Politike – Page 577 – Dielli

Cfare u tha Presidenti Trump marinareve në bordin e “The USS Gerald R. Ford”

March 6, 2017 by dgreca

Ja cfarë u tha marinarëve amerikanë Presidenti Trump në bordin e “The USS Gerald R. Ford”/

170302-N-PW494-0438 NEWPORT NEWS, Va. (March 02, 2017) President Donald J. Trump speaks with Sailors in the hangar bay aboard Pre-Commissioning Unit Gerald R. Ford (CVN 78). Trump visited March 2 to meet with Sailors and shipbuilders of the Navy's first-in-class aircraft carrier during an all-hands call inside the ship's hangar bay. (U.S. Navy photo by Mass Communication 1st Class Joshua Sheppard/Released) — **Një fjalim historik për të ardhmen e Flotës së SHBA-ve, që garanton supremacinë e saj, përgjatë shekullit të XXI-të/**

Një nga fjalimet më të bukura që kam dëgjuar për marinarët kudo në botë/

170302-N-YW238-0494 NEWPORT NEWS, Va. (March 2, 2017) President Donald J. Trump gives a thumbs-up to the audience after his tour of Pre-Commissioning Unit Gerald R. Ford (CVN 78). Trump visited March 2 to meet with Sailors and shipbuilders of the Navy’s first-in-class aircraft carrier during an all-hands call inside the ship’s hangar bay. (U.S. Navy photo by Mass Communication Specialist Seaman Connor Loessin/Released) — **Të nderuar marinarë të USS Gerald R.Ford!/**

Faleminderit! Faleminderit shumë! Cfarë nderi!

Ju thjesht më dhatë këtë xhaketë të bukur, duke më thënë: Zoti President, ju lutem merreni këtë në shtëpi. Ndërsa unë thashë, lermëni ta vesh. Dhe pastaj më dhatë kapelen e bukur, të cilën e vura në kokë. Ne, kemi një kapele të madhe “Bëje Amerikën të madhe përsëri!”, por unë thashë, kjo është një ditë speciale, ndaj po e vesh këtë. E drejtë? (Duartrokitje). Unë nuk kam nonjë ide se si duket, por mendoj që duket mirë. Eshtë një kapele që duket e madhe,- thjesht, si kjo anije që është kaq e madhe. Faleminderit!

Ndjehem i privilegjuar që po qëndroj sot këtu me burra dhe gra të jashtëzakonshëm të Marinës së Shteteve të Bashkuara. (Duartrokitje). Marinarët Amerikanë janë marinarët më luftarakë kudo në botë. Këtu afër kam znj. Susan,{vajza e zotit Ford}. Unë jam i gëzuar që ajo tani është me ne. Unë e di sa shumë punon ajo, vetëm vizita, plot 17 në ditë. Unë e di që ju i bëni gjërat drejtësisht, këtë unë do ta tregoj. Ata më thanë që ju, i keni bërë gjërat drejt, në nderim dhe të dy prindërve të tu, që ishin njerëz të mëdhenj, të mëdhenj. Dhe ne duam ta prezantojme këtë anije të bukur, tek populli Amerikan. Unë doja të isha këtu, unë doja të isha me ty. Në këtë mënyrë, Susan, unë përmbush respektin ndaj familjes tënde që ka bërë një punë të pabesueshme. (Duartrokitje).

USS Gerald R. Ford ka një vend të vecantë. Në të vertetë ajo ndjehet si një vend. Ti qëndron mbi kuvertë dhe ndjehesh sikur po qëndron mbi një copë të madhe toke. Por, kjo është më e mirë sesa toka. Anija nuk do të jetë thjesht një simbol i madh i Forcës Amerikane, por një trashëgimi e madhe për babain tuaj, Presidentin tonë të mëparshëm, Gerald Ford.

Presidenti Ford ishte një burrë i Marinës së SHBA. Meqë ra fjala, ai ishte gjithashtu një atlet i madh dhe ka mjaft prej jush që nuk e dinë këtë. Gerald R. Ford ishte në aksionet që Flota Amerikane zhvilloi në Paqësorin e Jugut gjatë Luftës së Dytë Botërore. Ai i shërbeu këtij vendi me nder, si ushtarak, në Kongres dhe në Shtëpinë e Bardhë. Dinjiteti dhe krenaria e kësaj anije i atribohet dhe përshtatet Gerald R. Fordit, këtij burri të madh dhe Presidenti të SHBA. Përgëzime për të gjithë burrat dhe gratë që kontribuan në ndërtimin e saj. Kjo anije është kulm i anijendërtuesve e mjeshtrave amerikane, më e madhja, më e mira, më e duhura. Anijendërtuesit amerikane janë më të të aftët kudo në botë. Kjo luftanije, dhe të gjithë që shërbejnë në të, duhet të jenë një burim i krenarisë për kombin tonë. Ne jemi të bashkuar sot,(duartrokitje), më mirë beso, kjo është e drejtë? Më mirë beso! (Duratrokitje). Dhe, me që ra fjala, ne do të kemi së shpejti më shumë vizitorë. Ne do të kemi më të ardhur. (Duartrokitje).

Ne jemi bashkuar sot, nga Gjenerali Mattis, tani Sekretari Mattis. (duartrokitje). Ku është ai? Mattis u vu në këtë detyrë për menaxhimin e kësaj ringritje të Forcës sonë Ushtarake. Ne, do t’i japim burrave dhe grave të shërbimeve të armatosura të Amerikës, burimet që ju duhen atyre për të mbajtur të sigurtë SHBA. Ne do të kemi pajisjet me të sofistikuara në botë, aeroplanë, anije dhe cdo gjë tjetër. Ne do të kemi, së shpejti, pajisjet më të mira në botë. (Duartrokitje).

Ne do tu japim ushtarakëve tanë mjetet që i duhen për të parandaluar cdo lloj lufte dhe, nëse kërkohet, ta bëjnë atë luftë dhe ta fitojnë? Të fitosh! Të fitosh! (Duartrokitje). Ne, do të fitojmë përsëri.

Admirali John Richardson, Shefi i Operacioneve të Marinës, Ky zotëri i madh është me ne sot gjithashtu. Admiral, ne do ti sigurojmë Marinës sonë që të ketë burimet, trajnimin e personelit dhe pajisjet e nevojëshme. Kështu, përgëzime, Admiral! Më shumë do vijnë. (Duartrokitje).

