PRISHTINË, 14 Maj 2016/ Dy parti opozitare, AAK e Nisma, kanë ftuar për sot pasdite në Prishtinë protestë paqësore  që “do të jetë më e madhja që është mbajtur në Kosovë”. Në protestat e opozitës kundër qeverisë, kur organizatore ishte edhe Vetëvendosje, së fundi më e madhja ishte në 17 shkurt me 100 mijë pjesëmarrës sipas organizatorëve e rreth 15 mijë sipas Policisë së Kosovës.

Është paralajmëruar se protesta do nis në ora 14:00 me një marsh nga Biblioteka Kombëtare drejt Sheshit Skenderbej, para ndërtesës kryesore të qeverisë kosovare.

 Për t’i harmonizuar veprimet për mbarëvajtjen e protestës së sotme në Prishtinë organizatorët kanë zhvilluar dje  takim me Policinë e Kosovës.

“Duke u nisur nga fakti se protesta është shumë e madhe, dhe drejt Prishtinës do të nisen mijëra automjete organizatorët kanë kërkuar mbështetjën e Policisë, që qarkullimi tyre të jetë i papenguar dhe maksimalisht i lehtësuar”, theksonte njoftimi i opozitës.

Policia nga ana e saj, sipas AAK-së, është treguar e gatshme që të ndërmarrë krejt çka është e nevojshme, që protesta të përmbyllët e qetë, çka është edhe përcaktim i organizatorëve të saj.

Në 8 prill  bëhej e ditur se, pas konsultave të njëpasnjëshme që nga anulimi i protestës së opozitës së bashkuar që e përbënin tre subjekte, përfshirë Vetëvendosjen, e paraparë që të mbahej me 26 mars, AAK ka marrë vendim për mbajtjen e një proteste gjithpopullore në 14 maj.

“Një vendim i tillë është marrë pas diskutimeve me të gjitha forumet e AAK-së dhe një përcaktimi të palëkundur, që të vazhdohet me kundërshtimin e kapjes së shtetit”, thuhej në njoftim.

Paralajmërohej se, AAK do të konsultohet edhe me partitë tjera opozitare dhe me shoqërinë civile  e me grupet e interesuara, në mënyrë që protesta të jetë sa më e fuqishme./b.j/  Foto Gazeta Dielli – Behlul Jashari/