Shqiptarët në Philadelphia organizuan ceremoninë e ngritjes solemne të flamurit të Kosovës në bashkia e qytetit.

Nga dr. Sadik Elshani

Gjatë shekujve Kosova kaloi një rrugëtim të gjatë me plot vuajtje, sakrifica, përpjekje mbinjerëzore, luftëra të pandërprera e të përgjakshme për liri e pavarësi. Prandaj, shpallja e Kosovës shtet i lirë e i pavarur, i njohur nga fuqitë e mëdha e demokracitë më të përparuara të botës, është një ngjarje madhështore, shumë e gëzueshme që vështirë mund të përshkruhet me fjalë. Shkurt, në Kosovë ka ndodhur nje mrekulli, një ringjallje. Një Feniks i vërtetë, është ringjallur Dardania e lashtë në një shtet të ri.

Shoqata jonë, “Bijtë e shqipes”, i kushton një rëndësi të madhe kësaj ngjarje madhështore të kombit tonë. Ajo vazhdimisht me shumë veprimtari e ka shënuar çdo përvjtor të pavarëisë së saj. Nga viti 2023, në përvjetorin e 15-të të pavarësisë së saj, kemi filluar edhe me organizimin e ngritjes së flamurit të Kosovës në bashkinë e qytetit të Philadelphias. Nuk ka vend më solemn për ta festuar pavarësinë e një vendi sesa në Philadelphia, vendlindjen e Shteteve të Bashkuara të Amerikës, ku lindi një shtet i ri dhe një epokë e re për njerëzimin. është ky një nder i jashtëzakonshëm për komunitetin tonë, Kosovën, kombin tonë – është afirmim i vlerave të përbashkëta për liri, pavarësi, paqe, drejtësi e përparim.

Edhe pse ishte një ditë e ftohtë, në sheshin e bashkisë ishin mbledhur bashkatdhetarët e gëzuar e të qeshur për të festuar këtë Ditë të Madhe për Kosovën e kombin tonë. Mbretëronte atmosferë festive, ngazëllyese: valonin flamujt e Kosovës, dhe ata kuqezi e amerikanë; jehonte kënga e vallja shqiptare, ku mbizotëronin ato me motive nga Kosova dhe ngjarjet e lavdishme të historisë së saj: jehonte kënga “Mora fjalë”, kushtuar komandantit legjendar, Adem Jasharit, mishërimit të lirisë së Kosovës. Në këtë ceremoni merrnin pjesë edhe këshilltarët e Këshillit Bashkiak të qytetit të Philadelphias, zotërinjtë: Michael Driscol e Mark Squilla. Nga Zyra për Çështjet e Emigrantëve merrte pjesë z. Alain Joinville, drejtor për Komunikime Strategjike e Programe. Ishte e pranishme edhe zonja Krista Bard, Konsulle e Përgjithshme e Nderit e Lituanisë, njëherësh edhe kryetare e Organizatës së Konsujve të Nderit në Philadelphia.

Pas një blloku me këngë e valle shqiptare filloi ceremonia e ngritjes së flamurit të Kosovës, u kënduan himnet kombëtare të Amerikës dhe Kosovës. Gjatë këndimit të himnit të Kosovës ngritej në shtizë edhe flamuri i saj. Flamuri u ngrit nga z.Imer Dedja, një biznismen i sukseshëm dhe zonjusha Diarta Kabashi, studente e mjekësisë. është ky një nderim që shoqata u ben anëtarëve të saj të dalluar. Për shkak të kohës shumë të ftohtë, pas ngritjes së flamurit ceremonia vazhdoi në mjediset e brendshme të bashkisë, në Caucus Room.

Ceremoninë e hapi z. Dritan Matraku, kryetar i Shoqatës Mbarëshqiptare “Bijtë e shqipes”, i cili i përshëndet të pranishmit, duke ua uruar Festën e Pavarësisë së Kosovës. Gjithashtu ai i përshëndeti dhe u dëshiroi mirëseardhjen mysafirëve të cekur më lart. Ndër të tjera z. Matraku u shpreh se Pavarësia e Kosovës është një ngjarje e madhe jo vetëm për Kosovën, por për të gjithë shqiptarët.

