-Komiteti Olimpik i Kosovës dërgon në Komitetin Olimpik Ndërkombëtar ankesën për ndalimin në kufi që Serbia i bëri delegacionit të boksit të Kosovës rrugës drejt pjesëmarrjes në Kampionatin Botëror të Boksit në Beograd/

PRISHTINË, 1 Nëntor 2021-Gazeta DIELLI nga korrespondenti në Kosovë Behlul Jashari/

 Komiteti Olimpik i Kosovës ka deponuar ankesën në Komitetin Olimpik Ndërkombëtar (KON/IOC)  pasi  nga autoritetet serbe në kufi delegacionit të boksit të Kosovës tre herë iu refuzua hyrja në shtetin e Serbisë, ku do të duhej të merrnin pjesë në Kampionatin Botëror të Boksit, që po mbahet në kryeqytetin serb Beograd.

Ekipi i boksit u ndalua në kufi nga policia serbe, e cila me urdhër të Qeverisë së Serbisë nuk lejoi ekipin e Kosovës të kalonte kufirin tek “Dheu i Bardhë” një herë dhe në Merdarë dy herë, në datat 23 dhe 24 Tetor 2021.

Komiteti Olimpik i Kosovës bëri të ditur sot se ka deponuar gjithë materialin me dëshmitë e refuzimit të hyrjes së ekipit të boksit në kufi, duke bashkëngjitur foto, video, shkrime të mediave ndërkombëtare, letrat dërguar Federatës Botërore të Boksit Amator (AIBA) nga Komiteti Olimpik i Kosovës, Federata e Boksit të Kosovës, etj.

Në e letrën e dërguar nga presidenti i Komitetit Olimpik të Kosovës, Ismet Krasniqi, për presidentin e Komitetit Olimpik Ndërkombëtar, Thomas Bach, krahas përshkrimit të gjithë ngjarjes në mënyrë kronologjike, është kërkuar nga shtëpia e Lëvizjes Olimpike në botë, të marrin të gjitha veprimet e duhura ndaj organizatorëve të botërorit të boksit dhe të gjithë akterëve të përfshirë në moslejimin e hyrjes së ekipit të boksit të Kosovës në Serbi.

“Në rast se këto veprime shpëtojnë pa ndonjë dënim të vërtetë, mesazhi i gjithë komunitetit sportiv do të jetë se sporti mund të përdoret si platformë e veprimeve politike dhe dëmtuese. Ekipi i Kosovës është dëmtuar në të gjitha aspektet e mundshme: moralisht, fizikisht, psikologjikisht dhe financiarisht. Ne jemi bërë edhe një herë dëm kolateral i marrëdhënieve të paqarta dhe ne nuk jemi gati të vazhdojmë duke vuajtur nga regjimet politike të një vendi tjetër. Kjo është një mundësi e mirë për familjen olimpike, në mënyrë që të sjellin vendime të përshtatshme dhe të drejta, dhe t’i tregojmë botës se jemi gati t’i mbrojmë vlerat tona dhe për këtë nevojiten të përfshihen të gjitha palët e interesit në sport”, thuhet mes tjerash në letrën e presidentit Krasniqi.

Drejtuesit e Komitetit Olimpik të Kosovës, presidenti Ismet Krasniqi dhe sekretari i përgjithshëm Besim Aliti janë në kontakt të vazhdueshëm me drejtuesit e Komitetit Olimpik Ndërkombëtar, me të cilët kanë diskutuar gjerë e gjatë çështjen e boksit gjatë takimeve në Kretë të Greqisë, ku javën e kaluar u mbajt Asambleja e Përgjithshme e Asociacionit Ndërkombëtar të Komiteteve Olimpike (ANOC).

Behlul Jashari

Kjo qendër është, sepse ju jeni në qendër, u tha kryeministri Kurti kampionëve olimpikë, në hapje të Qendrës Nacionale të Xhudos

Pejë, 28 shtator 2021

Jam shumë i nderuar dhe i lumtur, që sot po i hapim dyert e kësaj ndërtese e cila është realizuar në bashkëpunim me Federatën Botërore të Xhudos dhe Federatën e Xhudos së Kosovës, tha Kryeministri i Republikës së Kosovës, Albin Kurti, në fjalën e rastit në inaugurimin e Qendrës Nacionale të Xhudos së Kosovës, në Pejë.

