: Politikanët – Dielli

Ambasadori Donald Lu: Politikanët, frikë nga reforma në drejtësi

February 8, 2018 by dgreca

Ambasadori Donald Lu ka reaguar në Facebook pas përzgjedhjes së anëtarëve të KLP dhe KLGJ, pavarësisht se nuk u votuan në Kuvend për mungesë kuorumi.

Emrat u përzgjodhën me short pasi mazhoranca dhe opozita nuk e gjetën konsensusin për të miratuar një listë të përbashkët.

Opozita votoi kundër duke akuzuar se qeveria kërkon të vërë në dorë drejtësinë e re. Diplomati amerikan thotë se politikanët shqiptarë kanë frikë nga drejtësia.

Në mesazhin e publikuar nga Ambasada Amerikan ën Tiranë, Lu thotë se, politikanët kanë frikë nga reforma në drejtësi, por, kjo reformë ka hedhur sot një hap të rëndësishëm.

“Politikanët, në të majtë dhe në të djathtë, kanë frikë nga reforma në drejtësi. Mos u përqëndroni në lajmin e keq se politikanët dështuan sërish të bashkëpunojnë në përzgjedhjen e anëtarëve të KLGJ-së dhe KLP-së.

Përqëndrohuni në lajmin e mirë se Kushtetuta e kishte parashikuar këtë gjë dhe sot i përzgjodhi anëtarët në mënyrë rastësore. Unë kam më shumë besim në një përzgjedhje të rastit sesa në përzgjedhjen nga politikanët. Reforma në drejtësi ka hedhur një hap përpara”,- shkruan ambasadori Donald Lu në Facebook.

Ambasadori LU:Politikanë të korruptuar, zyrtarë, gjykatës, prokurorë janë të frikësuar

May 3, 2017 by dgreca

Aktivitet i Ambasadës së SHBA dhe Institutit për Demokraci e Ndërmjetësim me temë: “Aktivizimi rinor kundër korrupsionit”/

*Ambasadori Lu:Kohet po ndryshojnë. Politikanë të korruptuar, zyrtarë të qeverisë, gjykatës dhe prokurorë janë të frikësuar. A e dini prej kujt janë të frikësuar? Ata janë të frikësuar prej jush!/

Përktheu për “Dielli-in”, Herion Kërcelli/Në këtë aktivitet të zhvilluar më 2 maj, morën pjesë nxënës të shkollave të mesme të qyteteve Shkodër, Kukës, Elbasan, Berat, Vlorë, Lezhë, Gjirokastër dhe Tiranë.Seminarin e përshëndeti dhe Ambasadori Donald Lu, ku theksoi:

Të dashur nxënës dhe mësues,mirmëngjes!

Korrupsioni mbaron në një shoqëri, kur njerzit fillojnë të veprojnë, shpesh kjo udhëhiqet nga të rinjtë.

Kur unë punoja në Kirgizstan 14 vjet më parë, studentët në shkolla dhe universitete përballeshin me probleme të tmerrshme me korrupsionin. Të gjithë duhet të paguanin për notat. Vetëm fëmijët e pasur mernin nota të mira, por nuk mësonin kurrë. Studentët normalë punonin fort, por mernin nota të këqija ose nuk diplomoheshin kurrë. Korrupsioni vidhte arsimimin e tyre.

Këta studentë thanë, “Mjaft! Jo më ! Mbaron me mua!” Ata formuan klube dhe firmosën deklarata që nuk do të lejojnë kurrë ryshfet për arsimimin e tyre. Mësuesit dhe drejtorët e shkollave u tërbuan. Ministria e Arsimit ishte në kaos.

Por, Presidenti i Kirgizstanit, Oscar Akayev, ishte një profesor i mëparshëm fizike. Ai e pa që ndryshimi po vinte dhe vendosi të mbështeste këtë lëvizje studentore. Madje, konstatoi se, ministrat e tij, rektorët dhe mësuesit punonin kundër studentave, Presidenti Akayev, shkoi universitet më universitet duke treguar solidaritetin e tij me studentët. Shpejt më shumë njerëz u bashkuan me lëvizjen. Kështu ata pak studentë të parë ndryshuan kursin e vendit të tyre. Ky është një model si ndodh ndryshimi. Unë dua tju falenderoj ju të gjithëve për punën e udhëheqjen që keni treguar për këtë problem në Shkodër, Kukës, Elbasan, Berat, Vlorë, Lezhë, Gjirokastër dhe Tiranë. Gjithashtu falenderoj mësuesit tuaj të guximshëm për mbështetjen e tyre , Institutin për Demokraci e Ndërmjetësim dhe vecanërisht, zotin Shefqet Shyti, për vizionin dhe guximin e tij.

