investime – Dielli

KOSOVA PROMOVOHET NË IOWA

July 22, 2018 by dgreca

-Në shtetin amerikan të Iowas promovohen mundësitë për investime në Kosovë/-Në hapje të këtij aktiviteti, Konsulli i Përgjithshëm i Republikës së Kosovës në Iowa Xhavit Gashi foli për zhvillimet e Kosovës, si dhe për partneritetin e veçantë shtetëror ndërmjet Kosovës dhe Iowas/

Iowa, 22 Korrik 2018-Gazeta DIELLI/ Nën organizimin e Konsullatës së Përgjithshme të Republikës së Kosovës në shtetin Amerikan të Iowas, si dhe me mbështetje të Ministrisë së Inovacionit dhe Ndërmarrësisë, Oda Ekonomike Amerikane në Kosovë promovoi në Des Moines të Iowas mundësitë për investime në Kosovë. Në këtë aktivitet morën pjesë biznese dhe shefa ekzekutivë të asociacioneve të biznesit nga Shtetet e Bashkuara të Amerikës, përfaqësues të Federatës Botërore të Odave Ekonomike, por edhe shteteve të tjera si Brazili, Australia, Franca, Ishujt Kajman, etj.Në hapje të këtij aktiviteti, Konsulli i Përgjithshëm i Republikës së Kosovës në Iowa Xhavit Gashi foli për zhvillimet e Kosovës, si dhe për partneritetin e veçantë shtetëror ndërmjet Kosovës dhe Iowas. Ai falënderoi autoritetet ushtarake, ekonomike, edukative dhe kulturore të Iowas për avancimin e bashkëpunimit ndërmjet dy shteteve në shumë fusha të tjera.

Drejtori Ekzekutiv i Odës Ekonomike Amerikane në Kosovë, Arian Zeka tha se pavarësisht se Kosova është shtet i ri, ajo ka shënuar përparim të madh në aspektin e të bërit biznes, që është reflektuar edhe në raportin e Bankës Botërore që mat lehtësinë e të bërit biznes, por edhe atë të The Heritage Foundation i cili mat liritë ekonomike globale, i cili rendit Kosovën shumë më mirë se shumica e vendeve të Ballkanit Perëndimor, por edhe shumë shtete anëtare të Bashkimit Evropian. Ai njoftoi përfaqësuesit e pranishëm të bizneseve për vendimin e Qeverisë së Kosovës për themelimin e Zonës së Veçantë Ekonomike Amerikane në qytetin e Gjakovës. Ai tha se investitorëve potencialë amerikanë, brenda zonës do t’u ofrohet tokë pa pagesë, lirim nga dogana për linja të prodhimit dhe lëndë të parë, depo doganore brenda zonës, si dhe një zyrë e cila do të kryente të gjitha procedurat e aplikimit për leje ndërtimi dhe leje të tjera operative në emër të kompanive amerikane. Ai më tej shtoi se Kosova ofron një mjedis miqësor për kompanitë amerikane, ndërsa Zona si e tillë është model unik në rajon dhe më gjerë i dedikuar për kompanitë amerikane.

Në këtë aktivitet, i pranishëm ishte edhe Gjenerali Timothy Orr, Komandanti i Gardës Nacionale të Iowas, Kim Heidemann nga organizata e Shteteve Simotra të Iowas dhe Debi Durham, Drejtore e Autoritetit të Zhvillimit Ekonomik të Iowas. Kjo e fundit, organizoi edhe një takim për kompaninë amerikane “Ideal Energy”, e cila prezantoi para Konsullit të Përgjithshëm dhe drejtorit të Odës Ekonomike Amerikane, planin e tyre për investime në gjenerimin e energjisë alternative në Kosovë./b.j/

Kosova-Mbahet konferenca “Diaspora – Investimet dhe Punësimi”

May 30, 2016 by dgreca

Foto Gazeta DIELLI-Behlul Jashari: Kosova e lirë dhe e pavarur, angazhime edhe për zhvillim ekonomik – kryeqyteti, Prishtina/

-Ambasadorja e Gjermanisë në Kosovë, Angelika Viets: Diaspora mund të luajë një rol shumë të madh duke transmetuar dijen dhe përvojat në vendin e vet. Për zhvillimin e vendit, nuk janë të mjaftueshme remitancat, por nevojiten investimet/

– Në Strategjinë Kombëtare për zhvillim 2016-2021, diaspora është përfshirë në dy shtylla. Diaspora dhe përfaqësuesit e saj, bashkë me partnerët e tyre, kanë potencial për të investuar në Kosovë, u tha në konferencë/

Nga Behlul Jashari/ PRISHTINË, 30 Maj 2016/ Në Prishtinë, sot, mbi 200 investitorë të huaj e vendorë janë bërë bashkë për të investuar në Kosovë, në konferencën “Diaspora – Investimet dhe Punësimi”.

