këtij vizioni dhe ndihemi të lumtur se nuk kemi asnjë vizion tjetër alternativ për të ardhmen tonë”, theksoi kryeparlamentari Kosovar, Veseli.
Duke folur për disa tendenca për ta paraqitur Kosovën si një tokë pjellore për radikalizmin fetar, Veseli tha se ky është një perceptim i pavërtetë, sipërfaqësor dhe gjithsesi i përkohshëm. Ai e konsideroi të padrejtë dhe të pamoralshme që të gjykohet për një vend, duke marrë për bazë veprimet e një grupi të vogël individësh.
“Republika e Kosovës mbetet e përkushtuar, me tërë qenien e saj, në luftën kundër ekstremizmit të dhunshëm. Ne kemi pasur rezultate të prekshme në këtë drejtim dhe aleatët tanë na janë falënderuar për këto rezultate. Ne jemi të sigurtë ne fitoren kundër tendencave të ekstremizmit të dhunshëm”, potencoi kreu i Kuvendit.
Duke folur për kërcënimet i cili po i bëhet thelbit humanist të religjionit në botë nga grupe të ndryshme ekstremiste, Veseli tha se ashtu si qëllimet e tyre, edhe vizioni i tyre është i errët.
“Është koha, që brenda traditave tona të ndryshme kulturore e fetare, të rizbulojmë burimet e mirëkuptimit dhe solidaritetit me njeri-tjetrin. Është koha t’u tregojmë ekstremistëve se religjionet janë vlerë e jona, e jo instrument i tyre. Religjioni është tepër i rëndësishëm për ta lënë në duart e tyre. Është koha për një fitore të re të humanizmit liberal mbi fanatizmin e dhunshëm. Vetë kjo konferencë, me një pjesëmarrje kaq globale, me emra të nderuar të dijes e humanizmit, është në funksion të këtij qëllimi të përbashkët”, tha kryetari i Kuvendit të Kosovës, Veseli.
Në Prishtinë, në pasditën e 31 majit, nisi një ndër takimet më të mëdha të dialogut ndërfetar në Evropë, ku marrin pjesë më shumë se 300 pjesëmarrës nga 50 shtete të botës, përfshirë edhe shumë sosh që nuk e kanë njohur pavarësinë e Kosovës. Ata u mblodhën për tre ditë për të diskutuar rolin e gruas në luftimin e ekstremizmit. Në Prishtinë kanë mberritur edhe Nobelistët e paqes Shirin Ebadi (Iran) dhe Tawakkol Karman (Jemen).
Prishtina për herë të pestë ishte mikpritëse e këtij takimi të madh, të titulluar Interfaith Kosovo. Në këtë konferencë sivjet kishte shumë pjesëmarrës, përfshirë edhe liderë fetarë nga Argjentina, Jemeni, Amerika, Kuba, Tajlanda, Nigjeria, dhe mbi 45 shtete tjera nga mbarë rruzulli tokësor.
Konferenca titullohej “Roli i Gruas në Promovimin e dialogut Ndërfetar dhe luftimin e ekstremizmit” dhe është organizuar nga disa organizata që promovojnë dialogun si Instituti Ndërkombëtar për Dialog Ndërfetar, Tony Blair Faith Foundation, ndërsa mbështetës janë Ministria e Punëve të Jashtme, Kuvendi i Kosovës, Ambasada Amerikane, Ambasada Kanadeze, Ambasada Norvegjeze si dhe Organizata e Kombeve të Bashkuara.
Pjesëmarrësit ishin në panele të ndryshme që i dedikohen temave që kanë të bëjnë me familjen, rolin e gruas, pastaj gjuhën e urrejtjes në rrjete sociale. Konferenca Interfaith Kosovo sivjet ndau edhe Çmimin e Kosovës për Dialog Ndërfetar.
Pse Kosova dhe Ballkani gjetën lehtësim në rezultatin e zgjedhjeve të Austrisë
Si president i Kosovës, republikës së vogël në Ballkanin Perëndimor, Hashim Thaçi është i pari i cili pranoi të ketë ndjerë lehtësim nga rezultati i zgjedhjeve presidenciale në Austria./
Shkruan: Hashim Thaçi, president i Republikës së Kosovës/*
I kam dërguar urimet e mia presidentit të zgjedhur Alexander Van der Bellen dhe e mirëpres bashkëpunimin me të në çështjet që bashkojnë rajonin tonë me Vjenën – kryeqytetin e vjetër të Perandorisë së Habsburgëve – e cila ka luajtur një rol kyç në historinë, kulturën e madje edhe në arkitekturën tonë.
