Politike – Page 462 – Dielli

SEKRETARI AMERIKAN I SHTETIT MICHAEL POMPEO THEKSON RËNDËSINË E LIDHJEVE TRANSATLANTIKE

September 26, 2018 by dgreca

2-Frank-shkreli-2-300x183-1-1

Nga Frank Shkreli/

Në kuadër të mbledhjes së 73-të të Asamblesë së Përgjithshme të Organizatës së Kombeve të Bashkuara (OKB), që po mbahet në Nju Jork, Sekretari Amerikan i Shtetit, Michael Pompeo shtroi Darkën tradicionale të Transatlantikut në Hotelin Palace në qytetin e Nju Jorkut.

Është ky një takim i rastit për kolegë dhe miqë, përfaqsues të Bashkimit Evropian dhe të vendeve anëtare të NATO-s, për të bashkbiseduar, pa praninë e përfaqsuesve të medies, mbi çështje me rëndësi të interesit të përbashkët, por edhe për çështje që mund të shqetësojnë vendet individuale, e që njëkohsisht janë të rëndësishme edhe për Bashkimin Evropian dhe për Aleancën e Atlantikut, NATO.

Sipas një deklarate që lëshoi mbrëmë për mediet zëdhënsja e Departamentit Amerikan të Shtetit, (DASH) Heather Nauert, Sekretari Amerikan i Shtetit, Michael Pompeo më 25 shtator shtroi darkën e 18-të tradicionale të radhës për Sekretarin e Përgjithshëm të NATO-s, Jens Stoltenberg, Përfaqsuesen e lartë të Bashkimit Evropian për Punë të Jashtme dhe për Politikën e Sigurisë dhe Zëvëndës-Presidente e komisionit Evropian, Federica Mogherinin dhe për 40-ministra të punëve të jashtme dhe zyrtarë të tjerë të lartë nga Evropa dhe Kanadaja. Në këtë darkë mori pjesë gjithashtu edhe Ministri i Punëve të Jashtme të Shqipërisë, Ditmir Bushati.

Sipas zëdhënses së DASH, Sekretari Pompeo në darkën e shtruar për nder të miqëve të ngushtë dhe përfqsuesve të vendeve aleate të Shteteve të Bashkuara, theksoi rëndësinë e marrëdhënieve të ngushta transatlantike midis Shteteve të Bashkuara dhe Evropës, që sipas tij janë marrëdhënie të pa zëvendsueshme për sigurinë dhe begatinë tonë të përbashkët, të më shumë se një miliardë njerëzve në dy kontinentet tona.

Në deklaratën e zëdhënses së Departamentit Amerikan të Shtetit thuhet se, Kryediplomati amerikan nënvijoi rëndësinë e marrëdhënieve tregëtare të barabarta, reciproke dhe të lira duke theksuar gjithashtu edhe sigurinë energjetike në Evropë. Ai foli gjithashtu, sipas zëdhënses edhe për vazhdimin e punës me NATO-n dhe me Bashkimin Evropian, me qëllim të fuqizimit të aftësive mbrojtëse të Evropës dhe të shtimit të investimeve evropiane në fushën e mbrojtjes.

Mbi të gjitha Sekretari Amerikan i Shtetit Pompeo – në fjalën e tij para diplomatëve të vendeve aleate të Amerikës, bëri thirrje që Shtetet e Bashkuara, Evropa dhe Kanadaja të vazhdojnë të punojnë së bashku kundër agresionit të Rusisë në të gjitha format e tija, të veprojnë së bashku për të mundur ISIS-in dhe për të siguruar paqën në Irak dhe në Siri. Kryediplomati amerikan u bëri thirrje të gjitha vendeve që t’u bashkohen përpjekjeve amerikane për të ndaluar veprimtaritë e vazhdueshme shkatërruese të regjimit iranian, anë e mbanë botës dhe për të siguruar çnuklearizimin e plotë dhe përfundimtar të Koresë së Veriut.