Më lejoni të përgëzoj Kapitenin Richard MCCormack, Komandantin e Aeroplanmbajtëses, Gerald R. Ford. Kjo anije do të bëjë përmirësime të jashtëzakonshme tek Flota jonë si askush tjetër. Nuk do ketë në asnjë vend të botës si kjo anije. Ajo përfaqëson të ardhmen e Aeroflotës amerikane. Unë kam privilegjin më të madh që të shërbej si Kryekomandanti juaj dhe Krykomandanti i burrave dhe grave të ushtarakëve të Shteteve te Bashkuara. Jeni njerëz të mëdhenj. (Duartrokitje). Njerëz të mëdhenj, të mëdhenj!

Ju përshëndes ju dhe marinarët tanë kudo në botë. Gjithmonë do mbështes misionin tuaj.Nuk do t’ju zhgënjej kurrë ju. Gjithashtu prezantoj Mike Petters, President dhe Drejtuesi i Industrive “Huntington Ingalls” së bashku me Matt Mulherin, Presidenti i Kompanisë së Ndërtimit të anijeve të NewPort. (Duartrokitje).{Kjo kompani ka ndihmuar me anije falas Flotën shqiptare, bashkë me riparimin e tyre, Shënimi im, Sh.K}. As ata nuk do t’ju zhgënjejnë. (Duartrokitje). Për ata që i shërbejnë kombit tonë në uniformë dhe për ata që ndërtojnë instrumentat e mbrotjes sonë, unë ju falenderoj në emër të kombit tim. ANËTAR i AUDIENCËS: SH-B-A!

Jam dakort, jam dakort. (Të qeshura).

Anijet e transportit janë pjesa kryesore e inevntarit të Forcës ushtarake Amerikane jashtë vendit. Ato kanë mbi 4.5 akra paisje e forcë luftuese të territorit sovran të Shteteve të Bashkuara, të cilat nuk mund ti konkurojë askush. Nuk ka konkurrent për këtë anije. Ajo është një amfib i jashtëzakonshëm për Forcën Amerikane që do të furnizojë trupat amerikane për të siguruar paqen kudo në botë. Kjo anije, do ketë rreth 4,500 trupa personel dhe 70 avionë, ndaj do përbëjë një komponent jetik të mbrotjes sonë. Ky transportues gjigand dhe anijet e reja të klasës “Ford” do të zgjerojnë mundësinë që kombi ynë të zbatojë misionet jetike mbi cdo det e oqean sado të largët. Me shpresë, mbase është forcë që nuk na duhet ta përdorim, por nëse na duhet, kundërshtarët tanë do jenë në telashe të mëdha, të mëdha. (Duartrokitje).

Kjo aeroplanmbajtese e madhe rrit aftësitë tona për të luftuar terrorizmin dhe të kemi iniciativën ndaj kundërshtarëve për shumë vite në të ardhmen. Admirali i madh Nimitz, që komandoi Fllotën e Paqësorit të Shteteve të Bashkuara gjatë Luftës së Dytë Botërore, ka thënë, “është misioni i Marinës që të mbajë sa më larg luftën ndaj armikut në mënyrë që ajo mos zhvillohet në tokën e Shteteve të Bashkuara”. E vërtetë. (Duartrokitje). Dhe pikërisht 75 vjet më parë, marina jonë e bëri këtë në betejën e Midway, pikërisht nën Komandën e Admiralit Nimitz. Ju të gjithë keni dëgjuar për betejën e Midëay, ku marinarët e Marinës së Shteteve të Bashkuara luftuan me trimëri, e cila do të mbahet mend përmes kohërave. Ishte një trimëri që do jetojë gjatë.

Shtylla kurrizore e Fllotës Amerikane në Midway ishin tre aeroplanmbajtëse të bukura: Yorktown, Enterprise dhe Hornet. Te treja ishin ndërtuar me duart e mjeshtrave amerikanë, pikërisht këtu tek kantieri detar i Newsport. (Duartrokitje). Në betejën e Midway, Fllota pësoi humbje dhe u dëmtua. Por, guximi dhe veprat heroike të marinarëve ndryshuan kursin e historise. Shumë amerikanë trima vdiqën atë ditë, dhe, përmes sakrificës së tyre, ata kthyen rrymën e Luftës së Paqësorit. Ishte një rrymë e rreptë, një rrymë e madhe, rrymë e ligë, dhe marinarët e kthyen atë në favor të popullit amerikan..

Amerikanë të panumërt, pjesmarrës në atë luftë, disa prej tyre prindër ose gjyshër të njerëzve në këtë bord, u kthyen shëndoshë e mirë në shtëpi, falë veprave heroike të marinarëve. Marinarët në Midway janë pjesë e historisë të heronjve Amerikanë, një zinxhir i pathyer i patriotëve nga cdo brez në tjetrin, që u ngrit për të mbrojtur flamurin dhe lirinë tonë.

Kjo trashëgimi vazhdon sot tek luftëtarët amerikanë që mbrojnë popullin tonë nga kërcënimi i terrorizmit. Të Martën, unë i kërkova Kongresit një sesion të përbashkët, ku të shtohet buxheti i mbrojtjes dhe të mbështesë kërkesen time për një rindërtim të madh të Ushtrisë dhe Marinës së Shteteve të Bashkuara. (Duartrokitje).

