Ekonomi – Page 245 – Dielli

ARRESTOHEN TATIMORET, 2 TE ARRESTUAR, 7 NE KERKIM

November 8, 2013 by dgreca

Zbulohen shkeljet ligjore me 11 kompani kineze u blenë me falsifikim. Dy zyrtarë në pranga, ish-kreu i Tatimeve të Tiranës dhe 6 vartës shpallen në kërkim./

Gjykata urdhëron arrestimet e para në lidhje me vjedhjen e 5.2 milionë dollarëve me anë të skemës abuzive të rimbursimit të TVSH-së nga Drejtoria e Tatimeve në Tiranë.

Drejtoresha e Kontrollit Tatimor në këtë institucion, Afërdita Hysa dhe Tahir Kuka, inspektor i Procedurave të Rimbursimeve, kanë rënë në pranga. Në kërkim janë shpallur Ismail Muça, ish-drejtor i Tatimeve të Tiranës, Lauren Vata, ish-përgjegjës sektori dhe tre inspektorë të Drejtorisë së Tatimeve. Masa e arrestit në mungesë është marrë edhe ndaj dy biznesmenëve, Mirjan Beneja dhe Gjergji Tupe, të cilët kanë përfituar paratë e rimbursuara dhe më pas i kanë rishpërndarë ato, siç dyshohet, te të gjithë të akuzuarit dhe persona të tjerë.
Pesë abuzimet
Prokuroria deklaroi dje se nuk mund të japë të dhëna për hetimin për sa kohë nuk janë ekzekutuar masat e arrestit të vendosura nga gjykata më 6 nëntor 2013. Megjithatë, gazeta “Panorama” ka mësuar dje pesë shkeljet për të cilat janë ngritur akuzat e “shpërdorimit të detyrës”, “vjedhjes me pasoja të rënda” dhe “pastrimit të produkteve të veprës penale” ndaj shtatë zyrtarëve të Tatimeve dhe dy biznesmenëve. Sipas hetimeve, shuma prej 5.2 milionë dollarësh është nxjerrë nga buxheti i shtetit dhe është paguar në llogaritë e 11 kompanive me anë të pagesave në 11 kësteve në gusht-shtator 2013. Kompanitë të cilave u është bërë pagesa deri në qershor-korrik 2013 kanë pasur pronarë kinezë. Në verën e këtij viti, për 11 subjektet në QKR janë paraqitur dokumentet e blerjes së tyre dhe si pronarë janë regjistruar shtetasit Mirjan Beneja dhe Gjergji Tupe. Menjëherë ata kanë aplikuar për rimbursimin e TVSH-së së këtyre kompanive (tepricë kreditore e krijuar në vitet 2004-2005). Këtu ka ndodhur shkelja e parë, pasi dokumentet e blerjes së 11 kompanive rezultojnë se janë tërësisht false. Megjithatë, “pronarët e rinj” të 11 kompanive kanë aplikuar për faliment në QKR dhe kanë kërkuar që shteti t’u shlyejë rimbursimin e TVSH-së (në total 5.2 milionë dollarë). Procedura ka vazhduar pa pengesa edhe pse pas aplikimit, ligji detyronte Tatimet të verifikonin me imtësi. “Shkelja e dytë është kontrolli financiar i munguar. Ligji kërkon që Tatimet të bëjnë kontroll të thelluar për pesë vitet e fundit dhe vitet për të cilat kërkohet rimbursimi. Zyrtarët e akuzuar të Tatimeve kanë bërë verifikim formal, pasi kompanitë nuk kanë pasur aktivitet në pesë vitet e fundit. Sipas hetimit, verifikimi është bërë vetëm për vitet 2008-2013 dhe është thënë se “kompanitë nuk kanë aktivitet” duke mos u kryer asnjë verifikim për vitet kur ishte krijuar “teprica kreditore”. Shkelja e tretë ka ndodhur në faktin se e gjithë procedura ka zgjatur më pak se një javë, nga aplikimi deri në derdhjen e parave gjithçka ka ndodhur në pak ditë. Abuzimi i katërt është se të gjitha vlerat e kërkuara nga kompanitë në aplikimin/kërkesën për rimbursim vetëm sa janë lënë në fuqi nga Tatimet. Në shumat që pretendonin kompanitë nuk janë verifikuar faturat e blerjes dhe shitjes, nga të cilat buron shifra e rimbursimit, e cila zakonisht “korrigjohet” nga Tatimet, nëse bizneset tentojnë të fryjnë shifrat apo të përfitojnë. Abuzimi i pestë është se hedhja e parave në llogaritë e 11 kompanive është bërë fiktivisht. Hetimi ka zbuluar se paratë janë tërhequr pak ditë pas pagesës. Ato mësohet se nuk janë në llogaritë bankare të bizneseve që duhej t’i përfitonin, ndërsa dyshohet se shumat janë ndarë mes të akuzuarve dhe disa personave të tjerë që po hetohen. t.s/e.d

