Astrit Lulushi/

Aleksandri quhet i madh jo se dikush e ekzagjeron. Arritjet e tij ushtarake nuk kanë rival në Histori. Nëse Aleksandri nuk do të kishte qenë një figurë historike, por një personazh filmash, të gjithë kritikët do të kishin thënë se historia është për të qeshur; një djalë nga një vend i vogël që sulmon një perandori me një ushtri sa një pjesë e madhe e ushtrisë perandorake, duke ecur nga Greqia në Afganistan, duke pushtuar Afganistanin (gjë që asnjë nga superfuqitë e ditëve të fundit nuk e ka arritur), duke luftuar elefantët në Indi; të ecësh nëpër një shkretëtirë dhe të mos humbasësh kurrë një betejë është e vështirë të besohet.

Megjithatë, përveç ushtrisë, trashëgimia e tij shpesh është anashkaluar. Filipi shpiku dhe Aleksandri vuri në zbatim konceptin e “shtetësisë”.

Deri në kohën e tyre, perandoritë pushtuan njerëz të tjerë dhe, më së shumti, bënë përpjekje për të integruar klasën sunduese.

Filipi dhe Aleksandri e ndryshuan këtë. Ata ndërtuan qytete me popullsi të përzier, banorët e të cilëve kishin një interes të madh për të mbajtur status quo-në. Filipi e kishte prezantuar konceptin duke zgjeruar sundimin maqedonas në territorin jomaqedonas. Filipi ndërtoi qytete të reja, krijoi infrastrukturë të shkëlqyer për të tërhequr njerëz. Por risia e tij ishte se ai u dha banorëve të drejta qytetare për të fituar mbështetjen ose në rastin më të keq neutralitet. Në këtë mënyrë ai u përpoq të integronte në mbretëri popullsi të ndryshme (nga Maqedonia, Iliria, emigrantë nga Greqia jugore, trakë etj.). Aleksandri e zgjeroi konceptin në të gjithë perandorinë e tij. Ky është fillimi i konceptit “kasa – kasolle – cita -qytet” dhe “qytetësi” që romakët trashëguan përmes Aleksandrit dhe e përhapën.

20 gusht, 2022

ZERI I AMERIKES (https://www.zeriamerikes.com/a/6709961.html)

Në Shqipëri, dy shtetas rusë, M.Z., 24 vjeç dhe S.T., 33 vjeçe, së bashku me një shtetas ukrainas, F.T., 25 vjeç, u arrestuan mbrëmjen e së shtunës nën dyshimet për spiunazh, pasi njëri prej tyre kishte hyrë në uzinën ushtarake në Gramsh, duke tentuar të bëjë fotografi. Sipas një njoftimi të ministrisë së Mbrojtjes “roja ka vënë re lëvizje të dyshimta rreth objektit. Menjëherë ai ka njoftuar përgjegjësin e rojeve se një person ka hyrë brenda territorit dhe ka tentuar të bëjë fotografi”. Të dy ushtarakët më pas i kanë bërë thirrje të ndalojë, të riut M.Z.. Ndërsa ky i fundit është përpjekur të largohet, është ndaluar nga ushtarakët, pavarësisht se në këtë moment ai ka përdorur ndaj tyre një spray paralizues, duke ua hedhur në fytyrë.

Ndërsa i riu rus është shoqëruar në komisariatin e Gramshit, policia ushtarake, ka vërejtur dhe dy persona të tjerë, që dyshoheshin se po shoqëronin të riun rus që kishte hyrë në Uzinë. Sipas njoftimit të ministrisë së Mbrojtjes, gruaja ruse 33 vjeçare dhe ukrainasi 25 vjeçar, janë ndaluar nga policia jo shumë larg Uzinës, ndërsa udhëtonin me një automjet sportiv me targa të Ukrainës.

Të dy ushtarakët që bënë të mundur ndalimin e të riut që kishte hyrë në Uzinë, u trasportuan me shpejtësi në një spital të kryeqytetit, për shkak të problemeve me shikimin, të provokuara nga spray paralizues.