Kryeministri Kurti iu falënderua të dy partnerëve të këtij projekti për kontributin e dhënë në zhvillimin e sportit të xhudos në Kosovë.

“Bashkërisht, u kemi ndërtuar shtëpi të re kampionëve aktualë olimpik dhe kampionëve të tjerë të ardhshëm”, tha kryeministri duke shprehur besimin se Qendra Nacionale e Xhudos do të bëhet shtëpi edhe e shumë kampionëve të tjerë olimpikë.

Kryeministri njoftoi që projektet e tilla do të vazhdojnë, duke ndërtuar hapësira të tjera të reja përcjellëse, në të cilat, siç tha ai, do të presim sportistë vendorë e të huaj – krejt kjo, me qëllim të rritjes së rezultateve tona sportive dhe të promovimit të sportit si mekanizëm për ruajtjen e mirëqenies sonë shoqërore. “Le ta bëjmë sportin te ne, kulturë tonën”, shtoi ai.

Në përmbyllje të fjalës, kryeministri Kurti tha se është sfidë e jona e përbashkët që ta vazhdojmë traditën e sukseseve sportive në arenën ndërkombëtare. Ai theksoi se shtetet e rajonit, Evropës dhe të botës, tashmë e kanë kuptuar kapacitetin që ne e kemi.

“Nuk mund t’i befasojmë më. Është lufta jonë e radhës, t’i bëjmë të pranojnë vendin që e zë Kosova në hartën e botës”, tha Kryeministri i Republikës së Kosovës, Albin Kurti.

Fjala e plotë e Kryeministrit Kurti:

E nderuara Presidente, znj. Vjosa Osmani,

Të nderuar Kampionë Olimpikë, sportistë dhe ish-sportistë, urime edhe për këto medalje e nderime presidenciale,

I nderuari kryetar i Federatës Botërore të Xhudos, z. Marius Vizer,

I nderuari ministër i Ministrisë së Kulturës, Rinisë dhe Sportit, z. Hajrulla Çeku,

I nderuari kryetar i Federatës Nacionale të Xhudos, z. Agron Kuka,

Të nderuar kryetarë të partive opozitare, z. Memli Krasniqi dhe z. Ramush Haradinaj,

I nderuar kryetar i komunës së Pejës, z. Gazmend Muhaxheri,

Përshëndetje juve dhe të gjithë të tjerëve të pranishëm,

Kam kënaqësinë që të jem sot këtu, për të shënuar një fillim të ri të sportit të xhudos në Kosovë. Për dallim nga herat e kaluara, ku kryefjala ishin sukseset e xhudistëve tonë, kësaj radhe po e shënojmë ndërtimin e Qendrës Nacionale të Xhudos në Kosovë.

Urime të gjithëve.

Këtu, në këtë vend të rrethuar me Malet e Rugovës – në këtë lagje të Pejës, Kosova prodhoi katër kampionë Olimpikë, tre sportistë e një trajner – Majlindën, Distrian, Norën dhe Dritonin.

Ju që vini nga ky vend i maleve të larta e keni lartësuar gjithë vendin tonë dhe secilin qytetar të tij.

Këto male dinë shumë për ju, kanë parë e kanë dëgjuar rrugëtimin tuaj sfidues drejt sukseseve në sport. Ju kanë përcjellur për rrugë të mbarë në çdo garë që keni përfaqësuar Kosovën deri tash, dhe ju kanë pritur krah-hapur, sepse në çdo kthim ja keni shtuar vlerën me medaljet e juaja.

Duke ju falënderuar juve të dashura kampione, malet e Rugovës janë bërë Olimpi ynë sportiv. Apo, siç do të thoshte poeti Ervin Hatibi, “malet e larta përulen para jush”.

Padyshim, nevoja për infrastrukturë sportive është tejet e rëndësishme për zhvillimin e sportit. Besa, disa prej sporteve as nuk mund të ushtrohen pa infrastrukturë adekuate e me standarde ndërkombëtare.