Janë mbi 100 investitorë nga shtetet gjermanofolëse (Gjermani, Zvicër e Austri), dhe mbi 100 biznese vendore, para të cilëve institucionet qendrore e lokale të Kosovës prazantojnë projekte konkrete të investimeve.

Në hapje, kryetari i Odës Ekonomike Gjermano-Kosovare, Samir Krasniqi, falënderoi shtetin gjerman për mbështetjen e parezervë të kësaj konference. “Mërgata është e fuqishme në diasporë dhe kjo dëshmohet me investimet e suksesshme të bëra në Kosovë”, u shpreh ai.

Ambasadorja e Gjermanisë në Kosovë, Angelika Viets, theksoi se, “diaspora mund të luajë një rol shumë të madh duke transmetuar dijen dhe përvojat në vendin e vet”, ndërsa shtoi se, “për zhvillimin e vendit, nuk janë të mjaftueshme remitancat, por nevojiten investimet”.

Ministri kosovar i Diasporës, Valon Murati, theksoi se, diaspora sot përbën potencial shumëfish më të madh, jo vetëm financiar, por edhe profesional.

“Për ta lëvizur këtë potencial, Ministria e Diaspores ka filluar dhe po vazhdon me sukses krijimin e lidhjeve brenda diasporës sonë përmes implementimit të projektit të rrjetëzimit. Efektet e këtij rrjetëzimi janë të dyfishta: krijon mundësi për zhvillimin e mëtutjeshëm të bizneseve të diasporës përmes bashëpunimit mes tyre, si dhe përmes projekteve të përbashëkta midis nesh krijon mundësinë për zhvillimin e tyre dhe të vendit. Gjithashtu, në Strategjinë Kombëtare për zhvillim 2016-2021, diaspora është përfshirë në dy shtylla: njëra ka të bëjë me kapitalin njerëzor dhe tjetra merret me industritë konkurruese, potenciali investues i diasporës sonë dhe mundësia që ajo të shërbejë si konsumatore e shërbimeve dhe e prodhimeve të Kosovës“, tha ministri Murati.

Ministrja e Tregtisë e Industrisë, Hykmete Bajrami, tha se Qeveria e Kosovës ka punuar me vendosmëri për zbatimin e reformave, sidomos në sferën e investimeve.

“Në këtë drejtim është përmirësuar legjislacioni, politikat fiskale, si dhe janë mënjanuar shumë barriera për lehtësimin e bizneseve. I inkurajomë bizneset që të mos rreshtin me kërkesat e tyre, kritikat e tyre karshi institucioneve, sepse vetëm kështu e bëjmë Kosovën më të mirë”, tha ajo.

Afaristi i suksesshëm nga Gjermania, njëherësh kryetari i Unionit të Bizneseve Shqiptare në Gjermani, Nazmi Viqa, paraqiti edhe kërkesa konkrete për Qeverinë e Kosovës. “Diaspora dhe përfaqësuesit e saj, bashkë me partnerët e tyre, kanë potencial për të investuar në Kosovë, për t’i ngritur kapacitetet për zhvillimin ekonomik të bizneseve. Unioni i Bizneseve i ka disa propozime, ndër to të ketë siguri juridike, stimulime dhe infrastruktura e klima për investime të jetë serioze”, theksoi Viqa.

Arban Abrashi, ministër i Punës dhe Mirëqenies Sociale, tha se diaspora e Kosovës ka një rëndësi të veçantë jo vetëm për zhvillimin ekonomik përmes investimeve , por edhe përmirësimit të imazhit të vendit jashtë. “Qëllimi i kësaj konference është të krijohen lehtësi për investimet në diasporë, si dhe ato të përfitojnë nga fuqia punëtore”, bëri të ditur ai.

Konferenca vazhdon punimet gjatë tërë ditës me prezentimet rreth mundësive për investime, ndërsa nga pjesëmarrësit u theksua se brenda një viti Kosova nga diaspora pranon 600 deri 700 milionë euro.

Nesër, në kuadër të këtij organizimi, kompani nga Kosova, rajoni dhe tre shtetet gjermanofolëse do të mbajnë edhe Panairin e Punës, për të cilin tashmë janë paralajmëruar se do të ketë mbi 900 vende të lira.

Ky organizim, i pari i përmasave të tilla në Kosovë, bëhet nga Oda Ekonomike Gjermano Kosovare, mbështetur nga Shoqëria Gjermane për Bashkëpunim Ndërkombëtar (GIZ), Qendra Informative Gjermane për Migracion, Arsim dhe Karrierë (DIMAK) dhe në bashkëpunim me Ministrinë e Tregtisë dhe Industrisë, Ministrinë e Punës dhe Mirëqenies Sociale, Ministrinë e Diasporës, Agjencinë për Investime dhe Përkrahje të Ndërmarrjeve në Kosovë (KIESA), Programin Global për Migrim dhe Zhvillim (PME), Qendrën për Migrim Ndërkombëtar dhe Zhvillim (CIM) dhe për herë të parë në Kosovë me konkurse të hapura do të marrë pjesë edhe Agjencioni Federal për Punë (ZAV).

