Archives for March 2014

RAMUSH HARADINAJ: MISION I PAMBARUAR

March 31, 2014 by dgreca

Nga Ramiz LUSHAJ/1.Në historinë e botës ka familje që kanë nxjerrë lider epokal, ushtarak epope, po askund nuk gjen një të tillë sui generis: dera, kulla Hilmi Haradinaj i ka dhanë kombit tre gjeneralë të luftës të veçantë të Kosovës. Dy prej tyre heronj të lirisë, gjeneral Luan Haradinaj (6 maj 1997), gjeneral-kolonel Shkëlzen Haradinaj (19 prill 1999). Si emrat e tyre edhe vet jeta, betejat e rënia heroike.

Tjetri vlla, gjeneral Ramush Haradinaj, një legjendë e gjallë. Përndryshe, edhe “Kalorës i Lirisë”, si e çmon denjësisht një titull nderi dhanë këto ditë pranvere nga UAKSH. Ishte komandant i ZO të Rrafshit të Dukagjinit. Kreu detyrën e nënkomandantit të Trupave Mbrojtëse të Kosovës (TMK). Prej 29 prillit 2000 kalorës edhe i politikës: kryetar i partisë së re Aleanca për Ardhmërinë e Kosovës (AAK). Prej 3 dhjetorit 2005, mbi tre muaj, edhe kryeministër i Kosovës.Ky burrështetas panshqiptar, pas triumfalizmit ekselencial në Hagë, i nderuar nga Presidenti i Shqipërisë me Urdhrin e lartë “Gjergj Kastrioti – Skënderbeu”, po pegason në vizione e aksione të Rilindjes Kombëtare Moderne Shqiptare si një maratonamak kombëtar politik shqiptar i dy shekujve të fundit.

2.Deçani ka frymën e vet pellazgjike, si tokë etnike dardane në çdo kohë ka lind luftëtar e heronj yjetar në qiellin e historisë shqiptare të brezave.Kësaj ane, kah magjistralja e sotme Pejë-Gjakovë, legjendat flasin se trokoi heroi Gjergj Elez Alia me fustanellë e me kalin e bardhë të betejave. Në Grykën e Deçanit thonë se kanë luftue kreshnikët Muja e Halili të ramun nga pellget natyrore të Plavë-Gucisë shekuj ma herët se serbët e Nemanjasë të ngrinin mbi tokën e shqiptarit Hasi Kuçi e me projekt të protomjeshtrit katolik Vita i Kotorrit, mbi themele të kishës katolike të Gashit të Xërxës, manastirin ortodoks të Deçanit që sot UNMIK-ohet me 23 ha sipërfaqe kishtare. Hyu-t pellazgjik, Deçanit, edhe mbretër të Serbisë mesjetare si Stefan Uroshi III deshën me e marrë emrin për mbiemër përvetësor, pasi e ndjenin veten të vogël pa këtë madhështi dardane në brigje të Lumabardhit e lartësi alpine të Gjerovicës.

Heroi i Popullit Sulejman Vokshi, rrënjas nga visi i Vokshit të Deçanit, ka luftuar edhe në Preshevë e në Mitrovicë, si kundër sllavëve edhe otomanëve. Heroi i Popullit Isa Boletini (Maksutaj) i Mitrovicës ka djeplindje të tij Isniqin e Deçanit, po shkoi krah Ismail Qemalit në Vlorën e Flamurit të Pavarësisë, derisa vritet nga hjekësia e pushka malazeze në urën e Ribnicës në Podgoricë. Heroi i Popullit Asim Vokshi, i trungut vokshian, u vra për Spanjën në luftë internacionale. Luftëtari gjoks lufte Demë Ali Pozhari i Deçanit mori pjesë në beteja për mbrojtjen e Sanxhakut Shqiptar në Tregun e Ri dhe në Plavë-Guci po i përndjekur nga serbët u detyrua të emigrojë deri në Turqi.