Operacioni
Të arrestuar
1. Afërdita Hysa
45 vjeçe, ish-drejtoreshë e Kontrollit Tatimor, Tiranë
2. Tahir Kuka
57 vjeç, ish-inspektor i Procedurave të Rimbursimeve.

Në kërkim
1. Ismail Muça
44 vjeç, ish-drejtor i Drejtorisë Rajonale Tatimore Tiranë;
2. Lauren Vata
32 vjeç, ish-përgjegjës i Sektorit të Kontrollit Tatimor
3. Edmond Osmani
34 vjeç, ish-inspektor i Kontrollit Tatimor
4. Gramos Milushi
29 vjeç, Inspektor
i Kontrollit Tatimor
5. Kujtim Metaliaj
53 vjeç, ish-Inspektor
i Kontrollit Tatimor
6. Mirjan Beneja
33 vjeç, biznesmen
7. Gjergji Tupe
54 vjeç, biznesmen

(Kortezi:Panorama)

Bisnesi hebrej shpreh gadishmërinë për të investuar nëKosovë-Shqipëri

August 25, 2013 by dgreca

Nga Skënder Karaçica/Chikago/

Përditë po shpalosën arkivat historike që kanë të bëjnë me praninë dhe shpetimin e popullit hebrejë në vatrat shqiptare në Kosovë dhe Shqipëri gjatë Luftës së Dyë Botërore,që ishte kodi shekullor i besës me mikpritjen për popullin hebrejë në kohën e or ëve vrastare deri në shfarosje nga regjimi hitlerianë.Për aktin human e njerëzor të popullit shqiptar dhe afrimi nën strehën e shpetimit për hebrenjët,ishte temë e takimit të sotëm të përfaqësuesve të SHSHA-së(Mahmut Skenderi dhe Skënder Karaçica)me Dan Shure,kryetar i Odës Ekonomike të Izraelit dhe Michael Trajson,konsultant për biznesin global që u mbajt në lokalet ,,Miller Canfield,,në Çikago.

Në takimin e parë të këtij lloji shqiptaro-hebrejë u fol gjerësisht për historinë e kombit shqiptar dhe tërë rrugëtimi tij nëpër histori për liri dhe pavarësinë e Shqipërisë dhe të Kosovës.Mirëpo,edhe më tej ka mbetur e pazgjidhur çështja e kauzës sonë kombëtare shqiptare në Ballkan,theksuan përfaqësuesit e SHSHA-së,duke thënë para miqëve hebrejë se ende populli shqiptar ka mbetur i ndarë në pesë shtete nën regjimet e boshtit pansllavist në Serbi,Greqi,Mal të Zi dhe Maqedoni.Populli shqiptar ka historinë e njejtë me popullin hebrejë në historinë e tyre si njerkë me përmasat e shfarosjes që me së miri flet historia e orëve vrastare në kampet holokaust.Për pesëdhjetë vjetë është fshehur gjenocidi dhe shpërngulja kolektive e popullit shqiptar nga toka e tyre në Çamëri të orkestruar nga regjimi helenë në Grerfër qi.Prandaj me shpalimin e orëve vrastare deri në shkallë të gjenocidit,si u tha në takimin e sotëm në Çikago,krahina shqiptare e Çamërisë është ,,Holokausti 2,,në Europë!