Mirëpo, rrallëherë, dëgjojmë tregime të tilla – ku fillimisht fitojmë medalje Olimpike, e pastaj e ndërtojmë infrastrukturën. Kjo edhe është storja juaj e suksesit.

Kjo qendër, nuk do të ishte as e njëjtë dhe as e mundur pa suksesin tuaj të deritanishëm. Sot, kjo qendër do të ndihej e zbrazët pa ju.

Kjo qendër është, sepse ju jeni në qendër.

Ekipi i xhudos, jeni shembulli që duhet ta ndjekim në të gjitha fushat tjera sepse kur ka punë, suksesi nuk qëndron larg pavarësisht se prej nga vjen ai.

Jam shumë i nderuar dhe i lumtur, që sot po i hapim dyert e kësaj ndërtese e cila është realizuar në bashkëpunim me Federatën Botërore të Xhudos dhe Federatën e Xhudos së Kosovës.

Për të dy partnerët e këtij projekti: “Faleminderit për kontributin e dhënë në zhvillimin e sportit të xhudos në Kosovë”. Bashkërisht, u kemi ndërtuar shtëpi të re kampionëve aktual olimpik dhe kampionëve të tjerë të ardhshëm.

Dua të them, se deri më tani, nuk ka asgjë më madhështore, e asnjë sukses më meritor për të cilin shteti ynë duhet të kontribuoj e investoj.

Andaj, po shfrytëzoj rastin t’ju informoj se ky projekt do të vazhdojë edhe më tutje, duke ndërtuar hapësira të tjera të reja përcjellëse, në të cilat do të presim sportistë vendorë e të huaj – krejt kjo, me qëllim të rritjes së rezultateve tona sportive dhe të promovimit të sportit si mekanizëm për ruajtjen e mirëqenies sonë shoqërore. Le ta bëjmë sportin te ne kulturë tonën.

Ashtu siç kam thënë më herët, po e them përsëri, sporti është prioritet shtetëror. Andaj, njësoj sikur këtë qendër sot, në vazhdim do t’i përurojmë edhe qendrat e tjera sportive të cilat janë në planifikim apo në ndërtim e sipër.

Qëllimi jonë i përbashkët duhet të jetë që të rrisim numrin e të rinjve që merren me sportin e xhudos, e njëkohësisht të punojmë që në Lojërat Olimpike të ardhshme, të fitojmë edhe medalje të tjera.

Kjo do të jetë edhe më e lehtë për të gjithë, e veçanërisht për Dritonin, konsideruar se tash Majlinda do të jetë pjesë e ekipit të tij të trajnerëve. Është kënaqësi e jashtëzakonshme kur një kampione Olimpike si Majlinda, vazhdon rrugëtimin e saj në sport edhe pas përmbylljes së karrierës së saj aktive.

Është edhe më madhështore kur kjo qendër në krye të trajnerëve ka Majlinda Kelmendin.

Për këtë, sot këtu para jush, ju njoftoj që në mbledhjen e radhës të Qeverisë së Kosovës, Ministria e Kulturës, Rinisë dhe Sportit do të propozojë vendimin për shpalljen e Majlindës – Qytetare me Merita të Veçanta.

Për atë çfarë Majlinda i ka sjellë vendit tonë, kjo është më e pakta që ne mund të bëjmë për të personalisht – përtej investimeve që bëhen në sportin e xhudos, apo në klubin Ippon.

Po ashtu, nesër do të nënshkruhen vendimet për shpërblimet e dy kampioneve të reja Olimpike, Norës dhe Distrias. Që të tria bashkë, e keni vendosur Pejën në hartën e botës dhe e keni ranguar Kosovën në piedestal kundrejt shteteve të tjera.

Për një moment, të duket imagjinare ta mendosh se Kosova triumfon para shteteve që janë fuqi botërore. Por në fakt, është realitet të cilin të gjithë ne po e gëzojmë e të gjithë ne duhet ta dimë e ta vlerësojmë.

Është sfidë e jona e përbashkët që ta vazhdojmë traditën e sukseseve sportive në arenën ndërkombëtare. Shtetet e rajonit, Evropës dhe të botës, tashmë e kanë kuptuar kapacitetin që ne e kemi. Nuk mund t’i befasojmë më. Është lufta jonë e radhës, t’i bëjmë të pranojnë vendin që e zë Kosova në hartën e botës.

