Një ftesë për të gjithë shqiptarët e Amerikës.

Nga Alketa Burimi Kapaj/

E Premtja e Gjuhës Shqipe në Shkollën Shqipe në Naples, Florida, festoi mbylljen e një tjetër viti shkollor.

Një festë e bukur që na mblodhi të gjithëve bashkë rreth gjuhës, kulturës dhe dashurisë për rrënjët tona.

Kur hyra në sallën ku të gjithë ishin mbledhur, u hutova nga fëmijët që vraponin drejt meje për të më përqafuar. Në sytë e tyre pashë emocionin, gëzimin, por edhe atë drojën e ëmbël të atyre që do të dilnin në skenë për të recituar, kënduar e vallëzuar. Për disa prej tyre ishte hera e parë.

Shikoja në sytë e gjyshërve një emocion të veçantë, madje edhe më të madh se ai i fëmijëve. Ata mezi prisnin të shihnin nipërit e mbesat e tyre duke recituar në gjuhën shqipe. Prindërit kujdeseshin për çdo detaj të paraqitjes së fëmijëve të tyre, ndërsa stafi i Organizatës Shqiptaro-Amerikane të Southwest Florida-s punonte me përgjegjësi dhe përkushtim, duke u siguruar që çdo gjë të shkonte sa më mirë në këtë festë të bukur të Abetares dhe të mbylljes së vitit shkollor.

Por emocionin më të madh e përjetonin mësueset, sepse në atë skenë do të pasqyrohej puna, përkushtimi dhe dashuria e tyre gjatë gjithë vitit.

Shfaqja nisi me Himnin tonë Kombëtar. Më pas, programi u prezantua nga Evelina jonë, një vajzë e bukur, së cilës veshja popullore shqiptare i shtonte hijeshi, elegancë dhe krenari kombëtare. Më pas, fëmijët na dhuruan një program të pasur dhe plot gjallëri. Ata sollën alfabetin shqip, poezi për gjuhën shqipe, për mësuesin, për nënat shqiptare dhe për Shqipërinë. Kënduan, vallëzuan, luajtën në violinë dhe mbushën sallën me energji e buzëqeshje. Dhe, për çudi, ai emocion që i kishte mbërthyer para se të dilnin në skenë u shndërrua në forcë. Ata dhanë më të mirën e tyre.

Çfarë mrekullie është të dëgjosh zërat e fëmijëve që përcjellin dashurinë për gjuhën shqipe! A ka vlerë më të madhe se kjo, kur mendon se ky brez, i lindur larg atdheut, vazhdon ta ruajë gjuhën shqipe si një nga thesaret më të çmuara të identitetit të tij?

AAOSWFL ka bërë një punë të mrekullueshme duke krijuar dhe mbështetur këtë shkollë. Kjo vatër e ngrohtë shqiptarie është bërë një shtëpi e dytë për fëmijët tanë, një vend ku gjuha, kultura dhe traditat tona vazhdojnë të jetojnë.

Mirënjohje e veçantë shkon për të gjithë ata që e bëjnë të mundur këtë mision, por veçanërisht për dy zonjat e nderuara, Silvana Aliko Selfollari dhe Ana Gjergji, anëtare të bordit të organizatës, të cilat kanë qenë gjithmonë pranë mësueseve, fëmijëve dhe prindërve, duke ofruar mbështetje të palodhur dhe dashuri për këtë kauzë. Sepse ruajtja e gjuhës shqipe në diasporë nuk është vetëm një mësim. Është një amanet. Një zë që lidh fëmijët tanë me rrënjët, historinë dhe shpirtin e kombit të tyre.

Në fund të kësaj feste, ndërsa duartrokitjet mbushnin sallën dhe fëmijët shkëlqenin nga gëzimi, mendova se ky vit ishte një udhëtim i ri edhe për mua. Një vit plot mësime, sfida dhe zbulime. Por në fund ishin vetë fëmijët ata që na dhanë mësimin më të bukur: se ata janë mbartësit më të çmuar të trashëgimisë sonë.