Kahet e bisedës në takimin shqiptaro-hebrejë në Çikago kaluan edhe në shumë sfera të jetës dhe të informimit për të gjitha resurset njerëzore dhe të pasurisë që disponon atdheu i shqiptarëve në Ballkan.Sipas të dhënave demografike,populli shqiptar është populli më i ri në Europë me mesatarën kombëtare 27 vjeçare që tregon potencialin e të ardhmes së tij të ndritshme të emenacipimit dhe të zhvillimit shoqëror-ekonomik si dhe me një pasuri të madhe nëntokësore dhe mbitokësore me një vlerë të madhe prej kapitalit ekonomik.Duke i degjuar tërë rrjedhën e bisedës,Dan Shure,kryetar i Odës Ekonomike të Izraelit theksoj se jam mirënjohës për popullin shqiptar në Shqipëri dhe Kosovë që në kohën më të rëndë ka pranuar në familje dhe ka shpetuar nga asgjësimi popullin tim hebrejë.Për resurset e pasurisë që disponon atdheu i shqiptarëve,ata nuk e meritojnë të jenë të varfër në fillim të këtij shekullit të ri dhe për këtë bisnesi hebrejë është i gatshëm të udhëtoj me projektet zhvillimore të politikës së investimeve në akonominë në Kosovë dhe Shqipëri.Jemi të gatshëm që ti presim në Çikago përfaqësuesit e qeverive nga Prishtina dhe Tirana për bashkëpunimin e mëtejmë në të gjitha fushat e bisnesit dhe të politikave të investimeve në ekonomitë e vendeve të tyre mike.

Në takimin e sotëm doli nisma që ish kongresisti dhe kryetari i Ligës Qytetare Shqiptaro-Amerikane Joe DioGuardi të mbajë në ligjëratë me temën bosht marrëdhëniet shqiptaro-hebreje dhe pavarësia e shtetit të Kosovës në Muzeun Holokaust në Skokie të Çikagos.Me këtë rast Mahmut Skenderi,sekretsr i SHSHA-së ua dorëzoj miqëve hebrejë një seri dokumentesh arkivore -historike dhe botime të veçanta të matrialeve të botuara në Shqipëri,Kosovë dhe në Diasporën Shqiptare në Amerikë që kanë të bëjnë me praninë dhe shpetimin e hebrenjve nga populli shqiptar në kohën e luftës shfarësese të fashizmit(1940-1945).

Kosova do të përqendrohet në burimet e energjisë së ripërtëritshme

August 10, 2013 by dgreca

Nga Linda Karadaku/

Me qëllim që të mundësohet zhvillimi i energjisë së qëndrueshme, me karbon të ulët në përputhje me kërkesat e BE-së, Kosova duhet të nxisë përdorimin e burimeve të energjisë së përtëritshme, thanë zyrtarët.Qymyri përdoret tani për të krijuar rreth 90 përqind të elektricitetit të konsumuar në Kosovë dhe është një kontribues kryesor në nivelet e larta të dioksidit të karbonit e ndotjes.

Me miratimin e vendimit të Sekretariatit të Këshillit Ministror të Energjisë mbi nxitjen e përdorimit të energjisë nga burime të ripërtëritshme në dhjetor 2012, Kosova u angazhua në bërjen e 25 përqind të energjisë së saj nga burime të përtëritshme deri më 2020.

“Do të ishte jo-realiste të parashikoje prodhimin e plotë të energjisë nga termocentralet e qymyrit me të ripërtëritshme. Dhe duhet të mbajmë parasysh se të gjitha burimet e ripërtëritshme, përveç hidrocentraleve të mëdhenj, gjithsesi kanë nevojë për një skemë subvencionesh. Subvencionet duhet të jenë më të mëdha në qoftë se çmimi i elektricitetit do të jetë nën kostot e prodhimit,” tha për SETimesJanez Kopac, drejtor i Sekretariatit të Komunitetit të Energjisë.

