Saturday June 20 10:00 am Parade | 1:00 pm Festival

Parade Start: 81st Street & Central Park West

Shoqata “Jehona e Malësisë” dhe stafi pedagogjik i Shkollës së Gjuhës Shqipe njoftojnë se mësimi i rregullt për vitin shkollor 2025/2026 ka përfunduar me sukses. Me këtë rast, shprehim mirënjohjen dhe falënderimet më të sinqerta për të gjithë nxënësit, mësuesit dhe prindërit, të cilët me përkushtimin, bashkëpunimin dhe përgjegjësinë e tyre kontribuan në mbarëvajtjen dhe përfundimin me sukses të këtij viti shkollor.

Ruajtja dhe kultivimi i gjuhës shqipe është një mision i shenjtë kombëtar. Gjuha jonë amtare është themeli i identitetit tonë personal dhe kombëtar, ura që na lidh me historinë, kulturën, traditat dhe vlerat e trashëguara brez pas brezi. Përmes mësimit të gjuhës shqipe, fëmijët tanë forcojnë lidhjen me rrënjët e tyre dhe mbajnë gjallë krenarinë për prejardhjen shqiptare.

Njëkohësisht, ju bëjmë me dije se viti i ri shkollor 2026/2027 do të fillojë më 7 shtator 2026.

Urojmë që të gjithë nxënësit dhe familjet e tyre të kalojnë një verë të këndshme, të qetë dhe të mbushur me shëndet e gëzim. Shpresojmë t’ju gjejmë përsëri së bashku në shtator, me energji të reja dhe me dashuri edhe më të madhe për gjuhën, kulturën dhe kombin tonë.

Me respekt,

Shoqata “Jehona e Malësisë”

Stafi Pedagogjik i Shkollës së Gjuhës Shqipe

Kryetar,

Zef Berishaj

Shqiptarët e Amerikës protestojnë në New York kundër shitjes e zhvatjes së Atdheut, korrupsionit, vjedhjes, babëzisë e qeverisë…

Fotoreporter: Shaqo Gjokaj

Në Këshillin e Qytetit të Nju Jorkut, me rastin e Ditës së Çlirimit të Kosovës, anëtarët e këtij Këshilli, David Carr dhe Shirley Aldebol, nderuan dje, me Mirënjohjen e Këshillit të Nju Jorkut (Proclamation), Ambasadorin Blerim Reka.

Në fjalën e tij, Ambasadori Reka, në emër të Konsullatës së Përgjithshme të Republikës së Kosovës në Nju Jork dhe në emrin e tij personal, falënderoi zotin Carr dhe zonjën Aldebol, si dhe të gjithë anëtarët e Këshillit të Nju Jorkut, për mbështetjen e vazhdueshme ndaj Republikës së Kosovës, për nderimin e përvitshëm të pavarësisë së Kosovës me ceremoni festive në NY City Hall, si dhe për rolin mbështetës të qytetit të Nju Jorkut si shtëpia e dytë e mërgatës shqiptare.

Ai falënderoi gjithashtu bashkëatdhetarët tanë nga pesë bashkitë e Nju Jorkut, si dhe z. Naser Nika, kryetar i Shoqatës Shqiptaro-Amerikane të Staten Island, i cili ishte i pranishëm në ngjarjen e djeshme.

Nga Drita Gjongecaj/

Pikniku tradicional përmbyllës i Shkollës Shqipe ‘Children of the Eagle’ u organizua për të gjashtin vit radhazi në Ridge Road Park në Hartsdale, NY. Gjatë viteve të mëparshme, ky aktivitet është organizuar edhe në parqe të tjera të Westchester County, duke u shndërruar në një traditë të dashur për familjet e komunitetit tonë.

Pikniku i 6të vjetor u zhvillua vetëm një ditë pas ceremonisë festive “Në Gjuhën e Rrënjëve Tona”, ceremoni që u mbajt në ambientet e shkollës publike PS 108.

