-B.Jashari/Ambasadori i Republikës së Shqipërisë në Kosovë, Qemal Minxhozi, ishte dje në Gjakovë, ku së bashku me  ministrin Kosovar të Zhvillimit Ekonomik, Blerand Stavileci, u prit nga kryetarja e komunës Mimoza Kusari dhe më pas vizituan Fabrikën për pasurimin e kromit Deva.

“Potenciali minerar që ka Republika e Kosovës nuk është shfrytëzuar në kapacitet që ka, andaj qeveria do të shqyrtojë të gjitha mundësitë që të krijojë kushte më të favorshme për kompanitë e sektorit minerar me qëllim të shfrytëzimit të këtyre resurseve dhe krijimin e vendeve të reja të punës”, tha ministri Stavileci.

Kusari-Lila tha se vizita ka për qëllim vlerësimin e mundësive të rritjes se kapaciteteve për miniera. “Ne jemi të interesuar të shohim cilat janë mundësitë për hapjen e minierave të mëhershme në komunën e Gjakovës dhe për bashkëpunimin me Shqipërinë”, tha ajo.

Ambasadori shqiptar Minxhozi vlerësoi se e rëndësishme është që të prodhohet e bashkëpunohet, që të rritet efektivitetit i kësaj fabrike, e cila ka një treg te sigurt në perëndim dhe ka krijuar një emër të mirë. “Duhet të rritet bashkëpunimi në një shkallë më të lartë me Shqipërinë”, theksoi ai.

Bukurosh Koçi drejtor i Fabrikës së kromit Deva u shpreh i bindur se qeveria do të ndihmojë në krijimin e qasjes më të lehtë në lëndën e parë në Shqipëri si dhe të hulumtohen rezervat e kromit në Kosovë duke shtuar kështu numrin e punëtorëve me krijimin e minierave të tilla.