Archives for July 2018

Çfarë bisedoi Edi Rama me Donald Trump

July 12, 2018 by dgreca

Nga Ilir Levonja/

Në fakt klima mes Europës dhe Donald Trumpit është disi e nxehtë, së pari në lidhje me Naton, shpenzimet e pakta që vendet anëtare japin për buxhetin e aleancës së tyre ushtarake, gati 2%. Ku ai këshillon një rritje për shumë e shumë probleme në rajon etj. Së dyti emigrantët…, megjithëse edhe vet vjen nga një familje e tillë, gjermanësh të ardhur në Amerikë…, prapë këshillon atë që një hap duhet marrë. Dhe kjo e ka zanafillën që nga fushata e tij elektorale kur deklaronte se do detyronte qeverinë meksikane të ngrëntë ajo vetë barrierat kufitare me Shtetet e Bashkuara. Sidomos Europa ku sipas tij jo rastësisht elektorati solli dhe po sjell në pushtet forcat politike me programe të ashpra kundër emigracionit klandestin. Me këtë rast nuk la pa përmendur zgjedhjet e fundit në Itali. Nga ana tjetër qe i prerë në lidhje me takimin që do mbahet së shpejti midis tij dhe Vladimir Putinit…, ku në atë stilin e vet, e përmblodhi gjithçka mbi fatin e Sirisë.

Të mendosh se axhenda e Edi Ramës bën pjesë në rrugën e presidentit të Amerikës je naiv. Megjithatë ne kemi tashmë plot histori qesherake me punën e fotove. I pari e nisi vet Edi Rama me një shofer limuzine për të bërë një foto kur Obama mblidhte fonde për fushatën elektorale në 2012. Thonë se pagoi 80 mijë dollarë. Dhe këto, apo donacioni janë sot në shqyrtim nga gjykata për shkak se bie në kundërshtime me ligjet Amerike në lidhje me sporozimet e huaja. Së dyti Lulzim Basha në fushatën e fundit. Edhe ky si Edi Rama por me Donald Trumpin, përflitet se pagoi 50 mijë dollarë vetëm për një foto. Dhe shpesh në opinione, nga militantë me diapazon sa kokrra e grurit, thuhet se janë të domosdoshme për shkak se kështu i do mushka drutë, pra elektorati shqiptar. Eshtë një xhest provincial ku karshi halleve dhe informalitetit të ekonomisë sonë nuk duhej t’i kalonte nën hundë së pari drejtësisë shqiptare. Së dyti ndjeshmërisë qytetare, qofshin me prirje majtas apo djathtas. Sepse që ta dini vendi nuk rregullohet me foto. Fotot na përkasin neve, fejsbukistave me emrin popull, jo atyre që kanë marrë përsipër trendin e vendit.

Tani që të dy akuzojnë njëri-tjetrin përmes ca altoparlantëve partiakë si Taulant Balla dhe Edi Paloka. Por pyetja është se, a i kanë paguar vërtetë? Pa asnjë diskutim që po…, që të dy. Puna është tek ndjeshmëria jonë si qytetarë kur edhe shkeljet ligjore të shefave i quajmë gjë krejt normale edhe pse kostoja financiare është e tillë ku mund të ndreqje disa shkolla a spitale. Përballë shifrave të borxhit a të të ardhurave për frymë tek ne, kjo puna e fotove është bërë me të vërtetë një relaitet i hidhur. Edhe kur del me hiret e presidentes më seksi siç edhe është Kolinda Grabar e Kroacisë… aq sa sot zor se gjen shqiptar që ta di se kujt në fakt i përket kryeministri a presidenti i vendit të tij. Salloneve të Versaçes apo informalititetit urbanistik, ekonomik, mendor e rural të vendit të vet. Pa asnjë diskutim që është ajo e para, një shtetar i joni nuk ka asnjë lidhje të drejtpërdrejtë me popullin e vete, nguleni në mendje këtë. Po të kishte do i ngjante sado pak ati Makronit të Francës që e ka buzëqeshjen me pak hutim. Nuk e kanë. Ndaj për rrjedhoj janë rivalët tanë me foto e gjithçka dite, ojna moshe në faqet e përditshme të fejsbukut.