Zgjedhja e presidentit ishte një çështje krejtësisht austriake dhe do të ishte e pavend për cilindo prej nesh në Ballkan që të flisnim në favor të ndonjërit prej kandidatëve gjatë fushatës.
Megjithatë, zgjedhjet ishin me rëndësi jetike për ne në Kosovë dhe në rajon.
Ashtu si homologët e tij të ekstremit të djathtë në Francë dhe Gjermani, Norbert Hofer sulmoi politikën e jashtme të garniturës austriake që kishte njohur sovranitetin dhe pavarësinë e Kosovës. Ai gjithashtu kishte deklaruar publikisht se “do të ishte gabim që të pranohej Kosova në organizata ndërkombëtare, sepse kjo vetëm se do të shkaktonte probleme”.
Ky është lloji i argumentit që jemi mësuar të dëgjojmë nga Moska e Putinit, por jo nga një vend me një histori të gjatë të mbështetjes së vetëvendosjes së ish-republikave jugosllave që kanë fituar lirinë e tyre nga diktatori Sllobodan Millosheviq.
Austria u bë një fanar i shpresës kur ajo i hapi dyert e universiteteve për studentët tanë, pasi që Serbia ndaloi mësimin në gjuhën shqipe në Kosovën e pushtuar në vitet 1990. Unë, personalisht, kurrë nuk do t’i harroj homazhet për demokracinë dhe të drejtat e njeriut nga ana e politikanëve si Alois Mock dhe Otto von Habsburg, në kohën kur unë isha student.
Kjo është arsyeja pse ne në Kosovë ishim kaq të tronditur që një politikan arriti fare pranë presidencës kombëtare përmes një platforme që hodhi poshtë dekada të politikave të përcaktuara progresive që kanë ndihmuar Ballkanin për të kapërcyer urrejtjen dhe nacionalizmin.
Platforma e Hoferit, ashtu si e lëvizjeve të tjera të ekstremit të djathtë në Europë, mbështetet në konceptin e Hantingtonit të përplasjes së qytetërimeve dhe në promovimin e teorisë sE Islami është i papajtueshëm më Europën. Për ne në Kosovë, Shqipëri apo Bosnje, me shtresa të mëdha të shoqërivE tona që i përkasin besimit islam, një teori E tillë na përjashton nga ndjenja e të qenit pjesë e kontinentit ku kemi jetuar me shekuj dhe mijëvjeçarë.
Përveç kësaj, Kosova nuk është myslimane: shoqëria jonë është laike dhe qytetare.
Kosova u bë vendi i parë në Ballkani që zgjodhi një president grua më 2001 dhe është shteti i parë në Ballkan që ka njohur komunitetet LGBTI në kushtetutën e saj. I kam prirë paradës së komuniteteve LGBTI në Kosovë muajin e kaluar, për të përçuar mbështetjen tonë për këtë komunitet, pikërisht për t’i treguar qytetarëve tanë dhe botës se ekstremizmi dhe paragjykimi nuk kanë vend në mesin tonë.
Gjithashtu, ne nuk jemi as strehë e sigurt për ekstremistët. Shërbimet tona të sigurisë kanë bërë 100 arrestime dhe kanë siguruar 67 aktakuza si dhe 26 dënime kundër mbështetësve të ISIS-it në vendin tonë. Sekretari amerikan i Shtetit, John Kerry vuri në një vizitë të fundit në Kosovë se kosovarët janë prijës rajonalë në luftën kundër ekstremizmit të dhunshëm.
Sekretari i Përgjithshëm i Kombeve të Bashkuara, Bam Ki-moon, po ashtu, njohu rolin e Kosovës në promovimin e dialogut ndërfetar në një raport të vitit 2013. Edhe Bashkimi Europian theksoi ritmin e përshpejtuar të reformave tona dhe nënshkroi me Kosovën traktatin e parë para anëtarësimit, Marrëveshjen e Stabilizim Asociimit.
Sentimentet e thella euroskeptike të propaguara nga Hofer dhe ekstremi i djathtë janë jashtëzakonisht dhe qenësisht të rrezikshme për të gjitha vendet e Ballkanit.