Pas disa viteve të shkurtimit të buxhetit që ka dobësuar mbrojtjen tonë, unë po kërkoj një nga rritjet më të mëdha të buxhetit për mbrotjen në historinë e SHBA. Duke eleminuar vecoritë dhe pasigurinë që krijon, ne do ta bëjmë më të lehtë planifikimin e fondit për marinën në të ardhmen dhe kështu të kontrollohen kostot dhe të arihen marrëveshjet me të mira për taksapaguesin, i cili, sigurisht, është shumë i rëndesishëm. E drejtë? Arritëm të marim një marrëveshje të mirë. Nëse ne nuk kemi një marrëveshje të mirë, ne nuk bëjmë detyren tone. E njëjta varkë për më pak para. E njëjta anije për më pak para. Të njëjtët aeroplanë për më pak para. Kjo është cfarë ne po bëjmë. Që do të thotë se, ne do të marrim më shumë prej tyre, dhe ne mund ti përdorim ata. Ushtria jone kërkon financim të qëndrueshëm, stabël që të përshtatet me nevojat për të siguruar mbrotjen tonë. Tani, kërkesa jonë parësore është mirmbajtja e avionëve, shumë aeroplanë kanë më shumë mundësi që të rrëzohen për mirëmbatjen, sesa atë që janë duke bërë në qiell. Marina jonë momentalisht është më e vogla që nga Lufta e I-rë Botërore. Mos u merakosni, së shpejti do jetë më e madhja që ka qenë. Mos u merakosni. (Duartrokitje). Mendohuni për këtë. Në këto kohë plot sfida, Marina jonë është më e vogla që prej Luftës së Parë Botërore. Tashmë, ajo i takon kohës së kaluar. Në fakt, Unë sapo fola me drejtuesit e Marinës dhe liderat e industrisë, të cilët kanë diskutuar planet e mija që të marrin përsipër zgjerimin e gjithë Flotës sonë Detare, duke përfshirë Aeroplanmbajtësen e 12-të që na duhet. (Duartrokitje). Ne gjithashtu na duhen më shumë aeroplanë, më moderne dhe me kapacitete të fuqishme. Gjithashtu, ne duhet të përmirësojmë më shumë aftësitë tona kibernetike. Kjo përpjekje madhështore rindërtimi sigurisht që do të krijojë më shumë vende pune në Virginia, dhe në gjithë Amerikën, duke inciuar teknologji dhe shpikje të reja. SHBA-të kanë qenë dhe janë vendi, që gjithmonë kanë udhëhequr botën me guxim drejt së ardhmes. Ndaj buxheti im do të sigurojë që ne të bëjmë kështu dhe do të vazhdojmë të bëjmë pikërisht këtë. Anijet Amerikane do të lundrojnë në dete dhe oqeane. Aeroplanët Amerikanë do të ngrihen lart në qiej. Mjeshtrat Amerikanë do të ndërtojnë anijet tona. (Duartrokitje). Dhe Ushtria e Amerikës do të sigurojë që një diell i ndritshëm dhe me ngjyra të ndezura të shkëlqejë gjithmonë mbi kombin dhe popullin tonë. Marina jonë është e madhe. Marina jonë është e madhe. Populli ynë është i madh. I madh! (Duartrokitje).

Republika jonë do të mposhtë cdo sfidë, cdo rrezik. Do ti paraprijë cdo kërcënimi, dhe gjithmonë do të kërkojë paqen e vërtetë dhe të përhershme.

Zoti e bekoftë Ushtrinë tonë! Zoti e bekoftë Marinën tonë! Zoti e bekoftë familjen e mrekullueshme Gerald Ford. Zoti vazhdoftë të bekojë Shtetet e Bashkuara të Amerikës. Faleminderit shumë. (Duartrokitje).

Një fjalim i natyrshëm, brilant, i Presidentit dhe Komandantit të Përgjithshëm Donald Trump para marinarëve, që përvijon strategjinë e zhvillimit të Flotës së SHBA, gjatë këtij shekulli. Ndërkohë programi i Presidentit Trump e garanton Flotën e SHBA si mbretëreshë të deteve dhe oqeaneve në të ardhmen, duke i hequr cdo hije dyshimi cilido skeptiku. {Shënimi ynë}.

Për “Diell-in” Shefqet&Herion Kërcelli

Maqedoni: Paqartësitë e krizës politike, tensionojnë situatën

March 6, 2017 by dgreca

Presidenti i Maqedonisë, Gjorge Ivanov, vazhdon ta mbajë të bllokuar kapërcimin e krizës institucionale, pavarësisht thirrjeve të qarta nga Bashkimi Evropian dhe SHBA-të për dhënien e mandatit liderit opozitar, Zoran Zaev, i cili ka siguruar shumicën parlamentare për formimin e qeverisë së re të Maqedonisë.

Presidenca mbetet në qëndrimin se “mandati nuk do t’i jepet asnjë individi apo partie që me programin e saj rrënon sovranitetin dhe karakterin unitar të shtetit përmes platformave të hartuara në shtetet fqinje”.

Kreu i VMRO-së ka thënë se kriza mund të kapërcehet vetëm përmes zgjedhjeve të reja në të cilat sipas tij “qytetarët duhet të deklarohen se e pranojnë apo jo platformën shqiptare që parasheh dygjuhësinë në Maqedoni si hap drejt ndarjes së shtetit”.

LSDM-ja e Zoran Zaevit ka thënë se Gruevski “luan lojëra të rrezikshme” ndërsa nga presidenti ka kërkuar mandatin, por pa përjashtuar edhe mundësi tjera për kapërcimin e gjendjen, megjithëse nuk ka saktësuar se cilat mund të jenë ato.

Një gjendje e këtillë e paqëndrueshmërisë politike, thonë ekspertë të fushës, ka përkeqësuar edhe situatën e sigurisë me mundësi të përshkallëzimit me përmasa të rrezikshme duke marrë parasysh deklaratat e zyrtarëve të VMRO-së se “me çdo kusht dhe me të gjitha mënyrat do të mbrojnë shtetin”.

Njohësit e çështjeve të sigurisë thonë se partia e Gruevskit në fakt nuk mbron shtetin nga gjuha shqipe, por ajo shfrytëzohet si alibi për të mbrojtur veten nga shpërdorimet e shumta që ka bërë.

“Protestat e fundit që po mbahen dhe që po thirren janë kundër shqiptarëve, por kjo nuk ka të bëjë me realitetin. Kjo është një situatë e inskenuar dhe në rast se përshkallëzohet apo rriten turbulencat, kjo edhe më shumë do të vështirësojë funksionimin e institucioneve. Këta persona që kanë udhëhequr dhe vazhdojnë ta mbajnë pushtetin dhe që duhet të garantojnë sigurinë, janë pikërisht ata që bëjnë thirrje për pasiguri vetëm e vetëm për të mbuluar veprat e tyre në dyshimta”, thotë Bashkim Selmani, profesori i së drejtës penale në Universitetin Font të Shkupit.

Ai nuk beson se një skenar i tillë mund të kalojë meqë siç shprehet ai, qytetarët tanimë e dinë se kush janë ata që duan të shkaktojnë trazira në vend.

Por, në protestat që tani disa ditë po organizohen nga organizata të ndryshme, e pas të cilave besohet se qëndron VMRO-ja e Nikolla Gruevskit, janë regjistruar disa incidente, si sulme ndaj gazetarëve, ndaj kalimtarëve të rastësishëm, ndërsa së fundi edhe sulme fizike ndaj personaliteteve të ndryshme publike, të cilët me qëndrimet e tyre janë kritik ndaj pushtetit.