Kohet po ndryshojnë. Politikanë të korruptuar, zyrtarë të qeverisë, gjykatës dhe prokurorë janë të frikësuar. A e dini prej kujt janë të frikësuar? Ata janë të frikësuar prej jush!

Politikanëve nuk u konvenon Ligji “anti-mafia”

April 8, 2017 by dgreca

Nga Nadie Ahmeti/ Një ligj i quajtur anti – mafia, përmes së cilit do të rregullohej çështja e përfitimeve të pasurisë në mënyrë të paligjshme dhe rrjedhimisht do të luftohej korrupsioni dhe krimi i organizuar, ka vite që është iniciuar, por i njëjti, thonë njohës të rrethanave, nuk është hartuar pothuaj asnjëherë.

Ligji anti-mafia u iniciua rreth shtatë vjet më parë nga kryeministri atëhershëm Hashim Thaçi, por nuk u jetësua asnjëherë. Autoritetet në Prishtinë thonë se Kosova ka ligje, përmes së cilëve “bëhet konfiskimi i pasurisë së përfituar në mënyrë të paligjshme”.

Ministria e Drejtësisë, në një përgjigje me shkrim për Radion Evropa e Lirë, thotë se “çështja e konfiskimit të pasurisë së përfituar në mënyrë të paligjshme, do të adresohet në kuadër të Kodit Penal”.

“Ju njoftojmë se Grupi Punues është dakorduar që dispozitat, të cilat adresojnë çështjen e konfiskimit të pasurisë së fituar në mënyrë të paligjshme, do të adresohen në kuadër të Kodit Penal dhe Kodit të Procedurës Penale”.

“Aktualisht, grupi punues është duke punuar në Kodin Penal dhe pastaj do të vazhdohet me Kodin e Procedurës Penale”, thuhet në përgjigjen për Radion Evropa e Lirë, të zyrës për media të Ministrisë së Drejtësisë.

Por, përfaqësues të shoqërisë civile japin vlerësime të ndryshme për nevojën e miratimit të këtij ligji, përderisa anëtarë të Komisionit për Legjislacion e konsiderojnë të domosdoshëm, siç thonë, për dekriminalizimin e Kosovës.

Pal Lekaj, anëtar i Komisionit për Legjislacion në Kuvendin e Kosovës, thotë për Radion Evropa e Lirë, se duke marrë parasysh nivelin e lartë të korrupsionit, përvetësimin e pronës dhe mosfunksionimin në nivel të duhur të sistemit të drejtësisë, një ligj i tillë është i domosdoshëm dhe jetik për dekreminalizimin e Kosovës.

Por, mungesa e vullnetit politik dhe pasuria e pajustifikueshme e disa personave, thotë ai, ka ndikuar që autoritetet kompetente t’i “neglizhojnë procedurat e hartimit të Ligjit “anti-mafia”.

Lekaj sqaron se disa herë është menduar të procedohet në Komision, por është tërhequr nga rendi i ditës.

“Janë të gërshetuara interesat e pushtetarëve dhe në këtë drejtim, meqë njerëzit kanë prona mjaft dhe nuk e kanë të sqaruar prejardhjen e pasurisë se tyre, ndodh kjo. Pra, interesi është kryekëput politik”, thotë Lekaj.

Në anën tjetër, përfaqësues nga Institutit I Kosovës për Drejtësi, konsiderojnë se miratimi i këtij ligji mund të keqpërdoret politikisht. Betim Musliu nga ky institut, shprehet se ata që janë pushtet do të mundohen t’i ndjekin qytetarët që janë të rreshtuar në opozitë, për të bërë, siç thotë ai, “luftë shtrigash”

“Po në asnjë mënyrë nuk besojmë që kjo politikë dhe ky sistem i drejtësisë i kapur nga politika, do të shfrytëzojë ligjin për të bërë ndjekje të kriminelëve dhe t’ua konfiskojnë pasurinë. Por, do të bëjë veprim që do t’u shërbejë interesave ditore të politikës”, vlerëson Musliu.