Por për çfarë mund të ketë folur Edi Rama me Donald Trumpim? Çfarë i kërkonte me aq lutje, ndërkohë kur dikush nga ata këshilltarët si Batoni, rrinte gati me shkrepsen e iphonit. Çasti, i duhej…, mjaft t’u thotë shqiptarëve se ka miq të mëdhenj. Po del foto me Donald Trumpin. Shumë nga njerëzit aludojnë për një ndjesë kur e quante çmenduri nëse amerikanët do të zgjidhnin Trumpin president. Tani i duhej të sqaronte pozitat e majta të popullit të tij dhe se shkëlqesia e tij duhej ta kuptonte. Ca hamendësojnë për reformën në drejtësi. Mirëpo Trumpit vetëm për drejtësinë nuk mund t’i flasësh dot, për të vetmen arsye, se, po drejton gatitu për shkak të pushtetit që ka prokuroria apo drejtësia edhe mbi presidentin. Dhe ai do ta quante fatlum Edi Ramën që ka Arta Markun, tekst lexuesen e togjeve të tilla nuk e di, nuk kam informacion, nuk jap llogari etj. Trumpit drejtësia po i ha skalpin. Dhe jo vetëm atij, kujtdo në Amerikë. Në vendin ku shtetari nxiton e hap krahun vetë pa pritur ta rrëzojnë masat, mjaft një përfolje. Kurse Edi Rama me këmbë e duar, gjysmë i përkulur, a të lutem për diçka, do ma garantosh strehim politik për vete dhe Taulantin kur të mos jem në pushtet. Po ai vet si kryeministër, a është peshk i madh për Amerikën? Po lali Eri? Një sërë pyetjesh të tilla, naivësh ballkanikë, letra pa vlerë për një manjat shifrash i cili nuk vë asnjë lloj politike në kandar veçmas atë që i rrit të ardhurat në fund të vitit.

DEPUTETI ISMET BEQIRI , BASHKËBISEDIM NË VATËR

July 12, 2018 by dgreca

DEPUTETI I KOSOVËS DHE SEKRETAR I PËRGJITHSHËM I LDK, ISMET BEQIRI , BASHKËBISEDIM NË VATËR/

Deputeti i Kuvendit të Kosovës, njëkohësisht Sekretari i Përgjithshëm i Lidhjes Demokratike të Kosovës, z.Ismet Beqiri, ishte mysafir në Vatër të Mërkurën me 11 Korrik 2018 në mbrëmje. Ai shoqërohej nga Konsullja e përgjithshme e Republikës së Kosovës në Nju Jork, diplomatja Teuta Sahatçija si dhe nga diplomati i sapoemëruar në Konsullatën e Kosovës z. Lulzim Krasniqi.

Kryekonsullja e Kosovës, që luan njëkohësisht edhe rolin e Shefes të Misionit defakto të Kosovës, duke prezantuar deputetin e Kuvendit të Kosovës , ish Kryetarin e Prishtinës, njëkohësisht Sekretar i përgjithshëm i Lidhjes Demokratike të Kosovës, evidentoi cilësitë më pozitive të tij si deputet dhe politikan, ish kryebashkiak i Prishtinës, dhe i njohu të pranishmit me axhendën e tij gjatë kësaj vizite në SHBA. Diplomatja Sahatçija tha se vizitën e saj të parë në Komunitetin Shqiptar në Nju Jork në fillimet e karrierës së saj diplomatike e kishte bërë në Vatër, dhe qysh prej vizitës së parë nuk i ka shkëputur vizitat në Shtëpinë e Vatrës dhe takimet me vatranët.

Mysafirëve ua ka uruar mirëseardhjen në emër të Kryetarit të Vatrës z. Dritan Mishto, kryesisë dhe vatranëve, nëkryetari Agim Rexhaj. Zoti Rexhaj tha se ishte kënaqësi që priste një bashkëluftëtar nga formacioni i përbashkët,- i pari formacion politik demokratik i Kosovës, LDK, me njeriun që më së afërti i qëndroi pranë Presidentit historik të Kosovës, Dr. Ibrahim Rugovës edhe në ditët më të vështira, i njeriut të guximshëm, që nuk e friksuan as tanket e Serbisë e as tytat e armëve e presionet e tjera. Kemi 30 vjet njohje bashkë,dhe ndjehem i gëzuar që sot takohemi në Vatrën Kombëtare, në Vatrën e Shqiptarëve të Amerikës, tha ai.