“Këto sulme është e qartë se janë të organizuara dhe kanë për qëllim frikësimin e të gjithë atyre që kritikojnë punën e këtij regjimi. Kjo u paralajmërua nga disa personalitete publike që janë edhe ithtarët më të mëdhenj të partisë në pushtet. Ata thanë se tubime duhet të ketë edhe para shtëpive të atyre që sipas tij nuk punojnë për kauzën kombëtare dhe kjo edhe po ndodhë, me tubime, kërcënime, sulme fizike e kështu me radhë”, thotë Uranija Pirovska, kryetare e Komitetit të Helsinkit.

Ajo thotë se gjendja mund të përshkallëzohet në veçanti nëse presidenti vazhdon të mbajë qëndrimin e prerë lidhur me mos-mandatimin e social-demokratit Zoran Zaev për kryeministër. Ajo thotë se presidenti tanimë hapur është deklaruar se nuk është i barabartë për të gjithë shtetasit e Maqedonisë.

“Retorika nxitëse është rritur ditëve të fundit, një retorikë nxitëse kishte edhe presidenti Ivanov duke iu drejtuar vetëm një komuniteti dhe duke harruar me këtë rast se në Maqedoni jetojnë më shumë etnitete. Kështu që nëse nuk i jepet fund nxitjeve të këtilla, por edhe nëse nuk zbardhen rastet që kanë ndodhur mund të ketë përkeqësim të gjendjes”, thotë Pirovska.Maqedonia pa institucione të reja është që nga zgjedhjet e 11 dhjetorit të cilat me një diferencë prej vetëm 2 deputetëve u fituan nga VMRO-ja e Nikolla Gruevski e cila nuk arriti të formojë qeverinë pasi nuk gjeti partner tek partitë shqiptare që janë vendimtare për formimin e qeverisë.Mandati pritej t’i jepej Lidhjes Social-Demokrate, partisë së dytë e cila ka arritur të formojë një shumicë të re me mbështetjen e të gjitha partive shqiptare duke siguruar 67 vota të deputetëve nga 61 sa nevojiten për votimin e qeverisë. (REL)

Udhëtim në kryeqytetin e drogës

March 5, 2017 by dgreca

-Gazeta italiane: Shqipëria, Kolumbia e Europës/

Nga Tirana: “Shqipëria po kthehet në Kolumbinë e Europës”: Deklarata është bërë në nëntor të vitit të shkuar nga ish kryeministri i vendit Sali Berisha, që ka qenë president nga viti 1992 deri në 1997 dhe kryeministër nga 2005-a deri në 2013-ën.

Edhe nëse Shqipëria nuk është e përfshirë në një trafik kokaine të krahasueshëm me atë të vendit amerikano-jugor, është e vërtetë se kanabisi ka arritur përmasa të pashoqa në Europë.

Ambasadori i OSBE-së në vend, Berndt Borchardt, së fundmi ka llogaritur se të paktën 2 milion euro janë gjeneruar nga prodhimi e eksporti i kësaj lënde narkotike, në një vend që në vitin 2015 kishte një GDP prej nën 11 miliardë.

Dhe bëhet fjalë për një biznes që po rritet shpejt, nëse llogaritet se, nxitur nga rritja e kërkesës, prodhimi i kanabisit është trefishuar gjatë vitit të shkuar, siç shpjegon ekspertja shqiptare e krimit dhe terrorizmit Aleksandra Bodgani.

Një shifër që gjen konfirmon indirekt në fjalët e kryeministrit aktual Edi Rama, i cili e vë theksin te rritja e sasisë së kanabisit e sekuestruar në një vit, që në fakt është trefishuar (edhe pse kryeministri harron ta përmendë).

“Kanabisi për vënien e fëmijëve në gjumë”

Por, historia e kësaj droge në Shqipëri është shumë më e vjetër, e daton në kohën e regjimit komunist të Enver Hoxhës. Në gjysmën e dytë të viteve 70, pas prishjes së marrëdhënieve me Kinën, vendi e gjeti veten të izoluar në të njëjtin bllok komunist dhe me nevojën për të gjetur shpejt burime të reja.

Kështu lindën plantacionet e para të shtetit, të përqendruara kryesisht në rajonet jugore afër kufirit me Greqinë. Kanabisi u bë një produkt i konsumit të rregullt dhe disa banorë të Tiranës ende kujtojnë se si është përdorur në familje për të vënë në gjumë fëmijët më të shqetësuar.

Kultivimet mbijetuan të padëmtuara nga rënia e regjimit dhe për më tepër, jepnin më shumë prodhim pas krizës së viteve 90-të.

Malli, për më tepër, dërgohej në Itali dhe nga atje, me ndihmën e organizatave mafioze italiane, trafikohej në gjithë Europën. Me kalimin e kohës, në Shqipëri u krijuan disa zona të lira, ku kultivimi i kanabisit bëhej publikisht dhe forcat e rendit nuk guxonin të ndërhynin.

Bumerangu i Lazaratit

Një situatë për të ardhur keq, të cilën u përpoq ti jepte fund kryeministri Rama, me një aksion në qendër më të madhe: fshatin e Lazaratit, i pastruar tërësisht gjatë një operacioni të madh në vitin 2013.

Çuditërisht, kjo lëvizje e diktuar ndoshta edhe nga logjika zgjedhore rezultoi një bumerang i madh. Pasi u shkatërrua qendra e prodhimit në Lazarat, në katër vitet e fundit, plantacionet e kanabisit mbinë si kërpudha në gjithë vendin, fenomen që u zgjedhura edhe në rajone deri më tani pas të përfshira, të tilla si disa zona pranë Malit të Zi.

Në rritjen marramendëse të qarkullimit, shpjegon gazetari investigativ Lavdrim Lita, ka kontribuuar edhe futja ë treg e një fare vietnameze kanabisi, që do shumë më pak kohë për të dhënë prodhim dhe me shpejtësi ka zëvendësuar varietetin vendas.

Kanabisi i prodhuar në këtë mënyrë, sipas llogaritjeve nga BBC, po tregtohet me dyqind euro në Shqipëri dhe pastaj rishitet në Itali me një çmim dysheme 7 herë më të lartë.

Një fitim i madh që je jep jetë një xhiroje që në të vërtetë është një copë e madhe e GDP-së, duke llogaritur se së bashku me drogën në gomone që lundrojë për në Puglia, ngarkohen megjithëse në masë më të vogël se në të shkuarën edhe armë, femra për prostitucion, e në disa raste edhe emigrantë.