Pos prezantimit të projekteve për investime, në konferencë do të debatohet edhe për mundësitë që ofron legjislatura e re në Gjermani, si shansë reale e punësimit të qytetarëve të Kosovës në këtë shtet, por edhe për specifika të veçanta për çështje që ndërlidhen dikert me avansimin dhe përgatitjen profesionale të të rinjëve kosovarë.

Sipas regjistrimit të popullsisë të pranverës 2011, në Kosovë u numëran 1.739. 825 banorë rezidentë, por, numri është më i madh, meqë nuk ka përfshirë edhe një të tretën e kosovarëve që vlerësohet se jetojnë e punojnë jashtë vendit.

Diaspora per Vendlindjen- Dashuria për vendlindjen dëshmohet me vepra

June 16, 2015 by dgreca

Nga Esad GJONBALAJ/Kur muarem rrugën e mërgimit qe te gjithë jemi nisur me shpresën se një dite do te kthehemi. Ëndrra e vendlindjes nuk shuhet kurrë ne jetën e çdo mërgimtari. Vitet ikin e shpresat veniten sepse realiteti jetësor e bën te veten dhe dritarja e mundësisë se kthimit gjithnjë vazhdon te tkurret. Vitet e 80-ta ishin vite kur Plave Gucia kjo trevë shqiptare lulëzonte nga rinia e jone e cila po edukohej dhe emancipohej me thesarin i dijes ne Universitet e Kosovës. Mirëpo vitet e 80-ta përjetuan edhe eksodin e Madhe te rinis tone nga Plava e Gucia, eksod qe e la vendlindjen tone gjysme te zbrazet .

Vendlindja jonë e gjymtuar nga plaga e mërgimit dhe e mos perspektives ekonomike pret qe sot shpresën e jetës dhe të ardhmërisë te ia kthejnë po ata që dikur e lan te vetmuar, vendlindja pret që bijtë e saj ta mbrojnë at sot në formë tjetër duke ia kthyer vendlindjes së tyre perspektiven dhe gjallërinë që e kishte dikur dhe gjat historisë.

Sot vendlindje e jonë pret që dashurin tonë ta dëshmojmë me investime konkrete që banoreve vendas që nuk e braktisen at të u’a kthejmë shpresën përmes investimeve dhe që vendoreve të u’a lehtësojmë jetën e tyre përmes mundësisë së punësimit dhe qe ata mos ta braktisin vendlindjen tone te çmuar Plavë Gucinë.

Kohëve te fundit jemi duke vrenjtur një trend te shtimit te interesimit te bashkëvendësve tone për te investuar kapitalin e tyre dhe qe me veprat e tyre këta bashkëvendas po dëshmojnë atdhedashurinë ndaj atdheut. Investimet e tilla janë shumë domethënëse duke pasur parasysh se këto investime janë ne fazën e fillestare qe ngjall shpresat qe kapitali i tubuar i Plavë Guciasëve të bëhet forcë dhe fuqi ekonomike e trojeve tona të lara me gjakun e te parëve tonë.

Investimi në Vuthaj i bashkevendasit tonë Genc Q Gjonbalaj që jeton në Zvicër për ndërtimin e fermës së viçave është investimi i par konkret në këtë fshat qe si qellim ka punësimin dhe aktivizimin e mundësive të shumta në lëmin e blegtorisë që kan Vuthajt dhe vendbanimet e tjera ne Plavë Guci. Në komunikim me Gencin kuptuam se Ferma e tijë në fillim do te ketë rreth 150 viça dhe se tregun e shitjes e ka të garantuar në tregun Evropian.

Genc Q Gjonbalaj u lind dhe rrit ne Vuthaj me kushte te rënda ekonomike, por siç thotë Genci me modesti sa ma te rënd që e kisha jetën aq ma te fort dhe te thellë dhe brumosur e kam dashurin ne shpirtin tim për Vuthaj dhe Plavë Gucinë.