Nënkryetari i Vatrës duke përcjellë veprimtaritë dhe qëndrimet e Federatës Panshqiptare të Amerikës”VATRA”, tha se Vatra është mbi politikën, nuk është me asnjë parti politike, nuk lufton dhe nuk i ka shpallë luftë asnjë partie, por është marrë dhe merret me politikë në 106 vitet e jetës së saj, veçse Partia e saj është Kombi,-Vatra është me Shqipërinë, me Kosovën, me Tiranën, me Preshevën, me Ulqinin dhe Malësinë, me Shkupin e Tetovën, me Luginën e Preshevës, dhe ndjehet e brengosur kur politika vrapon pas interesave të ngushta dhe harron qytetarët. Vatra lufton çdo të keqe që i dëmton imazhin kombëtar të Shqiptarëve, dhe ndërhyn sa herë e sheh se politika e Tiranës, Prishtinës, bie ndesh me Washingtonin.

Më pas e ka marrë fjalën deputeti Ismet Beqiri, i cili tha se në këtë mjedis kaq atdhetar ndjehej si nxënësi i emocionuar para mësuesit në provim. Të gjithëve ne që merremi me politikë na takon ta falenderojmë Vatrën përsa dhe çfarë ka bërë ajo për Kombin për 106 vite. Pa Vatrën Shqiptare në Amerikë, nuk dihet se ç’rrjedhë do të kishin marrë ngjarjet për Kombin tonë. T’ju themi faleminderit Juve dhe parardhësve mendjendritur të Vatrës, është pak dhe nuk shlyhemi. Vatra meriton nderim dhe respekt. Ndjehem mirë që jam mes jush në këtë Tempull të atdhetarizmit mbarëshqiptar.

Më pas ai falenderoi Shtetet e Bashkuara të Amerikës për çfarë kanë bërë për Kosovën. Një falenderim të veçantë u drejtoi deputeti shqiptaro-amerikanëve, për ç’ka bënë për çlirimin e Kosovës, për kontributet, për armët, për bijtë që dërguan në vendlindje për të çliruar Kosovën. I ndjehemi të obliguar edhe presidentit historik të Kosovës dr. Ibrahim Rugova, i cili e çeli më së pari këtë portë të Lirisë së Kosovës këtu në Shtetet e Bashkuara të Amerikës. Të gjithë ne që kemi jetuar pranë presidentit i dëgjonim njerëzit tek tundnin kryet kur presidenti Rugova përsëriste sa herë dilte para medias:”Në miqësi të ngushte me Amerikën”…Kishte nga ata që thonin presidentit i është prishë kasetofoni…në fakt bindja e Dr. Rugovës dhe mbështetja që i dhatë Ju shqiptarët e Amerikës, na nxori në dritë…

Më pas ai analizoi gjendjen reale të Kosovës, problemet e dialogut me Beogradin, presionet dhe kurthet, besueshmërinë dhe dyshimet tek ky dialog, korrupsioni dhe trafikimi, mësymja e krimit dhe përballja me Ligjin, pozicionimin e partive politike, sakrifikimi i Partisë Lidhja Demokratike për intersat e Kosovës etj etj… Ra në sy se z. Beqiri në trajtimin e çështjeve foli jo nga pozicioni partiak, por nga ai Kombëtar. Luftën politike tha ai, ne e bëjmë në Kosovë, ndërsa kur dalim në SHBA apo në Europë, ne mbrojmë interesat e shtetit tonë.

Biseda ka rrjedhë e qetë si një bashkëbisedim i ngrohtë, ka përfshirë të gjithë pranishmit, ku secili ka shprehur opinion e tij. Deputeti me qetësi ka trajtuar edhe pyetjet e shumta që u bënë nga të pranishmit. Morën pjesë në debat: Marjan Cubi, anëtar i Kryesisë së Vatrës, Zef Balaj, anëtar i kryesisë, Pashko Camaj, Asllan Bushati, Lek Mirakaj, Gëzim Nika, Frederik Ndoci,Anton Raja, dhe editori Dalip Greca, i cili i njohu mysafirët me aksionet Kombëtare të Vatrës përgjatë 106 viteve të jetës së saj.