Në të njëjtën rrugë, në sens të kudnërt, vjen kokaina e importuar në Europë përmes Italisë dhe Spanjës dhe më pas transportohet në pjesën lndore të kontinentit. Nuk është e rralë që trafikantët italianë dhe shqiptarë – ku është e përfshirë kryesisht Ndrageta – shkëmbejnë drogë me njeri-tjetrin.

Policia e paralizuar nga korrupsioni

Në një vend ku tërheqja e shtetit social bën që të ndihen efektet e ashpra, Kultivimi i kanabisit është kthyer në një instrument mbijetese edhe për shumë fermerë të vegjët, të cilët u japin me qira tokat e tyre oligarkëve lokale.

Korrupsioni pengon efektivitetin e thuajse çdo aksioni të policisë: Nuk është e rrallë, shpjegon Lita, që në këmbim të një ryshfeti prej 20% dhënë zyrtarëve lokalë të forcave të rendit, lajmërojnë në kohë fermerët për ardhjen e një kontrolli, duke iu lejuar në këtë mënyrë të fshehin pjesën më të madhe të drogës, ndërsa një pjesë e vogël shkatërrohet nga policia, dhe për të rifreskuar statistikat triumfuese të qeverisë.

Kryeministri Rama, duke folur me “Sytë e Luftës”, ka kërkuar dy vite për zhdukjen e shumë zonave të lira, në të cilat kultivuesit e kanabisit arrijnë ti shpëtojnë dorës së ligjit, por zgjedhjet e përgjithshme janë te porta (në qershor) dhe rreziku është që grupet kriminale të drogës mund të financojë parti politike. Dhe të ndikojnë në politikat e qeverisë së ardhshme.

/Marrë nga Il Giornale

PJESË NGA DITARI I KONVALESHENCËS SIME IDEOLOGJIKE

March 4, 2017 by dgreca

I them sekretarit:-Ç’punë ka Dega e Punëve të Brendshme me poemën time. Pse Dega merret me krijimtarinë letrare?/

NGA FASLLI HALITI/ Viz. S.kamberi «Artist i Popullit»/

( PRILL 1973 – PRILL 1977)/

Janar 1973/

Gjatë muajit dhjetor 1972 u pëshpërit diçka për poemën time të botuar në tetor të vitit 1972 në gazetën “Zëri i Rinisë”. Flitej se do ta kritikonin. Thoshin se do të bëhej një mbledhje e rrethit letrar të Shtëpisë së Kulturës. Gori P., ishte i ipari që më tha se poema ime po analizohej në Komitet të Prtisë së Punës së rrethit për gabime ideopolitike. Gorit i kishte folur Fatmir Galanxhi, lulishtari i qytetit të cili e kishin thirr në Komitet të Partisë. I kishin kërkuar mendim për poemën “Dielli dhe rrëkerat”. Më saktë e përpunuan Fatmirin që ta kritikonte poemën në një mbledhje eventuale. Në fillim kjo s’më bëri përshtypje. Por më vonë thashethemet u shtuan, u bënë më serioze, më alarmante, më të rrezikshme. Tre skicat e mia «Thërmijëza jete», të botuara në «Zërin e popullit» në fillim të janarit të vitit 1973, ngjallën një reagim shumë të madh në Lushnjë. Instruktori që mbulonte sektorin e sigurimin në Komitetin e Partisë i kishte treguar gazetën sekretarit të parë.

-E sheh shoku Rrapi ç’ka shkruar Faslli Haliti. S’le njeri pa sharë. Edhe djalin tënd e ka sharë. Në një nga artikujt, (ato ishin tri skica, kurse instruktori i quante artikuj), shoku Rrapi, Faslli Haliti, pa iu dridhur qerpiku, sulmon, diskrediton deri edhe kunatin e zëvendës ministrit të punëve të brendshme…

Më thanë se Rrap Gjermeni i ishte përgjigjur me diplomaci:

-Është e drejtë e tij që të shkruajë.

Të shkruaj, por jo të shajë, shoku sekretar i parë.

Atë do ta shohim…

Instruktori i Komitetit të Partisë që mbulonte sigurimin Ilia K., me hundë të madhe dhe me kasketë proletare, ishte habitur me gjakftohtësinë e sekretarit. Ai priste që sekretari ta përgëzonte për atë për informacionin që i dha, kurse a… Instuktori priste që sekretari të tërbohej. Priste që sekretari të më thërriste menjëherë në zyrë, për ndonjë informacio shtesë që ta sitnin së bashku në zyrën e tij. Por nuk ndodhi ashtu. Sekretari dinte ta mbante veten. Si fshatar ai dinte, jo vetëm ta ruante dhe ta mbate brenda vstes tërbimin dhe hakmarrjen. Pastaj ai kishte qenë kaq vjet ambasador në Rumani. Si ish ambasador dinte të sillej me diplomaci.

-Ky nuk u nxeh fare – kishte thënë instruktori që mbulonte sigurimin në Komitet të Partisë.

-Kot s’është diplomat ai – kishte folur instruktori më Jago dhe më servil i Komitetit të Partisë DH.G., Për të cilim flitej se e kishte lënë të iatin të vdiste në korronecin e misrit, në qoshe të oborrit, pranë një grumbulli plehu.

***

Skicat e botuara në gazetën “Zëri i popullit” krijuan shqetësime edhe tek mjekët edhe në gjimnaz edhe tek një shofer taksie, i cili ishte betuar se do të më shtypte rrugës me rrotat e prapme. Mjekët kishin thënë se po të vente gruaja e tij në Maternitet për të lindur, do t’ia nxirrnin fëmijën çika-çika. Kunati i zëvendësministrit të Ministrisë së Punëve të Brendshme ishte tërbuar. Kishte thënë se më kishtë futur në shenjestër që kuri, që me poezitë “Njeriu me kobure”, “Djali i Sekretarit”, të botuara në revistën “Nëntori” dhe se tani që e kisha mbushur kupën me botimin e poemës “Dielli dhe rrëkerat dhe sidomos me botimin e skicave në gazetën “Zëri i popullit” ai do të ma mbante në lule të ballit sapo t’i krijohej rasti më eventual.

Shokët më thoshin gjithçka që dëgjonin. Më vinin në dijeni të gjithçkaje. Në fillim e mora si me shaka. Qeshja. Më bëhej qejfi që skicat kishin ngjallur reagime. Por shpejt filloi shqetësimi, alarmi tek unë.