Ka edhe investitor bashkevendas tonë qe dëshirojnë qe përmes investimeve të tyre të gjejnë veten ne vendlindjen e vet por edhe institucionet komunale e ne veçanti subjektet politike shqiptare duhet te jen forcë motivuese për investitorët potencial, dhe qe ti inkurajojnë ata e jo qe me veprimet jo racionale te tyre të krijojnë një klimë të disfavorshme për investimet e bashkatdhetarëve tanë gjegjësisht te Diaspore tonë

Unioni Global i Bizneseve Shqiptare në Diasporë i gatshm për investime në Kosovë e Shqipëri

May 23, 2015 by dgreca

Nga Prishtina Beqir Sina/
Biznesmenët dhe afaristët shqiptarë ka kërkuar nga institucionet e Kosovës, që të përkushtohen edhe më shumë për t’i krijuar hapësirë dhe ambient për investime në vendin e tyre, diasporës për të treguar edhe një her vetn e tyre ashtu si në lirinë dhe pavarësinë e Kosovës/
PRISHTINË,.- Unioni Global i bizneseve shqiptare në Diasporë, prej ditës së mërkur, ka nisur një forum ekonomik katër ditor – me takimet vjetore, të cilat filluan në Prishtinë – “Sëis Diamond Hotel”, dhe mbyllen sot e shtunë në Tiranë, në shënimin e përvjetorit të parë të formimit të këtij unioni.
Në këto takime që llogariten të jenë më të mëdhat, që prej themelimit, morën pjesë 17 kryetarët e rrjeteve të unioneve shqiptare në botë dhe biznesmenë shqiptarë të dalluar me veprimtarinë e tyre në diasporë.
Gjatë ditës së djeshme kryetarët e rrjeteve të unionit shqiptar formuan platformën e Unionit Global,duke e votuar atë së bashku me statutin e saj, si dhe i përcaktuan rregullat e funksionimit të unionit. Nga ky takim u vendos që edhe për një vit kryetar i Unionit Global të Biznesmenëve të Diasporës Shqiptare, të mbetet biznesmeni i njohur shqiptarë në Dallas- SHBA, zoti Nazar Mehmeti, dhe nëkryetar zoti Elmi Berisha nga Nju Jorku, si dhe Ismet Sjmali sekretar i përgjithsëhm.
Ndërsa, me këtë rast Nju Jorku, u zgjodh vendi mikpritës ku do të mbahet vitin e ardhshëm takimi i dytë i Unionit Global të Biznesmenëve të Diasporës shqiptare.
Gjatë, këtyre katër ditëve biznesmenët e dalluar shqiptarë në botë, diskutuan në frymën e mirëkuptimit mbi modalitetet e të bërit biznes në Kosovë dhe Shqipëri, si dhe treguan përvojat e tyre të suksesit në biznes në vendet ku ata jetojnë dhe veprojnë.
Forumin katërditor ekonomik, për çdo ditë me profesonalizëm dhe përkushtim të madh e ka udhëhequr zoti Naim Deduashaj, i cili në pozitën e Drejtorit të Investimeve të Diasporës, është edhe ideator dhe krijuesi i organizimit të këtij Rrjeti të Bizneseve Shqiptare në Diasporë.
Ky forum, u shpreh në fillim të fjalës së tij, zoti Dedushaj, është një shëmbull konkret se si të ndihmohet zhvillimi i vendeve tona respektivisht Kosova dhe Shqipëria nga Diaspora shqiptare, nëpër botë, e cila ka dhën një kontribut të jashtzakonisht të madh në shërbim të kombit shqiptar. “Ne sot, tha ai ndihemi krenar që në mesin tonë kemi së bashku me ne janë edhe disa afaristë dhe veprimtarë të dalluar të diasporës, tonë, nga Europa, Australia dhe SHBA, të cilët kurr nuk u ndalën duke punuar për çështjen Shqiptare, e në veçanti për Kosovën – duke qenë edhe pjesë e fuqishme e luftës për liri dhe e realizimit të pavarësisë së Kosovë”.
I gjithë forumi, është moderuar gjatë këtyre ditëve nga sekretari i përgjithshëm i këtij unioni, z. Ismet Smajli, biznesmen shqiptar nga Amerika, dhe kordinatori për Europë, zoti Yll Blakaj nën kryetar për Europën, pjestar i Rrjetit të Bizneseve Shqiptare në Austri, e cili është edhe meritori mbasi ka mundësuar takimin vjetor, që u mbajt këto ditë në Prishtinë dhe Tiranë.
Në forumin ekonomik të mbajtur sot, me temën “Përmirësimi i Ambientit për investimet nga investitorët e diasporës në Kosovë”, ky uninon ka kërkuar para Kryeministrit të Kosovës zotit Isa Mustafa dhe anëtarëve të kabinetit të tij pjesëmarrës në këtë forum, ndihmën e institucioneve për të investuar në Kosovë.
Ku edhe krerët e institucioneve, të Kosovës, fuqishëm u premtuan atyre ambient të sigurt për investime, dhe të gjitha lehtësirat e të bërit biznes.
Madje, kryeministri i Kosovës, Isa Mustafa, u zotua se Qeveria, që ai udhëheq do t’i krijoj kushtet për gjithë investitorët e diasporës kosovare të vijnë dhe të investojnë në vendin e tyre.
“Ardhja juaj këtu dhe investimet tuaja në Kosovë nuk janë të njëjta si investimet e tjera, sepse këtu kthehen njerëzit tanë, kthehen ata që e njohin mentalitetin, që e njohin kulturën, që dëshirojnë t’i ndihmojnë vendit të tyre dhe të cilët së bashku me kapitalin sjellin edhe dijen dhe përvojat që i nevojiten Kosovës. Po ashtu vlerësojmë remitencat që keni sjellë në Kosovë, pasi përmes jush ne kemi mbuluar shumë nga nevojat tona”, tha Mustafa.