Në emër të shoqatës “Bijtë e shqipes” përshëndeti zonjusha Erona Shurdhiqi, ish-nxënës e e dalluar e shkollës sonë shqipe – tani ajo është Clinical Research Coordinator, The Children’s Hospital of Philadelphia. Në fjalën e saj të përgatitur bukur zonjusha Shurdhiqi foli për rëndësinë e kësaj ngjarje të shënuar të historisë sonë, përpjekjet e sakrificat e shqiptarëve ndër vite për liri e pavarësi: “Kjo ditë është një moment reflektimi për sakrificën, përpjekjet, dhe ëndrrën e brezave që luftuan për një Kosovë të lirë dhe të pavarur.Flamuri i Kosovës nuk është thjesht një simbol shtetëror, por një dëshmi e rrugëtimit të gjatë dhe të mundimshëm të popullit tonë drejt lirisë dhe demokracisë. Sot, ai valëvitet me krenari jo vetëm në trojet tona, por edhe këtu, në Shtetet e Bashkuara të Amerikës – një vend që ka qenë dhe mbetet një aleat i palëkundur i Kosovës dhe shqiptarëve. Sot ky Flamur valvitet këtu i lire falë Presidentit te saj historik, Ibrahim Rugova, i cili me largpamësinë dhe urtësinë e tij udhëhoqi rrugën drejt pavarësisë. Ky Flamur valvitet i lire falë Ushtrise Çlirimtare të Kosovës, me në krye Komandantin Legjendar Adem Jasharin, duke flijuar tërë familjen e tij prej 59 anëtarësh. Ky flamur valvitet i lirë falë dëshmorëve që ranë gjatë luftës dhe gjithë popullit që sakrifikoi gjithçka për këtë liri e pavarësi” – u shpreh zonjusha Shurdhiqi. Ajo shprehu e dhe mirënjohjen e falenderimin për Shtetet e Bashkuara të Amerikës, për ndihmën e pakursyer që i kanë dhënë popullit tonë ndër vite: “Mirënjohja jonë ndaj Shteteve të Bashkuara të Amerikës është e pamatshme. Pa mbështetjen e tyre vendimtare, sakrifica e popullit tonë do të kishte qenë edhe më e rëndë, dhe rruga drejt lirisë shumë më e vështirë. Ndërhyrja e SHBA-ve në vitin 1999 ishte një akt historik që i hapi rrugën lirisë dhe pavarësisë së Kosovës.Në momentet më të errëta të historisë tonë Shtetet e Bashkuara te Amerikes dhe aleatët e tyre qëndruan përkrah Ushtrisë Çlirimtare të Kosovës dhe popullit tonë, duke mbrojtur të drejtën tonë për të jetuar të lirë”. Mirënjohje të veçantë zonjusha Shurdhiqi i shprehu edhe shoqatës “Bijtë e shqipes”, e cila ruan e promovon gjuhën, kulturën e traditat tona kombëtare, duke shërbyer si një urë që lidh diasporën me atdheun, si dhe një shembull i shkëlqyer i bashkimit e organizimit të shqipatrëve në mërgim. Gjithashtu, ajo u shprehu mirënjohje edhe Bashkisë e qytetit të Philadelphias që ndër vite e kanë mbështetur dhe mirëpritur komunitetin tonë: “Kjo dëshmon vlerat e mëdha të këtij qyteti dhe respektin për diversitetin e tij. Miqësia mes popullit shqiptar dhe atij amerikan është një lidhje e fortë, e pathyeshme, dhe e përjetshme” – u shpreh zonjusha Shurdhiqi,

Këshilltari Michael Driscol, miku i madh i shqiptarëve të Philadelphias u uroi të pranishmëve Ditën e Pavarësisë së Kosovës, duke theksuar përpjekjet dhe synimet e popujve për liri e pavarësi. Zoti Driscol theksoi se lidhja e thellë me Philadelphian, Kosovën e Shqipërinë është dëshira për të jetuar të lirë. Ai ceku edhe 250 Vjetorin e Shpalljes së Pavarësisë së ShBA-ve që do të festohet në vitin 2026, duke theksuar se kjo do të jetë një festë e të gjitha demokracive të botës. Ai foli edhe për rolin e emigrantëve në zhvillimin e Philadelphias, duke vlerësuar posacërisht emigrantët shqiptarë që në këtë qytet dhe anëmbanë Amerikës kanë sjellur talentet e tyre, vlerat familjare e njerëzore, etikën e lartë të punës e ndershmërisë. Nuk mungoi as porosia e tij për ta ruajtur gjuhën, kulturën e traditat tona kombëtare. Ai vuri në pah edhe vëllazërinë që Kosova, Shqipëria e Amerika ndajnë së bashku.