Përveç këtyre çështjeve me rëndësi për marrëdhëniet transatlantike që shpalosi Z. Pompeo para përfaqsuesve të vendeve aleate të Amerikës gjatë darkës së 18-të tradicionale transatlantike të marten mbrëma në Nju Jork, agjenda e Shteteve të Bashkuara për sesionin e 73-të të Asamblesë së Përgjithshme të Kombeve të Bashkuara, përfshinë edhe çështje të tjera të interesit për Shtetet e Bashkuara. Këto, sipas Kevin E. Miller, Ndihmës Sekretarit Amerikan të Shtetit në Byronë e Punëve të Organizatave Ndërkombëtare, përfshijnë pesë prioritete të politikës së jashtme amerikane: mos-përhapja e armëve bërthamore, ndihmat humanitare dhe siguria e furnizimit të ushqimeve në botë, paqa dhe sigurimi, masat kundër terrorizmit dhe reforma e vet Organizatës së Kombeve të Bashkuara. Ai është shprehur se rreziqet në rritje e sipër ndaj vlerave më themelore të Amerikës dhe ndaj parimeve bazë të Organizatës së Kombeve të Bashkuara përfshijnë terrorizmin, shkeljet flagrante të drejtave të njeriut, fatkeqësitë natyrore dhe regjimet despotike që kërcënojnë demokracitë e mirëfillta dhe sovranitetin kombëtar të shteteve.

Ndihmës Sekretari Amerikan i Shtetit në Byronë e Punëve të Organizatave Ndërkombëtare theksoi se një ndër prioritetet e politikës amerikane në sesionin e 73-të të Asamablesë së Përgjithshme të OKB-së, është reforma domethënse dhe e përhershme e kësaj organizate, ndërkohë që citoi ambasadoren amerikane pranë OKB-së, Nikki Haley se, “Bota ka nevojë për një OKB të disiplinuar, efikase, llogaridhënse dhe e përqendruar në rezultate.”

Sesioni vjetor i Asamblesë së Përgjithshme të Kombeve të Bashkuara, ashtu si çdo vjet edhe sivjet, duhet t’u kujtojë të gjitha vendeve anëtare objektivat origjinale të OKB-ës, ashtu siç janë shkruar në Kartën e Kombeve të Bashkuara, por njëkohsisht edhe sukseset dhe dështimet e organizatës botërore, ka shkruar Kevin E. Miller, Ndihmës Sekretari Amerikan i Shtetit në Byronë e Punëve të Organizatave Ndërkombëtare, në artikullin e tij mbi prioritetet e politikës amerikane gjatë sesionit të 73-të të Asamblesë së Përgjithshme të Kombeve të Bashkuara në Nju Jork.

THACI- MITCHELL: SHBA MBESHTET KOSOVEN

September 26, 2018 by dgreca

-Ndihmës Sekretari i Shtetit të SHBA-ve, Wess Mitchell: Kosova do ta ketë mbështetjen e Shteteve të Bashkuara të Amerikës edhe më tutje/

1 delg Mitchell

-Presidenti Thaçi: SHBA-ja është aleati ynë i përjetshëm. Të gjitha proceset i kemi projektuar dhe finalizuar së bashku/

-Kryeministri Haradinaj: ShBA-të kanë rol të pazëvendësueshëm në rrugën euro-atlantike të vendit/

NEW YORK-WASHINGTON, 26 Shtator 2018-Gazeta DIELLI/ Ndihmës Sekretari i Shtetit të SHBA-ve për Çështje Evropiane dhe Evroaziatike, Wess Mitchell, tha se Kosova do ta ketë mbështetjen e Shteteve të Bashkuara të Amerikës edhe më tutje, në forcimin e sundimit të rendit dhe të ligjit, në arsim dhe në rrugën e saj euroatlantike. Njoftimi i plote:

Presidenti Thaçi takoi ndihmës-sekretarin Mitchell, merr mbështetjen e SHBA-së

New York – Presidenti i Republikës së Kosovës, së bashku me kryeministrin, Ramush Haradinaj dhe zëvendëskryeministrin e parë, Behgjet Pacollin, zhvilluan një takim me ndihmës-sekretarin amerikan të Shtetit për Evropën dhe Euroazinë, Wess Mitchell.