Kosova kohët e fundit hartoi një Plan Veprimi të Energjisë së Përtëritshme Kombëtare që vendos synime për krijimin e elektricitetit, transportit dhe ngrohjes e ftohjes. Plani vë një hartë udhëzuese e masa sesi Kosova do të arrijë qëllimin e saj deri më 2020.

“Vendim-marrësit dhe zhvilluesit e projekteve të energjisë duhet të kryejnë vlerësime të ndikimit në mjedis, duke ndjekur standartet e larta mjedisore të BE-së e të përdorin teknologjitë më të mira në dispozicion për të pakësuar ndotjen e ajrit dhe ndikimet e lidhura me shëndetin publik të projekteve të energjisë. Termocentralet ekzistuese me qymyr në Kosovë kanë një ndikim të madh negativ mjedisor,” tha Kopac.

Ministria e Zhvillimit Ekonomik të Kosovës tha se politikat e saj mbështeten në kërkesat e BE-së.

“Politikat e Republikës së Kosovës për ndërtimin e rigjallërimin e kapaciteteve prodhuese të energjisë mbështeten në kërkesat e Bashkimit Evropian për mjedisin e shfrytëzimin me efektshmëri të burimeve të energjisë,” tha ministria për SETimes.

Rinora Gojani, një studiuese për Institutin për Politikën e Zhvillimit në Kosovë, tha se energjia e krijuar nga qymyri nuk është një zgjidhje e qëndrueshme për Kosovën.

“Kosova duhet të analizojë të gjitha burimet e energjisë. Por para së gjithash, ajo duhet të analizojë masat e efektshmërisë së energjisë. Një ‘negavat’ është më mirë se një megavat, në kuptimin që energjia që është kursyer si një rezultat i përdorimit të duhur është shumë më mirë sesa krijimi shtesë,” tha ajo për SETimes.

Gojani tha se Kosova ka burime të mira të energjisë së ripërtëritshme. Ajo vuri në dukje se një studim i kryer nga Daniel Kamen, një shkencëtar i energjisë në Universitetin e Kalifornisë në Bërkli, tregon se Kosova mund të mbulojë 38 përqind të konsumit të saj të energjisë nga mundësitë e erës, ujit dhe ato diellore.

Autoritetet e Kosovës pranojnë, megjithatë, se kjo do të jetë një sfidë.

“Gjetja e një ekuilibri në mes plotësimit të nevojave për energji e mos-dëmtimit të mjedisit dhe për pasojë shëndetit është një sfidë për të cilën kërkohet të zhvillohen strategji të përshtatshme që kënaqin të gjitha palët për aq sa është e mundshme,” tha për SETimes ministria e zhvillimit ekonomik.

Shtetasit që jetojnë në zonën e Obiliqit/Fushë Kosovës, në rrethinat e Prishtinës ku janë termocentrale, vuajnë pasojat e prodhimit të energjisë me bazë qymyrin.

Banorja Durime Sinani tha se familja e saj bleu një apartament atje për shkak se çmimet e apartamenteve janë më të lira, por ai është “një vend shumë i keq për të jetuar.”

“Nuk i hapim dritaret nga era e ndotja. Rrobat është vështirë të thahen sepse duhet të gjejmë njëkohë kur mund t’i nxjerrim në ballkon. Këtu jetojnë vetëm ata që nuk kanë mundësi për të bërë një zgjidhje më të mirë banimi,” tha Sinani për SETimes.Ne Foto: Centralet e qymyrit janë një burim i emetimeve të larta të dioksidit të karbonit e ndotjes së mjedisit, thanë ekspertët. [AFP]

*Për Southeast European Times në Prishtinë

Afaristët e diasporës eksplorojnë tregun kosovar

April 25, 2013 by dgreca

NE Foto: Asociacioni i Biznesmenëve Shqiptare në Zvicër/

Një takim B2B do të mbahet të enjten në Prishtinë. Elbasan Morina tha se takimi ka për qëllim stimulimin e prodhimit vendor dhe rritjen e eksportit Kosovar/Disa distributorë të prodhimeve ushqimore nga Bashkimi Evropian (BE) do të qëndrojnë këtyre ditëve në Kosovë, për të parë nga afër produktet që ofron Kosova për tregun e jashtëm, por edhe për t’i ofertuar tregut kosovar produktet e BE-së.

