Archives for August 2015

KUJTESE-156 mijë shtetas shqiptarë duhet të riaplikojnë për pasaporta për fëmijët e tyre

August 17, 2015 by dgreca

U prodhuan gabim me afat 10-vjeçar, 156 mijë fëmijë shqiptarë, riaplikim për pasaporta/
156 mijë shtetas shqiptarë duhet të riaplikojnë për pasaporta për fëmijët e tyre, për shkak të një gabimi teknik gjatë prodhimit të dokumentit biometrik në vitet 2009-2010.
Drejtoresha e sistemeve informatike në Drejtorinë e Pergjithshme të Gjendjes Civile, Miranda Harizaj, sqaron se pasaportat, për shtetasit deri në 16 vjeç, aksidentalisht janë prodhuar me afat 10-vjeçar, ndërsa duhet të ishin me afat përdorimi për 5 vite. “Siç dihet, në ligjin për pajisjen me pasaportë të shtetasve shqiptarë, afati i vlefshmërisë për shtetasit nën 16 vjeç është 5 vite. Për periudhën Prill 2009-Korrik 2010, Ministria e Punëve të Brendshme ka prodhuar 156 mijë pasaporta për shtetasit nën 16 vjeç në momentin e aplikimit, të cilët kanë pasur afat të pasaktë vlefshmërie. Afati i tyre i vlefshmërisë, në vend që të ishte për 5 vite, ishte bërë 10 vite. Kjo ka ndodhur për shkak të një gabimi teknik në sistem, që u konstatua me vonesë dhe ndryshimet e nevojshme për përmirësimin e sistemit bënë, që të identifikoheshin gjatë kësaj periudhe pasaportat e tyre. Ky korrigjim ka filluar në korrik të vitit 2010 dhe pas kësaj date është vijuar me prodhimin e pasaportave me afatet e duhura”, shprehet Miranda Harizaj, Drejtore e Sistemeve informatike. Por a janë të informuar qytetarët për këtë ndryshim? Për më tepër që mjaft familjarë udhëtojnë jashtë vendit së bashku me fëmijët në këtë periudhë për pushimet e verës? “Me konstatimin e këtij problemi, le të themi me afrimin e periudhës së skadimit të atyre pasaportave, në sistemin TIMS të kontrollit të kufirit – ku vlerësohen dokumentet e identifikimit të të gjithë shtetasve që dalin apo hyjnë në Shqipëri, – është bërë zëvendësimi. Për menaxhimin e këtij problemi, pasi e vlerësoi me ekspertët përkatës, Ministria e Punëve të Brendshme propozoi shtyrjen e afatit të vlefshmërisë së këtyre pasaportave për këta shtetas me 1 vit, në mënyrë që t’iu lihej kohë për njoftimin dhe për pajisjen me dokumentin e ri. Në këtë kuadër, ky akt kalimtar ligjor për shtyrjen e tyre me 1 vit ka hyrë në fuqi më 21 prill 2014, kohë gjatë së cilës Ministria e Punëve të Brendshme menjëherë ka realizuar planin dhe ka menaxhuar situatën për njoftimin e këtyre shtetasve që janë në list”, vijoi më tej Miranda Harizaj. Sipas Harizajt, kërkesat e shtetasve për të ribërë pasaportën për fëmijët e tyre ka ndikuar që të ketë radhë në sportele, duke qenë se gjatë verës mjaft emigrantë aplikojnë për pasaportën biometrike kur kthehen në atdhe.