Konsullja e Nderit, zonja Krista Bard përshëndeti në gjuhën shqipe: Urime Kosovë! Ajo shprehu kënaqësinë që po merrte pjesë në këtë manifestim. “Faleminderit që festoni lirinë, demokracinë” – u shpreh zonja Bard. Ajo theksoi se edhe Lituania ka kaluar një rrugëtim të gjatë për ta fituar lirinë. Gjithashtu, ajo përcolli edhe urimet e Këshillit të Konsujve të Nderit në Philadelphia. Zoti Alain Joinville përshëndeti në emër të Zyrës për Çështjet e Emigrantëve (Office for Emigrant Affairs). Ai i njoftoi të pranishmit për punën që bën kjo zyrë për t’i ndihmuar emigrantët e rinj për t’u përshtatur në jetën e qytetit të Philadelphias, ndihmon në promovimin e vlerave, programeve, zhvillimin e komuniteteve. Po ashtu, ai e ceku se Philadelphia është qytet që i mirëpret zemërhapur emigrantët dhe ku emigrantët ndihen mire: të mirëpritur e të vlerësuar. Pastaj zoti Joinville lexoi pjesë nga Proklamata përmes së cilës kryebashkiakja, Cherelle Parker, e shpallte 14 shkurtin e vitit 2025, Ditën e Pavarësisë së Kosovës në Philadelphia. Një nder i madh ky për Kosovën, të gjithë shqiptarët dhe miqtë e tyre. (Kjo ceremoni ishte planifikuar për datën 14 shkurt, por meqenëse atë ditë zhvillohej parada për ekipin e futbollit, “Eagles”, fitues të Kupën së Super Boël, atëherë ceremonia u shty për datën 18 shkurt).

Kështu edhe këtë vit shoqata “Bijtë e shqipes” përmbylli me plot sukses manifestimet e Ditës së Pavarësisë së Kosovës. Të gjithë të pranishmit uruan: Gëzuar Ditën e Pavarësisë Kosova jonë e dashur!

Philadelphia, më 18 shkurt 2025

Anila Kadija/

Me një ceremoni madhështore të mbajtur në ambientet e shkollës “Ardhmëria Westminster, St. Augustine’s”, komuniteti shqiptar në Londër festoi 17-vjetorin e Pavarësisë së Kosovës. Ky organizim, i udhëhequr nga një staf profesionistësh në bashkëpunim me të gjitha shkollat e Ardhmërisë dhe këshillin pedagogjik, mblodhi së bashku personalitete të rëndësishme nga Shqipëria, Kosova dhe Mbretëria e Bashkuar.

Në mesin e të ftuarve nderi ishin Ambasadori i Republikës së Shqipërisë në Mbretërinë e Bashkuar, Sh.T. Z. Uran Ferizi, Deputeti i Parlamentit Shqiptar dhe Kryetar i Bordit të Ardhmërisë, Z. Lavdrim Krashi, si dhe përfaqësues të lartë të institucioneve britanike, përfshirë Kryebashkiakun e Westminsterit, Këshilltarin Robert Rigby, dhe Kryetarin e Bashkisë Brent, Këshilltarin Tariq Dar.

Kryetari i Shoqatës Ardhmëria, z. Lutfi Vata, në fjalën e tij përshëndetëse falënderoi të gjithë të pranishmit për mbështetjen dhe uroi popullin e Kosovës me rastin e kësaj dite të shënuar.

Koncerti festiv: Një shfaqje mbresëlënëse e trashëgimisë shqiptare

Programi artistik nisi me një sfilatë unike të nxënësve të shkollave shqipe “Ardhmëria”, të cilët parakaluan me kostume tradicionale nga të gjitha trevat shqiptare, një iniciativë e parë e këtij lloji në Mbretërinë e Bashkuar. Atmosfera u elektrizua me interpretimin e këngës “Mora fjalë” dhe kërcimin energjik “Xhamadani vija-vija”, për t’i lënë vendin poezive dhe këngëve të tjera kushtuar Kosovës, të realizuara me pasion nga nxënësit.

