Komunitet – Page 389 – Dielli

U kremtua me madheshti njëvjetori i shoqatës së punonjësve shqiptaro-amerikanë të ruajtjes së rendit

November 23, 2013 by dgreca

Falenderim i veçantë u dha për të gjithë ata që i kanë mbështetur, qendruar pranë e ndihmuar për përballimin e shumëllojshmërisë së problemeve me të cilat përballen/

Nga BEQIR SINA, NY/

BROOKLYN, NY: Në kuadrin e aktiviteteve festive që po organizohen nga shqiptarët në Shtetet e Bashkuara, dje u shënua në New York edhe përvjetori i parë i themelimit të Shoqatës Amerikane Shqiptare të Policisë Iliriane. Kjo shoqatë ka mbledhur deri tani rreth vetes me dhjetëra oficerë policie, shqiptaro – amerikanë. Ata shërbejnë çdo ditë e natë me profesionalizëm dhe përkushtim në organet e policisë federale, shtetërore, si edhe në strukturat e tjera që merren me ruajtjen e rendit dhe sigurisë, në nivele lokale, në shtetin e New York-ut dhe në SHBA.

Numri i shqiptarëve të punësuar në fushat e zbatimit të Ligjit, ruajtjes së rendit dhe mbrojtjes së qytetarit, këtu në Amerikë, në dy dekadat e fundit ka ardhur duke u rritur. Në mesin e tyre ka edhe disa gra e vajza, dy prej të cilave janë edhe veterane të policisë së New Yorkut: motrat Tonuzi nga Dibra, të bijat e Gani Tonuzit, emigruar në SHBA, 50 vjet më pare. Edhe ato janë anëtare të shoqatës “Illyrian Society of Law Enforcement” dhe u nderuan dje me medaljet përkatëse të Departamentit të Policisë së New Yorkut (NYPD).
Mbrëmjen u organizua në lokalin luksoz “Russo’s On The Bay” në Howard Beach -një zonë në mes Brooklynit dhe Queensit në New York.

Festimin e përvjetorit të parë të themelimit të Shoqatës Amerikane Shqiptare të oficerëve të policisë “Illyrian Society of Law Enforcement”, e udhëhoqën Flamur Cani, Brahim Dedushaj, Naim Kacic, Ylli Dautaj, Ismet Hoxha dhe Elton Shametaj. Në këtë mbrëmje morën pjesë më shumë se 500 vetë.

Kurse oficeri Naim Kacic bëri një prezantim të shkurtër të shqiptarëve, duke folur mbi disa nga virtytet më të çmuara para shfaqjes së një pjese të filmit “Besa – Premtimi”, nje produksion amerikan i cili tregon një histori të jashtëzakonshme të marrëdhënieve midis shqiptarëve dhe hebrejve gjatë përiudhës së Holokaustit, në Luftën e Dytë Botërore.

Pjesëmarrësit, mbajtën një minutë zi për vdekjen e deputetit të Partisë Demokratike Sokol Olldashi,
Në veprimtari morën pjesë gjithashtu edhe përfaqësuesit e shtetit shqiptar, diplomatët nga Kosova dhe Shqipëria, ambasadori i Shqipërisë në OKB, z.Ferit Hoxha, dhe Konsulli i Përgjithshëm i R. së Kosovës, z Bekim Sejdiu, Asambleisti i parë shqiptar ne Kuvendin e New Yorkt, z Mark Gjonaj dhe mysafirë nga Shqipëria, si Drejtori i Përgjithshëm i Policisë së Shtetit, Artan Didi dhe Arben Hanelli (Liaison Police Officer) nga Ambasada e Shqipërisë – Washington DC.

Mbrëmja u çel me këndimin e hymnve kombëtare të SHBA dhe Shqipërisë nga këngëtaria e mirënjohur Merita Halili dhe vetëm me muzikë ai Kosovës, luajtur të tre në fizarmonikë nga mjeshtri Raif Hyseni.
Mbrëmjen e përvjetorit të parë e hapi Kryetari i kësaj shoqate, me gradën Kapiten, zoti Flamur Cani, i cili punon për më tepër se 22 vjet në NYPD (Departmenti i Policisë së New York-ut).

Në fjalën e tij, Cani përmendi faktin se kishte mësuar shumë nga prindërit e tij dhe miqtë e shokët shqiptarë, bashkëkombasit nga traditat shqiptare. Ai veçoi mikpritjenpër të cilën shqiptarët janë të njohur dhe që i bën të ndihen shumë krenarë që janë shqiptarë: “Nuk mund të shkoni në shtëpinë e një familje të shqiptarëve e të pa mos ju shërbejnë një kafe , një pije – gotë raki, ushqime të traditës shqiptare, bujarinë dhe dashurinë shqiptare”, tha Cani.