SHBA-të dhe Gjermania do të tërheqin raketat “Patriot” nga Turqia

August 17, 2015 by dgreca

Pas rivlerësimit të kërcënimeve nga konflikti në Siri duket se Shtetet e Bashkuara dhe Gjermania do të tërheqin bateritë e mbrojtjes raketore nga Turqia, të paktën sipas një deklarate të përbashkët të lëshuar të dielën nga SHBA-të dhe Turqia. Në fundjavë, ministrja gjermane e Mbrojtjes, Ursula von der Leyen njoftoi se Berlini nuk do të zgjatë mandatin ei mbrojtjes së kufirit jugor turk përtej afatit të parashikuar. Po kështu, bashkë me bateritë do të tërhiqen dhe 250 ushtarët gjermanë që janë aktualisht pjesë e misionit.
“Së bashku me partnerët e NATO-s e kemi mbrojtur popullin turk nga sulmet e mundshme raketore prej Sirisë. Raketat tona Patriot e kanë kryer me sukses misionin e tyre”, tha ministrja gjermane. Turqia i pati kërkuar më herët NATO-s ta ndihmonte në forcimin e mbrojtjes ajrore ndaj sulmeve të mundshme nga Siria. Pjesë e misionit të mbrojtjes raketore u bënë SHBA-të, Gjermania, Holanda,e së fundi dhe Spanja. Forcat e NATO-s janë të dislokuara pranë qytetit të Kahramanmaras-it, në jug të Turqisë, dhe që prej janarit të vitit 2013 kanë shërbyer në mision rreth 400 gjermanë.