Në këtë takim është biseduar për thellimin e marrëdhënieve bilaterale ndërmjet dy shteteve, avancimin e agjendës euroatlantike të Kosovës, procesin e transformimit të FSK-së në ushtri të Kosovës si dhe për fazën e fundit të dialogut për normalizimin e plotë të marrëdhënieve ndërmjet Kosovës dhe Serbisë.Presidenti Thaçi ka falënderuar ndihmës-sekretarin Mitchell për mbështetjen e palëkundur të SHBA-së që ka dhënë për shtetin dhe popullin e Kosovës në të gjitha periudhat, nga liria, te shtetndërtimi dhe tani forcimi i perspektivës euroatlantike.

“SHBA-ja është aleati ynë i përjetshëm. Të gjitha proceset i kemi projektuar dhe finalizuar së bashku. Prandaj, ne asnjëherë nuk do të largohemi nga kjo rrugë. Do të ecim së bashku drejt sfidave të reja që na presin”, ka theksuar presidenti Thaçi.

Duke folur për fazën e fundit të dialogut, presidenti Thaçi ka theksuar se mbështetja amerikane në këtë proces është jetik, për arritjen e një marrëveshje përfundimtare dhe ligjërisht të obligueshme.

Nga ana tjetër, ndihmës-sekretari amerikan i Shtetit për Evropën dhe Euroazinë, Wess Mitchell ka siguruar presidentin e Kosovës se SHBA-ja do të vazhdojë mbështetjen e gjithmbarshme për Kosovën.

Përtej një replike

September 25, 2018 by dgreca

Nga Alma LIÇO/

Herë pas here kam publikuar pjesë nga kujtimet që sjell në librin tim “Krahë të keputur”, me mbresat fëminore të viteve të tmerrshme të jetuara në diktaturë. Duke lundruar në internet, rastësisht konstatova se një gazetë e përditshme kishte botuar disa prej tyre. Por ajo që më befasoi, ishin disa komente cinike rreth atyre vuajtjeve dhe genocidi të pashembullt, të shkaktuara nga rregjimi çnjerëzor komunist, bëma tashmë të njohura botërisht. Ndjeva shtysën t’i përgjigjem një komentuesi me nofkën “Lugati”…