Këtë distributor do të vizitojnë disa nga qendrat prodhuese të pijeve dhe ushqimit në Kosovë, si dhe do të lidhin kontrata bashkëpunimi me afaristët vendor.

Takimin e tyre e ka mundësuar USAID-i dhe Projekti Diaspora për Zhvillim (DFD) i Institutit për Menaxhim dhe Zhvillim, të cilat kanë organizuar konferencën Biznesi për Biznesin (B2B) “Partneriteti për Industrinë e Frutave dhe Perimeve ne Kosovë”.

“Në ngjarjen B2B do të marrin pjesë 17 distributor të prodhimeve ushqimore nga BE-ja dhe rajoni ku ata do të kenë mundësi të krijojnë lidhje të reja të importit-eksportit me 20 qendra grumbulluese të frutave dhe perimeve të freskëta dhe kompani përpunuese të Kosovës”, thuhet në njoftim.

Pas konferencës dhe takimeve B2B, do të pasohet me vizitën tek ASK Food në Gjilan.

Bizneset nga Diaspora do të vazhdojnë me vizitën në terren duke vizituar kompanitë si: Koral në Fushë-Kosovë, Abi në Prizren, Stone-Castle në Rahovec etj.

Elbasan Morina është menaxher i Projektit Diaspora për Zhvillim (DFD).

Ai tha për albinfo.ch, se si pjesë e projektit DfD është themeluar Asociacioni i Biznesmenëve Shqiptare në Diaspore-Zvicër, me qellim që të shërbej si organizatë “ombrellë” për bizneset e diasporës, gjithashtu të jetë pikë kontakti për institucionet dhe bizneset e Kosovës.

Ai tha se takimi i bizneseve Kosovë – Diasporë, ka për qëllim stimulimin e prodhimit vendor dhe rritjen e eksporti të Kosovës.

“Kjo njëherit është edhe vizita e parë zyrtare e asociacionit të biznesit në Kosovë dhe ka për qëllim forcimin e lidhjeve mes Kosovës dhe Diasporës edhe në fushën e biznesit”, tha Morina, sipas të cilit, ky është fillimi i një procesi të gjatë, për fuqizimin e lidhjeve në mes bizneseve në Kosovë dhe Diasporës.

“Me këtë rast pritet të organizohet edhe një takim tjetër me biznesmenët nga diaspora që veç kanë investuar në Kosovë, bizneset aktuale që kanë interesim për eksport në diasporë por edhe për krijimin e urave të komunikimit në mes dy palëve”, deklaroi ai.

Gjate vizitës, sipas tij, pritet nënshkrimi i Marrëveshjeve të bashkëpunimit me Oden Ekonomike të Kosovës, ku njëherit do themelohet dhe inaugurohet një njësi e veçantë në kuadër të OEK, për ndërlidhje dhe koordinim me bizneset e diasporës, gjithashtu edhe një marrëveshje bashkëpunimi me IPAK-un.

Këto takime organizohen ne partneritet me: IPAK, Oden Ekonomike të Kosovës, Aleancën Kosovare të Bizneseve, USAID, Zyrat Ndërlidhëse për Diasporë në kuadër të Komunave, Rrjetin e Grave ne Biznes dhe partnere tjerë lokal.(Kortezi albInfo.Ch)

Rusët po i shesin pronat në Mal të Zi

April 24, 2013 by dgreca

Sipas zyrtarëve malazez, nga viti 2008 janë vetëm rusët ata që blejnë pronat në Mal të Zi. Megjithatë disa prej tyre tashmë po i shesin pronat të shtyrë nga një vendim i presidentin Putin./

Dekreti i presidentit rus, sipas të cilit politikanët rusë nga 1 qershori duhet të mbyllin llogaritë në bankat e huaja dhe të shesin pronën jashtë Rusisë, mund të ndikojë në tregun e pasurisë së patundshme në Mal të Zi.