Rrallëkush e din se kah fundmarsi 1998, pas Drenicës së Adem Jasharit, forca policore e (para)militare të Serbisë e mësynë përflakshëm e përgjakshëm kullën historike të Haradinjave në Gllogjan të Deçanit, ku hasën në një qëndresë luftarake krahinore. Gjatë luftimeve ballëpërballë plagoset randë gjeneral Ramush Haradinaj e, në ato kushte të vështira lufte në Rrafshin e Dukagjinit, shpëtoi mirësisht vetëm nga mjekime me ilaçe tradite, si pshere djathi, etj. Tevona, prapë, për herë të dytë, merr plagë nga plumba të ushtarëve rusë. Sllavët e stepave e të shkrepave e kanë në thep si luftëtar kombëtar. Ramush Haradinaj me plagë, pranga, hapa, vizione, pegason në luftë e paqe në historinë kombëtare e politike panshqiptare e më përnget si një Gjergj Elez Ali modern.

Në shek. XXI bota nuk ka askund tjetër si Ramush Haradinaj lider me plagë të luftës për liri e pavarësi që të jetë njëherash e kohëpaskohe: gjeneral lufte, lider i partisë parlamentare AAK, kryeministër përkohor i vendit të tij, të ketë shkuar në GjND në Hagë, të jetë me mision kariere politike të pambaruar, të hapur, për ardhmërinë e Kosovës, për bashkimin kombëtar.

3.Ramush Haradinaj në 8 vite emigrant kryesisht në Zvicër kontribuoi në (i)legalitet me sakrifica në përgaditjet për Luftën e Kosovës, të Maqedonisë e të Preshevës, sëbashku me Ali Ahmetin, Hashim Thaçin, e gjithata të tjerë të diasporës shqiptare.Ramush Haradinaj ishte nga ata strategë ushtarak që kur drejtonte e luftonte me UÇK-në në Rrafshin e Dukagjinit, në kohë “Betejën e Koshares”- në këtë “Termopile Shqiptare”, i kontribuoi thyerjes më 9 prill 1999, pas një gjysëm shekulli, të kufinit shqiptaro-shqiptar në mes Shqipërisë e Kosovës.Ramush Haradinaj me 8 vite qëndrestari e apologji në GjN në Hagë, pas dy burgosjeve e gjyqeve të gjata, me lirinë e pafajësinë e tij, u kthye në një tjetër fakt/or (ndër)kombëtar të çertifikimit të luftës të UÇK-së në Kosovë.Ramush Haradinaj ka plot një çerek shekulli veprimtari kombëtare politike kontributore meritore në Zvicër e Hagë, në Deçan e Prishtinë, në çdo vis të Kosovës, si edhe në gjithato vise të trojeve etnike shqiptare në Ballkan, në disa diaspora shqiptare në botë, saqë është kthye, si e portretizon saktë edhe ish-deputeti e presidenti i UAKSH, Azgan Haklaj, në një “De Gol Shqiptar”.

4. Ramush Haradinaj, tri herë gjeneral: në luftë, në Hagë, në politikë; është një politikan i formatit të madh (ndër)kombëtar.Kur ishte kryeministër me mandat të papërfunduar, kur shkoi në Hagë herën e parë dhe herën e dytë, kur u kthye në Kosovë, ka marrë gjithato vlerësime ndërkombëtare si nga ish ministra të jashtëm të Shteteve të Bashkuara të Amerikës, Madlen Ollbrajt, i Mbretërisë së Bashkuar të Britanisë së Madhe, Robin Kuk etj. Disa herë edhe ish senatori e tani Zëvendës President i ShBA, Joe Biden ka mbajt qëndrime të drejta për mirë ndaj Ramush Haradinaj, edhe kur u thirr në Hagë qyshse herën e parë, edhe kur u lirua i pafajshëm në bankën e nga dyert e saj.Një grup kryengritësish revolucionarë i “Aleanca Forca Demokratike” në Uganda e ka lyp “gjeneralin e politikës” Ramush Haradinaj në shkurt 2009 që të jetë ndërmjetës në bisedime ndërmjet tyre e Qeverisë Ugandase në Kampala. Gjithato qytete në Kosovë, Maqedoni, Shqipëri, etj. e kanë shpallë “Qytetar Nderi” të tyre si Kruja e Skënderbeut, Vlora e Ismail Qemalit, Tropoja e Sali Berishës, etj.