Ai tregoi se ishte më krenar se kur shikonte në këtë mbrëmje festive kaq shumë shqiptarë, “kolegë si oficerët të policisë, vëllezërit dhe motrat e komunitetit, njerëz të suksesshëm, si Mark Gjonaj, politikan i suksesshëm, Tahir Kukaj imam i xhamisë më të madhe në bregdetin lindor, biznesmenët të suksesshëm si Rrustem Geci, Harry Bajraktari, Anton Raja , Nijazi Dumani, Paul Kolaj, me të vëllezërit e tij nga “Famous Family Pizza”, Drejtorin e Përgjithshëm i Policisë shqiptare Artan Didi dhe shqiptarë të tjerë të përkushtuar gjithë jetën e tyre për punën e madhe – lidhur që të jetë e suksesshme , njerëzë që kanë respekt për familjet e tyre , miqtë dhe komuniteti”.

Duke folur pwr shoqatwn, zoti Flamur Cani tha se ajo “do të na lejojë dhe do të na mësojë si ne të lidhemi së bashku në mbështetje për njëri-tjetrin, si të shkëmbejnë informacion me njëri- të tjetrin dhe si të vazhdojmë të ndajmë dashurinë dhe respektin për kulturën tonë të pavarur:.

Më pas e mori fjalën Elton Shametaj, i cili foli për njëvjetorin e krijimit të shoqatës shqiptare të punonjësve të policisë së Shteteve të Bashkuara.

“Jemi në hapat e para”, tha ai, “është viti i parë, por një vit plot punë, përpjekeje dhe arritje në ngritjen nga secili në sektorët ku punojmë e mbulojmë. Puna e përkushtuar e me profesionalizëm e secilit në rrjedhën e madhe të problemeve kan qenë të dukshme gjatë gjithë dinamikës së aktiviteteve vjetore”. Zoti Shametaj përcolli një falenderim te veçantë për familjet e policëve, komunitetin dhe të gjithë atyre që i kanë mbështetur, qëndruar e ndihmuar të afërmit e tyre, për përkushtimin e kohës ndaj detyrës dhe përballimin e shumëllojshmërisë së problemeve që kanë familjet dhe fëmijët e tyre.

“Duke ju uruar për arritjet e këtij viti, gjithashtu jemi të ndërgjegjëshëm se edhe më shumë duhet të bëjmë me komunitetin tonë për vitet në vazhdim, për fuqizimin e shoqatës dhe në horizonte të reja” theksoi zoti Shametaj.Në fund ai shprehu dëshirën që me këtë rast të shprehte respektin e thellë për të gjithë të pranishmit, klerikët, politikanët, biznesmenët dhe në veçanti për Drejtorin e Policisë së Shtetit shqiptar z Artan Didi, “i cili” tha Shametaj “na ka nderuar me pjesëmarrjen e tij”.

Me këtë rast u nderua me Medaljen e Shoqatës së Dedektivëve të New Yorkut – nga DEA (Detectives Endowment Association), detektivi shiqptaro-amerikan Ismet “Izzy” Hoxha. Medaljet dhe çertifikata iu dorëzuan me këtë rast nga një grup dedektivësh dhe oficerësh të poliicisë së New Yorkut, që kishin ardhur enkas për këtë veprimtari për të nderuar kolegët e tyre, oficerë shqiptarë të policisë, në New York nga NYPD.

Një nderim i veçantë iu bë me këtë rast në emër të shoqatës “Illyrian Society of Law Enforcement”, anëtarit të Asamblesë së New York-ut, zotit Mark Gjonaj, Drejtorit të Përgjithshëm të Policisë së Shtetit, zotit Artan Didi si edhe veprimtarit të dalluar e biznesmenit të suksesshëm zotit Rrustem Geci.

Ylli Dautaj, lejtnant në NYPD, i cili pas luftës së Kosovës shkoi atje nga Amerika me mision për të ndihmuar, duke marrë fjalën tha: “Kam dalë këtu që në emrin tuaj t’i shpreh mirënjohjen e thellë, z. Geci dhe familjes së tij, të cilët kanë qendruar vazhdimisht në krah të rrjedhës së punëve tona, si dhe kanë ndihmuar konkretisht bashkëkombasit e disa viseve shqiptare”.

“Veprimet e Gecit”, tha ai, “kanë qenë frymëzim për të gjithë anëtarët e shoqatës sonë për realizmin cilësor e profesional të detyrave të ngrakuara z Geci do të jetë gjithmon me ne, ai do të ketë gjithmonë urimet me të shtrenjta të zemrave tona – Respekt dhe urime familjarisht!”