Sasha Beljakov, rus i cili investon prej vitesh në pronën e tij në Herceg Novi, ka dëshirë të tregojë se si njihet me presidentin rus Vladimir Putin, por edhe me zyrtarë të tjerë rusë. „Dhe zoti (Vladimir) Jakunjin, i cili është ministri i hekurudhave të Rusisë dhe (Jevgenij) Primakov është mik i madh i imi. Ai ka qenë dy herë në Herceg Novi me pushime. Dhe zoti Jakunjin ka qenë me pushime.“ Megjithatë miqtë e tij nuk kanë pronë në Mal të Zi. Beljakov thotë se edhe pse zyrtarët e lartë rusë kanë shumë para, në bregdetin e Malit të Zi vijnë vetëm për të pushuar.

Numri më i madh i turistëve në Mal të Zi zgjedh për të pushuar në Budva. Dhe ky qytet quhet metropoli malalez i turizmit. Sipas të dhënave të zyrës së pasurisë së patundshme të Malit të Zi një e katërta e banesave dhe e lokaleve të metropolit janë në pronësi të shtetasve të huaj. „Nga viti 2008, që nga kriza e parë ekonomike në botë, janë vetëm rusët, do të thoja, blerësit e huaj, ndoshta edhe ndonjë mund të vijë nga Beogradi, Novi Sadi, por ky është një fenomen shumë i rrallë“, thotë Ljubomir Novaković, pronar i agjencisë GRA-MAR, e cila, sipas fjalëve të tij, si dhe gati të gjithë agjencitë e tjera, punon me rusë.

Dhe në zyrën e pasurive të patundshme thonë se nga shtetasit e huaj, pronarë të pasurive të patundshme, pas atyre nga vendet e rajonit, ka më së shumti rusë. „Shumë politikanë të lartë nuk ka, por funksionarë, që punojnë në qeverinë e Rusisë, të cilët punojnë në organet shtetërore, prej tyre ka shumë“, thotë Beljakov, i cili njeh shumë rusë, që kanë blerë pasuri të patundshme në Mal të Zi. „Ka njerëz nga Këshilli i Sigurimit, që punojnë tek presidenti i federatës ruse, ka nga ushtria, ministria e Punëve të Brendshme, nga marina ruse. Eshtë ky nivel. Këtu ka qenë edhe (Aleksandar) Medvedev, zëvendëskryetari i Gaspromit dhe për të tjerë nuk di.“

Janë pikërisht ato, të cilët me dekret të Vladimir Putinit, janë të detyruar që nga 1 qershori të mbyllin xhirollogaritë në bankat e huaja dhe të shesin pronën jashtë Rusisë. Obligimi vlen për të gjithë politikanët e nivelit federal, por edhe për ata të nivelit më të ulët, deri tek qytetet. Ata duhet të vendosin, nëse dëshirojnë të mbajnë funksionet e tyre, apo të ruajnë llogaritë e tyre bankave dhe pasuritë e patundshme jashtë vendi.

Vendimi ka shkaktuar turbullira, jo ndonjë ofertë të veçantë

Beljakov thotë se zyrtarët rusë nga Mali i Zi kanë vendosur të dëgjojnë Putinin. „Për shembull në Herceg Novi, kanë blerë rreth 100 objekte banesa të vogla, të mesme, disa ndërtesa, restorante e të tjera. Gati gjysma është nxjerrë tani në shitje.”