Një moment i veçantë i mbrëmjes ishte interpretimi i këngës “Moj e bukura More” nga Stina Gerbeshi, ndërsa kulmi i programit erdhi me vallen e Tropojës, një simbol krenarie i trashëgimisë kulturore shqiptare të mbrojtur nga UNESCO.

Pjesa e dytë: Muzikë e lartë cilësie dhe interpretim artistik

Në vijim, publiku u magjeps nga interpretimet e dy artisteve të kalibrit ndërkombëtar, pianistes Mariela Cingo dhe solistes Sofia Kola, të cilat sollën një repertor të përzgjedhur, mes të cilave spikati kënga ikonike “Baresha” e Nexhmije Pagarushës.

Aktori i njohur Sokol Cahani përshëndeti të pranishmit me një interpretim poetik, ndërsa programi u moderua në mënyrë të shkëlqyer nga Ilira Mucaj, e cila, megjithëse e lindur dhe rritur në Kanada, dëshmoi një zotërim të përkryer të gjuhës shqipe.

Drejtuese artistike e manifestimit znj. Anila Kadija

Ky aktivitet i jashtëzakonshëm tregoi edhe një herë përkushtimin e komunitetit shqiptar në Londër për të ruajtur dhe promovuar gjuhën, kulturën dhe identitetin kombëtar, duke e përcjellë atë te brezat e rinj me krenari dhe dashuri.

Rafaela Prifti/

“Në ditën e rëndësishme të përvjetorit të 17 të pavarësisë së Kosovës, ju urojmë juve që ishit ambasadorë të saj kur Kosova nuk kishte ambasadë, ju që e mbajtët kurdoherë aktuale dhe në vëmendje çështjen e Kosovës në Nju Jork e Uashington ,” tha në fjalën e tij përshëndetëse Ambasadori Blerim Reka në pritjen diplomatike të Konsullatës së Përgjithshme të Republikës së Kosovës që u dha me këtë rast në restorantin Empire Steakhouse në Manhattan, mbrëmjen e ditës së hënë.

“Para së gjithash, lavdi dëshmorëve që çliruan Kosovën, Ushtrisë Çlirimtare të Kosovës me në krye komandantin Adem Jashari, dhe mirënjohje të përjetshme Shteteve të Bashkuara të Amerikës dhe NATO-s,” deklaroi drejtuesi i Konsullatës së Përgjithshme të Kosovës në Nju Jork.

“Festimet janë të shoqëruara gjithmonë edhe me evokim e reflektim për rrugën e gjatë të përpjekjeve që e sollën këtë ditë,” tha në bisedë Dr. Pashko Camaj, Sekretari i Federatës Pan-Shqiptare të Amerikës VATRA.

“Po mendoja sesa e re është një demokraci 17 vjeçare,” përsiati Harry Bajraktari, themeluesi i gazetës Illyria dhe aktivist i respektuar në bashkësinë shqiptare, “është si të jemi në vitin 1929 pas shpalljes së pavarësisë së Shqipërisë dhe në fund të viteve 1700 për Amerikën.”

Diplmati John Kelley ushtrues detyre i Misionit te Përhershëm të Amerikës në OKB përshëndeti festimin duke cilësuar se “rrugëtimi i Kosovës është shquar për nga vendosmëria dhe qëndrueshmëria. “Lidhjet midis dy popujve tanë janë të forta,” tha Kelley, dhe duke parashtruar perspektivat përfshirë ato ekonomike shprehu sigurinë se këto lidhje do të forcohen edhe më tej.

Organizatorët thanë se në pritjen diplomatike ishin rreth dyqind mysafirë prej të cilëve pesëdhjetë ambasadorë dhe diplomatë të shteteve anëtare të OKB-së, midis tyre edhe shtete që ende nuk e njohin pavarësinë e Kosovës.

Midis pjesëmarrësve ishin veprimtarë të njohur dhe përfaqësues të shoqatave patriotike shqiptare dhe kulturore, anëtarë të trupit diplomatik, sipërmarrës shqiptarë-amerikanë, avokatë, profesorë dhe akademikë, artistë, publicistë etj.

E ardhur për herë të parë në një kremtim të tillë, Maya, duke qëndruar pranë gjyshes së saj Fadilja Çunmulaj tha se ishte e gëzuar që mori pjesë në festimin e 17 vjetorit të pavarësisë së Kosovës.