Përvjetori i parë i themelimit të shoqatës u mbyll në një mjedis festiv me këngë e valle shqiptare nga të gjitha trevat. Këngëtarët Merita Halili dhe Gëzim Nika krijuan një atmosferë të mrekullueshme, me këngët e tyre, nën drejtimin e orkestrës së Raif Hysenit.

Kryetar i kësaj shoqatë është zgjedhur kapiteni Flamur Cani, i cili punon më tepër se 22 vjet në NYPD. Qëllimi i kësaj nisme është kanë deklaruar ata për gazetën shqiptaro amerikane “Illyria” është që t’i bashkojnë shqiptarët që të punojnë në organet e ruajtjes së rendit dhe sigurisë. Shoqata, e cila tani ka 50 anëtarë, planifikon të zgjerohet me anëtarë të rinj dhe pastaj të regjistrohet zyrtarisht.

Per me shume fototgrafi mund te klikoni ne facebook https://www.facebook.com/beqir.sina/media_set?set=a.628378197227104.1073741895.100001647878982&type=3

Shoqata KOMBI në Worcester përkujtoi 105-vjetorin e Himnit Kombëtar dhe Rilindasin ASDRENI

November 19, 2013 by dgreca

Nga Artur Vrekaj/

Shqiptarë nga Worcester dhe Boston u mblodhën këtë fundjavë të 16 Nëntorit 2013 në një veprimtari përkujtimore që organizoi Shoqata KOMBI për nder të 105 vjetorit të Himnit Kombëtar dhe figurës së Rilindasit Aleksandër Stavre Drenova, ASDRENI.Veprimtaria u çel me Himnin kombëtar të kënduar nga Spiridon Ilo dhe Xhuzepe Mauro që u përcoll edhe nga të pranishmit.

Ligjëratën kryesore me temën “Himni kombëtar” e mbajti shkrimtari Aristotel Mici. Ai përcolli një punim studimor që nga rrethanat që e shtynë Asdrenin për të shkruar tesktin “Betimi mbi flamur”. Gjithashtu ai nënvizoi se si një simbol i mbarë shqiptarëve edhe himni kombëtar shtegtoi me këngën e tij të kënduar në të katër vilajetet Shqiptare dhe në Diasporë. Zoti Mici ka shkruar dhe një libër me titull “Himni Kombëtar” ku përfshihet dhe trajtesa historike që shpjegoi për të pranishmit. Ndërkohë, ai ju përgjigj edhe pyetjeve për disa ndryshime që u propozuan në 100 -vjetorin e Pavarësisë së Shqipërisë, të cilat do tja prishnin anën historike sepse Himni ishte 104 vjeçar tashmë e breza të tërë ishin rritur duke e kënduar atë që nga Malësia e Madhe e deri në Çamëri, plus emigrantët në Europë dhe Amerikë.

Për mesazhin që na jep poezia e ASDRENI-t për ditët e sotme foli poetja Eriketa Tabaku. Ajo vlerësoi punën e ASDRENI-t si një rilindas i madh që shkroi se unë nuk dua të bëhem i famshëm, por të mbetem një Shqiptar i mirë.

Por në fakt, fama e tij mbeti, sepse hyri në histori jo vetëm me tekstin që u përzgjodh për himnin kombëtar por edhe me shkrime e korrespodenca me patriotë të tjerë në Stamboll e Shqipëri për një përzgjim të Shqiptarëve kudo në trojet Shqiptare apo Diasporë që të përbashkohen nën flamurin e Skënderbeut.

Veç kësaj, ai zë një vënd të veçantë midis Lasgushit dhe Naimit. Për nga tematika e poezive me temë dashurinë për vëndlidnjen që shkroi për Shqipërinë ai mbeti i kënduar për sa e sa e breza.Edhe sot, me këtë veprimtari atdhetare e letrare ne e bëjmë më koherente veprën e tij- përfundoi zonja Tabaku.

Zoti Sotir Pani, djali i Vasil Panit, kryetarit të Vatrës në Boston përcolli poezi të ASDRENI duke e bërë më të ndjeshme dashurinë për vëndlindjen sipas vargjeve të Rilindasit.

Më të larmishme këtë veprimtari e bëri edhe shfaqja e filmit dokumentar për ASDRENI me skenar Kolec Traboini që ka fituar dhe kupën e festivalit të filmit Shqiptar më 1976.

Jani Plasa, shkrimtar vlerësoi botimin këto ditë të librit të shkrimtarit Pandi Manço me titull “Drenova dhe bijtë e saj”. Sepse Drenova ka nxjerrë figura atdehtare si ASDRENI që vërtet i kanë bërë krenarë për veprën e tij.