I nderuar “Lugat”,

Paraprakisht, dëshiroj të të komplimentoj për nofkën, që është përshtatje perfekte e asaj çfarë përfaqëson. Ti nuk ke as minimumin e burrërisë të prezantohesh me emrin tënd të vërtetë.
Si komunist që je, të kuptoj për pandjeshmërinë dhe instiktet çnjerëzore. ……ditaret e jetës tuaj kullojnë gjak, nga ai i burrave, grave, pleqve, plakave , madje dhe ai i fëmijëve të djepit që u masakruan në emër të ideologjisë suaj të çmendur dhe pushtetit të dalë nga gryka e pushkës.
Të kuptoj për arrogancën imponuese me të cilën trajton historinë e deformuar, të shkruar nga të ngjashmit e tu .
Të kuptoj për intolerancën ndaj personave që mendojnë ndryshe nga ti, të cilët dhe sot e kësaj dite, ashtu si etërit e tu, i konsideron armiq.
Madje të kuptoj dhe për fjalorin vulgar dhe fyes që përdor rëndom në ligjeratat e tua.
Të kuptoj për urrejtjen që çfaq në mënyrë të pamotivuar ndaj qënieve njerëzore që nuk i ke njohur kurrë.
Të kuptoj edhe kur ndeshesh për opinione dhe këndvështrime lidhur me ngjarje të caktuara, pasi në kontekste të veçanta, ato edhe mund të ndryshojnë.
Por, ajo që nuk arrij të kuptoj është se ku e gjen të drejtën të më kundërvihesh mua. Unë kam shkruar një libër të thjeshtë me përjetimet e mia fëminore në diktaturë, të cilat nisin me internimin familjar, ditën kur unë mbusha dhjetë vjeç, kalvar persekucioni i cili vazhdoi mizorisht deri në vitin 1991.
I nderuar “Lugat”, unë nuk ndaj opinione për ngjarje të cilat nuk i kam jetuar, nuk bëj konkluzione, ato ja kam lënë me modesti lexuesve të mi. Unë shkruaj për ngjarje të vërteta, të jetuara nga vetë unë, të cilat për fat të keq nuk mund të ndryshojnë kurrë, me gjithë shtysën tënde dashakeqe për t’i keqinterpretuar ato. Në librin tim, unë tregoj se na hodhën familjarisht si dengje para një kasolleje të mbuluar me kashtë, diku në një fshat të largët, e cila do të trembte dhe bagëtitë. Pa dashur të përsëris ato realitete të tmerrshme që kam sjellë në atë libër, unë dëshmoj për të gjitha vuajtjet e atyre viteve të pafundme, në atë terror të pashembullt. Dhe zëri im nuk është i vetmuar. Gjatë viteve të tranzicionit janë paraqitur ngjarje dhe fakte të tmerrshme për terrorin e papërsëritshëm të komunistëve, ndaj asaj pjese të pambrojtur të popullsisë që nuk ishte bashkuar me ideologjinë e tyre vrastare. Ky ishte një krim që, sipas etërvë të tu komunistë, duhej të paguhej brez pas brezi, që nga fëmijët e sapolindur, e deri te pleqtë e plakat.
Dy vite më parë, në bulevardin kryesor të Tiranës, u vendosën fotot e tridhjetë e tetë martirëve të fesë katolike, të masakruar në mënyrën më mizore që ka njohur ndonjëhere historia e terrorit botëror…
Historia e zezë e komunizmit përmban mijëra të ekzekutuar të pafajshëm…të burgosur…familjarë e të afërm përjetësisht të internuar…
Asnjeri prej ketyre fakteve makabre, që do të ngjethnin çdo qenie njerëzore, nuk të bën përshtypje. Si skllav i lindur dhe i pandryshueshëm i ideologjisë vrastare, madje rrekesh të më sfidosh, se fajtor ka qenë gjyshi im, i cili nuk ndejti urtë të pranonte rregjimin, pasi çdo shtet ka ligjet e veta që duhen zbatuar…
Ti “Lugat” je veçse një mjeran i verbër, një skllav që i bindesh përulësisht etërve të tu kriminelë, që ul kokën dhe pranon me devotshmëri të plotë fshikullimet e lavazhin e trurit… si të mos mjaftonte asgjësimi i kundërshtarëve, kuçedra komuniste asgjësoi njeri pas tjetrit dhe pjellën e saj…dhe rezultat…një popull në arrati për të shpëtuar nga varfëria dhe terrori i baballarëve të tu, dhe vendi i bunkerizuar dhe i izoluar që ata ndërtuan.
… Koha i dha të drejtë gjyshit tim që e kundërshtoi ideologjinë komuniste që në vitin 1944…
…Nuk po zgjatem më shumë me ty…madje shumë kohë të kushtova…po të le në pellgun e mjerimit tënd…dhe kujto…ndonëse kalova fëmijërinë dhe rininë në internim…unë jam më e lirë se ti…

Kosova falënderuese për gjithë kontributin që ka dhënë Amerika

September 25, 2018 by dgreca

-Kryeministri Haradinaj gjatë vizitës zyrtare që është duke e zhvilluar në Shtetet e Bashkuara të Amerikës vizitoi Akademinë Ushtarake “West Point”/