“Ekipet e specializuara të Toksikologjisë, Djegie-Plastikës dhe ORL kanë kryer konsultat dhe ekzaminimet e plota për dy ushtarakët e ekspozuar ndaj gazit irritues, të cilët po marrin trajtimin e nevojshëm mjekësor dhe janë në gjendje të qëndrueshme, pa probleme akute të helmimit”, bëri të ditur në një njoftim të sajin Ministria e Shëndetësisë.

Ministri i Mbrojtjes Niko Peleshi, kontaktoi personalisht me dy ushtarakët duke u shprehur atyre “mirënjohjen që sakrifikuan për të mbrojtur një objekt strategjik”. Ndërsa shefi i shtabit të përgjithshëm të ushtrisë gjeneral brigade Arben Kingji, i vizitoi ata në spital.

https://www.facebook.com/plugins/post.php?href=https%3A%2F%2Fwww.facebook.com%2Fnikopeleshi%2Fposts%2Fpfbid02NEnEjrmbf3nHqe59JFwHRRKqcjVwfR4x5kyryx5x8ygnSqG97cyJb1qpJdA7hFojl&show_text=true&width=500

Për momentin nuk dihet se cili ka qenë qëllimi i shtetasve rusë dhe ukrainas të arrestuar. Në një reagim për ngjarjen kryeministri Edi Rama deklaroi se ata “dyshohen për spiunazh”, duke folur për “një ngjarje delikate”. Për zbardhjen e saj janë angazhuar përfaqësuesë të Policisë Ushtarake dhe Agjencisë së Inteligjencës dhe Sigurisë së Mbrojtjes dhe në bashkëpunim me Departamentin e Policisë Kriminale dhe Drejtorisë së Antiterrorit në Policinë e Shtetit.

Autoritetet shqiptare i janë drejtuar zyrtarisht ambasadës ruse në Tiranë, duke kërkuar informacion dhe shpjegime për shtetasit e arrestuar në mbrëmje.

Uzina e Gramshit, e ndërtuar në vitin 1962, ka prodhuar në të kaluarën armë, fillimisht pushkë të tipir “Simonov”, kalibër 7.62 mm, dhe më pas kallashnikovë. Më pas ajo është përdorur për të ofruar shërbime prodhuese për industrinë e mbrojtjes me makineritë e saj të precizionit të lartë apo dhe riparime. Ndërsa deri në një vit më parë është përdorur për demontimin e armëve të tepërta.

Dr. Erion Dasho/

Premtimi i Ministres së Arsimit për më tepër shkolla, ngjan si dy pika uji me premtimet dhe mburrjet e Ministres së Shëndetësisë sa herë përuron lyerjen e ndonjë spitali apo qendre shëndetësore.

Në fakt, me uljen e popullatës dhe lindshmërisë, nevoja për shkolla të reja do të jetë gjithmonë e më e ulët.

Nga ana tjetër, ndonëse popullata do të moshohet, edhe nevoja për shtretër spitalorë nuk do të rritet pasi kujdesi shëndetësor do të modernizohet dhe do të ofrohet ambulatorisht apo në familje.

Në këto kushte, investimet në infrastrukturë nuk duhet të jenë ekstensive, por intensive dhe, mbi të gjitha, strategjike.

Fatkeqësisht, qeverisja e rilindjes mendon vetëm për propagandë dhe një shkollë apo spital i lyer i sjell më tepër dobi se një strategji zhvillimore.

Ata bashkatdhetarë që kanë mbetur në Shqipëri dhe do të vazhdojnë të jetojnë atje bëjnë mirë që të shohin sa më parë përtej bojës.

Sepse një shkollë apo spital i lyer bukur, por pa mësues dhe mjekë cilësorë, pa pajisje didaktike apo diagnostike, me financime qesharake dhe me një strategji të paqartë zhvillimore nxjerr nxënës të paaftë dhe pacientë të pashëruar.

Dhe një shtet që nuk arrin të ofrojë dy shërbimet më të rëndësishme sociale për të cilat ka nevojë popullsia, përse duhet?!