dgreca – Page 725 – Dielli

Vatra duhet të afrojë njerëz me mendësi të hapura duke mbetur një federatë aktive apartiake

February 16, 2020 by dgreca

Nga ERVIN DINE/*

Së pari, më lejoni t’Ju falenderoj të gjithëve si anëtarë të Vatrës, që ma besuat detyrën e një prej Nënkryetarëve të kësaj federate historike, e cila i ka ndjekur me vëmendje dhe shqetësim gjithë zhvillimet e shtetit shqiptar dhe të krejt shqiptarëve, prej formimit të tij e deri në ditët e sotme. Prandaj edhe zgjedhjen time e konsideroj më tepër një përgjegjësi, të cilën do të përpiqem ta justifikoj me gjithë energjitë e mia.

Gjej rast ta uroj Kryetarin e ri të z. Berisha, për zgjedhjen e tij në krye të Vatrës dhe të besoj që angazhimi i tij të jetë një kapitulli të ri në jetën dhe aktivitetet e kësaj federate. Sigurisht do të falenderoj edhe kryetarin paraardhës, z. Mishto, për të gjitha përpjekjet e tij për të sjellë një model të ri komunikimi, si në trajtimin e problemeve edhe në afrimin e figurave të reja, një prej të cilëve jam edhe unë. Meriton të vlerësohet e të respektohet edhe vatrani i njohur, i zgjedhur President Nderi i Vatrës, zoti Rexhaj, i cili ndihmoi në mbarvajtjen e Kuvendit duke u hapur rrugë afrimit të njerëzve më aktivë në drejtimin e saj.

Prej vitesh e kam ndjekur nga afër, e më pas jam angazhuar seriozisht në aktivitetet e Vatrës. Sot mendoj se të gjithë duhet të udhëhiqemi nga figurat më me emër të saj si: Noli, Konica, Tromara, Pipa e plot të tjerë, dhe të japim më të mirën tonë, si në mbarëvajtjen e saj edhe në rritjen e nivelit të përfaqësimit.

Mendoj se Vatra duhet ta ketë qëllim të saj t’i afrojë të rinjtë dhe idetë e reja. Ajo duhet ta ketë prioritetet të saj gratë, intelektualët e figurat e suksesshme në këtë vend të mundësive për të gjithë.

Sa i përket metropolit të Neë Yorkut, ku ndodhet edhe përqëndrimi më i madh i shqiptarëve në Amerikë, mendoj se hapja e pesë degëve në këto qendra të mëdha si: Quins, Bronx, Broklyn, Manhattan dhe Staten Island, do t’i japë më shumë frymëmarrje dhe dinamikë aktivitete të saj.

Simbas mendimit tim, duhet të ngremë nivelin e aktiviteteve tona, të angazhojmë më shumë forca krijuese, dhe të veprojmë simbas një programi vjetor dhe mujor aktivitetesh, i cili duhet të jetë i detajuar dhe i ndjekur me rigorozitet.

Vatra duhet të afrojë njerëz me mendësi të hapura duke mbetur një federatë aktive apartiake, që do të komunikimin me gjithë shoqatat e tjera shqiptare, dhe asnjë herë s’do të heqë dorë nga mbrojtja e kauzave politike të drejta; të luftojë për të drejtat e shqiptarëve kudo që ata të jetojnë; të mbrojë lirinë dhe demokracinë; të kontribuojë me gjithë energjitë e saj për çeshtjen kombëtarë; të mospajtohet me fallsifikimin e historisë kombëtare dhe të jetë në ballë si të dënimit të krimeve të diktaturës komuniste edhe masakrave ende të pazbardhura në Kosovë.

Duhet të angazhohet brezi i ri i Vatrës në kompiuterizimin dhe dixhitalizimin e historisë së kësaj federate dhe gazetës së saj Dielli. Ajo të jetë më aktive në rrjetet sociale, si në komunikimin e aktiviteteve edhe në propagandimin e tyre. Për realizimin e këtij synimi, duhet të ngrihet një grup pune. Për këtë gjë do të flasë me gjerë z. Agustin Mirakaj.

E quaj mjaft me vlerë takimin e paradisaditëve me Departamentin ASH, dhe duhet të luftojë bashkarisht që të rrisim si cilësinë edhe sasinë e këtyre takimeve, duke luftuar që ta rrisim sferën e ndikimit në institucionet amerikane.