Ramush Haradinaj në qënien e tij, në vetëdijen e udhën e tij, ka një lumë “Lumabardh” e një mal “Gjerovicë”. Askush nuk mund ta ndalin të jetë një “lumabardh” i kohës, ashtu sikurse e vështirë ta pengojnë të bahet një “gjerovicë” apo një nga “gjerovicat” e Kosovës e të Kombit Shqiptar.

5.Ramush Haradinaj, i deçanas, kryetar i partisë Aleanca për Ardhmërinë e Kosovës dhe qytetar i lagjes “Arbëria” në Prishtinë, është nga ato personalitete kombëtare, nga ta burrështetas shqiptar, që qëndron vargni e lartësi tek germa “A” e Lirisë e Pavarësisë, zhvillimit e progresit të Kosovës së sotme.Lideri historik e biblik Ramush Haradinaj ka një mision të pambaruar: Vetëm 96 ditë ndejti kryeministër i Kosovës. Nuk e plotësoi as 100-ditëshin e parë të qeverisjes, “100 ditëshin Ruzveltian” të përcaktuar sipas presidentit amerikan Franklin D. Ruzvletit (Ruzvelti i LDB). Nuk ia mbrrini me e ba bilancin e mirë të punëve të tij si kryeministër. Nuk pati kohë e mundësi të na e baj publike ai vetë, sepse shkoi vullnetarisht në Hagë, në një mision tjetër për Kosovën e Kombin.

Ramush Haradinaj është një nga emblemat kombëtare, politike, ushtarake e shoqërore të Kosovës që në rrugëtimin e tij bashkëkohor burimon energji e vitalitet, prodhon ide, udhëheq veprime, ka plot vizione për të shkrue Alfabetin e tij politik deri tek germa “Zh”.

Ramush Haradinaj i pandalur nga plumbat e luftës me Sllavët e Jugut, i papenguar nga prangat e GJN në Hagë, ka asish e kësish që duan ta rrethatojnë tek germa “Z” në pamundësi reale e imagjinare për ta ndalë krejt, qoftë edhe në hapin e parafundit, para finales politike horizont hapur.

Kjo simbolika politike “Z” në historinë moderne shqiptare është “Zona Asnjanëse e Junikut”, e krijuar juridikisht me vendim të Konferencës së Ambasadorëve në Paris në nëntor 1921 si zonë ndarëse mes Shqipërisë Londineze e Mbretërisë Serbe-Kroate-Sllovene (MSKS). Kjo “Z.A.J” (që përfshinte 18 fshatra të Junikut, Deçanit, etj. në mes të cilëve edhe Gllogjani i Ramush Haradinajt). Kjo qëndroi si e tillë nën mbikqyrjen e Këshillit të Lidhjes së Kombeve deri në caktimin përfundimtar të kufirit në mes këtyre dy shteteve nga delegatë komisionierë të Anglisë, Francës, Italisë e Japonisë. Zona Asnjanëse e Junikut” ishte vis e vatër e mbi 2.000 atdhetarëve shqiptarë me prijës Hasan Prishtinën, Bajram Currin, Azem Galicën e të tjerë që kërkonin bashkimin kombëtar shqiptar, por në janar 1923, edhe nga diplomacia e Fuqive të Mëdha pushoi së ekzistuari e u aneksua nga Serbia.

A thue kësisoj, këso forme, po iu lypset Prishtinës zyrtare a ndokujt tjetër me e kantonue në një oaz politik në “Zonën Junik-Deçan” edhe gjeneralin e luftës e të paqes, të kombit e politikës, Ramush Haradinaj?! Iu duket kundërshtarëve se ia mbrrinë kësaj “fitoreje” ndaj tij në zgjedhjet lokale 2013 në Kosovë, ku u “rrudh” në vetëm dy komuna: Deçan e Junik, e me vende për këshilltarë të AAK në disa komuna të tjera. Mirëpo kjo i avitet “Fitores së Pirros”.