Njëra nga skicat që fliste për një mjek spekulativ, kishte tërbuar mjekët. Megjithëse skica ishte një krijim letrar, atë ia adresonin dikujt që nuk e donin. Dikush thoshte se mjeku i skicës ishte , ) H.Ç, profesori i tre pave, (itre minuseve), domethënë: profesor gjimnazi pa diplomë, gjeneral pa ushtarë (ai kishte bërë korrupsion me eshtrat e ushtarëve italianë të Luftës së dytë Btërore, kur kishte qenë drejtor në Komunale dhe shkrimtar, pa asnjë libër.

Skica e dytë fliste për kunatin e zëvendësministrit të Ministrisë së Punëve të Brendshme. Personazhin e kësaj skice e identifikonin me H… kunatin e zëvendësministrit të Ministrisë së Punëve të Brendshme. Por dikush tjetër thoshte se ai përafronte më sumë me shoferin e taksisë i cili ishte kushuri me sekretarin e Presidiumit të Kuvendit Popullor.

Për skicën e tretë nuk flitej. Personazhin e saj nuk e përafronin me ndonjë person konkret të qytetit. Personazhi i saj ishte një vanitoz. Po vanitozë ka shumë. Kështu që ai u la në heshthje.

***

Dëgjoja gjithçka dhe shqetësohesha. Flitej se do të bëhej mbledhja e letrarëve. Pse?

Që të kritikohej poema dhe poezitë e mia që kishin qenë polemike, kritikuese të cilat demaskonin burokracinë.

Çfarë nuk thuhej. Ç’nuk më vinte në vesh. Lemerira.

Pyes Gaz Kolin që ishte përgjegjës i rrethit të Aktivistëve të Letërsisë dhe Arteve pranë Shtëpisë së Kulturës. Më thotë:Ne si rreth aktivistësh letrar nuk kemi në plan të bëjmë ndonjë mbledhje. Për këtë të garantoj unë.

Ai thoshte gjysmën e së vërtetës. Këte unë do ta kuptoja më vonë. Mbledhja me të vërtetë s’do bëhej në shtëpinë e kulturës me aktivistët e letërsisë dhe të arteve. Ajo do të bëhej në Gjimnaz me rrethin e letrarëve të gjimnazit.

Pra Gaz Koli më kish thënë gjysmë të vërtetën.

Dinaku…, thashë me vete.

***

Vjen më takon, tregimtari Halili J., U çudita. Ne gati nuk flisnim dhe ai vinte e më takonte, madje më futi dhe krahun.

-E di, – më thotë – ti mbase edhe habitesh që të takova, por si shok që të kam patur, pavarësisht nga një farë ftohje apo qejfmbetje që kemi për fajin tim, unë si shok, e kam për detyrë që të të ve në dijeni për diçka që për ty është shumë serioze. Madje , më tepër se serioze, arrosëse do të thosha.

U preva në fytyrë. Më vajti mendja tek mbledhja, tek autodafeja që po më përgatitej.

-Dëgjo – më thotë. – Në Gjimnaz – kanë bërë një mbledhje me rrethin letrar. Aty është analizuar poema jote “Dielli dhe rrëkerat” si dhe poezitë e tua sidomos “Njeriu me kobure”, “Djali i sekretarit”, “Çifligu”, “Unë dhe burrokracia” e disa të tjera. Në të vërtetë aty nuk është analizuar gjë, por H.Ç, iu ka lexuar anëtarëve të rrethit letrar një kritikë për poemën dhe krijimtarinë tënde në përgjithësi.

Halil J. vazhdoi: Poeti i ri, gjimnazisti, Bujar Xh., më tha se poemën e kanë quajtur reaksionare, dekadente, formaliste e ku di unë. Mësuesi H.Ç. u kish thënë letrarëve të shkollës që të solidarizoheshin me kritikën dhe të vinin firmat. Ai i kishte siguruar se për këtë kishin edhe përkrahjen e Komitetit të Partisë, veçanërisht të Sekretarit të Parë.

E falënderova shokun tim dhe u ndava me të menjëherë, shumë i shqetësuar. Ç’të ishte kjo kështu. Ç’ishte ky sulm me përforcime maxhiore. Takoj drejtorin e gjimnazit. I them:

-More K, ç’bëhet kështu?

Partia nxit debatin dhe ballafaqimin. Ju analizoni poemën dhe krijimtarinë time dhe s’më ftoni në mbledhje.

Drejtori më tha prerë:

-S’të marrim leje ty ne, për të kritikuar.

-Ashtu?

-Po.

Drejtori iku. Pashë se ai i kishte shpatullat e ngrohta. Pas tij qëndronte sekretari i parë i Komitetit me të cilin ai ishte fis.

Pësova disiluzion.

Pas dy-tre ditësh më vjen përsëri Halili në klasë në orën e mësimit. Më thotë se kritika është nisur për në gazetën “Zëri i Rinisë”. Kritika u çua doras në gazetë. Për ta çuar nisën mësuesin e fizkulturës.

Por kritika nuk u botua në gazetën “Zëri i Rinisë”. Ajo u botua në gazetën lokale “Shkëndija”.

Kur e pashë të botuar u shqetësova. Kur e lexova u habita se si mund të botohej në shtypin tonë një shkrim i tillë me prirje denigruese.

Artikulli ishte gjithë insinuata në planin politik e personal.

Pasi e lexoi Ismail Kadareja më tha:

-Ky shkrim është i gabuar. Ta them unë. do të kritikohet.

Ma dha gazetën dhe më tha:

-Fute shkrimin në një zarf. Dërgoja Mehmet Shehut. I thuaj: “Kjo është demokracia juaj”?

Takova Dritero Agollin. Pasi e lexoi shkrimin u shpreh:

-Ky shkrim është një aktakuzë. Me këtë ti futesh në burg.

Lexoi emrat e autorëve të kritikës:

-Këta janë një tufë rrugaçësh – më tha dhe e palosi gazetën.

Kërkova takim me sekretarin e Komitetit të Partisë së Rrethit. Më priti. Më futi krahun që nga shkallët e sheshit gjer lart në zyrë.

U ulëm.

Më dha një cigare.

-S’e pi i thashë.

-Do ta pish – më tha si me të qeshur.

-Po s’e pi fare – i thashë.

Ai e pa që unë dridhesha nga emocioni.

-Pije, – më tha – po ta jap unë.

E mora cigaren. Ma ndezi me çakmakun e tij. E thitha dy herë dhe e lashë mbi tavëll. S’e futa më në gojë.

-Hë – më tha – Ç’kemi.

-Erdha për atë shkrimin kritik – i thashë – që kanë bërë letrarët e gjimnazit.

-Ashtu?

-Po – i them.

-S’e kam lexuar – më thotë

Alamet sekretari, gënjeu.