Nisur nga fakti që në zgjedhjet e fundit u zgjerua Këshilli i Vatrës me 72 anëtarë, të cilët së bashku me kryesinë dhe drejtuesit e saj prej 17 anëtarësh, afrojnë një shifër rreth 100 vetësh, na duhet të mendojmë seriozisht se ka ardhur koha që mbledhjet më të rëndësishme të bëhen në ambiente më të përshtatëshme, ku t’i krijohet mundësia dhe lehtësia e qëndrimit çdo pjesëmarrësi.

Në këtë fjalë timen, më lejoni të falenderoj edhe Degën e Vatrës së Michiganit me z. Grizhaj dhe Rakaj, për kontributin për organizimin me sukses të Kuvendit të fundit, pa harruar edhe z. Greca, editorin e Diellit, pikërisht sot në përvjetorin e 111 të numrit të parë, të kësaj gazete legjendë.

Në përfundim mund të them që s’duhet të harxhojmë shumë energji duke u marrë me veten, sepse do të lemë shumë prej angazhimeve tona pa realizuar. Unë besoj te fryma e tolerancës, mirëbesimit dhe kontribuimit të secilit prej nesh… prandaj po e mbyll fjalën time me një frazë të artë të Sami Frashërit që thotë: “Bashkimi i bën të mundëshme gjërat e pamundura, përçarja e bën të mundshmen të pamundur!”

Ju falenderoj për durimin tuaj!

* Diskutim në Këshillin e Vatrës, 15 Shkurt 2020

Diaspora nuk është vitrinë ku qeveritarët të bëjnë makiazhin e rradhës

February 16, 2020 by dgreca

https://gazetadielli.com/wp-admin/edit.php

-Diaspora dhe në veçanti Vatra,do jenë pasqyrë ku qeveritarët të shohin rrudhat në ballin e kombit,pasqyrë ku të shohin thinjat e Atdheut që çdo ditë plaket se rinia po e kërkon të ardhmen larg vendlindjes.Vatra gjithnjë do denoncojë dhe protestojë,sa herë të mos bëhen zgjedhje të lira e të ndershme,sa herë të bëhen zgjedhje të tipit monist/

– Ne, vatranet nuk refuzojmë askënd që don të komunikojë me ne,po ne ruajmë të drejtën për të qenë bashkëbisedues kritikë,ndaj kudo që ne gjykojmë se nuk po benë më të mirën për vendin.Ne japim respekt,po kërkojmë edhe nga zyrtarët respekt.Ne nuk mund të konsiderojmë si zhvillime pozitive kuvende të gjoja disporës,nuk mund të konsiderojmë pozitive krijimin e të ashtuqujturës K.K.D…/

Nga Lek MIRAKAJ*/

Së pari i uroj kryetarit dhe kryesisë,suksese dhe punë të mbarë.Do përpiqem të flas shkurt.E para çështje që do prek,është çështja e kanunores(Kushtetutës së Vatrës).Të parët na kanë lënë një thesar të shkëlqyer,që në themel të saj ka frymën e atdhedashurisë.Në kuvend u fol për disa ndryshime gjuhësore.Po nëse kanunorja ka ndonjë vlerë është edhe gjuha e përdorur,nëse ka fjalë arkaike,mund ti bëhet një fjalor sqarues në fund të botimit.Të ndërrosh gjuhën është njësoj si të thuash ,se “Meshari” i Gjon Buzukut duhet korrigju se gjuha e përdorur ,tashmë është e tejkaluar.Kemi një kanunore që themeluesit e veshën me arë,mos na e vishni me xhinse.Plotësojeni me amendamente që të ligjërojnë praktika,që tashmë i hasim në aktivitetin e përditëshme.