Kreu i Qeverisë së Kosovës, shtoi se ata kanë aprovuar një program qeveritar në të cilin janë munduar që të krijojnë një ambient të përshtatshëm për biznesin nga dispora.
Ndërsa, presidenti i Rrjetit të Biznesit të Diasporës Shqiptare, Nazar Mehmeti tha se ky është takimi i dytë i këtij rrjeti mes shqiptarëve në diasporë, por është një fillim i i mbarë dhe i madh, mbasi si u shpreh ai “Dita e bukur duket qysh në mëngjes” tha kreu i këtij unioni.
Edhe biznesmeni Lazim Destani, kërkoi që të shfrytëzojnë këtë sinergji ekonomike për zhvillimin e përgjithshëm të trojeve shqiptare.
Lazim Destani duke shprehur edhe një herë kënaqësin dhe përshëndetur me këtë rast këto takime , si kryetar nderi I këtij Unioni, ai tha se ndihesh krenar dhe I nderuar për të qenë pjesë e këtij forumi I cili nga aspekti ekonomik me të drejtë mund të quhet – struktura më e fuqishme në trojet tona etnike. “ Le ta shfrytëzojmë këtë sinenrgji të madhe ekonomike të diasporës për zhvillimin e përgjithshëm të trojeve tona” bëri thirrje në fillim të fjalës së tij biznesmeni I fuqishëm shqiptar nga Maqedonia , presidenti I kompanisë Ecolog, dhe kryetar nderi I Rrjetit të Biznesmenëve nga Diaspora, duke shtuar se “Në ktë format, ne jemi partneri me adresë më revalante për autoritetet dhe insitucionet tona për të koordinuar dhe hapur rrugët për investime dhe biznese në këto troje”.
Më tej në fjalën e tij zoti Destani ishte edhe pak kritik, ndaj institucioneve shqiptare -liderve shqiptar të cilët I “thumbojë paksa jo drejtëpërdrejt.
“Mbasi ne ia dalim, tha presidenti I kompanisë Ecolog, zoti Destani, të jemi konkurues madje në SHBA, Europë, Kanada, e gjithë andej, ku konkurenca është shumë më e madhe se në Ballkan, kurse këndej akoma hasim në vështërsi dhe barrier të natyrave të ndryshme”.
Më tej Destani ceku faktin se afaristët dhe biznesmenët shqiptarë në diasporë, nuk kërkojnë asgjë më tepër, se gjithë andej nëpër botë, thjesht që të investojnë në këto troje, ku akoma simbas tij importojmë shumëçka – kur ne dimë dhe kemi resourse t’I prodhojme dhe bejmë vetë, më lirë dhe më mirë.
“Nëse nëpër botë ia kemi dalë pyeti ai atëhere pse jo në viset tona jo? Të bashkuar në biznese dhe investime, le të ndertojmë të ardhmen tonë të përbashkët, le të investojmë për pasardhësit tanë . këtë të gjithë , ne dhe ju ua kemi borxh atyre dhe vatanit” përfundojë fjalën përshëndetëse, Presidenti I nderit I Unionit Global të biznesve Shqiptare në Diasporë.
Në kryetari I Përgjithshëm I këtij Unioni, zoti Elmi Berisha, biznesmen I sukseshëm , dhe veprimtar I dalluar I komunitetit shqiptar në SHBA, solli një përshëndetje të zjarrtë të të gjithë afaristëve dhe biznesmenëve të shqiptarëve të Amerikës, kryesishtë në zonën e ashtuquajtur të “Tri-Shteshtit”.
Gjatë gjithë kësaj kohe, u shpreh zoti Berisha që Kosova ka qenë e lirë, dhe, besojë, se nuk ka qenë ndonjëher më e përshtashme se sa tani për të investuar nga ne të gjithë, dhe të japim edhe kontributin tonë në zhvillimin e përparimin e saj. Nga që mendojë se erdhi, edhe koha që të bien brengat, dhe të bien disa barriera, duke dal në pah dëshira dhe mundësit e mërgatës shqiptare, nën udhëheqejen e qeverisë tuaj- zoti Kryeministër Mustafa
“Mbasi, tha ai ashtu si e përmendet edhe ju zoti Kryeministër, diaspora shqiptare gjatë gjithë historisë së saj ka luajtur një rolë historic, duke filluar qysh nga koha e formimit të shtetit shqiptarë, me Vatranët, dhe më tutje, deri në ditët e sotme, ku edhe lufta heroike e armatosur, u suportua dhe ndihmua shumë nga diaspora shqiptare, . Shqiptarët në diasporë, krijuan mundësi të reja kur erdhi fjala deri tek lufta për liri dhe pavarësinë e Kosovës dhe të drejtat e shqiptarëve të nëpërkëmbura në Maqedoni, Mal të Zi, Luginën e Preshevës dhe Çamëri, ku edhe ju e lideri historik Rugova, ishit pjesë e sistemit paralel atëhere”
Më tej zoti Berisha tha se :”Megjithëse, në Kosovë gjatë çlirimit të saj dhe pavarësisë situata e saj ka pasur lëvizje të ndryshme, të cilat mund të pohohet se mbas viti 2001 sikur ranë pak, kryesishët ishte ajo diaspora shqiptare dhe ajo në SHBA, dhe Europë, e cila e riktheu besimin, duke e rigjallëruar jetën e përditëshme në Kosovë e në të gjitha trojet shqiptare, ku një meritë të veçantë sot i jepet edhe afaristëve dhe biznesmenëve shqiptarë, veprimtarëve të dalluar të saj – në vendin mik Ii madh i shqiptarëve, pra në Shtetet e Bashkuara të Amerikës.