Gjuha shqipe është më shumë se fjalë. Ajo është një dritë që fëmijët tanë e mbajnë me vete kudo që jetojnë. Dhe sa kohë që ka fëmijë që e mësojnë, prindër që e mbështesin, mësues që e përcjellin dhe një komunitet që e mbron, ajo do të vazhdojë të ndriçojë e të jetojë, brez pas brezi, edhe larg brigjeve të Shqipërisë.

Viti shkollor u mbyll, por jo dashuria për gjuhën shqipe. Tani të gjithë presim me gëzim shtatorin, kur do të rinisim së bashku një tjetër vit të bukur shkollor, me të njëjtin mision në zemër: t’ua përcjellim fëmijëve tanë gjuhën dhe kulturën shqiptare.

Rreth autores:

Alketa Burimi Kapaj është autore dhe poete shqiptare me banim në Naples, Florida. Përmes veprës së saj letrare dhe angazhimit në Shkollën Shqipe në Naples, ajo kontribuon në ruajtjen dhe përcjelljen e gjuhës, kulturës dhe identitetit shqiptar te brezat e rinj në diasporë.

Shqiptarët e Amerikës protestojnë në New York kundër korrupsionit, vjedhjes, babëzisë, qeverisë…

“Zoti i bekoftë shqiptarët, Zoti i dënoftë tradhëtarët”

Fotoreporter: Shaqo Gjokaj

Av. Hasan Metuku/

Gjykatësi Federal rrëzon vendimet e Administrates Trump per ndalimim e udhëtimit drejt SHBA-ve për qytetare te 39 vendeve te Botes dhe urdhëron administraten per vazhdimin e përpunimit të Green Card (Kartave Jeshile) dhe Kërkesave për Azil.*

Një Gjyqtar Federal anuloi një sërë politikash të administratës Trump që ngrinin aplikimet për kartën e gjelbër, lejet e punës dhe përpunimin e azilit për emigrantët nga 39 vende. Kryegjyqtari i Qarkut të SHBA-së, John McConnell, vendosi që këto ndalime nga Shërbimi i Shtetësisë dhe Emigracionit të SHBA-së (USCIS) ishin të paligjshme, diskriminuese dhe tejkaluan autoritetin e agjencisë.

Vitin e kaluar, administrata ndaloi përpunimin e kerkesave të azilit dhe pezulloi aplikimet për përfitime emigracioni për individët e prekur që i nënshtroheshin ndalimit të udhëtimit për një periudhë të pacaktuar kohore, duke lënë miliona emigrantë në të gjithë Shtetet e Bashkuara të përballen me pasiguri në lidhje me statusin e tyre ligjor.

Në një vendim të gjatë gjyqësor prej 135 faqesh, Kryetari i Gjykatës së Qarkut të SHBA-së, John McConnell, arriti në përfundimin se Shërbimi i Shtetësisë dhe Emigracionit të SHBA-së (USCIS) veproj në mënyrë të paligjshme duke zbatuar kufizime të gjera pa autorizim nga Kongresi ose rregullore të përcaktuara. Gjykata arriti në përfundimin se politika kishte shenjestruar padrejtësisht aplikantët bazuar në vendin e tyre të origjinës dhe kishte shkelur ligjin federal të Emigracionit dhe Proceduren Administrative.

Gjykatësi, gjithashtu shfuqizoi një politikë të Shërbimit te Shtetësisë dhe Emigracionit (USCIS) që kërkonte që emigrantët nga vendet në listën e ndalimit të udhëtimit të administratës Trump – të cilët tashmë ishin miratuar për përfitime emigracioni pas hyrjes në Shtetet e Bashkuara pas vitit 2021 – t’i nënshtroheshin një shqyrtimi të dytë të rasteve të tyre. Gjykatësi hodhi poshtë argumentin e qeverisë se këto shqyrtime shtesë dhe vlerësime të bazuara në vendin e origjines ishin të nevojshme për sigurinë kombëtare, duke gjetur se kesaj politike i mungonte justifikimi i mjaftueshëm ligjor.