Pronari nga Dukati i shkruan përfaqësuesit të Këshillit të Europës në Shqipëri

August 17, 2015 by dgreca

KËRKESË PUBLIKE ZOTIT MARKO LEIDEKER PËFAQESUES I KËSHILLIT TË EUROPËS NË SHQIPËRI/
Shqiperi 17 Gusht 2015/
I nderuar zoti Marko Leideker, përfaqësues i Këshillit të Europës./
Duke ju falenderuar për veprimtarinë tuaj për të ndihmuar zhvillimet demokratike në Shqipëri, ju lutemi të na bëni të ditur publikisht komentin që kanë bërë specialistët e Këshillit të Europës për projektligjin e Qeverisë për kompensimin e pronave.
Llogjika na thotë se ka një manipulim nga Ministria e Drejtësisë duke bërë lojë fjalësh dhe keqpërdorur emrin e Këshillit të Europës. Sqarimi publik nga ana juaj, është i nevojshëm për të rivendosur besimin tonë ndaj institucioneve ndërkombëtare si dhe transparencën për veprimet e autoriteteve shqiptare. Përgjigja juaj publike do të sqarojë njëkohësisht mijëra pronarë në të gjithë zonën turistike perfshi dhe qindra pronarë në fshatin tim të Dukatit, ku secili pret kthimin me ligj të pronës së grabitur për 45 vjet nga diktatura komuniste dhe prej 24 vjetësh nga pjella e tyre e ricikluar në politikë prej Ramiz Alisë nëpërmjet mashtrimit pseudodemokratik të Katovicës.
Unë jam anëtar i Shoqatës “Dukati” dhe në harmoni te plotë me Shoqatën Kombëtare “Pronësi me Drejtësi’ dhe shoqatat e tjera, kërkojmë ndihmën tuaj për të korigjuar gabimet e qeverisë me pronat tona të trashëguara. Dukati është nje nga fshatrat e zonës turistike të Gjirit të Vlorës. Fshati ka pak tokë bujqësore të punueshme por në çdo kohë ka jetuar me nder. Nuk kemi vjedhur dhe përvetësuar kurrë më parë pronën e tjetrit, por kemi jetuar me punën e ndershme dhe me djersën e ballit, duke shfrytezuar atë pak tokë bujqësore, blektorinë dhe kullotat e Karaburunit që i trashëgojmë prej shumë brezash. Diktatura komuniste i grabiti pronat tona, na denigroi si kulakë, na persekutoi etj. Nese Evropa, Banka Botërore etj, e dëshirojnë Shqipërinë demokratike, ata ashtu siç imponojnë uljen e pensioneve dhe rritjen e energjisë elektrike, duhet që më parë të dertyrojnë shtetin të kthejë pronën e graditur tek i zoti. Politikanë me eksperiencë si ish presidenti Bamir Topi, po fokusohen tek referenca e çmimit të kompensimit. Zgjidhja nuk është çmimi por detyrimi i Shtetit për të zbatuar kushtetutën. Siç u shprehën ne deklaratën publike të shtatë shoqatat e pronarëve kompensimi e ka rradhën pas kthimit dhe është i pranushëm vetëm për pronat që nuk mund të kthehen pasi janë tjetërsuar dhe shërbejnë për nevoja publike.Ne nuk do të lejojmë pazare çmimash me të drejtat tona me dinjitetin tonë.Kompensimi qoftë edhe me para për pronat tona është mashtrim i rradhes se Shteti po merr borxhe për të shlyer borxhet. Kompensimi qoftë dhe me çmimin e tregut për prona që kanë përvetësuar padrejtësisht ose duan të përvetësojnë klanet e politikës është shkelje e Kushtetutës. Qeveria nëse ka para ose toka të lira , le të kompensojë grabitësit e perjudhës 1991-2015. Drafti i Qeverisë e shkel ne çdo rrjesht Kushtetutën sepse e konsideron pronën e grabitur me ligjet e diktaturës si pronë të shtetit. Ne, qytetarë dhe fashatarë, çuditemi pse KE , në emër të ligjit ka mbështetur vjedhjen . Si mundet që KE të pranojë zgjidhje me kompensimin pa korigjuar më pare, me ligj dhe me rrugë gjyqësore vendimet pa bazë Kushtetuese dhe gabimet e bëra me kthimin fizik. Gabimi korigjohet duke filluar aty ku ka nisur. Ne jemi në dijeni për kushtin dhe afatin kohor që Strasburgu i ka vënë Qeverisë Shqiptare për zgjidhjen e anarkisë së titujve të pronësisë konform Kushtetutës dhe Vendimit pilot të Gjykatës së Strasburgut.