Përfaqësues nga Organizata për Demokraci, Anti-Korrupsion dhe Dinjitet “Çohu”, e konsiderojnë të domosdoshëm miratimin e këtij ligj.

Arton Demhasaj thotë se pasuria e pajustifikueshme, së pari e zyrtarëve të lartë shtetërorë, ka bërë që të mos miratohet ky ligj.

Objekt i parë i hetimit, pas miratimit dhe zbatimit të ligjit, do të duhej të ishte prejardhja e pasurisë së zyrtarëve shtetërorë dhe pastaj konfiskimi, thotë Demhasaj duke shtuar se për këtë arsye, ky ligj po heshtet.

“Një ligj i tillë, nëse fillon të zbatohet do të cenonte pasurinë e politikanëve, pasi të gjithë jemi dëshmitarë, se kur shohim formularët e deklarimit të pasurisë së tyre, shumica nga ta janë milionerë, kanë pasuri milionëshe. Dhe, është shumë vështirë të bindemi se ajo pasuri milionëshe e tyre, është krijuar me pagat e tyre që i marrin. Dhe, kjo sjell si përfundim që këto pasuri mund të jenë të fituara në mënyra të ndryshme të paligjshme”, shprehet Demhasaj.

Për zyrtarët e Qeverisë së Kosovës, pavarësisht që nuk ekziston ligji “anti-mafia”, një “Ligj për Zgjerimin e Kompetencave për Konfiskimin e Pasurisë së Fituar në Vepër Penale”,siç thonë, kryen funksionin njëjtë

Kardinal Troshani: Politikanë, qëndroni më afër problemeve të popullit!

December 23, 2016 by dgreca

1-dom-ernest-troshani-1

Ne Foto:Kardinal Ernes Troshani u flet deputeteve nga foltorja e Kuvendit te Shqiperise/Kardinali Dom Ernest Troshani ishte i ftuar në seancën plenare të Kuvendit diten e djeshme, ku mbajti një fjalë në fillim të punimeve të tij dhe bëri apel ndaj deputetëve që të qëndrojnë më pranë problemeve të popullit.“Nuk kam ardhur për t’ju mësuar gjëra të reja, por kam ardhur që të falenderoj atdheun dhe popullin, që pas një “rrebeshi” prej 5 dekadash, më në fund gjeti forcën shpirtërore për t’i njohur bijëve dhe bijave të tij, që për të ruajtur lirinë e ndërgjegjes dhe besimit, nuk e braktisën popullin e vet. Jam dëshmitari i fundit i një brezi klerikësh katolikë që vuajtën dhe u persekutuan. Duke më bërë kardinal, Papa Françesku nuk më nderoi vetëm mua, por të gjithë Kishën Katolike Shqiptare dhe të gjithë popullin shqiptar”, deklaroi Dom Ernesti.
“Të nderuar deputetë, përpiquni të gjithë bashkë që kur çdonjëri të shohë në sytë tuaj, të shohë begatinë, drejtësinë, bujarinë dhe bekimin hyjnor. Qëndroni më afër problemeve të popullit shqiptar dhe bëni që politika të jetë shërbim e jo përfitim. Vetëm atëherë do të keni respektin e njerëzve të thjeshtë që kanë besuar te ju”, e përfundoi fjalën e tij, Dom Ernest Troshani.

PASSHENJTERIMI- A do te behen me te mire politikanet, shtetaret, kuvendaret tane?