Së fundi , duke ju drejtaur edhe Kryeministrit dhe anëtareve të kabinetit qeveritar nënkryetari I Rrjetit të Biznesve Shqiptare në Botë, zoti Elmi Berisha , tha se: “Më lejoni që duke shprehur besimin se kjo qeveri dhe ky kabinet qeveritar, ky lider, do të na ofrojë më të mirën, të gjithëve ne, për të ardhur dhe investuar në Kosovë dhe të ndihmojmë edhe ne ne në zhvillimin e saj – jam më se i bindur; se edhe një herë, duke besuar edhe në mundësit tona , në dedikim tonë moral , njerëzor dhe kombëtar, ekonomik dhe poliitik, diaspora shqiptare, veprimtarët e saj, afarustët dhe biznesmenët, do të bëjnë më të mirën për Kosovën” Por, zot Kryeministër, Mustafa, dhe ju qeveritar vetëm na jepni një shancë dhe na “hapni rrugët”, se mëpastaj jemi ne vet, që do ta tregojëm siç e kemi treguar vetveten për atë se çfarë mundet dhe do të bëjmë për Kosovën dhe zhvillimin e saj “
Mbështetje bizneseve kosovare në botë, u dha edhe nga ministri i Diasporës Valon Murati, i cili shoqërojë delegatët e unionit edhe në takimet e tyre në Istog, u tha atyre se do të bëjnë përpjekje që të ndryshojnë ambientin për investime.
Gjatë prezantimit të tij para të pranishmëve ministri i Diasporës Valon Murati potencoi se rrjetëzimi i diasporës e posaçërisht rrjetëzimi i bizneseve shqiptare të diasporës është një prej projekteve më të rëndësishme të realizuara nga ministria që ai udhëheq.
Ai gjithashtu foli edhe për mekanizmat që është duke i krijuar Qeveria e Kosovës për të kanalizuar remitancat e dërguara nga Diaspora në investime direkte dhe zhvillim ekonomik të vendit, duke tentuar që këto remitanca nga konsumi të drejtohen drejtë investimeve. Ministri Murati gjithashtu theksoi se Unioni Global i Bizneseve Shqiptare të Diasporës është një nga partnerët më të rëndësishëm të Qeverisë së vendit.
Në anën tjetër Ministri i Zhvillimit ekonomik Blerand Stavileci foli për rëndësinë e këtij takimi si një rast i mirë për të dëgjuar njëri tjetrin dhe për të parë idetë dhe propozimet nga bizneset tona në diasporë. Ai theksoi prioritetin e Qeverisë për të bashkëpunuar me sektorin privat dhe përmendi reformat strukturale që është duke i ndërmarrë Qeveria e Kosovës në favor të sektorit privat.
Ligji për investime strategjike dhe Fondi inovativ janë dy prej ndërmarrëseve kryesore të Qeverisë së Kosovës për të krijuar një klimë më të mirë të investimeve në Kosovë, theksoi ministri Stavileci.
Ndërsa, kryetari i Unionit të Bizneseve Shqiptare për Gjermaninë, Ejup Berisha, që është dega më e suksesshme e bizneseve shqiptare, kërkoi nga kryeministri që t’iu ndihmoj atyre që të investojnë në Kosovë
Në takim morën pjesë dhe diskutuan edhe, Ministri i Zhvillimit Ekonomik Blerand Stavileci, Ministrja Hykmete Bajrami minitre e MTI,kryetari i Pejës Gazmend Muhaxhuni, Besina Mustafa drejtore KIESA, Osman Shaini sekretar e përgjithshëm në MeD, Hakif Gashi kryetar, Arian Zeka, drejtor egzekutiv i Odës Ekonomike Amerikane në Kosovë, Samir Krasniqi i Odës Ekonomike Gjermane, përfaqësuesi i UNDP – IOM sekretari i parë i ambasadës së Finlandës, dhe afaristë e biznesmen kosovar.
Ndërkaq gjatë ditës së djeshme forumi ka vazhduar takimet e planifikuara me biznesmenë të komunës së Istogut dhe kryetarin e Komunës së Istogut, Haki Rugova. Takimi me biznesmenët që kanë investuar në Kosovë bëhet për tu njoftuar nga afër me punën e tyre.Forumi ka në axhenden e tyre edhe takime të tjera me krerët më të lartë të shtetit ndërsa përfundon gjatë ditës së shtunë me takimet në Tiranë.
Takimi gjithëkombëtar i Unionit të Bizneseve shqiptare, union ky i formuar një vit më parë me iniciativën e Ministrisë së Diasporës dhe i përkrahur nga UNDP-ja kishte si nikoqir të këtij takimi vjetor Rrjetin e bizneseve shqiptare në Austri, i cili funksionon që prej një viti në Vjenë.
Unioni i Biznesit i ka rrjetet e veta në 17 shtete të ndryshme të botës. Katër rrjete janë në Amerikë, një në Kanada dhe të tjerat në të gjitha shtetet ku ka shumicë shqiptare në Evropë. Gjatë themelimit të këtij Unioni janë zgjedhur edhe kryetarët e saj. Kryetar global i Unionit është zotëri Nazar Mehmeti, nën/kryetar Elmi Berisha,sekretar Ismet Smajli, ndërsa kryetar për Evropë Yll Blakaj.
Kryetar nderi është biznismeni i suksesshëm nga Tetova – Lazim Destani