Uroj që të gjithë ta gëzoni këtë hapësirë stërvitore, që të mos ju ndalen sukseset asnjëherë. Besoj se ky projekt do të sigurojë vazhdimin e suksesit tuaj në të ardhmen. Nuk kam dyshim se ky vend do të bëhet shtëpi edhe e shumë kampionëve të tjerë olimpikë.

Ju faleminderit shumë dhe e gëzofshit Qendrën Olimpike.

Suksese të gjithëve.

Albano Kolonjari

Gjithçka dukej si dikur, sikur asgjë të mos kishte ndryshuar, sikur Ai, të mos kishte qenë kurrë larg. Cristiano Ronaldo shënoi përsëri. Manchester United fitoi përsëri,  me golat e tij. Tifozët u gëzuan përsëri. Ai ishte në shtëpi, më në fund, ishte rikthyer në shtëpinë e tij, aty ku shumë vite me parë kishte marrë rrugë udhëtimi të tij prej ylli në futboll. Tifozët e Manchester United, në Old Trafford e kishin të vështirë të gjenin një biletë. Për ata që gjetën ishte një kënaqësi e vecantë. Ai Kristiano Ronaldo do të zbriste sërisht në fushë me bluzën e Manchester United. Gjatë tetë viteve të fundit ata që ishin shumë të vegjel janë rritur me tregimet mbi të, ata që e kanë parë në stadium, tashmë janë me fat të rishikojnë idhullin e tyre. Askush nuk ka qenë në gjendje ta bëjë Manchester United në Old Trafford, të ndihet përsëri i paepur sic e ka bërë Kristiano Ronaldo. Asnjëherë nuk është e lehtë të kthejmë orën dhe të rikrijomë momente magjike- prandaj dhe ata të vjterit  thonë se kurrë mos u kthe mbrapa- por karriera e futbollit të Cristiano Ronaldos gjithmonë ka sfiduar logjikën, dduke bërë një kthim spektakolar në Manchester United me dy gola në fitoren 4-1 kundër Newcastle United. Dy gola të cilat erdhën 18 vjet pas golit të parë të shënuar në Old Trafford për Manchester United (2012-2013). “Ishte një moment i pabesueshëm. Isha shumë nervoz dhe po mendoja mbrëmë se doja të luaja mirë dhe të tregoja se isha ende i aftë të ndihmoja ekipin. Ky klub është i pabesueshëm dhe unë jam shumë krenar. Unë do të jap gjithçka për t’i bërë ata krenarë për mua “, u shpreh Kristiano Ronaldo. Kjo ishte ndeshja e parë i Ronaldos për klubin e Manchester United  që nga transferimi i tij prej 28 milionë dollarësh nga Juventusi në gusht të këj viti.  Por jo c’do gjë ka qënë e lehtë për Ronaldon në këtë ndeshje. Një pankartë me fjalët “#Besoni Kathryn Mayorga” – me emrin e gruas që akuzoi Ronaldon për përdhunim u shfaq në stadium. Mayorga tha se ajo ishte përdhunuar në një dhomë hoteli në Las Vegas në 2009, por në atë kohë nuk zbuloi emrin e kujt ishte përdhunuar, por vite më vonë ajo akuzoi Ronaldon. Gjthsesi kjo nuk ja prishi festën Ronaldos që vazhdon të vendosë rekorde të cilat do të jenë të vështirë të thyen. Tek Manchester United, pas gjashtë vitesh Ronaldo u largua duke shënuar 118 herë dhe dukeluajtur 292 ndeshje. Tek Real Madridi është vendi ku Ronaldo  shënoi  450 gola në 438 ndeshje. Dhe në tre vitet e tij tek Juventus, ai goditi rrjetën 101 herë të tjera në 134 ndeshje. Me dy golat e shënuar në ndeshjen e tij të rikthimit me  Ronaldo ka shënuar 676 gola në 895 paraqitje në klub – si dhe 229 asistime, duke qënë golashënuesi më i mirë i të gjithë kohrave në historinë e futbollit.