Të pranishëm në këtë takim ishin dhe përfaqësues të Bashkisë Tropojë, Rexhep Ismajlaj dhe Rexhep Çuka, të cilët përshëndetën. Ata ndodhen në Nju Jork të ftuar nga biznesmeni Harry Bajraktari, i cili është shpall Nder i Bashkisë Tropojë.

Deputeti Beqiri dhe mysafirët nga Tropoja lanë mbresat e tyre nga kjo vizitë në librin e vizitorëve.

Thaçi e Vuçiq takohen më 18 korrik

July 12, 2018 by dgreca

Takimi i radhës midis presidentëve Thaçi e Vuçiq më 18 korrik/

Takimi i radhës ndërmjet Prishtinës dhe Beogradit në Bruksel, pritet të zhvillohet më 18 korrik, ka konfirmuar kabineti i Përfaqësueses së Lartë të Bashkimit Evropian, Federica Mogherini.

Presidenti i Kosovës Hashim Thaçi dhe ai i Serbisë, Aleksandar Vuçiq, do të takohen të mërkurën e ardhshme në Bruksel në kuadër të vazhdimit të dialogut politik për normalizimin e marrëdhënieve, bëhet e ditur nga kabineti i Mogherinit.

Kjo fazë e dialogut, nga të dyja palët është cilësuar si finale e vendimeve që pritet të merren në këtë proces të gjatë të bisedimeve.

Në komunikatën e lëshuar nga kabineti i Përfaqësueses së lartë të BE-së, thuhet se në takim do të diskutohet për vazhdimin e procesit që do të çojë drejt marrëveshjes. Bashkimi Evropian pret që të sigurohet nga të dyja palët se do të bashkëpunojnë që procesi të vazhdojë tutje në mënyrë intensive.

Takimi i fundit mes presidentëve Thaçi e Vuçiq është zhvilluar po në Bruksel, më 15 qershor.

Të dy presidentët kanë paralajmëruar tashmë kompromise e vendime të vështira, por të cilat nuk i kanë trajtuar para opinionit.

A KA TË DREJTË PRESIDENTI TRUMP?

July 12, 2018 by dgreca

A KA TË DREJTË TRUMP-I KUR THOTË SE VENDET E NATO-S NUK PAGUAJNË SA DUHET PËR MBROJTJEN E PËRBASHKËT?/

Nga Frank Shkreli/

Aleanca e NATO-s po zhvillon punimet e nivelit të lartë në Bruksel. Si zakonisht, në një takim të tillë, diskutohen çështje dhe sfida me të cilat përballet Aleanca e Atlantikut Verior, sidomos në fushën e sigurisë dhe të mbrojtjes, por edhe çështje të tjera që kanë të bëjnë me zhvillimet brenda aleancës si dhe me operacionet e saj në përgjithësi. Mirëpo, duket se mbledhja e nivelit të lartë e NATO-s në Bruksel dje dhe sot, po dominohet nga ankesa e Presidentit të Shteteve të Bashkuara, Donald Trump se vendet anëtare të Aleancës Perëndimore nuk po shpenzojnë sa duhet për sigurinë e përbashkët dhe u ka kërkuar atyre që të rrisin kontributet e tyre ndaj aleancës.

Në takimin fillestar të mërkurën me Presidentin Trump, Sekretari i Përgjithshëm i NATO-s, Gjenerali Jens Stoltenberg i shprehi mirëseardhjen udhëheqsit amerikan në kryeqendrën e NATO-s duke thënë se në takimin e nivelit të lartë në Bruksel do të preken shumë çështje me rëndësi, ndër to edhe shpenzimet për mbrojtje. Uhdëheqsi i NATO-s shtoi se, “Të gjithë ne jemi dakort se duhet të bëjmë më shumë në këtë fushë”, duke i thënë presidentit Trump se, “Jam dakort me ju se duhet të sigurojmë që aleatët të investojnë më shumë në këtë fushë”, është shprehur Stoltenberg. Ai deklaroi gjithashtu se lajmi i mirë është se të gjithë aleatët kanë filluar të investojnë më shumë për mbrojtje. Z. Stoltenberg iu drejtua Presidentit Trump duke thënë se, “Mesazhi juaj ka pasur ndikimin e duhur dhe se do të bëjmë ç’është e mundur që të shënohen rritje të mëtejshme të buxhetit të mbrojtjes”, ka theksuar kryetari i NATO-s, në takimin që zhvilloi fillimisht me Presidentin Trump. Ai shtoi se “Një NATO e fortë është e mirë jo vetëm për Evropën, por edhe për Shtetet e Bashkuara”, tha Stoltenberg.

