Nga Besi Londo/TIRANË.Shën Valentini ka sjellë në skenën e Universitetit të Arteve në Tiranë disa prej kryeveprave operistike të kompozitorëve me famë botërore të cilat kanë si libret historitë e dashurisë, të përjetësuara me personazhe të njohura si Violeta, Alfredo, Toska, Rozina,..

Koncerti simfonik “Shën Valentini në Opera”, nën dirigjimin e Lorenzo Turchi-Floris, i ofroi te premten ne mbremje publikut kryeqytetas pjesët më të famshme të autorëve klasik si, Rossini, Verdi, Puccini, Mozart, Lehar, etj. Koncerti u shoqërua nga baritoni Armando Lika, soprano Anila Gjermeni dhe tenori italian, David Sotgiu. Publiku duartrokiti ariet e operave te njohura si, “Berberi i Seviljes”, “Traviata”, “Toska”, “Turando”, etj.
Dirigjenti Lorenzo Turchi – Floris, i cili erdhi në Shqipëri për të drejtuar orkestrën e RTSH-së, në të njëjtën kohë është edhe pianist e kompozitor. Ai u formua së pari në Itali dhe pastaj në Rusi, ku perfeksionoi njohuritë e tij për piano në Rachmaninov Musical Institute.Nga viti 1998 Maestro Turchi – Floris është drejtor muzike i Choeur et Orchestre Symphonique du Mont-Blanc dhe nga viti 2008 drejton Musicfor International, përmes së cilit shumë aktivitete të tij muzikore ia kushton mbështetjes dhe zhvillimit të muzikës në vendet në zhvillim. Maestro ftohet rregullisht si solist dhe dirigjent nga orkestrat prestigjoze si: tilla Orchestre Symphonique du Mont-Blanc (Francë), i Musici Estensi (Itali), St Laurent KammerOrchester (Gjermani), Sarajevo National Orchestra (Bosnia Herzegovina).

I ftuar në këtë koncert ishte dhe tenori David Sotgiu i lindur në Perugia, ku edhe u diplomua në oboe pranë Konservatorit Francesco Morlacchi. Ai ka studiuar më pas kanto me Sesto Bruscantini, Renato Bruson, Raina Kavaibanska, Luciano Pavarotti dhe Mirella Freni. Në 2002 ishte ndër fituesit e sezonit të 56-të Konkursit të Komunitetit Evropian për të Rinjtë Këngëtarë Lirkë të Teatro Lirico Sperimentale Adriano Belli të Spoleto-s. Nga 2003 deri më sot ka performuar në shumë skena të teatrove evropiane. /k.sh/