. Detajet kryesore të vendimit:

• Ngrirja u hoq: Agjencite e emigracionit tani janë të detyruara ligjërisht të rifillojnë përpunimin e kartave të gjelbra, autorizimeve të punës dhe aplikimeve për azil për individët e prekur.

• Ndalimi i Udhëtimit në 39 Vende: Gjykata rrëzoi politikat që ndalonin përpunimin e kerkesave për aplikantët që vinin nga vendet e prekura nga ndalimet e udhëtimit të Presidentit Trump.

• Politika e “Rishikimit” e Bllokuar: Vendimi shfuqizoi një direktivë “rishikimi” jokushtetuese që i kishte lejuar qeverisë të rivlerësonte dhe peshonte faktorët e sigurisë specifike të vendit kundrejt emigrantëve nga këto vende të cilëve tashmë u ishin dhënë përfitime.

Vendimi prej 135 faqesh i gjykatës dënoi politikat që lanë emigrantë të panumërt në “situate ligjore të papërcaktuar”.

Vendimi i djeshëm është një fitore e rëndësishme për sundimin e ligjit dhe për mijëra emigrantë që ndoqën çdo kërkesë sic duhej dhe u detyruan te shihnin çështjet e tyre të ngrinin për një kohë të pacaktuar.

Vendimi kërkon që qeveria të rifillojë procedurat normale të përpunimit dhe të fillojë shqyrtimin e numrit të madh të çështjeve të prapambetura.

Padi të veçanta jane ne process gjygjesor në Nju Jork dhe Distriktin e Kolumbias që kundershtojnë pezullimin nga administrata Trump të përpunimit të vizave të emigrantëve për qytetare nga 75 vende, listë në të cilën përfshihet edhe Shqipëria.

Vendimet e pritshme te Gjykatave Federale per keto ceshtje do te jene shume te rendesishme per zhbllokimin e leshimit te vizave emigruese per qytetaret shqiptare qe jane ne pritje te vizes per muaj me radhe dhe per tu bashkuar me familjet e tyre ne Amerike.

Ne po ndjekim me interes keto procese gjygjesore dhe do te ju perditesojme ne kohe reale dhe me keshillat e nevojshme per cdo rast.

* Listen e vendeve mund ta gjeni ne linkun: https://www.congress.gov

Hasan Metuku, Esq.

Metuku Law P.C.

39 Broadway, Suite 1450

New York, NY 10006

Phone: 212-480-4242

Fax: 212-566-4088

Email: hhm@metukulaw.com

Website: www.metukulaw.com

Më 31 maj 2026, komuniteti shqiptar u mblodh në Wolfe’s Pond Park në Staten Island për piknikun e përvitshëm të organizuar nga 14 shoqata shqiptare të qytetit të Nju Jorkut. Ky aktivitet madhështor mblodhi rreth 8,000 pjesëmarrës të të gjitha moshave nën moton: “Një Ditë Tradite, Bashkimi dhe Argëtimi.”

Pikniku shërbeu si një mundësi e veçantë për familjet dhe miqtë shqiptarë që të kalonin kohë së bashku, të festonin trashëgiminë e tyre kulturore dhe të forconin lidhjet brenda komunitetit. Në të gjithë parkun mbizotëronte një atmosferë festive, ku pjesëmarrësit shijonin gatimet tradicionale shqiptare, merrnin pjesë në aktivitete sportive, luanin lojëra të ndryshme dhe ndanin biseda të ngrohta me njëri tjetrin. Për shumë prej tyre, kjo ishte edhe një mundësi e rrallë për t’u takuar me miq dhe të afërm që nuk i kishin parë prej vitesh.

Në skenën kryesore, të përgatitur posaçërisht për këtë festë, interpretohej muzikë shqiptare nga këngëtarë të njohur të komunitetit, dhe te ftuar. Këngët dhe vallet shqiptare jehonin në mbarë parkun, duke krijuar një atmosferë krenarie dhe gëzimi kombëtar. Dita e bukur me diell dhe flladi i lehtë që vinte nga Oqeani Atlantik i dhanë aktivitetit një hijeshi të veçantë.