Nga Keze Kozeta Zylo/

7 Shkollat Shqipe “Alba Life” Ambasador i Kombit si në Staten Island, Brooklyn, Queens, Bronx, Manhattan më parë, Online dhe Albany kjo e fundit shkolla më e re në Diasporë festuan cep më cep të Nju Jorkut Ditën e Shenjtë të Pavarësisë së Kosovës sonë martire.

TV dhe Shkolla Shqipe “Alba Life” u krijuan në funksion te Kombit dhe Kosovës 18 vjet më parë atëhere kur milloshevici, hitleri i ballkanit dhe shteti i tij nazist, vrau, therri, dënoi, dhunoi, ushtroi genocid mbi popullin e pafajshëm të Kosovës. Si themelues Qemal Zylo bashkë me familjen e ndjemë të nevojshme për të qenë një zë më shumë si media dhe shkolla shqipe në Diasporë.

Duke organizuar aktivitete në kolegj, apo duke marrë pjesë aktive në demonstrata, sheshe për Kosovën, ishte më se e domosdoshme për të krijuar TV dhe shkollat shqipe pasi mijëra fëmijë në këto aktivitete flisnin vetëm anglisht dhe të sensibilizonim mbarë opionionin.

Sivjet në 17 Vjetorin e saj kemi bekimin e Kosovës të patriotëve të mëdhenj dhe njerëzve të thjeshtë pasi nga një shkollë që ishte në fidanishten e Staten Island u bë dhe u përhap në 7 shkolla në gjithë Nju Jorkun. Nxënësit nën udhëheqjen e mësueseve profesioniste si: Entela Muda, Elona Shkreta, Fatlinda Bajçinca Gashi, Rozeta Hyseni, Helena Ujkaj, Albana Lazri, Erinda Isufaj, Vjollca Skënderi, Gresila Basha, Era Shkëmbi Çorbaxhi dhe Edvina Belishta dhanë koncerte të larmishme patriotike nëpër të gjitha klasat e tyre. Ata i kënduan Adem Jasharit, Kosovës, UCK-së, intepretuan poezi nga Ali Podrimja, Azem Shkreli, Agim Shehu dhe të tjerë që i kanë kënduar me aq dashuri Kosovës dhe Kombit.

Metodat e mësimdhënies janë të larmishme dhe studimi i historisë të Kosovës i ndihmon ata të respektojnë vërtetësinë e burimeve historike, dhe në të ardhmen jam e sigurtë se do ta kuptojnë historinë e falsifikatorëve serbë kundër shqiptarëve, ndryshe padija për të shkuarën na bën skllevërit e saj.

Mësuesit me klasat më të reja përqëndrohen kryesisht në informacionin e panjohur apo pjesërisht për nxënësin ku zhvillohet kompetenca e lëndës “analiza shkak – pasojë” .

Mësueset me profesionalizëm ushtrojnë komunikimin gojor dhe krijojnë ndërveprime në klasë që i ndihmon nxënësit të jenë më të përfshirë gjatë orës së mësimit dhe më të motivuar për të mësuar historinë.

Koncertet ishin të larmishme të bukura dhe atdhetare. Tek i shihja me flamujt e shtetit të Kosovës dhe të Kombit ndihesha tejet e emocionuar, e gëzuar dhe e motivuar për të punuar më shumë. Ata kërcyen vallen e Flamurit, vallen e Kosovës, vallen e Xhamadanit, Pogonishten, valle të tjera dhe natyrshëm shumë prej tyre duken sikur janë Ansambli i shtetit.

Vallja e Flamurit, Vallja e Çamërisë nga nxënësit në Staten Island dhe K’cimi i Tropojës nga nxënësit e Alba Life në Bronx u performua në Bashkinë e Nju Jorkut dhe Parlament ne Albany ku pjesëmarrësit i shoqëruan me duartrokitje të zjarrta. K’cimi i Tropojës pranuar nga UNESCO është krenari për ne që e performojmë për 18 vjet radhazi.

Të gjithë prindërit falenderojnë, shprehin mirënjohjen e tyre të pakufishme për themeluesit, mësuesit që punojnë papushuar dhe me një korrektësi të jashtëzakonshme sikur të jemi shkollë Harvardi pasi sipas tyre nuk falet një minutë të iki bosh.