Ramush Haradinaj i ka thye disa herë kufijtë: e “theu” kufinin e Serbisë e shkoi në Zvicër (1990); e theu kufinin mes Shqipërisë e Kosovës në Koshare (9 prill 1999); e “theu” kufinin prangor të Hagës me pafajësinë e tij, e theu kufinin…me Preshevën, me Maqedoninë edhe përtej Marrëveshjes së Ohrit. Po e “thyen” kufirin me Malin e Zi në mënyrë institucionale shtetërore me hapjen e rrugës së munguar Deçan-Plavë. Në zgjedhjet e sivjetme Parlamentare në Kosovë Ramush Haradinaj me partinë e tij, me aleancat e tij, ka me e thye këtë kufi politik “Z” të përkohshëm të “Lokaleve, 2013”, si dikur në marsin 1998 të Gllogjanit, në pranverën 1999 të Deçanit, në dimrin e 3 dhjetorit 2005 të Prishtinës, në nëntorin 2012 të Hagës, e ka me mbrri deri tek germa Zh”…

“Lumabardhi” Ramush Haradinaj, apostull biblik i Kosovës e Kombit qyshse në Zvicër, Ante në rritje me plagët e luftës në trup, kreshniku “Gjergj Elez Alia” i kohës moderne, “Prometheu” i Hagës, “De Goli Shqiptar”, gjenerali i luftës e i paqes, i ka vargit “Gjerovicat” e veta. E pret Kosova në piedestale të reja, sepse ky njeri epope e epokal, i lartësive e vazhdimësive, tashma është kthye në Simbol, është Institucion më vete, ka emrin e mbiemrin e tij: “Ramush Haradinaj i Deçanit, i Kosovës, i Kombit”.

5-vjetori i anëtarësimit në NATO, Nishani letër falenderimi Presidentit Obama

March 31, 2014 by dgreca

Me rastin e 5-vjetorit të anëtarësimit të Shqipërisë në NATO, Presidenti i Republikës, Bujar Nishani, njëkohësisht Komandanti i Përgjithshëm i Forcave të Armatosura, i dërgoi sot një letër falenderimi Presidentit të Shteteve të Bashkuara të Amerikës, Barack Obama, ku i shpreh mirënjohjen për mbështetjen e palëkundur dhe besimin e madh që SHBA i dhanë dhe vazhdojnë të tregojnë ndaj vendit tonë.

“Me rastin e 5-vjetorit të anëtarësimit të Shqipërisë në Aleancën më të fuqishme politike dhe ushtarake të botës, dëshiroj që edhe në emër të popullit shqiptar t’Ju shpreh mirënjohjen e pakufishme për mbështetjen e palëkundur dhe besimin e madh që Shtetet e Bashkuara të Amerikës i dhanë dhe vazhdojnë të tregojnë ndaj vendit tim”, citohet letra drejtuar Presidentit amerikan.

“Shqipëria dhe Shtetet e Bashkuara jo vetëm gëzojnë një partneritet të pathyeshëm e të veçantë bazuar mbi marrëdhëniet historike të shkëlqyera dypalëshe, por ndajnë interesa të përbashkëta përsa i përket mbrojtjes dhe konsolidimit të parimeve të demokracisë, lirisë dhe respektimit të të drejtave të njeriut nëpërmjet operacioneve të përbashkëta anembanë rruzullit”, shkruan në letrën e tij Presidenti Nishani.

“Shqipëria dhe Forcat e saj të Armatosura, vijon Kreu i Shtetit, e kanë provuar tashmë veten se janë partnere krenare, aleate besnikë e të besueshëm të NATO-s. Në këtë përvjetor të anëtarësimit tonë, në cilësinë e Kryetarit të Shtetit shqiptar si dhe të Komandantit të Përgjithshëm dëshiroj t’ju siguroj mbi vazhdimësinë e përkushtimit të plotë të Shqipërisë ndaj paqes dhe sigurisë globale si dhe mbi rolin vendimtar të Shqipërisë për ruajtjen e qëndrueshmërisë në rajonin dikur aq të trazuar të Ballkanit”. Po sot, Presidenti Nishani i është drejtuar me një letër falenderimi edhe Sekretarit të Përgjithshëm të NATO-s, Anders Fogh Rasmussen, ku shpreh mirënjohjen e vendit tonë, për mbështetjen e palëkundur dhe besimin e madh që kjo organizatë i ka dhënë Forcave të Armatosura Shqiptare.

