Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

HIQMET DEMIRI, PROFESORI MIK I STUDENTËVE

by

Ing. Bledi Stefa/

Prof. Hiqmeti perpos gjithe cilesive njerzore qe kishte, afrimiteti me studentet ishte i jashtezakonshem. Cilido prej nesh mund te komunikonte lirshem me Prof. Hiqmetin per çfare do lloj teme, qe lidhej me profesionin por edhe tema jetesore. Personalisht ruaj kujtime te pakrahasueshme me të, i qete, i shtruar ne komunikim, profesionist i denje dhe mjaft i dashur. Ne memorien time dhe gjithesecilit prej atyre qe e njohen, Prof. Hiqmeti do te mbahet mend shume gjate. Mirenjohje dhe respekt per jeten dhe vepren e Tij. Hiqmet Demiri lindi në 15 shtator të vitit 1938 në Tiranë. Gjatë viteve 1956 deri 1960, përfundon Fakultetin e Inxhinierisë së Ndërtimit në Universitetin Shtetëror të Tiranës. Mbas përfundimit të shkollës së lartë, prej viteve 1960 deri 1982 punon si inxhinier në Sektorin e Gjeodezisë, pranë Drejtorisë së Gjeodezisë në Ministrinë e Ndërtimit (Instituti Shtetëror i Projektimit, i cili pas vitit 1974 u shëndrrua në Ndërmarrjen e Gjeologji-Gjeodezisë). Në vitet 1982 deri 1984 Hiqmet Demiri ushtron detyrën e KryeInxhinierit në Drejtorinë e Ndërmarrjes së Ndërtimit të Hidrocentralit të Komanit. Në vitet 1984 ushtron detyrën e Kryetarit të Zyrës së Kontrollit Teknik në Sektorin e Gjeodezisë, pranë Ndërmarrjes Gjeologji-Gjeodezi. Prej vitit 1994 deri në vitin 1996 punon si Inxhinier Gjeodet në sektorin e Gjeodezisë, në Institutin Hidrogjeoteknik (para shkurtit 1994, ishte Ndërrmarja Gjeologji-Gjeodezi, ish Drejtoria e Studimeve Gjeologjike e Gjeodezike). Dy vite të tjera ushtroi detyrën e drejtuesit teknik në sektorin e gjeodezisë, që u formua si shoqëri anonime. Prej vitit 1998– 2002 por edhe në vazhdim Hiqmet Demiri punon si Inxhinier i liçensuar, indipendent, duke bashkëpunuar me shumë firma projektimi dhe ndërtimi në vend.

Veprimtaria mësimore

Në shtator të vitit 1968 deri në vitin 2002, por edhe në vazhdim, ushtron detyrën e pedagogut të jashtëm prane Fakultetit te Inxhinierise se Ndertimit. Gjatë kësaj periudhe numërohen një cikël mjaft i gjërë leksionesh, mbi lende te caktuara qe perfshiheshin ne planet mesimore te ketij fakulteti.

Anëtarësimet në forumet shkencore të vendit dhe ato ndërkombëtare

Hiqmet Demiri, gjatë karrierës së tij nuk ka lënë pa u bërë pjesë edhe e organizatave apo forumeve të ndryshme me karakter profesional. Vihet re që prej vitit 1985 e në vazhdim, është Anëtar i Këshillit Shkencor të Fakultetit të Inxhinierisë (viti 1985).Anëtar i Shoqatës së Gjeodetëve të Shqipërisë, njëherazi i zgjedhur edhe si Anëtar Nderi i SHGJSH. Anëtar i Shoqatës Shkencore për Mbrojtjen e Ujrave të Ëmbël dhe të Kripur (1994).

Lista e botimeve dhe studimeve shkencore

Hiqmet Demiri ka një numër mjaft të konsiderueshëm botimesh dhe studimesh shkencore. Ai është autor i disa regulloreve dhe manualeve profesionale. Gjithashtu ka botuar disa artikuj shkencor mbi:

• Metodën e drejtëkëndshave pa diagonale në krijimin e rrjetave gjeodezike të ndërtimit në veprat industrial (Buletini i Shkencave Teknike Nr. 3, Tiranë 1982).

• Punimet Gjeodezike në projektimin dhe ndërtimin e veprave industrial (Buletini special Tekniko-Shkencor i Ndërrmarjes Gjeologji-Gjeodezi Nr, 1, Tiranë 1974).