Edhe presidentë të tjerë amerikanë si dhe Kongresi, nga hera në herë në të kaluarën, kanë venë në dukje kontributin më të madh të Shteteve të Bashkuara ndaj buxhetit të NATO-s, në krahasim me vendet e tjera anëtare. Madje edhe paraadhësi i z. Trump, presidenti Barak Obama e kishte ngritur çështjen e mungesës së kontributeve të vendeve anëtare të NATO-s ndaj sigurisë së përbashkët. Por, presidenti Trump është treguar më këmbëngulës në këtë pikëpamje duke kërkuar rritjen e shpenzimeve për mbrojtje nga ana e vendeve anëtare të NATO-s duke përdorur një gjuhë direkte dhe të hapët, ndërsa disa do të thonin, aspak diplomatike, duke nervozuar aleatët me qëndrimet e tija ndaj NATO-s, një gjuhë kjo që nuk përdorej më përpara nga udhëheqsit ameriknaë. Ai është shprehur se çdo vend anëtar i NATO-s që nuk kontribon atë që i takon për mbrojtje të përbashkët – e këta janë shumica, sipas tij – është duke përfituar në kurriz të taksa paguesve amerikanë.

Po, a ka të drejtë Presidenti Trump kur akuzon se shumica e vendeve të Aleancës nuk japin kontributin e nevojshëm për mbrojtje të përbashkët, madje as kontributin prej 2% të buxhetit të përgjithshëm kombëtar të vendeve anëtare, për të cilin kanë rënë dakort të gjithë, që në vitin 2006? Është vështirë të thuhet dhe varet se statistikat e kujt duhet të besohen. Për më tepër, nuk është sigurt, sipas disa ekspertëve, se kur ankohet Z. Trump për mungesën e kontributeve evropiane ndaj NATO-s, nëse ai flet për fondet direkte ose indirekte të vendeve anëtare për mbrojtje të përbashkët të NATO-s. Disa ekspertë, me të drejtë mbajnë qëndrimin se – nëqoftse ai flet për kontributet e drejtë për drejta ndaj aleancës nga vendet anëtare, presidenti Trump po e ekzagjeron këtë çështje, por nga ana tjetër nëqoftse udhëheqsi i Shtëpisë së Bardhë flet për shpenzimet indirekte – të cilat janë shumë më të mëdha se sa fondet direkte të Shteteve të Bashkuara për NATO-n, atëherë ai mund të ketë të drejtë për pretendimet e tija se aleatët amerikanë në NATO nuk po konribojnë fondet që u takojnë, siç kanë pretenduar edhe para-ardhësit e Z. Trump, përfshirë, Presidentin Barak Obama. Problemi mund të jetë mënyra se si e paraqet këtë problem presidenti Trump, në krahasim me para-ardhësit e vet.

Gazeta Washington Post, në një artikull mbi këtë çështje, shkruan se dokumentat e NATO-s tregojnë se shumica e vendeve anëtare nuk plotësojnë angazhimet e tyre dhe as udhëzimet e NATO-s, të pranuara nga të gjithë në vitin 2006, për kontributin prej 2% për mbrojtjen e përbashkët. Sot, më shumë se një dekadë më vonë, vetëm një numër i vogël aleatësh evropianë në NATO, kanë realizuar këtë objektiv.

Gazeta citon një dokument të NATO-s në të cilin thuhet se, “Shpenzimet e mbrojtjes të Shteteve të Bashkuara efektivisht përbëjnë 73% të shpenzimeve të përgjithshme të Aleancës, por kjo”, sipas NATO-s, “Nuk do të thotë se Shtetet e Bashkuara mbulojnë73% të kostos së përgjithëshme për operacionet e NATO-s si organizatë, përfshirë kryeqendrën në Bruksel dhe komandat ushtarake varëse të saj, por do të thotë se ekziston një varësi e madhe e Aleancës, në përgjithësi, në kontributin që japin Shtetet e Bashkuara, në fusha të tjera të operacioneve. Si për shembull në fushën e inteligjencës, mbrojtjen e raketave balistike e shumë fusha të tjera, në të cilat Shtetet e Bashkuara kanë një epërsi në krahasim me vendet e tjera anëtare. Duket që, varësisht, se cilat shifra përdoren në lidhje me konributet, aq të ndryshme do të jenë edhe përfundimet në të cilat arrihet, gjë që mund të shkaktojë edhe keqkuptime. Thuhet se statistikat, cilat do qofshin ato, gënjejnë. Edhe ky problemi i kontributeve në NATO duket se është produkt statistikash që gënjejnë.