Shqipëria 5 vjet në NATO, mungon komandanti i pergjithshem, Presidenti Nishani

March 31, 2014 by dgreca

Kryeministri Rama: Pesha politike e Shqipërisë, më e fuqishme se kurrë/

Tiranë 31 Mars /ATSH-B.Kastrati/-Në 5-vjetorin e antarësimit të Shqipërisë në NATO, Kryeministri Edi Rama, duke folur në ceremoninë e rastit, e vlerësoi këtë hap ndër më të rëndësishmit në historinë e shtetit shqiptar, ndërsa shprehu mirënjohje për popullin dhe politikën shqiptare, të gjitha ato kombe dhe në mënyrë të veçantë për Shtetet e Bashkuara të Amerikës, që mbështetën vendin tonë të bëhet pjesë e aleancës më të fuqishme të njerëzimit.

Mirënjohjen ndaj NATO-s, Kryeministri Rama nuk e kufizoi vetëm me mbështetjen ndaj Shqipërisë për t’a bërë pjesë të saj, por sidomos me rolin që kjo organizatë ka luajtur për vendosjen e paqes në rajon.

“Mirënjohja ndaj NATO-s lidhet ngushtësisht edhe me rolin e asaj të madh në shuarjen e luftrave në Ballkan dhe posaçërisht në lirinë dhe pavarësinë e Kosovës. Pushimi i luftës, në rajon dhe liria e Kosovës mbeten kontribute pashlyeshme të Aleancës më të fuqishme në botë”, theksoi Rama. Siç u shpreh ai, të bërit pjesë të Shqipërisë në Aleancën Euroatlantike, ka ndikuar shumë pozitivisht të gjithë parametrat e zhvillimit të vendit.

“Ne tashmë e kemi bashkuar të ardhmen tonë me të ardhmen e popujve të lirë e të mëdhenj të cilët, cmimim e lirisë e kanë paguar dhe e paguajnë si çmimin e mirëqenies dhe sigurisë për të sotmen dhe gjeneratat që vijnë. Gjithashtu duke u integruar në Aleancën e madhe, Shqipëria është bërë pjesë e pandashme vlerave të larta të demokracisë lirisë dhe të drejtave njerëzore, ekonomisë së lirë dhe shtetit ligjor. Anëtarësimi në NATO e ka rritur si kurrë më pare rëndësinë dhe fuqinë politike të Shqipërisë si shtet, që tashmë është pjesë aktive e vendimmarrjeve më të rëndësishme për sigurinë në rrafshin global ”, tha Rama.
Më tej, Kreu i Ekzekutivit tha se Shqipëria është e angazhuar ligjërisht për të kontribuar edhe për mbrojtjen e integritetit dhe pavarësisë së çdo vendi aleat, ashtu sikundër mbrojtjes së paqes, lirive dhe të drejtave ku kjo Aleancë e sheh të nevojshme”.

Duke cituar Presidentin e SHBA-së Obama, i cili referuar ngjarjeve të fundit në Ukrainë u kujtoi të gjithëve se liria nuk është falas, Kryeministri shqiptar tha se “të gjithë duhet të jemi të gatshëm të paguajmë çmimin e lirisë sonë në çdo përmasë. Lirinë nuk mund ta kemi falas” tha ai, teksa kujtoi edhe kontributin e dëshmorit, Kapiten Feti Vogli, i cili humbi jetën në frontin e luftës kundër terrorizmit.

Ndërsa foli për forcimin e rolit të Shqipërisë në botë, në aspketin politik, ekonomik, ligjor etj, Rama tha se “hartimi i dokumentit të strategjisë së sigurisë kombëtare, reforma e thellë e institucioneve të sigurisë modernizimi i vazhdueshëm i policisë së shtetit janë sot prioritetet e dorës së parë dhe janë në rendin e ditës të punës tonë, për një Shqipëri europiane”.