Kjo më tronditi. E reduktova në maksimum bisedën. Ai nuk ishte i sinqertë me mua. unë isha në dijeni të gjithçkaje. Kurse ai po më thoshte s’e di, s’e kam lexuar.

U lemerisa.

I them se më janë bërë insinuata politike dhe personale. Më thotë.

-Do ta lexoj.

I them:

-Ç’punë ka Dega e Punëve të Brendshme me poemën time. Pse Dega merret me krijimtarinë letrare?

-Më konkretisht – më thotë sekretari.

-Po ja H.Ç. e ka çuar në Degën e brendshme poemën.

-Kush ta tha ty këtë?

-Murat Nexha – i them.

-Gabim ka bërë edhe Murati që ta ka thënë!

Kuptova se s’duhej zgjatur biseda.

-Kaq kisha – i thashë. – Nuk më vjen keq për kritikën që i bëhet poemës. Ajo është e botuar. Erdha vetëm t’ju them se nuk i pranoj kritikat që më bëhen në planin politik e personal.

Më thotë si me të qeshur:

-Më vjen mirë që krijimet e tua nuk i quan të përsosura.

-Përsosmëria nuk ka fund – i them.

-Shumë mirë që e pranon – më thotë.

-Përsosmërinë s’e kanë arritur as poetët më të mëdhenj – i them.

-Sigurisht, sigurisht. Furra nuk i pjek të gjitha bukët – më thotë – ca i pjek, ca i lë të pa pjekur, ca i djeg.

U largova nga zyra duke thënë me vete:

-Poemën time ku e fut ky tek bukët e papjekura apo tek bukët e djegura?

Mogherini: Shqipëria është Europë

March 3, 2017 by dgreca

*BASHA-MOGHERINI:30 MINUTA NE “ROGNER”/

1 Nishani mogherini Mogherini- Nishani, diskutim për reformën në drejtësi dhe dekriminalizimin/Presidenti Bujar Nishani u takua sot me Përfaqësuesen e Lartë të BE për Punët e Jashtme dhe Politikën e Sigurisë dhe Zv. Presidente e Komisonit Evropian, Federica Mogherini.

Presidenti Nishani i përcolli Mogherinit vlerësimin për mbajtjen lart në agjendën e BE të Shqipërisë dhe rajonit, dhe falënderoi për angazhimin e madh të të gjitha institucioneve të BE për ecurinë e reformave në Shqipëri.Kreu i Shtetit evidentoi se pas propozimit të Komisionit Europian për Shqipërinë dhe konkluzioneve të Këshillit, janë të qarta fushat prioritare në të cilat vendi duhet të bëjë përparim sa më parë.

Presidenti Nishani vuri në dukje se ndërkohë që reforma në drejtësi ka patur një zhvillim pozitiv në dy vitet e fundit, tashmë ka mbërritur në një etapë të rëndësishme që kërkon krijimin e mekanizmave legjitimë, të besueshëm dhe të shëndetshëm për zbatimin efikas të saj. Në këtë kontekst ai theksoi se është tejet e rëndësishme që ky proces të ecë vetëm mbi baza kushtetuese dhe ligjore, të shmanget politizimi i tij, dhe të inkurajohet gjithëpërfshirja, si garancitë e besueshmërisë tek qytetarët shqiptarë.

Kreu i Shtetit shtoi se reforma në drejtësi është e lidhur ngushtë edhe me reforma të tjera si ajo zgjedhore dhe dekriminalizimin e institucioneve dhe administratës publike, pasi të tria këto dimensione lidhen me perspektivën e Shqipërisë dhe të qytetarëve shqiptarë.

Duke u ndalur në zhvillimet e fundit në rajon, Presidenti Nishani garantoi se Shqipëria nuk ndërhyn në punët e brendshme të asnjë vendi tjetër, dhe se do të vazhdojë të kontribuojë për paqen dhe stabilitetin e rajonit. Ai shprehu shqetësimin e përdorimit të një gjuhe armiqësore ndaj shqiptarëve në Maqedoni për qëllime që lidhen me garën politike në vend.

Presidenti theksoi se Platforma e partive shqiptare në Maqedoni është produkt i vetë këtyre partive, të cilin Shqipëria e mbështet duke e parë në frymën e zbatimit të Marrëveshjes së Ohrit, duke mbështetur bashkëjetesën si qytetarë të barabartë ndërmjet të gjitha etnive atje, ashtu sikurse ndjekim parimin marrëdhënieve të fqinjësisë së mirë.

auto_1488564048fede1488565238

Mogherini: Shqipëria është Europë. BE gati për negociatat

Shqipëria është Europë! Ka qenë ky mesazhi që shefja e Politikës së Jashtme të BE, Federica Mogherini ka dhënë në një takim me studentët e Universitetit të Tiranës.“Është absolutisht e qartë se Shqipëria është Europa dhe duhet të largohemi nga retorika se ju keni rrugë europiane. Ju jeni rrugës drejt BE-së”, ka deklaruar Mogherini.
Shefja e diplomacisë sw BE ka thënë se Bashkimi Europian nuk ka për të qenë i plotë derisa Shqipëria të jetë pjesë e tij, por i takon vendit tonë që të çojë përpara proceset integruese.
“Zgjerimi është një zgjedhje e përbashkët që ne po e bëjmë së bashku dhe ka të bëjë me vendime të përbashkëta që ne i ndajmë me njëri-tjetrin. Tani e ka Shqipëria në dorë të marrë hapin përpara”, ka thënë Mogherini.
Dhe në këtë drejtim, përfaqësuesja e Lartë ka nënvizuar se implementimi i reformës në drejtësi është diçka që i duhet Shqipërisë dhe jo Brukselit.
“Janë qytetarët që duan një reformë në drejtësi që shteti të funksionojë më mirë dhe jo Brukseli. Ndaj është përgjegjësi e institucioneve që ta përmbushin këtë reformë. Një sistem i pavarur i drejtësisë lufton krimin e organizuar, korrupsionin, do të tërheqë të rinjtë e interesuar për biznes dhe investitorët. Ka ardhur koha që Shqipëria të marrë hapat e duhura, ne nga ana jonë jemi gati të hapim negociatat”, ka thënë Mogherini.
Nuk ka mbetur jashtë fjalimit të saj edhe kriza politike në Shqipëri, për të cilën Përfaqësuesja e Lartë ka nënvizuar se problemet dhe kontestet duhen zgjidhur brenda dyerve të institucioneve.