Në këtë ngjarje morën pjesë edhe përfaqësues të institucioneve amerikane, nga kongresi amerikan, zyrtarë lokalë të Staten Island, këshilltarë të qytetit, përfaqësues të Misionit të Përhershëm të Shqipërisë pranë OKB-së, si dhe aktivistë e drejtues të organizatave të ndryshme shqiptaro amerikane. Në fjalët e tyre përshëndetëse, ata vlerësuan organizatorët për realizimin e një aktiviteti me vlera të larta kombëtare dhe kulturore, si dhe për kontributin e tij në forcimin e marrëdhënieve shqiptaro amerikane.

Organizatorët kishin përgatitur një program të pasur me aktivitete sportive dhe argëtuese për të gjitha grupmoshat.

Anëtarët e Shoqatës Shqiptaro Amerikane “Skënderbej” kaluan momente të paharrueshme së bashku. Gatimet tradicionale, bisedat miqësore dhe atmosfera e ngrohtë e bënë këtë aktivitet edhe më tërheqës dhe të këndshëm.Një kontribut të rëndësishëm në organizimin dhe suksesin e pjesëmarrjes së shoqatës dhanë anëtarja e kryesisë, znj. Arta Xhaferri, dhe koordinatorja e aktivitetit, znj. Geltiana Bulku, të cilat punuan me përkushtim për mbarëvajtjen e këtij organizimi.

Një moment i veçantë dhe emocionues ishte festimi i ditëlindjes së anëtarit të shoqatës, z. Elton Xhaferri, dhe të Dion Hatia. Të gjithë të pranishmit u bashkuan në urimin e tyre, duke kënduar së bashku “Happy Birthday” dhe duke ndarë një tortë festive. Ishte një çast i bukur që solli buzëqeshje dhe forcoi edhe më shumë frymën e miqësisë dhe bashkimit.

Një nga aktivitetet më interesante të ditës ishte turneu i shahut i organizuar nga Shoqata Shqiptaro Amerikane “Skënderbej” Inc. Në këtë turne morën pjesë përfaqësues nga të gjitha shoqatat shqiptare pjesëmarrëse, ku secila shoqatë kishte përfaqësuesin e saj.

Hedhja zyrtare e shortit u zhvillua në orën 12:00 në tendën e Shoqatës Shqiptaro Amerikane “Skenderbej”. Shorti u drejtua nga presidenti i shoqatës, z. Imer Laçaj, së bashku me z. Lekë Preçi dhe z. Elton Xhaferri, të cilët shërbyen si arbitra dhe mbikëqyrën zhvillimin e turneut.

Pas përfundimit të shortit, garat nisën menjëherë. Ndeshjet ishin tepër konkurruese dhe dëshmuan nivel të lartë përgatitjeje, përqendrimi dhe përkushtimi nga pjesëmarrësit. Edhe pse nuk kishte kufizim kohe, disa prej ndeshjeve zgjatën më shumë se sa pritej, pasi lojtarët luftuan deri në lëvizjen e fundit për të siguruar fitoren.

Pas një gare të fortë dhe emocionuese, fitues i turneut u shpall z. Arjon Bushaj. Kupa e fitores iu dorëzua nga presidenti i Shoqatës Shqiptaro Amerikane “Skënderbej”, z. Imer Laçaj.

E gjithë dita u karakterizua nga atmosfera festive, gëzimi dhe fryma e bashkëpunimit. Pikniku dëshmoi edhe një herë rëndësinë e ruajtjes së identitetit kombëtar dhe forcimit të unitetit të komunitetit shqiptaro amerikan.

Në përfundim të aktivitetit, pjesëmarrësit shprehën mirënjohjen e tyre për organizatorët, vullnetarët dhe të gjithë ata që kontribuan në realizimin e këtij organizimi të suksesshëm. Të gjithë u larguan me kujtime të bukura, krenari për trashëgiminë e tyre dhe me dëshirën për t’u takuar përsëri vitin e ardhshëm në një tjetër festë të traditës, vlerave dhe kulturës shqiptare.

Shoqata Shqiptaro Amerikane “Skenderbej” – Staten Island.