E kuptoj nëqoftse lexuesi është i konfuzuar me këto të dhëna, pasi as unë nuk e kuptoj se ku qëndron problemi i vërtetë dhe se cilat statistika duhen besuar, ose cilat të dhëna ka përpara presidenti Trump kur ankohet për mos kontributin e nevojshëm të aleatëve. A flet ai për shpenzimet direkte apo ato indirekte, a po për dyja? Por, sidoqoftë, ndonëse diskutimi është aktual mbi mosbalancimin në shpenzimet ushtarake të vendeve të NATO-s, ai nuk është i ri, pasi vet NATO-ja ka thënë se ky problem ka ekzistuar ç’prej fillimit të aleancës. Ndryshimi është se kur u themelua NATO, Evropa ishte ende e shkatërruar nga lufta dhe e dobët ekonomikisht dhe nuk mund të flitej për një kontribut më tëmadh për aleancën, ndërsa sot, Evropa e Bashkuar është shumë më e fortë, qoftë ekonomikisht, qoftë ushtarakisht dhe ndoshta me të drejtë ose jo, Shtetet e Bashkuara, pikërisht Presidenti Trump, ashtu si edhe paraardhsit e tij, presin më shumë kontribute nga aleatët e tyre evropianë për mbrojtjen e përbashkët – pasi shumica kanë mundësi ta japin ndihmesën fhe fondet.

Është e vështirë të thuhet nëse tensionet e fundit transatlantike, si përfundim i kritikave të presidentit Trump ndaj vendeve anëtare të NATO-s, do të prekin ose jo marrëdhëniet midis aleatëve, por është e qartë se kritikat, me vend ose pa vend të presidentit Trump, duket se kanë pasur ndikimin e tyre tanimë, pasi ka shënja se vendet anëtare të NATO-s kanë hedhur hapat e para dhe kanë marrë masa për rritjen e investimeve për sigurinë dhe mbrojtjen e vet, përfshirë kontributin e 2% për operacionet e NATO-s. Megjithëkëtë, ndonëse NATO duket se është e angazhuar për realizimin e këtij objektivi prej 2%, disa ekspertë ushtarakë janë të mendimit se disa vende evropiane anëtare të aleancës nuk mund të arrijnë këtë objektiv pa ndërmarrë reformat ë dukëshme në strukturat e tyre ushtarake.

Ndërkaq, ata që — si përfundim i kritikave, me vend e pa vend, të Presidentit Trump ndaj NATO-s — mezi presin prishjen midis Shteteve të Bashkuara dhe aleatëve të tyre në NATO, qetësohuni se një gjë e tillë nuk do të ndodhë kurrë, madje edhe po të dëshironte kështu edhe Presidenti Trump, gjë që nuk e besoj. Si mbështetës i fortë i NATO-s, ashtu si edhe shumë të tjerë, jam i bindur se është vet sistemi amerikan, përfshirë edhe Kongresin e Shteteve të Bashkuara, ai që nuk do të lejonte tensionet transatlantike. Lidhjet midis Evropës dhe Shteteve të Bashkuara janë tepër të forta dhe të rëndësishme që të afektohen madje edhe nga disa deklarata të një presidenti amerikan. Përball kritikave të presidentit Trump ndaj NATO-s në të kaluarën, por edhe para se të nisej për Bruksel, ishin përfaqsuesit e vërtetë të popullit amerikan — Kongresi i Shteteve të Bashkuara — ata të cilët i dërguan një mesazh jo vetëm presidentit Trump dhe NATO-s, por edhe botës, për lidhjet e patundura të Amerikës me aleatët e saj në NATO, duke votuar një rezolutë në mbështetje të Aleancës së Atlantikut Verior, NATO-s. Në rezolutën e Senatit të Shteteve të Bashkuara prej 100-antarësh republikanë e demokratë – e miratuar me 92 vota në favor dhe 2 kundër — ligjëvensit amerikanë shprehën mbështetjen e tyre të fortë për NATO-n, ndërkohë që u bënë thirrje negociatorëve amerikanë të ritheksojnë angazhimin dhe mbështetjen e plotë të Shteteve të Bashkuara për Aleancën Veriore të Atlantikut, NATO.