Zoti Leideker, nga Kryesia e Shoqatës jemi vënë në dijeni se shoqata ka kërkuar të bëhen pransparente se çfarë i kanë kërkuar autoritetet shqiptare (AKKP etj) institucioneve ndërkombëtare KE dhe komentet e bëra nga ndërkombëtarët për draftin e Qeverisë por e vërteta po maskohet.
Në 10 Korrik 2015 Ministri i Drejtësisë i dërgoi shoqatave projektligjin dhe ftoi, në prezantimin që Qeveria do bënte datë 16 Korrik 2015 në hotelin “Sheraton”. Në ditën e prezantimit pronarët kërkuan të kishin mundësinë e diskutimit që të shprehnin konsideratat e tyre për projekligjin që ju ishte dërguar dhe e kishin analizuar, por nga drejtoresha e AKKP, pronarëve ju mohua e drejta të shprehnin mendimin e tyre. Për të mos qenë si kukulla për të mbushur sallën, ne të gjithë pronarët përfshi edhe unë u larguam nga salla. Ndërsa në takimin e parë ku ishte present dhe Kryeministri ishin të pranishëm shumë gazetarë dhe televizione, ndërsa në dy takimet e tjera që u zhvilluan datë 21 Korrik dhe dt. 31 Korrik, mediat dhe gazetarët u ndaluan të futen në sale, por asnjë gazete nuk foli. Në takimin e parë, unë personalisht para largimit, u takova dhe bisedova shkurt me Kryeministrin dhe ai më tha se do të vinte të bisedonte dhe sqarohej me pronarët, por nuk erdhi në asnjë nga dy takimet e mëvonshme.
Me vonë nga Kryesia e shoqatës jemi informuar se autoritetet shqiptare , që në Mars Prill 2015, paskan kërkuar nga strukturat e Këshillit të Europës për të ndihmuar për hartimin e ligjit të kompensimit dhe se projektligji ishte përfunduar para Korrikut 2015.
Në deklarimin zyrtar të Ministrisë së Drejtësisë thuhet se Projektligji është hartuar dhe me konsultimin paraprak me ekspertët e Këshillit të Evropës, etj. Këtu nuk ka transparencë. Nuk duam ta besojmë se drafti që praktikisht na vjedh pronat tona të trashëguara është hartuar me konsultimin të ekspertëve të Këshillit të Evropës. Shtrojmë pyetjen: përse këta ekspertë nuk kanë marrë në konsideratë asnjë nga sugjerimet tona. Si mund të bëhet kompensimi pa korigjuar kthimet fizike të gabuara, të bëra në kundështim me çdo ligj si dhe kthimet fizike të penguara nga AKKP në kundërshim të plotë me ligjet në fuqi. Zoti Stavri Semanjaku, një nga kryetarët e shoqatava paraqiti në takim argumenta të shumta që Agjensia nuk ka funksionuar për kthimin por për vjedhjen e pronave dhe nuk u kundërshtua as nga drejtoresha e AKKP që ishte prezente në takim. Pyesim përsëri si ka mundësi që specialistët e KE të miratojnë një draft që kërkon kompensim që bie ndesh me nenin 41 dhe 181 te Kushtetutes pra del mbi ligjet, del mbi Kushtetutën , dhe kërkon të ndryshoje dhe rregulloren e Gjykatës së Strasburgut. Pse ai draft i bërë sipas interesave të disa personave na është servirur si zgjidhje e mbështetur nga Këshilli i Europës. Ju lutemi na sqaroni nëse specialistet e KE kanë ardhur në Tiranë, pse nuk janë takuar qoftë dhe një herë të vetme me kryesinë e pronarëve por paskan punuar dhe përfunduar projektligjin në fshehtësi të pronarëve !