• Studimi i bazamentit gjeodezik kryesor për rilevimin e qyteteve në shkallën 1: 500 (Buletini special Tekniko-Shkencor i Ndërrmarjes Gjeologji-Gjeodezi Nr, 2, Tiranë 1981).

• Reduktimi këndor me anë të një pike ndihmëse, i dy pikave të padukshme me njëra tjetrën (Ndërtuesi Nr. 2 Maj 1978).

• Përdorimi i metodës parallaktike në përcaktimin e largësive (Ndërtuesi Nr. 3, Shtator 1979). Saktësia e punimeve gjeodezike në ndërtimin me element parafabrikat (Ndërtuesi, 1988).

Studime dhe raporte shkencore fondore të zbatuara

Studim mbi projektimin dhe zbatimin e punimeve topo-gjeodezike në Kombinatin e Metalurgjikut Elbasan (bashkëautor, Fondi i N. GJ.GJ, vitet 1968-1973). Raporti i studimeve gjeodezike për projektimin dhe zbatimin e Azotecit, Fier (bashëautor, Fondi i N. GJ.GJ, vitet 1968-1975). Gjithashtu rezultojnë një sërë studimesh dhe raportesh në vepra të ndryshme inxhinierike, të ndërtuara në qytete si Fieri, Elbasani, Ballshi, Tepelena, Bilishti, Klosi, Kavajë, Tiranë etj. Hiqmet Demiri ka mbajtur disa kumtesa dhe referate kryesisht të referuara në Katedrën e Gjeodezisë gjatë viteve 1976, 1987, 1979, si dhe në Ndërmarrjen e Gjeologji-Gjeodezisë gjatë viteve 1980, 1987, 1989.

Grada dhe tituj shkencor

Në vitet 1978– 1982, mbron tezën për gradën shkencore “Kandidat i Shkencave” me temë: “Studimi mbi metodat e prospektimit dhe të zbatimit të punimeve gjeodezike në veprat industriale”. Fusha e kërkimit; Gjeodezia Inxhinierike, Fakulteti i Inxhinierisë, Universiteti i Tiranës.Në datën 20. 01. 1982, i miratohet grada shkencore “Kandidat i Shkencave” me numër vendimi 57, datë. 22. 06. 1982 dhe numër regjistri themeltar 791, datë. 25. 06. 1982, konvertuar me gradën shkencore “Doktor” me Vendimin e Këshillit të Ministrave nr.351, datë. 30. 06. 1993.

Dr. Hiqmet Demiri, në datën 21. 02. 1995, i miratohet titulli shkencor “Mjeshtër Kërkimesh” me vendimin nr. 20, datë. 21. 02. 1995 nga Komisioni i Kualifikimit Shkencor.

Përgjatë viteve 1980- 2000 por edhe më tej, Dr. Hiqmet Demiri ka qënë reçensues në veprimtari të ndryshme shkencore, akademike por edhe studimore. Ai ka qënë udhëheqës në shumë diploma dhe disertacione, nga Katedra e Gjeodezisë në ç’do sezon, prej vitit 1972 deri në vitin 2000. Me rastin e 20 vjetorit të themelimit të Shoqatës së Gjeodetëve të Shqipërisë, në 22 Janar të vitit 2011, me propozim të Kryetarit të Shoqatës së Gjeodetëve të Shqipërisë, Dr. Demirit i akordohet titulli “Anëtar Nderi”, për kontribute të veçanta dhënë në fushën e Gjeodezisë.

YLLI KOLONJA, NJERIU DHE PROFESORI UNIK

by

Ing. Bledi Stefa/

Pedagogjia e Prof. Kolonjes eshte unikale. E pakrahasueshme e mbi te gjitha e demonstruar me levizjet karakteristike te Prof. Yllit e shoqeruar kjo edhe nga zeri i tij i veçante. Nuk ka rendesi nese ishe ulur ne banken e pare apo te fundit, ne sallen e leksionit. Interpretimin artistik e profesional te leksioneve te Prof. Yllit do ta merrnin njesoj te gjithe studentet. Menyra e shpjegimit te tij ndikonte ne dy karakteristika shume te rendesishme. E para Prof. Ylli çfaredo lloj leksioni te veshtire te shpjegonte, studenteve do t’ju mbetej patjeter diçka e vlefshme apo diçka qe; edhe pa i hapur fare librat, ti mund te ishe ne gjendje te riprodhoje leksionin e tij. Se dyti, salla e leksioneve me Prof. Yllin ishte perhere plote. Studentet vinin dhe e degjonin me shume zell menyren se si shpjegonte dhe duhet te kishin nje arsye te forte te mungonin gjate leksioneve te tij. Keto dy karakteristika por jo vetem, do ta rendisin Prof. Ylli Kolonjen nje nder pedagoget me te shquar te Universitetit Politeknik Shqiptar.