Për Kryeministrin bota duhet të ketë prioritet sigurinë. “Çështja e sigurisë është cdo ditë në rendin e ditës. Turbullirat e rrezikshme në një vend si Ukraina, shkëputja e gadishullit të Krimesë nga Rusia, ndryshimi arbitrar i kufijve shtetërorë, demonstrojnë domethënien e madhe të përpjekjeve për siguri dhe nga ana tjetër të mungesës së sigurisë nëpër botë. Siguria nuk mund dhe nuk duhet të zbresë kurrë nga kreu i prioriteteve të botës, të kësaj Aleance të madhe dhe padyshim i një shteti që është pjesë e kësaj aleance”, theksoi Kryeministri Edi Rama

DIASPORE-Sa bukur tingëllon gjuha shqipe në dhe të huaj

March 31, 2014 by dgreca

Kjo për mua është një eksperiencë e madhe dhe një shembull i mirë se si duhet të punoj edhe komuniteti shqiptar në Greqi, tha Bardha Mance, udhëheqëse i programit në gjuhën shqipe në Radio International në Athinë.- U promovuan shtatë libra të krijuesve shqiptar në Suedi dhe u ndanë shpërblime për poezitë më të mira për vitin 2013/

Nga XHAVIT ÇITAKU/

Geteborg, 31 mars- Shoqata e Shkrimtarëve dhe Artistëve Shqiptar “ Papa Klementi i XI Albani” dhe QKSH “ Migjeni” organizuan në Boros të Suedisë manifestimin kulturor “ Sofra poetike”,në të cilën morën pjesë intelektualë, krijues, publicistë, gazetarë, mysafirë të ftuar dhe bashkatdhetarë të shumtë. Këtë manifestim e nisi mbarë moderatorja Saranda Iseni duke krijuar një atmosferë të gjallë e të këndshme, me një të folur të pastër të gjuhës shqipe, me një renditje të mrekullueshme të të gjitha pikave të përgatitura me këtë rast, me batuat e saja, befasitë dhe me recitimin e bukur të poezisë të Hysen Ibrahimit “ Engjulli i dashurisë”.

Puna konkrete dëshmon për rezultatet e arritura

-Këtë manifestim e shoh dhe e çmoj lart si një veprimtari e cila ka për qëllim që ta kultivojë e ruaj gjuhën dhe kulturën shqiptare në mërgim në këtë pjesë të botës. Njëkohësisht ky manifestim, kjo sofër, paraqet një inspirim, nxitje e shtytje për të gjithë ata që janë të prirur të merren me shkrime që ta gjejnë vetën këtu, të veprojnë kështu në formë të organizuar dhe nesër të krijojnë vlera e vepra më të mira letrare, artistike dhe kombëtare. Sofra poetike ka edhe karakter garues. Konsideroj se Shoqata e Shkrimtarëve dhe Qendra Kulturore “ Migjeni” meritojnë lëvdata për një punë të mrekullueshme që janë duke bërë këtu në mërgim me synimin e vetëm që në këtë mënyrë t’i shërbejnë rinisë sonë, popullit tonë dhe atdheut të cilin e duan aq shumë të gjithë këta poetë, shkrimtarë e veprimtarë, tha Fetah Bahtiri, anëtarë i Kryesisë së SHSHASH” Papa Klementi i XI Albani”, të Suedisë dhe Kryetar i Jurisë për ndarjen e shpërblimeve për krijimet më të mira poetike.

Edhe Hysen Ibrahimi, kryetar, foli me krenari për rezultatet e arritura të SHSHASH “ Papa Klementi i XI Albani” duke përmendur me këtë rast dhjetra tituj të veprave e librave të botuara nga krijuesit shqiptar në zhanre të ndryshme e sidomos puna e madhe që është bërë në botimin e librave “ Thesari Kombëtar 1 dhe 2” që flasin në mënyrë të dokumentuar për gjithë atë aktivitet të madh që është zhvilluar nga komuniteti shqiptar në Suedi në dobi të çështjes kombëtare. Permendi edhe një bashkëpunim të mirëfilltë që ka filluar ndërmjet Ministrisë së Diasporës dhe këtij asosacioni në drejtim të avancimit dhe të ndihmës që do të afrohet në organizimin e shumë aktiviteteve në dobi të komunitetit shqiptar këtu në Suedi. Ndërkaq, Sokol Demaku foli për sukese të mëdha që janë shënuar në QKSH” Migjeni” për të kulmuar me botimin e revistës së përmuajshme “ Dituria” të kanalit të radios e TV-së në gjuhën shqipe, në të cilat po bëhet i mundur një informim dhe një prezentim i shkëlqyer e kulturës, traditës, historisë e sidomos të ruajtjes e kultivimit të gjuhës shqipe.