1 Thaci nderimi

Washington, 25 Shtator 2018-Gazeta DIELLI/

Kryeministri i Republikës së Kosovës, Ramush Haradinaj, gjatë vizitës zyrtare që është duke e zhvilluar në Shtetet e Bashkuara të Amerikës, është pritur në Akademinë Ushtarake “West Point” nga Gjeneral Lejtnant Darryl A. Williams me bashkëpunëtorë.
Me këtë rast, Kryeministri Haradinaj, falënderoi Gjeneralin Williams për pritjen dhe për ndihmën që është duke e dhënë kjo Akademi për ngritjen e kapaciteteve të Forcës së Sigurisë së Kosovës, përmes ofrimit të studimeve për kadetët kosovarë, e që aktualisht këtë Akademi janë duke u shkolluar dy kadetë të FSK-së, Arnela Shala dhe Ylli Dalladaku.
“Vendi ynë është falënderues për gjithë kontributin që ka dhënë Amerika, si në kohë lufte poashtu edhe paqeje. Jemi përherë mirënjohës që i kemi aleat të fuqishëm Shtetet e Bashkuara të Amerikës”, tha Kryeministri Haradinaj.
Ndër të tjerash, Kryeministri Haradinaj, duke folur para përfaqësuesve të “West Point Academy”, për transformimin e FSK-së në ushtri, tha se Kosova është e gatshme që ta ketë ushtrinë, e cila do t’i kontribuonte paqes dhe sigurisë në vend dhe më gjerë.
Gjeneral Lejtnant Darryl A. Williams, pasi falënderoi Kryeministrin Haradinaj për vizitën, tha se Kosova do ta ketë mbështetjen e parezervë të këtij institucioni përmes ofrimit të trajnimeve dhe studimeve ushtarake për pjesëtarët e FSK-së.Nga Gjenerali Williams, Kryeministri Haradinaj ka pranuar një dhuratë me simbolet e Akademisë Ushtarake “West Point”, ndërsa kryeministri Haradinaj e ka nderuar Gjeneralin Williams me medaljen e Skënderbeut.

Në Akademinë Ushtarake “West Point” ishte e pranishme edhe ambasadorja e Kosovës në SHBA, Vlora Çitaku. /b.j/

SHBA-të vlerësojnë sukseset e Kosovës

September 24, 2018 by dgreca

-Kryeministri Ramush Haradinaj në takim me Zëvendës-Ndihmës Sekretarin Amerikan të Shtetit, Pete Marocco: Kosova e gatshme të kontribuojë për paqen në rajon dhe botë/

1 Hashimi ndihmes sek

NJU JORK, 24 Shtator 2018-Gazeta DELLI/ Zëvendës-Ndihmës Sekretari Amerikan i Shtetit për Çështjen e Parandalimit të Konflikteve, Pete Marocco, në një takim sot në Nju Jork me kryeministrin kosovar Ramush Haradinaj tha se SHBA-të vlerësojnë sukseset që ka shënuar Kosova dhe do të jenë mbështetëse në rrugën e saj euroatlantike.

Njoftimi i dërguar thekson se, në takimin e zhvilluar në kuadër të punimeve të Asamblesë së Përgjithshme të OKB-së, është biseduar për angazhimin e Kosovës në luftën kundër ekstremizmit të dhunshëm dhe radikalizmit dhe për veprimet e ndërmarra në funksion të konsolidimit të brendshëm të vendit, forcimin e sundimit të rendit dhe ligjit dhe të gjitha mekanizmave të sigurisë dhe për angazhimin e Kosovës në luftën kundër ekstremizmit të dhunshëm dhe radikalizmit.

“Kosova është e gatshme që të kontribuojë për paqen në rajon dhe botë”, citon komunikata kreun e qeverisë kosovare.

Kryeministri Haradinaj e ka njoftuar Zëvendës-Ndihmës Sekretarin Marocco për të arriturat në Kosovë në përmbushjen e reformave, zhvillimin ekonomik, dhe në fuqizimin e sundimit të rendit dhe ligjit.