Tingujt e muzikës shqiptare shoqëruan gjatë gjithë ditës aktivitetin, duke i dhënë piknikut ngjyrat dhe shpirtin e festave tona tradicionale. Këngët dhe vallet shqiptare bashkuan fëmijë e të rritur në një atmosferë të ngrohtë, ku krenaria për trashëgiminë tonë kulturore ndihej në çdo cep të festës. Ishte një ditë ku gjuha shqipe dëgjohej natyrshëm, ku fëmijët luanin së bashku dhe ku familjet ndanin jo vetëm ushqimin, por edhe përvojat, kujtimet dhe shpresat për të ardhmen e komunitetit tonë.

Programi i ditës ofroi aktivitete për të gjitha grupmoshat. Një nga momentet më argëtuese ishte ndeshja miqësore e volejbollit mes mësueseve dhe prindërve nga njëra anë, dhe nxënësve më të rritur nga ana tjetër. Loja u zhvillua në një atmosferë plot energji, humor dhe frymë bashkëpunimi, duke krijuar momente të bukura që afruan edhe më shumë brezat brenda komunitetit tonë.

Ndërkohë, fëmijët më të vegjël shijuan lojërat e ndryshme në këndin e lojërave të parkut, ku të qeshurat dhe entuziazmi i tyre i dhanë gjallëri aktivitetit. Krahas lojërave, ata patën mundësi të angazhoheshin edhe në veprimtari krijuese artistike, duke krijuar piktura me bojëra dhe buqeta me lule. Përmes këtyre punimeve, fëmijët shprehën imagjinatën, kreativitetin dhe preferencat e tyre për ngjyrat, duke sjellë krijime të veçanta që pasqyronin botën e tyre të pasur dhe plot fantazi.

Një falënderim i veçantë shkon për dy biznese shqiptare që treguan edhe një herë mbështetjen e tyre të vazhdueshme ndaj misionit të “Children of the Eagle”. Restoranti Besa Grill, përmes bujarisë së pronarit Tony (Tush) Musaj, si dhe Sofra Tropojane, me pronare Majlinda Tafaj, dhuruan ushqim për pjesëmarrësit e piknikut, duke kontribuar në mënyrë domethënëse në suksesin e aktivitetit. Mbështetja e tyre nuk është thjesht një kontribut material; ajo pasqyron besimin dhe vlerësimin që ata kanë për punën e shkollës dhe për përkushtimin e stafit të “Children of the Eagle” në edukimin e brezit të ri. Ata kanë qenë vazhdimisht miq të shkollës sonë dhe një shembull i bukur i mënyrës se si bizneset shqiptare mund të kontribuojnë në forcimin e komunitetit.

Mirënjohje të veçantë meritojnë edhe mësueset tona, të cilat jo vetëm që kanë punuar me përkushtim gjatë gjithë vitit shkollor, por sollën edhe ushqime e ëmbëlsira për t’i ndarë me të gjithë pjesëmarrësit. Ky gjest i thjeshtë, por tepër domethënës, pasqyron frymën familjare që karakterizon shkollën tonë dhe marrëdhëniet e ngrohta që janë krijuar mes stafit, nxënësve dhe familjeve.

Pyetja që dëgjuam më shpesh nga prindërit, por sidomos nga fëmijët gjatë këtyre dy ditëve, ishte: “Kur do të fillojë viti i ri shkollor?”

Kjo pyetje ishte ndoshta treguesi më i bukur i suksesit të programit tonë. Ajo dëshmoi se fëmijët tanë nuk e shohin shkollën shqipe thjesht si një vend mësimi, por si një hapësirë ku ndërtojnë miqësi, forcojnë identitetin e tyre dhe ndihen krenarë për gjuhën dhe kulturën që trashëgojnë nga prindërit e tyre.

Falënderojmë nga zemra secilin që ishte pjesë e këtyre dy ditëve të veçanta, piknikut përmbyllës dhe ceremonisë “Në Gjuhën e Rrënjëve Tona”.

Le të punojmë akoma më ngushtë së bashku për të përcjellë te fëmijët tanë vlerat, gjuhën dhe kulturën shqiptare që do t’i shoqërojnë gjatë gjithë jetës.