Edhe pse zyra e agjencisë së tij ndodhet në qendër të Herceg Novit, Novaković thekson se që nga shpallja e këtij lajmi nuk kanë marrë ndonjë ofertë të posaçme. Ai thotë se shitja ka rënë për shkak të krizës, por ai nuk pret që lajmi mbi vendimin e Putinit të prekë rëndë tregun e Malit të Zi. „Kjo ka shkaktuar pak turbullirë në punën tonë, në kuptimin se humbet kërkesa dhe se këto rusë shesin pasuritë e patundshme, por mendoj se është çështje e këtyre njerëzve, që kanë prona të patundshme dhe janë të punësuar në administratën shtetërore në Rusi, që janë shumë të pakët në numër“, shpjegon ai. „Këtu kanë blerë njerëz, të cilët para së gjithash bëjnë punë private, dhe jo ata, që janë të punësuar si nëpunës.”

Largohen për arsye të tjera

Nëse numri më i madh i pronarëve të pasurive të patundshme përpiqet tani që t’i shesë, ky nuk është lajm i mirë për tregun e vogël të Malit të Zi, thotë analisti ekonomik, Vasilije Kostić. „Në këtë rast është shumë e rëndësishme që të dihet, se në ç’masë kjo ndodh në të vërtetë, se një iniciativë e tillë nuk vjen për shkak të pasigurisë së hapësirës, apo shkaqeve të tjera, që janë të pranishme në tregun tonë, por që kjo është çështje e një vendimi politik“, thekson Kostić. „Kjo për faktin e thjeshtë se është shumë e rëndësishme, që një aktivitet i tillë mund të ndikojë te pronarët të tjerë të kapitalit.“

Në ambasadën e Rusisë në Podgoricë thonë se nuk kanë listë të shtetasve të tyre, dhe as të shtetasve, zyrtarëve, politikanëve dhe nëpunësve civilë, të cilët blejnë prona të patundshme në Mal të Zi. Ata i referohen kadastrës. Megjithatë në administratën për pasuritë e patundshme theksojnë se nuk kanë lista të aktualizuara, se nuk dinë se sa nënshtetas rusë janë me të vertetë, që kanë pronë në Mal të Zi. Beljakov pret se do të jenë gjithnjë e më pak. Jo vetëm për shkak të vendimeve të Putinit, por edhe pse atyre nuk u lejohet të qëndrojnë në Mal të Zi më shumë se 90 ditë, nëse nuk marrin leje për qëndrim më të gjatë, për të cilën u kërkohet, siç thotë ai, tepër, edhe hapja e firmës, punësimi i punëtorëve etj. „Për shembull në Spanjë, nëse blen ndonjë pronë, ti menjëherë mund të marrësh qëndrim të përhershëm të jetosh në Spanjë. në Republikën Domenikane është edhe më e thjeshtë, atje mund të marrësh menjëherë nënshtetësi dhe gjtihçka, ndërsa këtu jo.“ Beljakov mendon se rusët, që kanë planifikuar që fillojnë punë në Ballkan, tani largohen sepse e shohin se për shkak të krizës nuk do të jenë të suksesshëm në këtë synim të tyrin. „Të gjitha këto i kanë blerë, kur çmimet kanë qenë më të larta dhe askush nuk i ka numëruar paratë. Tani çmimet kanë rënë dhe realisht ata blejnë me gjysëm çmimi.“ Por përpiqen t’ua shesin, për këtë është i sigurtë Beljakov, së pari rusëve të tjerë: „Nuk bëhet aspak fjalë për shitje masive të rusëve si pronarë pasurish të patundshme“, insiston Novaković. Agjencija e tij ka vërejtur interesim për pasurinë e patundshme malazeze në panair në Moskë, 9 deri me 16 prill, por ai e pranon se shitje nuk ka. Ai shpreson se vendimi i Putinit, sa më shumë që afrohet afati për zbatimin e tij, nuk do të ketë ndikim të madh. „Mendoj se është më tepër psikologjik, që të ulë kërkesën, se sa ç’është një histori e vërtetë reale. Sepse them, shumica e blerësve nuk kanë qenë nëpunës civilë. Nuk flas për njerëzit, që janë të punësuar në ndonjë firmë. Nuk është nevoja që të jenë të gjithë biznesmenë, ka njerëz, që punonjë në firma, në firma privare në Rusi. Kjo nuk përfshin këto njerëz.”

(Kortezi: Ana Bogavac/Angjelina Verbica)