Forumi BERZH, Fyle: Moment kyç që Ballkani të kërkojë investime

February 24, 2014 by dgreca

Gjergji Mima/ – Komisioneri për Zgjerimin dhe Politikat e Fqinjësisë Evropiane, Stefan Fyle, i pranishëm në forumin rajonal të nivelit të lartë për Investimet në Ballkanin Perëndimor, të organizuar nga BERZH në Londër, prezantoi qasjen e re të investimeve në këtë rajon.“Ndërsa Evropa tregon shenjat e para të daljes nga kriza, ky është një moment kyç për Ballkanin Perëndimor për të kërkuar për të tërhequr më shumë investime. Fakti që ekziston një grup i tillë i shquar i njerëzve të mbledhur këtu sot, duke sjellë së bashku krerët e rajonit, investitorët dhe përfaqësues të bashkësisë ndërkombëtare dhe institucioneve financiare ndërkombëtare aktuale dhe potenciale private dhe publike, tregon se rëndësia e investimeve është rritur për rajonin”, tha Fyle.

Duke paraqitur zyrtarisht për herë të parë qasjen e re të qeverisjes ekonomike, konkurrencën dhe rritjen e Komisionit Evropian për rajonin e Ballkanit Perëndimor, Komisioneri Fyle, u shpreh se “në Dokumentin e Strategjisë së Zgjerimit tetorin e kaluar, ne njoftuam synimin tonë për të zhvilluar një qasje të re në ekonomitë e rajonit të zgjerimit. Sot, unë zyrtarisht nis këtë qasje të re, e cila ka të bëjë me ndërtimin e një mirëkuptimi të përbashkët mes liderëve të këtyre vendeve dhe investitorëve të mundshëm mbi prioritetet për reformën ekonomike”.

“Cili është qëllimi i kësaj qasjeje të re ? Ne duam që të vazhdojmë t’u mbështesim në përmbushjen e sfidave të krijimit të vendeve të punës, rritjen e aftësisë konkurruese dhe nxitjen e rritjes . Gjatë pesë viteve të fundit, ne jemi ballafaquar me sfida të njëjta në Bashkimin Evropian. Përpjekjet tona për të trajtuar krizën po sjellin rezultate. Ne kemi përvojë – ne duam që ju të përfitoni prej saj tashmë”, tha Fyle.

“Asnjë nga vendet e Ballkanit Perëndimor nuk është një ekonomi tregu funksionale. Papunësia në të gjithë rajonin është e lartë. Të rinjtë janë të prekur veçanërisht. Nivelet e defiçitit publik dhe borxhit janë rritur. Konkurrueshmëria pengohet shpesh përmes politizimit të vendimeve që duhet të jenë drejtuar nga tregu. Këto probleme duhet të adresohen nëpërmjet një axhende të reformave të besueshme, shoqëruar me fonde të bollshme nga sektori privat dhe publik”, tha Fyle.