BASHA-MOGHERINI:30 MINUTA NE “ROGNER”/

Kryetari i Partisë Demokratike Lulzim Basha zhvilloi një takim rreth 30 minuta me shefen për politikën e jashtme të BE, Federica Mogherini, të cilën e njohu me kushtet e protestës së opozitës dhe me situatën politike në vend.

Pas përfundimit të takimit mes tyre që u zhvillua në “Rogner”, Basha theksoi se diplomates së lartë të BE i bëri me dije se krijimi i qeverisë teknike është zgjidhja e vetme për organizimin e zgjedhje të lira dhe demokratike.

“E njoha konkretisht me rrugëzgjidhjen e propozuar nga opozita për krizën e rëndë politike që vendi po kalon, i dështimit për të patur zgjedhje të lira dhe të ndershme. Zonja Mogherini do të shprehet vet, nuk jam këtu të bëj zëdhënësin apo zëdhënësen e saj. Por, kauza jonë ka mirëkuptim dhe mbështetje totale nga të gjithë ata që i duan të mirën Shqipërisë”, deklaroi kreu i demokratëve.

Lulzim Basha e konsideron kritike situatën aktuale politike, për të cilën bëri fajtor Kryeministrin Edi Rama, dhe u bëri thirrje forcave politike që t’i bashkohen kauzës opozitare.

“Shqipëria është një pacient me kancer që ka nevojë për një operacion të thellë. Qeveria teknike, që do t’i japë vendit zgjedhje të lira dhe të ndershme, është e vetmja zgjidhje për t’i dhënë vendit rrugëdalje”, tha kryetari i PD Lulzim Basha.

Prenoncimi i plotë i Lulzim Bashës:

“Sapo përfundova një takim me Përfaqësuesen e Lartë për Politikën e Jashtme të Bashkimit Europian, znj.Federica Mogherini. Pata rastin ta njoh konkretisht me rrugëzgjidhjen e propozuar nga opozita për krizën e rëndë politike që vendi po kalon; i krimit të gjithëpushtetshëm të lidhur me pushtetin politik, i drogës dhe parave të drogës, i moszbatimit të ligjit të dekriminalizimit, i nxjerrjes së bandave dhe kriminelëve nga burgu me ndërhyrje të drejtpërdrejtë politike të niveleve të larta, i dështimit për të patur zgjedhje të lira dhe të ndershme në vitin 2014 në Korçë, në 2015 anembanë vendit, në 2016 në Dibër, i dështimit për t’i dhënë vendit reformë zgjedhore si plotësimi i të gjitha kushteve për të hapur rrugën për zgjedhje të lira dhe të ndershme, vetëm përmes një qeverie teknike. Një qeverie të vullnetit të mirë që do të garantojë zgjedhje të lira dhe të ndershme. Duke zbatuar deri në fund ligjin për dekriminalizimin, duke ndërmarrë një aksion energjik dhe efektiv kundër narkokultivimit, narkotrafikimit dhe parave të pista të drogës që sipas tashmë gjithë mediave botërore kërcënojnë zgjedhjet në Shqipëri, dhe duke krijuar kushtet për zgjedhje të lira dhe të ndershme.

Pa dyshim duke i hapur kështu rrugë edhe zbatimit të reformës në drejtësi, sipas përcaktimeve kushtetuese të 22 korrikut për të cilën Partia Demokratike dhe opozita kanë dhënë kontribut dhe janë krenar për kwtw.

Pyetje: Çfarë ju tha znj.Mogherini?

Basha: Zonja Mogherini do të shprehet vetë. Unë nuk jam këtu të bëj zëdhënësin e saj, por mund t’ju them se kauza jonë, kauza e qytetarëve shqiptarë ka mirëkuptim dhe mbështetje totale nga të gjithë ata të cilët i kanë dashur dhe i duan të mirën Shqipërisë. Ata që na kanë shoqëruar në 26 vite tranzicion të vështirë e kuptojnë se Shqipëria me krimin e organizuar në pushtet dhe me problemin e jashtëzakonshëm të drogës nuk është një pacient me kollë që mund të shërohet me shurup, por është një pacient me kancer që ka nevojë për një operacion të thellë.

Ftesa ime është që faktorët e përgjegjshëm politikë të bashkohen në një pakt kombëtar për të kryer këtë operacion përmes një qeverie teknike e cila do t’i japë vendit zgjedhje të lira dhe të ndershme. Kjo është në të njëjtën kohë edhe e vetmja rrugëdalje. Çdo rrugë tjetër e çon vendin në humnerë, në sundimin e krimit të organizuar për një kohë të gjatë, duke dëmtuar nw palcë interesin kombëtar dhe jetët e të gjithë shqiptarëve në vendin tonë.

Pyetje: Z.Basha do të shkoni të hënën në Parlament në seancën për ngritjen e komisioneve të Vetingut?

Basha: Nuk ka dhe nuk për të pasur Parlament tjetër përveç Sheshit të Lirisë, deri në arritjen e një pakti kombëtar për zgjedhje të lira dhe të ndershme”.

Meta- Mogerini:Reforma në drejtësi të zbatohet sipas Kushtetutës, rrit besimin

Kryetari i Kuvendit Ilir Meta priti Përfaqësuesen e Lartë të Bashkimit Evropian për Politikën e Jashtme dhe Sigurinë, Federica Mogherini Meta shprehu mirënjohjen për mbështetjen e vazhdueshme të Bashkimit Evropian në avancimin e Shqipërisë drejt hapjes së bisedimeve për anëtarësim dhe në veçanti për asistencën e dhënë në kuadër të reformave kyçe.

Në këtë drejtim u theksua rëndësia e avancimit pa vonesa me zbatimin e reformimit të sistemit të drejtësisë në frymën e bashkëpunimit politik e institucional dhe në respekt të plotë të Kushtetutës së miratuar me konsensus.

Kreu i Kuvendit theksoi se “një reformë e bazuar në kushtetutë e rrit besueshmërinë e procesit dhe e përshpejton zbatimin më cilësor të saj” me qëllim që Shqipëria të ketë mundësi t’a luftojë më mirë korrupsionin, krimin e organizuar, trafiqet e paligjshme dhe për të krijuar një klime më të favorshme për investimet e huaja.

Gjatë takimit, Meta dhe Mogherini diskutuan gjithashtu edhe mbi zhvillimet e fundit në rajon duke ndarë bindjen e përbashkët se një Shqipëri e stabilizuar dhe konstruktive i shërben më mirë stabilitetit dhe bashkëpunimit rajonal.