Një gjyshe nga Kosova që më sjellë nipin dhe mbesën e saj pasi më uroi Gëzuar Pavarësinë e Kosovës më tha se nuk ka gëzim më të madh kur unë shoh gjithë këta fëmijë shqiptarë që mblidhen si zogjtë së bashku dhe cicërrijnë në gjuhen tonë hyjnore. sllobodani krimin e parë që bëri ishte të mbylleshin shkollat shqipe. Ndërsa mësuese Fatlinda Bajçinca Gashi nga Prishtina tha se unë gjithmonë prekem dhe sot kujtoj ditët e trishta të miat kur regjimi serb na mbylli shkollat shqipe dhe ne vazhduam nëpër shtëpia dhe nuk e lamë asnjhërë gjuhën tonë.

E meqënse jemi tek Pavarëia e Kosovës, për koicidencë sot Universiteti i Prishtinës ka 55 Vjetorin e krijimit të tij ku i ndjeri Prof. Isa Bajçinca është bashkëthemelues i tij. Ai ishte gjuhëtar shqiptar, ishte profesori më i dalluar i gjuhës dhe ish pjesëmarrës në Kongresin e Drejtshkrimit në Tiranë më 1972. Ai ka ligjëruar lëndën Kultura e Gjuhës si dhe Sintaksën e Gjuhës Shqipe. Ka qenë autorë e bashkautorë i shumë librave shkollorë. Ai ishte gardiani më i fuqishëm i gjuhës së unisuar shqipe.

Sjellë shembuj nga mësueset nga Kosova meqënse jemi në ditën e shenjtë të Kosovës dhe ne kemi fatmirësisht shumë nxënës, prindër që janë nga Kosova dhe që janë mbështetës shumë të fuqishëm të Shkollave Shqipe “Alba Life” .

Të dëgjosh nxënësit kur recitojnë poema është emocionuese. Ja disa poetë Ali Podrimja si: Me shekuj kam shitur gjakun e rritur jam me gjakun e shitur/ Me shekuj kam hëngër me veten/ e ditur s’kam të qesh me veten e tepruar… Miq, Kosova është gjaku im që nuk falet!

Apo Azem Shkreli si: Në vargun me krushq atdheu është krushku i pare/ Në të tëra meshat shenjte ai është Meshari/ dhe poeti i shquar tepelenas Agim Shehu si: Posi nga zër’ i perëndive

u zgjua kontinenti plak/ Nga cili akt i tragjedive/ sot mbi Kosovë kulloi kaq gjak?

Të gjithë nxënësit me seriozitetin sikur të jenë student universiteti e uruan Kosovën nga zemra e tyre dhe të jetë e pavarur përjetësisht. Në Bronx ishte ndarë dhe torta për Kosovën dhuruar nga prindi dhe mbështetëse e shkollave Mirela Arifaj.

Ndërsa shkruaj këtë reportazh për aktivitetete e Shkollave Shqipe “Alba Life” në të gjithë Nju Jorkun nuk e di pse nuk më ndahen nga mendja vargjet aq të dashura dhe të ndjera për mua dhe me këngë në buzë vazhdoj të bëj ritualin tim:

Dashkam sonte ta tund botën,

Pikën e lotit ta bëj krua,

Për Kombin të ngre Flamurin,

Me Kosovën mish e thua.

Gëzuar Kosova jonë dhe me shpirt e profesionalizëm e festuam Cep me cep 17 Vjetorin e Pavaresise së Kosoves nga Alba Life, Ambasadorit i Kombit Amerikë.

Gëzuar Kosova jonë!

-Bilbili i Kosovës, Mbretëresha e muzikës shqiptare, Këngëtarja e Shekullit, Artiste e Merituar, Nderi i Kombit, janë disa prej epiteteve dhe dekoratave për këngëtaren e madhe shqiptare, Nexhmije Pagarusha/

-Në 7 Shkurt 2014, Nexhmije Pagarusha qante per shuarjen e Vaçe Zeles “Unë Vaçen e kam shpirt. Unë me të do jetojë derisa të shkojë edhe unë te ajo…” Fliste e qante këngëtarja për këngëtaren, e pyetur nga korrespondenti në Kosovë tani i Gazetës DIELLI/

Gazeta DIELLI nga korrespondenti në Kosovë Behlul Jashari

PRISHTINË, 7 Shkurt 2025/ Bilbili i Kosovës, këngëtarja Nexhmije Pagarusha, e lindur në 7 Maj 1933 në fshatin Pagarushë, ka ndërruar jetë në moshën 86 vjeçare, njoftohej në 7 Shkurt 2020.