E dyta çështje që do të prek ,është çështja e pozicionimit të Vatrës.Vatra ka qenë dhe do mbetet antikomuniste,mund të diskutojmë përse,po nuk dua t’ju marr kohën.Diasporat janë shprehje e pakënaqësive të shtresave të gjëra të popullatës ,që për një aresye a tjetër janë larguar,ose më e saktë do ishte,janë përzënë nga vendlindja,për aresye të ndryshme,politike,ekonomike,për arësye se qeveritarët në përgjithësi, ua kanë bërë të pamundur jetesën.Vatra është shprehja më cilësore e të gjitha dëshirave dhe përpjekjeve për ta bërë të ardhmen e atdheut sa më të mirë. Si e tillë ne do përkrahim zhvillimet pozitive në Atdhe,por do jemi një zë i fuqishëm kritik ndaj zhvillimeve negative në Atdhe. Dhe me Atdhe kuptoj gjithë hapsirën shqiptare,që nga Presheva në Çamëri dhe kudo ku flitet gjuha e bukur shqipe,ku bukës i thonë bukë e nanës i thonë nanë. Ne nuk refuzojmë askënd që don të komunikojë me ne,po ne ruajmë të drejtën për të qenë bashkëbisedues kritikë,ndaj kudo që ne gjykojmë se nuk po benë më të mirën për vendin.Ne japim respekt,po kërkojmë edhe nga zyrtarët respekt.Ne nuk mund të konsiderojmë si zhvillime pozitive kuvende të gjoja disporës,nuk mund të konsiderojmë pozitive krijimin e të ashtuqujturës K.K.D…

Diaspora nuk është vitrinë ku qeveritarët të bëjnë makiazhin e rradhës,diaspora dhe në veçanti Vatra,do jenë pasqyrë ku qeveritarët të shohin rrudhat në ballin e kombit,pasqyrë ku të shohin thinjat e Atdheut që çdo ditë plaket se rinia po e kërkon të ardhmen larg vendlindjes.Vatra gjithnjë do denoncojë dhe protestojë,sa herë të mos bëhen zgjedhje të lira e të ndershme,sa herë të bëhen zgjedhje të tipit monist,do denoncojë faktin që nuk kemi organe të drejtësisë,që nuk kemi parlament,që nuk kemi një shtyp të lirë e të pavarur,do protestojë për sa kohë gjithë pushtet të jenë të përqëndruara në dorën e kryeministrit.Vatra është e hapur për të gjithë ata që duan të kontribojnë,po duhet të jetë e qartë për të gjithë se Vatra ka 28 Nëndorin festë kombëtare dhe 29 Nëndorin e konsideron si ditën e parë të pushtimit komunist shqipëfoles,pasojat negative të cilit i vuajmë edhe sot.Për dy vjet e gjysëm kam punuar dhe mbështetur kryetarin z.Mishto sepse mendoj se ai punoi si vatran dhe antikomunist,po ashtu do mbështes dhe punoj edhe me kryetarin e ri Z.Berisha.Suksese dhe punë të mbarë!

* Diskutimi në Këshillin e Vatrës, 15 Shkurt 2020

URIM I KORRESPONDENTIT TE DIELLIT NGA PRISHTINA PER PERVJETORIN E 111

February 16, 2020 by dgreca

URIM NGA KOSOVA: GAZETA DIELLI PËRVJETOR ME TRE NJËSHA – NUMRI 1 I GAZETARISË SHQIPTARE NË BOTË/

Gazeta DIELLI, Organ i Federates Pan-Shqiptare të Amerikës VATRA

Diell drite e ngrohtësie i Vatres Shqiptare në Amerikë të pashuar më shumë se një shekull dhe gjithmonë, Shumë urime për 111 vjetorin!

Përvjetor simbolik, me tre njësha-111- VJET

Numri një i gazetarisë shqiptare – më e hershmja gazetë shqipe në botë

E njoha nga historia e kombit dhe shtypit shqiptar

Jam i nderuar që gjatë shumë viteve merrte e botonte shkrime të miat nga media shqiptare

E në Ditën e Lirisë së Kosovës – në 12 Qershor 2015 nisa t’i shkruajë si korrespondent në Kosovë dhe do i shkruajë…

Me shumë respekt e vlerësim

Për gazetën DIELLI të themeluar nga personalitetet e shquara të kombit Fan Noli e Faik Konica

Për të gjithë shqiptarët në Amerikë që aq shumë kontribuan për Shqipërinë e Kosovën dhe të gjitha trojet tjera etnike…

E që vazhdojnë me mbështetjen e madhe

Lidhjen

Afrinë e dashurinë e përjetëshme

Falënderime e mirënjohje të përgjithëmonëshme

Uroj Kryetarin e VATRËS Elmi Berisha

Kryesinë

Këshillin

Dhe të gjithë VATRANËT

Shqiptarët në Amerikë…

Urime… Si edhe në 110 vjetor, në këtë kartolinë urimi në foto Agim Rexhaj, atëherë Nënkryetar e tani President Nderi i VATRËS, organi i saj Gazeta DIELLI dhe korrespondenti në Prishtinë në qendër të kryeqytetit të Kosovës shtet që pas dy ditësh feston 12 vjetorin e shpalljes së Pavarësisë në 17 Shkurtin historik 2008.