Poezi që qonin peshë mallin për atdhe

Në vazhdim të programit të pasur të Sofrës poetike Hamit Gurguri, Bajram Muharremi, Remzi Basha, Saranda Iseni, Fetah Bahtiri, Nulla Zullufi,Lebibe Zogjani dhe Shaban Osmani recituan bukur krijimet e tyre, por edhe të të tjerëve, ku më së më shumti dominonin poezitë që shprehnin mallin që e ndien çdo mërgimtarë në vazhdimësi për vendlindjen. I këndohej aq bukur, me aq ndjenja, me aq mallëngjim natyrës, fshatit, kroit, lumit, livadhit, bregores,ditëve më të bukura të rinisë… Në këtë atmosferë të dhimbshme dhe mallëngjyese që u krijua me këtë rast,kishte edhe të tillë që derdhnin lotë se nëna Kosovë i thërriste përmes atyre vargjeve të kthehen, të qëndrojnë atje ku kanë lindë apo të paktën të vizitojnë me shpesh tokën arbërore që vuan për bijtë e bijat e saj që tashmë janë larguar në vende të ndryshme të botës. Vuajtja e madhe për atdheun Nulla Zullufin e bëri poet. “ Kurrë nuk me ka shkuar mendja të merrem me krijimtari letrare, por ja sot në praninë tuaj bashkatdhetarë të nderuar po e promovoj librin “ Malli për atdhe”. Shkas, pra, siç po e shihni edhe nga titulli i librit është malli i madh që ndiej për atdheun, malli që me merr ta shoh ,ta ndiej, ta puthi tokën shqiptare”, tha ai. Fjalë miradije për një aktivitet përmbajtësor që po zhvillon mërgata shqiptare në Suedi i tha edhe Valon Bajrami, gazetar i RTV21, i cili kishte ardhë për një vizitë në këtë vend skandinav.

U shfaq edhe një dokumentar i Karl Nordstrym që kishte të bënte me përzënien me dhunë të shqiptarëve nga trojet e tyre nga soldateska serbe gjatë luftës në Kosovë. Karl Nordstrym kishte një sipërfaqe të madhe pyjesh, dhe siç thotë, ato skena të tmerrshme nuk e linin të qetë të prente drunjtë në pyllin e tij. “ Sa herë që merrja sharrën motorike për të prerë një dru, me dilnin para sysh ata turma të mëdha njerëzish që ishin të detyruar të braktisnin vendin e tyre. I ndieja në shpirt vuajtjet e tyre, nuk me lënin të qetë ato klithmat e fëmijëve, lodhjet në rrugëtimin e gjatë këmbë në kodra e male… “ shkruante në vargjet e tij Nordstrym.