Mbi jetën dhe veprimtarinë e atdhetarit, këngëtarit dhe piktorit Spiridon T. Ilo dhe Thima Nashi foli poeti Artur Vrekaj. Përshkrimi i figurës së kudondodhur të Spiridon T.Ilo sa me Nolin kur u dorëzua prift në New York më 1908, sa me Ismail Qemal bej Vlorën më 5 Nëntor 1912, në Bukuresht në mbledhjen ku u vendos Pavarësia e Shqipërisë e më vonë kur firmosi Aktin e Pavarësisë të 28 Nëntorit 1912 kur solli dhe flamurin nga Bukureshti në Vlorë, sa me Xhuzepe Mauron në New York kur këndoi e regjistroi Himnin kombëtar me kompaninë Colombia si dhe më 1923 kur e regjistroi me kompaninë e tij diskografike Albanian Phonograph Records Co.

Worcester i Massachusetts (SHBA) ka qënë djep i shqiptarisë. Këtu Thoma Nashi, muzikant që studjoi në Shkollën e Muzikës në Boston themeloi në Dhjetor 1916 bandën muzikore që më vonë Konica e quajti Banda kombëtare VATRA. Më 1918 Thoma Nashi botoi tesktin e himnit kombëtar të përshtatur për piano dhe orkestër. Njëkohësisht koret e kishave shqiptare në Massachusetts këndonin himnin e flamurit edhe me ndihmën e maestros Thoma Nashi.Një përshkrim i kësaj veprimtarie u përcoll edhe në radion me program tetëdhjetë vjeçar Ora Shqiptare të Worcesterit që drejton Andrea Tanaça.

Për rëndësinë e përkushtimit të Asdrenit në Çështjen Kombëtare Shqiptare foli shkrimtari Jani Papandile që solli fakte letërkëmbimesh të ASDRENI me patriotët në Shqipëri, Boston, Sofje dhe Stamboll duke e bërë më të gjallë e më të dokumentuar këtë veprimtari atdhetaro-letrare.

Programi vazhdoi me një shfaqje fotografish ( slideshow) që tregonin tematikën e veprimtarive të Shoqatës KOMBI gjatë këtyre gjashtë vjetëve ku spikat fryma e atdhedashurisë dhe promovimit të simboleve, figurave dhe ngjarjeve kombëtare si dhe përfaqësimi në qytetin e Worcester ku banojnë afër 10 mijë Shqiptaro-Amerikanë.

Me vëmëndje të veçantë u përcoll edhe përshëndetja që kryetari i Shoqatës Çamëria Sali Bollati në New York përcolli për takimin e sotëm të shoqatës KOMBI në Worcester,MA. Të dashur e të nderuar Bashkë! Ju përshëndes me dashuri e respekt të madh juve për ftesën e përzemërt atdhetare, ju faleminderit shumë!

Sot, jemi këtu bashkarisht për të nderuar një ndër Rilindasit tanë të shquar, ASDRENIN e himnit kombëtar. Dhe ngjarje të tilla atdhetare edhe neve të moshuarëve (nipi im, 10 vjeçar me emrin Lis, korrigjon ndonjë nga mysafirët kur më quan plak), na rinojnë duke na mbushur me krenari kombëtare.

Hymnin e flamurit Shqiptar të Skënderbeut e kam kënduar për herë të parë me zë të lartë më 1941, kur isha vetëm 4 vjec. Ne të vegjlit e këndonim duke kërcyer , ndërsa të moshuarit e këndonin me lotë në sy.

Kjo ngjarje e shënuar festohej në Paramithi të Çamërisë që padrejtësisht fuqitë europiane e ndanë nga trungu i nënës Shqipëri. Por shpirti Shqiptar jo vetëm nuk u shua asnjëherë, por përkundrazi, si përgjigje ndaj poshtërsive të grekëve ndaj neve Shqiptarëve të Çamërisë, krenaria e të ndjerit Shqiptar forcohej!

Këtu në Worcester,MA ku jeni vendosur juve , me shumë të drejtë krenoheni se edhe emrin e Shoqatës e mbani me emrin KOMBI, pra kombi Shqiptar.

Vetëkuptohet se sa më larg Atdheut të ndodhemi, aq më shumë e duam dhe krenohemi me të.

Këtu, para afro 100 vjetësh erdhën edhe shumë Shqiptarë nga Çamëria, dhe krijuan Shoqatën Çamëria, prej nga krenoheshin si Shqiptarë, por edhe i drejtoheshin Presidentëve Amerikanë dhe udhëheqësave europiane për të drejtat e mohuara të Shqiptarëve atje në Çamëri .