 Bilbili i Kosovës, Mbretëresha e muzikës shqiptare, Këngëtarja e Shekullit, Artiste e Merituar, Nderi i Kombit, janë disa prej epiteteve dhe dekoratave për këngëtaren e madhe shqiptare, Nexhmije Pagarusha, për të cilën vlerësimet më të larta shpreheshin edhe në mesazhet e shumëta të ngushëllimit.

E vlerësonte lart edhe media, duke theksuar se “Nexhmije Pagarusha, ikona e muzikës shqipe, ishte e njohur si një grua e cila gjatë gjithë karrierës së saj i ka shërbyer me nder dhe dashuri atdheut të saj përmes artit” dhe se “mendohet se ajo ka interpretuar mbi 150 këngë”.

7 SHKURT 2014: QANTE KËNGËTARJA PËR KËNGËTAREN

Pikërisht në 7 Shkurt 2014, kam shkruar se  Bilbili i Kosovës Nexhmije Pagarusha qante për Vaçe Zelen që u shua një ditë më parë në Basel të Zvicrës në moshën 75 vjeçare:

PËR VAÇE ZELEN SOT QANTE EDHE BILBILI I KOSOVËS

Prishtinë, 7 Shkurt 2014-Behlul Jashari/ Për Vaçe Zelen sot qante Nexhmija Pagarusha, u përgjigj me shumë lotë kur e pyeta si ndihet Bilbili i Kosovës në këtë ditë lamtumire nga Prishtina të Ikonës dhe Mbretëreshës së Këngës Shqiptare.

“Unë Vaçen e kam shpirt. Unë me të do jetojë derisa të shkojë edhe unë te ajo…”, flet  këngëtarja për këngëtaren.

Dhe, si ta ngushëllojë veten vazhdon: “Është me mua Vaçja.Vetëm trupi i saj nuk është, se shpirti i saj është me mua…”

“E takimi i parë ju kujtoht sot?”, e pyesim Nexhmijen.

“Takimi i parë ishte në Shqipëri në vitin 1971. E kam parë në skenë, nuk më ka ndodhë kurrë në jetë dikush të shkëlqejë si ajo, shkëlqente njerëzimi, e mira e saj, shpirti i saj i shëndritshëm…Edhe kur e kam takuar nga afër më është dukur ashtu, më e bukura, më e mira…Unë kam takuar shumë njerëz, kam parë botën, por si Vaçja që më ka hyrë në shpirt nuk kam parë”, shprehet Nexhmija.

Dhe vijon gjithnjë mes lotëve: “I dua të gjithë njerëzit, më duan…Po ajo, Vaçja, është imja, dhe unë ate e mbajë në shpirt. Trupi i saj shkoi, por shpirti i saj është te unë. Ngushëllime gjithë Shqipërisë, gjithë Kosovës, gjithë kombit dhe gjithë njerëzve…”, shprehet Bilbili i Kosovës.

Nexhmija kujton komunikimin e saj të fundit me Vaçen. “Tash kur kishte dalë prej spitalit, që ishte katër muaj, bisedova edhe u gëzova shumë se më tha ishte më mirë…”

 Nexhmije Pagarusha, mes shumë artistëve, shumë njerëzve të pikëlluar kishin ardhur pasditen e sotme në Aeroportin ndërkombëtar “Adem Jashari”  në Prishtinë për të pritur mbërritjen e trupit të pajetë të këngëtares së njohur shqiptare, Vaçe Zela, dhe për lamtumirën artistes së madhe.

Mes tyre ishte, ambasadori i Shqipërisë në Kosovë, Islam Lauka, i cili tha se këtu në Prishtinë plotësohej amaneti i fundit i Vaçe Zelës. “Siç më thanë edhe motrat e saj, ka kërkuar vetë Vaçja që të kalojë nëpër Kosovë, drejt Shqipërisë… Me zërin e saj, me shpirtin e saj, i ka kënduar këtij vendi, i ka kënduar kombit tonë…”, tha ambasadori shqiptar Lauka.