September 4, 2016 by dgreca

Nga Ilir Levonja/

Hose Maria Bergolio, i nohur si Papa Francesco, i 266-te i Selise se Shenjte, nuk do harrohet kurre per ne shqiptaret. Dhente Zoti qe ata pjesmarres aty, t’i kene pasur te mprehura majat e lapsave. Kjo dite e sotshme eshte vertete per tu mbajtur mend. Po keshtu edhe ky njeri. Nje i tille qe shkeli mermerin e Vatikanit me kepucet e Buenos Airesit. Thjesht per tu ndjere prane shumices globale qe bie ndesh me luksin e shtepise se tij. Ky burre nga Argjentina, ose jugu i skajshem, zgjodhi me doren e Zotit ne grigjen e shqiptareve nje prej tyre. Pa diskutim ate qe nga syte e te te mjereve shihej si nje engjull. Ndersa nga syte e te te nginjurve, si model per demagogjine e radhes ne fushaten politike po te radhes. Dhe ata (te mjeret) nuk jane pak ne kete glob qe sot e ka mbytur, ngrohja globale, droga dhe arratia njerezore. Deshira per te ikur. Ne fakt, e perditshmja serish, si te thuash po u ben nje padrejtesi. Qofte dhe me laurimin e saj. Pra shenjtit te tyre. Postera apo banera dixhitale qarkullojne kudo me buzeqeshjen e shenjtores. Aq te shumte sa do ta trishtonin edhe vet ate ne gjallje. Ndofta gezimi legjitim do te ishte me i drejte ndryshe. Pa karrike te radhes se pare. Por batalionet e shenjtit nuk e kane kete mundesi penguese. Ata jane te nenshtruar te ndjejne mungesen e saj. Te qajne dhe te qeshin kohesisht. Te gezohen si femije. Te falin urie. Kurse karrikeparet, priviligjenin qe te luajne me emrin e shenjtit…, ashtu si me rruzat ne perin e tespieve.

Bota e saj ishte nje fushe veprimtarie mes mizerjes, kockamaneve, te rrezuarve pertoke dhe te pashpreseve.

Ndofta ne keto dite horeje shqiptaresh, shqiptaret duhet kishin arsyen me madhore qe t’i nxirrnin me shqelma perjashta keta te radhes se pare. Por nuk e bene.

Nga ana tjeter mijra pyetje naive me bluajne koken:A do ndikohen per mire shqiptaret nga ky shenjterim i bijes se saj?

Sidomos shqiptaret shtetare. Ne raport me njeri-tjetrin. Me veten, me vendin. Per tu bere model per njerezimin kudo?

A do zhvillohet ndryshe e nesermja politike e Kuvendit te tyre?

Ku gjuha e komunikimit, e pritje percjelljes se njeri-tjetrit, e vleresimit te shoqi-shoqit, do jete si gjuha e shenjtit qe tashme kane?

A do t’i fusin shkopinje nen rrota shoku-shokut. Me imponime politike doganash. Me modelet e luftes se ashper dhe demagogjine e foltoreve. Me dy kombetare, me pese shtete?

Me yshtjen e tendencave gjoja nacionale? Atdhedashurie, por ama ndaj nje atdheu imagjinar?

A do ta permiresojne mireqenien e tyre?

A do ta permiresojne infrastrukturen e se perditshmes? Ato rruget ne lagjet. Apo rrethinat? Ku jeton e verteta e njerzve pa deshire per te ndrequr, meremetuar, mirembajtur?

A do ta japin Vetveten aq kollajllisht ne nje te thjeshte, vote?

A do te thone me, ata jane qener te gjithe? Njeri me mut se tjetri?

A do te jene me perpara…, me shume qytetare shqiptare se sa “démokrate”, “socialiste”, “komuniste”, etj?

A do vazhdojne te prodhojne intelektuale me shumice, shkenctare, humaniste, profesora, doktora, juriste,arsimtare e artiste…, permes selive due teseres se partive? Se sa permes legjislacionit sekulär, te shtetit perendimor?

A do vazhdojne te prodhojne misionare fetare me lemoshat qofte nga Orienti a Perendimi?

A do fillojne ta jetojne besimin me menyren shqiptare…, si shqiptare? Si race e bukur? Si race e vjeter?

A do ndergjegjesohen se ne kete shekull te ri…, ricklimi, qofte i mbetjeve, qofte i drejtuesve politike e shtetare, eshte prioritet dhe domosdoshmeri kohore?

A do ta kuptojne me ne fund…, se mundesia qe i jepni nje individi, per t’ju drejtuar. Nuk eshte rast kultural per te pasuruar ate the sojin e tij. Por rast kultural i ndreqjes se te perditshmes tuaj. I ardhmerise se femijeve tuaj.

A do ta kuptojne me ne fund se kur flitet per investime me parate e shtetit. Flitet per parate tuaja. Dhe se ju keni te drejten e plote te vetqeverisjes dhe pjesmarrjes.

A do ta gjykojme drejte e gjakftohte vetveten?

A do ta bejme kete ndonje dite?

Jane shume, shume hamendesime…..

….A do ta kuptojme me ne fund se, modelet, shembujt si ky i shenjtit tone. Nuk jane me per tu mburrur. Por thjesht, per t’i ndjekur.

Dhe Zoti mos vonofte e te na fusi ne udhen e duhur.