Prandaj me shumë gëzim e pranova ftesën tuaj. Unë jam si ai gur i rrokullisur, linda në Çamëri ku mbeta jetim, u rrita tek Nëna Shqipëri, mbarova studime të larta në ish-Çekosllovaki dhe tashti nga fundi, ky gur i rrokullisur gjeti vend këtu në Amerikë.

Amerika si vend mbështetës i Shqipërisë e që nga krijimi i asaj Shqipërie të vogël më 1912, me Çlirimin dhe Pavarësinë e Kosovës është bërë në të vërtetë një atdhe i Dyte yni. Prandaj, sot që jemi mbledhur të festojmë 105 -vjtorin e Himnit kombëtar kam shumë shpresa që do të vijë dita që këtë flamur të shenjtë ta shohim të valëvitet me krenari në trojet etnike.

Në fund u ndoq dhe kënduam së bashku himnin kombëtar të regjistruar nga kori i shkollës mbarëkombëtare Udha e Shkronjave në Tiranë me drejtor Artur Shkurti.

Ishte kjo veprimtari një zgjim për të çelur stinën e veprimtarive për 101-vjetorin e pavarësisë së Shqipërisë në Massachusetts.

U MBLODH KËSHILLI I FEDERATËS “VATRA”

November 17, 2013 by dgreca

U MBLODH KËSHILLI I FEDERATËS “VATRA”

Të shtunën me 16 Nëntor në mesditë, u mblodh Këshilli i Federatës Panshqiptare të Amerikës ”VATRA”. Raportin e Kryetarit, përmbledhtazi edhe protokollin e mbajtur në mbledhjen e mëparshme të Këshillit, anëtarët e Këshillit (Board Members) dhe anëtarët e Advisory Board, e kishin marrë me anë të postës elektronike para se të vinin në mbledhje. Po ashtu kishin marrë edhe rendin e ditës së mbledhjes.
Dr. Gjon Bucaj, kryetar i Vatrës, hapi takimin dhe u uroi mirëseardhjen pjesmarrësve. Po ashtu ai informoi për gjendjen shëndetësore të tre vatranëve, presdientit të Nderit, z. Agim Karagjozi, z. Jonuz Ndreu dhe Esat Coku- anëtarë të Advisory Board, të cilët ndodhen të shtruar në spitale.
Kjo ishte mbledhja e dytë e Këshillit të ri të përzgjedhur pas Kuvendit të Prillit të këtij viti, ku anëtarët janë rinovuar në masën mbi 50 për qind.
Ja lista :
KËSHILLI DREJTUES – BOARD OF DIRECTORS
K R Y E S I A – O F F I C E R S
1 KRYETAR: Dr. Gjon L. Buçaj
2 Z/V KRYETARE: Agim Rexhaj
3 Asllan Bushati
4 SEKRETARE: Nazo Veliu
5 Z/V SEKRETAR: Chris Kirka
6 ARKATAR: Marjan Cubi
7 KRYETARË TË FONDACIONEVE: Dr. Nexhat Kaliçi
8 Prof. Mithat Gashi
9 EDITOR: Dalip Greca
ANTARËT E KËSHILLIT DREJTUES KËSHILLI I PLEQSISË
(BOARD MEMBERS) (ADVISORY BOARD)
10 Adrian Neritani 1 Ahmet Giaffo
11 Adriatik Spahiu Kryetar Dege 2 Bashkim Ahmeti
12 Agim Aliçkaj 3 Esat Çoku
13 Ahmet Hoti 4 Gjokë Deçkaj
14 Albert Perndocaj 5 Hajdar Tonuzi
14 Alfons Grishaj ” ” 6 Jim Wm Pandeli
15 Armin Zotaj 7 Jonuz Ndreu
16 Bashkim Musabelliu 8 Lumo Tsungu
17 Besim Malota 9 Muhamet Omari
18 Bukurosh Curre 10 Musli Mulosmanaj
19 Cezar Ndreu 11 Mustafë Elezi
20 Deni Blloshmi 12 Naum Prifti
21 Dine Dine 13 Ndrec Gjergji
22 Dr. Elton Mara 14 Sejdi Hysenaj
23 Dr. Hasan Ademaj 15 Tonin Mirakaj
24 Dr. Skender Myrtezani ” ” 16 Uke Gjonbalaj
25 Eduard Dilo 17 Zef Perndocaj
26 Elmi Berisha ” ”
27 Ibrahim Kolari
28 Idriz Lamaj
29 Ismer Mjeku
30 Kolec Ndoja ” ”
31 Kujtim Qafa
32 Lek Mirakaj
33 Mehmet Kadriaj
34 Merita B. McCormack ” ”
35 Nick Markola ” ”
36 Ramadan Gashi
37 Ramiz Mujaj
38 Robert Mirakaj
39 Rrustem Gecaj
40 Sabit Bytyçi
41 Sejdi Bytyçi
42 Ylli Cakani
43 Zef Balaj
44 Zudi Karagjozi