“Qeveria është duke punuar në fuqizimin e rendit dhe ligjit. Ne kemi institucione kredibile që mund të kontribuojnë në ruajtjen e paqes në vend dhe rajon”, tha kryeministri Haradinaj, duke theksuar gjithashtu se fuqizimi i subjektivitetit ndërkombëtar të vendit duke u anëtarësuar në organizatat ndërkombëtare, do t’i mundësojë Kosovës që të jap kontributin e saj në sigurimin e paqes së qëndrueshme./b.j/

Kryeministri Haradinaj takoi në Nju Jork, shefin e MCC-së

Nju Jork, 24 shtator 2018- Kryeministri i Republikës së Kosovës, Ramush Haradinaj, gjatë vizitës zyrtare në ShBA, ka takuar Kryeshefin Ekzekutiv të Korporatës së Sfidave të Mijëvjeçarit (MCC), Brock Bierman.

Me këtë rast, kryeministri Haradinaj, e ka falënderuar kryeshefin e MCC-së, për kontributin e gjithanshëm që kanë dhënë dhe vazhdojnë të japin për popullin dhe shtetin e Kosovës.

“Populli i Kosovës do të jetë përherë mirënjohës për ndihmën që SHBA-të kanë dhënë për Kosovën”, tha kryeministri Haradinaj, i cili njëkohësisht e njoftoi kryeshefin Bierman për të arriturat e konsolidimit të shtetit.
Ndërkaq, Bierman gjatë bisedës me kryeministrin Haradinaj, vlerësoi përkushtimin e Qeverisë së tij në përmbushjen e agjendës shtetërore.
Programi i MCC-së për Kosovën, përkrahë përpjekjet e Qeverisë për të ulur shpenzimet e energjisë në ekonomi familjare dhe biznese, dhe për të përmirësuar transparencën dhe llogaridhënien me përqendrim në reformat institucionale dhe të politikaveAmerika, partnere e Kosovës në të gjitha fazat e shtetndërtimit.

1 Takimi 2

-Kryeministri Haradinaj: ShBA-të, partner i vendit në të gjitha fazat e shtetndërtimit/

Nju Jork, 24 Shtator 2018-Gazeta DIELLI/- Kryeministri i Republikës së Kosovës, Ramush Haradinaj, në kuadër të vizitës zyrtare në Shtetet e Bashkuara të Amerikës, ka zhvilluar një takim me senatorin amerikan, Ronald Johnson, anëtar i Komitetit të Senatit për Politikë të Jashtme i Shteteve të Bashkuara të Amerikës.
Njoftimi dërguar nga qeveria e Kosovës thekson se, në këtë takim Kryeministri Haradinaj e ka njoftuar Senatorin Johnson për progresin e arritur në vend, veçmas në fushën e rendit dhe ligjit dhe përkushtimin e Qeverisë në fuqizimin ndërkombëtar të vendit, anëtarësimin në organizatat ndërkombëtare, punën drejt transformimit të FSK-së në Ushtri dhe tema të tjera me interes për vendin.
Kryeministri Haradinaj ka theksuar se Kosova është e përkushtuar që të forcojë partneritetin bilateral me Shtetet e Bashkuara të Amerikës në çdo fushë me interes për të dyja vendet, duke ritheksuar qëndrimin e Qeverisë për miqësinë e përjetshme me ShBA-të dhe orientimin e pakthyeshëm euro-atlantik.
“ShBA-të ishin krah nesh në secilën etapë të shtetndërtimit tonë dhe orientimi ynë si vend është krah politikave të miqve tanë”, ka thënë Kryeministri Haradinaj.
Nga ana tjetër, Senatori Johnson ka përshëndetur angazhimin e Qeverisë së vendit në tema të ndjeshme për sigurinë dhe ka shprehur gatishmërinë për ta përkrahur vendin në proceset integruese dhe anëtarësimin në organizatat ndërkombëtare.
Pjesë e takimit ishin edhe Presidenti i vendit, Hashim Thaçi, Zëvendëskryeministri dhe ministër i Jashtëm Behgjet Pacolli dhe Ambasadorja e Kosovës në Shtetet e Bashkuara të Amerikës Vlora Çitaku.