Si një yll, Vaçe Zela, u shua dje në një spital në Basel të Zvicrës, pas një sëmundjeje të gjatë, në moshën 75 vjeçare.

NGA ARKIVI

4 Maj 2010: KOSOVË – NEXHMIJE PAGARUSHA DEKOROHET ME  ÇMIMIN “ARTISTE E MERITUAR”

PRISHTINË, 4 Maj 2010- B.Jashari/.- Nexhmie Pagarusha, e njohur edhe si “Bilbili i Kosovës”, u dekorua sot nga  Presidenti i Republikës së Kosovës, Fatmir Sejdiu, me çmimin “Artiste e Merituar” për veprimtarinë dhe kontributin e veçantë dhënë kultivimit të muzikës dhe këngës së përsosur shqipe, teatrit dhe filmit.

Dekorata u dorëzua sot solemnisht në ambientet e zyrës së Presidentit të Kosovës.

Në arsyetimin e dekorimit të znj. Pagarusha, Presidenti Sejdiu theksoi se “kontributi i Nexhmije Pagarushës në fushën e krijimit, kultivimit, interpretimit dhe të promovimit të artit muzikor shqiptar është i një rëndësie të jashtëzakonshme”.

“E përkushtuar gjithë jetën për të  ngritur vlerat e artit muzikor, duke krijuar identitet referues kulturor, duke qenë zë i fuqishëm i shpirtit dhe vlerave estetike shqiptare, ajo ishte dhe mbetet shenjë identifikuese  e Kosovës dhe simbol i artistit që me veprën e vet komunikon në mënyrë autentike dhe përherë frymëzuese me një audiencë të gjerë muzikore”, theksohet në arsyetim.

Po ashtu vlerësohet se Nexhmije Pagarusha “është shembulli më i mirë i personalitetit që tërë jetën ia kushtoi zhvillimit dhe ngritjes së artit dhe kulturës shqiptare dhe si e tillë ajo është frymëzim nxitës për brezat krijues dhe interpretues të artistëve”.

Presidenti Sejdiu e dekoroi znj. Pagarusha në 77-vjetorin e lindjes së saj dhe dekorimi u bë në  bazë të Nenit 84, pika 28 të Kushtetutës së Republikës së Kosovës, si dhe në bazë të Nenit 3, 34 dhe 49 të Rregullores mbi Dekoratat, Urdhrat dhe Titujt e Nderit të Kosovës që i jep Presidenti i Republikës së Kosovës dhe Procedurat e Dhënies së tyre.

27 Nëntor 2012: “NDERI I KOMBIT” PËR NEXHMIE PAGARUSHËN

     TIRANË, 27 Nëntor 2012/ATSH/.- Presidenti Bujar Nishani nderoi të martën me Urdhrin “Nderi i Kombit” këngëtaren e madhe shqiptare, Nexhmie Pagarusha, me motivacionin: “Artistes së shquar me zë të rrallë dhe interpretim virtuoz, që i dha shpresë dhe besim popullit shqiptar të Kosovës në vitet e vështira të pushtimit serbomadh dhe që i shtoi vlera dhe cilësi të reja kulturës shqiptare, duke u bërë pikë e rëndësishme referimi në historinë e saj”.
     Në ceremoninë e zhvilluar në Presidencë, ku ishin të pranishëm personalitete të artit dhe kulturës shqiptare,
Presidenti vlerësoi veprën e madhe kulturore dhe artistike të zonjës së madhe shqiptare, Nexhmie Pagarusha.
     “Gjatë 100 viteve, ne shqiptarët kemi qenë të pushtuar e të ndarë, por kulturën e këngën kurrë nuk mundën ta izolojnë, ta pengojnë, apo ta ndrydhin. Për ne është fat që, veçanërisht në momentet e vështira të izolimit, mesazhi përmes artit, përmes shpirtit të zonjës së madhe Nexhmie Pagarusha, ishte ndër gjërat e pakta që na mbante gjallë shpesën për të qenë një ditë pranë njëri-tjetrit”, u shpreh Nishani.
     Artistja e madhe, me fjalët e saj i emocionoi të pranishmit, ndërsa përcolli urimet më të mira për ditën e gëzueshme të 100-vjetorit të Pavarësisë. /a.s/ /m.m/