Paragjykimet për asimilimin e shqiptarëve nuk qëndrojnë

-Jam e entuziazmuar , e kënaqur, e emocionuar e mbi të gjitha më lënë përshtypje jashtëzakonisht të madhe ky mjedis i mbushur me këtë potencial të vlerave të mirëfillta krijuese. Ka pasur paragjykime se gradualisht mund të ndodh asimilimi i fëmijëve shqiptar, por me bindje të thellë mund t’iu them se kjo nuk qëndron dhe nuk do të ndodh kurrë me këtë potencial intelektual, me organizimin e mësimit plotësues në gjuhën shqipe, me organizimin e manifestimeve të shumta e të ndryshme, kulturore, letrare, sportive dhe me komunikim të përditshëm e vizita të shpeshta që i bëjmë vendlindjes, tha Bardha Mance, udhëheqëse e programit shqip në Radio International në Athinë të Greqisë. Ky manifestim i sotëm dhe këto vlera kaq të mëdha që po prezantohen sot janë një eksperiencë për mua dhe një shembull se si duhet të punoj edhe komuniteti shqiptar në Greqi, tha ndër të tjera ajo. Në vazhdim të këtij evenimenti u promovua libri i Fetah Bahtirit “ Kur i mbusha 70 vjet”, i Nuha Zullufit “ Malli për atdhe” Avdyl Ukës “ Loti mbeti në gjirmë të zemrës”, Hamit Gurgurit “ Vrragë pështerri” , i Remzi Bashës “ Zëri i Kosovës”, Bahtir Latifit “ Edhe ne jemi Bota” dhe libri “ Djali dhe tigri” nga Sokol Demaku, që është i dedikuar për nxënësit e klasës së katërt të shkollës fillore. Referuesit Bajram Muharremi, Fetah Bahtiri, Hysen Ibrahimi, Ismet Hasani, Rexhep Jashari, Saranda Iseni dhe Qibrije Hoxha vlerësuan lartë këta libra të këtyre krijuesve shqiptarë që janë edhe anëtarë të SHSHASH “ Papa Klementi i XI Albani” në Suedi. Ndërkaq, QKSH “ Migjeni” atyre ua ndau nga një libër të kristalt sikurse edhe Saranda Isenit, Hysen Ibrahimit me motivacion: ruajtja dhe kultivimi i gjuhës shqipe.

Ky manifestim letrar kishte edhe karakter garues dhe në të konkurruan 23 poetë me 90 poezi. SHSHASH “ Papa Klementi i XI Albani” çmimin e parë ia ndau poetit Brahim ( Ibish) Avdylit “ Zogu i nemur prej qiellit”, të dytin Lebibe Zogianit “ Këtë nuk ma the asnjëherë” dhe të tretin Milazim Kajtazit “ Dhimbje e mall”. Po ashtu, edhe QKSH “ Migjeni” ndau tri shpërblime. Poezia më e mirë u vlerësua se ishte ajo e Rizah Sheqirit “ Poet është vetëm Zemra”, e dyta e Vilheme Vranarit “ Rrënjet” që kishte konkurruar me shifrën WH44VL96, dhe e treta Yllka Sheqirit “ Vetmi”. U ndanë edhe shpërblime për poezinë më të mirë të vlerësuar nga publiku, të dashurisë, patriotike…

Legjenda: Pjesëmarrës të Sofrës poetike

Moore në Tiranë, takime me krerët e shtetit

March 31, 2014 by dgreca

Drejtori për Çështjet e Evropës Juglindore në Departamentin e Shtetit, Jonathan Moore, do të mbërrijë mbrëmjen e sotme në Tiranë për të marrë pjesë në konferencën e parë ndërkombëtare të organizuar nga “Albanian Policy Center” me temë “Bashkëpunimi transatlantik për paqen dhe sigurinë në Ballkan: Një axhendë e Shqipërisë për integrimin në BE dhe NATO”, në datën 2 prill.

Sipas organizatorëve, “kjo konferencë bëhet me rastin e 5-vjetorit të anëtarësimit të Shqipërisë në NATO dhe 5 vjetorit të ratifikimit të MSA-së. Konferenca do të trajtojë edhe çështjen e krijimit të një elite të re politike”.

Përveç z, Moore, në konferencë do të marrin pjesë edhe kreu i PD-së, Lulzim Basha, Edita Tahiri, Zevendeskryeministre e Kosoves, Teuta Arifi nga Maqedonia, si dhe deputetët Pandeli Majko, Majlinda Bregu, Arta Dade e shumë të tjerë, theksojnë organizatorët e Konferencës.

Ndërsa mësohet se z. Moore gjatë tri ditëve do të zhvillojë edhe takime me krerët më të lartë të vendit, Presidentin e Republikës, Bujar Nishani, Kryeministrin Edi Rama, Kryetarin e Kuvendit, Ilir Meta dhe kreun e PD-së, Lulzim Basha.