Ju zoti Leideker jeni në dijeni për standardet e dyfishta se në Shqipërinë e veriut, çdo trung familjar ka marrë pronën e tij të trashëguar dhe anarkia e titujve të pronësisë eshtë krijuar kryesisht në zonën turistike pasi kjo është zona e lakmuar nga politikanët . Kjo ka futur ne hasmëri familjet me njëra tjetrin, ka krujuar konflikte brenda fisit dhe familjes. Në eksperiencën time që kam mbushur të 80 vjet, kjo situatë që nuk di ti gjej emrin e përshtatshëm nuk ka ndodhur as në kohën e Mbretit Zog, as në kohën e pushtimit nazifashist dhe as në kohën e diktaturës së egër komuniste.
Ju nuk duhet të heshtni përderisa ju jeni ne dijeni se në Kuvendin e Shqipërisë disa deputetë përfshi Kryeministrin Edi Rama, ish kryeministrin Pandeli Majko, dhe deputetë të tjerë e kanë pohuar se për shkak të anarkisë së pronës janë vrarë mbi 8000 shtetas dhe ju e dini se ky numur shkon në rritje.
Ju jeni në dijeni se ish Kryeministri Sali Berisha në 2013 pranoi publikisht gabimin e Katovicës me pronat dhe megjithatë Qeveria po vazhdon në rrugën e tij të gabuar.
Qeveria aktuale e z. Edi Rama, në këto dy vjet ka miratuar ligje për legalizimin e grabitjeve dhe ndërtimeve paleje, veprim që në zonat turistike është absolutisht i papranushëm. Vjedhja në emër të ligjit e Karaburunit dhe pronave tona turistike është thelbi i projektligjit të fundit që Qeveria pretendon se ka marrë miratimin e Këshillit të Ruropës. Unë dhe bashkëfshatarët e mi, jemi të bindur dhe nuk mund ta besojmë atë që thuhet zyrtarisht se ky projektligj është konsultuar nga specialistet e KE pasi ky projektligj e ndërlikon mundësinë e zgjidhjes dhe nuk të çon në demokraci dhe BE. Nëse ky draft është vullneti i KE, shpresa jone e fundit, se me pranimin e Shqiperise ne BE, Europa do ti vendose Shqiperise kushte te forta, per zbatimin e Kartes se te Drejtave te Njeriut dhe Kushtetutes, po vdes. Dhe meqenese shpresa vdes e fundit, do te thote se pas saj vjen vdekja jone. Por mëenyra se si ne do te vdesim eshte natyrisht problemi yne. Ne dimë ti mbrojmë të drejtat tona, pronën dhe dinjitetin tonë njerëzor. Nqs. ne BE prona mbrohet me ligj, dhe ne Shqiperi prona vidhet me ligj dhe pronari shkaterrohet me te gjitha menyrat, a mund të pranohemi në BE.
Meqenese ju partneret tane europiane keni marre ne dore dhe ndikoni ne fatet e Shqiperise, po ju drejtohemi qe te luani rolin tuaj per problemin e prones, si nje te drejte njerezore qe e dallon diktaturën komuniste nga demokracia. Vënia juaj në krahe të ketyre formave te qeverisjes shqiptare ju ben bashkepunetore ne shkeljen e parimeve dhe ligjeve demokratike.
Ju lutem referojuni letres së fundit qe ju eshte adresuar nga shoqatat e pronarëve por dhe letrave të tjera të mëparshme. Unë dhe të gjithë ne pronarët jemi të gatshëm për çdo sqarim të dhe besojmë se do gjejmë mirkuptimin dhe bashkëpunimin tuaj drejt zgjidhjes së çështjes së kthimit të pronës ashtu siç përcakton neni 181 i Kushtetutës.
Ne pritje të përgjigjes tuaj.
Me respekt
Nuro Kulluri
Pronar autokton nga fashati Dukat i Vlorës
Tel 0682508014