Pr. As. Dr. Yli Kolonja, i ditëlindjes 11. 08. 1937, kryen studimet në Universitetin e Tiranës, pranë Fakultetit të Inxhinierisë së Ndërtimit, Dega Gjeodezi. Formimi profesional dhe aktiviteti i tij fillon menjëherë pas diplomimit në vitin 1962. Fillimisht ka punuar pranë Ndërmarrjes Shtetërore të Ndërtimit Nr. 2 Berat, duke mbajtur pozicionin e Kryetarit të Degës Teknike. Më pas, në vitin 1968 ushtroi detyrën e Përgjegjësit të Sektorit të Topografisë  pranë Institutit të Studimeve dhe Projektimeve të Bonifikimeve, në Ministrinë e Ndërtimit.

Prof. Kolonja vjen nga një karrierë e gjatë pedagogjike. Në vitin 1971 fillon të ushtrojë detyrën e pedagogut në Universitetin Politeknik të Tiranës, lektor në lëndën “Gjeodezia Inxhinierike” në Degën e Gjeodezisë. Në vitet 1988-1992 ushtroi detyrën e Përgjegjësit të Katedrës së Gjeodezisë Inxhinierike, ku në vitin 1990 do të ushtronte edhe detyrën e Zëvendës Dekanit të Fakultetit të Inxhinierisë së Ndërtimit. Karriera profesionale e Prof. Yllit vazhdon edhe në vitin 2005 si drejtues i punimeve Topografiko-Gjeodezike në ndërtimin e Terminalit të Ri, në Aeroportin “Nënë Tereza” Tiranë. Në një periudhë të gjatë kohe drejton Shoqatën e Gjeodetëve të Shqipërisë duke dhënë një kontribut shumë të vlefshëm për të. Largohet me dëshirën e tij nga drejtimi i SHGJSH-së në vitin 2010. Veprimtaria Shkencore e Prof. Ylli Kolonjës rendit një numër të kosiderueshëm botimesh universitare. Në vitin 1982 boton librin “Gjeodezia” (ushtrime) i cili do të pasohet me tre botime të tjera me tituj “Gjeodezia Inxhinierike I, II dhe III”.  Ndër të tjera, gjënden botime dhe artikuj të ndryshëm profesional të cilët, u kanë shërbyer dhe ju shërbejnë brezave të studentëve të Gjeodezisë dhe degëve të tjera.

Kualifikimet dhe vizitat e punës si brënda ashtu edhe jashtë Shqipërisë, janë për tu admiruar. Nisin me kualifikimin pranë Universitetit Politeknik të Torinos. Vizita punë në Institutin Mbretëror të Teknologjisë në Melbourn, Australi, Universitetin Teknik të Athinës, Universitetin Teknik të Vienës si dhe vizita të ndryshme punë në Kosovë, Maqedoni etj. Në vitin 1985, me vendimin Nr. 125 merr Gradën Shkencore “Doktor i Shkencave” dhe që prej vitin 1994 gëzon Titullin Shkencor,” Profesor i Asocuar”. Prof. Ylli Kolonja ka marr pjesë në një numër të madh studimesh dhe projektimesh në fushën e Gjeodezisë dhe Topografisë. Sot, Prof. Kolonja, me plot gojën mund të kosiderohet si një ndër personat me kontribut mjaft të gjërë në Inxhinieri i cili, u dha dije, jo vetëm brezave të tërë studentësh por edhe Kombit Shqipëtar.

Drejtimi i Shoqatës së Gjeodetëve të Shqipërisë, nga Prof. Ylli Kolonja ka një vlerë të madhe përsa i përket rifreskimit të bazës juridike si Akti i Themelimit, Statuti dhe Regjistrimi në organet kompetente të Shtetit Shqiptar. Ai së bashku edhe me kolegë të tjerë hodhën themelet e grupimit më të madh profesional nën emrin Shoqata e Gjeodetëve të Shqipërisë. Në bazë të statutit gëzon titullin më të lartë, si një ndër anëtarët themelues të këtij grupimi inxhinieresh.