U ra dakord që të vazhdohej me 12 pikat e rendit të ditës të njoftuara më parë. Kryetari i degës së Westchester, Nik Markola, kërkoi që të informonte Këshillin për riorganizimin e degës, së cilës i kanë ndryshuar edhe emrin. U la per ne fund.
Këshilli votoi protokollin e mbledhjes së 15 shtatorit. Nënkryetari Asllan Bushati kërkoi që të përfshihej në dokumentacion edhe Promemoria dërguar Kryeministrit të Shqipërisë nga përfaqësia e Vatrës.
Kryetari sqaron se ky dokument është publikuar në Gazetën Dielli të printuar dhe në publikimin e përdtishëm në online.
Gjithësesi u vendos që t’i bashkëngjitet raportit edhe Promemorja.
Pas raportit të kryetarit për aktivitetin e Vatrës që nga 15 shtatori, arkëtari, z. Marjan Cubi paraqiti raportin e arkës, duke dhënë shifrat e të ardhurave dhe të shpenzimeve. Raporti iu bashkëngjit protokollit të mbledhjes.
Dr. Bucaj raportoi rreth punës që po bën eksperti financiar rreth përfundimit të kontrollit të financave dhe takimeve qe ai ak bere me Kryesine dhe me Danny Blloshmi.
U diskutua gjatë mbledhjes edhe finalizimi i listës së anëtarëve të Këshillit të Vatrës, ku u debatua për të shtuar praninë e femrave.
Nga kryetari u dha edhe një informacion i zgjeruar rreth regjistrimit të Vatrës dhe tha se ky proces po shkon drejt fundit.Regjistrimi në IRS ka përfunduar. Degët, porositi dr. Bucaj, duhet të presin finalizimin e regjistrimit në qendër për të bërë edhe ato regjistrimet e veta.
U diskutua edhe për përmirësimin dhe adaptimin e Kanunores së Vatrës përmes shtimit të amendamenteve. Rreth këtij problem diskutoi juristi Bashkim Musabelliu.
U diskutua konkretisht rreth statusit ligjor të Vatrës dhe degëve.
U debatua edhe rreth listave të anëtarësise dhe shlyerjes së detyrimeve simbolike që kanë anëtarët ndaj Federatës. U la që kryesia të shqyrtojë listat e pagesave të prapambetura rreth periudhës Janar-Mars 2014. Diskutuan Uk Gjonbalaj, Dalip Greca.
Një pikë më vete e rendit të ditës ishte edhe informimi rreth njoftimit për gjendjen e ndërtesës së Vatrës. Kryetari përgëzoi anëtarin e Board Members, biznesmenit Rrustem Gecaj, i cili me shpenzimet e veta do të bëjë rinovimin e ndërtesës sapo të arrihet që ajo të lirohet nga materialet.
Z. Gecaj u tregua i gatshëm edhe për menaxhimin e ndërtesës së Vatrës, për të cilën ka probleme.
U diskutua edhe rreth përgatitjeve për festimin e Ditës së Flamurit, 101 Vjetorit të Pavarësisë së Shqipërisë.
Kryetari i komisionit, zv/kryetar i Vatrës, z. Asllan Bushati, informoi për anëtarët e Komisionit dhe përgatitjet e bëra. Darka do të organizohet me 30 nëntor në Restorantin Maestros.
Në këtë pikë e mori fjalën edhe editori i gazetës DIELLI, Dalip Greca, i cili falenderoi të gjithë ata që i ishin përgjigjur mesazhit të tij për ta mbështetur në përgatitjen e numrit special të gazetës DIELLI me rastin e Festes. Në mënyrë të vecantë ai vecoi degën e Vatrës në Queens me kryetar dr. Skënder Murtezani, që i ka qëndruar afër gazetës dhe ka dhënë kontribut konkret, duke mundësua shtatë faqe me urime. Po ashtu ai falenderoi edhe degën e Westchester(Greater New York), degën me kryetar Nick Markola, degen e Washingtonit me kryetare Merita B McCormack, degen e Jacksonville me kryetar Adriatik Spahiu, dgen Hudson Valley me kryetar Elmi Berisha, për mbështetjen e dhene. Pas degës së Queensit, renditet dega e Westchesterit, që rezervoi pesë faqe me urime. Po ashtu falenderoi anëtarët e kryesisë së Vatrës të cilët po ashtu e kanë mbështetë në këtë numër special te Diellit, duke dhënë secili prej tyre kontribut personal. Editori shprehu keqardhjen për keqkuptimin e krijuar me degën e Michiganit. Urimet në gazetë janë në vetëvete kontribute për Vatrën.
Kryetari Bucaj informoi edhe për librin e studiuesit Skënder Blakaj, të cilin Vatra do ta ndihmojë duke qenë bashkëbotuese e librit me letrat e panjohura të njerëzve të shquar deri në 1912, ku më shumë se 70 letra janë të bashkthemeluesit të Vatrës, Faik Konica.
Po ashtu Vatra, informoi dr. Bucaj, ka marrë përsipër që të bëjë edhe promovimin e librit enciklopedik të studiuesit Jusuf Buxhovi në gjuhën angleze”KOSOVA”.
Përsa i përket pikës së parashikuar për të diskutuar për problemin e armëve kimike të Sirisë në Shqipëri, këshilli e vlerësoi të ezauruar propozimin për të dalë me deklaratë në publik. Kryetari informoi se Vatra I ishte bashkuar shqetesimit te komunitetit dhe eshte bashkuar me shoqatat e tjera.
Gazetari i komunitetit Beqir Sina, i pranishëm në takim, solli propozimin e z. Simon Mirakaj për të sjellë në SHBA ekspozitën e të përndjekurëve politik .
Z. Nick Markola informoi për aktivitetin e degës së Westchesterit dhe struktuarave të saj.(Korresp. i DIELLIT)