MASAKRA E MIRDITES, GUSHT 1949

August 17, 2015 by dgreca

Nga Gjon Kadeli*/
Me 7 gusht 1949 u vra Bardhok Biba. Ai ishte sekretar i pare i patise dhe deputet i Mirdites.Si rrjedhim i kesaj vrasjeje, ne menyre te shpejte, forcat e vecanta te sigurimit dhe ato te ndjekjes hyne ne Mirdite. Focat e policise te zonave te ndryshme te Mirdites, shkuen neper katunde me listat e njerezve qe do te arrestoheshin. Si perfundim u arrestuen ma se 300 vete dhe familjet e te arrestuemve u interrnuen ne kampin famkeq te Tepelenes.
Mbas shqytimeve te ndryshme qe u bane nga autoritetet perkatese, u vendos qe 26 vete nga te arrestuemit te paraqiteshin ne gjygj ushtarak, kurse te tjeret u drguen ne burgjet e Shkodres. Gjykata vendosi qe 4 prej tyne te vareshin dhe 10te te pushkatoheshin.
Ekzekutimi u ba ne Qafe te Valmirit, ne afresi te vendit ku ishte vra Nardhok Biba. Ekzekutimet u bane , si hakmarrje per vrasjen e Bardhok Bibes; megjithse viktimat ne fjale nuk kishin te bashin aspak me vrajen ne fjale. Bardhok Biben e vrane te arratisunit, disa prej te, cileve, rregjimi komunist u kishte vra djalin, baben ose vellan.
Ekzekutimi u ba ne nji menyre aq te eger [barbare], se qe nuk ishte pa ndonji here ne ate vend. Ne prani te qinda e qinda njerezve, te moshave te ndryshme, qe qeveria i kishte detyrue te shoshin ne vendin ku do te bahej masakra,. sigurisht edhe per tmerrue edhe vete popullin.
Pushkatimi i njerezve u ba ne kete menyre: viktimat ishin te lidhune me tela me n jeni tjetrin, dhe vrasjet u bane nji nga nji me dy plumba nen sqetull dhe i dyti shifte vrasjen e te parit , i treti vrasjen e te dytit e keshtu me radhe. Ndonjeni prej atyne qe ra gjalle ne grope dhe krekoj te gjuenin perseri, thirrjes se tij ju pergjegjen te shtimet me mitraloza. Kjo menyre ekzekutimi, qe mund te quhet, vrasje e dyfishte, dhe tejet barbare, tregon egersine shtazarake dhe kombvrasese te rregjimit komunist.
Thuhet se nuk mbahet mend se ne Bjeshken e Oroshit, te kete ra ndonjihere bore, ne mes te gushtit, por naten e 17 gushtit, qe pasoi ekzekutimet ne fjale, ra bore. A mos kjo bore ishte nji reagim i vete
natyres, per masakrimin e njerezve te pafajshem?
Ata qe u voren ishin: Preng Dede Kola nga Oroshi, Pjeter Dede Vila e Pjeter Paloka nga Kacinari dhe Dode Marka Biba Nga Kthella.
Ata qe u pushkatuen ishin: Nga Kthella e Eper Gjegj Belleshi dhe nga Kthella Nikoll Bardhok Bajraktari,Llesh Gjon Melyshi, Bardhok Dode Gjini. Nga Kacinari Frrok Mata, Ndrec Marka Ndoj e Pjeter Dede Vila.
Nga Oroshi Nikoll Llesh Bajraktari e Preng Shkurt Nikolli dhe nga Peshqeshi Ndoc Gjete Cupi.
Per rregjimin komunist, nuk mjaftoi masakra e Valmirit. Asaj ju shtue edhe interrnimi i ma shume se 300 familjeve Mirditore ne kampin e perqendrimit ne Tepelene. Menyra se si , shume prej ketyne familjeve u
cuen ne Tepelene, ishte shume e veshtire. Shume prej tyne kaluen me jave nga nji vend ne tjetrin, deri sa mberrijten ne Tepelene. Ne rastin e familjes time, nga Oroshi na cuen ne Rreshen, ku bujtem dy
nete, ne rraze te Manit te Nreut, dhe mandej na cuen te kisha e Rrubikut ku ndejten dy jave, perpara se te na coshin ne Tepelene..
Shume prej familjeve qe u interrnuen ne Tepelene, kishin me veti femije, disa prej te cileve ishin krejte kerthije [foshnje]. Kuptohet se sa e veshire ishte, is per fimijet si edhe per nanezezat e tyne,
kur ata femije qashin nga uria e nanat nuk kishin se cka me ju dhane me hanger.
Ne kampin e Tepelenes vdiqen rreth 300 femije, shumica dermuese nga Mirdita. Vdekja e ketyne femijve u shkaktue nga uria dhe nga semundjet e ndryshme Me kujtohen si sot, dy raste, tejet te dhimshme dhe terqethese, kur njaj grueje i vdiqen dy fewmije mbrenda 24 oresh dhe nji tjetre nji femije, te dyja keto voren veten nga deshprimi. Te dyja keto te m jera ishin nga Mirdita., dhe te interrnueme si rrjedhim i
vrasjes se Bardhok Bibes.
Shtoi ketu, se pervec vdekjeve te aq shume femijve dhe te nji numri te dukshem te njerezve te moshuem, kesaj ju shtue edhe perbuzja e dinjitetit njerezor. vorret e atyne qe vdiqen ne kampin e Tepelenes, u zhvendosen tri here. Heren e fundit, nji pjese e kufomave i rivarrosen ne bregun e lumit te Bences, te cilat mbrenda nji kohe te shkurte, i mori uji i atij lumi.
Lind pyetja: Pse u ndermoren keto masa tejet barbare, ndaj popullit te pafajshem te Mirdites? A mos ishte nji shfrymje e nji mllefi individual, apo e nji natyre tjeter?
Sido qofte, per rregjimin komunist, qe nga fillimi, masakrat kane qene pjese e veprimtarise se tij. Po permendi vetem disa prej tyne. Masakra e Buzemadhes ne Lume, ku ate qe bane Serbet kunder atij populli trim bane edhe komunistet shqiptare. Masakra e Koplikut dhe masakra e njerezve te pafajshem ne Tirane per shkakt te incidentit ne Ambasaden Sovjetik dhe ajo e Mirdites. Pa dyshim keto masakravejne i vejne nji damke te zeze te pashlyeshme, ish rregjimit komunit shqiptar.
*Arkitekti i masakres, Mehmet Shehu ne shtratin e vdekjes

Seminari Ndërkombëtar për Gjuhën, Letërsinë dhe Kulturën Shqiptare, komunikim i Kosovës me gjithë botën