Ishte pikërisht tërheqja gravitacionale e Brukselit që solli paqen dhe stabilitetin në rajonin tonë. Pa perspektivën e anëtarësimin në BE, si një familje e vlerave dhe interesave të përbashkëta, politikat e rajonit tonë rrezikojnë të katandisen në një boshllëk që mund të mbushet nga ekstremistë në vendin tonë.
Sipas sondazheve, më shumë se 95 për qind e kosovarëve dëshirojnë anëtarësimin në BE dhe në NATO.
Si një hap drejt këtij qëllimi, Komisioni Europian tashmë ka rekomanduar zyrtarisht liberalizimin e vizave dhe lëvizjen e lirë të qytetarëve tanë brenda zonës Shengen, në përputhje me pjesën tjetër të Ballkanit.
Liberalizimi i vizave është fituar me shumë mund, pas reformave të vështira të brendshme, por është e qartë se disa politikanë në Europë po përfitojnë nga disponimi aktual i pakënaqësisë publike ndaj migrimit dhe po përdorin Kosovën dhe Ballkanin si një kokë turku.
Në ndërkohë që po festojmë fitoren e ngushtë të forcave progresive të Austrisë, një gjë është e sigurt. Krerët e Ballkanit duhet të punojnë më shumë në forcimin e sundimin të së drejtës dhe në luftimin e emigracionit të paligjshëm si dhe ekstremizmit të dhunshëm, për të siguruar një ndjenjë në rritje të sigurisë dhe për t’i qetësuar skeptikët në mbarë Europën.
Në duhet të jemi – siç është një thënie – “më katolikë se Papa”, në mënyrë që t’i bindin kundërshtarët se ëndrra europiane, rruga europiane, është shansi ynë i vetëm, kontrata më e mirë që ne mund të nënshkruajmë për të garantuar të ardhmen tonë.
*Presidenti Thaçi për “EurActiv”
Kosova-Mbahet konferenca “Diaspora – Investimet dhe Punësimi”
Foto Gazeta DIELLI-Behlul Jashari: Kosova e lirë dhe e pavarur, angazhime edhe për zhvillim ekonomik – kryeqyteti, Prishtina/
-Ambasadorja e Gjermanisë në Kosovë, Angelika Viets: Diaspora mund të luajë një rol shumë të madh duke transmetuar dijen dhe përvojat në vendin e vet. Për zhvillimin e vendit, nuk janë të mjaftueshme remitancat, por nevojiten investimet/
– Në Strategjinë Kombëtare për zhvillim 2016-2021, diaspora është përfshirë në dy shtylla. Diaspora dhe përfaqësuesit e saj, bashkë me partnerët e tyre, kanë potencial për të investuar në Kosovë, u tha në konferencë/
Nga Behlul Jashari/ PRISHTINË, 30 Maj 2016/ Në Prishtinë, sot, mbi 200 investitorë të huaj e vendorë janë bërë bashkë për të investuar në Kosovë, në konferencën “Diaspora – Investimet dhe Punësimi”.
Janë mbi 100 investitorë nga shtetet gjermanofolëse (Gjermani, Zvicër e Austri), dhe mbi 100 biznese vendore, para të cilëve institucionet qendrore e lokale të Kosovës prazantojnë projekte konkrete të investimeve.
Në hapje, kryetari i Odës Ekonomike Gjermano-Kosovare, Samir Krasniqi, falënderoi shtetin gjerman për mbështetjen e parezervë të kësaj konference. “Mërgata është e fuqishme në diasporë dhe kjo dëshmohet me investimet e suksesshme të bëra në Kosovë”, u shpreh ai.
Ambasadorja e Gjermanisë në Kosovë, Angelika Viets, theksoi se, “diaspora mund të luajë një rol shumë të madh duke transmetuar dijen dhe përvojat në vendin e vet”, ndërsa shtoi se, “për zhvillimin e vendit, nuk janë të mjaftueshme remitancat, por nevojiten investimet”.
Ministri kosovar i Diasporës, Valon Murati, theksoi se, diaspora sot përbën potencial shumëfish më të madh, jo vetëm financiar, por edhe profesional.