“VIZION 21”, LETER AMBASADORIT SHQIPTAR NE WASHINGTON DC

November 15, 2013 by dgreca

“Asnjëherë vetëm për vete, gjithmonë për të tjerët!/

Asnjëherë vetëm për një komb, gjithmonë për të gjitha/kombet”. – Moto e Vizion 21

14 Nëntor 2013/

Uashington/

Letër e hapur Shkëlqesisë së Tij Ambasador Galanxhi Shkëlqesia juaj,/

Në emër të Vizion 21, po ju shkruajmë që të shprehim shqetësimin e thellë dhe kundërshtimin tonë për vendimin për të marrë në konsideratë shkatërrimin e plotë apo të pjesshëm në Shqipëri të arsenalit kimik të Sirisë. Duke u bashkuar me mijëra shqiptarë të tjerë në Shtetet e Bashkuara të Amerikës, ftojmë qeverinë shqiptare të gjykojë me maturi dhe të peshojë pasiguritë e ndryshme në mënyrë të duhur dhe transparente.

Vendit tonë i mungojnë burimet e nevojshme për të trajtuar në mënyrë të sigurtë kimikatet toksike. Disa raporte flasin që mbeturina të rrezikshme nga arsenali i vet I vogël kimik janë ende të pasiguruara gjashtë vjet pas asgjësimit, me rrezik për jetën e njeriut dhe mjedisin. Përvec kësaj Shqipëria ka një historik me trajtim të pasigurtë municionesh. Në Gërdec, me qindra tonelata municionesh shpërthyen duke vrarë 26 njerëz, duke plagosur mbi 300 dhe duke shkatërruar ose dëmtuar seriozisht mbi 500 shtëpi dhe ndërtesa. Projekte të ngjashme, por me përmasa dhe me kompleksitet më të madh, mund të jenë shkatërrimtare për popullin dhe vendin tonë.

Një gjë që na alarmon edhe më shumë është fakti se një sërë ekspertësh nga vende të ndryshme nuk kanë gjetur konsensus rreth sigurisë të asgjësimit të armëve dhe kohëzgjatjes së procesit. Vende si Shtetet e Bashkuara të Amerikës kanë dështuar në mënyrë të përsëritur për të përmbushur afatet për asgjësimin e një arsenali më të vogël, ndërsa Norvegjia e ka refuzuar këtë ofertë menjëherë duke cituar mungesën e objekteve të nevojshëm. Duke pasur parasysh natyrën komplekse dhe procësin e gjatë të asgjësimit, kërkojmë të tërheqim vëmendjen tuaj për të marrë parasysh rreziqe të tjera të panjohura dhe evituar pasoja të padëshiruara.

Shkëlqesia Juaj, Këto fakte kanë shkaktuar shqetësim në rajon dhe në të gjithë botën, sidomos mes shqiptarëve. Ndërsa shkruajmë këtë letër, reagimi i publikut shqiptar ka qenë I shpejtë dhe i jashtëzakonshëm kundër këtij vendimi.