August 17, 2015 by dgreca

-Një nga ngjarjet më të rëndësishme kulturore dhe shkencore të Kosovës/
-Ajo që nuk e bëri që të mposhtet Kosova ishte gjuha shqipe/
-Pjesëmarrës të Seminarit edhe përfaqësuesit e arbneshëve të Zarës –Kroacisë/
Nga Behlul Jashari/ PRISHTINË, 17 Gusht 2015/ Kanë mbërritur në Prishtinë, kryeqytetin e Republikës së Kosovës, më shumë se 100 studiues të albanologjisë në Seminarin XXXIV Ndërkombëtar për Gjuhën, Letërsinë dhe Kulturën Shqiptare, i cili u hap solemnisht në ambientet universitare në ditën e sotme dhe zhvillohet deri në 28 gusht. Në hapje të Seminarit moren pjesë edhe presidentja e Republikës, Atifete Jahjaga, kryeministri Isa Mustafa, ambasadori i Shqipërisë në Kosovë, Qemal Minxhozi, si dhe përfaqësues të tjerë të institucioneve shtetërore, shkencore, kulturore e arsimore. Mes pjesëmarrëve, i nderuar e vlerësuar nga të gjithë, ishte themelues i Seminarit Ndërkombëtar për Gjuhën, Letërsinë dhe Kulturën Shqiptare, akademikët Idriz Ajeti, 98-vjeçar, i lindur në katundin Tupallë të Jabllanicës së Epërme – Luginë e Preshevës, në 26.VI.1917.
Kryeministri Mustafa e ka quajtur Seminarin ambasador shumë të rëndësishëm të komunikimit kulturor të Kosovës me botën, duke vlerësuar sidomos vazhdimësinë kohore të organizimit, dimensionin e hulumtimeve shkencore të gjuhës, letërsisë dhe kulturës shqiptare, si dhe përmasat dhe pjesëmarrjen e studiuesve nga mbarë bota.
“Seminari është bërë një nga ngjarjet më të rëndësishme kulturore dhe shkencore të Kosovës, dhe kjo si rezultat i vazhdimësisë kohore të organizimit, dimensionit të hulumtimeve shkencore të gjuhës, letërsisë dhe kulturës shqiptare, si dhe përmasave dhe pjesëmarrjes së studiuesve nga mbarë bota dhe të gjithë atyre që po e japin kontributin e tyre. Në të gjitha këto dekada të funksionimit të tij, Seminari ka promovuar shkencën dhe kulturën shqiptare, e së fundi është bërë një prej ambasadorëve shumë të rëndësishëm të komunikimit kulturor të Kosovës me gjithë botën”, theksoi Mustafa.
Për kontributin dhe mbështetjen e përhershme dhënë Seminarit Ndërkombëtar për Gjuhën, Letërsinë dhe Kulturën Shqiptare, kreu i qeverisë së Kosovës falënderoi shtetin shqiptar dhe ambasadorin e Shqipërisë Minxhozi, i cili poashtu në fjalën e tij theksoi dhe vlerësoi bashkëpunimet, përfshirë edhe Seminarin.
“Dëshiroj të falënderoj dhe të përkujtojmë me respektin më të thellë, të gjitha ata që kanë dhënë kontributin e tyre për këtë Seminar, studiuesit shqiptarë dhe studiuesit tjerë nga bota, që për shumë dekada, me punën e tyre, kanë kontribuar që gjuha, letërsia dhe kultura shqiptare të ndriçohet, të avancohet, dhe që vlerat shqiptare të shfaqen dhe të komunikohen ndërmjet nesh dhe me botën në përgjithësi”, u shpreh kryeministri kosovar Mustafa.
Ai theksoi edhe se, qeveria kosovare do të bëjë gjithçka që Kosova të jetë pjesë e rëndësishme e botës shumëkulturore.
“Prandaj, zhvillimet tona do ta qojnë përpara edhe këtë pjesë, si pjesë të integrimeve evropiane dhe integrimeve globale”, tha kryeministri Mustafa.
Ambasadori Republikës së Shqipërisë në Prishtinë, Qemal Minxhozi në fjalën e rastit theksoi rëndësinë e gjuhës në qëndresën e Kosovës karshi okupimit shumëvjeçar.
“Gjuha mbijetoi në një vend të okupuar mizorisht për dekada. Ajo që nuk e bëri që të mposhtet Kosova ishte gjuha shqipe. Dyzetë vjet, katër dekada gjuha jo vetëm që ka mbijetuar por është zhvilluar me një ritëm shumë të shpejtë”, tha ambasadori shqiptar Minxhozi.