“Për ta lëvizur këtë potencial, Ministria e Diaspores ka filluar dhe po vazhdon me sukses krijimin e lidhjeve brenda diasporës sonë përmes implementimit të projektit të rrjetëzimit. Efektet e këtij rrjetëzimi janë të dyfishta: krijon mundësi për zhvillimin e mëtutjeshëm të bizneseve të diasporës përmes bashëpunimit mes tyre, si dhe përmes projekteve të përbashëkta midis nesh krijon mundësinë për zhvillimin e tyre dhe të vendit. Gjithashtu, në Strategjinë Kombëtare për zhvillim 2016-2021, diaspora është përfshirë në dy shtylla: njëra ka të bëjë me kapitalin njerëzor dhe tjetra merret me industritë konkurruese, potenciali investues i diasporës sonë dhe mundësia që ajo të shërbejë si konsumatore e shërbimeve dhe e prodhimeve të Kosovës“, tha ministri Murati.
Ministrja e Tregtisë e Industrisë, Hykmete Bajrami, tha se Qeveria e Kosovës ka punuar me vendosmëri për zbatimin e reformave, sidomos në sferën e investimeve.
“Në këtë drejtim është përmirësuar legjislacioni, politikat fiskale, si dhe janë mënjanuar shumë barriera për lehtësimin e bizneseve. I inkurajomë bizneset që të mos rreshtin me kërkesat e tyre, kritikat e tyre karshi institucioneve, sepse vetëm kështu e bëjmë Kosovën më të mirë”, tha ajo.
Afaristi i suksesshëm nga Gjermania, njëherësh kryetari i Unionit të Bizneseve Shqiptare në Gjermani, Nazmi Viqa, paraqiti edhe kërkesa konkrete për Qeverinë e Kosovës. “Diaspora dhe përfaqësuesit e saj, bashkë me partnerët e tyre, kanë potencial për të investuar në Kosovë, për t’i ngritur kapacitetet për zhvillimin ekonomik të bizneseve. Unioni i Bizneseve i ka disa propozime, ndër to të ketë siguri juridike, stimulime dhe infrastruktura e klima për investime të jetë serioze”, theksoi Viqa.
Arban Abrashi, ministër i Punës dhe Mirëqenies Sociale, tha se diaspora e Kosovës ka një rëndësi të veçantë jo vetëm për zhvillimin ekonomik përmes investimeve , por edhe përmirësimit të imazhit të vendit jashtë. “Qëllimi i kësaj konference është të krijohen lehtësi për investimet në diasporë, si dhe ato të përfitojnë nga fuqia punëtore”, bëri të ditur ai.
Konferenca vazhdon punimet gjatë tërë ditës me prezentimet rreth mundësive për investime, ndërsa nga pjesëmarrësit u theksua se brenda një viti Kosova nga diaspora pranon 600 deri 700 milionë euro.
Nesër, në kuadër të këtij organizimi, kompani nga Kosova, rajoni dhe tre shtetet gjermanofolëse do të mbajnë edhe Panairin e Punës, për të cilin tashmë janë paralajmëruar se do të ketë mbi 900 vende të lira.
Ky organizim, i pari i përmasave të tilla në Kosovë, bëhet nga Oda Ekonomike Gjermano Kosovare, mbështetur nga Shoqëria Gjermane për Bashkëpunim Ndërkombëtar (GIZ), Qendra Informative Gjermane për Migracion, Arsim dhe Karrierë (DIMAK) dhe në bashkëpunim me Ministrinë e Tregtisë dhe Industrisë, Ministrinë e Punës dhe Mirëqenies Sociale, Ministrinë e Diasporës, Agjencinë për Investime dhe Përkrahje të Ndërmarrjeve në Kosovë (KIESA), Programin Global për Migrim dhe Zhvillim (PME), Qendrën për Migrim Ndërkombëtar dhe Zhvillim (CIM) dhe për herë të parë në Kosovë me konkurse të hapura do të marrë pjesë edhe Agjencioni Federal për Punë (ZAV).
Pos prezantimit të projekteve për investime, në konferencë do të debatohet edhe për mundësitë që ofron legjislatura e re në Gjermani, si shansë reale e punësimit të qytetarëve të Kosovës në këtë shtet, por edhe për specifika të veçanta për çështje që ndërlidhen dikert me avansimin dhe përgatitjen profesionale të të rinjëve kosovarë.
Sipas regjistrimit të popullsisë të pranverës 2011, në Kosovë u numëran 1.739. 825 banorë rezidentë, por, numri është më i madh, meqë nuk ka përfshirë edhe një të tretën e kosovarëve që vlerësohet se jetojnë e punojnë jashtë vendit.
- « Previous Page
- 1
- …
- 66
- 67
- 68
- 69
- 70
- …
- 106
- Next Page »