PËRSE HESHT KOMUNITETI SHQIPTAR NË SHBA?

July 11, 2018 by dgreca

APATIA DHE HESHTJA E SHOQATAVE NË SHBA KARSHI PROVOKIMEVE TË FUNDIT NË SHAS !/

1 Perleshje-ne-shas 1 kisha-shen-merise-shas

Nga Esad GJONBALAJ/

Ka kohë që shoqatat shqiptaro-amerikane me origjinë nga trojet tona etnike nën Mal te Zi dhe me veprimtari në SHBA i ka zënë një gjumë i thellë letargjik dhe i ka rrok apatia në aspektin e veprimtarisë për çështjen kombëtare. Shumëkush mund të pyet dhe habitet : pse valle heshtin dhe nga çka ose nga kush frikësohen apo a e din misionin e tyre shoqatat tona:Vite më herët shoqatat tona përmes Këshillit Koordinues të Shoqatave bashkërëndonin dhe bashkëvepronin aktivitetet kombëtare dhe ishin shembull i rrallë i një përafrimi të pa parë deri atëherë në aspektin kombëtar. Ishte kohë kur për çdo cenim të te drejtave të shqiptarëve nën Mal te Zi reagohej dhe veprohej menjëherë . Reagohej ashpër me denoncime publike, por shtrohej edhe ndikim në shtetet tona si në Shqipëri dhe në Kosovë, që të ndërhyjnë me ndikimin e tyre për cenimin e të drejtave te vëllezërve tanë nga autoritet malaziase, qoftë ne nivel të pushtetit lokal dhe apo të atij qëndror.

Ditëve të fundit ishim dëshmitar të provokimeve të klerit ultranacionalist të Kishës Ortodokse Serbe në Mal të Zi ndaj shqiptarëve autokton në lokalitetin Shas afër Ulqinit, me pretekst të kinse mbajtjes së një liturgjie fetare. Për të penguar këtë veprimtari ilegale në themelet e kishës mesjetare shqiptare të Shën Gjonit në Shas kishin dal disa dhjetra shqiptarë (katolikë e myslimanë) me vetëorganizim dhe kanë merituar çdo lavdatë për veprimet e tyre atdhetare aq më tepër kur dihet se klerikët qëllimkëqinj kishin ardhur me mbrojtje policore.

Mosreagimi dhe heshtja e diasporës lidhur me këtë provokim është e pajustifikueshme sepse diaspora e në veçanti shoqatat mision kryesor të tyre kanë dhe duhet ta kenë atdhetarinë.Ne anën tjetër të medaljës, për herë te parë Këshilli Nacional i Shqiptarëve në Mal të Zi ishte në krye të detyrës duke reaguar lidhur me rastin konkret dhe duke qenë në krye të misionit të cilin e ka obligim dhe duhet ta ketë.

Edhe pjesa dërmuese të partive tona politike ishin të vonuara dhe të mangëta në reagimet e tyre.

Shoqatat, gjegjësisht kryesitë e tyre duhet të zgjohen nga gjumi dimëror dhe mos të gjejnë vetëkënaqësinë e tyre vetëm në projekte të natyrës financiare por të veprojnë me mentalitet pragmatik dhe vizionar në aspektin kombëtar, respektivisht të mbrojtjes së kombit dhe të trashëgimisë tonë kulturore.

Mosreagimi i shoqatave nuk është në interesin e komunitetit sepse dihet se historikisht shoqatat dhe organizatat e tjera shqiptare ne mërgim gjithnjë preambulë të aktiviteteve të tyre e kanë pasur dhe duhet kanë realizimin e qëllimeve për kauzën kombëtare.

Fotot përshkrimi: 1. themelet e kishës mesjetare shqiptare të Shën Gjonit në Shas

Pamje gjate ballafaqimeve te shqiptarëve me klerikët serb ne Shas dhe policia malaziase