Brenda dy javësh më shumë se 35,000 nënshkrues kanë kundërshtuar këtë vendim në një peticion të organizuar në Avaaz.org të quajtur ” AKIP – Jo armëve kimike të Asadit në Shqipëri ” . Më shumë se 120,000 të tjerë kanë shprehur kundërshtimin e tyre në grupin në facebook të quajtur “1 milion Shqiptarë kundër asgjësimit të armëve kimike në Shqipëri.” Raportet e fundit në media janë veçanërisht shqetësuese dhe flasin për tensione në rritje në Shqipëri. Disa intelektualë të njohur e kanë quajtur këtë “përdhunim” dhe të tjerë parashikojnë “trazira”. Këto zhvillime të kohëve të fundit mund të ndikojnë në stabilitetin në vend gjatë transportimit apo asgjësimit të armëve kimike dhe njëkohësisht përbëjnë një kërcënim për demokratizimin e brishtë dhe zhvillimin e Shqipërisë.

Ne jemi të shokuar nga disa media që portretizojnë këtë kërkesë standarde si presion të tepruar nga ana e Shteteve të Bashkuara mbi Shqipërinë dhe një fait accompli, ndaj të cilit qeveria shqiptare është e pafuqishme. Kjo mund të ndikojë negativisht në opinionin publik shqiptarë, në një kohë kur shumë shqiptarë mendojnë se jetët e fëmijëve të tyre mund të jenë në rrezik. Kjo gjithashtu mund të çojë në manipulimin e opinionit publik shqiptar brenda vendit dhe në arenën ndërkombëtare.

Për këto arsye ne ju bëjmë thirrje që të përdorni çdo mundësi për t’iu kundërvënë kësaj tendence në të gjitha takimet me shqiptarët, sidomos gjatë protestave. Ne gjithashtu ju nxisim ju dhe qeverinë shqiptare që të marrë përgjegjësinë e vet dhe të komunikojnë në mënyrë efektive me publikun. Së fundi, është thelbësore që të ritheksojmë aleancën e natyrshme me Shtetet e Bashkuara si një kauzë vlerash dhe traditash të përbashkëta, por edhe në kuadrin e interesave jetike kombëtare për shqiptarët.

Ju falënderojmë paraprakisht për vëmendjen dhe mbesim me shpresë se kërkesa për asgjësimin e armëve kimike në Shqipëri do të refuzohet për të mirën e të gjithëve.

Sinqerisht,

Faton Limani,

Bashkëthemelues, Vizion 21

Shkolla e Qeverisjes Kennedy në Harvard

Faton.Limani@gmail.com

Genti Miho, Bashkëthemelues

Genti.Miho@gmail.com

SHQIPTARET: JO ARMEVE KIMIKE EDHE NE WASHINGTON DC

November 15, 2013 by dgreca

Shkruan: Petraq Pali/

Edhe në Washington DC, shqiptarët që banojnë në këtë komunitet si edhe të ardhur nga Arlingron, Virxhinia, Mariland, megjithe se ishte ditë pune, protestuan përpara Ambasadës shqiptare për t’i thënë: “JO ,JO JO JOOOO importit te Armeve Kimike ne Atdhe!”
Në kujdesin e organizatorëve znj. Aneta Xhiku (Mihali) dhe Znj. Elsa Xhaferi (Pali) që kishin lajmëruar për të dalë në këtë protestë të miratuar nga Autoritetet dhe Qeveria Amerikane.
Në orën 12 .30 u mblodhën para ambasadës dhe të gjithë njëzëri i thanë plot gojën “Jo importit te armeve kimike ne Atdhe.” Njerzit me maska mbrojtëse në fytyrë me flamuj dhe banderola, kënduan Hymnin e Flamurit dhe me pas këngën legjendare: “E dua më shumë Shqipërinë!”
Femijët tanë kishin lënë shkollën dhe morën pjesë në protestë.
Znj Antoneta Xhiku e më pas znj. Elsa Pali, mbajtën fjalën e rastit.
Më pas znj. Pali, intervistoi dhe incizoi të gjithë pjesëmarrësit, një nga një, për të thënë fjalën e tyre reth kesaj ngjarje tragjike për kombin tonë.
Nga punonjësit e Ambasadës nuk pati asnjë lloj impenjimi as denjuan, as doli asnje qoftë dhe për ëe takuar organizatoret.
Mitingu ishte shumë paqesor dhe policia e mbeshteti.
Pwrgatitjen e e banderolave, tw maskave e flamujve e sponsorizuan Skerdi dhe Elsa Pali dhe krye nwn kujdesin e tyre.
Washington DC