Drejtori i Seminarit Rrahman Paçarizi, ka kërkuar nga institucionet vendore që të njohin dhe pranojnë rezultatet e punës hulumtuese dhe shkencore që bëhet në institucionin e Seminarit.
“Duke e falënderuar kryeministrin për praninë e tij dhe fjalët që tha nga kjo tribunë dua t’i ftoj institucionet shtetërore që të sigurojnë që të sigurojnë infrastrukturën e nevojshme për komunikimin e rezultateve shkencore të albanologjisë dhe të fushave të tjera, me shkencën dhe dijen globale përmes krijimit të mundësive për anëtarësim në sistemet dhe mekanizmat e botimit, si në UNESCO, etj. Ndërsa, Ministrisë së Arsimit dhe Rektoratit i kërkojmë të njohë dhe të pranojë rezultatet e punës hulumtuese dhe shkencore që bëhet në institucionin e Seminarit, pasi në botë nuk ka një institucion më serioz që merret me shkencat albanologjike dhe nuk ka një revistë më përfaqësuese se kjo e Seminarit, ku botohen të arriturat në këto fusha”, tha drejtori Pacarizi.
Dekani i Fakultetit të Filologjisë, Sedat Kuçi përmendi qëllimet që ky Seminar përmbush përgjatë zhvillimit të tij. “Seminari Ndërkombëtar për Gjuhën, Letërsinë dhe Kulturën Shqiptare, përveç rolit arsimor, shkencor e kulturor po vazhdon t’i përmbush edhe misionin e afirmimit të vlerave të kulturës shqiptare në botë; misionin e përhapjes së mendimit intelektual shqiptar për problem të caktuara gjuhësore, letrare e kulturore; misionin e njohjes reciproke me rezultatet ne studiuesve shqiptarë dhe të huaj në fusha të ndryshme të albanologjisë; misionin e krijimit të mundësive të reja midis studiuesve shqiptarë dhe atyre të huaj që ka një rëndësi të madhe në aspektin e bashkëpunimit ndërnjerëzor dhe ndërkombëtar midis kulturave e popujve. Duhet të theksojmë se sivjet pjesëmarrës të Seminarit do të jenë edhe përfaqësuesit e arbneshëve të Zarës; misionin e krijimit të mundësive të reja për moblitet të studentëve, të pedagogëve dhe të hulumtuesve shkencorë”, tha ai.
Tre temat bosht të Seminarit për sesionet shkencore janë: Shqipja në domenin publik, Letërsia dhe religjioni, si dhe Kultura shqiptare në tranzicion.
Axhenda e seminarit përfshinë edhe: Kurse intensive të mësimit të shqipes (tre shkallë); ligjërata të veçanta të gjuhësisë; ligjërata për letërsinë dhe për kulturën shqiptare; referime shkencore; ligjërata të përgjithshme; tryeza të rrumbullakëta; program kulturor plotësues për t’i njohur seminaristët me bukuritë natyrore, me veprimtaritë kulturore e të mira të tjera në qendra të Kosovës.
Seminari Ndërkombëtar për Gjuhën, Letërsinë dhe Kulturën Shqiptare është themeluar pranë Fakultetit të Filologjisë (atëherë Fakulteti Filozofik) të Universitetit të Prishtinës, në vitin 1974. Ishte viti i Kushtetutës që avanconte të drejtat e shqiptarëve e të Kosovës si element konstituiv me të drejtë vetoje, i federatës së atëhershme.
Ky Seminar organizohet për studentë e studiues që merren me probleme të gjuhës, të letërsisë e të kulturës shqiptare, po edhe me albanologjinë përgjithësisht.

Seminari ka zhvilluar gjithsej tridhjetë e tre sesione. Në vitin 1991 është ndërprerë veprimtaria e tij nga organet e dhunshme serbe. Në vitet 1995 e 1996 sesionet e këtij Seminari u mbajtën në Tiranë në bashkëpunim me Institutin e Gjuhësisë e të Letërsisë të Akademisë së Shkencave të Shqipërisë.
Pas çlirimit të Kosovës në qershorin 1999, nga viti 2000 Seminari zhvillohet sërish në Prishtinë. Sesionet 19 dhe 20 (2000-2001) janë organizuar në bashkëpunim me Institutin e Gjuhësisë dhe të Letërsisë të Akademisë së Shkencave të Shqipërisë.