“Reformat e financave publike dhe të institucioneve të tregut të punës dhe reduktimi i pengesave administrative për bizneset duhet të jenë prioritete. Investimet në arsim, aftësitë dhe hulumtim gjithashtu duhet të jetë e lartë. Sundimi i ligjit është veçanërisht i rëndësishëm në aspektin e sigurisë ligjore dhe të besimit të investitorëve dhe kështu, është kyç për reformën ekonomike”, theksoi Fyle.

Sipas Komisionerit Fyle, “investimet do të ndodhin vetëm nëse vendet përmirësojnë klimën ndaj investimeve, duke krijuar kushtet për një rritje të qëndrueshme, të nevojshme për të krijuar vende të reja pune; kushtet për të ndihmuar dhe për të tërhequr investime të huaja direkte; kushtet në të cilat bizneset mund të jenë konkurruese dhe të lulëzojnë, dhe kushtet që do të rindezin frymën e sipërmarrësve tuaja dhe ndërmarrjeve të vogla dhe të mesme (SME)”.

Komisioneri Fyle inkurajoi të gjithë investitorët e pranishëm për të marrë këtë mundësi për të përcaktuar zonat në të cilat do të duan qeveritë të përqëndrohen për ta bërë klimën e investimeve në rajonin e Ballkanit Perëndimor më tërheqëse.

“Unë gjithashtu dua të theksoj rëndësinë e qeverisjes ekonomike në ruajtjen e mbështetjen për zgjerimin e Bashkimit Evropian”, tha Fyle duke u shprehur se “ne do të punojmë me ju për të arritur këto qëllime”.

“Së pari , ne kemi nevojë për stabilitet makroekonomik, fiskal dhe financiar. Ne tashmë kemi një dialog në programet makro – ekonomike dhe fiskale vjetore me të gjitha vendet me përjashtim të Kosovës. Ne duam të forcojmë këtë proces dhe të përqëndrohemi mbi reformat kryesore strukturore”, tha Fyle.

Ne, vijoi Komsioneri për Zgjerim, “do të mbështesim dialogun tonë mbi Programet Kombëtare të Reformës Ekonomike. Rezultati duhet të jetë për të rënë dakord së bashku në një grup të Vendeve të rekomandimeve specifike për të drejtuar reformat. Ne, së bashku me FMN-në, do të japim asistencë teknike për të mbështetur zbatimin e këtyre rekomandimeve. Vendet gjithashtu do të kërkohet të hartojnë planet e veprimit për menaxhimin e financave publike. Progresi këtu do të hapë mundësinë e mbështetjes buxhetore në sektorë në kuadër të Instrumentit të Ndihmës së Para – Aderimit (IPA) – IPA II”.

Së dyti, theksoi Fyle, “ne kemi nevojë për reforma sektoriale dhe investime në sektorë të caktuar, duke çuar në rritjen e eksporteve dhe më shumë vende pune. Komisioni do të ftojë vendet për t’i dhënë Pasqyrat (çdo vit të dytë, duke filluar nga viti 2015 ) e planeve të tyre për reforma strukturore në të gjithë sektorët më shqetësues, për të përmirësuar konkurrueshmërinë dhe rritjen, të tilla si transporti, energjia dhe arsimi.

Së treti, tha Fyle, “fonde të rëndësishme përmes IPA II do të mbështesin këtë proces dhe reformat pasuese me një fokus në veçantë në mbështetje të sektorëve. Dhe ne do të punojmë me të gjithë ju dhe me Institucionet Financiare Ndërkombëtare për të ofruar dhe financuar këto reforma. Vendet tuaja, të dashur Kryeministra, do të varet nga lidershipi juaj për të siguruar koordinim të të gjithë departamenteve të qeverisë tuaj për të siguruar që ju po punoni në reformat e dakorduara”.

“Nevojat për investime në rajon janë të konsiderueshme. Për këtë arsye unë kam qenë i kënaqur me marrëveshjen nëntorin e kaluar mes Evropës dhe Institucioneve Financiare Ndërkombëtare që të intensifikojnë bashkëpunimin e tyre në investime kyçe në infrastrukturë, duke përfshirë transportin si prioritet dhe energjisë . Kjo do të bëhet përmes Kuadrit të Investimeve të Ballkanit Perëndimor”, tha Fyle.

Komisioneri për Zgjerim theksoi gjithashtu se, “vendet e Ballkanit Perëndimor janë shumë të integruar ekonomikisht nëpërmjet Marrëveshjes së Tregtisë së Lirë të Evropës Qendrore (CEFTA). Prandaj ka kuptim për të përgatitur së bashku disa reforma dhe të vlerësojmë zbatimin e tyre. Strategjia Evropa Juglindore e 2020 për Punë dhe Prosperitet në një Perspektivë Evropiane mund të jetë një pikë kyçe referimi për Komisionin dhe Institucionet Financiare Ndërkombëtare”