PROF. MUHARREM DRAGOVOJA IN MEMORIAM

by

Bledi Stefa/

Personalisht kam patur fatin e mirë të takohem vetëm njëherë me Prof. Muharrem Dragovojën, kur kam qënë student.Ishim në katin e pestë të Fakultetit aty ku ndodhej edhe departamenti jonë dhe tek gjithsejcili prej pedagogëve që mund të hasje, vihej re një gëzim i veçantë. Prof. Dragovoja kish njoftuar se do të ishte prezent atë ditë dhe pothuajse edhe ne studentët ishim bërë pjesë e organizimeve të kësaj vizite. Duke u prezantuar në prezencë të pedagogëve të tjerë por edhe studentëve, shtrënguam duart me profesorin i cili përmendi fjalët “suksese ju uroj në studime dhe me plotë bindje mund t’ju them që Gjeodezia është një degë e bukur”. Këto kanë qënë fjalët që unë mbaj mënd nga takimi me Prof. Rremën, ashtu sikurse e thërrisnin me dashamirësi dhe në konfidence kolegët e tij më të rinj…

Muharrem Dragovoja lindi në 11 Korrik 1928 në një familje nëpunësi, në Qytetin e Shkodrës.Shkollën fillore e kreu në Qytetin e Kukësit dhe gjimnazin në vendlindje. Në prill të vitit 1944 merr pjesë në luftën nacional-çlirimtare në formacionin e brigadës së IV Kosovare. Më pas kthehet në vendlindje ku merr pjesë dhe shërben në komandën e Qarkut të Shkodrës.Me rihapjen e gjimnazit, vazhdon studimet të cilat i përfundon në vitin 1948. Në muajin Nëntor të vitit 1948 i akordohet bursa për vazhdimin e studimeve të larta në Degën e Gjeodezisë, në Instututin e Lartë të Gjeodezisë, Aerofotorilevimit e Hartografisë, në Moskë, studime të cilat i përfundon në vitin 1953.

Me kthimin në atdhe, emërohet inxhinier në Drejtorinë Gjeologji- Gjeodezi- Rruga Ura të Ministrisë së Ndërtimit. Gjatë viteve 1953-1957 aktivizohet në punime të ndryshme gjeodezike, komisione dhe si pedagog i jashtëm pranë Institutit të Lartë Politeknik. Me krijimin e Universitetit Shtetëror të Tiranës, emërohet Shef i Katedrës së Gjeodezisë, detyrë të cilën e kreu deri në daljen në pension (viti 1988, rreth 32 vite në detyrë).Gjatë punës pedagogjike, zhvillon leksione në lëndë të ndryshme në degët, Gjeodezi, Gjeologji, Ndërtim, Gjeografi etj.

Muharrem Dragovoja është botues i disa teksteve mësimore, artikujve shkencorë në ndihmë të prodhimit, monografive, manualeve, etj.Në vitin 1964 i akordohet titulli “Docent”.Prej andej në vitin 1994 merr titullin “Profesor” dhe në vitin 1996 merr titullin “Mësues i Popullit”.

Gjithashtu, bazuar në dokumenta rezulton që Prof. Muharrem Dragovoja ka qënë ndër themeluesit e Shoqatës së Gjeodetëve të Shqipërisë si dhe Kryetar i saj, për një periudhë relativisht të gjatë.Një nga fushat ku Prof. Dragovoja dha një kontribut të veçantë, ka qenë ajo e përgatitjes së teksteve mësimore dhe manualeve gjeodezike.Nën drejtimin e tij u përgatitën shumë programe mësimore dhe u zhvillua Dega e Gjeodezisë.U përgatitën gjithashtu një numër shumë i madh specialistësh të cilët punuan në drejtime të ndryshme në vitet në vijim.Për veprimtarinë e tij disa vjeçare, Profesor Muharremi është dekoruar me disa medalje dhe urdhëra. Me plot bindje mund të themi se Prof. Muharrem Dragovoja është një personalitet i madh, me kontribute të veçanta në zhvillimin e Gjeodezisë në vendin tonë. Në vitin 1994 kthehet në Moskë pranë familjes së tij, duke e vizituar disa herë vendin tonë.Ndahet nga jeta në 26 prill të vitit 2014.