Urime dhe falënderime e vlerësime Editorit të DIELLIT, Dalip Greca dhe të gjithë bashkëpunëtorëve e lexuesëve të gazetës sonë.

Urojmë nga Kosova që në 2020-tën ka edhe festën e 21 vjetorit të Lirisë – të hyrjes në Qershorin 1999 të NATO-s, forcës më të madhe planetare, prirë nga Shtetet e Bashkuara të Amerikës.

Me shumë respekt,

Behlul Jashari

Gazetar-korrespondent i Gazetës DIELLI, i akredituar në Kosovë

Prishtinë, 15 Shkurt 2020

U FESTUA PËRVJETORI i 111-të I GAZETËS DIELLI

February 16, 2020 by dgreca

Sot ishte festa e Gazetës më të vjetër të botës shqiptare-Diellit të Vatrës, gazetës që ende botohet në Nju Jork, SHBA. Urime të shumta ka marrë redaksia e Diellit nga të Trojet Etnike dhe nga ,mërgimtarët, kloegët dhe redaksitë e mediave. Pas mbledhjes së Këshillt dhe Kryesisë së Vatrës, u organizua në Regency Hotel një drekë, kushtuar këtij përvjetori. Për festën e Diellit ka përshëndetur Kryetari Elmi Berisha, Presidenti i nderit të Vatrës Agim Rexhaj, nënkryetari Alfons Grishaj dhe shumë të tjerë. Kryeredaktori i gazetës Dielli, Dalip Greca, përcolli në një atmosferë duartrokitjesh mesazhin e e ngrohtë për Diellin, dërguar nga Shkrimtari Visar Zhiti.
Faleminderit të gjithë atyre që na uruan dhe u bënë pjesë të këtij përvjetorit historik.

Ambasadorja Floreta Faber Uroi Kryetarin e Vatrës

February 16, 2020 by dgreca

Paraditen e së Shtunës, 15 Shkurt 2020, ambasadorja e Shqipërisë në Washington zonja Floreta Faber vizitoi selinë e Federatës Pan Shqiptare të Amerikës VATRA dhe uroi Kryetarin e ri të zgjedhur nga Kuvendi i 19 Janarit në Michigan, z. Elmi Berisha .Fillimisht ambasadorja informoi për veprimtarinë e ambasadës në Shtetet e Bashkuara të Amerikës, për kontaktetet e saj me komunitetin shqiptar në më shumë se 30 shtete të Amerikës ,takimet dhe me të rinjtë,foli për bashkëpunimin me ambasadën e Republikës së Kosovës etj. Ambasadorja ka përcjellë edhe urimin për 111 vjetorin e gazetës Dielli. Me mbërritjen e saj në shtëpinë e Vatrës, ambasadorja Floreta Faber u prit fillimisht nga Nën-Kryetari i Vatrës, z. Alfons Grishaj dhe vatranë të tjerë të ardhur për mbledhjen e Këshillit të Vatrës. Zoti Alfons Grishaj e filloi fjalën e tij duke i kërkuar shpjegim ambasadores Faber për mospjesëmarrjen e saj në Kuvendin e Vatrës mbas ftesës që i ishte dërguar. Ai vazhdoi se komuniteti shqiptar i Michiganit me rreth 200 000 shqiptarë kërkon më shumë vëmendje jo vetëm nga ambasada por edhe nga vetë shteti shqiptar. Më pas Ai u ndal tek Kuvendi i Vatrës së datës 19 Janar. Ky Kuvend tha z.Grishaj I organizuar nga dega e Vatrës së Michiganit, ishte model dhe I suksesshëm për nga organizimi po ashtu me arritjen e qëllimeve të tij. Pjesëmarrja e lartë, bashkëpunimi konstruktiv dhe zgjedhja e Kryetrit të Vatrës dhe Presidentit të Ri të Vatrës, treguan nivelin e lartë të emancipimit të Vatrës. Z. Grishaj theksoi se Vatra doli më e fortë ng ky Kuvend, në gjirin e saj janë mbledhur bijtë e familjeve më të mira patriotike dhe nacionaliste shqiptare nga Shqipëria, Dardania dhe Maqedonia në USA dhe se Vatra është në ditët e saj më të mira. Ai theksoi se Vatra nuk do të futet nën ombrellën e asnjë shoqate apo grupimi tjetër pasi vatra është një Federatë pan-Shqiptare, është një institucion kombëtar, ashtu sic është Kisha dhe Xhamia, e Teqeja, ku rriten dhe edukohen brezat. Ai tha se Vatra do të punojë fort që të gjitha shoqatat e tjera në Amerikë të mblidhen nën ombrellën e Vatrës. Vatra do të arrijë në atë nivel sa do të jetë e aftë që t’u kërkojë llogari qeverive shqiptare në Tiranë dhe Prishtinë dhe funksioni i saj do të jetë si një qeveri në hije e shqiptarëve. Z. Grishaj shprehi po ashtu edhe pakënaqësinë me qeverinë aktuale shqiptare, e cila bashkëpunimin me diasporën e bën në mënyrë selective, duke ofruar një pjesë dhe duke lënë jashtë vëmendjes pjesën tjetër.

Me pas Presidenti i nderit i Federatës Vatra Agim Rexhaj, i cili i tha asaj se Vatra qëndron mbi partitë politike dhe se do të respektojë vullnetin e votuesëve në Shqipëri e Kosovë, por Vatra kërkon respektim të votës së Lirë; është kundër manipulimit dhe shitblerjes së votës dhe u bën thirrje qeverive shqiptare që të përmirësojnë qeverisjen, të luftojnë korrupsionin dhe të rrisin mirëqenien e qytetarëve me qëllim që të ndalet migrimi masiv i shqiptarëve që po zbrazin trojet amtare.
Kryetari i Vatrës ka mirëpritur urimet e ambasadores dhe ka premtuar se nën mandatin e tij Vatra do të ngrihet në lartësinë e shekullit XXI dhe do t’i ndihmojë Kombit në zgjidhjen e problemeve kombëtare dhe se do të jetë një zë i fuqishëm edhe në Washington.

. Biseda me znj. Faber vazhdoi në formë debati. Ambasadorja theksoi ndër të tjera se e kishte marrë ftesën por shkak të ngarkesës së punës në ato ditë dhe impenjimeve të tjera nuk kishte arritur të merrte pjesë në Kuvendin e Vatrës. Ajo tha se kishte qenë disa herë në Michigan dhe se komuniteti I Michiganit do të jetë në vëmendjen e saj.

Z. Valentin Lumaj iu drejtua ambasadores Faber me tre pyetje:

1- Meqenëse Ambasada Shqiptare dhe Vatra kanë misione të ngjashme në mbrojtjen e çështjeve shqiptare në Amerikë, a ka në planin e saj ambasadorja bashkëpunimin me Vatrën në ato pika të përbashkëta dhe çështje konkrete shqiptare.

2- Si e shpjegoni klimën e miqësisë së Kryeministrit shqiptar me Serbinë dhe klimën e konfliktit me shtetarët e Kosovës?

3- A keni kontakte me komunitetin shqiptar në Chicago, mbasi një numër I madh shqiptarësh jetojnë atje dhe themelimit të një Katedre të Albanologjisë në Universitetin De Pol nga professor Gazmend Kapllani?

Pyetjes së parë Ambasadorja iu përgjigj gjatë dukë thënë ndër të tjera se Vatra dhe ambasada duhet të bashkëpunojnë për çështjet shqiptare, ndërsa refuzoi që ti përgjigjet pyetjes së dytë në lidhje me kryeministrin me arsyetimin se nuk dëshiron t’u përgjigjet pyetjeve politike. Megjithatë theksojmë se kjo pyetje nuk kishte të bënte me politiken por ishte për një çështje kombëtare.

Në lidhje me Shqiptarët në Chicago, ajo tha se kishte komunikim të vazhdueshëm, dhe se disa shoqata atdhetare në Chicago janë mbledhur duke krijuar një grup të posacem si ombrelle për të gjitha shoqatat që veprojnë atje. Ne u interesuam me miqtë tanë në Chicago dhe ata konfirmuan që nuk ka asnjë mbledhje shoqatash apo krijimin e një ombrelle për shoqatat atje. Në lidhje me Katedrën e Albanologjisë ajo tha se ishte e informuar dhe këtë vepër ia atribuoi fondeve të posaçme të trashëguara nga një shqiptaro-amerikan për këtë qëllim pa dhënë ndonjë vlerësim për punën e palodhur të Dr. Gazmend Kapllani për krijimin e kësaj Katedre.